Life in ABSDF

Knife to knife, Lance to lance or the ABSDF.

 

....................................................................................................................

သူပုန်ကျောင်းသားတဦးရဲ့ မာရသွန်ခရီး (၂၇)

တတိယအကြိမ် ညီလာခံနဲ့ ABSDF အကွဲအပြဲကာလ

၂ နှစ်တခါ ညီလာခံလုပ်ရမယ်ဆိုတဲ့ ABSDF ဖွဲစည်းအုပ်ချုပ်ပုံ အခြေခံဥပဒေပါ စည်းကမ်းတွေအရ ၁၉၉၁ သြဂုတ်လအစောပိုင်းမှာ တတိယအကြိမ်ညီလာခံ ခေါ်မယ်လို့ ဗဟိုက ဖိတ်စာရောက်လာပါတယ်။ ကျနော်တို့ စခန်းဟာ လူဦးရေ ၃၀၀ ကျော်ရှိတဲ့အတွက် ညီလာခံကိုယ်စားလှယ် ခွဲတန်း ၁၀ ဦးရပါတယ်။ ဒီအတွက် ဖွဲ့စည်းပုံပါ ရွေးကောက်ပွဲကော်မရှင် လုပ်ထုံးလုပ်နည်းတွေအတိုင်း ကိုယ်စားလှယ် ရွေးချယ်ရေးကော်မရှင်ကို ဖွဲ့ပါတယ်။


နှစ်ဘက်ဗဟိုရဲ့ အတွင်းရေးမှူးတွေဖြစ်သွားသူ စခန်းဥက္ကဋ္ဌ ကိုအောင်သန်းဝင်းနဲ့ အတွင်းရေးမှူး ကိုမျိုးဝင်း (နောက်တန်း ၆ ဦးအနက် အလယ် ၂ ဦး) ကို တပ်ရင်းမကွဲမီ သင်တန်းဆင်းပွဲတခုတွင် အတူတွေ့ရစဉ်
တပ်ရင်းဌာနချုပ်ကော်မရှင်၊ ရှေ့တန်း တပ်ခွဲအသီးသီးက ကော်မရှင်ခွဲတွေကနေ လျို့ဝှက်မဲစနစ်နဲ့ ရွေးချယ်မှုအရ ၁၀ ဦးစာရင်းထဲ ပါသွားသူတွေကတော့ ဗဟိုမှာရောက်နေတဲ့ ကိုကျော်ကျော်၊ ကိုခင်မောင်ဝင်းနဲ့ ကိုဌေးအောင်၊ နောက်တခါ စခန်းကော်မတီတွေထဲက ကိုအောင်သန်းဝင်း၊ ကိုမျိုးဝင်း၊ ကိုသိန်းဆောင်၊ ကိုဝင်းမင်းနဲ့ တပ်မှူးတွေထဲကတော့ ကိုဇော်သန်းနဲ့ ကိုဘုန်းကျော်။ ပြီးတော့ စခန်းဥက္ကဋ္ဌဟောင်း ကိုမင်းအောင်တို့ ဖြစ်ပါတယ်။ ကျနော်ကတော့ ကံဆိုးတာလား၊ ကံကောင်းတာလား မပြောတတ်။ ၁၀ ဦး ရွေးတဲ့အထဲ ၁၁ နေရာကနေ ကပ်ပြီး ကျန်နေခဲ့ပါတယ်။

ဥက္ကဋ္ဌနဲ့တပ်ရင်းမှုးအပါဝင် စခန်းတာဝန်ရှိသူ အတော်များများ သံလွင်စခန်းမှာ ကျင်းပတဲ့ တတိယအကြိမ် ညီလာခံဆီ သွားနေစဉ် ဒုတပ်ရင်းမှူး ဆရာအောင်မြင့်၊ ကော်မတီဝင်တွေဖြစ်တဲ့ ကျနော်၊ ဦး ဟန်လင်း၊ ကိုဂွမ်ရှီနဲ့ ကိုဉာဏ်စိုးတို့က စခန်းအုပ်ချုပ်ရေးကို ဆက်လက် တာဝန်ယူထားရပါတယ်။ ဒီလိုနဲ့ ၁၉၉၁ သြဂုတ်လ ၁၄ ရက်နေ့ကနေ စတင်လိုက်တဲ့ သံလွင်စခန်းက ဗဟိုညီလာခံဟာ တလလည်းမပြီး၊ ၂ လလည်းမပြီးနဲ့ ဘာတွေဖြစ်နေမှန်း မသိပါ။ သံလွင်စခန်းမှာ လုံခြုံရေး အခြေနေမကောင်းလို့ KNU ဌာနချုပ် မာနယ်ပလောစခန်းဆီ ပြောင်းပြီးဆွေးနွေးရတယ်။ နောက်တခါ မာနယ်ပလော ညီလာခံမှာ သဘောထား ကွဲမှုတွေကြောင့် KNU က လက်မခံတော့ဘဲ သံလွင်စခန်းဆီ ပြန်ပို့လိုက်တယ် စသည်ဖြင့် သတင်းမျိုးစုံ ကြားနေရပါတယ်။ ဒီလို သတင်းအမျိုးမျိုးဖြစ်နေရာကနေ နောက်ဆုံးမှာတော့ တော်လှန်ကော်မတီကိစ္စ၊ မြောက်ပိုင်း ကချင်နယ်မှာ ဖြစ်ပွားခဲ့တဲ့ သူလျိုမှုကိစ္စတွေအပေါ် သဘောထားကွဲပြီး ဗဟို ၂ ခြမ်း ကွဲသွားပြီလို့ ကျနော်တို့စခန်းဆီ သတင်းရောက်လာပါတယ်။

သတင်းရောက်လာတယ် ဆိုပေမယ့် အစအဆုံး ပြည့်ပြည့်စုံစုံ သိရတာမျိုးတော့ မဟုတ်ပါ။ ညီလာခံအတွင်း သဘောထားကွဲမှုတွေ ရှိနေတဲ့အတွက် ပြင်ပကို သတင်းပေါက်မှာစိုးလို့ဆိုပြီး ဗဟိုနဲ့ စခန်းတွေအကြား ဆက်သွယ်ရေးစက်တွေကိုလည်း အရေးပေါ်မှအပ ဆက်သွယ်မှုအားလုံး ပိတ်ထားတဲ့ အတွက် ဘာမှကို အတိအကျ မသိနိုင်တဲ့အခြေနေမျိုးပါ။ အကြမ်းအားဖြင့်ကတော့ အထက်ဖော်ပြပါ ကိစ္စ နှစ်ခုအပေါ် အဓိက သဘောထားကွဲပြီး ဒေါက်တာနိုင်အောင် ဦးဆောင်တဲ့ဗဟိုနဲ့ ကိုမိုးသီးဇွန် ဦးဆောင်တဲ့ဗဟို ဆိုပြီး ဗဟို၂ ခု ဖြစ်သွားပြီ။ ဗဟိုဘက်က တပ်ရင်းတွေ၊ စခန်းတွေလည်း ဟိုဘက်ဗဟို ဒီဘက်ဗဟိုတွေကို အသီးသီး ထောက်ခံ ရပ်တည်လိုက်ပြီလို့ သိလိုက်ရပါတယ်။

