(အရင်လက ရေးထားတဲ့ မဲဆောက်ခရီးစဉ်ဆောင်းပါးကို ပြန်လည်တည်းဖြတ်ပြီး ABSDF ၃၆ နှစ် အမှတ်တရအဖြစ် ပြန်လည်တင်ပြပါသည်)
(၁) ရာဇဝင်ထဲက မဲဆောက်...
---
မဲဆောက်ဆိုတာ မြန်မာ့တော်လှန်ရေးသမိုင်းနဲ့ တလျောက်လုံး ဆက်စပ်နေတဲ့မြို့ပါ။ ဟိုး...ဗိုလ်ချုပ်အောင်ဆန်းတို့ခေတ် ရဲဘော်သုံးကျိပ်တပ်တွေ ဂျပန်နဲ့အတူ ဝင်စဉ်ကတည်းက မဲဆောက်ကနေ စစ်ကြောင်းတခု ဝင်တယ်လို့ စာအုပ်တွေထဲ ဖတ်ရပါတယ်။
ပြီးတော့ ဝန်ကြီးချုပ်ဟောင်း ဦးနု ဦးဆောင်တဲ့ ပြည်ချစ်ပါတီ ခေတ်ကလည်း မဲဆောက်ဟာ အဓိကနေရာ တခုဖြစ်ခဲ့ပါတယ်။ နောက်... ၁၉၈၈ စာရေးသူတို့ တောခိုစဉ် ABSDF ကာလတုန်းကလည်း မဲဆောက်ဟာ အဓိနေရာတခုပါ။
အရင်က ရွာသာသာအဆင့်သာရှိတယ်ဆိုတဲ့ မဲဆောက်ဟာ အခု အတော်ကိုပြောင်းလဲ
တိုးတက်သွားပြီ။ ဒီမြို့ကို စာရေးသူ ပထမ ဆုံးရောက်ဖူးတာ ၁၉၈၈ အောက်တိုဘာလ၊ ABSDF ဗဟိုကော်မီတီ- နယ်မြေကော်မီတီတွ စတင်ဖွဲ့စည်းစဉ်က။ နောက်ဆုံးရောက်တာက ၂၀၁၃ ဇွန်လ။
အဲဒီ ၈၈၊ ပြီးတော့ ၂၀၁၃ ကနေ အခု ၂၀၂၄ ကြားမှာ မဲဆောက်က လုံး၀ ပြောင်းလဲသွားပြီ။ ရွာသာသာအဆင့်ကနေ တကယ့် နယ်စပ်ကုန်သွယ်ရေးမြို့ကြီးတခုဖြစ်သွားပြီ။ ဟိုက်ဝေး လမ်းတွေကလည်း အများကြီး၊ မြို့ပြင်ရပ်ကွက်သစ်တွေကလည်း အများကြီး။ မြဝတီ- ချစ်ကြည်ရေး တံတားနားမှာလည်း အိမ်ယာသစ်တွေက အများကြီး...
အရင်က နေခဲ့ဖူးတဲ့ ABSDF နယ်မြေကော်မီတီရုံးရှိရာ ရပ်ကွက်ဘေးက၊ ကျနော်တို့ ဟင်းဖိုးမရှိရင် သွားခူးနေကြ လမ်းဘေး ကဇွန်းခင်းလည်း မတွေ့တော့ဘူး။ အဲ... အရင်ခေါက်တွေက မဲဆောက်ရောက်ရင် ဝင်တွေ့နေကြ လေယာဉ်ကွင်းနားက ဒေါက်တာစင်သီယာ ဆေးခန်းတောင် အရင်နေရာမှာ မရှိတော့ဘူး...။(ဟိုး....မြို့ပြင် အမှတ် ၂ တံတားဖက်ပြောင်းသွားပြီ)။ အရင်ခေတ်က ကျနော်တို့ ကျိုးဖိုးတွေကို ခရီးသွားခွင့်လက်မှတ်ထုတ်ပေးတဲ့ ဗိုလ်မှူးစိုးစိုးအိမ်ကိုလည်း မမှတ်မိတော့ဘူး...
