Saturday, December 15, 2012

သူပုန်ကျောင်းသားတဦးရဲ့ မာရသွန်ခရီး ၂၈

on May 3, 2012 3:50 pm အောက်မေ့ဖွယ် / ဧရာဝတီ။ 

ဘက်မလိုက် ညီညွတ်ရေးအဖွဲ့နဲ့ လက်နက်ခွဲခြမ်းရေး

ညီညွတ်ရေးဆိုတဲ့ခေါင်းစဉ်ကို တွေ့ကတည်းက မညီမညွတ်ဖြစ်နေကြပြီဆိုတာကို မြန်မာ့နိုင်ငံရေး၊ တော်လှန်ရေးကို လေ့လာဖူးသူတိုင်း သိပြီးဖြစ်မှာပါ။ ရှေ့မှာတင်ပြခဲ့တဲ့အတိုင်း “ငြိမ်းချမ်းစွာကွဲပြဲရေးမူ” အရ ၂၀၁ တပ်ရင်း ၃ ခြမ်းကွဲပြီးတဲ့နောက် မူလနေရာမှာ ဆက်နေတဲ့ ကျနော်တို့အုပ်စုဟာ “ဘက်မလိုက် ညီညွတ်ရေးအဖွဲ့” ဆိုတဲ့ခေါင်းစဉ်နဲ့ စခန်းကော်မတီအသစ်ကို ဖွဲ့လိုက်ပါတယ်။


ကိုမိုးသီးဇွန်နဲ့ ဘက်မလိုက်ကော်မီတီများရဲ့ အစည်းဝေးတခု


 
အရင်ကရှိခဲ့တဲ့ လုပ်ထုံးလုပ်နည်းတွေအတိုင်း ရွေးကောက်ပွဲကော်မရှင်ကိုဖွဲ့၊ ရှေ့တန်း၊ နောက်တန်းရှိ ရဲဘော်တွေရဲ့ မဲဆန္ဒတွေကို ခံယူရပါတယ်။ အဲဒီရွေးချယ်မှုအရ ပေါ်လာတဲ့ စခန်းကော်မတီသစ်မှာ ကျနော်က ဥက္ကဋ္ဌ၊ ကိုမျိုးသိန်း (ရှေ့ပိုင်းမှာဖော်ပြခဲ့တဲ့ တပ်ထောက်အရာရှိ၊ အခုကနေဒါ) က အတွင်းရေးမှူး၊ ဦးဟန်လင်း (ကွယ်လွန်) က စည်းရုံး-ပြန်ကြားတာဝန်ခံ၊ ကိုအောင်မော် (ရေဇင်းစိုက်ပျိုးရေး တက္ကသိုလ်ကျောင်းသား၊ အခု ဖင်လန်နိုင်ငံ) က ဘဏ္ဍာ-ထောက်ပံ့ တာဝန်ခံ ဖြစ်လာပါတယ်။
တပ်မှူးတွေထဲမှာတော့ ရှေ့ပိုင်းမှာတင်ပြခဲ့တဲ့ တပ်ရင်းထောက်လှမ်းရေးမှူး ကိုသောင်းညွန့် (အခုထိ နယ်စပ်မှာရှိနေဆဲ) က တပ်ရင်းမှူး (တပ်ရင်းမှူးဟာ ဖွဲ့စည်းပုံဥပဒေအရ ဒုဥက္ကဋ္ဌ)၊ တပ်ခွဲ ၂ မှူးကိုတင်ထွန်း (ပြန်ဝင်) က ဒုရင်းမှူး (ဒုရင်းမှူးဟာ ဖွဲ့စည်းပုံဥပဒေအရ တွဲဘက်အတွင်းရေးမှူး) ဖြစ်လာပါတယ်။


ရှေ့ပိုင်းမှာတင်ပြခဲ့တဲ့ စခန်းကော်မတီဟောင်းတွေထဲမှ ကိုဇော်မင်း (၁၉၉၃ ရနောင်းဘက်မှာ ပျောက်ဆုံး) က တပ်ရေးဗိုလ်၊ ကိုမင်းဇော်ရွှေ (အခု နယူးဇီလန်) က တပ်ထောက်ဗိုလ်၊ ကိုဌေးလှိုင် (အခုထိ နယ်စပ်မှာရှိနေဆဲ) က တပ်ရင်းအရာခံဗိုလ်တွေ ဖြစ်လာပါတယ်။ တပ်ခွဲမှူးတွေအဖြစ်ကတော့ ပုလောဒေသတပ်ခွဲ ၁ မှူးအဖြစ် ကိုခင်မောင်ချို ခေါ် ဘိုင်လာမန် (အခု အမေရိကန်)၊ ဒုခွဲမှူးအဖြစ် ကိုကျော်သူ (အခု အမေရိကန်)၊ တပ်ခွဲ ၂ မှူးအဖြစ် မူလခွဲမှူးဖြစ်သူ ကိုသိန်းမြင့်ကျော် ခေါ် ဘိုင်သိန်းမြင့် (၁၉၉၇ မှာ ကျဆုံး) ဒုခွဲမှူးအဖြစ် ကိုမင်းဇော်သူ (၁၉၉၃ ရနောင်းဘက်မှာ ကိုဇော်မင်းနဲ့အတူ ပျောက်ဆုံး) တို့ ဖြစ်လာပြီး တပ်ခွဲ ၂ ခွဲနဲ့ ပြန်လည်စုဖွဲ့ခဲ့ပါတယ်။ ဆက်သွယ်ရေး၊ ဆေးနဲ့ ထောက်လှမ်းရေးတပ်ဆွယ် ၃ ခုစလုံး ကျနော်တို့နဲ့အတူ ပါလာတဲ့အတွက် တပ်ဆွယ်တွေကတော့ မူလဖွဲ့စည်းပုံအတိုင်း အပြောင်းလဲ မရှိသလောက်ပါပဲ။