အဲဒီလို အရှုပ်အထွေးများစွာ ဖြစ်နေစဉ်မှာ စခန်းတာဝန်တခုနဲ့ ထီးခီးကို ရောက်နေတဲ့ကျနော်ဟာ ဒုရင်းမှူး ဆရာအောင်မြင့်နဲ့ စခန်းကော်မတီဆီက ခွင့်ပြုချက်မယူဘဲ ကိုယ့်သဘောနဲ့ကိုယ် ဘန်ကောက်ကို ခရီးထွက်လာပါတယ်။ ကျနော်ဟာ ကော်မတီထောက်ပံ့ရေးတာဝန်နဲ့ ကန်ချနပူရီ၊ ဘန်ကောက်ကို သွားနေကြမို့ ထုံးစံအတိုင်း KNU မြိတ်-ထားဝယ်ခရိုင် ဘဏ္ဍာရေးတာဝန်ခံ ပဒိုကမ္ဘာအေးဆီကနေ ဘတ်ငွေ ၅၀၀ ချေးပြီး ဒီတိုင်း ထထွက်လာတာ ဖြစ်ပါတယ်။

ဘန်ကောက်မှာ ပထမဆုံး တွေ့သူတွေက ကျနော်တို့စခန်းဥက္ကဋ္ဌ တာဝန်ကနေ ကိုမိုးသီးဇွန်အဖွဲ့ရဲ့ ဗဟိုကော်မီတီ အတွင်းရေးမှူး ၁ ဖြစ်လာသူ ကိုအောင်သန်းဝင်းနဲ့ ကိုဝင်းမင်းတို့ ဖြစ်ပါတယ်။ သူတို့ ၂ ဦးကို ဦးမောင်မောင်ဆွေရဲ့ အိမ်အနီးက ကိုမိုးသီးဇွန်ရဲ့ ရုံးခန်းသစ်မှာ တွေ့တာဖြစ်ပြီး အဲဒီအချိန်အထိ ကိုဝင်းမင်းက ဘယ်ဘက်မှာ ရပ်တယ်လို့ အတိအကျ ဆုံးဖြတ်ချက် မရှိသေးပါဘူး။ နောက်တရက်မှာတော့ စခန်းကော်မတီ အတွင်းရေးမှူးကနေ ကိုနိုင်အောင်တို့ ဗဟိုကော်မီတီရဲ့ အထွေထွေအတွင်းရေးမှူး ဖြစ်လာသူ ကိုမျိုးဝင်းကို ရမ်ဂဟမ်က မူလ နိုင်ငံခြားရေးရုံး ၀န်းကျင်မှာ ကျနော်သွားတွေ့ပါတယ်။

ကွဲပြဲကာစ နှစ်ဖက်ဗဟိုကော်မတီ စာရင်းကတော့ ကိုမိုးသီးဇွန်တို့ဘက်မှာ ဥက္ကဋ္ဌအဖြစ် ကိုမိုးသီးဇွန်၊ ဒုဥက္ကဋ္ဌအဖြစ် ကိုအောင်သူငြိမ်း၊ အထွေထွေအတွင်းရေးမှူးအဖြစ် ဆလိုင်းကိုကိုဦး၊ အတွင်းရေးမှူး ၁ အဖြစ် ကိုအောင်သန်းဝင်း၊ အတွင်းရေးမှူး ၂ အဖြစ် ကိုမျိုးသန့်တို့ ဖြစ်ပါတယ်။ ဒေါက်တာနိုင်အောင်တို့ဘက်မှာတော့ ဥက္ကဋ္ဌအဖြစ် ဒေါက်တာနိုင်အောင်၊ ဒုဥက္ကဋ္ဌအဖြစ် ကိုကျော်ကျော်၊ အထွေထွေအတွင်းရေးမှုးအဖြစ် ကိုမျိုးဝင်း၊ အတွင်းရေးမှူး ၁ အဖြစ် ကိုအောင်ထူး၊ အတွင်းရေးမှူး ၂ အဖြစ် ကိုလှဌေးတို့ ဖြစ်ပါတယ်။

နှစ်ဖက်တာဝန်ရှိသူတွေဖြစ်တဲ့ စခန်းဥက္ကဋ္ဌ ကိုအောင်သန်းဝင်းနဲ့ စခန်းအတွင်းရေးမှူး ကိုမျိုးဝင်းတို့ရဲ့ ပြောဆိုချက်တွေဟာ သူ့ဆင်ခြေနဲ့သူ နှစ်ဖက်စလုံး မှန်သလိုဖြစ်နေတဲ့အတွက် သတင်းသွားမေးမိတဲ့ ကျနော်ကပဲ “မေးမိတာ မှားပါတယ်” ဆိုသလိုမျိုးဖြစ်သွားလို့ ကျနော်လည်း ဘာဆက်လုပ် ရမှန်းမသိပါ။ နောက်ဆုံးမှာတော့ အားလုံးဆုံပြီး စခန်းရောက်မှ စုံညီရှင်းလင်းပွဲလုပ်မယ်၊ ပြီးတော့မှ ရဲဘော်တွေရဲ့ ဆုံးဖြတ်ချက်အတိုင်း ခံယူမယ်လို့ အကြမ်း သဘောတူညီမှုရကာ ကျနော်တို့အားလုံး သီးခြားစီ မင်းသမီးစခန်းဆီ ပြန်ဝင်လာကြပါတယ်။