ဒါပေမယ့် မပူပါနက်... ဒီနေ့ ခေတ်သစ်လူငယ်တွေက ကျနော်တို့ခေတ်ကလို KNU လက်မှတ်ပါမှ မဲဆောက်တခွင် ခရီးသွားနိုင်တာမျိုးမဟုတ်တော့ဘူး။ ၁၀ နှစ်စာ လက်မှတ်တွေ၊ အလုပ်သမားလက်မှတ်တွေ၊ အနည်းဆုံးတော့ ရဲကြေး ဘတ် ၃၀၀ ပေးထားရင် တလစာ (ည ၈ နာရီကနေ မနက် ၅ နာရီအတွင်းတော့ မရ) လွတ်လပ်စွာ သွားလို့ရနေတယ်လို့ ဆိုပါတယ်။
အရင်ခေတ်ကလို မြန်မာမှန်းမသိအောင် ထိုင်းယောင်ဆောင်ရတဲ့ ခေတ်မဟုတ်တော့ဘူး။ မြန်မာပုဆိုးကိုဝတ်- မြန်မာလို အော်ကျယ်အော်ကျယ်ပြောပြီး သွားလု့ိရတဲ့ခေတ်ရောက်နေပြီ။ မြန်မာဆိုင်တွေ အများကြီးရှိနေပြီ။
“မင်္ဂလာပါ စားသောက်ဆိုင်” ဆိုရင် မနက်စာအတွက် မြန်မာစားစရာတွေ အကုန်ရတယ်။ ဆိုင်ကလည်းအကျယ်ကြီး... ၆ ယောက်ထိုင်စားပွဲ အလုံး ၂၀ ကျော်မှာ လူတွေအပြည့်၊ နန်းကြီးသုပ်တပွဲမှာတာ နာရီဝက်နီးပါး စောင့်ရတယ်။ လူများလွန်းလို့ စားဖိုမှုးတွေ- စားပွဲထိုးတွေ လက်မလည်ဘူး...
ညနေပိုင်းအတွက်ဆိုရင်လည်း MOM (Memories of Maesot) - စားသောက်ဆိုင်ဆိုတာ မြို့ပြင် ရေကန်ဘေးနားမှာ အတော်သားနားတာ။ အားပေးတဲ့လူတွေ အများကြီး...
အရင်ခေတ်ကဆိုရင် မဲဆောက်ဈေးထဲက အန်တီချစ် လဖက်ရည်ဆိုင်၊ ဒီဖက် ဈေးအထွက်က ကုလား လဖက်ရည်ဆိုင်နဲ့ ဟိုဖက် ရုပ်ရှင်ရုံနားက ဆိုင်တွေပဲရှိတာ။ လဖက်ရည်တခွက် ၅ ဘတ်နဲ့သောက်တာတောင် ... “ဘယ်ကရတဲ့ ပိုက်ဆံနဲ့ သောက်တာလဲ”...ဆိုပြီး စခန်းကနေ မဲဆာက်တက်လာတဲ့ ရဲဘော်တွေရဲ့ မေးခွန်းထုတ်ခြင်းကို ခံရပေါ့...။
အခုက ခေတ်ပြောင်းသွားပြီ၊ စားသောက်ဆိုင်တွေ၊ ဘားတွေ ထိုင်တာတောင် ပြသာနာမရှိတော့ဘူး။ တတိယ နိုင်ငံရောက် ဘော်ဘော်တွေ၊ ဒါမှမဟုတ် ပြည်တွင်းက မိဘဆွေမျိုးဆီကနေ K-pay, wave money, Western Union စသဖြင့် ခေတ်မီနည်းတွေနဲ့ လဖက်ရည်ဖိုး တောင်းလို့ ရနေပြီမဟုတ်ပါလား...
---
(၂) ရွှေကုက္ကို သို့မဟုတ် တချိန်က ကျီုးဖိုးများရဲ့ ရေကျော်စခန်း...
