Wednesday, May 22, 2013

သူပုန်ကျောင်းသား တဦးရဲ့ ပြည်တော်ပြန် ခရီးစဉ် (၄)

ဧရာဝတီ။
S
ရန်ကုန်မြို့လည်က လမ်းဘေး လက်ဖက်ရည်ဆိုင် တဆိုင် (ဓာတ်ပုံ – Reuters)


မနက်ခင်းတခင်းမှာ ၂၅ နှစ်အတွင်း ပထမဆုံး မြန်မာနိုင်ငံရဲ့ မနက်စာကို သုံးဆောင်ဖို့ မြို့လယ်က နာမည်ကြီး လက်ဖက်ရည်ဆိုင်တခုဆီ ကျနော် ရောက်ပါတယ်။ ဘာ စားရင်ကောင်းမလဲဆိုပြီး ဆိုင်နံရံကိုကြည်လိုက်တော့ စားစရာ စာရင်းကို မတွေ့ပဲ ဘုန်းကြီးပုံနဲ့ ဘုန်းကြီးတွေရဲ့ အဆိုအမိန့်တွေကို နံရံ အပြည့် တွေ့ရပါတယ်။

ဥရောပမှာတော့ စားသောက်ဆိုင်လိုနေရာတွေမှာ ဘာသာရေးကိစ္စရေးလေ့မရှိပါ။ ဒါပေမယ့် ထိုင်းနိုင်ငံက နယ်မြို့တချို့မှာတော့ တခါတလေ ဘုန်းကြီးပုံတွေ့ရတတ်တဲ့အတွက် ထိုင်းနဲ့ ဆင်တယ်လို့ ပြောရမယ်။ စားပွဲပေါ်မှာတော့ စမူဆာ၊ ကြက်ကြွပ်ကြော်နဲ့ တခြားမုန့် ၄-၅ မျိုး တင်ထားပါတယ်။ မြန်မာနိုင်ငံမှာ ဥရောပနဲ့ အမေရိကားလို အစားအသောက်တွေကို စံချိန်မှီ မမှီ စစ်ဆေးတဲ့စနစ် မရှိသေးဘူး၊ ရန်ကုန်က ဆီတွေ မသန့်ဘူး၊ ဟင်းသီးဟင်းရွက်တွေမှာလည်း ဓာတုဆေးပါတယ်ဆိုပြီး နာမည်ကြီးနေတဲ့အတွက် မနေ့ညက ဘာမှမစားရဲလို့ ဗိုက်ကလည်း အတော်ဆာနေပါပြီ။

စာရေးသူသည် ထိုင်း-မြန်မာ နယ်စပ်တွင် အခြေစိုက်သော ကျောင်းသား လက်နက်ကိုင် ABSDF အဖွဲ့ဝင်ဟောင်း ဖြစ်ပြီး DVB ၏ သတင်းထောက် ဟောင်းလည်း ဖြစ်သည်။ ယခုအခါ နော်ဝေနိုင်ငံတွင် နေထိုင်လျက် ရှိသည်
ဆာပေမယ့် လျှောက်စားလို့ မဖြစ်သေး။ ကျနော့်အရင် ရန်ကုန်ရောက်ဖူးတဲ့ ပြည်တော်ပြန်တွေဆို ၀က်သားတုတ်ထိုးတွေ၊ အသုတ်စုံတွေ၊ ကြံရည်တွေကြောင့် တချို့ ၀မ်းလျှော ၀မ်းပျက်ဖြစ်ပြီး ဆေးရုံတင်ရတဲ့အထိ အခြေအနေ ဆိုးသွားတယ်။ ဒါ ကြောင့် ကားမတိုက်အောင် ”သွား” သတိထားရသလို၊ ၀မ်းမလျှောအောင် ”စား” သတိလည်း ထားနေရပါတယ်။ အပြင်မှာ အနေကြာသွားတာကြောင့်  မြန်မာအစားအသောက်တွေကို ကျနော်တို့လျှာတွေ အရသာခံချင်တိုင်း ကျနော်တို့ ဗိုက်တွေက ခွင့်မပြုတော့ပါဘူး။

”လက်ဖက်ရည်ပဲ အရင်ပေးပါ” လို့ စားပွဲထိုးကိုပြောတော့ ချိုပေါ့၊ ချိုဆိမ့်၊ ပေါ့ကျ ဘယ်ဟာလဲ လို့ထပ်မေးပါတယ်။ နိုင်ငံရပ်ခြားက ကော်ဖီဆိုင်တွေမှာ ကာဖယ်ချီနို၊ ကာဖေးလာတေး၊ အမေရိကာနို၊ အက်စပရက်ဆို စသဖြင့် မှာနေကြပေမယ့် လက်ဖက်ရည်ဆိုင် မထိုင်တာ လက်ဖက်ရည် မသောက်ဖြစ်တာကြာပြီဖြစ်လို့ ဘာမှာရမှန်း ကျနော် ချက်ချင်း မဆုံးဖြတ်နိုင်။ နောက်ဆုံးတော့ သူငယ်ချင်းတွေသောက်တဲ့ ”ပေါ့ကျ” ကိုပဲ မှာပါတယ်။

စမူဆာသုတ်မှာပြီး စားဖို့ပြင်နေတုန်း ဘေးစားပွဲမှာ ထိုင်နေတဲ့ စားသုံးသူတဦးရဲ့ ချောင်းဟန့်သံ၊ ခံတွင်းရှင်းသံ ကြားရလို့ လှည့်ကြည့်မိပါတယ်။ ရေနွေးကြမ်းခွက်နဲ့ ပလုပ်ကျင်းပြီး စားပွဲအောက်က အမှိုက်ပုံးထဲ ”ဗျစ်” ဆိုပြီး ကွမ်းသွေးနဲ့ တခြားအညစ်အကြေးတွေကို ထွေးချလိုက်ပါတယ်။ ပြီးတော့ သလိပ်ဟန့်ပြီး တံတွေးပါ ထပ်ထွေးလိုက်ပြန်ပါတယ်။ ဒီလုပ်ရပ်ကို ကျနော်က အထူးအဆန်း ကြည့် နေပေမယ့် တခြားစားပွဲက လူတွေအတွက်တော့ မထူးတော့တဲ့ နေ့စဉ်မြင်ကွင်း ဖြစ်နေပုံပါ။

နဂိုကတည်းကမှ မသန့်တဲ့ အစားအသောက်ဆိုပြီး အားရပါးရ မစားရဲ ဖြစ်နေတဲ့ ကျနော် ဒီလို မြင်ကွင်းမျိုးကို မြင်ရတဲ့အခါ ဆက်မစားနိုင်တော့ပဲ ရပ်သွားတယ်။ ရေနွေးကြမ်း ပန်းကန်လုံးကို သံသယနဲ့ ကြည့်နေတုန်း ဆေးလိပ်မီးခိုးက ကျနော့် နှာခေါင်းဝထဲ ၀င်လာတယ်။ ဒုက္ခပါပဲ။ စားသောက်ဆိုင်အတွင်း ဆေးလိပ်သောက်တဲ့လူက ဘေးက တခြား စားသုံးသူတွေကို လုံးဝ ဂရုမစိုက်ပါ။ ကိုယ့်အပြုအမူဟာ တခြားလူ အနှောင့်အယှက်ဖြစ်မလား စဉ်းစားဖို့ မြန်မာတွေ မေ့လျော့နေခဲ့တာ ဘယ်လောက် ကြာသွားခဲ့ပြီလဲ။

တကယ်ဆိုရင် လူထုကျန်းမာရေး အရေးတယူလုပ်ကြတဲ့ နိုင်ငံအတော်များများမှာ လူကြား ဆေးလိပ်သောက်ခွင့် မရှိတော့ပါ။ ဘန်ကောက်မှာ မြို့လည်ကောင် ဆေးလိပ်သောက်ချင် သတ်မှတ်ထားတဲ့ နေရာမှာ သောက်၊ ပြီးရင် ဆေးလိပ်ခွက်ထဲပစ်ခဲ့၊ မဟုတ်ရင် ဒဏ်တပ်ခံထိမယ်။ နော်ဝေးမှာတော့ အများပြည်သူနဲ့ဆိုင်တဲ့နေရာတင်မက ကိုယ့်အိမ်ထဲမှာတောင် ဆေးလိပ်သောက်ခွင့်မရှိ။ အသက်မပြည့်သေးတဲ့ ကလေးတွေရှေ့မှာဆို လုံးဝ မသောက်ရပါ။ ရန်ကုန်မှာကတော့ အသက်မပြည့်သေးတဲ့ ကလေးတွေကိုယ်တိုင် ဆေးလိပ်ရောင်းတာ သောက်တာတွေကို တွေ့ရတော့ ကလေးသူငယ်အခွင့်အရေးဆိုတာ အတွေးက ရောက်သွားမိပြန်တယ်။

ပြီးတော့ ကွမ်းတံတွေး။ ကွမ်းစားတာ ထား၊ ထွေးတာက ရန်ကုန်တမြို့လုံး ရဲရဲနီ။ တွေ့တဲ့နေရာ ကွမ်းတံတွေး ထွေးတာတွေကိုလည်း မယဉ်ကျေးတဲ့ လုပ်ရပ်တခုအဖြစ် အစိုးရက ကန့်ကွက်မယ့်ပုံ မတွေ့ရသေးပါ။ ကျနော်ငှားစီးဖူးတဲ့ တက္ကစီသမားတိုင်းလိုလို မီးပွိုင့်လိုနေရာ ဖြစ်ဖြစ်၊ ကားကျပ်လို့ ခဏတဖြုတ် နားတာဖြစ်ဖြစ် တံခါးဖွင့်ပြီး လမ်းမပေါ် ကွမ်းတံတွေး ထွေးချလိုက်တာပါပဲ။ ဘတ်စ်ကားတွေအပါအ၀င် နေရာအတော်များများမှာ ”ကွမ်းသွေးမထွေးရ” ဆိုတဲ့ ဆိုင်းဘုတ်တွေရှိပေမယ့် အဲဒီဆိုင်းဘုတ်တွေကိုယ်တိုင် ကွမ်းတံတွေး ပေနေပါတယ်။

ဆေးလိပ်သောက်တာ၊ ကွမ်းစားတာကို အပြစ်မမြင်ကြပေမယ့် အရက်သောက်တာကိုတော့ မြန်မာတွေ မကောင်းမှုလို့ မြင်ကြပါတယ်။ ဘုရားမကြိုက်တဲ့ အလုပ်၊ ၅ ပါးသီလမှာ သူရာမေရိယ ဆိုပြီး ပညတ်ထားလို့ ထင်တယ်။ တနည်းအားဖြင့်ဆိုရင်တော့ အရက်သောက်သုံးမှုကို ကျန်းမာရေးရှုဒေါင့်ကနေ မကြည့်ဘဲ ဘာသာရေးရှုဒေါင့်နဲ့ ချည်းကပ်တဲ့ သဘောမျိုးလို့ ကျနော် ထင်ပါတယ်။
မနက်စာစားပြီး ဟိုတယ်ပြန် အင်တာနက်သုံးတော့ လိုင်းက မချိတ်။ ကောင်တာမှာ သွား ပြောတော့ ”ဒီက ဖြစ်တာမဟုတ်ဘူး အကို။ မြန်မာတယ်လီပို့စ်က ဖြစ်နေတာ။ ကျနော်တို့ ဘာမှ မတတ်နိုင်ဘူး” လို့ ပြောတဲ့အတွက် ကျနော်လည်း ဘာမှမတတ်နိုင်။ ဒါ မြန်မာပြည်၊ ဒီတိုင်းပြည်အတွက် ငါတို့ တိုက်ပွဲဝင်ခဲ့တာလို့ ကိုယ့်ကိုယ်ကို ပြန်နှစ်သိမ့်နေရတယ်။

နောက်တနေ့ တစ်ရက်ကို ဒေါ်လာ ၃၀ တန် သို့မဟုတ် ကျပ်ငွေ ၃ သောင်းတန် ပေးငှားရတဲ့ ဟိုတယ်ခန်းကနေ အလကားနေလို့ရမယ့် မိတ်ဆွေတယောက်ရဲ့ အိမ်ခန်းဆီ ပြောင်းပါတယ်။ မပြောင်းလို့ မဖြစ်။ ဒေါ်လာ ၃၀ ဆိုတာဟာ ဥရောပနဲ့ အမေရိကားက လူတွေအတွက် သိပ်မပြောပလောက်ပေမယ့် ရန်ကုန်က ကျောင်းဆရာတဦးရဲ့ တလ၀င်ငွေက ကျပ် ၆ သောင်းသာ ရှိပါတယ်။ သူများ တလဝင်ငွေနဲ့ ညီမျှသောငွေကို ကျနော်က ၂ ရက်တည်းနဲ့ သုံးလိုက်ရတာ စိတ်မသန့်ဖြစ်လာပါတယ်။

ကျနော့်မိတ်ဆွေရဲ့အခန်းက မြို့လယ်လမ်းကြား တနေရာက ၆ ထပ်တိုက် အပေါ်ဆုံးထပ်။ (အလွှာလို့ ရန်ကုန်သားတွေက အသုံးများတယ်)။ ၆ ထပ်ကနေ ၂ ထပ်အထိ ရှိသမျှ အခန်းအားလုံး နိုင်လွန်ကြိုးတွေ တွဲလောင်းချထားပြီး ဧည့်သည်လာရင် အဲဒီကြိုးကို ဆွဲရပါတယ်။ ဒါဆိုရင် အပေါ်မှာ ခေါင်းလောင်းမည်ပြီး အိမ်ရှင်က ၀ရံတာကိုထွက်လာ၊ တရပ်ကွက်လုံး ကြားအောင် အောက်ကိုအော်ပြော၊ သေချာပြီဆိုတော့မှ အဲဒီကြိုးကနေတဆင့် သော့ချိတ်ပြီး ချပေး။ ”သြော်… မင်းသိုက်ရဲ့ ကြိုးဆိုတာ ဒီလိုကိုး” ဆိုပြီး ကျနော့်ပါးစပ်က လွှတ်ကနဲ ထွက်သွားတယ်။


