Friday, December 31, 2021

Interview with Nandar Sit Aung of NUCC. Part-2



“စစ်အာဏာရှင်စနစ်ကို အပြီးသတ်တိုက်ဖို့ပဲ ကျနော်တို့စဉ်းစားတယ်။ တွေ့ဆုံဆွေးနွေးရေး ခေါင်းထဲမှာမရှိဘူး”

(နန္ဒာစစ်အောင်- NUCC အဖွဲ့ဝင်တဦး)
------------------------------------------------------
(၃၁/၁၂/၂၀၂၁)

အမျိုးသားညီညွတ်ရေးအတိုင်ပင်ခံကောင်စီ NUCC တပ်ပေါင်းစုက စစ်အာဏာရှင်ပြုတ်ကျရေးအပြီးသတ်တိုက်ပွဲအတွက်ပဲ မူဝါဒတွေချမှတ်အကောင်အထည်ဖေါ်နေပြီး စစ်ကောင်စီနဲ့ဆွေးနွေးရေးဆိုတာကို စဉ်းစားထားချက် မရှိဘူးလို့ NUCC အဖွဲ့ဝင်တဦးဖြစ်သူ အလုပ်သမားတပ်ပေါင်းစုမှ ကိုနန္ဒာစစ်အောင်ကပြောပါတယ်။

စစ်အာဏာသိမ်းပြီး ၁၁ လကြာ ကာလအတွင်း တပ်ပေါင်းစုရဲ့လှုပ်ရှားဆောင်ရွက်နိုင်မှုတွေအပေါ် BNN သတင်းဌာနမှ ဦးထက်အောင်ကျော်က မေးမြန်းစဉ် သူက အဲဒီလို ဖြေကြားခဲ့တာပါ။

အခုထုတ်လွှင့်ပေးမယ့် မေးမြန်းချက် ဒုတိယ ပိုင်းမှာတော့...
- လူထုဆန္ဒပြပွဲတွေ အရှိန်လျော့ကျမသွားအောင် ဘယ်လိုဆက်ထိန်းထားမလဲ...
- NUCC ဟာ လက်တွေ့တိုက်ပွဲကိုအရှိန်မြှင့်ဖို့ထက် အနာဂတ်မျှော်မှန်းချက်အပေါ် အချိန်ပေးတာ သိပ်များနေသလား..
- တရားမျှတမှုကို အရင်မရှာဖွေပဲနဲ့ စေ့စပ်ညှိနှိုင်းရေး ထပ်ဖြစ်နိုင်သေးလား...
- လက်နက်ကိုင်တိုက်ပွဲနဲ့ စစ်ကောင်စီကို ဖြုတ်ချနိုင်မလား...စတဲ့ အကြောင်းအရာတွေကို ဆွေးနွေးတင်ပြထားပါတယ်။

Thursday, December 30, 2021

Interview with Nandar Sit Aung of NUCC. Part 1



“ပြည်မမှာ ဒီမိုကရေစီအကြောင်း ပြောနေတဲ့အချိန်မှာ ပြည်နယ်တွေက ဖက်ဒရယ်အကြောင်းပြောနေတယ်။ ဒီနှစ်ခုကို ကျနော်တို့ပူးပေါင်းဆောင်ရွက်နေပါတယ်”

(နန္ဒာစစ်အောင်- မြန်မာနိုင်ငံ အလုပ်သမားတပ်ပေါင်းစု)
-----------------------------------------------------
(၃၀/၁၂/၂၀၂၁)

ပြည်မဖက်က တောင်းဆိုနေတဲ့ ဒီမိုကရေစီအခွင့်အရေးတိုက်ပွဲဝင် အင်အားစုတွေနဲ့ ပြည်နယ်တွေက တောင်းဆိုနေတဲ့ ဖက်ဒရယ်ရရှိရေးတိုက်ပွဲဝင် အင်အားစု နှစ်ခုကိုပေါင်းစပ်ပြီး စစ်အာဏာရှင်ပြုတ်ကျရေးအတွက် NUCC တပ်ပေါင်းစုက တိုက်ပွဲဝင်နေတာဖြစ်တယ်လို့ တပ်ပေါင်းစုအဖွဲ့ဝင်ဖြစ်တဲ့ မြန်မာနိုင်ငံအလုပ်သမား တပ်ပေါင်းစုမှ ကိုနန္ဒာစစ်အောင်ကပြောပါတယ်။

စစ်တပ်က အာဏာသိမ်းပြီး ၁၁ လနီးပါးကြာ ကာလအတွင်း ဒီမိုကရေစီအင်အားစုနဲ့ ဖက်ဒရယ်အင်အားစုတွေကြားပူးပေါင်းဆောင်ရွက်မှုအခြေအနေ၊ တနည်းအားဖြင့် အမျိုးသားညီညွတ်ရေးအတိုင်ပင်ခံကောင်စီ NUCC တပ်ပေါင်းစုရဲ့ ဆောင်ရွက်နိုင်မှု အခြေအနေတွေအပေါ် BNN သတင်းဌာနမှ ဦးထက်အောင်ကျော်က မေးမြန်းစဉ် သူက အဲဒီလိုဖြေကြားခဲ့တာပါ။

အခုထုတ်လွှင့်ပေးမယ့် မေးမြန်းချက် ပထမ ပိုင်းမှာတော့ ...
- အလုပ်သမားတပ်ပေါင်းစုက NUCC ထဲ ဘာကြောင့်ပါဝင်တာလဲ...
- NUCC မှာပါတဲ့ ၂၈ ဖွဲ့က ဘာတွေ ပူးပေါင်းဆောင်ရွက်နေသလဲ...
- နယ်စပ်ဒေသအခြေစိုက် EAO တွေနဲ့ ပြည်မကနေရောက်လာတဲ့ ဒီမိုကရေစီအင်အားစုတွေကြား ပူးပေါင်းဆောင်ရွက်မှုက အားရစရာရှိရဲ့လား... စတဲ့အကြောင်းအရာတွေကို ဆွေးနွေးတင်ပြထားပါတယ်။

(လက်နက်ကိုင်တိုက်ပွဲ၊ လူထုတိုက်ပွဲနှင့် သံတမန်တိုက်ပွဲပေါင်းစပ်ပြီး ဘယ်လိုအောင်ပွဲယူနိုင်မလဲဆိုတဲ့ ဆွေးနွေးချက်ပါတဲ့ ဒုတိယ ပိုင်းကိုတော့ မနက်ဖန်ညမှာ ထုတ်လွှင့်ပေးမှာဖြစ်ပါတယ်)။ 


Wednesday, December 29, 2021

Interview with Karenni Human Rights Groups. Part 2



“စစ်ကောင်စီက လူသတ်မီးရှို့နေတာကို ကုလသမဂ္ဂက ဘာမှဝင်ရောက်မတားဆီးပဲနေခြင်းနေခြင်းဟာ ကျနော်တို့ကို သေချင်သေပစေဆိုပြီး စွန့်ပစ်ထားသလိုဖြစ်နေပါတယ်”

(ဗညားခွန်အောင်- Karenni Human Rights Group)
--------------------------------------------------------
(၂၉ /၁၂/၂၀၂၁)

စစ်ကောင်စီတပ်တွေက အရပ်သားတွေကို အစုအပြုံလိုက်ဖမ်းဆီ မီးရှို့သတ်ဖြတ်နေတာကိုသိရဲ့နဲ့ ကုလသမဂ္ဂနဲ့ နိုင်ငံတကာအစိုးရတွေက ဘာမှကြားဝင်တားဆီးခြင်းမရှိပဲ လွှတ်ပေးထားတာဟာ စစ်ပြေးဒုက္ခသည်တွေကို သေချင်သေပါစေဆိုပြီး တာဝန်မဲ့ စွန့်ပစ်ထားသလိုဖြစ်နေတယ်လို့ ကရင်နီလူ့အခွင့်အရေးအဖွဲ့က ဗညားခွန်အောင်က ဝေဖန်လိုက်ပါတယ်။

ဒီဇင်ဘာ ၂၄ ရက်နေ့၊ ခရစ်စမတ်အကြိုနေ့က ကရင်နီပြည်နယ်၊ ဖရူဆိုမြို့နယ်၊ ဖိုဆိုရွာမှာဖြစ်ပွားခဲ့တဲ့ အရပ်သား ၃၀ ကျော်ဖမ်းဆီး၊ မီးရှို့သတ်ဖြတ်ခံရမှုနဲ့ပတ်သက်ပြီး BNN သတင်းဌာနမှ ဦးထက်အောင်ကျော်က မေးမြန်းစဉ် သူက အဲဒီလိုပြောခဲ့တာပါ။

အခုထုတ်လွှင့်ပေးမယ့် မေးမြန်းချက် ဒုတိယ ပိုင်းမှာတော့... 
- မီးရှို့သတ်ဖြတ်ခံရသူတွေထဲမှာ ဒေသခံအရပ်သားတွေအပြင်  Save the Children နိုင်ငံတကာ ကယ်ဆယ်ရေးအဖွဲ့က ဝန်ထမ်း ၂ ဦးပါ ပါသွားတဲ့အကြောင်း...
- ကရင်နီဒေသမှာ စစ်ပြေးဒုက္ခသည် တသိန်းကျော်၊ တနည်းအားဖြင့် ပြည်နယ်လူဦးရေ သုံးပုံတပုံရှိနေချိန်အထိ ကုလသမဂ္ဂနဲ့ နိုင်ငံတကာဖက်က ဘာမှအကူအညီမပေးနိုင် သေးတဲ့အကြောင်း...
- ကနီဖက်က အစုအပြုံလိုက်သတ်ဖြတ်မှု၊ အခု ဖရူဆိုဖက်က အစုအပြုံလိုက်သတ်ဖြတ်မှုတွေကို ကုလသမဂ္ဂက အရေးမယူပဲ ဒီတိုင်းလွှတ်ပေးထားတာ ဒေသခံတွေကို သေချင်သေပါစေဆိုပြီး တာဝန်မဲ့စွန့်ပစ်ထားသလိုဖြစ်နေပြီလား... စတဲ့ အကြောင်းအရာတွေကို ဆွေးနွေးတင်ပြထားပါတယ်။

(မနက်ဖန်မှာတော့ အမျိုးသားညီညွတ်ရေးအတိုင်ပင်ခံကောင်စီ-NUCC အဖွဲ့ဝင်တဦးဖြစ်သူ မြန်မာနိုင်ငံအလုပ်သမားတပ်ပေါင်းစုက ကိုနန္ဒာစစ်အောင်နဲ့ မေးမြန်းချက်ကို ထုတ်လွှင့်ပေးမှာဖြစ်ပါတယ်)။

Tuesday, December 28, 2021

Interview with Karenni Human Rights Groups. Part-1


ဖရူဆိုမြို့နယ်အတွင်း လူ ၃၀ ခန့် အစုအပြုံလိုက် မီးရှို့သတ်ဖြတ်ခံမှုအကြောင်း မေးမြန်းချက် (၁)
--------------------------------------------------
(၂၈/၁၂/၂၀၂၁)

ကရင်နီဒေသ ဖရူဆိုမြို့နယ်၊ မိုဆိုကျေးရွာမှာ ဖြစ်ပွားခဲ့တဲ့ အစုံအပြုံလိုက်မီးရှို့သတ်ဖြတ်ခံရမှုအတွင်း လူပေါင်း အနည်းဆုံး ၂၉ ဦးသေဆုံးခဲ့တယ်၊ အလောင်းတွေ ရထားပြီးဖြစ်တယ်လို့ ကရင်နီ လူ့အခွင့်အရေးအဖွဲ့က ဗညားခွန်အောင်ကပြောပါတယ်။ ကရင်နီအမျိုးသမီးအဖွဲ့က မော်ဗျားမြာဦးကတော့ ဒီဖြစ်စဉ်ဟာ လူသားမဆန်စွာ ဆိုးလွန်းတဲ့အတွက် နိုင်ငံတကာဖက်က စစ်ကောင်စီကို အရေးယူဖို့လိုတယ်လို့ပြောပါတယ်။

ဒီဇင်ဘာလ ၂၄ ရက်နေ့၊ ခရစ်စမတ်အကြိုနေ့က ဖရူဆိုမြို့နယ်မှာဖြစ်ပွားခဲ့တဲ့ လူအစုအပြုံလိုက်အသတ်ခံရမှုနဲ့ပတ်သက်ပြီး BNN သတင်းဌာနမှ ဦးထက်အောင်ကျော်က မေးမြန်းစဉ် သူတို့ ၂ ဦးက အဲဒီလိုပြောခဲ့တာပါ။

အခု ထုတ်လွှင့်ပေးမယ့် မေးမြန်းချက် ပထမ ပိုင်းမှာတော့... မီးရှို့သတ်ဖြတ်ခံရသူတွေထဲက ၂၉ ဦးရဲ့အလောင်းကို ကောက်ယူရရှိထားမှု၊ ဒေသခံတွေအပြင် နိုင်ငံတကာကယ်ဆယ်ရေးအဖွဲ့ ဝန်ထမ်းတွေပါ သေဆုံးခဲ့မှု၊ စစ်ကောင်စီ ပြန်ကြားရေးဖက်က သတင်းထုတ်ပြန်ချက်နဲ့ လက်တွေ့ မြေပြင်က အခြေအနေ ကွာခြားနေမှု... စတဲ့ အကြောင်းအရာတွေကို ဆွေးနွေး တင်ပြထားပါတယ်။

(ဒီလို အစုအပြုံလိုက်သတ်ဖြတ်ခံရမှုတွေ၊ သိန်းနဲ့ချီပြေးနေရတဲ့ စစ်ပြေးဒုက္ခသည်တွေအပေါ် ကုလသမဂ္ဂနဲ့ နိုင်ငံတကာဖက်က ဟန့်တားဖို့၊ ကူညီပေးဖို့ပျက်ကွက်နေတဲ့အပေါ် ဝေဖန်ချက်ပါဝင်တဲ့ ဒုတိယပိုင်းကိုတော့ မနက်ဖန် ညပိုင်းမှာ ဆက်လက်ထုတ်လွှင့်ပေးမှာဖြစ်ပါတယ်)။


Saturday, December 25, 2021

Interview with Tom Andrews of UN. Part-2 edit


“တိုင်းပြည်ကို ထိန်းချုပ်ဖို့ အကြောက်တရားသွပ်သွင်းတဲ့ လုပ်ရပ်ဟာ တကယ်တမ်းမှာတော့ ဆန့်ကျင်ဘက်ရလဒ်ပဲ ဖြစ်လာတယ်” (Tom Andrews- UN Special Rapporteur on human rights in Myanmar) ----------------------------------------------------- (၂၅/၁၂/၂၀၂၁) အာဏာသိမ်းစစ်ကောင်စီက တိုင်းပြည်ကိုထိန်းချုပ်နိုင်ဖို့ ပြည်သူတရပ်လုံးကြောက်ရွံ့သွားအောင် ဖိနှိပ်မှုတွေအစွမ်းကုန်လုပ်ပြနေပေမယ့် တကယ်တန်းမှာတော့ ရလာဒ်က သူတို့ထင်ထားသလိုဖြစ်မလာပဲ လူထုရဲ့ အမျက်ဒေါသ ပိုပြီးထွက်လာမှုနဲ့သာ ရင်ဆိုင်နေရတယ်၊ တပ်မတော်ကျရှုံးတဲ့အထိ ဖြစ်သွားနိုင်တယ်လို့ မြန်မာနိုင်ငံဆိုင်ရာ ကုလသမဂ္ဂ လူ့အခွင့်အရေးအထူးစုံစမ်းသူ Tom Andrews ကပြောပါတယ်။ ဖေဖေါ်ဝါရီ ၁ ရက်နေ့ စစ်တပ်က အာဏာသိမ်းပြီးနောက် ဖြစ်ပေါ်နေတဲ့ ဆိုးရွားလှတဲ့ လူ့အခွင့်အရေးချိုးဖောက်မှုအခြေအနေတွေနဲ့ပတ်သက်ပြီး BNN သတင်းဌာနမှ ဦးထက်အောင်ကျော်က မေးမြန်းစဉ် သူက အဲဒီလိုဖြေကြားခဲ့တာပါ။ အခုထုတ်လွှင့်ပေးမယ့် မေးမြန်းချက် ဒုတိယ ပိုင်းမှာတော့... - အာဏာသိမ်းပြီး ၁၁ လနီးပါးကြာအခြေအနေမှာ လူ့အခွင့်အရေးချိုးဖောက်မှု ဘယ်လောက်ဆိုးနေသလဲ... - အစုအပြုံလိုက်သတ်ဖြတ်မှုတွေအပေါ် ကုလသမဂ္ဂက ဘယ်လိုအရေးယူနိုင်မလဲ... - ကုလသမဂ္ဂနဲ့ နိုင်ငံတကာအသိုင်းအဝိုင်းရဲ့ ဆောင်ရွက်မှုအပေါ် အားမရလို့ လက်နက်ကိုင်ခုခံမှရတော့မယ်လို့ ဆုံးဖြတ်လိုက်ကြတဲ့ လူငယ်တွေအပေါ် ကုလ အရာရှိက ဘယ်လိုအမြင်ရှိသလဲ... - မြန်မာ့အနာဂတ်အပေါ် ကုလ အရာရှိက ဘယ်လိုရှုမြင်ထားသလဲ... စတဲအကြောင်းအရာတွေကို ဆွေးနွေးတင်ပြထားပါတယ်။ ===================================== မြန်မာနိုင်ငံဆိုင်ရာ ကုလသမဂ္ဂ လူ့အခွင့်အရေးစုံစမ်းသူ Tom Andrews နှင့် မေးမြန်းချက် (၂) ------------------------------------------------------ ၂၅/ ၁၂/ ၂၀၂၁ ၁- (BNN)... အခုထိကတော့ ၂၀၁၇ ကဖြစ်ခဲ့တဲ့ ရိုဟင်ဂျာ တသန်းနီးနီး ဘင်္ဂလားဒေ့ရှ်နိုင်ငံဖက် ထွက်ပြေးသွားရတဲ့ အခြေအနေပေါ့လေ။...အခုဆက်ပြီး တနိုင်ငံလုံးရဲ့ လူ့အခွင့်အရေးအခြေအနေ၊ အထူးသဖြင့် ဖေဖေါ်ဝါရီ ၁ ရက်နေ့ စစ်တပ်က အာဏာသိမ်းပြီးနောက်ပိုင်း အခြေအနေကိုမေးချင်ပါတယ်။ AAPP နိုင်ငံရေးအကျဉ်းသားများကူညီရေးအဖွဲ့ရဲ့ ထုတ်ပြန်ချက်အရ စစ်တပ်ရဲ့သတ်ဖြတ်မှုကြောင့် သေဆုံးခဲ့ရတဲ့အရပ်သား ၁၃၀၀ ကျော်နေပြီ၊ ဖမ်းဆီးခံထားရသူက ၁၁၀၀၀ ကျော်နေပြီလို့ သိထားရပါတယ်။ မစ္စာတာ Andrews ဘယ်လို မှတ်ချက်ပေးချင်ပါသလဲ... (Tom Andrews)... ဒီကိစ္စကလဲ ဆိုးတယ်ဗျာ။ ပိုကောင်းလာဖို့ အရိပ်အယောင်မမြင်ပါဘူး။ ချင်းပြည်နယ်၊ စစ်ကိုင်းနဲ့ တခြားဒေသတွေမှာ တပ်တွေ တိုးပြီးဖြန့်ချလာတာ တွေ့နေရတော့ ကျနော် သိပ်ကိုစိုးရိမ်ပါတယ်။ စစ်အစိုးရက မြန်မာပြည်သူတွေအပေါ် ကျူးလွန်မှုတွေကို ဖြည်လျှော့မဲ့ အရိပ်အယောင်တောင် မပြတဲ့အပြင် ရက်စက်ကြမ်းကြုတ်မှုတွေကလဲ ကြောက်စရာကြီးပါဗျာ။ အခြေအနေကို ထိန်းချုပ်နိုင်ဖို့အတွက် မြန်မာပြည်သူပြည်သားတွေ ကြောက်လန့်နေအောင် အကြမ်းဖက်တဲ့နည်းနဲ့ ကြိုးပမ်းနေတာပါ။ တကယ်တမ်းဖြစ်နေတာကတော့ ကျနော် လေ့လာဖတ်ရှုမိသလောက်၊ တိုင်းပြည်ထဲကလူတွေနဲ့ ပြောဆိုမိသလောက်ဆိုရင် ရက်စက်ကြမ်းကြုတ်တဲ့ လုပ်ရပ်တွေနဲ့ စစ်တပ်အင်အား တိုးချဲ့ပြီး ပြည်သူတွေကို ရန်သူအဖြစ် ဆက်ဆံနေတာပဲ။ နိုင်ငံအများစုမှာဆိုရင် စစ်တပ်ရဲ့ အခန်းကဏ္ဍဟာ ပြည်သူကို ကာကွယ်ဖို့၊ တိုင်းပြည်ကို စောင့်ရှောက်ဖို့ပဲ။ ဒါပေမယ့် မြန်မာနိုင်ငံမှာကတော့ ဆန့်ကျင်ဘက်ပါပဲ။ စစ်တပ်က မြန်မာပြည်သူတွေကို တိုက်ခိုက်နေတယ်။ အခြေအနေကတော့ ဆိုးတယ်။ ပိုပြီးတော့လဲ ဆိုးသထက်ဆိုးလာနေတာဆိုတော့ မြန်မာပြည်မှာ တပ်မတော် ကျရှုံး သွားနိုင်တယ်လို့ ကျနော်ထင်တယ်။ တိုင်းပြည်ကို ထိန်းချုပ်ဖို့ အကြောက်တရားသွပ်သွင်းတဲ့ လုပ်ရပ်ဟာ တကယ်တမ်းမှာ ဆန့်ကျင်ဘက်ရလဒ်ပဲ ဖြစ်လာတယ်။ လူထုက ဒီ့ထက်ဒီ အမျက်ဒေါသ ပိုပြီးထွက်လာတယ်။ အတိုက်အခံတွေဘက်က အင်အား ခိုင်မာလာတယ်။ ဆိုတော့ကာ ပြည်သူတွေကို အကြမ်းဖက်ခြိမ်းခြောက်ပြီး ပြည်သူတွေကို ခြိမ်းခြောက်ပြီး အရှိန်ရလာမယ်လို့ ယူဆရင်တော့ ဆန့်ကျင်ဘက်ပဲလို့ ပြောရမယ်။ (ဖြေကြားချက် အသေးစိပ် စာသားတွေကို https://burmanewsnetwork.com ထဲ ဝင်ရောက်ဖတ်ရှုနိုင်ပါတယ်)