နွေဦးတော်လှန်ရေးအတွက် ထောက်ပို့ရဲဘော်တွေ ဘယ်လိုရန်ပုံငွေရှာနေသလဲဆိုတာကို မပြောခင် တချိန်က ABSDF ရဲဘော်များရဲ့ ကော်မူးရာ (ဝမ်ခ)နဲ့ ရေကျော်စခန်းဖက်မှာ တည်ဆောက်ထားတယ်ဆိုတဲ့ နာမည်ကြီး ရွှေကုက္ကိုမြို့ခရီးစဉ်ကို အရင် တင်ပြချင်ပါတယ်။
ပြီးခဲ့တဲ့ သင်္ကြန်ကာလ မြဝတီတိုက်ပွဲဖြစ်တုန်းက စစ်ကောင်စီ စစ်သားတွေ ခိုအောင်းခဲ့တယ်ဆိုတဲ့ အမှတ် ၂ တံတားကိုကျော်ပြီး အဝေးပြေးလမ်းပေါ်ကနေ သောင်းရင်းမြစ်အတိုင်း အပေါ်နည်းနည်းတက်လိုက်ရင် (သောင်းရင်းက ပြောင်းပြန်စီးတဲ့အတွက် ရေစီးအတိုင်းပြောရင်အောက်ဖက်) ဟွေးခလုတ်ရွာဟောင်းဖက် ရောက်ပါတယ်။
ဟွေးခလုတ်ကျော်ရင် အရင် ဝမ်ခဟောင်း- (ကော့မူရာ) နေရာပေါ့။ အဲဒီကနေ အပေါ်နည်းနည်းလေး ထပ်တက်တော့ အရင် ရေကျော်စခန်းဟောင်းနေရာဖြစ်မယ်ထင်ပါတယ်။ မှန်းပြောရတာ- မရောက်ဖြစ်တာ နှစ် ၃၀ ကျော်ပြီဆိုတော့ မသေချာတော့ဘူး။
အဲဒီနေရာမှာ သောင်ရင်းမြစ်ဘေး ထိုင်းဖက်ကမ်းက စားသောက်ဆိုင်တခုရဲ့ Rooftop ပေါ် တက်လိုက်တော့... “Wow...ရွှေကုက္ကိုဆိုတာ ဒီလိုကြီးလား”...။ ဓာတ်ပုံတွေ၊ ဗီဒီယိုတွေထဲမှာ မြင်ရတာထက် အများကြီး ပိုကြီးကျယ်ခန်းနားနေတာ တွေ့လိုက်ရပါတယ်။
တနည်းအားဖြင့်ပြောမယ်ဆိုရင်တော့ ကရင်ပြည်နယ်မှာ ရှမ်းမြောက်တို့၊ ကချင်တို့၊ ချင်းတို့၊ ရခိုင်တို့၊ ကရင်နီတို့နဲ့မတူတဲ့ အရှိတရားတခုကို တွေ့လိုက်ရတယ်လို့ပြောရမလား...။
တလောက ဖတ်ရတဲ့သတင်းတွေအရဆိုရင် သံလွင့်မြစ်နဲ့ ထိုင်းနယ်စပ်တကျောရှိ စစ်ကောင်စီစခန်းအားလုံးကို KNLA - တပ်မဟာ ၅ နဲ့ မဟာမိတ်တွေက အလုံးစုံသိမ်းပိုက်လိုက်ပြီ၊ သံလွင်မြစ်ကြောင်းတခုလုံးမှာ စစ်ကောင်စီ ကင်းစင်သွားပြီ... ဒီလို သိထားရပါတယ်။
ဒါပေမယ့် အခု ကျနော်ထိုင်ငေးနေတဲ့ သောင်ရင်းမြစ်ဘေးတလျောက်မှာတော့ စစ်ကောင်စီရော၊ စစ်ကောင်စီရဲ့ မဟာမိတ်တွေလို့ပြောနိုင်တဲ့ BGF တွေရော အများကြီးရှိနေဆဲဖြစ်ပါတယ်။ ရွှေ့ကုက္ကိုလိုမြို့သစ်တွေ ဒီနေရာမှာရှိနေခြင်းကိုက မြဝတီတိုက်ပွဲ ဘာကြောင့် အဖျားရှုးသွားသလဲ...ဆိုတဲ့ အချက်တွေအတွက် အရေးကြီး အထောက်အထားဖြစ်မယ်ထင်ပါတယ်။
BGF တွေကို KNU က ဘယ်လိုသဘောထားသလဲ...။ KIA ကတော့ ဆော့လော်၊ ချီဖွေ၊ ပန်ဝါ၊ ကန်ပိုက်တည် စတဲ့မြို့တွေမှာရှိတဲ့ BGF တွေကို ဆက်တိုက် ထိုးစစ်ဆင်နေတာတွေ့ရပါတယ်။ တပ်ပေါင်းစုအတွင်း ပါဝင်တဲ့ ERO တွေရဲ့ မူဝါဒတွေက တဖွဲ့နဲ့တဖွဲ့ မတူကြဘူးလား၊ ရန်သူ့လက္ခဏ သတ်မှတ်ချက်က တဖွဲ့နဲ့တဖွဲ့ မတူကြဘူးလား...