ဒီလိုစုဖွဲ့မှုလုပ်ပြီးတာနဲ့ တပ်ရင်းပိုင်ပစ္စည်းတွေကို ခွဲဝေတာ၊ လှုပ်ရှားမှုနယ်မြေ ခွဲဝေတာတွေကိုလည်း ကျနော်တို့ ဘက်မလိုက်အဖွဲ့နဲ့ ဒေါက်တာ နိုင်အောင်ကို ထောက်ခံတဲ့ ကိုဇော်သန်းတို့၊ ဆရာအောင်မြင့်တို့ အဖွဲ့ကြား ဆက်လုပ်ရပါတယ်။ ပထမဆုံး ခွဲဝေမှုလုပ်ရတာက တပ်ရင်းကွဲချိန်မှာ တပ်ရင်းရုံးနံရံမှာ ချိတ်ထားတဲ့ သေနတ်တွေကိစ္စပါ။ အဲဒီကာလက လက်နက်အတော်များများကို တပ်ရင်းရုံးနံရံမှာ ချိတ်ထားပြီး ကျည်ဘောက်တွေကိုတော့ တနေရာမှာ သီးခြားစီ သိမ်းထားပါတယ်။ နောက်တခါ ခွဲရင်းခြမ်းရင်းနဲ့ ထပ်သိလာရတာကတော့ သေနတ်မောင်းတံထဲက Fire pin ခလုတ်တွေကို တပ်ရင်းအရာခံဗိုလ် ကိုဝင်းအောင်က သီးခြားသိမ်းထားတဲ့အတွက် အကွဲအပြဲကာလအတွင်း မကျေနပ်လို့ အချင်းချင်း ထပစ်ရင်တောင် အဲဒီသေနတ်တွေက ပစ်လို့မရဘူးနိုင်ဆိုတာကို နောက်ပိုင်းမှသိရလို့ ကိုဝင်းအောင်ကို ၀ိုင်းအမှတ်ပေးကြတာကို အမှတ်ရနေပါတယ်။

ဒီလိုလက်နက်ခွဲဝေရာမှာ ကျနော်တို့အချင်းချင်းကြား ညှိမရလို့လား၊ ကြားလူလိုလို့လား၊ ဘာကြောင့်မှန်းတော့ မမှတ်မိတော့ပါ။ KNU တပ်မဟာ ၄ ကနေ ကျောင်းသားရေးရာ တာဝန်ခံအဖြစ် တာဝန်ပေးထားသူ ဆရာမန်းငြိမ်းမောင် (ကိုကိုးကျွန်းကနေ ၁၉၇၀ မှာ ထွက်ပြေးလွတ်မြောက်လာသူ၊ ၂၀၁၁ ခုနှစ်နှောင်းပိုင်းမှာ ဒုတိယအကြိမ်ဖမ်းဆီးခံရပြီး ၂၀၁၂ ခုနှစ် မတ်လနှောင်းပိုင်းကမှ ပြန်လွတ်လာသူ) ဟာ ကျနော်တို့စခန်းဆီ ရောက်လာပြီး လက်နက်ခွဲဝေရေးကိစ္စမှာ ကြားဝင်ဆောင်ရွက်ပေးပါတယ်။ ထုံးစံအတိုင်း သူ့ဖက်က များများရသင့်တယ်၊ ငါ့ဖက်က များများရသင့်တယ်နဲ့ ငြင်းခုန်လိုက်ကြတာ ၃-၄ ရက်ကြာတဲ့အထိ သဘောတူညီမှု မရခဲ့ပါဘူး။ နောက်ဆုံးမှာတော့ ခံစားချက်တွေလျော့ချ၊ အပြန်အလှန် နားလည်မှုတွေရအောင် လုပ်ကြရင်းနဲ့ အချိုးတူခွဲဝေဖို့ သဘောတူလိုက်ပါတယ်။ တပ်ရင်းရုံးရှိ လက်နက်အားလုံးပေါင်းက ၄၀ လောက်ပဲရှိပြီး ကျန်တဲ့လက်နက်တွေ အားလုံးက ရှေ့တန်းတပ်တွေနဲ့ အတူရှိနေတာ ဖြစ်ပါတယ်။

အဲဒီရှေ့တန်းတပ်တွေထဲက ကိုကျော်ရတို့ ပင်လယ်ပြင်အုပ်စုနဲ့အတူ ရှိနေတဲ့ လက်နက်အားလုံးကို ကိုမိုးသီးဇွန်တို့ အဖွဲ့ပိုင်အဖြစ် သဘောတူလိုက်ပါတယ်။ အလားတူ နတ်အိမ်တောင်အခြေစိုက် ဘိုင်သိန်းမြင့်ရဲ့ တပ်ခွဲ ၂ တခုလုံးကလည်း ဘက်မလိုက်ကို ထောက်ခံတဲ့အတွက် အဲဒီကလက်နက် အားလုံးကိုလည်း ဘက်မလိုက်အဖွဲ့ပိုင်အဖြစ် သတ်မှတ်ပေးလိုက်ပါတယ်။ ပပြင်ဒေသအခြေစိုက် ကိုပြည်ဆောင်ဦးတို့ရဲ့ တပ်ခွဲ ၁ မှ တပ်စု ၂ စုက ကိုနိုင်အောင်တို့ဖက် ထောက်ခံပြီး တစုက ဘက်မလိုက်ကို ထောက်ခံတဲ့အတွက် ထောက်ခံတဲ့လူနဲ့ ပါသွားတဲ့ လက်နက်စာရင်းအတိုင်း အတည်ပြုလိုက်ပါတယ်။ အလားတူ ကိုဘုန်းကျော် ဦးဆောင်တဲ့ ဘန်းချောင်းဒေသ တပ်ခွဲ ၃ မှာလည်း ၂ စုက ကိုနိုင်အောင်တို့ဖက်ကို ထောက်ခံပြီး တစုက ဘက်မလိုက်ကို ထောက်ခံတဲ့အတွက် လူနဲ့အတူပါသွားတဲ့ လက်နက်စာရင်းအတိုင်း အတည်ပြုလိုက်ပါတယ်။ လက်နက်နဲ့ နယ်မြေခွဲဝေမှု ညှိနှိုင်းရတာ ဘယ်လောက်အထိ လက်ဝင်သလဲဆိုတာကိုတော့ တောထဲမှာ နေဖူးသူတွေမှ ပိုနားလည်နိုင်မယ်လို့ ထင်မိပါတယ်။