Interview with Tom Andrews of UN. Part-2



“တိုင်းပြည်ကို ထိန်းချုပ်ဖို့ အကြောက်တရားသွပ်သွင်းတဲ့ လုပ်ရပ်ဟာ တကယ်တမ်းမှာတော့ ဆန့်ကျင်ဘက်ရလဒ်ပဲ ဖြစ်လာတယ်”

(Tom Andrews- UN Special Rapporteur on human rights in Myanmar)
-----------------------------------------------------
(၂၅/၁၂/၂၀၂၁)

အာဏာသိမ်းစစ်ကောင်စီက တိုင်းပြည်ကိုထိန်းချုပ်နိုင်ဖို့ ပြည်သူတရပ်လုံးကြောက်ရွံ့သွားအောင် ဖိနှိပ်မှုတွေအစွမ်းကုန်လုပ်ပြနေပေမယ့် တကယ်တန်းမှာတော့ ရလာဒ်က သူတို့ထင်ထားသလိုဖြစ်မလာပဲ လူထုရဲ့ အမျက်ဒေါသ ပိုပြီးထွက်လာမှုနဲ့သာ ရင်ဆိုင်နေရတယ်၊ တပ်မတော်ကျရှုံးတဲ့အထိ ဖြစ်သွားနိုင်တယ်လို့ မြန်မာနိုင်ငံဆိုင်ရာ ကုလသမဂ္ဂ လူ့အခွင့်အရေးအထူးစုံစမ်းသူ Tom Andrews ကပြောပါတယ်။

ဖေဖေါ်ဝါရီ ၁ ရက်နေ့ စစ်တပ်က အာဏာသိမ်းပြီးနောက် ဖြစ်ပေါ်နေတဲ့ ဆိုးရွားလှတဲ့ လူ့အခွင့်အရေးချိုးဖောက်မှုအခြေအနေတွေနဲ့ပတ်သက်ပြီး BNN သတင်းဌာနမှ ဦးထက်အောင်ကျော်က မေးမြန်းစဉ် သူက အဲဒီလိုဖြေကြားခဲ့တာပါ။

အခုထုတ်လွှင့်ပေးမယ့် မေးမြန်းချက် ဒုတိယ ပိုင်းမှာတော့... 
- အာဏာသိမ်းပြီး ၁၁ လနီးပါးကြာအခြေအနေမှာ လူ့အခွင့်အရေးချိုးဖောက်မှု ဘယ်လောက်ဆိုးနေသလဲ...
- အစုအပြုံလိုက်သတ်ဖြတ်မှုတွေအပေါ် ကုလသမဂ္ဂက ဘယ်လိုအရေးယူနိုင်မလဲ...
- ကုလသမဂ္ဂနဲ့ နိုင်ငံတကာအသိုင်းအဝိုင်းရဲ့ ဆောင်ရွက်မှုအပေါ် အားမရလို့ လက်နက်ကိုင်ခုခံမှရတော့မယ်လို့ ဆုံးဖြတ်လိုက်ကြတဲ့ လူငယ်တွေအပေါ် ကုလ အရာရှိက ဘယ်လိုအမြင်ရှိသလဲ...
- မြန်မာ့အနာဂတ်အပေါ် ကုလ အရာရှိက ဘယ်လိုရှုမြင်ထားသလဲ... စတဲအကြောင်းအရာတွေကို ဆွေးနွေးတင်ပြထားပါတယ်။ 
=====================================

မြန်မာနိုင်ငံဆိုင်ရာ ကုလသမဂ္ဂ လူ့အခွင့်အရေးစုံစမ်းသူ Tom Andrews နှင့်  မေးမြန်းချက် (၂)
------------------------------------------------------
၂၅/ ၁၂/ ၂၀၂၁

၁- (BNN)- အခုထိကတော့ ၂၀၁၇ ကဖြစ်ခဲ့တဲ့ ရိုဟင်ဂျာ တသန်းနီးနီး ဘင်္ဂလားဒေ့ရှ်နိုင်ငံဖက် ထွက်ပြေးသွားရတဲ့ အခြေအနေပေါ့လေ။...အခုဆက်ပြီး တနိုင်ငံလုံးရဲ့ လူ့အခွင့်အရေးအခြေအနေ၊ အထူးသဖြင့် ဖေဖေါ်ဝါရီ ၁ ရက်နေ့ စစ်တပ်က အာဏာသိမ်းပြီးနောက်ပိုင်း အခြေအနေကိုမေးချင်ပါတယ်။ AAPP နိုင်ငံရေးအကျဉ်းသားများကူညီရေးအဖွဲ့ရဲ့ ထုတ်ပြန်ချက်အရ စစ်တပ်ရဲ့သတ်ဖြတ်မှုကြောင့် သေဆုံးခဲ့ရတဲ့အရပ်သား ၁၃၀၀ ကျော်နေပြီ၊ ဖမ်းဆီးခံထားရသူက ၁၁၀၀၀ ကျော်နေပြီလို့ သိထားရပါတယ်။ မစ္စာတာ Andrews ဘယ်လို မှတ်ချက်ပေးချင်ပါသလဲ...

(Tom Andrews)- ဒီကိစ္စကလဲ ဆိုးတယ်ဗျာ။ ပိုကောင်းလာဖို့ အရိပ်အယောင်မမြင်ပါဘူး။ ချင်းပြည်နယ်၊ စစ်ကိုင်းနဲ့ တခြားဒေသတွေမှာ တပ်တွေ တိုးပြီးဖြန့်ချလာတာ တွေ့နေရတော့ ကျနော် သိပ်ကိုစိုးရိမ်ပါတယ်။ စစ်အစိုးရက မြန်မာပြည်သူတွေအပေါ် ကျူးလွန်မှုတွေကို ဖြည်လျှော့မဲ့ အရိပ်အယောင်တောင် မပြတဲ့အပြင် ရက်စက်ကြမ်းကြုတ်မှုတွေကလဲ ကြောက်စရာကြီးပါဗျာ။ 

အခြေအနေကို ထိန်းချုပ်နိုင်ဖို့အတွက် မြန်မာပြည်သူပြည်သားတွေ ကြောက်လန့်နေအောင် အကြမ်းဖက်တဲ့နည်းနဲ့ ကြိုးပမ်းနေတာပါ။ တကယ်တမ်းဖြစ်နေတာကတော့ ကျနော် လေ့လာဖတ်ရှုမိသလောက်၊ တိုင်းပြည်ထဲကလူတွေနဲ့ ပြောဆိုမိသလောက်ဆိုရင် ရက်စက်ကြမ်းကြုတ်တဲ့ လုပ်ရပ်တွေနဲ့ စစ်တပ်အင်အား တိုးချဲ့ပြီး ပြည်သူတွေကို ရန်သူအဖြစ် ဆက်ဆံနေတာပဲ။ နိုင်ငံအများစုမှာဆိုရင် စစ်တပ်ရဲ့ အခန်းကဏ္ဍဟာ ပြည်သူကို ကာကွယ်ဖို့၊ တိုင်းပြည်ကို စောင့်ရှောက်ဖို့ပဲ။ ဒါပေမယ့် မြန်မာနိုင်ငံမှာကတော့ ဆန့်ကျင်ဘက်ပါပဲ။ စစ်တပ်က မြန်မာပြည်သူတွေကို တိုက်ခိုက်နေတယ်။

အခြေအနေကတော့ ဆိုးတယ်။ ပိုပြီးတော့လဲ ဆိုးသထက်ဆိုးလာနေတာဆိုတော့ မြန်မာပြည်မှာ တပ်မတော် ကျရှုံး သွားနိုင်တယ်လို့ ကျနော်ထင်တယ်။ တိုင်းပြည်ကို ထိန်းချုပ်ဖို့ အကြောက်တရားသွပ်သွင်းတဲ့ လုပ်ရပ်ဟာ တကယ်တမ်းမှာ ဆန့်ကျင်ဘက်ရလဒ်ပဲ ဖြစ်လာတယ်။ လူထုက ဒီ့ထက်ဒီ အမျက်ဒေါသ ပိုပြီးထွက်လာတယ်။ အတိုက်အခံတွေဘက်က အင်အား ခိုင်မာလာတယ်။ ဆိုတော့ကာ ပြည်သူတွေကို အကြမ်းဖက်ခြိမ်းခြောက်ပြီး ပြည်သူတွေကို ခြိမ်းခြောက်ပြီး အရှိန်ရလာမယ်လို့ ယူဆရင်တော့ ဆန့်ကျင်ဘက်ပဲလို့ ပြောရမယ်။

(ဖြေကြားချက် အသေးစိပ် စာသားတွေကို https://burmanewsnetwork.com ထဲ ဝင်ရောက်ဖတ်ရှုနိုင်ပါတယ်) 
==========================================

Thursday, December 23, 2021

Interview with Tom Andrews of UN. Part.1



“ရက်စက်ကြမ်းကြုတ်တဲ့ ရာဇဝတ်မှုတွေကို ကျူးလွန်ပြီး လွတ်မြောက်သွားတာမျိုးမဖြစ်အောင် အရေးယူဖို့ လိုပါတယ်”

(Tom Andrews- UN Special Rapporteur on the human rights in Myanmar)
-----------------------------------------------------
(၂၃/၁၂/၂၀၂၁)

မြန်မာစစ်တပ်က နေအိမ်တွေကို မီးရှို့၊ လူတွေကိုသတ်ဖြတ်တဲ့အတွက် တသန်းလောက်ရှိတဲ့ ရိုဟင်ဂျာတွေ ဘင်္ဂလားဒေ့ရှ် နယ်စပ်ထဲ ထွက်ပြေးလာရတဲ့ ၂၀၁၇ ဖြစ်စဉ်အတွက် အပြစ်ရှိသူတွေကို အရေးယူနိုင်ဖို့လိုတယ်၊ တာဝန်ခံမှု ရှိအောင်လုပ်ဖို့လိုတယ်လို့ မြန်မာနိုင်ငံဆိုင်ရာ ကုလသမဂ္ဂ လူ့အခွင့်အရေးအထူးစုံစမ်းသူ Tom Andrews ကပြောပါတယ်။

ပြီးခဲ့တဲ့ ရက်ပိုင်းအတွင်းက သူသွားရောက်လေ့လာခဲ့တဲ့ ရိုဟင်ဂျာဒုက္ခသည်စခန်းအခြေအနေနဲ့ပတ်သက်ပြီး BNN သတင်းဌာနမှ ဦးထက်အောင်ကျော်က မေးမြန်းစဉ် သူက အဲဒီလိုဖြေကြားခဲ့တာပါ။

အခုထုတ်လွှင့်ပေးမယ့် မေးမြန်းချက် ပထမ ပိုင်းမှာတော့... ဘင်္ဂလားဒေ့ရှ် နယ်စပ်စခန်းက ဒုက္ခသည်တွေရဲ့ နောက်ဆုံးအခြေအနေ၊ ကုလသမဂ္ဂ အေဂျင်စီတွေရဲ့ ကူညီ ဆောင်ရွက်ပေးနေမှု၊ အိမ်ပြန်နိုင်မယ့် အလားအလာ၊ သူတို့ အိမ်ကိုမီးရှို့ပြီး သူတို့ကိုမောင်းထုတ်ခဲ့တဲ့ စစ်တပ်ကို နိုင်ငံတကာဖက်က ဘယ်လိုအရေးယူနိုင်မလဲ... စတဲအကြောင်းအရာတွေကို ဆွေးနွေးတင်ပြထားပါတယ်။ 

(ဖေဖေါ်ဝါရီ ၁ ရက်နေ့၊ စစ်တပ်အာဏာသိမ်းမှုနောက်ပိုင်း ဖြစ်ပေါ်လာတဲ့ လူ့အခွင့်အရေးချိုးဖောက်မှုတွေအပေါ် ကုလသမဂ္ဂ ဖက်က ဘယ်လိုအရေးယူနိုင်မလဲ...ဆိုတဲ့ အကြောင်းအရာတွေပါတဲ့ ဒုတိယ ပိုင်းကိုတော့ မနက်ဖြန်ညမှာ ဆက်လက် ထုတ်လွှင့်ပေးမှာဖြစ်ပါတယ်)။

=========================================

မြန်မာနိုင်ငံဆိုင်ရာ ကုလသမဂ္ဂ လူ့အခွင့်အရေးစုံစမ်းသူ Tom Andrews နှင့်  မေးမြန်းချက် (၁)
------------------------------------------------------
၂၃/ ၁၂/ ၂၀၂၁

မင်္ဂလာပါ။ BNN ပရိသတ်များခင်ဗျား... ဒီနေ့ ဆွေးနွေခန်းအတွက် ကျနော်ဖိတ်ခေါ်ထားသူကတော့ မြန်မာနိုင်ငံဆိုင်ရာ ကုလသမဂ္ဂ လူ့အခွင့်အရေးအထူးစုံစမ်းသူ Tom Andrews ဖြစ်ပါတယ်။ မေးမြန်းမယ့် အဓိကအကြောင်းအရာကတော့ ပြီးခဲ့တဲ့ သီတင်းပတ်က သွားခဲ့တဲ့ ရိုဟင်ဂျာဒုက္ခသည်စခန်းအခြေအနေအပါဝင် မြန်မာနိုင်ငံရဲ့ လက်ရှိ လူ့အခွင့်အရေးနောက်ဆုံး အခြေအနေ၊ နောက် ကုလသမဂ္ဂက ဘာတွေ ဆောင်ရွက်ပေးနိုင်မလဲ...ဆိုတဲ့အကြောင်းတွေ ဖြစ်ပါတယ်။

၁- (BNN) မင်္ဂလာပါ- Tom Andrews ...ပထမဆုံးကတော့ ခုနက နိဒါန်းမှာပါတဲ့အတိုင်း ဘင်္ဂလားဒေ့ရှ်နယ်စပ်က ရိုဟင်ဂျာဒုက္ခသည်တွေရဲ့အခြေအနေဖြစ်ပါတယ်။ သူတို့ အိမ်ပြန်နိုင်မယ့်အခြေအနေကိုမပြောခင် အဲဒီက မြင်ကွင်းကို အရင်ဆုံးပြောပြပေးပါဗျ...။

(Tom Andrews) ... ဘင်္ဂလားဒေ့ရှ်ခရီးစဉ်မှာ လေယာဉ်ပေါ်ကနေ ဆင်းလိုက်တာနဲ့ ဘင်္ဂလားဒေ့ရှ်နိုင်ငံမှာ ခိုလှုံနေတဲ့ ရိုဟင်ဂျာ တစ်သန်းနီးပါးရဲ့ အခြေအနေကို လေ့လာကြည့်ရှုဖို့ ကျနော် စိတ်အားထက်သန်နေပါတယ်။ သူတို့ထဲက အများစုဟာ ၂၀၁၇ ခုနှစ် ရခိုင်ပြည်နယ်မှာ လူမျိုးတုံးသတ်ဖြတ်မှုတွေကနေ ထွက်ပြေးတိမ်းရှောင်လာကြသူတွေပါ။

ဒါက ကျွန်တော့်တာဝန်ပါပဲ။ သတင်းအချက်အလက်တွေကို အခြေခံတဲ့  စိစစ်တွေ့ရှိချက် နောက်ဆုံးအခြေအနေနဲ့အတူ အကြံပြုချက်တွေကို ကုလသမဂ္ဂ လူ့အခွင့်အရေးကောင်စီကို အစီရင်ခံ တင်ပြဖို့ပါ။ ဒီခရီးစဉ်ကာလက တိုတိုလေးပါ။ တပတ်ကျော်ကျော်လေးဆိုတော့ အားသွန်ကြိုးပမ်းရပါတယ်။ Cox's Bazaar ခရိုင်ထဲက စခန်းတွေကို ခရီးထွက်ခဲ့ပါတယ်။

Bhasan Char ကျွန်း ခရီးက အသွားသုံးနာရီ၊ အပြန် သုံးနာရီဆိုတော့ ဒီကျွန်းဟာ ဘယ်လောက် ခေါင်တဲ့နေရာလဲဆိုတာ သဘောပေါက်နိုင်ပါတယ်။  အဲဒီကလူတွေ ဘယ်ကလာပြီး သူတို့ရည်မှန်းချက်ဆန္ဒက ဘာလဲဆိုတာ အတိအကျ နားလည်ဖို့ ကြိုးစားရင်း အချိန်ကုန်ခဲ့ပါတယ်။ သိပ်ကောင်းတဲ့ ခရီးစဉ်ပါ။ အသိအမြင်လဲ တိုးပါတယ်။ ဒီခရီးစဉ်နဲ့ ပတ်သက်လို့ ဒုက္ခသည်တွေအခြေအနေကို သိချင်တယ်ဆိုရင်တော့ အသေးစိတ်အချက်တချို့ကို ပြောပြနိုင်ပါတယ်၊ ကျနော်တို့ ဘယ်ကိုသွားပြီး ဘာတွေ ဆောင်ရွက်ခဲ့တယ်ဆိုတဲ့ အကျဉ်းချုပ်သုံးသပ်ချက်မျိုးပေါ့။

(ဖြေကြားချက် အသေးစိပ် စာသားတွေကို https://burmanewsnetwork.com ထဲ ဝင်ရောက်ဖတ်ရှုနိုင်ပါတယ်) 
==========================================

Wednesday, December 22, 2021

Interview with Tom Andrews of UN. Intro.


“မြန်မာနိုင်ငံရဲ့ အနာဂတ်ဟာ ခင်ဗျားတို့လက်ထဲမှာရှိပါတယ်။ ကျနော်လုပ်နိုင်သမျှ အစွမ်းကုန်ကူညီသွားမယ်”

(Tom Andrews- UN Special Rapporteur on the human rights in Myanmar)
-----------------------------------------------------
(၂၂/၁၂/၂၀၂၁)

မြန်မာနိုင်ငံရဲ့ အနာဂတ်ဟာ မြန်မာလူငယ်တွေရဲ့လက်ထဲမှာရှိနေပြီး ကုလသမဂ္ဂနဲ့ နိုင်ငံတကာအသိုင်းအဝိုင်းက ဒါကို ထောက်ခံအားပေးဖို့လိုတယ်လို့ မြန်မာနိုင်ငံဆိုင်ရာ ကုလသမဂ္ဂ လူ့အခွင့်အရေးအထူးစုံစမ်းသူ Tom Andrews ကပြောပါတယ်။

ပြီးခဲ့တဲ့ ရက်ပိုင်းအတွင်းက သူသွားရောက်လေ့လာခဲ့တဲ့ ရိုဟင်ဂျာဒုက္ခသည်စခန်းအခြေအနေအပါဝင် လက်ရှိ နွေဦးတော်လှန်ရေးကာလအတွင်း စစ်ကောင်စီတပ်တွေရဲ့ လူ့အခွင့်အရေးချိုးဖောက်မှုတွေအပေါ် ကုလသမဂ္ဂဖက်က ဘယ်လိုအရေးယူဆောင်ရွက်နေသလဲဆိုပြီး BNN သတင်းဌာနမှ ဦးထက်အောင်ကျော်က မေးမြန်းစဉ် သူက အဲဒီလိုဖြေကြားခဲ့တာပါ။

လူ့အခွင့်အရေးအထူးစုံစမ်းသူ Tom Andrews နဲ့မေးမြန်းချက်အသေးစိပ်ကိုတော့ မနက်ဖြန်ညမှာ စတင်ထုတ်လွှင့်ပေးမှာဖြစ်ပါတယ်။

Tuesday, December 21, 2021

နောက်ဆုံးဖြစ်ရမယ်


လင္းလင္းနဲ႔ အာဇာနည္ သီခ်င္း မွ်ေ၀ပါသည္...

ပြန်လာမယ်မေမေ


အာဇာနည္ သီခ်င္းအား မွ်ေ၀ပါသည္...