BGF ကို မဟာမိတ်အဖြစ် စည်းရုံးဖို့ KNU ဘက်က စဉ်းစားထားပါတယ်။ KIA က တိုက်သလိုမျိုး အပြတ်တိုက်ဖို့မရှိဘူးလို့ KNU ခေါင်းဆောင်တဦးက စာရေးသူကို ပြောပါတယ်။
မာနယ်ပလောခေတ်၊ ဗိုလ်ချုပ်မြခေတ်ကလို ကရင်လက်နက်ကိုင်အဖွဲ့တွေအားလုံး KNU အောက်မှာ တစုတစည်းတည်းပြန်ဖြစ်ဖို့ဆိုတာ ဖြစ်နိုင်သေးလား...။ ဗိုလ်မှူးစိုးစိုးလက်မှတ်နဲ့ မဲဆောက်တခွင်သွားနိုင်တဲ့ ခေတ် လိုမျိုး KNU သြဇာ ပြန်ရှိလာနိုင်သလား...
လက်ရှိအထိုင်ကို အပြောင်းအလဲ မလုပ်နိုင်သေးရင်တော့ မာနယ်ပလောခေတ်ကလိုမျိုး တပ်ပေါင်းစုမှာ ဦးဆောင်ရေး၊ မြောက်ပိုင်းအဖွဲ့တွေနဲ့ဟန်ချက်ညီ အရှိန်အဟုန်နဲ့ ချီတက်ရေးတွေကတော့ နည်းနည်းခက်နေဦးမယ်ထင်ပါတယ်။
ဒါတွေက ရွှေကုက္ကိုမြို့ကို သောင်းရင်းမြစ် တဖက်ကမ်းကနေ ထိုင်ငေးရင်း တွေးမိတာတွေပါ။ ဒီထက် ပိုတွေးလို့မဖြစ်ဘူး။ “ပြောတာတော့ လူတိုင်းပြောတတ်ပေါ့။ ခင်ဗျားကိုယ်တိုင် နယ်စပ်ပြန်လာပြီး လာတိုက်ပါလား” ဆိုရင် ဒုက္ခရောက်မယ်။ အသက် ၆၀ နီးပြီဆိုတော့ ထောက်ပို့အဆင့်ထက် ပိုပြီး ကွင်းထဲဆင်းဖို့ မလွယ်တော့ပါ...။
---
(၃) “တပြည်လုံး PDF၊ တကမ္ဘာလုံး PRF ”
ထောက်ပို့ဆိုမှ ... အဆင်မပြေမှုတွေ၊ အားမလိုအားမရမှုတွေ မည်သု့ိပင်ရှိနေစေကာမူ လစဉ် ဒေါ်လာ ၅၀၊ ၁၀၀ ပုံမှန် အလှူငွေထည့်နေသူ၊ ဈေးရောင်းပွဲတွေ အပတ်စဉ်ကျင်းပပြီး ရန်ပုံငွေရှာပေးနေသူ ထောင်-သောင်းချီ ရှိနေဆဲဆိုတာကို သိခွင့်ရခဲ့ပါတယ်။
တနည်းအားဖြင့် NUG-MOD ရဲ့ “တပြည်လုံး PDF၊ တကမ္ဘာလုံး PRF ” ဆိုတဲ့ဆောင်ပုဒ်က အလုပ်ဖြစ်ပုံရပါတယ်။ (PRF : People's Revolution Supply Family)။