တပ်ရင်းမကွဲမှီတွေ့ရတဲ့ ခွပ်ဒေါင်းနှစ်ကောင် မျက်နှာချင်းဆိုင် ABSDF ဆိုင်းဘုတ်

 ထူးခြားဆန်းကြယ်သော တရားစီရင်ခန်း

ကျနော်တို့ ဘက်မလိုက်အဖွဲ့နဲ့ ဒေါက်တာနိုင်အောင်တို့အဖွဲ့ကြားမှာ လက်နက်နဲ့ နယ်မြေလို အရေးကြီး တဲ့ ခွဲဝေမှုကိစ္စအပြင် အရက်ပုလင်း ၃၃-လုံး ခွဲဝေရေးကိစ္စလဲပါတယ်ဆိုရင် စာဖတ်ပရိတ် သတ်ယုံ ပါ့မလား။ ဖြစ်ပုံကတော့ ကျနော်တို့စခန်းပိုင် စက်လှေဟာ တပ်ဖွဲ့ဝင်တွေကို ရှေ့တန်းပို့ပြီး အပြန်မှာ လှေသမားတွေနဲနဲပါးပါး ငွေကြေးအဆင်ပြေစေရေးအတွက် ပစ္စည်းအနဲအကျဉ်းသယ်ယူပီး နောက် တန်းနဲ့ KNU ရွာတွေဆီမှာပြန်ရောင်းတာမျိုးကို ကော်မီတီက နားလည်မှုပေးထားပါတယ်။ ဒါပေမဲ့ ပြသာနာကဖြစ်ချင်တော့ တပ်ရင်းကွဲခါနီးအခေါက်မှာ ဘန်းချောင်းနဲ့ မေတ္တာဖက်ကနေပြန်လာတဲ့ တပ် ရင်းလှေဟာ အယင်လိုစားစရာတွေသယ်လာတာမဟုတ်ဘဲ ၃-ဆနီးပါးအမြတ်ရနိုင်တဲ့ Army Rum ပုလင်း ၃၃-လုံး ကိုသယ်လာပါတယ်။ အယင်ကဆိုရင်တော့ ဒီသတင်းကို စခန်းကော်မီတီက မသိဘဲ ဒိုင်ရှို လုပ်ကောင်းလုပ်ထားနိုင်မှာဖြစ်ပေမဲ့ အခုတော့ သူတို့လှေ ပြန်ရောက်ချိန်မှာ စခန်းကလဲ ကွဲနေ တော့ ဒီ ပုလင်းတွေအကြာင်းကို အားလုံးသိကုန်ပီး အဲဒီလှေသမား ၂-ဦးကို လုံခြုံရေးတပ်ဖွဲ့က ဖမ်းဆီး အချုပ် ထဲထည့်၊ အရက် ပုလင်း ၃၃-လုံးကိုလဲ သက်သေခံပစ္စည်းအဖြစ်သေတ္တာထဲ ထည့်သိမ်း ထား လိုက်ပါ တယ်။

ကံက ထပ်ဆိုးချင်တော့ စခန်းကွဲတဲ့အချိန်မှာ အဲဒီဖမ်းဆီးခံလှေသမား ၂-ဦးစလုံးက ကျနော်တို့ ဘက်မလိုက်အဖွဲ့ကိုထောက်ခဲ့တဲ့အထဲပါလာတဲ့အတွက် ဒီအမှုကို ကျနော်တို့ ကော်မီတီသစ်က တာဝန် ယူ လိုက်ရပါတယ်။ ဒီလှေသမား ၂-ဦးဟာ အရက်သေစာသယ်ယူခြင်းဖြင့် တော်လှန်ရေးရဲ့ ဂုဏ် သိက္ဒာကို ထိခိုက်အောင် လုပ်ခြင်းဖြစ်တယ်လို့မှတ်ချက်ချပီး သူတို့ ၂-ဦးကို တပ်ဖွဲ့ဝင် အဖြစ်ကနေ ထုတ်ပယ်ကြောင်း ကော်မီတီသစ်က ဆုံးဖြတ်ချက်ချလိုက်ပါတယ်။ ဒါဟာ အကွဲအပြဲ ကာလအတွင်း အပြင်းထန်ဆုံးနဲ့ ပထမဆုံးပြစ်ဒဏ်ဖြစ်တာကြောင့် ဘက်အသီးသီးက ဒါကို လက်ညိုးထိုးပီး ပြစ်ဒဏ် နဲ့ ပြစ်မှုမမျှဘူး။ ဒါဟာ တရားဥပဒေစိုးမိုးရေးအပေါ် နိုင်ငံရေးအယူအဆက လွမ်းမိုးလိုက်တာဖြစ်တယ် ဆိုပီး ကျနော်တို့ကော်မီတီကို ၀ိုင်းဝေဖန်ကြပါတယ်။ ကျနော်တို့ကတော့ ဒီဝေဖန်ချက်ကို လက်မခံဘဲ ဆုံးဖြတ် ချက်မပြင်နိုင်ဘူး။ ဒါပေမဲ့ တပ်ရင်းညီလာခံမှာ အယူခံဝင်နိုင်တယ်ဆိုပီး ဒီကိစ္စကိုအဆုံး သတ် လိုက်ပါ တယ်။

အဲ...လှေသမား ၂-ဦးကို ဒီလိုအပြစ်ပေးပီးတဲ့အခါမှာတော့ သူတို့သယ်လာတဲ့ အရက်ပုလင်း ၃၃-လုံးကို တပ်ရင်းရုံးရှေ့ လူမြင်ကွင်းမှာ စံပြ အနေနဲ့ ရိုက်ခွဲပစ်မယ်ဆိုပီး ကျနော်ကအဆိုပြုလိုက်ပါတယ်။ ဒါပေမဲ့ ဘန်ဒါရေးတာဝန်ခံနဲ့ တပ်ထောက်အရာရှိတို့ကနေ အရက်တလုံးကို ဘတ် ၁၀၀-လောက်တန် တဲ့အတွက် ဒီလိုလုပ်ရင် ဘတ် ၃၀၀၀-ထောင်ကျော်ကို အလားကားဖြုန်းတီးရာရောက်မယ်။ ဒီ ဘတ် ၃၀၀၀-ဟာ ရဲဘော် ၂၀၀-ခန့်အတွက် တလစာရိက္ခာဖိုးရတယ်ဆိုပီး အချက်လက်နဲ့ တင်ပြလာပါတယ်။ နောက်ဆုံးမှာတော့ အများသဘောတူညီချက်အရ ဒီပုလင်းတွေကို မရိုက်ခွဲ တော့ဘဲ တပ်ရင်းရံပုံငွေရ အောင် ပြန်ရောင်းချမယ်လို့ဆုံးဖြတ်လိုက်ပါတယ်။