Monday, December 20, 2021

Interview with Bo Hla Tin of NUG on ASEAN.part 2


“ကမ္ဘောဒီးယားဝန်ကြီးချုပ်အနေနဲ့ အာဆီယံမူ ၅ ချက်အတိုင်း ဆက်လက်ရပ်တည်ဖို့ တောင်းဆိုပါတယ်”

(ဦးဘိုလှတင့်- အာဆီယံဆိုင်ရာ သံအမတ်ကြီး- NUG)
----------------------------------------------
(၂၁/၁၂/၂၀၂၁)

အာဆီယံ အလှည့်ကျ ဥက္ကဌအသစ်ဖြစ်လာမယ့် ကမ္ဘောဒီးယားဝန်ကြီးချုပ် အနေနဲ့ အာဆီယံမူ ၅ ချက်အတိုင်းဆက်လက်ရပ်တည်ရမှာဖြစ်ပြီး စစ်ကောင်စီနဲ့ နီးနီးကပ်ကပ်မဆက်ဆံသင့်ဘူးလို့ အမျိုးသားညွန့်ပေါင်းအစိုးရ အာဆီယံ ဆိုင်ရာသံအမတ်ကြီး ဦးဘိုလှတင့်က တိုက်တွန်းလိုက်ပါတယ်။

ဇန်နာဝါရီ ၁ ရက်နေ့မှာ အာဆီယံ အလှည့်ကျဥက္ကဌဖြစ်လာမယ့် ကမ္ဘောဒီးယားဝန်ကြီးချုပ် ဟွမ်ဆမ်-က ရှေ့နှစ် ပထမ သီတင်းပတ်အတွင်း နေပြည်တော်သွားမယ်၊ စစ်ကောင်စီကို အာဆီယံထဲပြန်ပါလာအောင် ဖိတ်ခေါ်မယ်ဆိုပြီး ပြောဆိုလာတာနဲ့ပတ်သက်ပြီး BNN သတင်းဌာနမှ ဦးထက်အောင်ကျော်က မေးမြန်းစဉ် သူက အဲဒီလိုဖြေကြားခဲ့တာပါ။

အခု ထုတ်လွှင့်ပေးမယ့် မေးမြန်းချက် ဒုတိယ ပိုင်းမှာတော့... အာဆီယံ ဥက္ကဌသစ်ရဲ့ ပြောဆိုချက်အပေါ် NUG ရဲ့ တုန့်ပြန်ချက်၊ အမေရိကန်ရဲ့ NDAA အမျိုးသား ကာကွယ်ရေးဆိုင်ရာလုပ်ပိုင်ခွင့်ဥပဒေ- က ရှေ့တန်းမှာတိုက်ပွဲဝင်နေတဲ့ PDF တွေအတွက် ဘယ်လိုအထောက်ကူဖြစ်စေမလဲ... စတဲ့ အကြောင်းအရာတွေကို ဆွေးနွေးတင်ပြထားပါတယ်။

(မနက်ဖန် ညနေပိုင်းမှာတော့ မြန်မာနိုင်ငံဆိုင်ရာ ကုလသမဂ္ဂ လူ့အခွင့်အရေးအထူးစုံစမ်းသူ Tom Andrews နဲ့မေးမြန်းချက်ကို ထုတ်လွှင့်ပေးဖို့ရှိနေပါတယ်)။ 

Sunday, December 19, 2021

Interview with Bo Hla Tint of NUG on US policy. Part-1



“NUG ကို အသိအမှတ်ပြုရေးအတွက် ဆောင်ရွက်ချက်တွေကို လွှတ်တော်ထံ တင်ပြရမယ်ဆိုတာက အတော်ထူးပါတယ်”

(ဦးဘိုလှတင့်- အာဆီယံဆိုင်ရာ သံအမတ်ကြီး-NUG)
----------------------------------------------
(၂၀/၁၂/၂၀၂၁)

အမေရိကန်လွှတ်တော်က အတည်ပြုလိုက်တဲ့ National Defense Authorization Act (NDAA) အမျိုးသား ကာကွယ်ရေးဆိုင်ရာလုပ်ပိုင်ခွင့်ဥပဒေ- မှာပါတဲ့ အမျိုးသားညီညွတ်ရေးအစိုးရ NUG အားအသိအမှတ်ပြုရေးအတွက် အစိုးရဖက်က ဘာတွေဆောင်ရွက်ခဲ့ပြီးပြီလဲဆိုတာကို လွှတ်တော်ဆီ ၂ လအတွင်း ပြန်တင်ပြရမယ်ဆိုတဲ့အချက်ဟာ အတော်ထူးခြားနေတယ်လို့ အာဆီယံဒေသဆိုင်ရာ NUG သံအမတ်ကြီး ဦးဘိုလှတင့်ကပြောပါတယ်။

ဒီဇင်ဘာလ ၁၅ ရက်နေ့က လွှတ်တော်အမတ် Mitch McConnell ဦးဆောင်တင်သွင်းတဲ့ မြန်မာ့ဒီမိုကရေစီအားပေးထောက်ခံရေး ဥပဒေရဲ့ ထူးခြားချက်တွေနဲ့ပတ်သက်ပြီး BNN သတင်းဌာနမှ ဦးထက်အောင်ကျော်က မေးမြန်းစဉ် သူက အဲဒီလိုဖြေကြားခဲ့တာပါ။

အခုထုတ်လွှင့်ပေးမယ့် မေးမြန်းချက် ပထမ ပိုင်းမှာတော့...
- ဒီဥပေဒရဲ့ အနှစ်ချုပ်က ဘာလဲ...
- ဒါဟာ NUG ကို အမေရိကန်အစိုးရက တရားဝင်အသိအမှတ်ပြုလိုက်တဲ့ သဘောလား...
- CDM ဝန်ထမ်းတွေအပါဝင် စစ်ပြေးဒုက္ခသည်တွေအတွက် တရားဝင် အကူအညီတွေရလာတော့မလား...
- စစ်ကောင်စီကို အားပေးနေတဲ့ ရုရှားနဲ့တရုတ်ကို အမေရိကန်က ဘယ်လို ဟန့်တားမှာလဲ...
- ဒီလောက်အရေးကြီးတဲ့ ဥပဒေကို ထောက်ခံကြိုဆိုဖို့ ဒီမိုကရေစီအင်အားစုတွေဖက်က ဘာကြောင့် နှောက်နှေးနေတာလဲ.... စတဲ့အကြောင်းအရာတွေကို ဆွေးနွေးတင်ပြထားပါတယ်။

(အာဆီယံဥက္ကဌသစ်က စစ်ကောင်စီနဲ့ နီးနီးကပ်ကပ်ဆက်ဆံမယ်ဆိုတဲ့အပေါ် NUG ရဲ့ တုန့်ပြန်ချက်ပါဝင်တဲ့ ဒုတိယ ပိုင်းကိုတော့ မနက်ဖန်မှာ ဆက်လက် ထုတ်လွှင့်ပေးမှာဖြစ်ပါတယ်)။ 

Friday, December 17, 2021

Interview with Ko Hein Htet of Dawei youth. Part-2



“လူငယ်တွေလုပ်လိမ့်မယ်ဆိုပြီး လွှတ်ထားလို့မရဘူး။ လူတိုင်းက နိုင်တဲ့နေရာကနေ ကူညီပါဝင်ဖို့ လိုပါတယ်”

(ကိုဟိန်းထက်- လူငယ်ရေးရာကော်မီတီ အတွင်းရေးမှူးဟောင်း)
--------------------------------------------
(၁၇/၁၂/၂၀၂၁)

နွေဦးတော်လှန်ရေးမှာ လူငယ်တွေ အဓိကပါဝင်နေတာမှန်ပေမယ့် လူငယ်တွေချည်း လွှတ်ပေးထားလို့မရဘူး၊ နိုင်ငံသားတဦးချင်းစီက ကိုယ့်တတ်နိုင်တဲ့နေရာကနေ ကူညီပြီး တော်လှန်ရေးထဲပါဝင်ဖို့ လိုတယ်လို့ လူငယ်ရေးရာကော်မီတီ အတွင်းရေးမှူး ဟောင်း ကိုဟိန်းထက်ကပြောပါတယ်။

စစ်အာဏာသိမ်းမှု ၁၀ လကျော်ကာလ၊ နွေဦးတော်လှန်ရေးအခြေအနေနဲ့ပတ်သက်ပြီး BNN သတင်းဌာနမှ ဦးထက်အောင်ကျော်က မေးမြန်းစဉ် သူက အဲဒီလို ဖြေကြားခဲ့တာပါ။

အခု ထုတ်လွှင့်ပေးမယ့် မေးမြန်းချက် ဒုတိယ ပိုင်းမှာတော့...
- တနသာင်္ရီတိုင်းအတွင်း PDF တွေရဲ့လှုပ်ရှားနိုင်မှုအခြေအနေ ဘယ်လိုရှိသလဲ...
- တိုက်ပွဲဝင်နေတဲ့ လူငယ်တွေကို ဘယ်လိုကူညီပေးသင့်သလဲ...
- စစ်ပြေးဒုက္ခသည်တွေအတွက်ကော ဘယ်လိုကူညီပေးနေသလဲ...
- စစ်ကောင်စီကို လက်နက်ကိုင်တိုက်ပွဲနဲ့ ဖြုတ်ချမှရမယ်ဆိုတဲ့ နည်းလမ်းကို လူငယ်တွေက ဘာကြောင့်ရွေးခဲ့သလဲ...
- လက်နက်အင်အားသာလွန်နေတဲ့ စစ်ကောင်စီတပ်တွေကို လက်နက်မပြည်စုံတဲ့ PDF တပ်တွေက ဘယ်လိုအနိုင်ယူနိုင်မလဲ...
စတဲ့အကြောင်းအရာတွေကို ဆွေးနွေးတင်ပြထားပါတယ်။

Thursday, December 16, 2021

Interview with Pado Mahn Mahn of KNU. part-2 edit


“EAO တွေကြားမှာ ရပ်တည်ချက် ၃-မျိုးရှိနေပါတယ်၊ ကျနော်ကတော့ အာဏာရှင် အပြုတ်တိုက်ရေးလမ်းကို ရွေးထားပါတယ်”

(ပဒိုမန်းမန်း- KNU တွဲဖက်အထွေထွေအတွင်းရေးမှူး-၂ ဟောင်း)
----------------------------------------------
(၁၆/၁၂/၂၀၂၁)

တိုင်းရင်းသားလက်နက်ကိုင်အဖွဲ့ EAO တွေကြားမှာ ရပ်တည်ချက် ၃-ခုကွဲပြားနေဆဲ ဖြစ်တဲ့အတွက် နွေဦးတော်လှန်ရေးမှာ အချို့အဖွဲ့တွေ ပါမလာသေးတာဖြစ်တယ်လို့  KNU တွဲဖက်အထွေထွေအတွင်းရေးမှူး-၂ ဟောင်း- ပဒိုမန်းမန်ကပြောပါတယ်။

စစ်အာဏာသိမ်းပြီး ၁၀ လကျော်ကာလအတွင်း တိုင်းရင်းသားလက်နက်ကိုင်အဖွဲ့ EAO တွေနဲ့ ပြည့်သူ့ကာကွယ်ရေးတပ်ဖွဲ့ PDF တွေကြား ပူးပေါင်းဆောင်ရွက်နိုင်မှု အခြေအနေနဲ့ပတ်သက်ပြီး BNN သတင်းဌာနမှ ဦးထက်အောင်ကျော်က မေးမြန်းစဉ် သူက အဲဒီလိုဖြေကြားခဲ့တာပါ။

အခု ထုတ်လွှင့်ပေးမယ့် မေးမြန်းချက် ဒုတိယ ပိုင်းမှာတော့... 
- KNU နဲ့ အခြား ကရင်တိုင်းရင်းသား လက်နက်ကိုင်အဖွဲ့တွေကြား ပူးပေါင်းဆောင်ရွက်မှု အခြေအနေ ဘယ်လိုရှိသလဲ...
- ၁၉၈၈ တုန်းက တော်လှန်ရေးမအောင်မြင်ခဲ့ပေမယ့် ဒီနေ့ ၂၀၂၁ ကာလမှာ ဘာကြောင့် အောင်မြင်မယ်လို့ ယူဆနိုင်သလဲ...
- EAO ၈ ဖွဲ့ပဲ နွေဦးတော်လှန်ရေးထဲပါလာပြီး ကျန်အဖွဲ့တွေ မပါလာသေးတာ ဘာကြောင့်လဲ...
- လက်နက်ကိုင်တိုက်ပွဲ၊ လူထုတိုက်ပွဲ၊ သံတမန်ရေးတိုက်ပွဲနဲ့ နိုင်ငံရေးတိုက်ပွဲတွေကို ဘယ်လိုဟန်ချက်ညီ လုပ်သွားသင့်သလဲ... 
စတဲ့အကြောင်းတွေကို ဆွေးနွေးတင်ပြထားပါတယ်။

(ထားဝယ်-လောင်းလုံးဒေသက လူငယ်ခေါင်းဆောင်တဦးနဲ့ မေးမြန်းချက် ဒုတိယ ပိုင်းကိုတော့ စနေညမှာ ဆက်လက်ထုတ်လွှင့်ပေးမှာဖြစ်ပါတယ်)။

Wednesday, December 15, 2021

Interview with Pado Mahn Mahn of KNU. Part-1



“တပ်မဟာအားလုံးက တညီတညွတ်တည်း စစ်ရေးလှုပ်ရှားမှုဆောင်ရွက်ဖို့လိုပါတယ်”

(ပဒိုမန်းမန်း- KNU တွဲဖက်အထွေထွေအတွင်းရေးမှူး-၂ ဟောင်း)
----------------------------------------------
(၁၅/၁၂/၂၀၂၁)

KNU ထိမ်းချုပ်နယ်မြေတခုဖြစ်တဲ့ လေးကေ့ကော် ဒေသဆီ စစ်ကောင်စီတပ်တွေဝင်လာတာမျိုး နောက်ထပ်မကြုံစေဖို့အတွက် တပ်မဟာတွေအားလုံး တညီတညွတ်တည်း စစ်ရေးလှုပ်ရှားမှုဆောင်ရွက်ဖို့လိုတယ်လို့ KNU တွဲဖက်အထွေထွေအတွင်းရေးမှူး-၂ ဟောင်း- ပဒိုမန်းမန်ကပြောပါတယ်။

CDM တွေ ခိုလှူံနေတဲ့ လေးကေ့ကော်ဒေသဆီ စစ်ကောင်စီတပ်တွေဝင်လာပြီး ဖမ်းဆီးတာ၊ တိုက်ပွဲဖြစ်တာအပါဝင် လက်ရှိ နွေဦးတော်လှန်ရေးအပေါ် တိုင်းရင်းသားလက်နက်ကိုင်အဖွဲ့တွေရဲ့ ရပ်တည်ချက်နဲ့ပတ်သက်ပြီး BNN သတင်းဌာနမှ ဦးထက်အောင်ကျော်က မေးမြန်းစဉ် သူက အဲဒီလိုဖြေကြားခဲ့တာပါ။

အခု ထုတ်လွှင့်ပေးမယ့် မေးမြန်းချက် ပထမ ပိုင်းမှာတော့... လေးကေ့ကော်ဒေသ တိုက်ပွဲ နောက်ဆုံးအခြေအနေ၊ စစ်ကောင်စီတပ်တွေက ဒီဒေသဆီ ဘာကြောင့် မကြာခနဝင်ရောက်စစ်ဆေးနေတာလဲ၊ နွေဦးတော်လှန်ရေးအပေါ် KNU ရဲ့ သဘောထားက ဘယ်လိုရှိသလဲ၊ စစ်ကောင်စီရဲ့ အနိုင့်ကျင့်မှုမခံရအောင် EAO တပ်တွေနဲ့ PDF တပ်တွေ ဘယ်လိုပူးပေါင်းဆောင်ရွက်သင့်သလဲ... စတဲ့အကြောင်းအရာတွေကို ဆွေးနွေးတင်ပြထားပါတယ်။

(နွေဦးတော်လှန်ရေးမှာ EAO တွေ အားလုံးပါမလာသေးတာ ဘာကြောင့်လဲ...ဆိုတဲ့ သုံးသပ်ချက်ပါဝင်တဲ့ ဒုတိယ ပိုင်းကိုတော့ မနက်ဖန် ညပိုင်းမှာ ဆက်လက်ထုတ်လွှင့်ပေးသွားမှာဖြစ်ပါတယ်)။

Tuesday, December 14, 2021

Interview with Ko Hein Htet of Dawei Part-1



“စစ်ကောင်စီရဲ့ အကြမ်းဖက်မှုတွေက လက်နက်ကိုင်တော်လှန်မှ ရမယ်ဆိုတာကို ပိုပြီးယုံကြည်လာစေပါတယ်”

(ကိုဟိန်းထင်- လူငယ်ရေးရာကော်မီတီ အတွင်းရေးမှူးဟောင်း)
-----------------------------------------------
(၁၄/၁၂/၂၀၂၁)

စစ်တပ်က အာဏာသိမ်းမှုကိုလက်မခံနိုင်ကြောင်း ငြိမ်းချမ်းစွာဆန္ဒပြသူတွေကို စစ်ကောင်စီတပ်တွေက အကြမ်းဖက်ပစ်ခတ်သတ်ဖြတ်တဲ့အတွက် လူငယ်တွေဟာ ရွေးစရာမရှိပဲ လက်နက်ကိုင်တော်လှန်ရေးထဲ ရောက်လာနေတာဖြစ်တယ်လို့ ထားဝယ်ဒေသက ထင်ရှားတဲ့ လူငယ်ခေါင်းဆောင်တဦးဖြစ်သူ ကိုဟိန်းထက်ကပြောပါတယ်။

လူငယ်ခေါင်းဆောင်တွေ၊ လွှတ်တော်ကိုယ်စားလှယ်တွေ၊ PDF နဲ့ဆက်စပ်တယ်လို့ စွပ်စွဲခံရသူတွေရဲ့နေအိမ်တွေကို ချိတ်ပိတ်တာ၊ ဖမ်းဆီးတာတွေနဲ့ပတ်သက်ပြီး BNN သတင်းဌာမှ ဦးထက်အောင်ကျော်က မေးမြန်းစဉ် သူက အဲဒီလို ဖြေကြားခဲ့တာပါ။

အခုထုတ်လွှင့်ပေးမယ့် မေးမြန်းချက် ပထမ ပိုင်းမှာတော့... စစ်ကောင်စီက လူနေအိမ်တွေကို ချိတ်ပိတ်သိမ်းပိုက်နေပုံ၊ ထားဝယ်နဲ့ လောင်းလုံးဒေသမှာ ဆန္ဒပြပွဲတွေ ဆက်လက်အားကောင်းနေပုံ၊ ဆန္ဒပြပွဲတွေကို စစ်ကောင်စီက အကြမ်းဖက်ဖြိုခွင်းခြင်းက လက်နက်ကိုင်တော်လှန်ခြင်းကို ကိုယ်တိုင် ဖိတ်ခေါ်သလို ဖြစ်လာစေသလား... စတဲ့အကြောင်းအရာတွေကို ဆွေးနွေးတင်ပြထားပါတယ်။

(လွတ်မြောက်နယ်မြေရောက် လူငယ်တွေရဲ့လှုပ်ရှားမှူအကြောင်းဆွေးနွေးထားတဲ့ ဒုတိယ ပိုင်းကိုတော့ မနက်ဖန်ညမှာ ဆက်လက်ထုတ်လွှင့်ပေးမှာဖြစ်ပါတယ်)။


Sunday, December 12, 2021

Interview with Aung San Myint of KNPP. Part-3



“တနိုင်ငံလုံးလွတ်မြောက်မှ ငါတို့ ပြည်နယ်အရေးလည်း တပြိုင်တည်းပါသွားမယ်”

(ဦးအောင်ဆန်းမြင့်- (KNPP)
--------------------------------------------
(၁၂/၁၂/၂၀၂၁)

အခုဖြစ်နေတဲ့ တနိုင်ငံလုံးလွတ်မြောက်ရေးတိုက်ပွဲမှာ တိုင်းရင်းသားလက်နက်ကိုင်အဖွဲ့ (EAO) အားလုံးပါဝင်ဖို့လိုတယ်။ တနိုင်ငံလုံးလွတ်မြောက်ရေးတိုက်ပွဲမှာအားလုံးလက်တွဲပါဝင်ပြီး ပြည်နယ်အရေးကိုလည်း တပြိုင်တည်းဆောက်ရွက်သွားဖို့လိုတယ်လို့ ကရင်နီအမျိုးသားတိုးတက်ရေးပါတီ KNPP အတွင်းရေးမှူး ၂ ဦးအောင်ဆန်းမြင့်က တိုက်တွန်းလိုက်ပါတယ်။

စစ်အာဏာသိမ်းပြီး ၁၀ လကြာအခြေအနေမှာ တိုင်းရင်းသားလက်နက်ကိုင်အဖွဲ့ EAO တွေနဲ့ အသစ်ပေါ်လာတဲ့ PDF တပ်တွေကြား ဘယ်လိုပူးပေါင်း တိုက်ပွဲဝင်နေသလဲဆိုပြီး BNN သတင်းဌာနမှ ဦးထက်အောင်ကျော်က မေးမြန်းစဉ် သူက အဲဒီလိုဖြေကြားခဲ့တာပါ။

အခု ထုတ်လွှင့်ပေးမယ့် မေးမြန်းချက် နောက်ဆုံးပိုင်းမှာတော့... NUCC ထဲမှာ EAO တွေ အားလုံးပါလာအောင် ဘယ်လိုဆောင်ရွက်မလဲ၊ ၁၉၈၈ ကဖြစ်ပေါ်ခဲ့တဲ့ လက်နက်ကိုင်တော်လှန်ရေးအပေါ် EAO တွေဆက်ဆံပုံနဲ့ အခု ၂၀၂၁ မှာပေါ်လာတဲ့ နွေဦးတော်လှန်ရေးအပေါ် EAO တွေ ဆက်ဆံပုံ ဘယ်လိုကွာသလဲ၊ အရင်က ပြည်နယ်အရေးတခုတည်းကိုသာ ဦးပေးတဲ့ EAO တွေအနေနဲ့ အခု နွေဦးတော်လှန်ရေးမှာ အားလုံးပါဝင်ပြီး ပြည်နယ်အရေးကိုပါ ဆောင်ရွက်သင့်တယ်ဆိုတာကို လက်ခံလာကြပြီလား... စတဲ့ အကြောင်းအရာတွေကို ဆွေးနွေး တင်ပြထားပါတယ်။

(ဆန္ဒပြပွဲတွေနေ့စဉ်ဖြစ်ပေါ်နေတဲ့ ထားဝယ်ခရိုင် လောင်းလုံးမြိုနယ်က လူငယ်ခေါင်းဆောင်တဦးနဲ့ မေးမြန်းချက်ကိုတော့ အင်္ဂါနဲ့ ဗုဒ္ဓဟူးညပိုင်းတွေမှာ ဆက်လက်ထုတ်လွှင့်ပေးသွားဖို့ရှိနေပါတယ်)။ 

Saturday, December 11, 2021

Interview with Aung San Myint of KNPP. part-2

“အရင်လို နယ်စပ်တိုက်ပွဲ မဟုတ်တော့ဘူး၊ အခုတိုက်ပွဲတွေက မြို့ထဲမှာကို ဖြစ်နေတာ”

(ဦးအောင်ဆန်းမြင့်- (KNPP)
--------------------------------------------
(၁၁/၁၂/၂၀၂၁)

နွေဦးတော်လှန်ရေးကာလ တိုက်ပွဲတွေဟာ အရင်ခေတ်ကလို နယ်စပ်နဲ့ ကျေးလက်ဒေသမှာတင် ဖြစ်နေတာမဟုတ်ပဲ ရွာကြီးတွေ၊ မြို့ကြီးတွေထဲအထိ စစ်ရှိန်တက်နေပြီဖြစ်တယ်၊ လွတ်မြောက်နယ်မြေတွေ ကျယ်ပြန့်လာနေပြီဖြစ်တယ်လို့ ကရင်နီအမျိုးသားတိုးတက်ရေးပါတီ KNPP အတွင်းရေးမှူး ၂ ဦးအောင်ဆန်းမြင့်ကပြောပါတယ်။

အမျိုးသားညီညွတ်ရေးအတိုင်ပင်ခံကောင်စီ NUCC မှာပါဝင်တဲ့ KNPP နဲ့ အသစ်ပေါ်လာတဲ့ PDF တပ်တွေကြား ဘယ်လိုပူးပေါင်း တိုက်ပွဲဝင်နေသလဲဆိုပြီး BNN သတင်းဌာနမှ ဦးထက်အောင်ကျော်က မေးမြန်းစဉ် သူက အဲဒီလိုဖြေကြားခဲ့တာပါ။

အခု ထုတ်လွှင့်ပေးမယ့် မေးမြန်းချက် ဒုတိယ ပိုင်းမှာတော့... ကရင်နီဒေသတွင်းက တိုက်ပွဲအခြေအနေ၊ PDF နဲ့ မဟာမိတ်တပ်တွေရဲ့ နယ်မြေထိမ်းချုပ်နိုင်မှုအနေအထား၊ စစ်ပြေးဒုက္ခသည်တွေ ကူညီပေးနေမှုအခြေအနေတွေကို ဆွေးနွေး တင်ပြထားပါတယ်။