“ခေတ်က ပြောင်းသွားပြီ ကိုယ့်လူရေ...။ အခု PRF က လစဉ်ရတဲ့ ထောက်ပံငွေ၊ အခြား ကရတဲ့ အလှူငွေနဲ့ MOD ကနေ လစဉ်ရိက္ခာခွဲတမ်းပေးထားတဲ့ PDF တပ်ဖွဲ့ဝင် ၂ သိန်းလောက်အထိရှိတယ်။ ဒါတောင် မပေးနိုင်သေးတဲ့ LPDF တွေ အများကြီးကျန်နေသေးတယ်” လို့ ၈၈ တော်လှန်ရေးကနေ လက်ရှိတော်လှန်ရေးအထိ ဆက်လက်ပါဝင်နေတဲ့ ရဲဘော်ဟောင်းတဦးက ပြောပါတယ်။
နွေဦးတော်လှန်ရေး ၃ နှစ်တာအတွင်း PDF, LPDF တွေ အင်အား ၂ သိန်းကျော်အထိရှိပြီး မြို့ပေါင်း ၈၀ ကျော်ကိုသိမ်းကာ အောင်မြင်မှုတွေအများကြီးရထားပေမယ့် အချို့ဒေသတွေမှာတော့ တောလှန်ရေးအဖွဲ့တွေ- LDPF တွေက မှိုလိုပေါက်နေဆဲလို့ ဝေဖန်သံတွေ လည်းကြားနေရပါတယ်။
၁၉၈၈ အခြေအနေနဲ့နှိုင်းယှဉ်မယ်ဆိုရင် အဲဒီကာလက ဘာမြို့မှ မသိမ်းနိုင်ဘူးဆိုပေမယ့် စက်တင်ဘာ ၁၈ မှာ စစ်တပ်က အာဏာသိမ်းပြီး နိုဝင်ဘာ ၁ ရက်နေ့မှာ ABSDF ဖွဲ့နိုင်တယ်။ ဒီဇင်ဘာအစောပိုင်းမှာ DAB တပ်ပေါင်းစုဖွဲ့တယ်... စသဖြင့် တိကျခိုင်မာတဲ့ အဖွဲ့တွေ- တပ်ပေါင်းစုတွေကို ချက်ခြင်း လုပ်ပ်နိုင်တယ်လို့ ဆိုကြပါတယ်။
အခုခေတ် LPDF တွေ... NUCC ပုံစံ တပ်ပေါင်းစုတွေက ခိုင်မာတိကျမှု မရှိဘူး၊ တပ်ပေါင်းစုမူ တိကျမှုမရှိပဲ သူရသူယူ ကိုယ်ရကိုယ်ယူ သဘောဖြစ်နေတယ်ဆိုတဲ့ ဝေဖန်ချက်ကိုလည်း သုတေသနဖက်မှာ တာဝန်ယူနေတဲ့ ရဲဘော်ဟောင်းတဦးက ထောက်ပြခဲ့ပါတယ်။
ဒါပေမယ့်... လောလောဆယ်ကတော့ ...ဝေဖန်ရေးတွေ သိပ်မလုပ်နက်... ခင်ဗျားတို့ခေတ်က စဉ်းစားပုံနဲ့ ဒီနေ့ လူငယ်တွေစဉ်စားပုံ မတူတော့ဘူး။ ခင်ဗျားလုပ်နိုင်တဲ့ ထောက်ပို့ကိုပဲ များများလုပ်၊ အလှုငွေ များများရအောင် လှုပ်ဆော်ပေးတာကိုပဲ လုပ်ပါ- ကျန်တာ သိပ်မပွားနဲ့...