ဒါရိုက်တာ မင်းသိုက်ရဲ့ ကြိုးဆိုတာကတော့ ပြီးခဲ့တဲ့နှစ်အတွင်း ဒေါ်အောင်ဆန်းစုကြည် ဦးစီးကျင်းပတဲ့ ဖလင်ပွဲမှာ ပထမ ဆုရသွားတဲ့ ရုပ်ရှင်တိုပါ။ ရန်ကုန်က ဓာတ်လှေကားမရှိ၊ လူခေါ်တဲ့ လျှပ်စစ်ခေါင်းလောင်းနဲ့ စကားပြောစက် မရှိတဲ့ တိုက်ခန်းတွေမို့ မြန်မာ့နည်းမြန်မာ့ဟန် ကြိုးဆွဲစနစ်သုံးတာကို ထိထိမိမိ တင်ပြထားတဲ့ ရုပ်ရှင်ပါ။

အဲဒီတော့ ကျဉ်းမြောင်း ကောက်ကွေ့ ညစ်ထေးလှတဲ့ လှေကားကို ချွေးပြန်တဲ့အထိ တက်ပေတော့။ ဒါကြောင့် ဘန်ကောက်၊ ချင်းမိုင်တို့နဲ့ သန့်ပြန့်မှု အတော်ကွာလို့ နယူးဒေလီနဲ့ တူတယ်လို့ ပြီးခဲ့တဲ့အပတ်က ကျနော် ပြောမိတာပါ။ လူနေတိုက်တန်းတင်မက ရုံးခန်းတွေပေါ်တက်တဲ့ လှေကားတွေမှာလည်း ကွမ်းတံတွေးတွေ၊ ဆေးလိပ်တိုတွေ၊ ဖုံတွေ၊ အမှိုက်တွေနဲ့ ညစ်ထေးနေတာကို တွေ့ခဲ့ရပါတယ်။

ရန်ကုန်က တိုက်တွေ ၆ ထပ်အထိ ဓာတ်လှေကား ဆင်စရာမလိုဘဲ ၆ ထပ်ကျော်မှ ဓာတ်လှေကားဆင်ပေးရတယ်။ ဒါကြောင့် ကန်ထရိုက်တိုက်လို့ ခေါ်တဲ့ တိုက်အများစုဟာ ၆ ထပ်ပဲ ဆောက်ကြတယ်လို့ မိတ်ဆွေက ပြောတယ်။ ဓာတ်လှေကားနဲ့ လေအေးစက်ဟာ ရန်ကုန်မှာ ဇိမ်ခံ ပစ္စည်းလို့လည်း သူက ဆိုပါတယ်။ ”ဓာတ်လှေကားကတော့ မရှိတာပဲ ကောင်းပါတယ်ဗျာ။ ဓာတ်လှေကားစီးရင် မီးပျက်သွားရင် ဒုက္ခများလိမ့်မယ်”တဲ့။

ရန်ကုန်မှာ တနေ့ နှစ်ခါလောက် မီးပျက်တာကို ကျနော် ကြုံပါတယ်။ မြို့ထဲက တိုက်တန်းတွေမှာတင် ပျက်တာမျိုး မဟုတ်။ မင်္ဂလာဒုံ အပြည်ပြည်ဆိုင်ရာ လေဆိပ်မှာတောင် ပျက်တယ်လို့ ကြုံဖူးသူတွေက ပြောတော့ အံ့ဩရတယ်။ ကြီးကြီးကျယ်ကျယ် ပြောမယ်ဆိုရင်တော့ နိုင်ငံရဲ့ အခြေခံအဆောက်ဦတွေက ဘာမှ တိုးတက်မှု မရှိသေးလို့ပဲ ကောက်ချက်ဆွဲမိပါတယ်။ မီးက မမှန်၊ ရေက မလာ။ မြို့ပတ်ရထားနဲ့ ဘတ်စ်ကားတွေက ဟောင်းနွမ်း။ လိုရာ အလွယ်တကူ ဝယ်နိုင်မယ့် ၂၄ နာရီဖွင့်တဲ့ ဆဲဗင်းအလဲဗင်းလို ဆိုင်တွေ ရန်ကုန်မှာ မရှိသေးပါ။

ရန်ကုန်မြို့ကြီးရဲ့ လွဲချော်မှု အတော်များများကို ငြီးငြူပြီးတော့ ကျနော်ရောက်သွားတဲ့နေရာက အဲဒီလွဲချော်မှုတွေကို ပြင်မယ်လို့ မျှော်လင့်ရတဲ့ အမျိုးသားဒီမိုကရေစီအဖွဲ့ချုပ် NLD ရုံးခန်းပါ။ ပါတီ ခေါင်းဆောင်တွေကို အင်တာဗျုးလုပ်ဖို့ သွားခြင်းမဟုတ်။ တချိန်က DVB မှာ တာဝန်ထမ်းစဉ်က နေ့စဉ် တယ်လီဖုန်းခေါ် သတင်းမေးရင်းနဲ့ ရဲဘော်ရဲဘက်တွေလို ရင်းနှီးနေတဲ့ ရုံးအဖွဲ့မှူးနဲ့ မိတ်ဆွေဟောင်းတွေကို တွေ့ဆုံနှုတ်ဆက်ဖို့ပါ။


”အဲဒီ ဖုန်းပေါ့ဗျာ။ ခင်ဗျားတို့ နေ့စဉ်ခေါ်ပြီး ကျနော်တို့ကို ဒုက္ခပေးခဲ့တာ” လို့ ရုံးအဖွဲ့မှုး ဦးသိန်းဦးက ကျနော့်ကို လုပ်ဖေါ်ကိုင်ဖက်တဦးသဘွယ် နှုတ်ဆက်ပါတယ်။ ဦးသိန်းဦး၊ ဦးစိုးဝင်း၊ ဒေါ်လဲ့လဲ့၊ ဒေါ်အေးအေးမာ အပါဝင် NLD ရုံးမှာ တွေ့တဲ့ လူအတော်များများကို ဆယ်နှစ်ဆယ်မိုးလောက် နေ့စဉ်ဖုန်းခေါ်ပြီး သတင်းမေးဖူးပေမယ့် အခုမှ ပထမဆုံးအကြိမ် လူချင်းတွေ့ဖူးတာ ဖြစ်ပါတယ်။ အခုတော့ NLD ဟာ လွန်ခဲ့ တဲ့ ၁၀ နှစ်ကျော် ဒီပဲယင်းကာလကလိုမျိုး အပိတ်ဆို့ခံ အဖမ်းဆီးခံ ပါတီတခု မဟုတ်တော့ပါ။ အလားတူ DVB ကလည်း အရင်လို ပြည်ပအခြေစိုက် အတိုက်အခံ သတင်းဌာန မဟုတ်တော့ပါ။ ဒါကိုပဲ တိုးတက်မှုတခုအဖြစ် သတ်မှတ်ရမလား။

NLD နာယကလည်း ဖြစ် သတင်းစာဆရာကြီးလည်း ဖြစ်သူ ဦးဝင်းတင်နဲ့ တွေ့ချင်ကြောင်းပြောတော့ NLD အလံနဲ့ ဒေါ်အောင်ဆန်းစုကြည်ပုံ ကပ်ထားတဲ့ ဖိုးဝှိးကား အနီရောင်ကြီးနဲ့ ဦးဝင်းတင်ရှိရာ ကျောက်မြောင်းကို လိုက်ပို့ပေးပါတယ်။ “ကြည့်လုပ်နော် ကားဆရာ။ စွမ်းအားရှင်တွေနဲ့ လမ်းမှာ တိုးနေပါဦးမယ်” ဆိုပြီး ကျနော်က နောက်တော့ အဲဒီလိုမျိုးတော့ မရှိတော့ပါဘူးလို့ ကားဆရာက ရယ်ပြီးပြောပါတယ်။

ဦးဝင်းတင်က ဗီဒီယိုရီပို့တွေမှာ မြင်ဖူးနေတဲ့အတိုင်းပါပဲ။ ”ပါတီထဲမှာလည်း ပြောရဲဆိုရဲသူ သိပ်မရှိဘူးဗျာ။ နိုင်ငံခြားသတင်းထောက်တွေက ကျနော့်ဆီချည်းပဲ လာ မေးနေကြတယ်” ဆိုပြီး ကျနော့်ကို သတင်းသမားတဦးအဖြစ် သူက ရှုမြင် နှုတ်ဆက်ပါတယ်။ ဒေါ်အောင်ဆန်းစုကြည်ရှေ့မှာ ဘယ်သူကမှ ဆန့်ကျင်ဘက် စကားမပြောရဲဘူးဆိုတဲ့ နိုင်ငံခြားသတင်းစာပါ သူ့မှတ်ချက် စကားတွေအကြောင်း ကျနော်တို့ ဆွေးနွေးဖြစ်ပါတယ်။ ”ကျနော်ကတော့ ကျနော့် အမြင်ကို ပွင့်ပွင့်လင်းလင်း ပြောနေတာပဲဗျာ။ သူတို့မကြိုက်လည်း မတတ်နိုင်ဘူး” လို့ စစ်သားတပိုင်း အစိုးရ လို့ သူခေါ်တဲ့ လက်ရှိ ဦးသိန်းစိန်အစိုးရအကြောင်းလည်း ဦးဝင်းတင်က ပယ်ပယ်နယ်နယ် ဝေဖန်နေဆဲပါ။

တနေ့တည်းပဲ ညနေ ၆ နာရီမှာ အမျိုးသားသတင်းဆု ချီးမြှင့်တဲ့ အမျိုးသားကဇာတ်ရုံဆီ ကျနော် ရောက်သွားပါတယ်။ အ၀င်ဝမှာ ကင်မရာ တကားကားနဲ့စတွေ့တာက DVB သတင်းအဖွဲ့။ ဟိုဖက်ဘေးမှာတော့ စကိုင်းနက်ရုပ်သံက လိုက်ဖ်လွှင့်တဲ့ အသံလွှင့်ကားတွေနဲ့။ တရုတ်အစိုးရက လက်ဆောင်ပေးထားတဲ့ ဇာတ်ရုံထဲ ၀င်လိုက်တော့ ”လေလှိုင်းပေါ်ကလူသတ်သမား”တွေ ဖြစ်ခဲ့တဲ့ ဘီဘီစီ၊ ဗီအိုအေ၊ ဒီဗွီဘီက ညွှန်ကြားရေးမှူးတွေအပါအဝင် မီဒီယာအသီးသီးက တာဝန်ရှိသူတွေ တန်းစီနေရာယူလို့။


”ဆင်ဆာမရှိတော့ဘူးဆိုပေမယ့် မီဒီယာတွေကို ဘယ်သူပိုင်သလဲ။ မီဒီယာ အုံနာရှစ် ပေါ်လစီ မရှိပဲနဲ့ တော့ လွပ်လပ်စွာ ရေးသားခွင့်ရနေပြီလို့ မပြောနိုင်သေးပါဘူး” လို့ အကောင်းဆုံး အယ်ဒီတာ့အာဘော် ဆုရသွားတဲ့ မသီတာ(စမ်းချောင်း)ရဲ့ စကားသံက အားလုံးကို လှုပ်နှိုးလိုက်ပါတယ်။ အရင်က ဒါမျိုး ဘယ်ပြောလို့ ရပါ့မလဲ။ အခုတော့ နိုင်ငံရေး အကျဉ်းသားဟောင်းရေးတဲ့ ”အသွင်မတူမှုနှင့် ပဋိပက္ခအသွင်ပြောင်းခြင်း” ဆိုတဲ့ အယ်ဒီတိုရီရယ် ဆုပေးတယ်ဆိုကတည်းက ဒါ မီဒီယာလောက တိုးတက်မှုတခုလို့ ဆိုသင့်တာပေါ့။

ပြီးတော့ အကောင်းဆုံး သတင်းဆု၊ အကောင်းဆုံး ဆောင်းပါးဆု၊ အကောင်းဆုံး ကာတွန်းဆု၊ အကောင်းဆုံး သတင်းဓာတ်ပုံဆု၊ အကောင်းဆုံး ရုပ်သံဆု စသဖြင့် ကြေငြာပါတယ်။ ”ဘာကြောင့် အကောင်းဆုံး အသံလွှင့်ဆုနဲ့ အကောင်းဆုံး အွန်လိုင်းဆု မပေးတာလဲ” ဆိုပြီး ကျနော်က နောက်တော့ ရှေ့နှစ်ကျရင်ဖြစ်လာမှာပါလို့ ဘေးနားမှာထိုင်တဲ့ သတင်းထောက်တဦးက ပြောပါတယ်။ အကောင်းဆုံး ရုပ်သံဆုကို ဒီနှစ်မှ စပေးတဲ့အတွက် ရှေ့နှစ်ကျရင် အကောင်းဆုံး အသံလွှင့်ဆုနဲ့ အွန်လိုင်းဆု ပါလာနိုင်တယ်လို့ သူက တွက်ပါတယ်။

တကယ်ဆို ဘီဘီစီနဲ့ ဗွီအိုအေ အပါအ၀င် လိုင်းတိုရေဒီယိုတွေကို နားထောင်နေတဲ့ ပရိတ်သတ်က ဂျာနယ်နဲ့ သတင်းစာ ဖတ်တဲ့ ပရိတ်သတ်ထက် ဆယ်ဆမက များတယ်ဆိုတာ ဆုရွေးချယ်ရေးအဖွဲ့ဝင်တွေ မသိပဲနေပါ့မလား။ Facebook အပါဝင် အွန်လိုင်းအသုံးပြုပြီး သတင်းရယူနေတဲ့ မြန်မာပရိတ်သတ်လည်း တိုးလာနေတယ်ဆိုတာကိုလည်း သူတို့သိမှာပါ။


ပွဲပြီးလို့ အိမ်ပြန်တဲ့အခါမှာတော့ မသီတာပြောတဲ့ ဒီနေ့ မြန်မာမီဒီယာတွေကို ဘယ်သူတွေက ပိုင်ဆိုင်ထားပါသလဲဆိုတဲ့ မီဒီယာ အုံနာရှစ်ကိစ္စက ကျနော် ခေါင်းထဲ ကပ်ပါလာပါတယ်။သူပုန်လူထွက် သတင်းထောက်ဆိုတော့ သိက္ခာကို ရိက္ခာလဲရတဲ့အဖြစ်မျိုး ဘယ်တော့မှ မလုပ်နိုင်။