(တနိုင်ငံလုံးလွတ်မြောက်ရေးတိုက်ပွဲမှာပါဝင်မှ ပြည်နယ်တွေလွတ်မြောက်ရေးလည်း တပြိုင်တည်းပါသွားမယ်ဆိုတဲ့ အတွေးအခေါ်ကိုလက်ခံပြီး အားလုံးလက်တွဲ တိုက်ပွဲဝင်ဖို့လိုတယ်-ဆိုတဲ့ သုံးသပ်ချက်ပါတဲ့ နောက်ဆုံးအပိုင်းကိုတော့ မနက်ဖန် တနင်္ဂနွေညမှာ ဆက်လက် ထုတ်လွှင့်ပေးသွားမှာဖြစ်ပါတယ်)။




Friday, December 10, 2021

Interview with Aung San Myint of KNPP- part-1



“စစ်ကောင်စီနဲ့ တိုက်ပွဲစဖြစ်တာနဲ့ လူငယ်တွေအများကြီး ကျနော်တို့ဆီရောက်လာတယ်”

(ဦးအောင်ဆန်းမြင့်- Karenni National Progressive Party (KNPP)
--------------------------------------------------

(၁၀/၁၂/၂၀၂၁)

ပြီးခဲ့တဲ့မေလအတွင်း ကရင်နီအမျိုးသားတပ်မတော်နဲ့ စစ်ကောင်စီတပ်တွေကြား တိုက်ပွဲစတင်ပြီးနောက် ဒေသတွင်းရှိ ကရင်နီလူငယ်တွေ ထောင်နဲ့ချီပြီး သူတို့ဒေသဆီ ရောက်လာကာ လက်နက်ကိုင်တော်လှန်ရေးအတွင်း ပါဝင်နေတယ်လို့ ကရင်နီအမျိုးသားတိုးတက်ရေးပါတီ KNPP အတွင်းရေးမှူး ၂ ဦးအောင်ဆန်းမြင့်ကပြောပါတယ်။

စစ်အာဏာရှင် တော်လှန်ရေးတပ်ပေါင်းစု အမျိုးသားညီညွတ်ရေးအတိုင်ပင်ခံကောင်စီ NUCC မှာပါဝင်တဲ့ KNPP နဲ့ အသစ်ပေါ်လာတဲ့ PDF တပ်တွေကြား ဘယ်လိုပူးပေါင်း တိုက်ပွဲဝင်နေသလဲဆိုပြီး BNN သတင်းဌာနမှ ဦးထက်အောင်ကျော်က မေးမြန်းစဉ် သူက အဲဒီလိုဖြေကြားခဲ့တာပါ။

အခု ထုတ်လွှင့်ပေးမယ့် မေးမြန်းချက် ပထမ ပိုင်းမှာတော့... NUCC ထဲ KNPP နဲ့ တိုင်းရင်းသားလက်နက်ကိုင် EAO ၈ ဖွဲ့ ဘယ်လိုပါဝင်လာသလဲ၊ တိုင်းရင်းသားလက်နက်ကိုင်တွေနဲ့ ရွေးကောက်ခံလွှတ်တော်ကိုယ်စားလှယ်တွေ၊ CSO တွေကြား ဘယ်လို ပူးပေါင်းဆောင်ရွက်နေသလဲ၊ EAO တွေနဲ့ PDF တွေကြား ဘယ်လိုပူးပေါင်း တိုက်ပွဲဝင်နေသလဲ... စတဲ့ အကြောင်းအရာတွေကို ဆွေးနွေးတင်ပြထားပါတယ်။

(အရင်ကဆိုရင် တိုက်ပွဲဖြစ်တဲ့နေရာတွေဟာ နယ်စပ်က ရွာငယ်တွေဖြစ်ပေမယ့် “အခုတော့ တိုက်ပွဲက မြို့ထဲအထိရောက်နေပြီ”- ဆိုတဲ့အကြောင်း ဆွေးနွေးချက် ပါဝင်တဲ့ ဒုတိယ ပိုင်းကိုတော့ မနက်ဖန် စနေညမှာ ဆက်လက် ထုတ်လွှင့်ပေးမှာဖြစ်ပါတယ်)။

Thursday, December 9, 2021

Interview with U Thein Oo of NUG on ASSK part-2


“ဗိုလ်ချုပ်အောင်ဆန်းတို့ခေတ်နောက်ပိုင်း ပထမဆုံးအကြိမ် တနိုင်ငံလုံးပါဝင်တဲ့ လူထုတော်လှန်ရေးကို မြင်လာနေရတာဖြစ်ပါတယ်”

(ဦးသိန်းဦး- တရားရေးဝန်ကြီး- NUG)
-------------------------------------------------
(၉ /၁၂/၂၀၂၁)

နွေဦးတော်လှန်ရေးရဲ့ လက်ရှိအခြေအနေဟာ ဗိုလ်ချုပ်အောင်ဆန်းတို့ခေတ်၊ ကိုလိုနီနယ်ချဲ့တော်လှန်ရေးနောက်ပိုင်း ပထမ ဆုံးအကြိမ်ပြန်မြင်ရတဲ့ တနိုင်ငံလုံးပါဝင်တဲ့ လူထုတော်လှန်ရေးဖြစ်တယ်လို့ NUG တရားရေးဝန်ကြီး ဦးသိန်းဦးကပြောပါတယ်။

စစ်အာဏာသိမ်းမှု ၁၀ လ တာကြာပြီးချိန် နွေဦးတော်လှန်ရေးအလားအလာနဲ့ပတ်သက်ပြီး BNN သတင်းဌာနမှ ဦးထက်အောင်ကျော်က မေးမြန်းစဉ် သူက အဲဒီလိုဖြေကြားခဲ့တာပါ။

အခု ထုတ်လွှင့်ပေးမယ့် မေးမြန်းချက် ဒုတိယ ပိုင်းမှာတော့... စစ်ကောင်စီတပ်တွေက နေအိမ်တွေကို ချိတ်ပိတ်၊ ရွာမီးရှိ့ု၊ လူသတ်လုပ်နေတဲ့အပေါ် ဥပဒေ ကြောင်းအရ ရှုမြင်ချက်၊ ၁၉၉၀ ရွေးကောက်ပွဲအလွန် NCG ခေတ်နဲ့ အခု ၂၀၂၀ ရွေးကောက်ပွဲအလွန် NUG ခေတ် ဘယ်လိုကွာသလဲ၊ အာဏာရှင်ဖြုတ်ချရေးတိုက်ပွဲနဲ့ ဖက်ဒရယ်နိုင်ငံသစ်တည်ဆောက်ရေးကို ဘယ်လို ဟန်ချက်ညီ လုပ်သွားသင့်သလဲ... စတဲ့အကြောင်းအရာတွေကို ဆွေးနွေးတင်ပြထားပါတယ်။

(မနက်ဖန် သောကြာနဲ့ စနေညနေပိုင်းတွေမှာတော့ PDF တပ်တွေနဲ့ ပူးပေါင်းတိုက်ပွဲဝင်နေတဲ့ NUCC အဖွဲ့ဝင် တိုင်းရင်းသားလက်နက်ကိုင်အဖွဲ့ခေါင်းဆောင်တဦးနဲ့ မေးမြန်းချက်ကို ထုတ်လွှင့်ပေးသွားမှာဖြစ်ပါတယ်)။

Wednesday, December 8, 2021

Interview with U Their Oo of NUG on ASSK part-1



“အယူခံဝင်နေတာ မဟုတ်ဘူး၊ တရားခွင်ကနေ စစ်ကောင်စီကို စိမ်ခေါ်နေတာဖြစ်တယ်”

(ဦးသိန်းဦး- တရားရေးဝန်ကြီး- NUG)
-------------------------------------------
(၈/၁၂/၂၀၂၁)

ဒေါ်အောင်ဆန်းစုကြည်ဟာ စစ်ကောင်စီဖက်က မတရားဖမ်းဆီး ထောင်ချမယ်ဆိုတာကိုသိရဲ့နဲ့ တရားခွင်မှာ အမှုရင်ဆိုင်နေတာဟာ အယူခံဝင်နေတာမဟုတ်ပဲ စစ်ကောင်စီကို တရားခွင်ကနေ စိမ်ခေါ်နေတာသာဖြစ်တယ်လို့ NUG တရားရေးဝန်ကြီး ဦးသိန်းဦးကပြောပါတယ်။

နိုင်ငံတော်အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်နဲ့ သမ္မတဦးဝင်းမြင့်တို့ကို စစ်ကောင်စီက ထောင်ဒဏ်တွေချမှတ်လိုက်တာနဲ့ပတ်သက်ပြီး BNN သတင်းဌာနမှ ဦးထက်အောင်ကျော်က မေးမြန်းစဉ် သူက အဲဒီလို ဖြေကြားခဲ့တာပါ။

အခု ထုတ်လွှင့်ပေးမယ့် မေးမြန်းချက် ပထမ ပိုင်းမှာတော့... စစ်ကောင်စီက ဘာကြောင့်အခုလို ဖမ်းဆီးထောင်ချတာလဲ၊ နောက်ထပ် ဘယ်လိုစွဲချက်တွေ တင်ထားသေးလဲ၊ မတရားတဲ့ ဥပဒေတွေကို တရားရုံးတက်ပြီး ရင်ဆိုင်ဖြေရှင်းနေတာ အဓိပါယ်ရှိရဲ့လား... စတဲ့အကြောင်းအရာတွေကို ဆွေးနွေးတင်ပြထားပါတယ်။

(၁၉၉၀ ရွေးကောက်ပွဲတုန်းက လူထုဟာ လွှတ်တော်အမတ်တွေကိုသာ တာဝန်ပေးလိုက်တာဖြစ်ပြီး အခု ၂၀၂၀ ရွေးကောက်ပွဲမှာတော့ လူထုကိုယ်တိုင် တိုက်ပွဲထဲပါဝင်လာတဲ့အချက်က ထူးခြားတယ်ဆိုတဲ့ သုံးသပ်ချက် ပါဝင်တဲ့ ဒုတိယပိုင်းကိုတော့ မနက်ဖန်ညပိုင်းမှာ ဆက်လက် ထုတ်လွှင့်ပေးသွားမှာဖြစ်ပါတယ်)။

Tuesday, December 7, 2021

Interview with Nan Lay of Student on Yangon Strike



“စစ်ကောင်စီရဲ့ အင်အားသုံးအကြမ်းဖက်မှုက လူထုကို စုစည်းတုန့်ပြန်ဖို့ တွန်းအားပေးသလို ဖြစ်စေခဲ့ပါတယ်”

(ကိုနန်းလင်း- တကသ-ကျောင်းသားဟောင်းများအင်အားစု)
---------------------------------------------------
ငြိမ်းချမ်းစွာဆန္ဒပြနေတဲ့ ကျောင်းသားလူငယ်တွေကို စစ်ကားနဲ့ဝင်တိုက်ပြီး အကြမ်းဖက်ဖြိုခွင်းမှုတွေက လူထုကို စိတ်ဆိုးဒေါသထွက်စေပြီး ပိုပြင်းထန်တဲ့ ဆန္ဒပြမှုတွေ၊ လူထုအုံကြွမှုတွေကိုသာ ဖြစ်ပေါ်လာစေမှာဖြစ်တယ်လို့ ဆန္ဒပြပွဲတွေနဲ့ ဆက်စပ်ဆောင်ရွက်နေသူ တကသ- ကျောင်းသားဟောင်းများအဖွဲ့မှ ကိုနန်းလင်းက ပြောပါတယ်။

ရန်ကုန် ကြီးမြင်တိုင်မှာဖြစ်ပွားခဲ့တဲ့ ဆန္ဒပြလူငယ်တွေကို စစ်ကားနဲ့ဝင်တိုက်ဖြိုခွင်းတဲ့အပေါ် လူငယ်တွေရဲ့အမြင်-တုန့်ပြန်ချက်ကို BNN သတင်းဌာနမှ ဦးထက်အောင်ကျော်က မေးမြန်းစဉ် သူက အဲဒီလိုဖြေကြားခဲ့တာပါ။

အခု ထုတ်လွှင့်ပေးမယ့် မေးမြန်းချက်ထဲမှာတော့... ငြိမ်းချမ်းစွာဆန္ဒပြနေတဲ့ လူငယ်တွေကို စစ်ကားနဲ့ဝင်တိုက်ဖြိုခွင်းမှုအပေါ် လူငယ်တွေရဲ့ တုန့်ပြန်ချက်၊ ဒီဇင်ဘာ ၁၀ ရက်နေ့မှာကျရောက်တဲ့ နိုင်ငံတကာလူ့အခွင့်အရေးနေ့မှာ ဘာတွေ လုပ်ဖို့ရှိသလဲ၊ ဆန္ဒပြပွဲတွေကို အကြမ်းဖက်ဖြိုခွင်းခြင်းက PDF တွေ ပိုအင်အားကောင်းလာအောင် စစ်ကောင်စီက အားပေးနေတာလား၊ အဆုံးသတ်တိုက်ပွဲအတွက် လူငယ်တွေ ဘယ်လိုပြင်ထားကြသလဲ... စတဲ့အကြောင်းအရာတွေကို ဆွေးနွေးတင်ပြထားပါတယ်။


Saturday, December 4, 2021

Interview with Aung Myo Min of NUG on UN-Burma part-2


“ငြိမ်းချမ်းတဲ့နည်းကို စစ်ကောင်စီက လက်မခံရင် ခုခံစစ်နဲ့ ဖိအားပေးမှုကို အရှိန်မြှင့်ဖို့ပဲရှိပါတယ်”

(ဦးအောင်မျိုးမင်း- လူ့အခွင့်အရေးဝန်ကြီး- NUG)
---------------------------------------------------
နိုင်ငံတကာဖက်က ကမ်းလှမ်းနေတဲ့အတိုင်း တွေ့ဆုံဆွေးနွေးအဖြေရှာရေးကို စစ်ကောင်စီဖက်က ဆက်လက်ငြင်းပယ်နေမယ်ဆိုရင်တော့ PDF တွေရဲ့ ခုခံစစ်လှုပ်ရှားမှုကို အရှိန်မြှင့်၊ နိုင်ငံတကာဖိအားပေးမှုကိုအရှိန်မြှင့်ပြီး အဆုံးသတ်တိုက်ပွဲ ဆင်နွဲဖို့ပဲ ရွေးစရာ ကျန်လိမ့်မယ်လို့ NUG လူ့အခွင့်အရေးဝန်ကြီး ဦးအောင်မျိုးမင်းကပြောပါတယ်။

စစ်အာဏာသိမ်းမှု ၁၀ လပြည့်ကာလ နိုင်ငံရေးအလားအလာတွေနဲ့ပတ်သက်ပြီး BNN သတင်းဌာနမှ ဦးထက်အောင်ကျော်ကမေးမြန်းစဉ် ပြည်ထောင်စုဝန်ကြီးက အဲဒီလို ပြောခဲ့တာပါ။

အခုထုတ်လွှင့်ပေးမယ့် မေးမြန်းချက် ဒုတိယ ပိုင်းမှာတော့...သိန်းနဲ့ချီရှိလာနေတဲ့ IDP တွေကို နိုင်ငံတကာက ဘယ်လိုအကူအညီပေးနိုင်မလဲ၊ လူ့အခွင့်အရေးချိုးဖောက်မှုတွေအတွက် စစ်ကောင်စီခေါင်းဆောင်ပိုင်းကို အရေးယူနိုင်တော့မလား၊ ဆွေးနွေးပွဲတွေကို စစ်ကောင်စီက လက်မခံပဲ ဆက်ငြင်းပယ်နေရင် ဘာတွေဆက်ဖြစ်လာနိုင်သလဲ... စတဲ့ အကြောင်းအရာတွေကို ဆွေးနွေးတင်ပြထားပါတယ်။

Friday, December 3, 2021

Interview with Aung Myo Min of NUG on UN-Burma affair part-1


“သံတမန်ရေးတိုက်ပွဲမှာတော့ စစ်ကောင်စီဟာ တပွဲပြီးတပွဲ ဆက်တိုက်ရှုံးနေပါတယ်”

(ဦးအောင်မျိုးမင်း- လူ့အခွင့်အရေးဝန်ကြီး-NUG)
--------------------------------------------
(၃/၁၂/၂၀၂၁)

ဦးကျော်မိုးထွန်းကို သံအမတ်ကြီးအဖြစ် ကုလသမဂ္ဂ Credential Committee က ဆက်လက်အတည်ပြုလိုက်တာဟာ နွေဦးတော်လှန်ရေးအတွက် အောင်ပွဲဖြစ်ပြီး စစ်ကောင်စီအတွက်တော့ သံတမန်ရေးတိုက်ပွဲမှာ ဆက်တိုက်ကျဆုံးနေတဲ့ သင်္ကေတဖြစ်တယ်လို့ NUG လူ့အခွင့်အရေးဝန်ကြီး ဦးအောင်မျိုးမင်းကပြောပါတယ်။

ကုလသမဂ္ဂက ဦးကျော်မိုးထွန်းကို သံအမတ်ကြီးအဖြစ် ဆက်လက်အသိအမှတ်ပြုကြောင်း မနေ့ကကြေညာတာအပါဝင် စစ်အာဏာသိမ်းမှု ၁၀ လ တာ ကာလအတွင်း တိုးတက်ဖြစ်ထွန်းမှုတွေအကြောင်း BNN သတင်းဌာနမှ ဦးထက်အောင်ကျော်ကမေးမြန်းစဉ် သူက အဲဒီလို ဖြေကြားခဲ့တာပါ။

အခုထုတ်လွှင့်ပေးမယ့် မေးမြန်းချက် ပထမ ပိုင်းမှာတော့... ဦးကျော်မိုးထွန်းကို ကုလသမဂ္ဂဆိုင်ရာ သံအမတ်ကြီးအဖြစ် ဆက်လက်အသိအမှတ်ပြုလိုက်ခြင်းက နွေဦးတော်လှန်ရေးအတွက် ဘယ်လောက်အရေးကြီးသလဲ၊ စစ်ကောင်စီဖက်က သံတမန်စစ်မျက်နှာမှာ ဆက်တိုက်ကျဆုံးနေပြီလား၊ နိုင်ငံတကာရောက် မြန်မာတွေရဲ့ ထောက်ခံမှုက နွေဦးတော်လှန်ရေးအတွက် ဘယ်လောက်အရေးပါသလဲ၊ ဒေါ်လာ ၁၀ သန်းအပါဝင် ပြည်ပ အလှူငွေတွေက PDF တွေကို ဘယ်လောက်အထိ အားပေးနိုင်မလဲ... စတဲ့ အကြောင်းအရာတွေကို ဆွေးနွေးတင်ပြထားပါတယ်။

(စစ်ကောင်စီဖက်က ဆွေးနွေးပွဲကိုလက်မခံရင် PDF တွေရဲ့လက်နက်ကိုင်တော်လှန်ရေးက အဆုံးသတ်တိုက်ပွဲအထိဖြစ်သွားနိုင်သလားဆိုတဲ့ ဆွေးနွေးချက်ပါဝင်တဲ့ ဒုတိယ ပိုင်းကိုတော့ မနက်ဖန်ညမှာ ဆက်လက်ထုတ်လွှင့်ပေးမှာဖြစ်ပါတယ်)။

Wednesday, December 1, 2021

Interview with U Than Soe Naing after 10-months of Military coup- Part 2


“စစ်ကောင်စီက ဆွေးနွေးပွဲကိုလက်ခံမခံရင် စစ်ရေးအရဖြုတ်ချတာကို ခံရဖို့ရှိတယ်”

(ဦးသန်းစိုးနိုင်- နိုင်ငံရေး ဝေဖန်သုံးသပ်သူ)
------------------------------------------------------
(၁/၁၂/၂၀၂၁)

အာဆီယံနဲ့ နိုင်ငံတကာဖက်က တောင်းဆိုနေတဲ့အတိုင်း တွေ့ဆုံဆွေးနွေးရေးကို စစ်ကောင်စီဖက်က ဆက်ပြီး ငြင်းပယ်နေရင် ပြည်သူလူထုရဲ့ လက်နက်ကိုင်နည်းနဲ့ ဖြုတ်ချတာကို ခံရဖွယ်ရှိနေတယ်လို့ နိုင်ငံရေးဝေဖန်သုံးသပ်သူ ဦးသန်းစိုးနိုင်ကပြောပါတယ်။

စစ်အာဏာသိမ်းမှု ၁၀-လပြည့် အခြေအနေနဲ့ပတ်သက်ပြီး BNN သတင်းဌာနမှ ဦးထက်အောင်ကျော်က မေးမြန်းစဉ် သူက အဲဒီလိုဖြေကြားခဲ့တာပါ။

အခုထုတ်လွှင့်ပေးမယ့် မေးမြန်းချက် ဒုတိယ ပိုင်းမှာတော့... နိုင်ငံတကာ သံတမန် စစ်မျက်နှာမှာ စစ်ကောင်စီ တကယ်ကျရှုံးနေပြီလား၊ NUG ရဲ့ ငွေတိုက်စာချုပ်ရောင်းရငွေ ဒေါ်လာ ၁၀ သန်းက လက်နက်ကိုင်တိုက်ပွဲရဲ့ ဟန်ချက်ကို အပြောင်းအလဲဖြစ်လာစေနိုင်သလား၊ စစ်ကောင်စီကို လက်နက်ကိုင်တိုက်ပွဲနည်းနဲ့ဖြုတ်ချတာအပြင် အခြားရွေးချယ်စရာနည်း ကျန်သေးလား... စတဲ့အကြောင်းအရာတွေကို ဆွေးနွေးတင်ပြထားပါတယ်။

Tuesday, November 30, 2021

Interview with U Than Soe Naing after 10 months of Myanmar coup- Part 1


“မြိုနယ်ပေါင်း ၃၀၀ ကျော်သာရှိပေမယ့် PDF တပ်က ၄၀၀ နီးပါးအထိရှိလာနေပြီဖြစ်တယ်”

(ဦးသန်းစိုးနိုင်- နိုင်ငံရေး ဝေဖန်သုံးသပ်သူ)
------------------------------------------------------
(၃၀-၁၁-၂၀၂၁)

မြန်မာနိုင်ငံမှာ မြိုံနယ်ပေါင်း ၃၀၀ ကျော်သာရှိပေမယ့် ဒေသဆိုင်ရာ ပြည်သူ့ကာကွယ်ရေးတပ် PDF အရေအတွက်က ၄၀၀ နီးပါးအထိရှိလာနေပြီး ပြည်သူလူထုရဲ့ ခုခံတော်လှန်မှုက အရှိန်အဟုန်အလွန် ကောင်းလာနေပြီဖြစ်တဲ့အတွက် စစ်ကောင်စီ ဖက်က လူထုတောင်းဆိုချက်ကို လက်ခံဖို့လိုလိမ်မ့ယ်လို့ နိုင်ငံရေးဝေဖန်ဆန်းစစ်သူ ဦးသန်းစိုးနိုင်က ပြောပါတယ်။