အပေါ် နှစ်ခြမ်း၊ အောက် ငါးခြမ်းနဲ့ မင်းသမီးဒေသ

စခန်းရောက်မှ ရှင်းလင်းပွဲလုပ်ပြီး ဆုံးဖြတ်ကြမယ်ဆိုပေမယ့် တကယ်ကတော့ ဗဟိုမှာကွဲတယ် ဆိုကတည်းက ကိုမိုးသီးဇွန်တို့ဘက်က တာဝန်ရှိသူတဦးဟာ ရနောင်းကိုဆင်းပြီး ကိုကျော်ရတို့ ပင်လယ်ပြင်တပ်စုကို သူတို့ဘက်ကပါဖို့ အပြတ်စည်းရုံးထားပြီးသား။ ကိုကျော်ရနဲ့ တပ်ဖွဲ့ဝင် ၄၀ ကျော် ၅၀ နီးပါးဟာ သူတို့ဘက်မှာ ရှိနေပြီဖြစ်တယ်လို့ ကြေညာထားပြီးဖြစ်ပါတယ်။ ဒါကြောင့် ကျနော်တို့ မိခင်တပ်ရင်းရှိရာ မင်းသမီးစခန်း ကုက္ကိုပင်ကြီးအောက်က ညီလာခံအတွေ့အကြုံ ရှင်းလင်းပွဲနဲ့ ရဲဘော်တွေရဲ့ ဆန္ဒခံယူပွဲဟာ ကိုနိုင်အောင်တို့ ဘက်က ကိုယ်စားလှယ်တွေနဲ့ ဘယ်ဘက်မှာမှ မပါဘဲ ဒီ နှစ်ဖွဲ့ပေါင်းတဲ့အထိ ဘက်မလိုက်ရပ်မယ်။ ကွဲပြဲတာကို လက်မခံနိုင်ဘူးဆိုတဲ့ ကျနော်တို့လို ပုဂ္ဂိုလ်တွေအကြား ရှင်းလင်းပွဲ သဘောမျိုးသာ ပိုများနေပါတယ်။

၁၉၉၁ ဒီဇင်ဘာလ ၃ရက်နေ့က ၁၁ ရက်နေ့အထိ ၉ ရက်ကြာကျင်းပတဲ့ အဲဒီမျက်နှာစုံညီ ရှင်းလင်းပွဲကို ကိုအောင်သန်းဝင်းနဲ့ ကိုမျိုးဝင်းအပါဝင် နှစ်ဘက်စလုံးက ကိုယ်စားလှယ် ၇ ဦးလောက် လာရောက်ရှင်းလင်း တင်ပြကြပါတယ်။ ကျနော်တို့ လက်ကျန် ကော်မီတီ ငါးဦးက သဘာပတိ ဒိုင်လူကြီးအဖြစ် တာဝန်ယူရပြီး ပွဲမကြမ်းအောင် ထိမ်းခဲ့ရပါတယ်။

ကျနော် မှတ်မိသလောက်ဆိုရင် ကိုအောင်သန်းဝင်းဘက်က အဓိကထား တင်ပြတာဟာ ကိုမိုးသီးဇွန်ရဲ့ ၈ လေးလုံးကာလ ထင်ပေါ်ကျော်ကြားမှု၊ ဗကသနဲ့ လူဘောင်သစ် ဒီမိုကရက်တစ်ပါတီမှာ ခေါင်းဆောင်မှု အစဉ်လာတွေ ဖြစ်ပါတယ်။ ဒီလိုအစဉ်အလာရှိတဲ့ ခေါင်းဆောင်ဖြစ်ပေမယ့် ညီလာခံအတွင်းမှာတော့ သူတို့ဟာ လူနည်းစုဖြစ်နေတဲ့အတွက် သူတို့ရဲ့ တင်ပြချက်တွေကို ဒေါက်တာနိုင်အောင်တို့ အုပ်စုက လက်မခံဘဲ လူများစုနဲ့ အနိုင်ကျင့်ခဲ့တယ်ဆိုတဲ့ သဘောမျိုး ကိုအောင်သန်းဝင်းက ပြောတယ်လို့ ကျနော် အမှတ်ရနေပါတယ်။

ကိုမျိုးဝင်းတို့ဘက်က ပြောတဲ့အထဲမှာတော့ အဖွဲ့အစည်းတွေရဲ့ လုပ်ထုံးလုပ်နည်းနဲ့ ဒီမိုကရေစီ ကျင့်စဉ်ရဲ့ သဘောအရ အများစုဆန္ဒကို အနည်းစုက လိုက်နာရမယ်ဆိုတဲ့ သဘောမျိုးပါတယ်လို့ ကျနော် မှတ်မိနေပါတယ်။
ကျနော်အပါဝင် ကွဲပြဲတာကို လက်မခံဘူးဆိုတဲ့ အုပ်စုကတော့ “အများစုဆန္ဒကို အနည်းစုက လိုက်နာရမှာဖြစ်သလို အနည်းစုဆန္ဒကို အများစုက လေးစားဖို့လိုတယ်။ ဒါကြောင့် ကွဲပြဲမှုကို ချက်ချင်းရပ်တန့်ပြီး အမြန်ဆုံး ပြန်လည်ပေါင်းစည်းဖို့လိုတယ်” ဆိုပြီး ပြောခဲ့တယ်လို့ မှတ်မိနေပါတယ်။


အရေးကြီးတဲ့ ရဲဘော်ထု ရှင်းလင်းပွဲလုပ်လေ့ရှိရာ မင်းသမီး စခန်းမှ အရိပ်ကောင်းတဲ့ ကုက္ကိုပင်ကြီး
ဒီလိုနဲ့ မနက် ၈ နာရီကနေ ညနေ ၄ နာရီအထိ ၉ ရက်လုံးလုံး ငြင်းခုံဆွေးနွေးလိုက်တာ လူတွေလည်း အတော်ခြေကုန်လက်ပန်း ကျကုန်ကြပါတယ်။ တနေ့ ၈ နာရီနှုန်းနဲ့ ကုက္ကိုပင်ကြီးအောက်မှာ နေ့ခင်းဘက် ဒီလို တရားဝင်ရှင်းလင်းပွဲတွေနဲ့ ရှုပ်နေသလို ညနေခင်းတွေမှာလည်း ဘားတိုက် အသီးသီးမှာ တီးတိုးစကားဝိုင်းတွေနဲ့ ဆွေးနွေးနေကြတာဟာ တကယ့်ကို အကြိတ်အနယ်ပါပဲ။ နောက်ဆုံးမှာတော့ ဘက်တခုခုကို ထောက်ခံတဲ့ တပ်ရင်းတခုတည်းအဖြစ် ဘယ်လိုမှ ရပ်တည်လို့ မဖြစ်နိုင်တော့တဲ့အတွက် “ငြိမ်းချမ်းစွာ ကွဲပြဲရေးမူဝါဒ” ကို ခေါင်းဆောင်ပိုင်းအသီးသီးက လက်ခံသဘောတူ လိုက်ရပါတယ်။ ဒီအတွက် ရဲဘော်တဦးချင်း ဆန္ဒရှိတဲ့အတိုင်း ကြိုက်တဲ့ဘက်မှာ လွတ်လပ်စွာ ရပ်နိုင်တယ်လို့ ဆုံးဖြတ်လိုက်ရပါတယ်။