အစိုးရပြန်ကြားရေးဌာနမှာ တာဝန်ထမ်းဖို့ လုံးဝစိတ်ကူးမရှိ။ ခရိုနီ၊ ခရိုပြာတွေပိုင်တဲ့ မီဒီယာမှာလည်းလုပ်ဖို့ စိတ်မ၀င်စား။ ဒိုနာတွေ ကြော်ညာတွေပေါ် မှီခိုနေရတဲ့ မီဒီယာသမား ဘ၀မျိုးကိုလည်း စိတ်က သိပ်မလိုလား။ ကိုယ်ပိုင်မီဒီယာထောင်ဖို့တော့ ဝေလာဝေး အရင်းအနှီးက မရှိသေး။ လွတ်လပ်တဲ့ ဖရီးလန့်စ် ဂျာနယ်လစ်တဦးအဖြစ် ရန်ကုန်မီဒီယာလောကမှာ ရပ်တည်ဖို့ ဆိုတာရော ကျနော့်အတွက် နေရာရှိနေသေးသလား။

Wednesday, May 15, 2013

သူပုန်ကျောင်းသားတဦးရဲ့ ပြည်တော်ပြန် ခရီးစဉ် (၃)

 

အင်းလျား ကန်စောင်းက အရင်လို တက္ကသိုလ် အငွေ့အသက် မရှိတော့ (ဓာတ်ပုံ – wikimedia.org)



အခုတော့ ရန်ကုန်အပြည်ပြည်ဆိုင်ရာလေယာဉ်ကွင်းဟာ အသစ်။ လွန်ခဲ့တဲ့ ၂၅ နှစ် ကျနော် ရန်ကုန်က မထွက်ခင် ဒီနေရာမှာ ဘာမှမရှိသေး။ တိုးချဲ့ရုံးဆောက်မယ်ဆိုပြီး မြေနေရာရှင်းနေတုန်း။ အပြင်ဖက် ထွက်လိုက်တော့မှ အရင်က ကျနော် ရန်ကုန်-ထားဝယ် သွားနေကြ၊ ပြည်တွင်းရုံးဟောင်းကို ဟိုဖက် ခပ်လှမ်းလှမ်းမှာ လှမ်းမြင်ရပါတယ်။

လေယာဉ်ကွင်းကနေ မြို့ထဲထွက်လာတော့ ထပ်ချဲ့ထားတဲ့ လမ်းမနဲ့ ဆေးသုတ်ထားတဲ့ ပလက်ဖောင်းတွေကို တိုးတက်မှုအဖြစ် သတိထားမိပါတယ်။ ”ရန်ကုန် လမ်းတွေက ပိုကောင်း ပို ကျယ်လာသလိုပဲ” လို့ ကျနော်က ပြောမိပါတယ်။ ”ချီးကျူးဖို့ သိပ် ဆန္ဒမစောနဲ့လေ၊ ပြည်လမ်းလောက်ပဲ ကောင်းတာ။ မြို့ထဲရောက်ရင် ခင်ဗျားတွေ့ပါလိမ့်မယ်” လို့ ကျနော့်ကို လိုက်ပို့တဲ့ သူငယ်ချင်းက ကောက်ချက်ပေးပါတယ်။

စာရေးသူသည် ထိုင်း-မြန်မာ နယ်စပ်တွင် အခြေစိုက်သော ကျောင်းသား လက်နက်ကိုင် ABSDF အဖွဲ့ဝင်ဟောင်း ဖြစ်ပြီး DVB ၏ သတင်းထောက် ဟောင်းလည်း ဖြစ်သည်။ ယခုအခါ နော်ဝေနိုင်ငံတွင် နေထိုင်လျက် ရှိသည်
“သစ်ပင်တွေ များတာကတော့ ဂုဏ်ယူစရာပဲဗျ။ ဒီတချက် တည်းနဲ့တင် ရန်ကုန်က ဘန်ကောက်ထက် သာသွားပြီ” လို့ ကျနော်က ထပ်ပြော မိပြန်ပါတယ်။ ”ဒါတောင် နာဂစ်တုန်းက အပင်ကြီးတွေ ကုန်သွားလို့” ဆိုပြီး သူငယ်ချင်းက တုံ့ပြန်ပါတယ်။ ဒီလိုနဲ့ ၈ မိုင်လမ်းဆုံ၊ အင်းလျား ကန်ဘေးက တံတားနီကို ဖြတ်ပြီး တက္ကသိုလ်ရှေ့ ရောက်လာ ပါတယ်။ ရန်ကုန် တက္ကသိုလ် ဆိုတဲ့ ဆိုင်းဘုတ်နဲ့ ဂျက်ဆင်ကို ငေးနေတုန်း ကားက လှည်းတန်း ကုန်းကျော် တံတားပေါ် ရောက်လာပါတယ်။

“ဒါ ဒီမိုကရေစီ ခေတ်ရဲ့ ပထမဆုံး ကုန်းကျော် တံတားပေါ့” လို့ ကားဆရာက ရှင်းပြပါတယ်။ ဒီတံတား သစ်ကြောင့် ယဉ်ကျော ပိတ်ဆို့မှု အတော် သက်သာ သွားတယ် လို့လည်း သူက ဆိုပါတယ်။ ဒါပေမယ့် ကျနော့် မျက်စိထဲမှာတော့ ဒီတံတားဖွင့်ကာစ ပြီးခဲ့တဲ့ သင်္ကြန်ကာလ အတွင်း တံတားပေါ် ကားပိတ်ရပ်ပြီး ဂီတာတီး အရက်သောက်နေတဲ့ Facebook ပေါ်က ဓာတ်ပုံကို ပြေးမြင်မိတယ်။ ”လွတ်လပ်ရေး ရတယ်ဆိုပြီး လမ်းမပေါ်ဆေးလှန်းတဲ့ လူတွေ” လို့ ဗိုလ်ချုပ်အောင်ဆန်းပြောခဲ့ဖူးတဲ့ စကားလုံးကိုလဲ သွားသတိရမိ ပါတယ်။

”ဒါ ဆေး ၁ လေ။ လိပ်ခုံးတော့ မရှိတော့ဘူး” လို့ သူငယ်ချင်းက ဆေးတက္ကသိုလ်ဟောင်းကို လက်ညှိုးထိုးပြီး ပြောပါတယ်။ ပြီးတော့ ဦးဝိစာရလမ်း။ ”ဒီ တော်လှန်ရေးပန်းခြံက ပိတ်ထားတာ ကြာပြီ။ အာဇာနည်ကုန်းလည်း အများပြည်သူ ၀င်ခွင့်မရသေးဘူး” လို့ သူက ဆက်တိုက် ရှင်းပြနေပါတယ်။ ပြုပြင်ပြောင်းလဲရေး လုပ်နေပါတယ်ဆိုတဲ့ လက်ရှိအစိုးရခေတ်မှာ ပြန်မရနိုင်မယ့် ပျောက်ဆုံးမှုတွေ၊ ပိတ်ထားတာတွေ၊ မရသေးတာတွေ အများကြီးပါလားလို့ စဉ်းစားရင်းနဲ့ ကားက မြို့ထဲရောက်လာပါတယ်။

ကျနော်စိတ်ထဲမှာတော့ ရန်ကုန်ဟာ သူ့အရှေ့အရပ်က ဘန်ကောက်နဲ့မတူပဲ သူ့အနောက်က နယူးဒေလီနဲ့ ပိုတူနေသလိုပဲ။ အဆောက်အဦတွေက ဟောင်းနွမ်းချေးထူ။ ကွမ်းသွေးတွေက နေရာတကာ။ ကားဟွန်းသံကတညံညံ၊ လမ်းဖြတ်ကူးသူတွေက စည်းကမ်းမရှိ။ လမ်းမပေါ်နွားရှိတာနဲ့ မရှိတာပဲ ကွာတယ်ဆိုပြီး ကျနော်က ထင်မြင်ချက်ပေးတော့ ”ဒါတောင် ဟွန်းမတီးရ ဇုံလုပ်ထားတာ” ဆိုပြီး ကားဆရာက ၀င်ပြောပါတယ်။

ကျနော်ပဲ ဥရောပမှာ အနေကြာသွားလို့လားတော့ မသိပါဘူး။ ရန်ကုန်က လူတွေ လမ်းကူးတာ တကယ့်ကို ကြောက်စရာ။ လူကူးမျဉ်းကြားရှိပေမယ့် ကားတွေက ရပ်ပေးတာမဟုတ်။ လူကူး မျဉ်းကျားပေါ်အထိ တက်ရပ်တာမျိုး။ လုံးဝ ရပ်မပေးပဲ ရှောင်မောင်းတာမျိုးတွေ တွေ့ရပါတယ်။ ”အော်စလိုက လူတွေကို ရန်ကုန်မှာ လမ်းကူးခိုင်းရင်တော့ အားလုံး ကားတိုက်သေကုန်မယ်” လို့ ကျနော် တွေးမိပါတယ်။ ဘာကြောင့်လဲဆိုရင် အော်စလိုမှာ လမ်းကူးသူတွေက ကားလာ မလာကိုတောင် မကြည့်ပါ။ မျဉ်းကြား တွေ့တာနဲ့ ဒီတိုင်း ကူးချလိုက်တာပါပဲ။ သက်ဆိုင်ရာကားက မျဉ်းကြားနဲ့ ၃ ပေအကွာလောက်ကနေ ရပ်စောင့်ပေတော့။ အဲဒီလိုမစောင့်ရင် ကားသမား လိုင်စင်အသိမ်းခံရပြီသာ မှတ်။


အရှေ့နဲ့အနောက် ကွာခြားမှုတွေအကြောင်း ပြောရင်းပွားရင်းနဲ့ ကမ်းနားလမ်းပေါ်က ကျနော်တည်းမယ့် ဟိုတယ်တလုံးဆီ ရောက်လာပါတယ်။ ဟိုတယ် လော်ဘီနဲ့ ကားရပ်နေရာ အပါအ၀င် ဓာတ်လှေကားစောင့်တဲ့ အင်အားပါပေါင်းလိုက်ရင် ဟိုတယ်ဝန်ထမ်းဦးရေက ထိုင်းရဲ့နှစ်ဆ၊ နော်ဝေ ရဲ့ ၅ ဆလောက်ရှိမယ်။ အခန်းထဲရောက်ပြီး လေအေးစက်ဖွင့်လိုက်တော့လည်း ဖုန်နံ့ အလာဂျီ ရှိတဲ့ ကျနော့် နှာခေါင်းက ဒီအခန်း မသန့်ဘူးဆိုတာ ချက်ချင်းသိလိုက်ပါတယ်။ ပြူတင်းပေါက် ဖွင့်ပြီး ရန်ကုန်မြစ်ဖက် လှမ်းကြည့်မယ်ပြင်တော့ ပြူတင်းပေါက်နံရံပေါ်မှာ ဖုန်တွေအများကြီး။ လိုက်ကာကလည်း အနက်ရောင်နဲ့။ တီဗွီ၊ ရေခဲသေတ္တာနဲ့ ရေချိုးခန်းက ရေပူ-ရေအေး စက်တွေ အားလုံးမှာ ၀ိုင်ယာကြိုးတွေ၊ အဒပ်ပတာတွေနဲ့ ရှုပ်ထွေးနေပါတယ်။

ဒေါ်လာ ၃၀ တန် အခန်းဆိုတော့ ဒီလောက်ပဲ ရမှာပေါ့လေဆိုပြီး စိတ်ထဲဖြေရပါတယ်။ ဒါပေမယ့် ဘန်ကောက်မှာ ကျနော်တည်းခဲ့တဲ့ ဘတ် ၉၀၀ တန် (ဒေါ်လာ ၃၀ တန်) အခန်းက ဒီထက်သာတယ် ဆိုတာ ကျနော်သိနေတာပဲလေ။ နောက် ”မြန်မာနိုင်ငံက ဟိုတယ်တွေက ဈေးကြီးပြီး ဘာ ဆားဗစ်မှ မရှိဘူး” လို့ တခြားလူတွေ ငြီးတာကြားဖူးနေတာ အခုတော့ ကျနော်သိပြီ။

ဟိုတယ်မှာ အထုပ်အပိုးထားပြီး ကျနော်တို့ ပထမဆုံးသွားဖို့ ရွေးချယ်တဲ့နေရာက ရွှေတိဂုံစေတီ။ တက္ကစီငှားတော့ ၁၅၀၀ တဲ့။ ဈေးအတော်ကြီးတယ်လို့ ထင်လိုက်ပေမယ့် ဘတ်နဲ့တွက်တော့ ၅၀ (၂ ဒေါ်လာ) ထက်မပို။ တံခါးဆွဲဖွင့်ပြီး ၀င်ထိုင်မယ်ပြင်တော့ တံခါးက အလွယ်တကူမပွင့်။ နေကလည်း ပူလိုက်တာ ၄၀ ဒီဂရီစင်တီဂရိတ်တောင် ရှိပါတယ်။ အပူချိန် ၅ ဒီဂရီလောက်သာရှိတဲ့ အော်စလိုကို မေ့ထားလိုက်တော့။ အပူချိန် ၃၅ ရှိတဲ့ ဘန်ကောက်ထက်တောင် ရန်ကုန်က ပိုပူနေပါလား။


ရန်ကုန်နေပူပူမှာ လေအေးစက်မရှိတဲ့ တက္ကစီပေါ် တံခါးကို ခဲရာခဲဆစ်ဖွင်ြ့ပီး တက်လိုက်တော့ ထိုင်ခုံမှာ ခါးပတ်မရှိ။ ကားသမားကိုပြောတော့ သူကိုယ်တိုင်လည်း ခါးပတ် မရှိ။ ဒါ မြန်မာပြည်ပဲလေ။ ”အဲကွန်းဖွင့်ရင် ၅၀၀ ပိုပေးရတယ်ဆိုတာ ဟုတ်လား” လို့ ကျနော်က ကားသမားကို နောက်ပြီးမေးတော့ ”ဟုတ်ပါတယ်။ ဒါပေမယ့် ကျနော်ကားက ဖွင့်စရာ အဲကွန်း မရှိဘူး။ သဘာဝအတိုင်းပေါ့” တဲ့။

တောင်ဖက်မုခ်မှာ ဖိနပ်အပ်ပြီး ဘုရားပေါ်တက်လာတော့ ”Please camera fee” ဆိုပြီး အကျီအဖြူရောင် ကော်လာကတုံး ၀တ်ထားတဲ့လူငယ် ၂ ဦးက ကျနော်ကို တားပြီး ဝင်ကြေး တောင်းပါတယ်။ ”နိုင်ငံခြားသား မဟုတ်ဘူး၊ မြန်မာပဲလေ” လို့ ပြောပြီး စည်းရုံးပေမယ့် မရ။ နိုင်ငံခြားသား မှတ်ပုံတင်ကိုင်ထားလို့ နိုင်ငံခြားသားလို့ အဲဒီအလှူခံပုဂ္ဂိုလ်တွေက ဆိုပါတယ်။ ”ဘုရားအတွက် လှူတာပဲ အကိုရာ၊ ကုသိုလ် ရပါတယ်” လို့တောင် ကျနော်ကို ချည်လိုက်တယ်။