စစ်အာဏာသိမ်းမှု ၁၀ လပြည့်အခြေအနေနဲ့ပတ်သက်ပြီး BNN သတင်းဌာနမှ ဦးထက်အောင်ကျော်က မေးမြန်းစဉ် သူက အဲဒီလိုဖြေကြားခဲ့တာပါ။

အခုထုတ်လွှင့်ပေးမယ့် မေးမြန်းချက် ပထမ ပိုင်းမှာတော့...အခုတကြိမ် စစ်တပ်က အာဏာသိမ်းမှုနဲ့ အရင် ၆၂၊ ၈၈ အာဏာသိမ်းမှုတွေကြားမှာ ဘယ်လိုကွာခြားချက်ရှိသလဲ၊ EAO တိုင်းရင်းသားလက်နက်ကိုင်အဖွဲ့တွေနဲ့ PDF အဖွဲ့တွေကြား ပူးပေါင်းဆောင်ရွက်မှုက အားရစရာရှိရဲ့လား၊ တရုတ်က စစ်ကောင်စီကို လက်မခံခြင်းဟာ ဘယ်လောက်အထိအရေးကြီးသလဲ... စတဲ့အကြောင်းအရာတွေကို ဆွေးနွေးတင်ပြထားပါတယ်။

(ဒီလိုအနေအထားမှာ စစ်ကောင်စီဖက်က အာဆီယံတောင်းဆိုချက်အတိုင်း ဆွေးနွေးရေးကိုလက်ခံသင့်သလား၊ PDF တပ်တွေနဲ့လူထုက လက်နက်ကိုင်နည်းနဲ့ဖြုတ်ချတာကို စောင့်နေသင့်သလား...ဆိုတဲ့ ဆွေးနွေးချက်ပါတဲ့ ဒုတိယ ပိုင်းကိုတော့ မနက်ဖန် ညမှာ ဆက်လက်ထုတ်လွှင့်ပေးမှာဖြစ်ပါတယ်)။

Sunday, November 28, 2021

 “နော်ဝေမှ ထန်တလန်သို့” သို့မဟုတ် စစ်အာဏာသိမ်းပြီး ၁၀ လကြာ အခြေအနေအပေါ် ရှုမြင်ချက်

------------------------------------

(၂၈/၁၁/၂၀၂၁)




(၁) “နော်ဝေမှ ထန်တလန်သို့”

----------------------


“နော်ဝေမှ ထန်တလန်သို့” လို့ အမည်ပေးထားတဲ့ ရန်ပုံငွေ ဈေးရောင်းပွဲတခုကို နော်ဝေနိုင်ငံ အော်စလိုမြို့မှာ မနေ့က (၂၇ နိုဝင်ဘာ) ကျင်းပခဲ့ပါတယ်။ CRPH Support Group, Norway ကဦးစီးကျင်းပတဲ့ အဲဒီပွဲကို ပရိသတ် ၂၀၀ ကျော်၊ ၃၀၀ နီးပါးအထိ တက်ရောက်အားပေးတာတွေ့ရပါတယ်။


ဈေးရောင်းပွဲအပြင် “Thantlang Evening” လို့အမည်ပေးထားတဲ့ တော်လှန်ရေးသီချင်းတွေနဲ့ဖျော်ဖြေတာ၊ ထန်တလန်အကြောင်း မှတ်တမ်းဗွီဒီယိုပြသာတာအပါဝင် ဖျော်ဖြေရေး ပညာပေးအစီစဉ်တခုကိုလည်း တပြိုင်တည်းပြုလုပ်ခဲ့ပါတယ်။


အော်စလို လူငယ်စင်တာခန်းမမှာကျင်းပတဲ့ အဲဒီပွဲမှာ အောက်ထပ်က ဈေးရောင်းပွဲမှာ ရောင်းသမျှအပြောင် အားပေးကြတဲ့အပြင် အပေါ်ထပ်က ဖျော်ဖြေရေးခန်းမမှာလည်း လူတွေ ပြည့်လျှံသွားခဲ့ပါတယ်။


ပွဲအပြီး စာရင်းအကြမ်းအရ ဈေးရောင်းပွဲကနေ ခရိုနာ ၄ သောင်းကျော် (အမေရိကန် ဒေါ်လာ ၅ ထောင်ကျော်) ထန်တလန်သို့ကူညီရန် ရန်ပုံငွေ ရခဲ့တယ်လို့ CRPH Support Group, Norway တာဝန်ရှိသူတဦးကပြောပါတယ်။

===================================== 


(၂) နွေဦးတော်လှန်ရေးနှင့် ပြည်ပက မျိုးဆက်သစ်များ

----------------------------


ဒီပွဲမှာ စာရေးသူသတိထားမိတဲ့ ထူးခြားချက်တခုက “ထန်တလန်အတွက် ရန်ပုံငွေ ဈေးရောင်းပွဲ” ဆိုပေမယ့် ချင်းတိုင်းရင်းသားတွေတင်မကပဲ တိုင်းရင်းပေါင်းစုံ တက်ရောက်အားပေးခြင်းပါ။ တခါ ၈၈ မျိုးဆက် လူကြီး (အခုတော့ လူကြီးဖြစ်ပြီပေါ့ ၅၀ တန်းဆိုတော့)တွေအပြင် မျိုးဆက်သစ် ၂၀ တန်းတွေလည်း အများကြီးတက်ရောက်လာတာတွေ့ရပါတယ်။


ဒါဟာ အခုနွေဦးတော်လှန်ရေးကာလအတွင်း ပြောင်းလဲတိုးတက်လာတဲ့ ထူးခြားချက်တခုဖြစ်ပါတယ်။ အော်စလိုပါလီမန်ရှေ့မှာကျင်းပလေ့ရှိတဲ့ ဆန္ဒပြပွဲတွေမှာလည်း အလားတူ တိုင်းရင်းသားပေါင်းစုံ၊ မျိုးဆက်ပေါင်းစုံ ပါဝင်လာတာတွေ့ရပါတယ်။


ဒီလိုရေးတော့ အရင်က ခွဲခြား ခွဲခြားရှိနေခဲ့သလားလို့ စာဖတ်သူတွေက မေးခွန်းထုတ်နိုင်ပါတယ်။ ဟုတ်ပါတယ်။ အတိအကျထုတ်ပြောဖို့ခက်ပေမယ့် အဲဒီလို ခွဲခြားမှုတွေ တဦးချင်း၊ တဖွဲ့ချင်းစီရဲ့ စိတ်ထဲမှာ ရှိနေတယ်လို့ စာရေးသူက ခံစားရပါတယ်။ 


တဖွဲ့က ဦးစီးလုပ်ရင် အခြားအဖွဲ့တွေက အစုံအညီမတက်တာမျိုး၊ ၈၈ မျိုးဆက်က လုပ်တာကို မျိုးဆက်အသစ်တွေက စိတ်မဝင်စားတာမျိုး သတိထားမိပါတယ်။ အခုတော့ ဒီလိုခွဲခြားဆက်ဆံမှုတွေကို နွေဦးတော်လှန်ရေးက ချေဖျက်ပစ်လိုက်ပါပြီ။


အထူးသဖြင့် နယ်စပ်မှာမွေးတဲ့၊ ပြည်ပမှာမွေးတဲ့ ဆယ်ကျော်သက်တွေ၊ အသက် ၂၀ တန်းလူငယ်တွေဟာ သူ ရောက်ရှိနေတဲ့ နိုင်ငံကလူငယ်တွေလို လွတ်လပ်ပေါ့ပါးစွာ နေနိုင်ခွင့်ရှိပေမယ့် “မြန်မာပြည်က အသက် ၂၀ တန်း GZ တွေရဲ့ အသေခံ တိုက်ပွဲဝင်နေမှုက သူတို့ကို လှုပ်နှိုးခဲ့ပါတယ်” တယ်လို့ စာရေးသူ ထင်ပါတယ်။


အနှစ်ပြန်ချုပ်ရရင် အခု ပြည်ပမှာကျင်းပတဲ့ ဒီမိုကရေစီအရေး၊ ဖက်ဒရယ်အရေး လှုပ်ရှားမှုပွဲတွေဟာ အရင်လို လူအနည်ငယ်သာ ပါဝင်တဲ့ပွဲမျိုးမဟုတ်တော့ဘူး။ တိုင်းရင်းသားပေါင်းစုံ၊ မျိုးဆက်ပေါင်းစုံ၊ ခွဲခြားဆက်ဆံမှုမရှိတော့ပဲ အားလုံးပါဝင်တဲ့ ပွဲတွေ ဖြစ်လာနေပါတယ်။


ဒီပွဲကိုလာတဲ့ တဦးချင်းကိုးမေးကြည့်မယ်ဆိုရင်လည်း “နွေဦးတော်လှန်ရေး ရန်ပုံငွေ” အတွက် တနည်းမဟုတ် တနည်းနဲ့ အကူအညီပေးနေသူတွေချည်းဖြစ်နေမှာ သေချာပါတယ်။ 


အများစုက CRPH Support Group, Norway ကနေတဆင့် အလှူငွေ လစဉ်ပုံမှန်ထည့်နေကြပေမယ့် အချို့ကတော့ သက်ဆိုင်ရာဒေသအလိုက် PDF တပ်တွေကိုကူညီတာ၊ CDM တွေကိုကူညီတာ၊ IDP တွေကိုကူညီတာ စသဖြင့် ရှိနေပါတယ်။ အချို့ဆိုရင် ရှိသမျှ အဖွဲ့အားလုံးကို နည်းနည်းစီခွဲပြီး ကူညီနေတာမျိုးလည်းတွေ့ရပါတယ်။ 


ဆိုလိုတာက ဒီပွဲမှာ ဘာမှမလုပ်ပဲ ဘေးထိုင်-ဘုပြော ရပ်ကြည့်နေသူမရှိပါ။ နိုင်တဲ့နေရာကနေ အားလုံးပါဝင်ကူညီပေးနေတာတွေ့ရပါတယ်။

==================================      


(၃) ထန်တလန်သို့ ရောက်ခဲ့စဉ်က

------------------------ 



တိုက်တိုက်ဆိုင်ဆိုင်ပါပဲ၊  “နော်ဝေမှ ထန်တလန်သို့” ရန်ပုံငွေ ဈေးရောင်းပွဲကျင်းပတဲ့ နေ့ဟာ စာရေးသူ ထန်တလန်သို့ ပထမဆုံးအကြိမ်ရောက်ဖူးခြင်း ၂ နှစ်ပြည့်တဲ့နေ့နဲ့ တိုက်ဆိုင်နေပါတယ်။ (နွေဦးတော်လှန်ရေးအောင်ပွဲခံပြီးရင် နောက်တခေါက် ထပ်သွားမယ်)


ချင်းပြည်နယ်ဟာ မြန်မာနိုင်ငံမှာ ဖွံဖြိုးတက်မှုအနည်းဆုံး၊ လမ်းပန်းဆက်သွယ်ရေး အခက်ခဲဆုံးလို့ဆိုကြပါတယ်။ ဒါကြောင့် သွားရောက်လည်ပတ်သူလည်း သိပ်မရှိပါဘူး။ ဒါပေမယ့် သဘာဝအလှတွေနဲ့ နာမည်ကြီးတဲ့ မင်းတပ်၊ ကန်ပက်လက်ဒေသက နတ်မတောင်ကိုတော့ အတော်များများ သွားကြတာတွေ့ရပါတယ်။


ဒီလို သဘာဝအလှတွေနဲ့နာမည်ကြီးတဲ့ နတ်မတောင် (ဒေသအခေါ်  ခေါနုသုမ်) ကိုသွားဖို့ ၂၀၁၉ ခုနှစ် နိုဝင်ဘာ ၂၇ ညမှာ စာရေးသူဟာ ပုဂံ-ပခုက္ကူကနေ မင်းတပ်မြို့ဆီ တက်လာခဲ့ပါတယ်။ ခေါင်းစဉ်မှာပါတဲ့ ချင်းပြည်နယ်မြောက်ပိုင်းက ထန်တလန်ဟာ မြေပြန့်ဒေသနဲ့ သိပ်ဝေးတယ်ဆိုနိုင်ပေမယ့် တောင်ပိုင်းက မင်းတပ်၊ ကန်ပက်လက်ကတော့ သိပ်မဝေးပါဘူး။


ပခုက္ကူကနေ ၃ နာခွဲ၊ ၄ နာရီလောက်မောင်းရင် မင်းတပ်ကိုရောက်ပါတယ်။ လမ်းကလည်း သိပ်အဆိုးကြီးမဟုတ်ပါဘူး။ ပခုက္ကူကနေ ကံမကိုဖြတ်၊ ပေါက်မြို့အထိက မြေပြန်သက်သက်လို့ထင်ပါတယ်။ ပေါက်ကနေ ကျောက်ထုအကြားမှာ တောင်ပေါ်နည်းနည်းတက်လာတယ်လို့ထင်ရပေမယ့် သိပ်အမြင့်ကြီးတော့ မဟုတ်ပါ။


ကျောက်ထု အလွန်မှာတော့ ကန်ပက်လက်၊ ဆောဖက်သွားတဲ့လမ်းခွဲ၊ တခါ ထီးလင်း၊ ဂန့်ကောဖက်သွားတဲ့လမ်းခွဲတို့ကိုတွေ့ရပါတယ်။ ကျောက်ထုကနေ မင်းတပ်ကြားမှာတော့ တကယ့်တောင်တက်ပေါ့။ တကယ်ဆို ကျောက်ထုအလွန် မကွေးတိုင်းနယ်စပ်နဲ့ ချင်းပြည်နယ်နယ်စပ်မှတ်တိုင်ကနေ မင်းတပ်အထိက ၇ မိုင်ပဲရှိပါတယ်။ 


အခုပြောခဲ့တဲ့ ပခုက္ကူကနေ ကျောက်ထုအထိ၊ ပြီးတော့ ဆော၊ ဟိုဖက်က ထီးချိုှုင့်၊ ဂန့်ကော အားလုံးဟာ မကွေးတိုင်းထဲမှာ ရှိပါတယ်။ ချင်းပြည်နယ်ထဲမှာတော့ ဒီဖက်မှာ မင်းတပ်၊ ဟိုဖက်မှာ ကန်ပက်လက်ပေါ့။ မင်းတပ်ကိုဖြတ်ပြီးဆက်သွားမယ်ဆိုရင် အပေါ်ဖက်မှာ မတူပီ၊ အနောက်ဖက်ကိုဖြတ်ဆင်းရင် ရခိုင်ရိုးမဖက်က ပလက်ဝကိုရောက်နိုင်ပါတယ်။ ဒါက ချင်းတောင်ရဲ့ တောင်ပိုင်း ပထဝီ အနေအထား။


ပင်လယ်ရေပြင်ရဲ့အထက် အမြင့်ပေ (၄၆၂၀)မှာရှိတဲ့ ထင်းရူးပင်တွေကြားက မင်းတပ်မြို့မှာ မြူခိုးတွေအုပ်ဆိုင်းနေပါတယ်။ မြို့ဝင် ဝင်ချင်း ပထမဆုံးတွေ့မိတာက ဦးဝမ္မသူးမောင်း ပန်းခြံပါ။ (စာရေးသူကို လိုက်ပို့တဲ့ မင်းတပ်အမတ်ကြီးက ဒီနေရာကို ပထမဆုံးရွေးပြတာလည်းဖြစ်နိုင်ပါတယ်။ အခုတော့ မင်းတပ်အမတ်မင်းလည်း နွေဦးတော်လှန်ရေးထဲမှာ)။


အဓိကပြောမှာက ထန်တလန်ဆိုတော့ မင်းတပ်အကြောင်း ဒီလောက်ပါပဲ။ မင်းတပ်ကနေ ဟိုဖက်ထွက်ပြီး တောကိုပြန်ပတ်မောင်းရင် နာမည်ကြီးလှတဲ့ နတ်မတောင် (ဒေသအခေါ်  ခေါနုသုမ်)ကိုရောက်ပါတယ်။ ဒီတောင်ကိုလည်း မြေပြန့်ကလူငယ်တွေ အတော်များများရောက်ဖူးပြီးသားဆိုတော့ အကျယ်မချဲ့တော့ပါ။


အဲဒီတောင်ကနေ မင်းတပ်ဖက်မပြန်ပဲ ဒီဖက်ဆင်းလာမယ်ဆိုရင် ကန်ပက်လက်ကိုရောက်ပါတယ်။ ကန်ပက်လက်ကနေထွက်လာရင် မကွေးတိုင်းထဲ ပြန်ဝင်ပြီး ဆောကိုရောက်ပါတယ်။ ဆောကနေ ပြန်ထွက်ရင် ရှေ့မှာပြောခဲ့တဲ့ မင်းတပ်ကိုသွားစဉ်ကလမ်းခွဲ ကျောက်ထုကို ပြန်ရောက်ပါတယ်။ 


(အခုတော့ ဒီဒေသမှာ စစ်ပွဲတွေဖြစ်နေပြီး မင်းတပ်၊ ကန်ပက်လက်၊ ဆော ဒေသခံ PDF တပ်တွေက ဒေသတခုလုံးကို ကြီးစိုးထားလုက်ပြီလို့ ယူဆရပါတယ်)။


ကျောက်ထုကနေ ပေါက်ကိုဆင်းပြီး ပခုက္ကူပြန်ဆင်းမလား၊ မြိုင်ဖက်ကိုဖြတ်ပြီး စစ်ကိုင်းမန္တလေးဝင်မလား၊ ဒါမှမဟုတ် ရခိုင် အမ်း၊ ကျောက်ဖြူဖက်ဆင်းမလား စသဖြင့် လမ်းခွဲတွေရှိပါတယ်။


စာရေးသူက ထန်တလန်သွားမှာဆိုတော့ ကျောက်ထုကနေ ထီးလင်း၊ ဂန့်ကော လမ်းကြမ်းဖက်ကိုရွေးလိုက်ပါတယ်။ တကယ်ဆို မင်းတပ်ကနေ မတူဖက်သွားပြီး ဟားခါးကိုတက်တဲ့လမ်းအတိုင်းသွားမယ်ဆိုရင် မကွေးတိုင်းထဲ ပြန်ဆင်းစရာမလိုပဲ ဟားခါးကနေ ထန်တလန်ကိုရောက်နိုင်ပါတယ်။ 


ဒါပေမယ့် လမ်းကသိပ်ကြမ်းတယ်ဆိုတဲ့အတွက် မကွေးတိုင်းထဲပြန်ဆင်းပြီး ကျောက်ထု၊ ထီးလင်း၊ ဂန့်ကောလမ်းကိုပဲရွေးလိုက်ပါတယ်။ ဒီလမ်းတလျောက်မှာတော့ ယောချောင်းတလျောက်က ရွာတန်းတွေကိုတွေ့ရပြီး တဖက်မှာ ချင်းတောင်တန်း၊ တဖက်မှာ မကွေးတိုင်းထဲက မြေပြန့်စိုက်ခင်းတွေပေါ့။ ဒီဒေသဟာ ယောနယ်အဖြစ် နာမည်ကြိးပြီး အခုတော့ ယောဒေသ PDF က ကြီးစိုးထားလိုက်ပြီလို့ ယူဆရပါတယ်။


ဂန့်ကောကနေ ဟားခါးဖက် မတက်ပဲ ဆက်မောင်းမယ်ဆိုရင် အခု တိုက်ပွဲတွေအပြင်းအထန်ဖြစ်နေတဲ့ စစ်ကိုင်းတိုင်း ကလေးမြို့ ဖက်ရောက်ပါတယ်။ ဂန်ကောဟာ ဟားခါးနဲ့ ကလေးဖက်သွားတဲ့လမ်းခွဲမြို့ဖြစ်သလို မြေပြန့်ဒေသ ပခုက္ကူ၊ ရေစကြို၊ မုံရွာဖက် ဆင်းနိုင်တဲ့ လမ်းခွဲမြို့လည်းဖြစ်ပါတယ်။


စာရေးသူက ထန်တလန်ကိုသွားမှာဆိုတော့ ဂန်ကောမှာ နေ့လည်စာ စားပြီး ဟားခါးကို ဆက်တက်ပါတယ်။ ဂန့်ကော-ဟားခါးလမ်းကတော့ တကယ့် မဟာတောင်တက်လမ်းပါပဲ။ ချင်းတောင်ပိုင်းက မင်းတပ်၊ ကန်ပက်လက်လမ်းတွေလို တိုတိုလေးတွေ မဟုတ်ဘူး။


တောင်ကမြင့်၊ အကွေ့အကောက်ကများ၊ လမ်းကကျဉ်း၊ ရှည်လျားထွေပြားဆိုတော့ မိုင် ၇၀ သာရှိတဲ့ ဂန့်ကော-ဟားခါးလမ်းကို ၃ နာရီလောက်မောင်းရပါတယ်။ မနက်ထွက်လာတဲ့ မင်းတပ်ကနေပြန်တွက်မယ်ဆိုရင် မင်းတပ်-ဟားခါးဟာ မိုင် ၂၀၀ လောက်ရှိပါတယ်။


ဟားခါးဟာ မင်းတပ်ထက်ပိုမြင့်ပြီး ပင်လယ်ရေမျက်နှာပြင်အထက် (၆၁၂၀) ပေမှာရှိတဲ့အတွက် မနက်ခင်းဆို တမြို့လုံးကိုမြူဆိုင်းနေတဲ့ပုံက သိပ်လှပါတယ်။ (မင်းတပ်က (၄၆၂၀)ပေသာမြင့်ပါတယ်)။ ပြည်နယ်မြို့တော်ရဲ့ ပါလီမန်အဆောက်ဦသစ်နဲ့ ဟိုး.. တောင်တန်းပေါ်က အိမ်ယာအသစ်တွေကို မြို့အဝင်မှာရှိတဲ့ (ဒုသမ္မတ ဟင်နရီ ဗန်ထီးယူ အမည်နဲ့ဖွင့်ထား) View Point Tower ပေါ်ကနေကြည့်ရတာ သိပ်အရသာရှိပါတယ်။


ဟားခါးနဲ့ ထန်တလန်ဟာ ၂၂ မိုင်သာဝေးတယ်ဆိုပေမယ့် လမ်းကြမ်းပြီး တောင်-အတက်-အဆင်း၊ အကွေ့-အကောက် များလွန်းတာကြောင့် တနာခွဲလောက်မောင်းရပါတယ်။ မြို့လယ်မှာ နိုင်လွန်ကတ္တရာခင်းထားပြီး မြို့လေးက အေးချမ်းငြိမ်သက်လှပါတယ်။