ဒီဆုံးဖြတ်ချက်အရ ပထမဆုံး ကွဲပြဲသွားတာကတော့ ဒိုင်လူကြီးအဖြစ် သဘာပတိတာဝန် ယူနေကြတဲ့ ကျနော်တို့ လက်ကျန် စခန်းကော်မီတီ ငါးဦးပဲဖြစ်ပါတယ်။ ဒုရင်းမှူး ဆရာအောင်မြင့်က ကိုနိုင်အောင်တို့ဘက် ပါသွားပါတယ်။ ကျနော်၊ ဦးဟန်လင်း၊ ကိုဉာဏ်စိုး (ရက်ပိုင်းအတွင်း ကိုနိုင်အောင်တို့ဘက်ကို ပြောင်းသွားသူ)၊ ကိုဂွမ်ရှီ (လပိုင်းအတွင်း ကိုမိုးသီးဇွန်တို့ဘက်ကို ပြောင်းသွားသူ) တို့ကတော့ ဘယ်ဘက်မှမပါဘဲ ဘက်မလိုက် ညီညွတ်ရေးအဖွဲ့ဆိုပြီးရပ်ဖို့ သဘောတူလိုက်ပါတယ်။ အဲဒီနောက်မှာတော့ ငါတို့ကွဲသွားပြီဖြစ်တဲ့အတွက် စခန်းတခုတည်း အတူနေလို့ မဖြစ်တော့ဘူး၊ တနေရာစီနေမှ သင့်တော်မယ်လို့ ထပ်မံသဘောတူပြီးတဲ့နောက် ဆရာအောင်မြင့် ဦးဆောင်တဲ့ ဒေါက်တာ နိုင်အောင်ကို ထောက်ခံတဲ့အဖွဲဟာ သူတို့ လူအင်အား ၈၀ ခန့်နဲ့အတူ ကျနော်တို့ မူလစခန်းနဲ့ တမိုင်ခန့်ဝေးတဲ့ တပ်ရင်း စစ်သင်တန်းကျောင်းရှိရာ အရပ်ဆီ ပြောင်းသွားပါတယ်။

ဆန်အိတ်တွေ၊ ရိက္ခာတွေ၊ အိုးတွေခွက်တွေ၊ စောင်တွေ၊ ခွေးတွေကြောင်တွေကိုပါ သယ်ပြီး ထွက်သွားကြတဲ့ ဒီမြင်ကွင်းဟာ တကယ့်ကို ရင်နင့်စရာပါ။ တမြို့တည်းကနေ တောခိုဖို့ အတူထွက်လာသူတွေ၊ အထကတွေ တက္ကသိုလ်တွေမှာ နှစ်ပေါင်းများစွာ အတူကျောင်းတက်လာသူတွေ၊ ယုံကြည်ချက်တူလို့ အသက်ပါပုံအပ်ပြီး သုံးနှစ် သုံးမိုးလုံးလုံး တောတွင်းမှာ အတူနေ၊ အတူစား၊ အတူသွား၊ အတူတိုက်ပွဲဝင်လာခဲ့တဲ့ “ရဲဘော်သူငယ်ချင်း” တွေအချင်းချင်း အခုလို ကွဲသွားတဲ့မြင်ကွင်းကို ဘာနဲ့နှိုင်းပြရမှန်း ကျနော် စကားလုံး ရှာမတွေ့သေးပါ။ နှစ်ပေါင်းများစွာ ပေါင်းသင်းလာတဲ့ မိဘနှစ်ပါး သဘောထား မတိုက်ဆိုင်လို့ ကွဲပြဲချိန်မှာ သားသမီးတချို့က အဖေနဲ့လိုက်သွားပြီး တချို့က အမေနဲ့ကျန်ခဲ့တဲ့ မြင်ကွင်းမျိုးများ ဖြစ်နေလေမလားလို့တော့ စဉ်းစားမိပါတယ်။ ဒါပေမယ့်ဘာမှ မတတ်နိုင်။ လက်နက်ကိုင်တော်လှန်ရေး လုပ်နေတဲ့ ကျောင်းသားတွေဆိုတော့ စာသင်ခန်းထဲက ကျောင်းသားတွေလို “အဖေကယ်ပါ၊ အမေကယ်ပါ” ဆိုပြီး အော်ငိုနေလို့ဖို့လည်း မဖြစ်နိုင်တော့ပါ။

ဒီလိုနဲ့ ကျန်တဲ့လူ ၂၀၀ ၀န်းကျင်ခန့်ကတော့ ကျနော်တို့နဲ့အတူ ဘက်မလိုက်အဖြစ် မူလစခန်းမှာ နေမြဲအတိုင်း ဆက်နေကြပါတယ်။ ကိုမိုးသီးဇွန်ကို ထောက်ခံတဲ့ ကိုကျော်ရတို့အဖွဲ့ကတော့ အဲဒီအချိန် စခန်းမှာမရှိဘဲ ပင်လယ်ပြင်ထဲ ရောက်နေတာကြောင့် စခန်းနေရာအတွက် ပြဿနာမရှိခဲ့ပါ။ (နောက်ပိုင်းမှာတော့ ကျနော်တို့ ဘက်မလိုက်တပ်ရင်းရဲ့ အရှေ့ဘက် တမိုင်နီးပါးအကွာက တနင်္သာရီမြစ်ဘေးမှာ ၂၀၂ တပ်ရင်းဆိုပြီး သူတို့ရဲ့ စခန်းကို လာဆောက်ပါတယ်။)

ကျနော်တို့ ၂၀၁ တပ်ရင်းအတွင်း ၁၀ ရက်နီးပါး အော်ကြီးဟစ်ကျယ် အငြင်းပွား၊ ခိုက်ရန်ဖြစ်ပွားမှုမရှိဘဲ ခြိမ်းချမ်းစွာနဲ့ “ကုက္ကိုပင်လမ်းခွဲ” လုပ်လိုက်နိုင်ကြပေမယ့် ကျနော်တို့ဘေးနားရှိ ၂၀၃ တပ်ရင်းမှာတော့ ဒီလို ငြိမ်းချမ်းစွာ လမ်းခွဲနိုင်ပုံမရ။ (မြိတ်ဒေသ မောတောင်စခန်းအခြေစိုက် ၂၀၃ တပ်ရင်းဟာ ၁၉၉၀ အစောပိုင်းမှာ န၀တက ထိုးစစ်ဆင်တဲ့အတွက် မောတောင်စခန်း ကျပြီးနောက် မင်းသမီးဒေသဆီ ပြောင်းလာပြီး ကျနော်တို့ တပ်ရင်းနဲ့ မနီးမဝေးမှာ အခြေချထားပါတယ်။) ရှင်းလင်းပွဲကိုလည်း အသေအချာ လုပ်နိုင်ပုံမရဘဲ ကိုမိုးသီးဇွန်ကို ထောက်ခံတဲ့ အင်အားနည်းတဲ့အဖွဲ့တွေကို ကိုနိုင်အောင်ကို ထောက်ခံတဲ့ အင်အားများတဲ့အုပ်စုက စခန်းကနေ မောင်းထုတ်လိုက်ပါတယ်။ ဒါကြောင့် ကိုထိန်လင်း ဦးဆောင်တဲ့ ကိုမိုးသီးဇွန်တို့ဘက်က ၂၀၃ အဖွဲ့ဟာ ကျနော်တို့စခန်းဝန်းကျင် တနင်္သာရီမြစ်ဘေးကနေ ထီးခီးဆီ သွားရာလမ်းကြားရှိ အလယ်စတိုအထိ ရောက်သွားပါတယ်။