”ဒီငွေတွေ ဘုရားဆီရောက်တာ သေချာရဲ့လား” ဆိုပြီး ကျနော်က နောက်သလိုလိုပြောလိုက်တာကိုတော့ သူတို့ သိပ်ကြိုက်ပုံမရ။ ဒီအရပ်မှာ ဒီလိုမေးခွန်းမေးလေ့ရှိပုံ မရပါ။ တကယ်လို့ ကျနော်က ဗုဒ္ဓဘာသာမဟုတ်ဘူးဆိုရင် ဘယ်လိုလုပ်မလဲ။ ဘုရားပေါ်တက်လာသူတိုင်းကို အလှူငွေထည့်ဖို့၊ ဘုရားဖူးဖို့ လာသူချည်းလို့ ပုံသေတွက်ထားလို့ ဘယ်ဖြစ်မလဲ။ နိုင်ငံခြားသားအများစုက ခရစ်ယာန်တွေ၊ ဘာသာမဲ့တွေ၊ ဘာသာကွဲတွေ ဆိုတော့ ဘုရားဖူးဖို့လာတယ် ဆိုတာထက် ထူးခြားတဲ့ သမိုင်းဝင်နေရာတခုကို လေ့လာချင်လို့ လာကြတာဖြစ်မယ်လို့ ထင်မထားသင့်ဘူးလား။

လောလောဆယ်တော့ ဘာမှမတတ်နိုင်။ သူတို့တောင်းတဲ့အတိုင်း ၅ ဒေါ်လာ ထုတ်ပေးလိုက်ပါတယ်။ ဒါပေမယ့် ဒေါ်လာ ၂၀ တန်ကို ပြန်အမ်းဖို့မရှိဘူးဆိုတဲ့အတွက် ကျနော့်သူငယ်ချင်းကပဲ ကျပ်ငွေ ၅၀၀၀ ထုတ်ပေးလိုက်ရတယ်။ ဘန်ကောက်က မြဘုရားဝင်ကြေး ဘတ် ၂၀၀ နဲ့ယှဉ်ပြီး ပြန်တွက်ကြည့်တော့ ၅ ဒေါ်လာဆိုတာ ဘတ် ၁၅၀ လောက်ပဲ ရှိပါတယ်။ ဘန်ကောက်ရောက်တိုင်း မြဘုရားကို ဘတ် ၂၀၀ ပေးပြီးဖူးစဉ်က ဈေးများတယ်လို့ တခါမှ မထင်ခဲ့တဲ့ကျနော် ရွှေတိဂုံမှာ ဘတ် ၁၅၀ ကောက်တာကို ဘာလို့ဈေးကြီးတယ်လို့ ထင်နေပါလိမ့်။

ဘန်ကောက်က မြဘုရားဝင်းထဲမှာ နိုင်ငံခြားသား ထောင်နဲ့ချီ တိုးဝှေ့ဝင်နေတာ တွေ့ရပေမယ့် ရွှေတိဂုံပေါ်မှာတော့ နိုင်ငံခြားခရီးသည် သိပ်မများဘူးလို့ ကျနော်ထင်ပါတယ်။ အောင်ပွဲမပါပဲ ပြန်လာတဲ့ ကျနော်ဟာ အောင်မြေနင်းဖို့တော့ သတိရသား။ အောင်မြေနင်းပြီး အာဇာနည်ကုန်းနဲ့ ပြည်သူ့လွှတ်တော်(အခု ရန်ကုန်တိုင်း လွှတ်တော်) ဖက်လှမ်းကြည့်တော့ သစ်ပင်တွေ ကြီးလာလို့ဖြစ်မယ် အရင်လို မမြင်ရတော့ပါ။

တပတ်ပြည့်လို့ တောင်ဖက်မုခ်နား ပြန်ရောက်တော့ ကျောင်းသားခေါင်းဆောင်တွေရဲ့ သမိုင်းဝင်ကျောက်တိုင် ဝင်ကြည့်တယ်။ တကယ်တော့ ရွှေတိဂုံဆိုတာဟာ ဘာသာရေးပြယုဂ် သက်သက်မဟုတ်။ ကိုလိုနီခေတ်ကစပြီး ၈ လေးလုံး အရေးတော်ပုံ၊ ရွှေဝါရောင်တော်လှန်ရေး ခေတ်တွေအထိ ဖိနှိပ်သူတွေကို တွန်းလှန်ဖို့ ကျောင်းသားတွေ လူစုခဲ့တဲ့နေရာပါ။


တောင်ဖက်မုခ်စောင်းတန်းက အဆင်း ခေါင်မိုးဆေးရေး ပန်းချီတွေကို ကြည့်ပြီး ကျနော့်သူငယ်ချင်းက “နှမျောဖို့ သိပ်ကောင်းတာဗျာ။ မူလရှေးလက်ရာ ဗုဒ္ဓ၀င်ခန်းတွေ ဘာမှမရှိတော့ဘူး။ အားလုံး အသစ်လုပ် ဆေးသုတ်ထားတာပဲ ကျန်တော့တယ်” လို့ ပြောပါတယ်။ ဘယ်လိုဖြစ်တာလဲလို့ ဆက်မေးကြည့်တော့ ၁၉၈၈ စစ်တပ်က အာဏာသိမ်းပြီးစအချိန်မှာ ရွှေတိဂုံစောင်းတန်းပေါ်က နံရံပန်းချီတွေကို ဖြုတ်လဲပစ်ခဲ့တယ်လို့ ဆိုပါတယ်။

ရွှေတိဂုံကနေ ရန်ကုန်တက္ကသိုလ်ဆီ တက္ကစီငှားတော့ ၂၅၀၀ တောင်းပါတယ်။ တကယ်က ပထမ ငှားစဉ်က တက္ကသိုလ်ကို မဟုတ်။ တက္ကသိုလ်နောက်က အင်းလျားကန်စောင်း စားသောက်ဆိုင်တွေကိုပါ။ ကားသမားနဲ့ စကားစပ်ရင်း တက္ကသိုလ်ထဲ ၀င်ခွင့်ပေးနေပြီဆိုလို့ အရေးပေါ်လမ်းကြောင်းပြောင်းခဲ့တယ်။ ”၀င်ခွင့်ရတာ မကြာသေးဘူးဗျ။ အိုဘားမား မလာခင်လေးကမှ ရတာ” ဆိုပြီး ကားသမားက ရှင်းပြပါတယ်။ အဓိပတိလမ်းအတိုင်းမောင်း ဘွဲ့နှင်းသဘင်ရှေ့မှာ ရပ်ပြီး ကျနော်နဲ့ ကျနော်သူငယ်ချင်း တယောက်တလှည့် ကျနော်တို့ တက်ခွင့်မရလိုက်တဲ့ ဘွဲ့နှင်းသဘင်ကြီးနဲ့ဓာတ်ပုံရိုက်ကြတယ်။

ဘေးပတ်ဝန်းကျင်ကို လှည့်ကြည့်တော့ လူတဦးစ နှစ်ဦးစထက် မပို။ သစ်ပုတ်ပင်အပါအ၀င် သစ်ပင်ကြီးတွေကို ဖြတ်ပြီး ဥဩတွန်သံက လွင့်လာတယ်။ ရန်ကုန်နေတောင် အဓိပတိလမ်းပေါ် အပူချိန်လျှော့ကျသွားတယ်လို့ ခံစားမိတယ်။ ၀ိဇ္ဇာခန်းမဖက်ကနေ ဂျက်ဆင်ဖက်ကိုဖြတ်လျှောက်ပြီး သီရိဆောင်ရှေ့က ရေတမာပင်တွေအောက် ကျနော်တို့ ရောက်တယ်။ ”ဂျက်ဆင်ထိပ်က လရိပ်ပြာ”နဲ့ ”မောင့်သီရိမေ” သီချင်းတွေကို သွားသတိရမိပါတယ်။


ပြည်လမ်းဖက် ထွက်လာတော့ မာလာဆောင်က ကျောင်းသူတွေ နေတဲ့အဆောင် မဟုတ်တော့ပဲ နိုင်ငံခြားဘာသာသင်တဲ့ အဆောင်အဖြစ် အသွင်ပြောင်းခံလိုက်ရပြီ။ ”အဆောင်သရဲလည်း ဘုံပျောက်ပြီ ထင်ပါရဲ့” လို့စဉ်းစားရင်း တချိန်တုန်းက တက္ကသိုလ်ဆီ တမ်းတမိပါတယ်။ မာလာဆောင်ရှေ့ကနေ အင်းလျားကန်ဘောင်ဖက် တက်မယ်ပြင်လိုက်တော့ အရင်လို ထီးကာထားတဲ့အတွဲလေးတွေ သစ်ပင်အောက်မှာ ရှိနေတုန်း။

အင်းလျားကန်စောင်းက အရင်လို တက္ကသိုလ်အငွေ့အသက် မရှိတော့။ မဟာဆန်သူတွေ၊ ဣနြေ္ဒရှင်တွေကို မမြင်ရတော့။ ထမိန်တိုတိုခေတ်ကိုတောင် ကျော်ပြီး ဒီနေ့ခေတ်သစ် ဘောင်းဘီတိုတို ခေတ်ကို မြင်လိုက်ရတယ်။ ကောင်မလေးတွေ လက်ဖက်ရည်ဆိုင် ထိုင်သင့် မသင့် အငြင်းပွားခဲ့ဖူးတဲ့ ကျနော်တို့ခေတ်ဟာ အဝေးကြီး ကျန်ခဲ့ပြီပဲ။ သြော် အခုတော့လည်း ဘောင်းဘီတို ကောင်မလေးတွေက ဘီယာဝိုင်းမှာ ထိုင်လို့။

လူတွေရဲ့ တန်ဖိုးထားမှု၊ စံသတ်မှတ်မှု ဆိုတာတွေဟာ ခေတ်နဲ့အညီ ပြောင်းလဲသွားတတ်တဲ့ သဘောလား။ ဒါမှမဟုတ် တစုံတဦး၊ တဖွဲ့ဖွဲ့က အတင်းအကြပ် ပြောင်းလဲလိုက်တာကို ကျနော်တို့ ခံလိုက်ရတာလား။ သေချာတာကတော့ အင်းလျားကန်ဟာ လွန်ခဲ့တဲ့ ၂၅ နှစ်ကလို တက္ကသိုလ်နယ်မြေ မဟုတ်တော့ပါ။ အရင်ကရှိခဲ့ဖူးတဲ့ ဘူးသီးကြော်ဆိုင်မှာ ဘီယာဆိုင်တွေ၊ စားသောက်ဆိုင်တွေ အခိုင်အမာ နေရာယူထားလိုက်ပါပြီ။


ဒီနားက ဆိုင်မှာထိုင်နေသူတွေ၊ ကန်ဘောင်ပေါ် လမ်းလျှောက်နေသူတွေထဲမှာ အင်းလျား ရာဇ၀င်နဲ့ တံတားနီ နောက်ခံသမိုင်းကို သိသူ ဘယ်နှစ်ဦးရှိလဲ။ လွန်ခဲ့တဲ့ ၂၅ နှစ်က ဖြစ်ပွားခဲ့တဲ့ ကျနော်တို့မျိုးဆက်ရဲ့ တိုက်ပွဲဝင်မှုတွေ၊ ပေးဆပ်မှုတွေကို ဒီကန်ဘောင်ပေါ်မှာ ထိုင်နေတဲ့ အသက် ၂၀ တန်း လူငယ်တွေ တကယ်ပဲ မေ့ကုန်ကြပြီလား။

သမိုင်းခေတ် များစွာကို ဖြတ်သန်း ခဲ့ဖူးတဲ့ အင်းလျားရဲ့ ကန်ဘောင်ပေါ် လမ်းလျှောက်ရင်း တခါက တက္ကသိုလ် ညနေခင်းတွေ၊ တွဲလျှောက် ခဲ့ဖူးတဲ့ သူငယ်ချင်းတွေ၊ ၃/၈၈ အင်းလျား သီချင်းထဲက ရဲဘော် သူငယ်ချင်းတွေ၊ ပြီးတော့ … ဘယ်တော့မှ အိမ်ပြန်ခွင့် မရနိုင်တော့ဘဲ တက္ကသိုလ် နယ်မြေနဲ့ အဝေး တောတောင် တွေထဲ ထာဝရ လမ်းခွဲသွား ရရှာတဲ့ ရဲဘော် သူငယ်ချင်း များစွာကို ကျနော် လွမ်းနေ မိတော့တယ်။

Friday, May 10, 2013

သူပုန်ကျောင်းသားတဦးရဲ့ ပြည်တော်ပြန်ခရီးစဉ် (၂)

ဧရာဝတီ။
 

နောက်ဆုံးတော့ လေယာဉ်က ”ရန်ကုန်အပြည်ပြည်ဆိုင်ရာလေဆိပ်” ကို ဆိုက်ရောက်ခဲ့ပြီ (ဓာတ်ပုံ- ထက်အောင်ကျော်)


ဘန်ကောက်သံရုံး အပြင်ရောက်လို့ စာအုပ်ကို ဖွင့်ကြည့်လိုက်တော့ ဗီဇာ ၂၈ ရက်ရတယ်လို့ ရေးထားတာ တွေ့ရပါတယ်။ ဒါဆို သေချာသွားပြီ၊ ၂၅ နှစ်တာ ဝေးကွာနေရတဲ့ အမိမြေဆီ ပြန်ခွင့်ရပြီပေါ့။ ဒီလိုသေချာပြီဆိုမှ ကျောပိုးအိတ်ထဲက ကင်မရာကိုထုတ် လိုအပ်မယ် ထင်တာတွေကို ရိုက်ရပါတယ်။ ဗီဇာ မရခင် ကတည်းက ကင်မရာတကားကား လုပ်နေရင် သတင်းထောက်ဆိုပြီး ဆိုရှယ်ဗီဇာ မပေးရင် ဘယ်လိုလုပ်မလဲ။