မြို့လယ်မှာ ကြီးမားပြီး ရှေးကျလှတဲ့ ဘုရားကျောင်းတခုကိုတွေ့ရပါတယ်။ စာရေးသူ စခန်းချတဲ့နေရာက မြို့ဟိုဖက်အထွက် တောင်တန်းတွေကြားမှာ ဆောက်တဲ့ Resort အသစ်မှာ။ မြူခိုးတွေဆိုင်းနေပြီး အေးစိမ့်စိမ့်ရာသီဥတု၊ မနက်ခင်းနေရောင်အောက်မှာ လမ်းလျောက်ရတဲ့အရသာက ဥရောပက ဆွင်ဇလန်တို့၊ သြစီတီယားတို့၊ နော်ေ၀ နွေရာသီလိုမျိုး။  ဥရောပသွားတွေ အကြိုက်တွေ့မယ့် နေရာမျိုးပေါ့။


အသစ်ဆောက်နေတဲ့ ဖလမ်းလေဆိပ်သာ ပြီးရင် ထန်တလန်ဒေသဟာ တကယ့် Eco Tourism အတွက် အရေးပါတဲ့နေရာ၊ လူကြိုက်များတဲ့နေရာ ဖြစ်လာမှာ သေချာပါတယ်။  


ဒါပေမယ့် စာရေးသူက ညနေပိုင်းရောက်ပြီး မနက်ပိုင်းပြန်ထွက်လာတာဆိုတော့ မြို့တခွင်ကို အသေချာမလေလာခဲ့ရပါတယ်။ မြို့ကနေ ပြန်အထွက် မြို့အဝင်ဆိုင်းဘုတ်ရှိတဲ့ တောင်ကုန်းပေါ်ကနေ ထန်တလန်ကို ပြန်ကြည့်ရတဲ့ မြင်ကွင်းက သိပ်လှပါတယ်။


အခုတော့ ဒီမြို့လေးဟာ စစ်မြေပြင်ဖြစ်လို့...။ မီးလောင်ခံရတာ ၃ ကြိမ်မက ရှိနေပြီဖြစ်ပြီး (မနေ့ကလည်း တခါ ထပ်မီးရှိုခံရပြန်ဟုသိရ) အိမ်ခြေ ၂၀၀ ကျော်အထိ ပျက်စီးနေပြီလို့သိရပါတယ်။ မြို့လူဦးရေ တသောင်းကျော်ဟာလည်း မြို့ကနေ ထွက်ပြေးပြီး ကျေးလက်ကရွာတွေမှာ တသောင်းခန့်နဲ့ အိန္ဒိယနယ်စပ် မီဇူရမ်မှာ တသောင်းနီးပါး ခိုလှုံနေကြတယ်လို့ ဒေသခံလူ့အခွင့်အရေးအဖွဲ့တွေကပြောပါတယ်။


ဒီမြို့လေးအတွက် ကျနော်တို့ ဘယ်လိုကူညီပေးနိုင်ကြမလဲ...။ တကယ်တော့ ဒီမြို့တခုတည်းမဟုတ်ပါဘူး။ ချင်းပြည်နယ်က မြို့ရွာအတော်များများ စစ်ကောင်စီတပ်တွေရဲ့ မီးရှိုဖျက်ဆီးခြင်းကိုခံနေရတာပါ။ ထန်တလန်ကတော့ အဆိုးဆုံးပေ့ါ။


တခါ ချင်းနဲ့ဆပ်စပ်နေတဲ့ မကွေး၊ စစ်ကိုင်းတိုင်းထဲမှာလည်း စစ်ပွဲတွေက ပြင်းထန်၊ လူနေအိမ်တွေ မီးရှို့ဖျက်ဆီးခံနေရတာ မနည်းမနော။ ပြီးတော့ ကယား။ ကရင်နီဒေသ။


တဖက်မှာ စစ်ဒဏ်ကြောင့် ဒီလိုခံနေရသလို အခြားတဖက်မှာလည်း နွေဦးတော်လှန်ရေးကနေ မွေးထုတ်ပေးလိုက်တဲ့ ဒေသခံ PDF တွေက ဒီဒေသ ၄ ခုမှာ အင်အား အတောင့်တင်းဆုံး။ 



=================================


(၄) အဲတော့ ဘာဆက်ဖြစ်မှာလဲ

------------------------- 


အပျက်အစီးသတင်းတွေ၊ မီးရှို့ခံရတဲ့ပုံတွေ မီဒီယာတွေပေါ်မှာ အတော်များများ တွေ့နေရပေမယ့် နွေဦးတော်လှန်ရေးကနေ မွေးထုတ်ပေးလိုက်တဲ့ ဒေသခံ PDF တွေရဲ့ လှုပ်ရှားမှုကို တွေ့ရဖို့ ခက်ခဲနေဆဲဖြစ်ပါတယ်။


စာရေးသူ တွေ့မိတဲ့ ဓာတ်ပုံ ဗွီဒီယို မှတ်တမ်းတွေအရ ချင်းနဲ့ ကရင်နီဒေသက PDF တပ်တွေဟာ အရင် ၈၈ တုန်းက ကျောင်းသားတပ်မတော်လို နယ်စပ်ကတောတောင်တွေထဲ တိုက်နေတာမျိုးမဟုတ်ပါဘူး။ မြို့ငယ်တွေနဲ့  ကျေးလက်ဒေသတွေကို အသေချာ ထိမ်းချုပ်ပြီး ထောင်ချီတဲ့တပ်အင်အားနဲ့ လူထုနဲ့အတူ ချီတက်နေတာ တွေ့ရပါတယ်။


တချို့နေရာတွေမှာဆိုရင် ကုန်တင်ကားတွေ၊ လေးဘီးယက်ကားတွေနဲ့ PDF တပ်တွေ စစ်ကြောင်းချီတက်နေပုံ၊ IDP အတွက် ရိက္ခာ ဆေးဝါး ပို့ပေးနေပုံက ကျေးလက်ဒေသ အတော်များများကို PDF တွေက ထိမ်းချုပ်ထားတယ်ဆိုတာ ပေါ်လွင်နေပါတယ်။


လေ့လာသူတွေရဲ့အဆိုအရ တနိုင်ငံလုံးမှာ PDF တပ်ဖွဲ့ပေါင်း ၃၀၀ ကျော်အထိရှိနေပြီး (ဒီထဲမှာ ၂ နှစ်တာဝန်ထမ်းရမယ့် NUG ကာကွယ်ရေးဝန်ကြီးဌာနအောက်က အမြဲတန်း PDF မပါသေးဟုထင်) အင်အား တသိန်းကျော်တယ်လို့သိရပါတယ်။ အစောပိုင်းမှာ တူမီးသေနတ်၊ လက်လုပ်မိုင်းတွေကိုသုံးနေရပေမယ့် အခု မောင်းပြန်သေနတ် အတော်များများရနေပြီလို့ဆိုပါတယ်။


တခါ NUG က ထုတ်ရောင်းတဲ့ ငွေတိုက်စာချုပ်ကိုဝယ်ယူအားပေးမှုကလည်း ထင်ထားတာထက် အများကြီးအားကောင်းနေပြီး ၂၄ နာရီအတွင်း ဒေါ်လာ ၁၀ သန်းအထိ ရရှိခဲ့တယ်ဆိုပါတယ်။ ဒါဟာ ရှေ့မှာပြောခဲ့တဲ့ လစဉ်ထည့်ဝင်နေတဲ့အလှုငွေ၊ ဒေသခံ PDF တွေ၊ IDP တွေ၊ CDM တွေကို လစဉ်အကူအညီပေးနေတာတွေနဲ့ မဆိုင်သေးပါဘူး။ တနည်းအားဖြင့် အဲဒီလို အကူအညီပုံမှန်ပေးနေတဲ့ကြားကကို နောက်ထပ် အကူအညီတွေကို ဒေါ်လာသန်းနဲ့ချီ ဆက်ပေးနေကြတာပါ။


ပြည်ပကလူတွေတင်မက။ ပြည်တွင်းကလူတွေကလည်း ပြည်ပက အသိတွေဆီမေးပြီး ငွေတိုက်စာချုပ်တွေဝယ်နေကြလို့ ဘဏ်တွေကတောင် ဖြေးဖြေးလှူကြပါဆိုပြီး တောင်းပန်နေရတဲ့အထိ။ 


ဆိုလိုတာက နွေဦးတော်လှန်ရေးအပေါ် လူထုထောက်ခံမှုက အရင်ဘယ်တုန်းကနဲ့မှ မတူအောင် အားကောင်းနေပါတယ်။ တနည်းအားဖြင့် စစ်ကောင်စီအပေါ် လူထုရဲ့ မလိုလားမှုက အထင်းသားပေါ်နေပြီး အချိန်ကြာလာတာနဲ့အမျှ မလိုလားမှုကနေ အမြစ်ပြတ် ချေမှုန်းရေးအထိ တာစူနေတဲ့ သင်္ကေတတွေ တွေ့လာနေရပါတယ်။


ဒီအချိန်မှာ စစ်ကောင်စီက ဘာဆက်လုပ်မှာလဲ၊ ၂၀၂၃ မှာရွေးကောက်ပွဲလုပ်ပေးမယ် ပြောထားရုံနဲ့ မရလောက်ဘူးဆိုတာကိုတော့ လူတိုင်းသိလောက်ပါတယ်။ အာဆီယံ အပါဝင် နိုင်ငံတကာရဲ့ ကြားဝင်ဖြန်ဖြေမှုကို စစ်ကောင်စီက လက်ခံမှာလား။


အခုချိန်အထိကတော့ အာဆီယံနဲ့လည်းအဆင်မပြေ၊ တရုတ်နဲ့လည်းအဆင်မပြေ၊ ကုလ နဲ့လည်းအဆင်မပြေတဲ့အတွက် စစ်ကောင်စီဟာ ဆွေးနွေးပွဲလမ်းကို ပိတ်ထားသလိုဖြစ်နေပါတယ်။


ဒါဖြင့် ရင်ဆိုင်တိုက်ပွဲတွေကို ဆက်လုပ်သွားမှာလား၊ အခု ရှိနေတဲ့၊ လူထု ထောက်ခံမှုအားကောင်းလှတဲ့ PDF တပ်တွေကို အပြုတ်တိုက်နိုင်မယ်လို့ စစ်ကောင်စီက ခန့်မှန်းထားပါသလား...။


အာဏာသိမ်း ၁၀ လပြည့်အတွက် စာရေးသူမေးမြန်းထားတဲ့ နိုင်ငံရေးအကဲခတ်တဦးရဲ့ အမြင်ကို ဒီနေရာမှာ တင်ပြချင်ပါတယ်။ သူ့ရဲ့အမြင်တိုင်းဆိုရင် စစ်ကောင်စီအတွက် အကောင်းဆုံးထွက်ပေါက်ဟာ အာဆီယံအပါဝင် နိုင်ငံတကာရဲ့ ကြားဝင်မှုကို လက်ခံပြီး ဆွေးနွေးအဖြေရှာရေးဖြစ်ပါတယ်။


အဲဒါကိုလက်မခံပဲ ဆက်တိုက်နေမယ်ဆိုရင်တော့ ရွေးစရာ ၂ လမ်းပဲရှိပါတယ်။ တလမ်းက အာဏာသိမ်းဥက္ကဌကို ဖြုတ်ချပြီး တပ်မတော်ကနေ လူထုခေါင်းဆောင်တွေနဲ့ ဆွေးနွေးအဖြေရှာရေးနဲ့ နောက်တနည်းကတော့ PDF နဲ့လူထုရဲ့ တဖြေးဖြေးအင်အားကောင်းလာနေတဲ့ စစ်ရေးအရတိုက်ခိုက်ဖြုတ်ချမှုကို စစ်ကောင်စီက ခံယူဖို့ပဲဖြစ်ပါတယ်။



ထက်အောင်ကျော်

(၂၈-၁၁-၂၀၂၁)

Friday, November 26, 2021

Interview with Banya Khung Aung (KHRG) part- 2


“ပြည်နယ်လူဦးရေ သုံးပုံတပုံ စစ်ပြေးဒုက္ခသည်ဖြစ်နေတဲ့အတွက် ပြင်ပက အကူအညီမရရင် မလွယ်ဘူး”

(ဗညားခွန်အောင်- Karenni Human Rights Group)
------------------------------------------------
(၂၇/၁၁/၂၀၂၁)

အာဏာသိမ်းစစ်ကောင်စီတပ်ရဲ့အကြမ်းဖက်မှုတွေကြောင့် ကရင်နီဒေသခံ တသိန်းကျော်၊ တနည်းအားဖြင့် ဒေသလူဦးရေရဲ့ သုံးပုံတပုံဟာ အိုးအိမ် စွန့်ခွာထွက်ပြေးနေရတဲ့အတွက် ကုလသမဂ္ဂအပါဝင် ပြင်ပကအကူအညီမရဘူးဆိုရင် ဆက်လက်ရပ်တည်ဖို့ မလွယ်ဘူးလို့  ကရင်နီ လူ့အခွင့်အရေးအဖွဲ့က ဗညားခွန်အောင်ကပြောပါတယ်။

စစ်တပ်က အာဏာသိမ်းပြီး ၁၀ လနီးပါးကြာကာလ စစ်ပြေးဒုက္ခသည်တွေရဲ့အခြေအနေနဲ့ပတ်သက်ပြီး BNN သတင်းဌာနမှ ဦးထက်အောင်ကျော်က မေးမြန်းစဉ် သူက အဲဒီလိုဖြေကြားခဲ့တာပါ။

အခု ထုလွှင့်ပေးမယ့် မေးမြန်းချက် ဒုတိယ ပိုင်းမှာတော့... ၁၀ လနီးပါးကြာလာတဲ့အထိ ကုလသမဂ္ဂ အေဂျင်စီတွေက စစ်ပြေးဒုက္ခသည်တွေကို အကူအညီမပေးနိုင်သေးတာ ဘာကြောင့်လဲ၊ NUG နဲ့ ဒေသခံ လက်နက်ကိုင်အဖွဲ့တွေကကော ဒုက္ခသည်တွေကို ဘယ်လိုအကူအညီပေးနေသလဲ၊ ပြည်ပရောက် မြန်မာတွေကကော ဘယ်လို ကူညီပေးနေသလဲ၊ ကရင်နီဒေသ တိုက်ပွဲအခြေအနေ ဘယ်လိုရှိသလဲ၊ ဒုက္ခသည်တွေ ဘယ်တော့ အိမ်ပြန်နိုင်မလဲ... စတဲ့ အကြောင်းတွေကို ဆွေးနွေးတင်ပြထားပါတယ်။

Interview with Banya Khung Aung (KHRG) Part 1



“ပြည်သူမှ ပြည်သူသို့ အကူအညီက ရေရှည်မလွယ်တဲ့အတွက် UN အေဂျင်စီတွေရဲ့ အကူအညီ လိုအပ်နေပါတယ်”

(ဗညားခွန်အောင်- Karenni Human Rights Group)
-----------------------------------------------------
(၂၆/၁၁/၂၀၂၁)

စစ်ကောင်စီတပ်တွေရဲ့ ထိုးစစ်ဆင်မှုကြောင့် ကရင်နီဒေသမှာ အိုးအိမ်စွန့်ခွာ ထွက်ပြေးနေရသူဦးရေ တသိန်းကျော်အထိရှိလာနေပြီး ရိက္ခာနဲ့ အမိုးအကာအတွက် အကူအညီတွေ အရေးပေါ်လိုအပ်နေတယ်လို့ ကရင်နီလူ့အခွင့်အရေးအဖွဲ့က ဗညားခွန်အောင်က ပြောပါတယ်။

စစ်တပ်ကအာဏာသိမ်းပြီး ၁၀ လနီးပါးကာလအတွင်း ကရင်နီဒေသက စစ်ပြေးဒုက္ခသည်တွေအခြေအနေနဲ့ပတ်သက်ပြီး BNN သတင်းဌာနမှ ဦးထက်အောင်ကျော်က မေးမြန်းစဉ် သူက အဲဒီလိုပြောခဲ့တာပါ။

အခုထုတ်လွှင့်ပေးမယ့် မေးမြန်းချက် ပထမ ပိုင်းမှာတော့... ပြီးခဲ့တဲ့ ရက်ပိုင်းက ဖြစ်ပွားခဲ့တဲ့ လွိုင်ကော်မြို့က ကရုနာဆေးခန်းကို စစ်ကောင်စီတပ်တွေက ဝင်ရောက်စီးနင်းမှုနောက်ဆုံးအခြေအနေ၊ တိုက်ပွဲအခြေအနေနဲ့ စစ်ပြေးဒုက္ခသည်ဦးရေ တိုးလာနေမှု၊ နေအိမ်မီးလောင်မှုနဲ့ ဒုက္ခသည်များသေဆုံးမှု၊ ပြည်သူက ပြည်သူသို့အကူအညီကိုသာအားကိုးနေရပြီး ကုလသမဂ္ဂအဖွဲ့အစည်းတွေက အခုချိန်အထိ အကူအညီ မပေးနိုင်သေးတာ ဘာကြောင့်လဲ... စတဲ့ အကြောင်းအရာတွေကို ဆွေးနွေးတင်ပြထားပါတယ်။

(ကရင်နီပြည်နယ်ရဲ့ လူဦးရေ သုံးပုံတပုံ နေရပ်စွန်ခွာထွက်ပြေးနေရတဲ့အပေါ် ဘယ်လို အကူအညီပေးနိုင်မလဲဆိုတဲ့ ဆွေးနွေးချက်ပါဝင်တဲ့ ဒုတိယ ပိုင်းကိုတော့ မနက်ဖန်ညမှာ ဆက်လက် ထုတ်လွှင့်ပေးသွားမှာဖြစ်ပါတယ်။)

Tuesday, November 23, 2021

Interview with Bo Hla Tin of NUG on China-ASEAN Meeting.



“NUG က နိုင်ငံတကာရဲ့ ယုံကြည်မှုကို ပိုရလာနေပါတယ်”

(ဦးဘိုလှတင့်- NUG ၏ အာဆီယံဆိုင်ရာ သံအမတ်ကြီး)
-----------------------------------------------------
(၂၃/၁၁/၂၀၂၁)

ပြည်သူလူထုတရပ်လုံးက နွေဦးတော်လှန်ရေးအပေါ်  ပြတ်ပြတ်သားသားထောက်ခံ အားပေးလာနေတဲ့အတွက် နိုင်ငံတကာအသိုင်းအဝိုင်းက စစ်ကောင်စီကို ဘေးဖယ်ပြီး အမျိုးသားညီညွတ်ရေးအစိုးရ NUG ကို ပိုပြီး အသိအမှတ်ပြုလာနေတာဖြစ်တယ်လို့ အာဆီယံဒေသဆိုင်ရာ သံအမတ်ကြီး ဦးဘိုလှတင့်ကပြောပါတယ်။

မနေ့ကကျင်းပတဲ့ တရုတ်-အာဆီယံ အစည်းအဝေးမှာ စစ်ကောင်စီ ဥက္ကဌကို တက်ခွင့်မပေးပဲ ချန်ထားခဲ့တာနဲ့ပတ်သက်ပြီး BNN သတင်းဌာနမှ ဦးထက်အောင်ကျော်က မေးမြန်းစဉ် သံအမတ်ကြီးက အဲဒီလိုဖြေကြားခဲ့တာပါ။

အခုထုတ်လွှင့်ပေးမယ့် မေးမြန်းချက် အသေးစိပ်ထဲမှာတော့... တရုတ်-အာဆီယံ အစည်းအဝေးမှာ စစ်ကောင်စီဥက္ကဌကို မဖိတ်ပဲ ချန်ထားခြင်းက သံတမန်ရေးတိုက်ပွဲမှာ ဘယ်လောက် ထိရောက်မှုရှိသလဲ၊ အာဆီယံဒေသဆိုင်ရာ သဘာဝပတ်ဝန်းကျင်ဆွေးနွေးပွဲအတွက် NUG ဝန်ကြီး တဦးကို ဖိတ်ကြားတာဟာ စစ်ကောင်စီနေရာမှာ NUG ကို အစားထိုးတော့မယ့် သဘောလား၊ NUG က ငွေတိုက်စာချုပ်တွေရောင်းပြီး ရန်ပုံငွေရှာနေရတာဟာ နိုင်ငံတကာဖက်က ငွေကြေးအကူအညီမပေးသေးလို့လား... စတဲ့ ဆွေးနွေးချက်တွေကို ရှုစားနားဆင်ရမှာဖြစ်ပါတယ်။

Saturday, November 20, 2021

Interview with Su Su Swe (Human Right Activist in Dawei)


“တောထဲထွက်ပြေးတော့ အိမ် မီးရှို့ခံရတယ်။ မပြေးပဲနေရင် လူပါ အဖမ်းခံရတယ်”

(မယ်စုစုဆွေ- ထားဝယ်ဒေသ လူ့အခွင့်အရေးလှုပ်ရှားသူ)
-----------------------------------------------
(၂၀/၁၁/၂၀၂၁)

တနသာင်္ရီတိုင်း ထားဝယ်ခရိုင်နဲ့ ပုလောဒေသမှာ စစ်ပြေးဒုက္ခသည် ထောင်နဲ့ချီရှိနေပြီး ကယ်ဆယ်ရေးအကူအညီတွေ အရေးပေါ်လိုအပ်နေတယ်လို့ ဒေသဆိုင်ရာ လူ့အခွင့်အရေးလှုပ်ရှားသူ မယ်စုစုဆွေကပြောပါတယ်။ ဒါ့အပြင် စစ်ကောင် စီတပ်တွေက ရွာမှာ လူမရှိတဲ့အိမ်တွေကို မီးရှို့နေတဲ့အတွက် ဒေသခံတွေ အတော်ဒုက္ခရောက်နေတယ်လို့ သိရပါတယ်။

တနသာင်္တိုင်းအတွင်းမှာ စစ်ကောင်စီတပ်နဲ့ ဒေသခံ PDF တပ်တွေကြား တိုက်ပွဲဖြစ်ပြီးနောက် ရွာမီးရှို့ခံရတာ၊ ဖမ်းဆီးသတ်ဖြတ်ခံရတာတွေကြောင့် ရွာသားတွေ ထွက်ပြေးပုန်းအောင်နေရတဲ့အခြေအနေနဲ့ပတ်သက်ပြီး BNN သတင်းဌာနမှ ဦးထက်အောင်ကျော်က မေးမြန်းစဉ် သူမက အဲဒီလိုဖြေကြားခဲ့တာပါ။