ဒီအကွဲအပြဲကို စာရင်းပြန်ချုပ်ရမယ်ဆိုရင်တော့ ဗဟိုမှာ နှစ်ခြမ်းသာကွဲပေမယ့် ကျနော်တို့ မင်းသမီးဒေသမှာတော့ တပ်ရင်း နှစ်ရင်းကနေ တပ်ရင်း ငါးရင်းအထိ ကွဲသွားပါတယ်။ ကျနော်တို့ ၂၀၁ မှာဆိုရင် ၂၀၁ ဒေါက်တာနိုင်အောင်၊ ၂၀၁ မိုးသီးဇွန်၊ ၂၀၁ ဘက်မလိုက်ဆိုပြီး တပ်ရင်း သုံးခုဖြစ်လာပါတယ်။ နောက်တခါ ၂၀၃ မှာဆိုရင်လည်း ၂၀၃ ဒေါက်တာနိုင်အောင်၊ ၂၀၃ မိုးသီးဇွန်ဆိုပြီး တပ်ရင်း နှစ်ခု ဖြစ်လာပါတယ်။

ကျနော်တို့ ကျောင်းသားတွေအကြား ဒီလိုအကွဲအပြဲတွေ ဖြစ်နေတာကို KNU ကလည်း အထူးစိတ်ဝင်တစား စောင့်ကြည့်နေပြီး ကျောင်းသားတွေအချင်းချင်း ပစ်ကြခတ်ကြတော့မလားလို့ စိုးရိမ်နေခဲ့ကြတယ်လို့လည်း နောက်ပိုင်းကျမှ ပြန်သိရပါတယ်။ ဘာကြောင့်လဲဆိုရင် သူတို့ KNU အပါဝင် ကွဲဖူးသမျှ လက်နက်ကိုင် အဖွဲ့အားလုံး အချင်းချင်း ပစ်ကြခတ်ကြပြီး အတူတူနေလို့မရအောင် ဖြစ်ခဲ့တာချည်းနဲ့ပဲ ကြုံဖူးလို့လို့ ဆိုပါတယ်။ ဒါကြောင့် ကျနော်တို့ ကျောင်းသားတွေ ကွဲတာဟာ တကယ် ကွဲတာမဟုတ်ဘဲ ဟန်ပြကွဲပြခြင်းသာ ဖြစ်ဖို့များတယ်ဆိုပြီး KNU ခေါင်းဆောင်ပိုင်းက နောက်ပြောင်ပြောဆိုလေ့ရှိတာကို ကျနော် မှတ်မိနေပါတယ်။


ဒေါက်တာနိုင်အောင်ကို ထောက်ခံတဲ့ ၂၀၁ အဖွဲ့မှ တပ်ရင်းရုံးသစ်နဲ့ စခန်းသစ်နေရာ ရှင်းလင်းဆောက်လုပ်နေစဉ်
ကျနော်တို့ မင်းသမီးဒေသအပြင် ABSDF တခုလုံးရဲ့ အဲဒီကာလ အကွဲအပြဲအခြေနေကို ကြားမိသမျှ ပြန်ပြောရမယ်ဆိုရင် တပ်ရင်းတခုတည်း သုံးခြမ်းကွဲတာကတော့ ကျနော်တို့ တပ်ရင်းတခုတည်းပဲ  ရှိတယ်လို့ထင်ပါတယ်။ ကျန်တဲ့တပ်ရင်းတွေ အများစုကတော့ တပ်ရင်းအလိုက် ဟိုဘက် ဒီဘက် ထောက်ခံလိုက်ကြပြီး အလွန်ဆုံးကွဲတဲ့တပ်ရင်းက နှစ်ခြမ်းပဲ ကွဲကြပါတယ်။ ဥပမာ – ဘုရားသုံးဆူ ဒေသမှာဆိုရင် ၁၀၁ တပ်ရင်းက ကိုနိုင်အောင်တို့ဘက်ကို ထောက်ခံပြီး ၁၀၂ က ကိုမိုးသီးတို့ကို ထောက်ခံလိုက်ပါတယ်။ သီဘောဘိုးဒေသရှိ ၂၀၄၊ ၂၀၅၊ ၂၀၆ တပ်ရင်းတွေ ဘယ်ဘက်ဘယ်လို ထောက်ခံသလဲဆိုတာကိုတော့ ရှင်းရှင်းလင်း မသိပါ။ သီဘောဘိုးအနီးရှိ စခန်းသစ်ဒေသအခြေစိုက် တပ်ရင်းတခုမှာတော့ ကျနော်တို့လိုပဲ ဘက်မလိုက်ရပ်တဲ့ အဖွဲ့တခုပေါ်လာတယ်လို့ သိရပါတယ်။ ဒါပေမယ့် ကျနော်တို့နဲ့ သူတို့အဖွဲ့ကြား ဘာမှအဆက်သွယ် မရှိခဲ့ပါ။

တခြားစခန်းတွေထဲမှာတော့ ကော့မူးရာစခန်းမှ ၂၁၁၊ ရေကျော်စခန်းမှ ၂၀၇၊ သံလွင်မှ ၂၀၉ တို့က ကိုနိုင်အောင်တို့ဘက်ကို ထောက်ခံတယ်လို့ ကြားရပါတယ်။ တခါ သံလွင်မှပဲ ၂၀၈ နဲ့ စောထမှ ၂၁၀ တို့က ကိုမိုးသီးဇွန်တို့ဘက်ကို ထောက်ခံတယ်လို့ သိရပါတယ်။ အလားတူ ကရင်နီနယ်မှ ၃၀၃၊ ပအို့နယ်မှ ၆၀၁၊ မြောက်ပိုင်း ကချင်ဒေသနဲ့ အိန္ဒိယနယ်စပ်ရှိ တပ်တွေဟာလည်း ကိုနိုင်အောင်တို့ဘက်ကို ထောက်ခံတယ်ဆိုပြီး ကြားရပါတယ်။ ဒါပေမယ့် ရှမ်းနယ်မြေရှိ တပ်ရင်းတခုနဲ့ ဘင်္ဂလားဒေ့ရ်ှနယ်စပ်ရှိ ၉၀၁ တပ်ရင်းတွေကတော့ ကိုမိုးသီးဇွန်တို့ကို ထောက်ခံတယ်လို့ ကြားရပြန်ပါတယ်။

ဗဟိုဘက်ကလာတဲ့ ဒီသတင်းတွေကို တဆင့်ခံ ကြားရခြင်းသာဖြစ်ပြီး ကျနော် အသေချာမသိပါ။ ကျနော် အတိအကျ သိတာကတော့ မင်းသမီးဒေသရှိ ၂၀၁ နဲ့ ၂၀၃ တပ်ရင်းတွေရဲ့အခြေနေမျှသာ ဖြစ်ပါတယ်။

........................................................................................