ဗီဇာ ကိစ္စပြီးလို့ သံရုံးရှိရာ ဆုန်ထွန်လမ်းမကြီးဖက်ကနေ ဆီလုံလမ်းမကြီးဖက် လျှောက်လာတဲ့အခါမှာ Myanmar Visa Service ဆိုတဲ့ ဆိုင်းဘုတ်တခုကို လမ်းဘေးမှာ တွေ့ရပါတယ်။ အဲဒီဆိုင်းဘုတ်နဲ့ သိပ်မဝေးတဲ့ နေရာမှာတော့ မြန်မာခရီးသွား ကုမ္ပဏီတခုကို တွေ့ရပြီး ဆိုရှယ်ဗီဇာအပါဝင် ဗီဇာပေါင်းစုံကို သူ့ဆိုင်က လုပ်ပေးနေတယ်လို့ ပြောပါတယ်။ ဆိုရှယ်ဗီဇာဆိုရင် ဘတ်ငွေ ၃၅၀၀ ယူပြီး မြန်မာနိုင်ငံက ဘာလက်မှတ်မှ ယူစရာမလို။ လူကိုယ်တိုင်လည်း သံရုံးသွားစရာမလိုပဲ နေ့ချင်းပြီးရအောင် သူလုပ်ပေးနိုင်တယ်လို့ ဆိုင်မန်နေဂျာက ပြောပါတယ်။

လေယာဉ်လက်မှတ် ဈေးနှုန်းတွေ၊ ရန်ကုန်က ဟိုတယ်ဈေးနှုန်းတွေ အကြောင်း မေးမြန်းလို့ ကောင်းတုန်း တယ်လီဖုန်းမြည်လာလို့ ကောက်ကိုင်လိုက်တော့ သတင်းဆိုးတခု ၀င်လာပါတယ်။ “ရဲဘော်သူငယ်ချင်း” တဦးဖြစ်သူ ကိုမောင်မောင်ကြီး ဒီမနက်ပိုင်းက မဲဆောက်မှာ ကွယ်လွန်သွားပြီဆိုတဲ့ သတင်းပါ။ ဒီတော့ မဲဆောက်ကို ဆင်းပြီး အဲဒီက ရဲဘောာ်တွေနဲ့တွေ့ပြီးမှ ရန်ကုန်ကိုဝင်မယ်လို့ ဆုံးဖြတ်ချက်ချ လိုက်ပါတယ်။

နောက်နေ့ မနက် ၁၀ နာရီဝန်းကျင်မှာ မဲဆောက်ဘုန်းကြီးကျောင်းဆီ ကျနော် ရောက်သွားတော့ ကိုမောင်မောင်ကြီး ဈာပန အခမ်းအနားက စတင်နေပါပြီ။ ABSDF ဥက္ကဌ ကိုသံခဲနဲ့ တခြားအဖွဲ့အစည်း အသီးသီးက ရဲ ဘော်တချို့ကို ခန်းမရှေ့က ခုံတန်းမှာ ထိုင်နေတာတွေ့ရပြီး အခမ်းအနားတွင်းမှာတော့ ဒု ဥက္ကဌ ကိုမျိုးဝင်းက ကိုမောင်မောင်ကြီးအတွက် အမှတ်တရ စကားပြောနေပါတယ်။ ပြီးတော့ လူ့ဘောင်သစ် ဒီမိုကရက်တစ် ပါတီက ကိုငွေလင်း၊ NDD (ဒီမိုကရေစီနဲ့ ဖွံ့ဖြိုးတိုးတက်ရေး အင်အားစု) က ကိုစိုင်းမြင့်သူ၊ AAPP (နိုင်ငံရေး အကျဉ်းသားများ ကူညီရေးအဖွဲ့) က ကိုတိတ်နိုင်၊ အမျိုးသားဒီမိုကရေစီ အဖွဲ့ချုပ် လွတ်မြောက်နယ်မြေက ကိုထွန်းအောင်ကျော် စသဖြင့် ၈၈ မျိုးဆက် နိုင်ငံရေးအင်အားစု အသီးသီးရဲ့ ကိုယ်စားလှယ်တွေက အမှတ်တရ စကားပြောတာ၊ သ၀ဏ်လွှာ ဖတ်တာတွေ ပြုလုပ်ခဲ့ကြပါတယ်။

ထုံးစံအတိုင်း သူတို့ပြောတာတွေထဲမှာ ကိုမောင်မောင်ကြီးအတွက် အမှတ်တရ စကားလုံးတွေအပြင် လက်ရှိနိုင်ငံရေးအပေါ် ထင်မြင်ချက် ဝေဖန်ချက်တွေလည်း ပါဝင်ပါတယ်။ အထူးသဖြင့် “ရန်သူရဲ့လှည့်ကွက်၊ ရန်သူရဲ့ ကစားကွက်” ဆိုတဲ့ စကားလုံးကို မကြာခဏ ကြားရတဲ့အတွက် သူတို့မှာ ရန်သူရှိနေဆဲ၊ ရန်သူ မပျောက်သေးဘူးလို့ နားလည်ရပါတယ်။

ဒါပေမယ့် ဒီလို အမှာစကား ပြောနေသူတွေထဲက တချို့ဟာ အဲဒီရန်သူလို့ သူတို့ခေါ်နေဆဲဖြစ်တဲ့ လက်ရှိ ဦးသိန်းစိန်အစိုးရ တာဝန်ရှိသူတွေနဲ့ တွေ့ဆုံဆွေးနွေးနိုင်ဖို့ ရန်ကုန်အထိ သွားရောက် လေ့လာခဲ့ကြပြီး ဖြစ်ပါတယ်။ အမှတ်တရ စကားပြောပြီးလို့ ထမင်းစားချိန်မှာ ရဲဘော်ဟောင်းတွေနဲ့ စကားလိုက်ပြောကြည့်တဲ့ အခါမှာတော့ “ရန်သူရဲ့ လှည့်ကွက်၊ ရန်သူရဲ့ကစားကွက်” ဆိုတဲ့ လက်ရှိအစိုးရကလုပ်နေတဲ့ ငြိမ်းချမ်းရေးနဲ့ နိုင်ငံရေးပုံသဏ္ဍန်တွေအပေါ် မယုံကြည်တဲ့ စကားလုံးကိုပဲ ထပ်ကာထပ်ကာ ကြားခဲ့ရပြန်ပါတယ်။

“အခြေအနေက မလွယ်သေးဘူးဗျ။ KIA နဲ့လည်း တိုက်ပွဲက မပြီးသေးဘူး။ အခုဆိုရင် ရှမ်း-မြောက်မှာတောင် သေနတ်ပြန်ပေါက်နေပြီ။ ၀ ကလည်း ပြင်နေပြီဆိုတော့ ကျနော်တို့အားလုံး တော်လှန်ရေးသတိ ရှိဖို့ လိုလိမ့်မယ်” ဆိုပြီး ABSDF ဗဟိုကော်မတီဝင်တဦးက ပြောပါတယ်။

မဲဆောက်နဲ့ ချင်းမိုင်ရှိ တော်လှန်ရေးရဲဘော်တွေ၊ သတင်းနယ်ပယ်က လုပ်ဖော် ကိုင်ဖက်တွေနဲ့ ဆွေးနွေးပြီးတဲ့နောက် မေလ ၁ ရက်နေ့မှာတော့ ကျနော်ရဲ့ ရန်ကုန်ခရီးစဉ်ကို စတင်ခဲ့ပါတယ်။ လွန်ခဲ့တဲ့  နှစ် ၂၀ ကာလတွေအတွင်း နိုင်ငံအတော်များများဆီ ခရီးသွားဖူးပြီးဖြစ်ပေမယ့် အခု ရန်ကုန်ခရီးစဉ်ကတော့ တကယ့်ကို ရင်ခုန်စရာပါ။ ဒါပေမယ့် လေယာဉ်ကောင်တာ ဖြတ်တော့လည်း သံရုံးဗီဇာဌာနလို ဘာမှကို အမေးအမြန်း မလုပ်တော့ပါဘူး။

ဒါဟာ ကျနော်ကိုင်ထားတဲ့ နော်ဝေနိုင်ငံသား (Passport) စာအုပ် ကြောင့်များလားလို့ တွေးမိပြီး အရင်တုန်းက မြန်မာစာအုပ်အတုနဲ့ ခရီးသွားစဉ်က ကြုံခဲ့ဖူးတဲ့ စစ်ဆေးမေးမြန်းမှုတွေကို သွားသတိရမိပါတယ်။ မြန်မာစာအုပ်ဆိုရင် အစစ်အဆေး အမေးအမြန်း ထူလှတဲ့ ဘန်ကောက် လေယာဉ်ကွင်း ၀န်ထမ်းတွေဟာ အခုတော့ ဘာမှ အမေးအမြန်း မလုပ်တော့ဘဲ “ဆရာဝါဒီခပ်” လောက်နဲ့ ပြီးသွားပါတယ်။ တနည်း လူတယောက်ရဲ့ Identity ဆိုတာဟာ အဲဒီလူကိုင်ထားတဲ့ စာအုပ်၊ နေထိုင်တဲ့နိုင်ငံဆီ လိုက်ပြီး တန်ဖိုးပြောင်းသွားတဲ့သဘော ရှိသလား။

ဒီလိုစဉ်းစားရင်း ရန်ကုန်ပျံမယ့် D 4-5 ဂိတ်တွေဆီ ရောက်လာတော့ နိုင်ငံခြားခရီးသည် အတော်များများကို တွေ့ရပါတယ်။ အများစုဟာ အာရှဒေသကဖြစ်ပြီး အနောက်တိုင်းသား တချို့ကိုလည်း တွေ့ရပါတယ်။ မြန်မာ စကားပြောနေတဲ့ လူတချို့ထဲမှာတော့ ဘန်ကောက်မှာ ဆေးလာကုတဲ့ သက်ကြီးရွယ်အို ၃-၄ ဦးကို ဘီးတပ် ကုလားထိုင်တွေနဲ့ တွေ့ရပါတယ်။ ပြီးတော့ စီးပွားရေးသမားလို့ ယူဆရတဲ့ လူတချို့နဲ့ လူငယ်တချို့လည်း တွေ့ရတယ်။

“အဲဒါက အပိုတွေပါဗျာ။ အရင်က ဒီဖောင်တွေ ဖြည့်စရာ မလိုဘူး” ဆိုပြီး အသက် ၂၀ ကျော် လူငယ်တဦးက ကျနော် ဟိုလှန်ဒီလှန် လုပ်ရင်း ခေါင်းစားနေတဲ့ ကာစတန်ဖောင်ကို ကြည့်ပြီး ပြောလိုက်တယ်။ တကယ်က ဒီဖောင်ကို ဖြည့်စရာ လိုတယ်လို့ ကျနော်က မထင်။ ကာစတန်ဖောင်ဆိုတာ ကိုယ့်မှာကြေညာစရာ ပစ္စည်းပါမှ ဖြည့်ရတာမျိုး မဟုတ်လား။ ဒါပေမယ့် ဒီဖောင်ထဲမှာတော့ ကိုယ့်မှာ နိုင်ငံခြားငွေ ပါလာရင် မပျက်မကွက် ထည့်သွင်း ဖော်ပြရမယ်လို့ ဆိုထားပါတယ်။

“သူတို့ပဲ ဒေါ်လာအသစ်တွေ ယူလာရမယ်လို့ ပြောထားပြီး ဘာကြောင်တာလဲ” လို့ အဲဒီလူငယ်နဲ့ သဘောတူကြောင်း ကျနော်က ပြန်ပြောလိုက်တယ်။ ဒါပေမယ့် ဖောင်ကို အသေအချာ ဖတ်ကြည့်တဲ့ အခါမှာတော့ ခရီးသည်အားလုံးကို ဆိုလိုတာ မဟုတ်။ မြန်မာနိုင်ငံကူး လက်မှတ်ကိုင်ထားသူတွေကိုသာ ဆိုလိုပြီး နိုင်ငံခြားသားတွေ နိုင်ငံခြားငွေကိုင်တာ ကြေညာစရာ မလိုပါ။
“အင်း … ကိုယ်က နိုင်ငံခြားသား ဖြစ်နေပြီပဲလေ”

မကြာခင် ဘန်ကောက်နေ ရန်ကုန်ခရီးစဉ် စတယ်။ အရင် မြန်မာစာအုပ်အတု ကိုင်တုန်းကဆိုရင် ဘန်ကောက် လေယာဉ်ကွင်းမှာ အတင်းအကျပ် ဖမ်းဆီးပြီး ရန်ကုန်သွားမယ့် လေယာဉ်ပေါ် အတင်းတင်ပေးလိုက်မှာကို စိုးရိမ်ပူပန်ခဲ့ဖူးတဲ့ ကျနော်ဟာ အခုတော့ အဲဒီလေယာဉ်ကို အခကြေးငွေပေးပြီး ကျေနပ်စွာ လိုက်ပါစီးနင်းလို့ပေါ့။ ဒါဟာ နိုင်ငံရေး အခြေအနေ ပြောင်းလဲသွားတာလား။ ကျနော်ကိုယ်တိုင် အပြောင်းအလဲ လုပ်ခံလိုက်ရတာလား။ သိပ်မကွဲပြားလှ။

“စွန်တန် အရွိုင်မိုင်”။ ကျနော် အတွေးနယ်ချဲ့နေတုန်း ထိုင်းလေကြောင်း လေယာဉ်မယ်လေးက သူတို့ ကျွေးတဲ့ သဘောင်္သီးသုပ် စားကောင်းလားလို့ ထိုင်းဘာသာနဲ့ မေးပါတယ်။ “အရွိုင်ဒီး” လို့ လက်မထောင်ပြရင်းနဲ့ ထိုင်းတွေရဲ့ သူတို့ရိုးရာကို လူသိများအောင် ကြော်ငြာတတ်တဲ့ ပညာကို ကျနော် စဉ်းစားမိပြန်ပါတယ်။ သိပ်စပ်တယ်လို့ နာမည်ကြီးလှတဲ့ ဘန်ကောက် လမ်းဘေးဆိုင်တွေက သင်္ဘောသီးသုပ်ဟာ အခု လေယာဉ်ပေါ်မှာတော့ နိုင်ငံတကာဧည့်သည်တွေ စားနိုင်အောင် အစပ်တွေကို လျှော့ထားပါတယ်။

အတွေးစကို ခဏနားပြီး လေယာဉ်ပြူတင်းပေါက်ကနေ အောက်ကို လှမ်းကြည့်လိုက်တော့ ထိုင်းနယ်စပ်ကိုကျော်ပြီး မြန်မာနယ်မြေ မွန်ပြည်နယ်ထဲ ရောက်နေပြီ။ ပြီးတော့ မုတ္တမပင်လယ်ကွေ့ကိုဖြတ် ရန်ကုန်မြို့ဆီ ဦးတည်လို့။ ရန်ကုန် ဆင်းကာနီး လေယာဉ်ကွင်းဝန်းကျင် အခင်းအကျင်းက ဘန်ကောက်နဲ့ တခြားစီ။ လယ်ကွင်းတွေ၊ ခပ်နိမ့်နိမ့် အိမ်လေး၊ တဲလေးတွေကိုသာ တွေ့ရပြီး မြို့ပြလက္ခဏာကို မတွေ့မိ။