အခုထုတ်လွှင့်ပေးမယ့် မေးမြန်းချက်ထဲမှာတော့... ထားဝယ်ခရိုင်နဲ့ ပုလောဒေသမှာ တိုက်ပွဲငယ်တွေ ဆက်တိုက်ဖြစ်နေတာ၊ တောင်ပျောက်ဒေသမှာ ထောင်နဲ့ချီတဲ့ ရွာသားတွေ တောထဲပြေးပုန်းနေရတာ၊ စကစ က ဖြတ်လေးဖြတ် လုပ်ထားတဲ့အတွက် ရိက္ခာအခက်အခဲဖြစ်နေတာ၊ ပြည်တွင်း-ပြည်ပကနေ အရေးပေါ် အကူအညီပေးအပ်ဖို့ လိုနေတဲ့အကြောင်းတွေကို ဆွေးနွေးတင်ပြထားပါတယ်။

Thursday, November 18, 2021

Interview with Way Poe Ngeal of WLB on NUCC Part-2


“စစ်ကောင်စီ ဖြုတ်ချရေးနဲ့ ဖက်ဒရယ်စနစ် တည်ဆောက်ရေးကို တပြိုင်တည်း ဆောင်ရွက်ဖို့လိုပါတယ်”

(လွေးပိုးငယ်- WLB)
----------------------------------------
(၁၈/၁၁/၂၀၂၁)

အာဏာသိမ်း စစ်ကောင်စီ ဖြုတ်ချရေးတိုက်ပွဲနဲ့ ဖက်ဒရယ်စနစ် တည်ဆောက်ရေးလုပ်ငန်းစဉ်ကို တပြိုင်တည်း ဆောင်ရွက်ဖို့လိုပါတယ်လို့ အမျိုးသားညီညွတ်ရေး အတိုင်ပင်ခံကောင်စီ NUCC အဖွဲ့ဝင်ဖြစ်တဲ့ အမျိုးသမီးများအဖွဲ့ချုပ် မြန်မာနိုင်ငံ (WLB) မှ လွေးပိုးငယ်ကပြောပါတယ်။

NUCC ဟာ စစ်အာဏာရှင်ပြုတ်ကျရေးအတွက် ဘယ်လိုလုပ်ဆောင်မလဲဆိုတာကို အဓိကမပြောပဲ အာဏာရှင်အလွန် ဖက်ဒရယ်တည်ဆောက်ရေးကို အလေးပေး ပြောလွန်းတယ်ဆိုတဲ့ ဝေဖန်မှုတွေနဲ့ပတ်သက်ပြီး BNN သတင်းဌာနမှ ဦးထက်အောင်ကျော်က မေးမြန်းစဉ် သူမ က အဲဒီလိုဖြေကြားခဲ့တာပါ။

အခုထုတ်လွှင့်ပေးမယ့် မေးမြန်းချက် ဒုတိယ ပိုင်းမှာတော့... စစ်အာဏာရှင်ပြုတ်ကျရေးလုပ်ငန်းစဉ်ထက် အာဏာရှင်အလွန် ဖက်ဒရယ်တည်ဆောက်ရေးအပေါ် ဘာကြောင့် ပိုအလေးပေးပြောနေကြသလဲ၊ အရင် ရွေးကောက်ခံ အမတ်တွေချည်းဖွဲ့ခဲ့တဲ့ အစိုးရတွေထက် လက်ရှိ (De Facto) နဲ့ (De Jure) ပေါင်းစပ်ထားတဲ့ NUG အစိုးရမှာ ဘယ်လိုအားသာချက်တွေရှိနေသလဲ၊ လူငယ်တွေကို ဦးဆောင်မှုပိုပေးလိုက်ရင် ခွဲခြားဆက်ဆံမှုတွေ ပပျောက်သွားမလား... စတဲ့ အကြောင်းအရာတွေကို ဆွေးနွေးတင်ပြထားပါတယ်။

Wednesday, November 17, 2021

Interview with Lway Peo Ngeal of WLB on NUCC part-1


“NUCC ဟာ De Facto နဲ့ De Jure ပေါင်းစပ်ထားတဲ့ နိုင်ငံရေးလမ်းကြောင်းသစ်ဖြစ်တယ်”

(လွေးပိုးငယ်- WLB)
-----------------------------------------------
(၁၇/၁၁/၂၀၂၁)

အမျိုးသားညီညွတ်ရေး အတိုင်ပင်ခံကောင်စီ NUCC ကို ဖွဲ့စည်းခြင်းဟာ လက်တွေ့နယ်မြေတွေကိုအုပ်နေသူတွေ (De Facto) နဲ့ ရွေးကောက်ခံထားရသူတွေ (De Jure) ပေါင်းစပ်ပြီး နိင်ငံရေးလမ်းကြောင်းသစ်အဖြစ် အလုပ်လုပ်နိုင်ဖို့ဖြစ်တယ်လို့ အဲဒီအဖွဲ့မှာ ပါဝင်တဲ့ အမျိုးသမီးများအဖွဲ့ချုပ် မြန်မာနိုင်ငံ Women's League of Burma (WLB) က လွေးပိုးငယ်ကပြောပါတယ်။

NUCC ဖွဲ့စည်းကြောင်း မနေ့ကပြုလုပ်ခဲ့တဲ့ သတင်းစာရှင်းပွဲနဲ့ပတ်သက်ပြီး BNN သတင်းဌာနမှ ဦးထက်အောင်ကျော်က မေးမြန်းစဉ် သူမ က အဲဒီလို ဖြေကြားခဲ့တာပါ။

အခု ထုတ်လွှင့်ပေးမယ့် မေးမြန်းချက် ပထမ ပိုင်းမှာတော့... NUCC ကို ဘာကြောင့် ဖွဲ့ဖို့လိုအပ်သလဲ၊ ဘယ်အဖွဲ့တွေ ပါဝင်သလဲ၊ ဘာတွေဆောင်ရွက်သွားမှာလဲ၊ အနာဂတ်ဖက်ဒရယ်ပြည်ထောင်စုတည်ဆောက်ရေးက ဘာကြောင့် အခုကတည်းက ကြိုတင်ဆွေးနွေးဖို့လိုအပ်နေသလဲ... စတဲ့အကြောင်းအရာတွေကို ဆွေးနွေး တင်ပြထားပါတယ်။

(အာဏာသိမ်းစစ်ကောင်စီ ကိုအရင်ဖြုတ်ချပြီးမှ အနာဂတ်ဖက်ဒရယ်ပြည်ထောင်စုတည်ဆောက်ရေးဆိုတာကို ဆွေးနွေးသင့်တယ်မဟုတ်လားဆိုတဲ့ မေးခွန်းထုတ်မှုတွေကိုတော့ မနက်ဖန်ထုတ်လွှင့်ပေးမယ့် ဒုတိယ ပိုင်းမှာ စောင့်မျှော် ကြည့်ရှုနိုင်ပါတယ်)။

Sunday, November 14, 2021

Interview with Honey Thang (CHRO) on Htan Tlang


“ထန်တလန်အတွက် အရေးပေါ်အကူအညီ လိုအပ်နေပါတယ်”

(မဟန်နီထန်း- Chin Human Right Organization)
--------------------------------------
(၁၄/၁၁/၂၀၂၁)

အာဏာသိမ်း စစ်ကောင်စီတပ်ရဲ့ မီးရှို့မှုကြောင့် အိမ်ခြေရာနဲ့ချီမီးလောင်ခဲ့ရပြီး သောင်းနဲ့ချီတဲ့လူတွေ နေရပ်ကိုစွန့်ခွာထွက်ပြေးနေရတဲ့ ချင်းပြည်နယ်က ထန်တလန်မြို့မှာ အရေးပေါ်ကယ်ဆယ်ရေးအကူအညီ လိုအပ်နေတယ်လို့ ချင်းလူ့အခွင့်အရေးအဖွဲ့က မဟန်နီထန်းကပြောပါတယ်။

ပြီးခဲ့တဲ့ သီတင်းပတ်က မီးလောင်ခဲ့တဲ့ ထန်တလန်မြို့ နောက်ဆုံးအခြေအနေ၊ ကယ်ဆယ်ရေးအခြေအနေတွေနဲ့ပတ်သက်ပြီး BNN သတင်းဌာနက ဦးထက်အောင်ကျော်က မေးမြန်းစဉ် သူမက အဲဒီလိုပြောဆိုခဲ့တာပါ။

အခုထုတ်လွှင့်ပေးမယ့် မေးမြန်းချက်ထဲမှာတော့... ထန်တလန်မြို့ မီးလောင်မှု နောက်ဆုံးအခြေအနေ၊ ကူညီကယ်ဆယ်ရေးအနေအထား၊ ပြည်တွင်း- ပြည်ပက ဘယ်လို ကူညီပေးနိုင်မလဲ၊ နွေဦးတော်လှန်ရေးမှာ ရှေ့တန်းက ပါဝင်နေတဲ့ ချင်းပြည်သူတွေအပေါ် အားပေးစကား...စတဲ့အကြောင်းအရာတွေကို ဆွေးနွေးတင်ပြထားပါတယ်။


Saturday, November 13, 2021

Interview with U Myint Kyaw on Danny Fenster.


“သတင်းလွတ်လပ်ခွင့်ကို ပိတ်ပင်ခံခြင်းက Professionalism ကိုပါ ဆွဲချသွားသလိုဖြစ်စေပါတယ်”

(ဦးမြင့်ကျော်- သတင်းစာဆရာ)
----------------------------------------------------
(၁၃/၁၁/၂၀၂၁)

အာဏာသိမ်းစစ်ကောင်စီက လွတ်လပ်တဲ့သတင်းဌာနတွေကို ပိတ်ပင်လိုက်ခြင်းဟာ လွတ်လပ်စွာသတင်းရယူခွင့်ကို ထိခိုက်ရုံတင်မကပဲ သတင်းလောကရဲ့ Professionalism ကိုပါ ဆွဲချသွားသလိုဖြစ်စေခဲ့တယ်လို့ ဝါရင့်သတင်းစာဆရာ ဦးမြင့်ကျော်ကပြောပါတယ်။

အမေရိကန်သတင်းသမား Danny Fenster ကို စစ်ကောင်စီတရားရုံးက ထောင်ဒဏ် ၁၁ နှစ်အထိအပြစ်ပေးလိုက်တဲ့အခြေအနေအပါဝင် လက်ရှိ မြန်မာနိုင်ငံရဲ့ သတင်းလွတ်လပ်ခွင့်အခြေအနေနဲ့ပတ်သက်ပြီး BNN သတင်းဌာမှ ဦးထက်အောင်ကျော်က မေးမြန်းစဉ် သူက အဲဒီလိုဖြေကြားခဲ့တာပါ။

အခုထုတ်လွှင့်ပေးမယ့် မေးမြန်းချက်ထဲမှာတော့ ... အမေရိကန်သတင်းသမားတဦးကို ထောင်ဒဏ် ၁၁ နှစ်အထိချလိုက်တာ သိပ်များမနေဘူးလား၊ ဖမ်းဆီးခံ မြန်မာသတင်းသမားတွေရဲ့ အခြေအနေ ဘယ်လိုရှိသလဲ၊ သတင်းရရေးအတွက် ဆိုရှယ်မီဒီယာတခုတည်းကို အများပြည်သူက အားထားနေရပြီလား၊ လက်ရှိ မီဒီယာတွေရဲ့ သတင်းဖေါ်ပြမှု အဆင့်အတန်းက ဘယ်လိုရှိသလဲ၊ သတင်းလွတ်လပ်ခွင့်ကို ဒီအချိန်မှာ မျှော်လင့်လို့ ရသေးရဲ့လား... စတဲ့အကြောင်းအရာတွေကို ဆွေးနွေးတင်ပြထားပါတယ်။

Wednesday, November 3, 2021

Interview with Aung Thu Nyein- (about Bill Richardson's trip)



“အမေရိကန်ဖက်က သံတမန်ရေးလမ်းကြောင်းဖောက်တယ်လို့ ယူဆပါတယ်”

(ဦးအောင်သူငြိမ်း- နိုင်ငံရေး ဝေဖန်သုံးသပ်သူ)
--------------------------------------------
(၄/၁၁/၂၀၂၁)

အမေရိကန် ဝါရင့်သံတမန် Bill Richardson ရဲ့မြန်မာနိုင်ငံ ခရီးစဉ်ဟာ သာမန်ပုဂ္ဂိုလ်ရေးခရီးစဉ်မဟုတ်ပဲ ၉ လကြာပိတ်ဆို့နေတဲ့ သံတမန်ရေးလမ်းကြောင်းကို လမ်းစ ပြန်ဖေါ်ပေးဖို့ဖြစ်နိုင်တယ်လို့ နိုင်ငံရေးဝေဖန်သုံးသပ်သူ ဦးအောင်သူငြိမ်းကပြောပါတယ်။

စစ်အာဏာသိမ်းမှု ၉ လပြည့်ချိန်၊ အာဆီယံ အထူးကိုယ်စားလှယ်၊ ကုလ အထူးကိုယ်စားလှယ်တွေ မြန်မာနိုင်ငံထဲ ဝင်ခွင့်မရပဲဖြစ်နေချိန်မှာ အမေရိကန် ဝါရင့်သံတမန် Bill Richardson ရဲ့ ထူးခြားတဲ့ ခရီးစဉ်နဲ့ပတ်သက်ပြီး BNN သတင်းဌာနမှ ဦးထက်အောင်ကျော်ကမေးမြန်းစဉ် သူက အဲဒီလိုဖြေကြားခဲ့တာပါ။

အခုထုတ်လွှင့်ပေးမယ့် မေးမြန်းချက်ထဲမှာတော့ အမေရိကန်သံတမန်ရဲ့ ခရီးစဉ်အပြီးမှာ ဘာတွေထူးခြားမှုရှိလာနိုင်သလဲ၊ အာဆီယံနဲ့ ကုလ အထူးကိုယ်စားလှယ်တွေ မြန်မာနိုင်ငံဆီ လာခွင့်ရလာနိုင်သလား၊ တရုတ်နိုင်ငံဖက်ကကော ဘယ်လိုတုန့်ပြန်လာနိုင်ဖွယ်ရှိနေသလဲ၊ သံတမန်ရေးကြိုးပမ်းမှုတွေက စစ်ကောင်စီရဲ့ အကြမ်းဖက်မှုတွေကို တားဆီးနိုင်ပါ့မလား... စတဲ့ အကြောင်းအရာတွေကို ဆွေးနွေးတင်ပြထားပါတယ်။

Sunday, October 31, 2021

Interview with Saw Han Ngwe Oo (LGBT) Part 2


“လွတ်ငြိမ်းထဲပါပေမယ့် ထောင်ဖူးဝရောက်ပြီးမှ အထဲပြန်သွင်းခံရသူတွေလည်း အများကြီးပဲ”
(စောဟန်နွေဦး- LGBT အရေးနှင့် လူ့အခွင့်အရေးလှုပ်ရှားသူ)
-----------------------------------------------
(၃၀ /၁၀/၂၀၂၁)
လူသားချင်းစာနာမှုအရ နိုင်-ကျဉ်း ၅၀၀၀ ကျော်ကို ပြန်လွှတ်ပေးခဲ့တယ်လို့ စစ်ကောင်စီက ကြေညာပေမယ့် ထောင်ဖူး၀ ရောက်ပြီးမှ ပြန်ဖမ်းခံရသူတွေလည်း အများကြီးရှိနေတယ်လို့ အောက်တိုဘာ ၁၉ ရက်ကမှ ပြန်လွတ်လာသူ၊ LGBT အရေးလှုပ်ရှားသူ စောဟန်နွေဦးကပြောပါတယ်။

မန္တလေးနန်းတွင်း စစ်ကြောရေးစခန်းမှာ လိင်ပိုင်းဆိုင်ရာစော်ကားမှုတွေရှိခဲ့တယ်ဆိုတဲ့ စွပ်စွဲချက်တွေနဲ့ပတ်သက်ပြီး BNN သတင်းဌာနမှ ဦးထက်အောင်ကျော်က မေးမြန်းစဉ် စောဟန်နွေဦးက အဲဒီလိုပြောခဲ့တာပါ။

အခုထုတ်လွှင့်ပေးမယ့် မေးမြန်းချက် ဒုတိယ ပိုင်းမှာတော့... လွှတ်ပေးပြီးမှ ထောင်ဖူးဝမှာတင် ပြန်ဖမ်းတယ်ဆိုတာ တကယ်လား၊ နွေဦးတော်လှန်ရေးမှာ LGBT တွေအတော်များများပါဝင်နေတာ ဘာကြောင့်လဲ၊ လွတ်မြောက်နယ်မြေမှာ ဘာတွေဆက်လုပ်မှာလဲ... စတဲ့ အကြောင်းအရာတွေကို ဆွေးနွေးတင်ပြထားပါတယ်။

Friday, October 29, 2021

Interview with Saw Han Ngwe Oo (LGBT) Part-1


စစ်ကြောရေးစခန်းတွင် လိင်ပိုင်းဆိုင်ရာ စော်ကားခံခဲ့ရသူ LGBT တဦးနှင့် မေးမြန်းချက် (၁)
--------------------------------------------
(၂၉ /၁၀/၂၀၂၁)

နွေဦးတော်လှန်ရေးအတွင်း ပါဝင်မှုနဲ့ ဖမ်းဆီးခံခဲ့ရသူတွေကို စစ်ဆေးတဲ့အခါမှာ စစ်ကောင်စီ တာဝန်ရှိသူတွေက လိင်ပိုင်းဆိုင်ရာစော်ကားမှုတွေ ပြုလုပ်ခဲ့တယ်လို့ အောက်တိုဘာ ၁၉ ရက်ကမှ လွတ်ငြိမ်းချမ်းသာခွင့်နဲ့ ပြန်လွတ်လာသူ၊ LGBT အရေးလှုပ်ရှားသူ စောဟန်နွေဦးကပြောပါတယ်။

သီတင်းကျွတ်ပွဲမှာ ပါဝင်နိုင်ဖို့အတွက် လူသားချင်းစာနာမှုအရ နိုင်-ကျဉ်း ၅၀၀၀ ကျော်ကို ပြန်လွှတ်ပေးခဲ့တယ်လို့ စစ်ကောင်စီရဲ့ကြေညာချက်နဲ့ပတ်သက်ပြီး BNN သတင်းဌာနမှ ဦးထက်အောင်ကျော်က မေးမြန်းစဉ် စောဟန်နွေဦးက အဲဒီလိုပြောခဲ့တာပါ။

အခုထုတ်လွှင့်ပေးမယ့် မေးမြန်းချက် ပထမ ပိုင်းမှာတော့... ဘာကြောင့် အဖမ်းခံခဲ့ရတာလဲ၊ မန္တလေး နန်းတွင်းစစ်ကြောရေးစခန်းမှာ ဘယ်လို စော်ကားခံခဲ့ရတာလဲ၊ KIA ဒေသအထိသွားပြီး စစ်သင်တန်းတက်ခဲ့တယ်ဆိုတာ တကယ်လား၊ အိုးဘိုထောင်တွင်းမှာကော အခြေအနေတွေ ဘယ်လိုရှိသလဲ... စတဲ့ အကြောင်းအရာတွေကို ဆွေးနွေးတင်ပြထားပါတယ်။

(နွေဦးတော်လှန်ရေးမှာ LGBT အတော်များများပါဝင်နေတဲ့ ထူးခြားချက်၊ လွတ်မြောက်နယ်မြေမှာ ဘာတွေဆက်လုပ်ဖို့ရှိလဲ... စတဲ့ အချက်တွေပါဝင်တဲ့ ဒုတိယ ပိုင်းကိုတော့ မနက်ဖန်၊ စနေညမှာ ဆက်လက်ထုတ်လွှင့်ပေးသွားမှာဖြစ်ပါတယ်)။

Wednesday, October 27, 2021

Interview with U Bo Hla Tint (ASEAN- NUG) Part- 2


“မျိုးဆက်သစ်လူငယ်တွေရဲ့ စွန့်လွှတ်စွန့်စားမှုက လွတ်မြောက်ရေးလှုပ်ရှားမှု သမိုင်းမှာ အမြင့်ဆုံး ဒီဂရီကို ရောက်နေပါပြီ”

(ဦးဘိုလှတင့်- အာဆီယံဆိုင်ရာ သံအမတ်ကြီး- NUG)
----------------------------
(၂၈/၁၀/၂၀၂၁)

ဒီနေ့  မျိုးဆက်သစ် GZ လူငယ်တွေရဲ့ စွန့်လွှတ်စွန့်စားမှုဟာ စစ်အာဏာရှင်လက်အောက်က လွတ်မြောက်ရေးလှုပ်ရှားမှုသမိုင်းမှာ အမြင်း့ဆုံး ဒီဂရီအထိ ရောက်နေပြီဖြစ်တဲ့အတွက် မကြာခင် အောင်ပွဲရမှာသေချာတယ်လို့ အမျိုးသားညီညွတ်ရေးအစိုးရ NUG အာဆီယံ ဆိုင်ရာ သံအမတ်ကြီး ဦးဘိုလှတင့်ကပြောပါတယ်။

အောက်တိုဘာ ၂၆ ကနေ ၂၈ အထိ သုံးရက်တာကျင်းပနေတဲ့ အာဆီယံ ထိပ်သီးအစည်းအဝေးရဲ့ အလားအလာတွေနဲ့ပတ်သက်ပြီး BNN သတင်းဌာနမှ ဦးထက်အောင်ကျော်က မေးမြန်းစဉ် သူက အဲဒီလိုဖြေကြားခဲ့တာပါ။

အခု ထုတ်လွှင့်ပေးမယ့် မေးမြန်းချက် ဒုတိယ ပိုင်းမှာတော့... အာဆီယံ အစည်းအဝေးက ဘယ်လိုဆုံးဖြတ်ချက်တွေ ထွက်လာနိုင်သလဲ၊ စစ်ကောင်စီက အစည်းအဝေးမတက်တဲ့အတွက် အာဆီယံနဲ့ NUG ကြား ဆက်ဆံရေး ပိုတိုးတက်လာနိုင်သလား၊ အရင် ၁၉၉၀ ဝန်းကျင် NCG အစိုးရအောက်မှာ တာဝန်ယူရတာနဲ့ အခု ၂၀၂၀ ရွေးကောက်ပွဲအလွန် NUG အစိုးရအောက်မှာ တာဝန်ထမ်းရတာ အခြေအနေခြင်း ဘယ်လိုကွာခြားသလဲ... စတဲ့ အကြောင်းအရာတွေကို ဆွေးနွေးတင်ပြထားပါတယ်။