ဒါပေမယ့် မပြောပဲကလည်း မနေနိုင်တော့... အရင် BCG (Burma Cooridation Group) ကိုပြတဲ့ စာရင်းမျိုးလား၊ BCG လို နိုင်ငံတကာအဖွဲ့တွေက နယ်စပ်စခန်းတွေကို ရိက္ခာ-ဆေးဝါး လစဉ် လာလှုပေးတာ မရှိဘူးလား မေးမိပြန်ပါတယ်။
စာရေးသူတို့ခေတ်ကဆို BCG ကပေးတဲ့ ရိက္ခာနဲ့ပဲ လစဉ် စားဝတ်နေရေးကို ဖြေရှင်းခဲ့တာရမို့လား။ ပြည်ပရောက်မြန်မာဆိုလို့ ဒေါ်ခင်ပြုံး၊ ဦးမောင်မောင်ဆွေ၊ နောက် ဦးတင်မောင်ဝင်းတို့ရဲ့ CRDB... ဒါပဲရှိတာ။ သူတို့ကလည်း လစဉ်ပုံမှန်ပေးနိုင်တာမျိုးမဟုတ်ဘူး။
အခုကတော့ ပြည်ပရောက် မြန်မာတွရဲ့အကူအညီက အံ့သြစရာကြီး။ အဲဒါနဲ့ အဓိက လည်ပတ်နေရတာ။ ဒါဆို နိုင်ငံတကာအကူအညီဆိုတာက- လေ... ပဲရှိတာလား.. ၊ လက်နက်မပေးရင်တောင် ဆန်ဖိုး-ဆီဖိုးလေးတော့ ထောက်ပံ့သင့်တာပေါ့။ ဒါတွေကို နိုင်ငံတကာက ကူရင် ပြည်ပရောက်တွေရဲ့ ထောက်ပံ့မှုကို စစ်ရေးဖက်မှာ သုံးနိုင်တာပေါ့...။
ဒါမှမဟုတ် “ငါတို့မှာ ငါတို့ရှိနေတယ်” ဆိုပြီး သူများတွေဆီ၊ နိုင်ငံတကာအစိုးရတွေဆီ မျက်နှာငယ်တောင်းခံဖို့ သိပ်မကြိုးစားတော့တာလား။ NDAA က ဒေါ်လာ သန်း ၁၀၀ ကျော်၊ ဟိုနေရာက ဘယ်လောက်ဆိုတာတွေက မြေပြင်ကို ရောက်မလာသေးဘူးလား...
ဘာပဲဖြစ်ဖြစ်... ဒီလိုအခြေနေမှာ ပြည်ပကနေ တလနည်းနည်းစီ နိုင်သလောက် ချွေ့ (အကူအညီပေးတာကို ထိုင်းလိုနဲ့ ဘန်းစကားအခေါ်)နေသူတွေရှိသလို တပြားမှ မချွေ့ပဲ ဘေးထိုင် ဘုပြောနေသူတွေကလည်း ရှိနေဆဲလို့ ဆိုပါတယ်။
ပြည်ပကနေ နိုင်သလောက် ချွေ့နေရုံနဲ့တော့ မလုပ်မဖြစ်ဘူး။ ကိုယ်တိုင် နယ်စပ်ဆင်းပြီး လုပ်မှရမယ်ဆိုတဲ့ ခံယူချက်နဲ့ ပြန်လာသူ ရဲဘော်ဟောင်း အနည်းအကျဉ်းကိုလည်း မဲဆောက်မှာ တွေ့ခွင့်ရခဲ့ပါတယ်။