နောက်ဆုံးတော့ လေယာဉ်က “ရန်ကုန်အပြည်ပြည်ဆိုင်ရာလေဆိပ်” ကို ဆိုက်ရောက်ခဲ့တယ်။ အခင်းအကျင်းက ချင်းမိုင် လေယဉ်ကွင်းလောက်တောင် မသားနား။ အထုတ်အပိုး ဆွဲပြီး အများနည်းတူ လမ်းလျှောက်လာတော့ အစောင့်တွေ သိပ်မတွေ့ရ။ တွေ့မယ့်တွေ့တော့ အိမ်သာထဲမှာ အစောင့်ဝန်ထမ်းက နှစ်ယောက်။ အိမ်သာထဲက ထွက်ပြီး အောက်ထပ်ကို ဆင်းလိုက်တာနဲ့ Arrival အခန်းကို ရောက်ပြီ။ မှန်နံရံ အပြင်ဖက်မှာ ကျနော့်ကို လာကြိုတဲ့ တောပြန်ရဲဘော်တချို့၊ ထားဝယ်သားတချို့နဲ့ အသိမိတ်ဆွေ အနည်းအကျဉ်းကို တွေ့ရတယ်။

သူတို့ကို လက်ပြနှုတ်ဆက်ရင်း မှန်နံရံ နားကပ်သွားတော့ တောပြန်ရဲဘော်တဦးက ကျနော့်ကို လက်ထိပ်ခတ်ပြီး ပြည်နှင်ဒဏ်ပေးနိုင်တယ်ဆိုတဲ့ သင်္ကေတ လုပ်ပြပြီး နောက်ပါတယ်။ သူက နောက်နေပေမယ့် ကျနော်က ခပ်လန့်လန့်။ မတော် ပြန်ပို့လိုက်ရင် ဒုက္ခလို့ တွေးမိပြီး ထောက်လှမ်းရေးတွေ မျက်စိ နောက်နိုင်တဲ့ လည်ပင်းက ကင်မရာကို ဖြုတ်သိမ်းပြီး အိတ်ထဲ ထည့်လိုက်ပါတယ်။ ပြီးတော့ Passport Control မှာ တန်းစီပေါ့။

နှေးသလား မမေးနဲ့။ တကယ်က စက်တွေနှေးတာ ဖြစ်ဖို့ များပါတယ်။ ကျနော် တန်းစီတဲ့ ကောင်တာမှာ Passport ကော်ပီကူးတဲ့ စက်ပျက်သွားလို့ ၀န်ထမ်းတဦး ညည်းညူနေပြီး ဟိုပြင် ဒီပြင် လုပ်နေတာ တွေ့ရပါတယ်။ ဘန်ကောက်လို လူတွေ ထောင်သောင်းချီ ၀င်လာတဲ့ နေရာမျိုးမှာသာဆို သေပြီဆရာပဲ။ ထူးခြားတာကတော့ နိုင်ငံခြားသား Passport ကို စစ်တဲ့ ၀န်ထမ်းအားလုံးက အမျိုးသမီးတွေဖြစ်နေပြီး မြန်မာ Passport စစ်တဲ့ဖက်က ၀န်ထမ်းတွေက အမျိုးသားတွေပါ။

ကျနော်ဟိုငေး ဒီငေးလုပ်နေတုန်း “ကျေးဇူးပြုပြီး သတ်မှတ်နေရာမှာ ရပ်ပေးပါ” လို့ လဝက အရာရှိ အမျိုးသမီးက ပြောပါတယ်။ အသေအချာကြည့်တော့မှ ရန်ကုန်လေဆိပ်လည်း နိုင်ငံတကာ လေဆိပ်တွေလို ဗီဒီယို ကင်မရာနဲ့ ဓာတ်ပုံရိုက် မှတ်တမ်းတင်တာမျိုး ရှိနေမှန်း သတိပြုမိတယ်။ ဒါပေမယ့် လ၀က ၀န်ထမ်းကလည်း သံရုံးဝန်ထမ်းလို ဘာမှမမေး။ သူ လုပ်စရာရှိတာတွေကို လုပ်ပြီး “ဒုန်း” ကနဲ “တုံး” ထုပေးလိုက်ပါတယ်။

အထုတ်အပိုး ရွေးတဲ့နေရာဆီပြေး တွန်းလှည်းပေါ် ပစ္စည်းတွေတင်ပြီး ထွက်လာတော့ ကာစတန်ဖြတ်ရပါတယ်။ ပစ္စည်းတွေကို Xray ရိုက်၊ လက်ဆွဲအိတ်ကို စစ်ဆေးပေါ့။ ဒီတော့မှ ပြဿနာ တက်ပါလေရော။ ကျနော်က ဘာမှကြေညာစရာ ပစ္စည်းမပါဘူးဆိုပြီး ကာစတန် ဖောင်မှာ ဘာမှရေးမထားတော့ “ကြေညာစရာရှိရှိ မရှိရှိ လူတိုင်းဖြည့်ရတယ် အစ်ကို” ဆိုပြီး ကာစတန်ဝန်ထမ်းက ပြောပါတယ်။

ဒီတော့မှ ကတိုက်ကရိုက်နဲ့ ဖောင်ဖြည့်ပေးရပါတယ်။ ကျနော့်ကိုမှ ရွေးပြီး တကူးတက ရစ်နေတဲ့ပုံမျိုး မဟုတ်။ မြန်မာပြည်ရဲ့ လုပ်ထုံးလုပ်နည်းတွေ ရှည်လျားထွေပြားမှုတွေက တခြားနိုင်ငံက လူတွေအဖို့ ရစ်နေသလို ဖြစ်နေတာမျိုးလို့ ထင်ပါတယ် ။ ပြီးတော့ အပြင်ထွက်လို့ ရပါပြီ။

“အောင်ပွဲမပါပဲ ပြန်လာသူပေါ့ဗျာ” လို့ အပြင်ကို ရောက်ရောက်ချင်း ကျနော်ရဲ့ တောပြန်ရဲဘော်တွေကို အော်ပြီး နှုတ်ဆက်လိုက်ပါတယ်။ ကျနော့်ရွာကနေ လာကြိုနေသူတွေကတော့ ကျနော်တို့ ဘာတွေပြောနေမှန်း နားလည်ပုံ မရ။ ချက်ချင်းဆိုသလို ရွာက မိတ်ဆွေတွေက အမေ့ဆီကို ဖုန်းခေါ်ပြီး လှမ်းနှုတ်ဆက်ခိုင်းပါတယ်။ “မီးဝေး… ဖစု နန် ကွန်းပဲ ပလ္လန်လာပီလာ” (သြော် သားလေး နင်တကယ်ပဲ ပြန်လာပြီ နော်) လို့ ကျနော့်အမေက ထားဝယ်လိုပြောပြီး ဖုန်းထဲမှာ ငိုပါတော့တယ်။

ကျနော် ပြန်လာတော့ ကျနော့်အမေ ဝမ်းသာသလို တနိုင်ငံလုံးက သားနဲ့ဝေးနေခဲ့တဲ့ တခြား အမေတွေရော ၀မ်းသာဖို့ အချိန်ရောက်ပြီလား။ အိမ်ပြန်ချိန် နောက်ကျခဲ့တဲ့ သားသမီးများစွာ အဝေးတနေရာမှာ ကျန်နေဆဲဆိုတာကိုတော့ ကျနော်သိနေခဲ့တယ်။ ပြီးတော့ လုံးဝ အိမ်ပြန်လာခွင့်မရတော့တဲ့…

ဘယ်တော့မှ အိမ်ပြန် မလာနိုင်တော့တဲ့ သားသမီးတွေ… ၂၅ နှစ်တာ တော်လှန်ရေး ခရီးရှည်အတွင်း ဒီမိုကရေစီရေး အတွက် အသက်ပေးသွားတဲ့ ABSDF တပ်ဖွဲ့ဝင် ရဲဘော် သူငယ်ချင်း ၆၀၀ ကျော်။ အဲဒီလို သားပျောက် သမီးပျောက် မိခင်တွေထက်စာရင် ကျနော်တို့က ဇာတ်ပြန်ပေါင်း နိုင်ပါသေးတယ် အမေလို့ စိတ်ထဲက ကိုယ့်ကိုယ်ကို ဖြေပေမယ့် အလွမ်းတွေ တပုံတပင်နဲ့ ရန်ကုန်မြေကို ကျနော် နင်းခဲ့ပြီ။

Friday, May 3, 2013

သူပုန်ကျောင်းသား တဦးရဲ့ ပြည်တော်ပြန် ခရီးစဉ် (၁)

ဧရာဝတီ။
  

အရင်ခေတ်က လူသွားနည်းလှတဲ့ မြန်မာနိုင်ငံဟာ အခုတော့ ဗီဇာတန်းစီ လာလျှောက်သူ မနည်းလှ (ဓာတ်ပုံ – ထက်အောင်ကျော်)

လွန်ခဲ့တဲ့ ၂၅ နှစ်က ဖြစ်ပွားခဲ့တဲ့ ၈ လေးလုံး အရေးတော်ပုံ ဖြိုခွဲခံရပြီးနောက်ပိုင်း လက်နက်ကိုင်တော်လှန်ရေး လုပ်မယ် ဆုံးဖြတ်ချက်နဲ့ တောခိုခဲ့သူတွေထဲက တချို့ ပြီးခဲ့တဲ့နှစ်အတွင်း ပြည်တော်ပြန် လေ့လာရေးခရီးစဉ်တွေလုပ်ခဲ့ကြပါတယ်။ ၂၀၁၀ ရွေးကောက်ပွဲပြီးကတည်းက ဒါဇင်နဲ့ချီ ပြန်ခဲ့ကြပြီး ၂၀၁၂ ကြားဖြတ်ရွေးကောက်ပွဲ အပြီးမှာတော့ ရာနဲ့ချီ လေ့လာရေး ခေါင်းစဉ်အောက်မှာ အဖွဲ့စည်းအလိုက်ရော၊ တဦးချင်းအရပါ ပြန်ခဲ့ကြပါတယ်။

တောခိုကျောင်းသားဟောင်းတဦးဖြစ်တဲ့ ကျနော်ကတော့ အခြေနေအမျိုးမျိုးကြောင့် သူတို့နဲ့အတူ လိုက်မပါနိုင်ခဲ့ပါ။ အခြေအနေ အမျိုးမျိုးဆိုတဲ့အထဲ အဓိက အခက်ခဲကတော့ ကျနော်နေထိုင်တဲ့ နော်ဝေနိုင်ငံက ထုတ်ပေးထားတဲ့ ခရီးသွားလက်မှတ်မှာ Except Myanmar ”မြန်မာနိုင်ငံမှ အပ” တကမ္ဘာလုံး သွားနိုင်သည်လို့ ရေးထားတဲ့အတွက် နော်ဝေးနိုင်ငံသား မဖြစ်မချင်း မိခင်နိုင်ငံကိုသွားခွင့်မရတဲ့ သဘော။ တနည်းအားဖြင့်ပြောမယ်ဆိုရင်တော့ နိုင်ငံခြားသားအဖြစ် အရင်ခံယူပြီးမှ အမိမြန်မာနိုင်ငံဆီ တရားဝင်ပြန်လည်ခွင့်ရတဲ့သဘော ဖြစ်နေလို့ပါပဲ။

ထပ်ရှင်းအောင်ပြောရမယ်ဆိုရင်တော့ နော်ဝေခရီးသွားလက်မှတ်နဲ့ အမိမြန်မာနိုင်ငံဆီ ပြန်ခွင့်မရဘူး ဆိုတာဟာ မြန်မာနိုင်ငံဆီ အပြီးအပိုင် မပြန်ရဲသေး၊ မပြန်သင့်သေးဘူး ထင်လို့ ပြောတာပါ။ တကယ် အပြီးပြန်ရဲရင်တော့ ဘယ်နိုင်ငံက ဘာခရီးသွားလက်မှတ်၊ ဘာနိုင်ငံသားလက်မှတ်မှ မလိုပါ။ ဒီတိုင်း ထပြန် သွားလည်း ဖြစ်ပါတယ်။

ဘာကြောင့်အပြီး မပြန်ရဲသေးလဲ။ အပြီး မပြန်သင့်သေးဘူးလို့ ထင်သလဲ ဆိုတာကိုတော့ နောက်ပိုင်းကျမှ ခေါင်းစဉ်တခုနဲ့ သီးခြားဆွေးနွေးချင်ပါတယ်။ ဒီနေရာမှာတော့ တတိယ နိုင်ငံရောက် တောခို ကျောင်းသားဟောင်းတဦး၊ DVB သတင်းထောက်ဟောင်းတဦးအနေနဲ့ ၂၅ နှစ်ကြာ အမိမြေနဲ့ခွဲခွာခဲ့ပြီး မှ အိမ်ပြန်လည်နိုင်ဖို့ ပြင်ဆင်ရပုံ အဆင့်ဆင့်ကိုသာ ဦးစားပေး တင်ပြလိုပါတယ်။

ပထမဆုံး ပြင်ဆင်မှုကတော့ နော်ဝေနိုင်ငံသားဖြစ်အောင် လျှောက်လွှာတင်ရခြင်းပါပဲ။ နိုင်ငံခြားသားတဦး မြန်မာနိုင်ငံမှာ မြန်မာနိုင်ငံသားဖြစ်ခွင့်ရဖို့ ဘယ်လို သတ်မှတ် အရည်အချင်းတွေ လိုအပ်သလဲဆိုတာ ကျနော် တခါမှ မလေ့လာဖူးပါ။ နော်ဝေနိုင်ငံမှာတော့ နိုင်ငံသားဖြစ်ချင်ရင် ၇ နှစ် ဆက်တိုက်နေပြီး ဘာပြစ်မှုဆိုင်ရာ ဥပဒေ ချိုးဖောက်မှု မရှိဘူး။ နောက်တခါ နော်ဝေဘာသာစကားကိုလည်း သတ်မှတ်ထားတဲ့ စာသင်ချိန် နာရီပြည့်ထားပြီးကြောင်း လက်မှတ်ပြနိုင်ရင် နိုင်ငံခြားသားတိုင်း နိုင်ငံသားအဖြစ် လျှောက်ခွင့်ရှိတယ်လို့ အကြမ်းဖျဉ်း နားလည်နိုင်ပါတယ်။