အဲဒီလိုဆုံးဖြတ်ပီးကာမှ မထင်မှတ်တဲ့ပြသာနာက စတော့တာပါဘဲ့။ ၉-ရက်ကြာဆွေးနွေးပွဲကနေ အခု စခန်းကော်မီတီအသစ်ပေါ်ပီး သတင်း ၂-ပါတ်ကျော်ကြာတဲ့အထိ အကွဲအပြဲတွေနဲ့အလုပ်ရှုပ်နေလို့ အဲဒီပုလင်း ၃၃-လုံးကို ဘယ်သူကမှ အသေချာမစစ်ဆေးရသေးပါဘူး။ သစ်သားတန်းလေးနဲ့ လုပ် ထားတဲ့ လက်လုပ်ဘီဒိုထဲမှာ အဲဒီ ၃၃-လုံးကို ပါကင်ပိတ် အတိုင်းမြင်နေရလို့ ဘီဒိုကို သော့ဖွင့်ပီး တခါမှမစစ်ဆေးမိပါ။ အခု ရောင်းမယ်ဆိုပီး ပုလင်းတွေကို ရုံးပေါ်ယူလာတော့မှ... "ဟေး မင်းတို့ပုလင်း တွေက အရက်ဟုတ်ရဲ့လား။ အထဲမှာ လဖက်ခြောက်ဖတ်တွေလားမသိဘူး" ဆိုပီး အရက်အကြောင်း အတွေ့အကြုံရှိတဲ့ ကော်မီတယောက်က ထအော်ပါတယ်။ ဒီတော့မှ ကျန်တဲ့လူတွေလဲ ပုလင်းတွေကို အသေချာကိုယ်တွယ်စစ်ဆေးကြပါတယ်။ ဒီလို စစ်တော့မှ ၃၃-လုံးမှာ ၁၀-လုံးလောက်က ရေနွေးကြမ်း တွေ ဖြစ်နေပါရော့လား။ မောင်ကျိုးဖိုးတွေများကျွမ်းကျင်မှုကတော့ လက်ဖျားခါလောက်ပါရဲ့။ အပူပေး ထားတဲ့အပ်နဲ့ ပုလင်းဖင်အောက်ကနေ အရက်ကိုစုတ်ထုပ်ပီး ရေနွေးတွေကိုပြန်ထည့်ထားပါသတဲ့။ ဒီတော့ အပေါ်က ပါကင်ကနေရာဘာမှ မယွင်းဘဲ အထဲမှာ ရေနွေးတွေ ရောက်နေတာပေါ့။

နောက်ဆုံးမှာတော့ တပ်ရင်းအကွဲအပြဲငြင်းခုံနေစဉ် သတင်း ၂-ပတ်ကျော် ကာလတလျောက်လုံး ဒီအရက်ပုလင်းတွေ သိမ်းဆည်းရာ တပ်ရင်းရုံးဘေးက အဆောင်လေးမှာနေထိုင်တဲ့ ဒုရင်းမှုးဆရာ အောင်မြင့်နဲ့ ကော်မီတီဝင် ကိုညဏ်စိုးတို့ဆီ အားလုံးကလက်ညိုးထိုးပါတော့တယ်။ ဒီတော့မှ ညဏ် ကြီးရှင် ကိုညဏ်စိုးက ထွက်လာပီး ပုလင်းထဲကအရက်တွေကို လက်ရာမယွင်းစေဘဲ သိပ္ပံနည်းကျ ထုတ်ယူနည်းအဆင့်ဆင့်ကို ရှင်းပြတော့ပါတယ်။ ဒီလိုနဲ့ ကျနော်တို့ရဲ့ အရက် ၃၃-လုံးခွဲဝေရေး မဟော သဓာ တရားစီရင်ခန်းလဲ တခန်းရပ်ပီး စခန်းတခုလုံး တ၀ါးဝါး-တဟားဟားနဲ့ ရည်မောခဲ့ကြဖူးတာကို ကျနော် အမှတ်ရနေပါတယ်။



တပ်ရင်းကွဲပြီးနောက် မျက်နှာချင်းဆိုင်ခွပ်ဒေါင်းကိုပြန်ပြင်ထားတဲ့ဆိုင်းဘုတ်သစ်

ခွပ်ဒေါင်းယတြာ

တောထဲမှာကြုံခဲ့ရတဲ့အဖြစ်အပျက်အများစုဟာ စိတ်ညစ်စရာတွေဖြစ်ပေမဲ့ လူတွေဟာ စိတ်ညစ်စရာ ကို သိပ်မမှတ်မိဘဲ ရည်စရာတွေကိုဘဲ့မှတ်မိနေတတ်သလားတော့မပြောတတ်ပါ။ အဲဒီအကွဲ အပြဲ ကာ လ ကျနော်မှတ်မိနေတဲ့ နောက်ထပ်ရည်စရာတခုကတော့ ခွပ်ဒေါင်း-ယာတြာဖြစ်ပါတယ်။ တပ်ရင်း ဆိုင်းဘုတ်မှာ ခွပ်ဒေါင်း ၂-ကောင်ကို မျက်နှာချင်းဆိုင်ဆွဲထားလို့ အချင်းချင်းခွပ်ကြတာ။ ကျောင်းသား စခန်းဆီ ခွပ်ဒေါင်းအရှင်ကိုသယ်လာပီး လာရောင်းလို့ ခွပ်ဒေါင်းတွေ ပြသာနာတက်တာ ဆိုတဲ့ ယတြာ ဆန်ဆန် ဖြစ်စဉ်တခုလဲ ကျနော်တို့စခန်းမှာဖြစ်ပွါးခဲ့ပါသေးတယ်။

ရှေ့အခန်းမှာဖေါ်ပြခဲ့တဲ့အတိုင်း အများသွားတောင်ကြားလမ်းထိပ်မှာ စိုက်ထူထားတဲ့ တပ်ရင်း ဆိုင်း ဘုတ်ကို စာဖတ်သူ အသေချာကြည့်မယ်ဆိုရင် ခွပ်ဒေါင်း ၂-ကောင်ဟာ ဘုန်းကြီးကျောင်းဝက ခြင်္သေ့ နှစ်ကောင်လို မျက်နှာချင်းဖြစ်နေတာကို တွေ့ရနိုင်ပါတယ်။ ဒီအတွက် ဆိုင်းဘုတ်ဆွဲတဲ့ ဒုရင်းမှုး ဆရာ အောင်မြင့်ဆီ စွဲချက်ကရောက်လာပါလေရော။ "ဆရာ ခွပ်ဒေါင်းပုံအဆွဲကောင်းလို့ ခွပ်ဒေါင်းတွေ အ ချင်းချင်း ခွပ်ကုန်ကြပြီ" ဆိုပြီး အားလုံးက ဆရာ့ကို ၀ိုင်းစကြပါတယ်။ ဒီလို စတာကို မခံနိုင်တဲ့ ဆရာ အောင်မြင့်ကလဲ အဲဒီဆိုင်းဘုတ်ကြီးကို ချက်ချင်းဖြုတ်ချပီး ခွပ်ဒေါင်း ၂-ကောင်ကိုပြန်ဖျက်။ ABSDF အမည်နဲ့ တပ်ရင်း နံပတ်လောက်ကိုဘဲ့ ချန်ပြီး ပြန်ပြင်လိုက်ပါတယ်။