Tuesday, October 26, 2021

Interview with U Bo Hla Tint of (ASEAN-NUG) Part 1


“အာဆီယံ ခေါင်းဆောင်တွေရဲ့ ပြောင်းလဲလာနေတဲ့ ခြေလှမ်းသစ်ကို ကျနော်တို့ ကြိုဆိုတယ်”

(ဦးဘိုလှတင့်- အာဆီယံဆိုင်ရာ သံအမတ်ကြီး- NUG)
----------------------------
(၂၇/၁၀/၂၀၂၁)

အာဆီယံ ဆုံးဖြတ်ချက်ကို မလိုက်နာတဲ့ စစ်ကောင်စီ ဥက္ကဌကို ထိပ်သီးအစည်းအဝေး ဆီ မဖိတ်ပဲချန်ထားတာအပါဝင် အာဆီယံ ခေါင်းဆောင်ပိုင်းရဲ့ ပြောင်းလဲလာနေတဲ့ ခြေလှမ်းသစ်တွေကို ကြိုဆိုပါတယ်လို့ အမျိုးသားညီညွတ်ရေးအစိုးရ NUG အာဆီယံ ဆိုင်ရာ သံအမတ်ကြီး ဦးဘိုလှတင့်ကပြောပါတယ်။

အောက်တိုဘာ ၂၆ ကစပြီး ၃ ရက်တာကျင်းပနေတဲ့ အာဆီယံ ထိပ်သီးအစည်းအဝေးရဲ့ အလားအလာတွေနဲ့ပတ်သက်ပြီး BNN သတင်းဌာနမှ ဦးထက်အောင်ကျော်က မေးမြန်းစဉ် သူက အဲဒီလိုဖြေကြားခဲ့တာပါ။

အခု ထုတ်လွှင့်ပေးမယ့် မေးမြန်းချက် ပထမ ပိုင်းမှာတော့... အာဆီယံ သံအမတ်ကြီးအဖြစ် တာဝန်ပေးခံရပုံ၊ စစ်ကောင်စီ ဥက္ကဌ မပါပဲ ကျင်းပတဲ့ အာဆီယံ အစည်းအဝေးက တကယ်ပဲ တိုးတက်တဲ့ ခြေလှမ်းသစ်တွေ လှမ်းလာနိုင်တော့မလား၊ ၃ ရက်တာ အစည်းအဝေးအပြီးမှာ မြန်မာ့အရေးအပေါ် အာဆီယံက ဘယ်လို အရေးယူမှုတွေ လုပ်လာနိုင်သလဲ... စတဲ့ အကြောင်းအရာတွေကို ဆွေးနွေးတင်ပြထားပါတယ်။

(၁၉၉၀ ရွေးကောက်ပွဲအလွန်ကာလနဲ့ အခု ၂၀၂၀ ရွေးကောက်ပွဲအလွန်ကာလ တူညီချက်- ကွာခြားချက်အကြောင်းတွေပါဝင်တဲ့ မေးမြန်းချက် ဒုတိယ ပိုင်းကိုတော့ မနက်ဖန် မှာ ဆက်လက် ထုတ်လွှင့်ပေးသွားမှာဖြစ်ပါတယ်)။

Interview with Khin Omar of Progressive Voice- Part 2


“စစ်ကောင်စီရဲ့ အနိုင်ကျင့် ဗိုလ်ကျမှုတွေကို ရပ်တန့်အောင် အရင်လုပ်ပြီးမှ ဆွေးနွေးရေးစကားကိုပြောပါ”

(မခင်ဥမ္မာ- Progressive Voice)
----------------------------
(၂၆/၁၀/၂၀၂၁)

အာဏာသိမ်း မြန်မာစစ်ကောင်စီရဲ့ အနိုင်ကျင့် ဗိုလ်ကျမှုတွေကို ရပ်တန့်အောင် အရင်လုပ်ပြီးမှ တွေ့ဆုံဆွေးနွေးရေးဆိုတာကို ပြောသင့်တယ်လို့ Progressive Voice က မခင်ဥမ္မာကပြောပါတယ်။

ဒီနေ့စတင်ကျင်းပတဲ့ အာဆီယံ ထိပ်သီးအစည်းအဝေး၊ အဲဒီအစည်းအဝေးအပြီးဖြစ်ပေါ်လာနိုင်တဲ့ နိုင်ငံတကာ ကြားဝင် ညှိနှိုင်းမှုအလားအလာတွေနဲ့ပတ်သက်ပြီး BNN သတင်းဌာနမှ ဦးထက်အောင်ကျော်က မေးမြန်းစဉ် သူမက အဲဒီလို ဖြေကြားခဲ့တာပါ။

အခု ထုတ်လွှင့်ပေးမယ့် မေးမြန်းချက် ဒုတိယ ပိုင်းမှာတော့... ၃ ရက်ကြာ အာဆီယံအစည်းအဝေးပြီးရင် နိုင်ငံတကာဖက်က ကြားဝင်ညှိနှိုင်းမှုဖြစ်လာနိုင်သလား၊ စစ်တပ်နဲ့ အာဏာခွဲဝေအုပ်ချုပ်ရေးဆိုတဲ့ လွန်ခဲ့တဲ့ ၁၀ နှစ်က ပုံစံကို ဒီနေ့ တော်လှန်ရေးမျိုးဆက်သစ်က လက်ခံနိုင်သေးရဲ့လား၊ တိုက်ပွဲပုံစံသစ်တွေနဲ့ နိုင်ငံသစ်ကို တည်ဆောက်နိုင်တော့မလား... .. စတဲ့ အကြောင်းအရာတွေကို ဆွေးနွေးတင်ပြထားပါတယ်။

Monday, October 25, 2021

Interview with Khin Omar of Progress Voice- part 1


“အာဆီယံ တခုတည်းမဖြေရှင်းနိုင်ဘူး။ လုံခြုံရေးကောင်စီက ထောက်ခံပေးဖို့ လိုနေပါတယ်”
(မခင်ဥမ္မာ- Progressive Voice)
----------------------------
(၂၅-၁၀-၂၀၂၁)

မြန်မာနိုင်ငံက စစ်ကောင်စီကို အရေးယူတဲ့အခါ အာဆီယံ တခုတည်းနဲ့ ဆောင်ရွက်နိုင်စွမ်းမရှိတဲ့အတွက် ကုလသမဂ္ဂလုံခြုံရေးကောင်စီရဲ့ ထောက်ခံမှုကို အာဆီယံက ရယူဖို့လိုအပ်နေတယ်လို့ Progressive Voice အဖွဲ့ရဲ့ ဥက္ကဌ မခင်ဥမ္မာကပြောပါတယ်။

မနက်ဖန်စတင်တော့မယ် အာဆီယံ ထိပ်သီးအစည်းအဝေးနဲ့ပတ်သက်ပြီး BNN သတင်းဌာနမှ ဦးထက်အောင်ကျော်က မေးမြန်းစဉ် သူမက အဲဒီလို ဖြေကြားခဲ့တာပါ။

အခု ထုတ်လွှင့်ပေးမယ့် မေးမြန်းချက် ပထမ ပိုင်းမှာတော့... ပြီးခဲ့တဲ့ သတင်းပတ်က ကျင်းပခဲ့တဲ့ အာဆီယံ အရပ်ဖက်အဖွဲ့များရဲ့ အစည်းအဝေးတောင်းဆိုချက်၊ မနက်ဖန် အစည်းအဝေးကိုတက်မယ့် နိုင်ငံရေးအရ ကိုယ်စားမပြုတဲ့ ကိုယ်စားလှယ်ဆိုတာ ဘယ်လိုမျိုးလဲ၊ ၃ ရက်တာ အစည်းအဝေးမှာ ဘာတွေ ဆွေးနွေးပြီး ဘယ်လို ဆုံးဖြတ်ချက်တွေ ထွက်လာနိုင်သလဲ၊ အစည်းအဝေးမတိုင်ခင် ရက်ပိုင်းအလိုမှာ အာဆီယံဒေသဆီခရီးထွက်လာတဲ့ အမေရိကန် အဆင့်မြင့် ကိုယ်စားလှယ်အဖွဲ့ရဲ့ ခရီးစဉ်က ဘယ်လောက်အရေးပါသလဲ... စတဲ့ အကြောင်းအရာတွေကို ဆွေးနွေးတင်ပြထားပါတယ်။

(ဆွေးနွေးရေးအကြောင်း မပြောခင် စစ်ကောင်စီရဲ့ ထိုးစစ်ဆင်မှုတွေ၊ လူသားမဆန် ရက်စက်မှုတွေကို အရင်ရပ်တန့်အောင်လုပ်ဖို့လိုကြောင်းဆွေးနွေးချက် ပါဝင်တဲ့ ဒုတိယ ပိုင်းကိုတော့ မနက်ဖန် ညမှာ ဆက်လက် ထုတ်လွှင့်ပေးမှာဖြစ်ပါတယ်)။

Thursday, October 21, 2021

Interview with U Aung Myo Min of NUG.


“ပြန်လွတ်လာသူတွေထဲမှာ NLD ထိပ်ပိုင်းခေါင်းဆောင်တွေ မပါသေးဘူး”
(ဦးအောင်မျိုးမင်း- လူ့အခွင့်အရေးဝန်ကြီး- NUG)
------------------------------------------
(၂၁/၁၀/၂၀၂၁)

အာဏာသိမ်းစစ်ကောင်စီက ပြန်လွှတ်ပေးတဲ့သူတွေထဲမှာ ဒေါ်အောင်ဆန်းစုကြည်နဲ့ ပြည်နယ်-တိုင်း ဝန်ကြီးချုပ်တွေလို NLD ထိပ်ပိုင်းခေါင်းဆောင်တွေ မပါသေးတဲ့အတွက် ဒါဟာ ပြုပြင်ပြောင်းလဲမှုလုပ်ချင်လာတဲ့သဘောလို့ လုံး၀ ယူဆလို့မရသေးတဲ့အကြောင်း အမျိုးသားညီညွှတ်ရေးအစိုးရ NUG လူ့အခွင့်အရေးဝန်ကြီး ဦးအောင်မျိုးမင်းကပြောပါတယ်။

ဖေဖေါ်ဝါရီ ၁ ရက်နေ့ နောက်ပိုင်း ဖမ်းဆီးခံထားရသူ ၈၀၀၀ နီးပါးထဲက ၅၀၀၀ ကျော်ကို ပြန်လွှတ်ပေးနေပါပြီလို့ စစ်ကောင်စီက ကြေညာတဲ့အပေါ် BNN သတင်းဌာနမှ ဦးထက်အောင်ကျော်က NUG ရဲ့ သဘောထားကိုမေးမြန်းစဉ် သူက အဲဒီလိုဖြေကြားခဲ့တာပါ။

အခုထုတ်လွှင့်ပေးမယ့် မေးမြန်းချက်ထဲမှာ... စစ်ကောင်စီက ဘာကြောင့် နိုင်-ကျဉ်းတွေကို အခုလို ပြန်လွှတ်ပေးလိုက်တာလဲ၊ ဒီလိုလွှတ်ပေးမှုအပေါ် အာဆီယံနဲ့ နိုင်ငံတကာအသိုင်းအဝိုင်းကကြိုဆိုလေမလား၊ ဒီလိုလွှတ်ပေးမှုကြောင့် တိုက်ပွဲအရှိန်တွေ ပြန်ကျသွားနိုင်သလား၊ NUG ဖက်ကကော လွှတ်ပေးမှုကနေဖြစ်ပေါ်လာမယ့် နောက်တဆင့်အတွက် ဘာတွေပြင်ဆင်ထားသလဲ... စတဲ့အကြောင်းအရာတွေကို ဆွေးနွေးတင်ပြထားပါတယ်။

Tuesday, October 19, 2021

Interview with U Myo Win of PPST- Part 2


“လူထုရွေးချယ်မှု Mandate တခုတည်းနဲ့မရဘူး၊ အားလုံး လက်တွဲဆောင်ရွက်နိုင်ဖို့လိုတယ်”

(ရဲဘော်မျိုးဝင်း- PPST ပြောခွင့်ရပုဂ္ဂိုလ်)
----------------------------------------------
(၁၉/၁၀/၂၀၂၁)

မြန်မာနိုင်ငံရဲ့ပြသာနာတွေကိုဖြေရှင်းတဲ့နေရာမှာ လူထုကရွေးချယ်ထားတဲ့ဆိုတဲ့ Mandate တခုတည်းနဲ့မလုံလောက်ဘူး။ အင်အားစုအားလုံး လက်တွဲဆောင်ရွက်နိုင်ဖို့လိုတယ်လို့ အပစ်ရပ်ထားတဲ့ တိုင်းရင်းသားလက်နက်ကိုင်အဖွဲ့ ၁၀ ဖွဲရဲ့ ငြိမ်းချမ်းရေးလုပ်ငန်းစဉ် ဦးဆောင်အဖွဲ့ PPST ပြောခွင့်ရသူ ရဲဘော်မျိုးဝင်းကပြောပါတယ်။

တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ် NCA လက်မှတ် ရေးထိုးခြင်း (၆)နှစ်ပြည့်နေ့မှာ ထုတ်ပြန်တဲ့ ကြေညာချက်နဲ့ လက်ရှိနိုင်ငံရေးဖြစ်စဉ်တွေအပေါ် BNN သတင်းဌာနမှ ဦးထက်အောင်ကျော်က မေးမြန်းစဉ် သူက အဲဒီလို ဖြေကြားခဲ့တာပါ။

အခု ထုတ်လွှင့်ပေးမယ့် မေးမြန်းချက် ဒုတိယ ပိုင်းမှာတော့...အာဆီယံအပါဝင် နိုင်ငံတကာရဲ့ ကြားဝင်ဖြန်ဖြေမှုအပေါ် အမြင်၊ ဒီအချိန်မှာ တွေ့ဆုံဆွေးနွေးရေးပြောနေတာ လက်တွေ့ကျရဲ့လား၊ လက်ရှိ ပြသာနာအားလုံးရဲ့ မူလအစဟာ အာဏာသိမ်း စစ်ကောင်းစီပဲ မဟုတ်ဘူးလား.... စတဲ့ အကြောင်းအရာတွေကို ဆွေးနွေးတင်ပြထားပါတယ်။

Monday, October 18, 2021

Interview with U Myo Win of PPST- Part 1


“PPST က နွေဦးတော်လှန်ရေးကို ဝန်းရံပံ့ပိုးနေပါတယ်”
(ရဲဘော်မျိုးဝင်း- PPST ပြောခွင့်ရပုဂ္ဂိုလ်)
----------------------------------------------
(၁၈/၁၀/၂၀၂၁)

CDM လှုပ်ရှားမှုအပါဝင် နွေဦးတော်လှန်ရေးကို သူတို့အဖွဲ့က ဝန်းရံပံ့ပိုးနေပါတယ်လို့ အပစ်ရပ်ထားတဲ့ တိုင်းရင်းသားလက်နက်ကိုင်အဖွဲ့ ၁၀ ဖွဲရဲ့ ငြိမ်းချမ်းရေးလုပ်ငန်းစဉ် ဦးဆောင်အဖွဲ့ PPST ပြောခွင့်ရသူ ရဲဘော်မျိုးဝင်းကပြောပါတယ်။

တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ် NCA လက်မှတ် ရေးထိုးခြင်း (၆)နှစ်ပြည့်နေ့မှာ ထုတ်ပြန်တဲ့ ကြေညာချက်နဲ့ လက်ရှိနိုင်ငံရေးဖြစ်စဉ်တွေအပေါ် BNN သတင်းဌာနမှ ဦးထက်အောင်ကျော်က မေးမြန်းစဉ် သူက အဲဒီလို ဖြေကြားခဲ့တာပါ။

အခု ထုတ်လွှင့်ပေးမယ့် မေးမြန်းချက် ပထမပိုင်းမှာတော့... NCA သဘောတူစာချုပ်က ဆက်ရှိနေဆဲလား၊ ပျက်သွားပြီလား။ အာဏာသိမ်းစစ်တပ်အပေါ် PPST က ဘယ်လိုသဘောထားသလဲ၊ နွေဦးတော်လှန်ရေးမှာ ပူးပေါင်းပါဝင်ဖို့ ဘာတွေ အခက်အခဲရှိနေသလဲ... စတဲ့ အကြောင်းအရာတွေကို ဆွေးနွေးတင်ပြထားပါတယ်။

(အာဆီယံအပါဝင် နိုင်ငံတကာရဲ့ ကြားဝင်ဆောင်ရွက်မှုအပေါ်အမြင်၊ တွေ့ဆုံဆွေးနွေးအဖြေရှာရေးဆိုတာဖြစ်နိုင်ခြေရှိသေးလား...စတဲ့ အကြောင်းရာတွေပါဝင်တဲ့ ဒုတိယ ပိုင်းကိုတော့ မနက်ဖန်ညမှာ ဆက်လက် ထုတ်လွှင့်ပေးမှာဖြစ်ပါတယ်)။

Friday, October 15, 2021

Interview with U Aung Thu Nyein


“စစ်ကောင်စီမှာ မဟာမိတ်သိပ်နည်းနေလို့ ဒီအတိုင်း ရပ်တည်ဖို့ ခက်ပါတယ်”
-------------------------------------------
(၁၅/၁၀/၂၀၂၁)

အာဏာသိမ်းစစ်ကောင်စီဟာ အိမ်နီးချင်း အာဆီယံကိုတောင် မဟာမိတ်မဖွဲ့နိုင်ပဲ တရုတ်နဲ့ရုရှားကိုသာအားကိုးနေရတဲ့အတွက် ရေရှည်ရပ်တည်ရေးခက်ခဲနိုင်တယ်လို့ နိုင်ငံရေး ဝေဖန်သုံးသပ်သူ ဦးအောင်သူငြိမ်းကပြောပါတယ်။

အာဏာသိမ်းပြီး ၈ လကြာ နိုင်ငံရေးအခြေအနေ၊ အာဆီယံ အထူးကိုယ်စားလှယ် လာခွင့်ရ မရအခြေနေ၊ နိုင်ငံတကာရဲ့ ဖိအားတိုးလာနေတဲ့အခြေအနေတွေနဲ့ပတ်သက်ပြီး BNN သတင်းဌာနမှ ဦးထက်အောင်ကျော်က မေးမြန်းစဉ် သူက အဲဒီလိုဖြေကြားခဲ့တာပါ။

အခုထုတ်လွှင့်ပေးမယ့် မေးမြန်းချက်ထဲမှာ... အာဆီယံ အထူးကိုယ်စားလှယ်ခရီးစဉ်ရဲ့ နောက်ဆုံးအခြေနေ၊ အာဆီယံကိုယ်စားလှယ်ကို လာခွင့်မပေးရင် ဘာတွေ ဆက်ဖြစ်လာနိုင်သလဲ၊ သံတမန်ရေးကြားဝင်စေ့စပ်မှု မအောင်မြင်ရင် လက်နက်ကိုင်တိုက်ပွဲတွေ ပိုပြင်းထန်လာနိုင်သလား၊ နွေဦးတော်လှန်ရေး ၈ လကျော်ကြာတဲ့အထိ ဒီမိုကရေစီ အင်အားစုနဲ့ တိုင်းရင်းသားအင်အားစုတွေကြားမှာ တပ်ပေါင်းစု မဖွဲ့နိုင်သေးတာ ဘာကြောင့်လဲ... စတဲ့ အကြောင်းအရာတွေကို ဆွေးနွေးတင်ပြထားပါတယ်။

Thursday, October 14, 2021

Interview with Chairman of Myanmar Cycling.



2019 ခုုနွစ္က ျပဳလုုပ္ခဲ့တဲ့ ျမန္မာနုုိင္ငံ စက္ဘီးအဖြဲ႔ခ်ဳပ္ဥကၠဌ ဦးခင္ေမာင္၀င္းနွင့္ One News ေမးျမန္းခ်က္ကုုိ မွတ္တမ္းအျဖစ္ ျပန္လည္ေဖၚျပအပ္ပါသည္။

Wednesday, October 13, 2021

Dr Tint Swe Part 3


ဒေါက်တာတင့်ဆွေနှင့် မေးမြန်းချက် (၃) ------------------------------------------- (၃/၉ /၂၀၂၁) စစ်အာဏာရှင်စနစ်ကို အပြတ်ရှင်းမယ်ဆိုရင် အာဏာရှင်တွေနဲ့ပေါင်းနေတဲ့ အခွင့် အရေးသမားတွေကိုလည်း အပြတ်ရှင်းသင့်တယ်လို့ ၁၉၉၀ ရွေးကောက်ခံ လွှတ်တော် ကိုယ်စားလှယ်တဦးဖြစ်သူ ဒေါက်တာတင့်ဆွေကပြောပါတယ်။ စစ်အာဏာသိမ်းမှု ၇ လပြည့်အခြေအနေနဲ့ပတ်သက်ပြီး BNN သတင်းဌာနက ဦးထက်အောင်ကျော်နဲ့ သီးသန့် မေးမြန်းခန်းအတွင်း သူက အဲဒီလိုပြောခဲ့တာပါ။ အခုထုတ်လွှင့်ပေးမယ့် မေးမြန်းချက် နောက်ဆုံးအပိုင်းမှာတော့... အရင်တော်လှန်ရေးတွေထက် အခုတော်လှန်ရေးက အောင်မြင်မှုရနိုင်ခြေ ပိုများနေတယ်လို့ ဘာကြောင့် ပြောနိုင်တာလဲ၊ ဘယ်အစိုးရတက်တက် ပေါင်းစား-ညာစားမယ်ဆိုတဲ့ လူတန်းစား ကို ဘယ်လိုသဘောထားသင့်သလဲ၊ ဒလန်တွေကို ရှင်းပစ်တာ ထိရောက်မှုရှိသလား၊ ပြည်တွင်း-ပြည်ပ အကူအညီတွေက နွေဦးတော်လှန်ရေးကို ဘယ်လောက်အထိ တွန်းအားဖြစ်စေသလဲ... စတဲ့ အကြောင်းအရာ တွေကို ဆွေးနွေးတင်ပြထားပါတယ်။ (ဒီတပတ် စနေ-တနင်္ဂနွေမှာတော့ လက်နက်ကိုင်တော်လှန်ရေးအကြောင်း စစ်ရေး၊နိုင်ငံရေး လေ့လာသုံးသပ်သူ ဦးမောင်မောင်စိုးနဲ့ မေးမြန်းချက်ကို ထုတ်လွှင့်ပေးသွားဖို့ စီစဉ်ထားပါတယ်)။

Share

Twitter Delicious Facebook Digg Stumbleupon Favorites More