သူပုန်ကျောင်းသားတဦးရဲ့ မာရသွန်ခရီး (၂၆)

စင်ပြိုင်အစိုးရ ၀န်ကြီးချုပ်နှင့် သူ၏ သူပုန်တပ်မတော်

ကျနော်မှတ်မိသလောက်ဆိုရင် တပ်ရင်းညီလာခံအပြီး ၁၉၉၀ ဇူလိုင်လကနေ ၁၉၉၁ နှစ်ကုန်ပိုင်း ABSDF ဗဟို နှစ်ချမ်းကွဲတဲ့အချိန်အထိတာဝန်ထမ်းဆောင်ခဲ့တဲ့ စခန်းကော်မတီဟာ စုစည်းညီညွတ်မှု အားအကောင်းဆုံး၊ တည်ငြိမ်မှုအရှိဆုံး ကော်မတီတခုဖြစ်ခဲ့ပြီး အရေးကြီးတဲ့ကိစ္စ အတော်များများကို ဆောင်ရွက်နိုင်ခဲ့ပါတယ်။ ကော်မတီတာဝန်ရှိသူတွေ ထိုင်းနိုင်ငံထဲ ထွက်ပြီး နိုင်ငံတကာ ဆက်ဆံရေး၊ ထိုင်းစီးပွားရေးသမားတွေနဲ့ ဆက်ဆံရေး၊ အလှူရှင်တွေနဲ့ ဆက်ဆံရေး၊ တခြားမဟာမိတ် အဖွဲ့တွေနဲ့ ဆက်ဆံရေး၊ ဘန်ကောက်က ကျောင်းသားတွေနဲ့ ဆက်ဆံရေးကိစ္စတွေကိုပါ ဆောင်ရွက်နိုင်ခဲ့ပါတယ်။ အဲဒီကာလမှာ ဆူခွန်ဗစ် ဆွိုင် ၇၁ ထဲက မင်းသမီးစခန်းရဲ့ရုံးကို ပိတ်ပစ်ခဲ့ပြီး ဆူခွန်ဗစ်လမ်း နောက်တနေရာရှိ ဦးစိုးပိုင် (နောက်ပိုင်း NCGUB ရဲ့ အကြံပေးအရာရှိ) ရဲ့ နေအိမ်ကို စခန်းကော်မတီ စုရပ်နေရာအဖြစ် ကျနော်တို့ အသုံးပြုခဲ့ကြပါတယ်။


ဒေါက်တာ စိန်ဝင်း ၂၀၁ တပ်ရင်း မင်းသမီးစခန်းတွင် မိန့်ခွန်း ပြောနေစဉ်
ဒီလိုနဲ့တနေ့မှာတော့ အထူးပုဂ္ဂိုလ် ၃ ဦးကို ဦးစိုးပိုင်ရဲ့အိမ်မှာ ကျနော်တွေ့ရပါတယ်။ အဲဒီပုဂ္ဂိုလ်တွေကတော့ မာနယ်ပလောကနေ ဘန်ကောက်ကို ရောက်ကာစ စင်ပြိုင်အစိုးရ ၀န်ကြီးချုပ် သချာင်္ပါမောက္ခ ဒေါက်တာ စိန်ဝင်း (အာဇာနည်ခေါင်းဆောင်ကြီး ဦးဘ၀င်းရဲ့သား၊ ဒေါ်အောင်ဆန်းစုကြည်ရဲ့ အစ်ကိုဝမ်းကွဲ)၊ နိုင်ငံခြားရေးဝန်ကြီး ဦးပီတာလင်းပင်၊ ဘဏ္ဍာရေးဝန်ကြီး ဦးဝင်းကိုတို့ ဖြစ်ပါတယ်။ နောက်တပတ်လောက် ကြာတဲ့အချိန်မှာတော့ ဒေါက်တာ စိန်ဝင်းနဲ့ ဘဏ္ဍာရေးဝန်ကြီး ဦးဝင်းကိုတို့ ကျနော်တို့ မင်းသမီးစခန်းဆီ ရောက်လာပါတယ်။

အားလုံးသိပြီး ဖြစ်တဲ့အတိုင်း ၁၉၉၀ မေလ ရွေးကောက်ပွဲမှာ အမျိုးသားဒီမိုကရေစီအဖွဲ့ချုပ် (NLD) ပါတီ ၈၀ ရာခိုင်နှုန်းကျော်နဲ့ အပြတ်အသတ် အနိုင်ရခဲ့ပေမယ့် န၀တက အာဏာလွှဲမပေးခဲ့ပါဘူး။ ဒီရွေးကောက်ပွဲဟာ လွှတ်တော်တက်ဖို့ အမတ်ရွေးတာ မဟုတ်ဘဲ အခြေခံဥပဒေဆွဲဖို့ ရွေးတာသာဖြစ်တယ်ဆိုပြီး အမိန့်ကြေညာချက်တွေ ထွက်လာပါတယ်။ နောက်ဆုံးမှာတော့ ပြည်တွင်းမှာ ပါလီမန်ခေါ်ဖို့ အစိုးရဖွဲ့ဖို့ မဖြစ်နိုင်တော့ဘူးလို့ အမတ်အတော်များများက စဉ်းစားကြပြီး နယ်စပ်မှာ  စင်ပြိုင်အစိုးရဖွဲ့မယ်လို့ ဒေါက်တာ စိန်ဝင်းနဲ့ လွှတ်တော်အမတ်တချို့ မာနယ်ပလောဒေသဆီ ရောက်လာတယ်လို့ သိရပါတယ်။ ဒီလိုနဲ့ ၁၉၉၀ ဒီဇင်ဘာလ ၁၈ ရက်နေ့မှာ အမျိုးသားညွန့်ပေါင်းအစိုးရ (National Coalition Government of the Union of Burma – NCGUB) ကို မာနယ်ပလော ဌာနချုပ်မှာ ဖွဲ့စည်းလိုက်တယ်လို့ မှတ်တမ်းတွေမှာ ဖော်ပြထားပါတယ်။