အဲဒီလိုလျှောက်တာကို စိစစ်တာက ၁၂ လခန့် ကြာလေ့ရှိပါတယ်။ အဲဒီလိုနဲ့ နော်ဝေးနိုင်ငံသားလက်မှတ် ကျနော်ရလာခဲ့တယ်။ ရပြီဆိုတာနဲ့ နဂိုကတည်းက စိတ်ကူးယဉ်ထားတဲ့အတိုင်း ရေးလက်စ ”သူပုန်ကျောင်းသားတဦးရဲ့ မာရသွန်ခရီး” စာအုပ်ကို ရန်ကုန်မှာ ထုတ်ဝေရေး၊ ခွဲခွာနေရတာ ၂၅ နှစ်ရှိပြီဖြစ်တဲ့ မိဘဆွေမျိုးတွေနဲ့ တွေ့ဆုံရေး။ ပြီးတော့ အားလုံး ပြောနေကြ တဲ့အတိုင်း စစ်ဗိုလ်ချုပ်ဟောင်း သမ္မတဦးသိန်းစိန်နဲ့ နိုဘဲလ် ငြိမ်းချမ်းရေးဆုရှင် အတိုက်အခံခေါင်းဆောင် ဒေါ်အောင်ဆန်းစုကြည်တို့ ပူးပေါင်းဆောင်ရွက်နေတယ်ဆိုတဲ့ ”စိန်-စု” နိုင်ငံရေးအခင်းအကျင်းကို လေ့လာရေးပေါ့။

နော်ဝေနိုင်ငံသားရပြီး သတင်းနှစ်ပတ်အတွင်း ခရီးထွက်လာတဲ့ကျနော် ပထမ ဆုံးကြုံရတာကတော့ အရင်က တောင်းတောင်းပန်ပန် လျှောက်ထားနေရတဲ့ ထိုင်း ဗီဇာ မလိုတော့ပါ။ ထိုင်းနဲ့ဥရောပအကြား သဘောတူညီချက်အရ သတင်း ၄ ပတ်ကျော်အောင် မနေဘူးဆိုရင် ဥရောပသားတွေ ထိုင်းဝင်ဖို့ ဗီဇာ မလို။ ဒါပေမယ့် မြန်မာပြည်သွားရေးအတွက် ထိုင်းနိင်ငံမှာရှိတဲ့ မြန်မာသံရုံး မှာ ဗီဇာလျှောက်တဲ့ကိစ္စက အချိန် ဘယ်လောက်ကြာမယ်မှန်း မသိတဲ့အတွက် လိုလိုမယ်မယ် ထိုင်း ဗီဇာ လျှောက်လာခဲ့ပါတယ်။

ကီလိုမီတာ ၇၀၀၀ ကျော်ဝေးတဲ့ အော်စလိုနဲ့ ဘန်ကောက်အကြား ဒီတခေါက်ခရီးစဉ်က အရင်လို မဟုတ်။ အရာရာဟာ နလုံးတုန် ရင်ခုန်စရာ ဖြစ်နေသလိုလို။ အော်စလို၊ ဟယ်လ်စင်ကီ၊ မော်စကိုကနေ အာရှအလယ်ပိုင်း တောင်တန်းပေါ်ကနေ ပျံသန်းလာတဲ့လေယာဉ် နယူးဒေလီမြို့ပေါ်ရောက်တော့ အိမ်နဲ့ နီးလာပြီဆိုတဲ့အသိ ၀င်လာပါတယ်။ အရင်က ဒီခရီးစဉ်ကို အကြိမ်ကြိမ်သွားဖူးပြီးဖြစ်ပေမယ့် ဒီလိုမျိုး ခံစားချက် မဖြစ်မိ။

လေယာဉ်စီးချိန် ၁၀ နာရီ ၁၁ နာရီလုံး အိပ်ရင်အိပ်၊ မအိပ်ရင်လဲ ရုပ်ရှင်ထိုင်ကြည့် ပေ့ါ။ အခုတော့ အိပ်မပျော် စားမ၀င် ရင်ခုန်ချင်နေတယ်ဆိုရမလား။ နယူးဒေလီကနေ ကလ္လကတ္တားကို ဖြတ်ပြီး ကပ္ပလီပင်လယ်ထဲ ဖြတ်ပါတယ်။ ဘင်္ဂလားဒေ့ရ်ှက ကော့ဘဇားမြို့ရဲ့ ခပ်လှမ်းလှမ်းကနေ ရခိုင်ရိုးမကိုကျော် ပဲခူးကို ကျော်တော့ ”ဒါ မြန်မာပြည်ထဲ ရောက်နေပြီပဲ” လို့ စိတ်ထဲက ရေရွတ်မိပါတယ်။ ပြီးတော့ မုတ္တမပင်လယ်ကိုဖြတ် ကျနော် တချိန်က စာသင်ခဲ့ဖူးတဲ့ တက္ကသိုလ်ရှိရာ မော်လမြိုင်တည့်တည့်က ဖြတ်ပါတယ်။ ပြီးတော့ ဘုရားသုံးဆူနဲ့ ဝေါလေ စခန်းဝန်းကျင်။ တနည်းအားဖြင့်ပြောမယ်ဆိုရင်တော့ ကျောင်းသားတပ်မတော် တချိန်က လှုပ်ရှားခဲ့ဖူး တဲ့ KUN နယ်မြေတွေကိုဖြတ်ပြီး လေယာဉ်က ထိုင်းနိုင်ငံထဲ ၀င်လာပါတယ်။


ဘန်ကောက် သုဝဏ္ဏဘူမိလေဆိပ်ကို လေယာဉ်ဆင်းပြီး ဘန်ကောက်ကို ပြန်မြင်တော့ အခင်းအကျင်းက အတော် တိုးတက်ပြောင်းလဲနေပါပြီ။ အရင်အခေါက်တွေတုန်းကလို တက္ကစီသမားတွေနဲ့ ဈေးညှိစရာမလို၊ တက္ကစီသမား ဈေးညစ်တာကို ခံစရာမလိုတော့။ လေဆိပ်က မိုးပျံရထားကို ၄၅ ဘတ်ပေးပြီး စီးလိုက်တာနဲ့ မြို့လယ်က ပရာထိုင်း ဘူတာအထိ ရောက်မယ်။ အဲဒီကနေ မိုးပျံရထား ပြောင်းစီးပြီး ကိုယ်တည်းမယ့် နေရာဆီသွားလိုက်ရင် ဘတ် ၁၀၀ လောက်နဲ့ လိုရာခရီးကို ရောက်နေပါပြီ။

ဒါပေမယ့် နော်ဝေရာသီဥတုအခြေနေနဲ့ ပြောင်းပြန်ဖြစ်သွားတဲ့ အပူချိန်က ချွေးပြန်စေပါတယ်။ အနှုတ်ဖြစ်လိုက် အပေါင်း ၁-၂ ဒီဂရီ စင်တီဂရိတ်ဖြစ်လိုက် အခြေအနေမှာ ချွေးမထွက်လို့ စိတ်ညစ်နေခဲ့တဲ့ ကျနော် ဘန်ကောက်နွေရဲ့ အပူက အဲကွန်းရထားထဲမှာ ထိုင်နေရင်းနဲ့ ချွေးတွေထွက်လို့။ ကိုယ်ချွေးနံ့ ကိုယ် ပြန်နံလာလို့ ဘေးကလူတွေကို အားနာလာလို့ ကြည့်မိတော့ ထူးဆန်းတာ နိုင်ငံခြားကလာတဲ့ ခရီးသည်တွေပဲ ကိုယ့်လိုချွေးပြန်နေတာ တွေ့ရပြီး ဒေသခံ ထိုင်းတွေက ချွေးတစက်မှ မထွက်ကြပါ။

ကော်ဖီသောက်တော့လည်း ထိုင်းတွေက ”ကာဖယ်ယင်” ခေါ် ကော်ဖီအအေးကို ကြိုက်ကြပါတယ်။ အနောက်လေ မိနေတဲ့ ကျနော်ကတော့ ကော်ဖီဆိုရင် အပူမှ။ ပြီးတော့ ဒီက 7-Eleven ဆိုင်တွေမှာ ကော်ဖီစက် မရှိ။ မတက်နိုင်။ ရောမရောက်ရင် ရောမလို ကျင့်ပေတော့။ ရေခဲစိမ်ကော်ဖီကို ရေခဲရေလိုသဘောထားပြီး သောက်။ ဘန်ကောက်နေပူပူအောက်မှာ မိုးပျံရထားတဆင့်၊ ကုန်းကြောင်းတဆင့်လျှောက်ပြီးတဲ့ နောက်မှာတော့ ဆထွန် လမ်းမကြီးဘေး၊ ဆွိုင် ထနန်ပန်ထဲက မြန်မာသံရုံး ဗီဇာ ဌာနဆီ ကျနော်ရောက်လာပါတယ်။

ပြည်ပရောက်မြန်မာတွေအတွက် အသင့်တော်ဆုံး ဗီဇာဟာ Social Visa ဆိုရှယ်ဗီဇာ လို့ကြားရတဲ့အတွက် အဲဒါ ဘယ်လိုလျှောက်ရသလဲဆိုပြီး အရင်ဆုံး လာစုံစမ်းတာပါ။ အဲဒီ ဗီဇာနဲ့ မြန်မာနိုင်ငံဆီ သွားဖူးတဲ့ အော်စလိုက မိတ်ဆွေတဦးရဲ့အပြောတိုင်းဆိုရင် မြန်မာနိုင်ငံက ဆွေမျိုးတဦးဦးရဲ့ဖိတ်စာနဲ့ အဲဒီလူရဲ့ နိုင်ငံသားစိစစ်ရေးကဒ် မိတ္တူတွေလိုတယ်လို့ သိရပါတယ်။ ဒါပေမယ့် ဘာစာမှ မလိုဘူး၊ ဘန်ကောက်မှာရှိတဲ့ မြန်မာပွဲစားတွေကို လိုင်းဝင်လိုက်ရင် လူကိုယ်တိုင်တောင် သံရုံးသွားစရာမလိုဘူး။ ဗီဇာ နေ့ချင်းရတယ်လို့ ပြောကြတာလည်း ရှိပါတယ်။

သူပုန်လူထွက် သတင်းထောက်ဆိုတော့ ပွဲစားကို ပိုက်ဆံပေးလုပ်ရတဲ့အလုပ်မျိုး၊ စည်းမျဉ်းအတိုင်းမလုပ်ပဲ ”ဂွင်” ဖန်တဲ့ မြန်မာတွေရဲ့ ညာဉ်ဆိုးကို ကျနော်က သိပ်သဘောမတွေ့လှ။ ပြီးတော့ ခဲရာခဲဆစ် အတွေ့အကြုံကိုလည်း သိချင်သေး။ စတိုရီလည်း လုပ်ချင်သေးတယ်ဆိုတော့ သံရုံးဆီ ကိုယ်တိုင် သွားမေးတာ အကောင်းဆုံးလို့ ဆုံးဖြတ်ပြီး ဗီဇာ ဌာနဆီ ကျနော် ရောက်လာတာပါ။

တကယ်တော့ ဒီသံရုံးဟာ ထိုင်းနိုင်ငံမှာနေခဲ့ဖူးတဲ့ မြန်မာကျောင်းသားတိုင်းနီးပါး မရောက်ဖူးသူ မရှိသလောက်ပါပဲ။ ကွာတာဆိုလို့ အရင်ကရောက်ဖူးတာဟာ ဒီသံရုံးကို ဆန့်ကျင်ဆန္ဒပြပွဲလုပ်ဖို့ဖြစ်ပြီး အခုတခေါက်ကတော့ ပြည်ဝင်ခွင့်ဗီဇာ လျှောက်ဖို့ ဖြစ်နေတာပါပဲ။ ဒါဟာ အများပြောနေသလို အခြေအနေတွေ ပြောင်းသွားတဲ့သဘောလား။ ကျနော်တို့ ကိုယ်တိုင်ပြောင်းသွားတဲ့ သဘောလား၊ အပြောင်းခံလိုက်ရတဲ့ သဘောလား။ ”တံတားက ရွေ့နေတာလား၊ ရေက စီးနေတာလား။”

ဘာကို ဘ၀င်မကျမှန်း အသေအချာ မသိပေမယ့် စိတ်ထဲမှာတော့ ဒီလိုနည်းနဲ့ အိမ်ပြန်ခြင်းမျိုးကို သိပ်သဘောမကျပါ။ ဒါပေမယ့် မတတ်နိုင်။ လောလောဆယ် ဒီနည်းမှတပါး တခြားနည်း မရှိသေးတဲ့အတွက် ဗီဇာဌာနထဲ ကျနော် အရဲစွန့်ဝင်သွားပါတယ်။ ပြီးတော့မှ ဒီအပေါက်ဟာ လွန်ခဲ့တဲ့ ၁၄ နှစ် ၁၉၉၉ အောက်တိုဘာလ ၁ ရက်နေ့တုန်းက တောခိုကျောင်းသားတွေဖြစ်တဲ့ ကိုဂျော်နီတို့ ”စွမ်းအားမြင့်စစ်သည်တော်” တွေ ၀င်ခဲ့တဲ့အပေါက်ပါလား ဆိုပြီး ရင်ခုန်မိပါသေးတယ်။ အထဲမှာ လူ ၁၀၀ ကျော် ၀င်လိုက် ထွက်လိုက်လုပ်နေပေမယ့် အပေါက်ဝမှာ အစောင့်တယောက်မှမရှိ။ မျက်နှာကျက်ပေါ်မှာတော့ CCTV တလုံး တပ်ထားတာ တွေ့ရပါတယ်။

အများစုက ထိုင်းနဲ့ နိုင်ငံခြားသားဖြစ်နေပြီး မြန်မာနိုင်ငံသား သိပ်မတွေ့ရ။ သံဃာ၂ ပါးကို တွေ့ရ တဲ့အတွက် မြန်မာလိုနဲ့ နှုတ်ဆက်ပြီး ဗီဇာဘယ်လိုလျှောက်ရသလဲ မေးကြည့်မိပါတယ်။ ”တကာကြီးက ဗမာဖြစ်ပြီး ကိုယ့်နိုင်ငံကိုယ်ပြန်တာ ဗီဇာလျှောက်ဖို့လိုသေးလား” ဆိုပြီး မေးခွန်းပြန်ထုတ်နေလို့ ပြည်ပရောက်တွေအကြောင်း ဇာတ်လမ်းစုံ ရှင်းပြနေရပါသေးတယ်။ နောက်ဆုံးတော့ သူတို့လည်း ဘာမှမသိ။ ကောင်တာမှာ သွားမေးတာ အကောင်းဆုံးဆိုပြီး လူတန်းရှည်ကို တန်းစီစောင့်ရပြန်ပါတယ်။