ဆိုင်းဘုတ်တွေနဲ့ပါတ်သက်ပြီး သတိရသလောက်ဆက်ပြောရမယ်ဆိုရင် အဲဒီကာလက ကျနော်တို့ ကျောင်းသားတွေဟာ ဘာလုပ်လုပ် ဆိုင်းဘုတ်တင်တာကို အယင်ဆုံးလုပ်လေ့ရှိပါတယ်။ တပ်ရင်း အ၀င်ဝ ဆိုင်းဘုတ်၊ တပ်ရင်းရုံးဆိုင်းဘုတ်၊ စာကြည့်တိုက်ဆိုင်းဘုတ်၊ စာသင်ကျောင်းဆိုင်းဘုတ်၊ ဆေး ခန်းဆိုင်းဘုတ်၊ မွေးမြူရေးခြံဆိုင်းဘုတ်၊ ယုတ်စွအဆုံး စိုက်ခင်းထဲမှာ ဘာအပင်မှမစိုက်သေးခင် ''တပ်ရင်း စိုက်ပျိုးရေးခြံ" ဆိုတဲ့ ဆိုင်းဘုတ်ကို အယင်ဆုံး စိုက်တဲ့ခေတ်ပါ။ ဒီလိုနဲ့ စခန်းမှာ အထိုင် များတဲ့၊ စိတ်ရှည်သီးခံပြီး အားလုံးနဲ့တည့်အောင်ပေါင်းတတ်တဲ့ ဒုရင်းမှုးဆရာအောင်မြင့်ဟာ "ဆိုင်း ဘုတ် ရေးတဲ့ ပန်းချီဆရာ" အဖြစ် အုန်းပင်တက်လက်မှတ်ရခဲ့ပေါ့။

ဆရာအောင်မြင့်ရဲ့ ဒေါင်းရုပ် ယာတြာကနေ ဒေါင်းအရှင် ဇါတ်လမ်းအကြောင်းကိုဆက်ရမယ်ဆိုရင် ကျနော်တို့ဘက်မလိုက်အဖွဲ့ဆီပါလာတဲ့ တပ်မှုးတဦးနဲ့ ဆွေမျိုးတော်စပ်သူတဦးဟာ မြန်မာနိုင်ငံက ရှား ပါးတိရိစ္ဆန်တွေကိုသယ်ပြီး ထိုင်းမှာထွက်ရောင်းဖို့အတွက် ကျနော်တို့စခန်းဆီ ခေတ္တာရောက်နေပါ တယ်။ ကံဆိုးပြီး တိုက်ဆိုက်မှုဖြစ်ချင်တော့ သူ ကျနော့်တို့ဆီမှာ အဲဒီလိုခေတ္တာတည်းခိုနေတဲ့ အချိန် ဟာ ကျနော်တို့ တပ်ရင်းကွဲတဲ့အချိန်နဲ့ ကွက်တိဖြစ်နေပါတယ်။ ကံကထပ်ဆိုးချင်တော့ သူသယ်လာ တဲ့ရှား ပါးတိရိစ္ဆန်တွေက ဒေါင်းတွေချည်းဖြစ်နေပြန်ပါတယ်။

"ခင်ဗျားဗျာ၊ ကျောင်းသားစခန်းဆီလာပီး ခွပ်ဒေါင်းတွေလာရောင်းရတယ်လို့" ဆိုပီး သူ့ကို ကျနော်တို့ ၀ိုင်းစကြတာကို ကျနော်မှတ်မိနေဆဲဖြစ်ပါတယ်။


နတ်အိမ်တောင်တိုက်ပွဲနဲ့ အိမ်နီးချင်းတပ်ရင်းများ

ဒီလို အကွဲအပြဲကိစ္စ၊ နယ်မြေခွဲဝေရေးကိစ္စ၊ လက်နက်ခွဲဝေးရေးကိစ္စတွေနဲ့ ကျနော်တို့ အကြီးအကျယ် ငြင်းခုန်လို့ကောင်းတုန်း ၁၉၉၁ ဒီဇင်ဘာ ဒုတိယ သတင်းပတ်ထဲမှာ အရေးပေါ်သတင်းတခု ၀င်လာပါတယ်။ အဲဒါကတော့ ကျနော်တို့ ဘက်မလိုက်အဖွဲ့ရဲ့ နယ်မြေထဲမှာပါတဲ့ တပ်ခွဲ ၂ အခြေစိုက်ရာ နတ်အိမ်တောင်စခန်းကို န၀တတပ်တွေက ထိုးစစ်ဆင်ဖို့ စစ်ကြောင်းတွေ တက်လာနေပြီဆိုတဲ့သတင်းပါ။


ဒု တပ်ရင်းမှူး ကိုတင်ထွန်းအပါဝင် တပ်ခွဲ ၂ မှ ရဲဘော်တချို့နဲ့ KNU တပ်ဖွဲ့ဝင်တချို့ကို နတ်အိမ်တောင် တောင်ထိပ်က ဆွေးနွေးပွဲတခုတွင် တွေ့ရစဉ်
ဒါကြောင့် ငြင်းခုန်မှုတွေကို ခေတ္တဆိုင်းငံ့ပြီး စစ်ပွဲကိစ္စအတွက် အရေးပေါ်ပြင်ဆင်ရပါတယ်။ နတ်အိမ်တောင်စခန်းကနေ အကွဲအပြဲ အစည်းဝေးအတွက် တပ်ရင်းဆီရောက်နေတဲ့ (ဒုရင်းမှူးဖြစ်သွားသူ) တပ်ခွဲမှူး ကိုတင်ထွန်း၊ နောက် ကော်မတီဝင် ဦးဟန်လင်းနဲ့ ရဲဘော်တချို့ကို နတ်အိမ်တောင်ဒေသဆီ ထိုင်းနိုင်ငံဖြတ် ကားလမ်းကနေ အမြန်ပြန်ပို့ရပါတယ်။ နောက်တခါ အဲဒီအချိန်မှာ ၁၀၁ တပ်ရင်းနဲ့ ၁၀၂ တပ်ရင်းတွေလည်း နတ်အိမ်တောင်အနီးက ပြည်သိမ်းစခန်း (အရင် ရဲဘော်သုံးကျိပ်ဝင် ဗိုလ်ရန်နိုင် ဦးဆောင်တဲ့ ပြည်ချစ်တပ်မတော် တောင်ပိုင်းတိုင်း စစ်ဌာနချုပ်စခန်းဟောင်း) ၀န်းကျင်မှာ ရောက်နေပြီဖြစ်တဲ့အတွက် အဲဒီတပ်တွေနဲ့ ပူးတွဲဆောင်ရွက်ဖို့ ကိစ္စတွေကိုလည်း တခါတည်း တာဝန်ပေးလိုက်ပါတယ်။