အဲဒီအစိုးရအဖွဲ့မှာ ၀န်ကြီးချုပ်၊ ကာကွယ်ရေးဝန်ကြီးနဲ့ ပြည်ထဲရေးဝန်ကြီးအဖြစ် အမျိုးသားဒီမိုကရေစီ ပါတီဥက္ကဋ္ဌ ပေါက်ခေါင်း မဲဆန္ဒနယ်အမတ် ဒေါက်တာ စိန်ဝင်း၊ နိုင်ငံခြားရေးဝန်ကြီးအဖြစ် ပြင်ဦးလွင်အမှတ် ၂ မဲဆန္ဒနယ်မှ တသီးပုဂ္ဂလအမတ် ဦးပီတာလင်းပင်၊ ဘဏ္ဍာအခွန်ဝန်ကြီးအဖြစ် NLD ရေဦးအမှတ် ၂ မဲဆန္ဒနယ်အမတ် ဦးဝင်းကို၊ ကုန်သွယ်ရေးနဲ့ သမ၀ါယမ၀န်ကြီးအဖြစ် NLD ရွေတောင် အမှတ် ၂ မဲဆန္ဒနယ်အမတ်  ဦးသန်းကြွယ်၊ တရားရေးဝန်ကြီးအဖြစ် NLD မန္တလေး အနောက်တောင် အမှတ် ၂ မဲဆန္ဒနယ်အမတ် ဦးသိန်းဦး၊ ဆောက်လုပ်ရေး၊ သတ္တုတွင်းနဲ့ စွမ်းအင်ဝန်ကြီးအဖြစ် NLD မိုးကုတ် အမှတ် ၂ မဲဆန္ဒနယ်အမတ် ဦးဘိုလှတင့်၊ အလုပ်သမားနဲ့ လှုမှုကယ်ဆယ်ရေး ၀န်ကြီးအဖြစ် NLD ကျောက်ကြီး မဲဆန္ဒနယ်အမတ် ဦးထွန်းဦး စသည်ဖြင့် ၀န်ကြီး ၉ ဦးနဲ့ ဖွဲ့စည်းထားတာကို အဲဒီကာလက မာနယ်ပလောမှာ ထုတ်ဝေတဲ့ စာစောင်တွေ မှာတွေ့ရှိရပါတယ်။

ဒီလို အစိုးရဖွဲ့နိုင်ဖို့ ပြည်တွင်းက လွှတ်တော်အမတ်တွေ ဒါဇင်နဲ့ချီပြီး ထိုင်း-မြန်မာ နယ်စပ် မာနယ်ပလော အထိ ချောချောမောမော ရောက်နိုင်ဖို့ ကူညီခဲ့တဲ့အဖွဲ့တွေထဲမှာ ABSDF က အဓိကနေရာက ပါဝင်ခဲ့တဲ့အပြင် အဲဒီကာလဟာ ABSDF ရဲ့ အရှိန်သြဇာ အတောက်ပဆုံး ကာလလည်း ဖြစ်ပါတယ်။ အနှစ်ပြန်ချုပ်ရရင်တော့ NCGUB ၀န်ကြီးချုပ်နဲ့အဖွဲ့ဟာ မာနယ်ပလောမှာ အစိုးရဖွဲ့ပြီးလို့ နိုင်ငံတကာဆက်ဆံရေးအတွက် ဘန်ကောက်ကို ခေတ္တရောက်နေစဉ် ABSDF ရဲ့ နာမည်ကြီးစခန်းတခုဖြစ်တဲ့ ကျနော်တို့ မင်းသမီးစခန်းဆီ ၁၉၉၁ နွေဦးရာသီ (ဖေဖော်ဝါရီ သို့မဟုတ် မတ်လလောက် ဖြစ်မယ်လို့ ထင်ပါတယ်) မှာ ရောက်လာတယ်ဆိုပါတော့။

အဲဒီကာလ ကျနော်တို့စခန်းကလူတွေ နားလည်ချက်အတိုင်းဆိုရင် NCGUB ဟာ ကျနော်တို့ရဲ့ အစိုးရဖြစ်ပြီး ABSDF က NCGUB ရဲ့ လက်နက်ကိုင်တပ်မတော် ဖြစ်ပါတယ်။ ဒီတော့ ၀န်ကြီးချုပ် ဒေါက်တာ စိန်ဝင်းဟာ ကျနော်တို့ရဲ့ စစ်ဦးစီးချုပ်ပေါ့။ ဒီလိုနားလည်ချက်တွေနဲ့ စစ်ဦးစီးချုပ်ကို တခမ်းတနားကြိုဆိုပြီး ကိုကျော်ရ  ဦးစီးတဲ့တပ်စုက လက်နက်အပြည့်အစုံနဲ့ လုံခြုံရေးလိုက်ပေးပါတယ်။ အဲဒီအချိန်မှာ မောတောင်အခြေစိုက် ၂၀၃ တပ်ရင်းကလည်း မောတောင်စခန်းကို န၀တတပ်တွေက ၁၉၉၀ အစောပိုင်း ရွေးကောက်ပွဲမတိုင်မီမှာ သိမ်းလိုက်ပြီးတဲ့အတွက် မောတောင်ကနေ ဆုတ်ခွာပြီး ကျနော်တို့ မင်းသမီးဒေသဆီ ပြောင်းလာကာ ကျနော်တို့တပ်ရင်းနဲ့ သိပ်မဝေးတဲ့ တနင်္သာရီမြစ်ဘေး တနေရာမှာ အခြေစိုက်ထားပါတယ်။


ဒေါက်တာ စိန်ဝင်း၏ မိန့်ခွန်းကို နားထောင်နေသည့် ရဲဘော်များ
ဒီလိုနဲ့ လက်နက်အပြည့်ပါတဲ့ လုံခြုံရေးတပ်စိတ်တစိတ်က ရှေ့မှာလမ်းရှင်း၊ အဲဒီနောက်မှာ ၀န်ကြီးချုပ် ဒေါက်တာ စိန်ဝင်း၊ ဘဏ္ဍာရေးဝန်ကြီး ဦးဝင်းကိုနဲ့ ကျနော်တို့ စခန်းကော်မတီတချို့လိုက်ပါ၊ ပြီးရင် နောက်ထပ်လုံခြုံရေး တပ်စိတ်တစိတ်က နောက်ကလိုက်နဲ့ ၂၁၀ နဲ့ ၂၀၃ စခန်း ၂ ခုဆီသွားပြီး ရဲဘော်ထုကို ဒေါက်တာ စိန်ဝင်း မိန့်ခွန်းပြောခဲ့ပါတယ်။