ကောင်တာ နံပတ် ၁ မှာထိုင်တဲ့ အမျိုးသမီးက ဆက်ဆံရေး သိပ်မဆိုး။ မောက်မာမှု မရှိ။ ဆိုရှယ်ဗီဇာလျှောက်မယ်ဆိုရင် မြန်မာပြည်က ဖိတ်ခေါ်စာနဲ့ အဲဒီလူရဲ့ နိုင်ငံသား  စိစစ်ရေးကဒ် မိတ္တူတွေလိုတယ်။ ကျန်တာကတော့ ကမ္ဘာလှည့်ခရီးသွားတွေ လျှောက်နေတဲ့အတိုင်း ပုံမှန်ပါပဲလို့ အသေအချာ ရှင်းပြပါတယ်။ အဲဒီဖိတ်စာက ဘယ်လိုရေးရမှာလဲ။ နမူနာရှိလားဆိုပြီး ထပ်မေးတော့ ”ဟိုမှာလေ၊ နံရံမှာ ကဒ်ထားတာ မတွေ့ဘူးလား” တဲ့။ နံရံကစာဆီသွားပြီး အသေအချာကြည့်။ လက်ကိုင်တယ်လီဖုန်းနဲ့ ဓာတ်ပုံရိုက်ပြီး ပြန်ထွက်လာရပါတယ်။

ပြီးတော့မှ မြန်မာနိုင်ငံ ကျေးလက်တောရွာက ကျနော့်အိမ်ဆီ ဖုန်းဆက်ပြီး ဖိတ်စာနမူနာကို အီးမေးလ်နဲ့ ပို့ထားကြောင်း၊ ဖောင်ဖြည့်ပြီး နိုင်ငံသားကဒ် မိတ္တူပို့ပေးဖို့ ပြောရပါတယ်။ အစိုးရ အပြောင်းအလဲကြောင့် မဟုတ်ပဲ နည်းပညာပြောင်းလဲတိုးတက်မှုအရ ကျေးလက်ဒေသက ကျနော်ရွာ့မှာလည်း ၂ သိန်းတန် လက်ကိုင်ဖုန်းတွေ ရှိနေပါပြီ။ (အဲဒီနေ့အထိ ၁၅၀၀ တန်ဖိုးကဒ် ခွဲတန်းမရသေးပါ)။ ဒါပေမယ့် အင်တာနက်တော့ မရှိသေး။ ဒီတော့ ရွာကနေ ၅-၆ မိုင်ဝေးတဲ့ မြို့ပေါ်တက်ပြီး အင်တာနက်ဆိုင်ကတဆင့် ကျနော် မှာထားတာတွေ ပို့နိုင်ဖို့ တနေကုန် ကြိုးပမ်းခဲ့ရပါတယ်။



ဒီလိုနဲ့ နောက်တနေ့မနက် ဗီဇာသွားလျှောက်တော့ ဘာမှ အမေးအမြန်းမရှိ။ ကောင်တာ အမှတ် ၁ မှာ တိုကင်ယူပြီး ကောင်တာ အမှတ် ၄ က အမှတ်စဉ်ခေါ်တာကို ထိုင်စောင့်နေရုံပါပဲ။ ကောင်တာဆို လို့ အခန်းထဲမှာ ကောင်တာ ၄ ခုရှိပါတယ်။ ကောင်တာ ၁ က သတင်းမေးခြင်း၊ ဖောင်ဖြည့်ခြင်း၊ တိုကင်ယူခြင်း အပါအ၀င် ပထမ အဆင့်ကိစ္စတွေကို ဆောင်ရွက်ပေးပါတယ်။ ကောင်တာ ၂ ကတော့ ထိုင်း နိုင်ငံသားတွေချည်းအတွက် သီးခြားလုပ်ပေးတဲ့ကောင်တာ။ ကောင်တာ ၃ ကတော့ တိုးရစ်ဗီဇာ လုပ်ပေးပါတယ်။ ကျနော်တို့ ဆိုရှယ်ဗီဇာသမားတွေကတော့ ကောင်တာ ၄ Business ဘဇ်နက် ဗီဇာကောင်တာမှာ ၀င်တန်းစီရပါတယ်။

အရင်ခေတ်က လူသွားနည်းလှတဲ့ မြန်မာနိုင်ငံဟာ အခုတော့ ဗီဇာတန်းစီလာလျှောက်သူ မနည်းလှ။ ထိုင်းကောင်တာမှာ ပေါ်နေတဲ့ နံပါတ်တွေအရ လူဦးရေ ၅၀၀ ၀န်းကျင်။ တိုးရစ်ကောင်တာက ၄၀၀ ၀န်း ကျင်။ ကျနော် တန်းစီနေတဲ့ ဘဇ်နက်ကောင်တာမှာတော့ ၂၀၀ ၀န်းကျင်ရှိတဲ့အတွက် တရက် တရက်ကို လူ ၁၀၀၀ ၀န်းကျင် ဗီဇာ ထုတ်ပေးနေရတဲ့သဘောပါ။

”ခင်ဗျားက ဆိုရှယ်ဗီဇာလျှောက်မှာလား” ဆိုပြီး ကောင်တာထိုင် အရာရှိကမေးတော့ နည်းနည်းတွန့်ချင်သွားတယ်။ ‘ဇာတ်လမ်းတော့ စပြီ။ ထုံးစံအတိုင်း အရစ်ခံရတော့မယ် လို့ ထင်လိုက်ပါတယ်။ ”ဟုတ်ပါတယ်။ ဆိုရှယ်ဗီဇာလျှောက်ရမယ်ဆိုပြီး ဟိုဖက်ကောင်တာက ပြောလိုက်လို့ပါ” လို့ ကျနော်က ပြန်ဖြေပါတယ်။ ပြီးတော့ သူက ကျနော့် မျက်နှာကို အသေအချာကြည့်ပြီး…”ခင်ဗျားက ရန်ကုန်ကို ဘယ်နေ့သွားချင်တာလဲ” လို့ ထပ်မေးပါတယ်။ ”ဗီဇာရတဲ့ အချိန်ပေါ့ဗျာ။ ဗီဇာက နေ့ချင်းပြီးရတယ်ဆိုတာ ဟုတ်လား” လို့  leading question ပြန်မေးလိုက်ပါတယ်။

”ရပါတယ်။ နေ့ချင်းပြီးဆိုရင် ၂၀၀၀ ကျော်။ တရက်ခြားဆိုရင် တထောင်ကျော်။ တပတ်တွင်းဆိုရင် ၈၀၀ လောက်ပဲ။ ခင်ဗျား ဘယ်နေ့လိုချင်လဲ” လို့ သူကဖြေပါတယ်။ သတင်းထောက်တွေရဲ့ ထုံးစံအတိုင်း မသေချာတဲ့ မနက်ဖြန်ကို ဘယ်စောင့်နေပါ့မလဲ။ နေ့ချင်းပြီး လိုချင်ပါတယ်ဆိုပြီး ဘတ် ၂၀၀၀ ကျော်ပေး လိုက်ပါတယ်။ ပြီးတော့ ငွေလက်ခံဖြတ်ပိုင်းပေး၊ ညနေ ၃ နာရီခွဲကြမှ တခေါက်ပြန်လာပါလို့ ပြောတဲ့အတွက် သံရုံးထဲကနေ ကျနော်ပြန်ထွက်လာခဲ့ပါတယ်။


ဗီဇာလျှောက် ရခက်တယ်။ ဆွေ ၇ ဆင့်၊ မျိုး ၇ ဆင့်ဖောင် ဖြည့်ရတယ်။ သံရုံးအရာရှိတွေက သိပ်အရစ် ရှည်တယ် ဆိုပြီး သတင်းကြီးနေတဲ့အတွက် ဘာမှမမေးပဲ ဒီလို လက်ခံလိမ့်မယ်လို့ ကျနော် ထင်မထားခဲ့ပါ။ ဒါပေမယ့် အခုဟာက လျှောက်လွှာကို လက်ခံထားခြင်းသာဖြစ်ပြီး ဗီဇာကို ထုတ်မပေးသေးတဲ့အတွက် စိတ်ထဲမှာ သိပ်မသေချာသေး။ ဒီလိုနဲ့ ညနေ ၃ နာရီကျော်ကျော်လောက် သံရုံးရှေ့ ပြန်ရောက်တော့ ကျနော့်အရင် တန်းစီနေသူတွေ ၁၀၀ လောက် ရှိမယ် ထင်ပါတယ်။ ဒီလောက် နေပူတဲ့ကြားထဲ ပလက်ဖောင်းပေါ် ထိုင်စောင့်နေသူတွေ။ အနောက်တိုင်းသူတချို့ဆိုရင် ကလေး တွန်းလှည်းတွေနဲ့။

သံရုံးတံခါးဖွင့်တာကို စောင့်ရင်းနဲ့ သံရုံးထဲ အသေအချာကြည့်မိတော့ မြန်မာအလံကို မတွေ့မိ။ အနီးကပ် တံခါးနား ကပ်ကြည့်တော့မှ ခပ်နိမ့်နိမ့် စိုက်ထားတဲ့ အလံတိုင် ၂ ချောင်းမှာ မြန်မာအလံနဲ့ အာဆီယံ အလံတွေကို တွေ့ရပါတယ်။ သတင်းလိုက်ခဲ့ဖူးလို့ မှတ်မိနေတာက ၁၉၉၉ ခု ကိုဂျော်နီတို့အဖွဲ့ သံရုံးစီးနင်းစဉ်တုန်းက ရဟတ်ယာဉ် ဆင်းမရလို့ဆိုပြီး ခုတ်လှဲလိုက်တဲ့ အလံတိုင်ဟောင်းဟာ အခုထိ ပြန်မထူနိုင်သေး။ အဲဒီအစား အလံတိုင်ငယ်နဲ့ပဲ ခရီးဆက်နေတဲ့သဘောလို့ ယူဆရပါတယ်။

၃ နာရီခွဲမှာ တံခါးဖွင့်လို့ အားလုံး တိုးဝှေ့ဝင်သွားပြီးနောက်မှာလည်း ဘာအစစ်အဆေး အမေးမြန်းမရှိ။ ”ဟောဒီမှာ လက်မှတ်ထိုး” လို့ပြောပြီး ကျနော် နော်ဝေ နိုင်ငံကူးစာအုပ်ကို ပြန်ပေးလိုက်ပါတယ်။ ကျနော်က သံရုံးအရာရှိ တခုခု မေးဦးမယ်ထင်လို့ ကြောင်ပြီး ရပ်နေမိတော့ ”ပြီးပြီလေ၊ ဒါပဲလေ” ဆိုပြီး အဲဒီအရာရှိက ပြောပါတယ်။ ဒီတော့မှ ကျနော်လည်း စာအုပ်ကို ဖွင့်တောင် ကြည့်မနေတော့ပဲ သံရုံးထဲကနေ ခပ်သွက်သွက် ထွက်လာခဲ့တယ်။ ကျနော် မြန်မာပြည် ပြန်ဖို့ ဗီဇာ ရခဲ့ပြီ။




Wednesday, May 1, 2013

သူပုန်ကျောင်းသား ရန်ကုန်ရောက်ပြီ။

ABSDF ရဲဘော်ရဲဘက်များနဲ့ စာဖတ်ပရိတ်သတ်များသို့ အသိပေးတင်ပြချက်

ABSDF တပ်ဖွဲ့ဝင်ဟောင်းနဲ့ DVB သတင်းထောက်ဟောင်းဖြစ်ပြီး လောလောဆယ် အလွတ်သတင်း ထောက်၊ စာရေးသူအဖြစ်တာဝန်ထမ်းနေတဲ့ ကျနော်ထက်အောင်ကျော် (ခေါ်) ၀င်းထိန်ဟာ ၂၈ ရက် စာ ဆိုရှယ်ဗီဇာနဲ့ မြန်မာနိုင်ငံဆီ ဒီနေ့ (မေလ ၁ ရက်နေ့) ရောက်ရှိခဲ့ပါတယ်။



ဒီခရီးစဉ်အတွင်း ကျနော်ရေးသားခဲ့တဲ့ ''သူပုန်ကျောင်းသားတဦးရဲ့ မာရသွန်ခရီး'' ဆောင်းပါးတွေကို စု စည်းပြီး (မေလ ၅ ရက်နေ့မှာထုတ်နိုင်ဖို့စီစဉ်နေ) စာအုပ်ထုတ်ဝေရေး၊ ABSDF သမိုင်းနဲ့ပတ်သက်ပြီး လုပ်နိုင်တာတွေ လုပ်ဆောင်ရေး၊ ၂၅ နှစ် တာ ခွဲခွာနေရတဲ့ မိဘဆွေမျိုးများနဲ့တွေ့ဆုံရေး၊ လက်ရှိဖြစ် ပေါ် တိုးတက်နေပါတယ်ဆိုတဲ့ နိုင်ငံရေး အခြေနေတွေကို လေ့လာဖို့ရှိပါတယ်။

ဒီခရီးစဉ်အတွင်း တွေ့ရှိရတဲ့ ထူးခြားချက်တွေကိုလဲ ခရီးသွားမှတ်တန်းပုံစံနဲ့ အခန်းဆက် ရေးသားတင် ပြသွားဖို့စီစဉ်ထားပါတယ်။


ရဲဘော်ရဲဘက်များ၊ စာဖတ်ပရိတ်သတ်များအားလုံးကို လေးစားလျှက်

ထက်အောင်ကျော် (ခ) ၀င်းထိန်
မေလ ၁- ရက်နေ့။ ရန်ကုန်မြို့။
...........................................................................................................................

Dear all,

I was arrived Rangoon today, 1 May 2013. During 28 days of my social visa, I plan to publish a book called, ''Marathon journey of a student rebel'' about 10-years of my life with the ABSDF.

I also plan to visit my family in Tavoy, southern Burma. And I will also to learn so called ''Burmese Style Reform''.

I will report you weekly about my trip in this blog and some media.

Best

Htet Aung Kyaw @ Win Htein

Share

Twitter Delicious Facebook Digg Stumbleupon Favorites More