ကျနော်တို့တပ်ရင်းရဲ့ မြောက်ဘက် အိမ်နီးချင်း (တောင်ဘက် အိမ်နီးချင်းကတော့ ၂၀၃ တပ်ရင်း ဖြစ်ပါတယ်) တပ်ရင်းတွေဖြစ်တဲ့ ၁၀၁ နဲ့ ၁၀၂ တပ်ရင်း နှစ်ခုအကြောင်းကို အကျဉ်းရုံးပြောရမယ် ဆိုရင် ၁၉၉၀ ဖေဖော်ဝါရီ ဒုတိယ သတင်းပတ်မှာ န၀တတပ်တွေက ဘုရားသုံးဆူဒေသကို သိမ်းလိုက်တဲ့အတွက် အဲဒီနေရာကနေ သူတို့တပ်ရင်းတွေ ဆုတ်ပေးလိုက်ရပါတယ်။ အဲဒီနောက်မှာတော့ ၁၀၁၊ ၁၀၂၊ PDF (ပြည်သူ့ကာကွယ်ရေး တပ်ဖွဲ့) တို့ဟာ မွန်ပြည်သစ်ပါတီ တပ်တွေနဲ့ ပူးပေါင်းပြီး အထူးစစ်ကြောင်းတခုကို ဖွဲ့စည်းလိုက်ကြောင်း၊ ပြီးတော့ ၁၉၉၀ မတ်လ ၂၂ ရက်နေ့မှာတော့ ကျောင်းသားတော်လှန်ရေးသမိုင်းမှာ ထင်ရှားတဲ့ “ရေးတိုက်ပွဲ” ကို ဆင်နွှဲခဲ့ကြောင်း ၁၀၁ နဲ့ ၁၀၂ မှ ရဲဘော်တချို့က ကျနော့်ကို ပြောပြခဲ့ပါတယ်။

“ရေးတိုက်ပွဲ” အပြီးမှာတော့ တပ်တွေအားလုံးကို ပြန်စုပြီး “ကလိန်ကန်” ဘက်မှာ စခန်းချနေထိုင်ခဲ့ကြောင်း။ အဲဒီကတဆင့် ၁၉၉၁ အစောပိုင်းမှာ မွန်နယ်မြေကနေထွက်ပြီး ကျနော်တို့ ၂၀၁ တပ်ရင်း တပ်ခွဲ ၂ ရှိရာ နတ်အိမ်တောင် ဒေသဘက်ဆီ ထွက်လာတာဖြစ်ကြောင်း၊ အဲဒီနောက် ပြည်သိမ်းစခန်းဝန်းကျင်ဆီ ရောက်လာပြီး ၁၀၂ က ဘိုမတောင်၊ ၁၀၁ က ဆင်မတောင်တွေမှာ တပ်တည်ချထားခဲ့တယ်လို့ ၁၀၁၊ ၁၀၂ ရဲဘော်တချို့က အခုဆောင်းပါးရေးဖို့ မေးမြန်းစဉ်အတွင်း ကျနော်ကို ပြောပြခဲ့ပါတယ်။

တကယ်တမ်း ပြောမယ်ဆိုရင်တော့ အကွဲအပြဲသဘောအရဆိုရင် ကျနော်တို့ ၂၀၁ တပ်ရင်း၊ တပ်ခွဲ ၂ က ဘက်မလိုက်၊ ၁၀၁ က ကိုနိုင်အောင်တို့ဘက်၊ ၁၀၂ က ကိုမိုးသီးဇွန်တို့ဘက် ဖြစ်နေတဲ့အတွက် နိုင်ငံရေးအမြင်အရ ဘာမှမဆိုင်သလို ဖြစ်နေခဲ့ပါတယ်။ ဒါပေမယ့် တကယ့်စစ်ပွဲ ဖြစ်တဲ့အခါမှာတော့ မတူတဲ့ တပ်ရင်း ၃ ရင်းက ကျောင်းသားအားလုံး အတူတကွ လက်တွဲပြီး စည်းလုံးညီညွတ်စွာနဲ့ န၀တတပ်တွေကို ရင်ဆိုင်ခဲ့တာကို တွေ့ရပါတယ်။ အဲဒီကာလ နတ်အိမ်တောင်ဒေသတာဝန်ခံ KNU တပ်ရင်း ၁၀ ရဲ့တပ်ခွဲ ၂ မှူးက ဗိုလ်လှချော (ကွယ်လွန်) ဖြစ်ပါတယ်။ တိုက်ပွဲကာလအတွင်း တာဝန်ယူကြတဲ့ တောင်ကုန်းတွေကတော့ ၂၀၁ တပ်ရင်းက ကျောင်းသားကုန်း၊ ၁၀၁ က အလံတိုင်ကုန်း၊ ၁၀၂ က  ၀၁ ကုန်းတို့ ဖြစ်ပါတယ်။

ပုံမှန်အားဖြင့်ဆိုရင်တော့ န၀တစစ်ကြောင်းတွေဟာ နယ်မြေရှင်းတဲ့သဘောနဲ့ နတ်အိမ်တောင် တောင်ခြေရင်းအထိ တာဝန်ကျစစ်ကြောင်း ထိုးလေ့ရှိပြီး တပတ်လောက်ကြာရင် ပြန်ဆုတ်သွားလေ့ရှိပါတယ်။ ဒါပေမယ့် ကျနော်တို့ ကြိုမသိလိုက်တဲ့ အချက်ကတော့ ဒီတခါ စစ်ဆင်ရေးဟာ အရင်လို ပုံမှန်နယ်မြေရှင်းတဲ့ စစ်ဆင်ရေးမဟုတ်ဘဲ နတ်အိမ်တောင်စခန်းကို အခြေစိုက်ပြီး ရတနာ ဓာတ်ငွေ့ပိုက်လိုင်း ဖောက်ဖို့ စီမံကိန်းအတွက် ဖြစ်တယ်။ ဒီဒေသတခုလုံးကို ရှင်းပြီး ဓါတ်ငွေ့ပိုက်လိုင်းဖောက်ဖို့ န၀တ၊ ထိုင်းနဲ့ နိုင်ငံတကာကုမ္ပဏီတွေ သဘောတူညီချက် ယူထားပြီးပြီဆိုတဲ့အချက် ဖြစ်ပါတယ်။