ပြည်တွင်းကနေ ပြန်လာပြီး ကျန်းမာရေးကိစ္စတွေကူညီပေးနေတဲ့ အရင် နယ်မြေကော်မီတီက ကိုသိန်းထွန်း၊ အမေရိကန်ကနေပြန်လာပြီး လူမှု-စီးပွားကိစ္စတွေ ကူညီပေးနေတဲ့ ဘုရားသုံးဆူဖက်က ကိုကိုချစ်တို့ ၂ ဦးပဲ လူချင်းတွေ့ဆုံစကားပြောခွင့်ရခဲ့ပြီး အခြား ရဲဘော်ဟောင်းတွေနဲ့ တွေ့ခွင့်မရလိုက်ပါ။
နယ်သာလန်ကပြန်လာတဲ့ ကိုဘီစီက ရှေ့တန်းရောက်နေလို့ ချိန်ပြီး လွဲခဲ့ရ၊ နော်ဝေကနေ ပြန်လာတဲ့ နိုင်-ကျဉ်းဟောင်း ၂ ဦးနဲ့လည်း ချိန်ပြီး လွဲခဲ့ရပြန်ပါတယ်။ အခြား စာရေးသူ မသိတဲ့ ABSDF ရဲဘော်ဟောင်းတွေ၊ နိုင်-ကျဉ်း ဟောင်းတွေ တတိယ နိုင်ငံတွေကနေ ပြန်လာပြီး နွေဦးတော်လှန်ရေးကိုကူညီနေတာ ဒါဇင်နဲ့ချီရှိနေပါတယ်။
အဲဒီထဲက တဦးကတော့ အခု ABSDF ၃၆ နှစ်ပြည့် နှစ်ပတ်လည်မတိုင်ခင်လေးမှာတင် ကျဆုံးသွားတဲ့ ရဲဘော်မြင့်ဇော် ဖြစ်ပါတယ်။ သူဟာ အရင် ဗဟိုဖက် စခန်းတခုကဖြစ်ပြီး ၁၉၉၂ ရေကျော်စခန်း (အခု ရွှေကုက္ကိုနေရာ) တိုက်ပွဲမှာ ပါဝင်ခဲ့ဖူးသူလို့ သိရပါတယ်။
နောက်ပိုင်း သြစီမှာ အခြေချနေထိုင်ပြီး အခု ၂၀၂၁ နွေဦးတော်လှန်ရေးမှာ မဲဆောက်ကို ပြန်လာပြီး၊ အဲဒီကတဆင့် ကရင်ပြည်နယ်ထဲကိုဝင်ပြီး (၈.၈.၂၀၂၁) က စတင်ကာ နဂါးဖြူ စစ်ကြောင်းမှာ PDF ရဲဘော်အဖြစ် တာဝန်ထမ်းနေသူ ဖြစ်ပါတယ်။ ရဲဘော်သစ် တခါပြန်ဖြစ်ချိန်မှာ သူ့အသက်က ၆၁ နှစ်- ရှိနေပါပြီ။
အဲဒီလို သမိုင်းဖြတ်သန်းမှု၊ ပေးဆပ်မှုတွေရှိခဲ့တဲ့ ABSDF ရဲဘော်ဟောင်း၊ PDF ရဲဘော်သစ် ကိုမြင့်ဇော်ဟာ ရှေ့တန်းမှာ တိုက်ပွဲဝင်ရင်း ABSDF ၃၆ နှစ်ပြည့် မွေးနေ့မတိုင်ခင် တရက်မှာ ကွယ်လွန်သွားတယ်လို့သိရပါတယ်။
ကိုမြင့်ဇော်အပါဝင် ABSDF ခေတ်ကနေ PDF ခေတ်အထိ တော်လှန်ရေးထဲ ကိုယ်တိုင်ပါဝင်ဆောင်ရွက်ခဲ့သူတွေ၊ နယ်စပ်အထိလာပြီး ကူညီပေးနေသူတွေ၊ တတိယ နိုင်ငံတွေကနေ တတ်နိုင်သလောက်ဝိုင်းကူပေးနေတဲ့ ရဲဘော်ကြီးများအားလုံးကို ...
ABSDF ၃၆ နှစ်ပြည့်မွေးနေ့မှာ အလေးပြုလိုက်ပါတယ်။. ။
ရဲဘော်ဝင်းထိန် @ ထက်အောင်ကျော်
(၂- ၁၁ -၂၀၂၄)