ဆိုလိုတာကတော့ ကျနော်တို့ ကျောင်းသားတပ်ရင်း ၃ ခုနဲ့ KNU တပ်တွေ ဘယ်လိုပဲ ခုခံပါစေ၊ န၀တက နတ်အိမ်တောင်ကို မရမချင်း သိမ်းမယ့်စီမံကိန်း ရှိပြီးသားဖြစ်တဲ့အတွက် ၁၉၉၁ ဒီဇင်ဘာလ ၁၈ ရက်နေ့မှာ စခန်းကျသွားပါတယ်။ ဒီတိုက်ပွဲအတွင်း KNU မှတဦး၊ ၁၀၁ တပ်ရင်းမှ ၂ ဦးကျဆုံးပြီး တချို့ဒဏ်ရာရခဲ့ပါတယ်။ ၁၀၁ က ကျဆုံးသွားသူ ရဲဘော် ၂ ဦးရဲ့အမည်ကတော့ တပ်ကြပ် ကိုယုကြည်နဲ့ တပ်သား ကိုမောင်စိုးတို့ ဖြစ်တယ်လို့ သိရပါတယ်။ ကျနော်တို့ ၂၀၁ မှ ရဲဘော်တချို့၊ ၁၀၂ မှ ရဲဘော်တချို့ ဒဏ်ရာရခဲ့ပေမယ့် သိပ်မပြင်းထန်ဘူးလို့ သိရပါတယ်။ အဲဒီနောက်ပိုင်းမှာတော့ KNU နဲ့ ကျနော်တို့ ABSDF တပ်တွေဟာ နတ်အိမ်တောင်စခန်းကနေ ခွာစစ်ဆင်ပြီး လေးအိမ်စုဆိုတဲ့ နတ်အိမ်တောင် အောက်ဖက် ၃ မိုင်ခန့်အကွာ နယ်စပ်စခန်းမှာ ပြန်လည်အခြေစိုက် လှုပ်ရှားခဲ့ပါတယ်။

ရာဇ၀င်ထဲက နတ်အိမ်တောင်

တကယ်တမ်း ပြောမယ်ဆိုရင်တော့ နတ်အိမ်တောင်စခန်းဆိုတာဟာ နယ်စပ်ဒေသနဲ့ပတ်သက်ပြီး တောမခိုခင် ကျနော်သိတဲ့ တခုတည်းသောနေရာ ဖြစ်ပါတယ်။ မြန်မာပြည်မြေပုံကို ကြည့်လိုက်မယ်ဆိုရင် အရှေ့-အနောက် အကျဉ်းမြောင်းဆုံး မိုင် ၃၀ ၀န်းကျင်သာရှိတဲ့နေရာဟာ နတ်အိမ်တောင်စခန်းရှိတဲ့နေရာ ဖြစ်ပါတယ်။ ဒီစခန်းဟာ ကျနော်တို့ထားဝယ်ဒေသရဲ့ အဓိကမှောင်ခိုလမ်းကြောင်း ဖြစ်တဲ့အပြင် ပြည်ချစ်တပ်နဲ့ ကော်သူးလေတပ်တွေ ရှိတဲ့နေရာအဖြစ် ကျနော် အလယ်တန်းကျောင်းသားဘ၀ကတည်းက ကြားဖူးခဲ့ပါတယ်။ ဒါပေမယ့် နတ်အိမ်တောင်စခန်းဆီ ကျနော် တကယ်ရောက်ဖူးတဲ့အချိန်ကတော့ ၁၉၉၀ မေလ ရွေးကောက်ပွဲမတိုင်ခင် ကာလကျမှဖြစ်ပါတယ်။


၁၀၁ ဥက္ကဋ္ဌ ကိုတင်စိုးနောင်နဲ့ ၁၀၂ ဥက္ကဋ္ဌ ကိုသီရိညွန့်တို့ကို နတ်အိမ်တောင်နယ်စပ် မှတ်တိုင်အနီး တွေ့ရစဉ်
ရွေးကောက်ပွဲမတိုင်မီ နယ်စပ်ရောက် ကျောင်းသားတွေကို ပြန်ခေါ်ရမယ်ဆိုပြီး မိသားစုတွေကို အစိုးရက ဖိအားပေးတဲ့အတွက် ကျနော့်ရွာက သူငယ်ချင်းတဦး နတ်အိမ်တောင်စခန်းအထိ ရောက်လာပြီး ကျနော့်ကို လာခေါ်တဲ့အတွက် အဲဒီလူနဲ့တွေ့ဖို့ မင်းသမီးကနေ နတ်အိမ်တောင်စခန်းဆီ ရောက်လာတာဖြစ်ပါတယ်။ တခြားကျောင်းသားတွေကိုလည်း အလားတူ လာခေါ်ခိုင်းတာ တွေ့ရပေမယ့် ပြန်လိုက်သွားတဲ့လူတော့ မတွေ့မိပါဘူး။

အဲဒီလို မိသားစုကိစ္စ၊ ပုဂ္ဂိုလ်ရေးကိစ္စတွေကို ဆွေးနွေးပြီးနောက်မှာတော့ နတ်အိမ်တောင်စခန်းကို ကျနော် လေ့လာခွင့်ရခဲ့ပါတယ်။ နတ်အိမ်တောင်ဟာ ကျနော်တို့ မင်းသမီးဒေသနဲ့ ရာသီဥတုမတူဘဲ တောင်ပေါ်မြို့လေးတခုလို အေးစိမ့်စိမ့်လေး၊ မြူနှင်းဝေေ၀လေး ဖြစ်နေပါတယ်။ ဒီဒေသအတွင်း အမြင့်ဆုံးတောင်တန်း ဖြစ်တဲ့အတွက် ကလိန်အောင်၊ ကံပေါက်နဲ့ ထားဝယ်ဘက်ကို အပေါ်စီးကနေ လှမ်းမြင်ရတဲ့ရှုခင်းက အတော်လှပါတယ်။ ကျနော်ရောက်ဖူးခဲ့သမျှ နယ်စပ်စခန်းတွေထဲမှာတော့ အလှပဆုံးနဲ့ ဆက်သွယ်ရေး အလွယ်ကူဆုံးစခန်းတခုဖြစ်ပြီး အပန်းဖြေစခန်းတောင် ဆောက်သင့်တဲ့နေရာလို့ ထင်မိပါတယ်။

သဘာဝအလှအပြင် စီးပွားရေးအခြေနေကို ပြောရမယ်ဆိုရင်တော့ ရှေ့မှာပြောခဲ့တဲ့ ကျနော်တို့ ၂၀၁ တပ်ရင်း၊ ခွဲ ၂ ဘားတိုက်ရှိရာ ကျောင်းသားကုန်းနဲ့ အလံတိုင်ကုန်းကြားမှာ မြန်မာနိုင်ငံထဲဆင်းတဲ့ လူသွားလမ်းလေး (အခုတော့ ဒီလမ်းဟာ ရတနာသဘာဝဓာတ်ငွေ့ ပိုက်လိုင်းသွယ်တန်းတဲ့ လမ်းကြောင်းဖြစ်သွားခဲ့ပါပြီ) ရှိပြီး အဲဒီလမ်းထိပ်မှာ KNU အကောက်ဂိတ်၊ သို့မဟုတ် ဒေသအခေါ် မှောင်ခိုဂိတ် ရှိပါတယ်။ ဒီဂိတ်ဟာ တနေကုန် စည်ကားနေပြီး ကုန်သည်အတက်အဆင်းတွေနဲ့ ရှုပ်ရှက်ခတ်နေပါတယ်။ မြန်မာပြည်ဘက်က တက်လာသူအများစုဟာ နွားတွေ၊ ကျွဲတွေကို သယ်လာသူတွေဖြစ်ပြီး ထိုင်းဘက်က အပြန်မှာတော့ စက်ဘီးတွေ၊ ကားပစ္စည်းတွေ၊ အချိုမှုန့်အပါဝင် ထိုင်းထွက် စားသောက်ကုန်တွေကို ကျောပိုးခြင်းတောင်းတွေနဲ့ ပြန်သည်သွားတာကို တွေ့ရပါတယ်။

ကျောင်းသားစခန်းရဲ့ နောက်ကျောမှာတော့ ကျောက်ပုံရွာဆိုတဲ့ အိမ်ခြေ ၃၀ ခန့်ရှိ နယ်စပ်ရွာလေးရှိပါတယ်။ အဲဒီမှာ ကျနော်တို့တပ်ခွဲက မိသားစုတချို့နေပြီး အများစုကတော့ ကုန်သည်တွေဖြစ်ပါတယ်။ အဲဒီရွာအလွန်မှာ ထိုင်းနယ်ခြားစောင့်ဂိတ်ရှိပြီး အဲဒီဂိတ်နောက်မှာတော့ ဦးပဇ္ဈင်း ဖေကြည်ကျောင်းလို့ ကျောင်းသားတွေကခေါ်တဲ့ ထိုင်း-ထားဝယ် ဘုန်းကြီးကျောင်းတကျောင်း ရှိပါတယ်။ အဲဒီကျောင်း ခြံစည်းရုံးအလွန်မှာတော့ တောချတော နယ်ခြားစောင့် တပ်စခန်းကို တွေ့ရမှာဖြစ်ပြီး အဲဒီစခန်းရဲ့ရှေ့မှာတော့ ဘောလုံးကွင်းနဲ့ စာသင်ကျောင်းတွေ ရှိပါတယ်။

အဲဒီ ဘောလုံးကွင်းဘေးမှာတော့ အိမ်ခြေ ၁၀၀ ကျော်လောက်ရှိမယ့် နတ်အိတ်တောင်ရွာနဲ့ ဈေးတန်းကြီးကို တွေ့ရပါတယ်။ နတ်အိမ်တောင်က အိမ်တွေဟာ သွပ်ပြားမိုး သစ်သားအိမ်တွေဖြစ်ပြီး လမ်းမတန်းတလျှောက် အိမ်တွေအားလုံးဟာ ဆိုင်ခန်းတွေနဲ့ တွဲထားတဲ့အိမ်တွေ ဖြစ်ပါတယ်။ နတ်အိမ်တောင် ဈေးတန်းကြီးကိုလည်း သွပ်ပြားနဲ့ပဲမိုးထားတာ တွေ့ရပြီး ကျနော်တို့ထားဝယ်မြို့ပေါ်က ဈေးနီးနီး စည်ကားနေတာကို တွေ့ရပါတယ်။

တနည်းအားဖြင့် ပြောမယ်ဆိုရင်တော့ နတ်အိမ်တောင်စခန်းနဲ့ မင်းသမီးစခန်းဟာ မြို့နဲ့တောလို ကွာတယ်လို့ ကျနော်စိတ်ထဲ ခံစားမိပါတယ်။ နတ်အိမ်တောင်စခန်း မကျခင် နောက်ထပ် ၃-၄ ခေါက်လောက် ထောက်ပံ့ရေးတာဝန်နဲ့ ကျနော် ရောက်ဖူးခဲ့ပါသေးတယ်။

နောက်တခါ ထူးထူးခြားခြား နတ်အိမ်တောင်စခန်းဟာ န၀တလက်ထဲ ကျပြီးတဲ့အထိ သွားရောက်လည်ပတ်နိုင်တဲ့ တခုတည်းသောနေရာ ဖြစ်ပါတယ်။ ၁၉၉၁ ဒီဇင်ဘာမှာ စခန်းကျပြီးချိန် နောက်ပိုင်း ရတနာ ပိုက်လိုင်းစီမံကိန်းအတွက် သတင်းယူဖို့ သတင်းထောက် တဦးအဖြစ် နတ်အိမ်တောင်ရွာနဲ့ တောင်ထိပ်ဆီ ကျနော် ၃-၄ ခေါက် ထပ် ရောက်ခဲ့ပါသေးတယ်။ အလားတူ ၂၀၀၈ ထိုင်းခရီးစဉ်အတွင်းမှာလည်း နယ်စပ်အလွမ်းပြေအဖြစ် နတ်အိမ်တောင်ရွာနဲ့ တောင်ထိပ်စခန်းဆီ ကျနော်သွားလည်ခဲ့ဖူးတာကို အမှတ်ရနေပါတယ်။     ။

0 comments:

Post a Comment

Share

Twitter Delicious Facebook Digg Stumbleupon Favorites More