ထုံးစံအတိုင်း အခင်းအကျင်းကိုသာ မှတ်မိလေ့ရှိပြီး အရေးကြီးတဲ့စကားလုံးတွေ။ သဘောတရားတွေကို မှတ်မိလေ့မရှိတဲ့ကျနော်ဟာ ဒေါက်တာ စိန်ဝင်း ဘာတွေ ပြောသွားမှန်း အတိအကျ မမှတ်မိတော့ပါ။ အကြမ်းအားဖြင့်ကတော့ တော်လှန်ရေးအင်အားစုတွေဖက်မှာ ရွေးကောက်ခံ လွှတ်တော်အမတ်တွေနဲ့ ဖွဲ့စည်းထားတဲ့ အစိုးရတရပ် ရှိလာပြီဖြစ်တဲ့အတွက် နိုင်ငံတကာထောက်ခံမှု ပိုရလာနိုင်တဲ့အကြောင်း၊ တော်လှန်ရေးရေချိန် မြင့်လာနိုင်တဲ့အကြောင်း၊ အောင်ပွဲနဲ့ ပိုနီးလာတဲ့အကြောင်းတွေ ပါမယ်လို့ထင်ပါတယ်။


ဒီမိုကရေစီကျေးရွာနဲ့ ပူးတွဲကော်မတီများ

စင်ပြိုင်အစိုးရ ၀န်ကြီးချုပ်ရဲ့ ခရီးစဉ်အပြီးမှာတော့ ကျနော်တို့စခန်းဆီ NLD ပါတီဝင်တွေ အတော်များများ ထပ်ရောက်လာပါတယ်။ အဲဒီထဲမှာ ကံပေါက်-ကလိန်အောင် ဒေသဘက်မှ ဦးသန်းညွန့် ခေါ် ဦးဖိုးအို (အခု သြစတေးလျ) နဲ့ ဦးရှိန် (အခု အမေရိကန်)၊ သရက်ချောင်းဘက်မှ ဦးလှိုင်တင်၊ ဦးမောင်အေးနဲ့ ဦးဆံသ (အမည်ရင်း မမှတ်မိတော့ပါ)။ မြိတ်-ပုလောဘက်မှ ဦးတင်မောင်တို့ကို ကျနော် အမှတ်ရနေပါတယ်။
ဦးဖိုးအိုနဲ့ ဦးရှိန်တို့ဟာ ၁၉၉၀ ရွေးကောက်ပွဲ ပြီးကတည်းက နတ်အိမ်တောင်ရှိ ကျနော်တို့ ကျောင်းသားတပ်တွေနဲ့ အတူတူ နေနေတာဖြစ်ပါတယ်။ သရက်ချောင်းအုပ်စုကတော့ ရနောင်းကနေတဆင့် ဘန်ကောက်ကိုဖြတ်ပြီး ၁၉၉၁ အစောပိုင်းမှာ မင်းသမီးစခန်းဆီ ရောက်လာတာ ဖြစ်ပါတယ်။

သူတို့နဲ့အတူ NLD ပါတီရဲ့ အရေးကြီး စာရွက်စာတမ်းတွေ ပါလာနိုင်ပေမယ့် ကျနော်တို့ ကျောင်းသားတွေ အကြား မှတ်မိနေတာကတော့ ဦးဆံသ သယ်လာတဲ့ “နယ်လှည့်ဆံသ” ပုံးကြီးပဲဖြစ်ပါတယ်။ ကျနော်တို့စခန်းက ဆံရှည်ကိုယ်တော်အားလုံး သူရဲ့လက်စွမ်းပြမှုကို ခံလိုက်ရပြီး “ဆံပင်သာ ကုန်သွားမယ်၊ ပညာက မကုန်ဘူး” ဆိုတဲ့ စကားလုံးဟာလည်း အဲဒီကာလက အတော်ခေတ်စားခဲ့ပါတယ်။
အဲဒီကာလက ကျနော်တို့ ကျောင်းသားတွေဟာ စစ်တိုက်တာကိုသာ အားသန်နေတဲ့အတွက် သူတို့နဲ့တွဲပြီး ဘာလုပ်ရမှန်း မသိပါ။ နောက်တခါ အသက်အရွယ်အရကလည်း ကျနော်တို့က ၂၀ တန်း၊ NLD ကလူတွေ က ၅၀ ကျော် ၆၀ တန်းတွေဆိုတော့ ကျနော်တို့တပ်တွေနဲ့အတူ ရှေ့တန်းလိုက်ဖို့ကလည်း သိပ်အဆင်မပြေလှပါ။ ဒီလိုနဲ့ နတ်အိမ်တောင် စခန်းဝန်းကျင်မှာခိုလှုံနေကြတဲ့ ထားဝယ်သားတွေကို စုစည်းပြီး “ကျောက်ကဒင်” ဘက်မှာ ဒုက္ခသည်ရွာတရွာ ဖြစ်ပေါ်လာပါတယ်။


ဒေါက်တာ စိန်ဝင်းတို့ အစိုးရဖွဲ့စဉ်က သတင်းဓာတ်ပုံတချို့ကို ထိုစဉ်က မာနယ်ပလောထုတ် KNU စာစောင်တွင် တွေ့ရစဉ်
အဲဒီကာလ ၁၉၉၀-၉၁ ၀န်းကျင်က မဲဆောက်ဖက်မှာ ဟွေးခလုတ်အပါဝင် ဒုက္ခသည် စခန်းတချို့ ရှိနေပြီဖြစ်ပေမယ့် ကျနော်တို့တောင်ပိုင်း ကန်ချနပူရီဘက်မှာတော့ ဘာစခန်းမှ မရှိသေးပါ။ ဒါကြောင့် ဒီလို စခန်းဆောက်တာကို ထိုင်းအာဏာပိုင်တွေက သိပ်ကြိုက်ပုံမရဘဲ စခန်းကို မီးရှို့မောင်းထုတ်တာကြောင့် စခန်းနေရာ ခဏခဏ ပြောင်းခဲ့ရပါတယ်။ နောက်ပိုင်း နတ်အိမ်တောင်စခန်းကျပြီး ရတနာဓာတ်ငွေ့ပိုက်လိုင်း စီမံကိန်းကြောင့် ကံပေါက်ဒေသခံတွေ အများအပြား ထွက်ပြေးလာပြီးနောက် မှာတော့ ဦးရှိန်တို့ ဦးစီးဆောင်ရွက်နေတဲ့ စခန်းဟာ လူဦးရေ ရာဂဏန်းအထိရှိလာပြီး “ဒီမိုကရေစီ ကျေးရွာ” အဖြစ် လူသိများလာပါတယ်။ အဲဒီနောက်ပိုင်း နတ်အိမ်တောင်စခန်း ကျသွားတဲ့အတွက် ဒီမိုကရေစီရွာဟာလည်း ကျောက်ကဒင်ကနေ လေးအိမ်စုဘက်ကို ပြောင်းခဲ့ရပါတယ်။ တခါ လေးအိမ်စုမှာ အခြေအနေ မကောင်းတော့ သုခလို့ခေါ်တဲ့ ကွမ်းချောင်းဘက်က နယ်စပ်ဂိတ်အနီးဆီ ထပ်ပြောင်းရပြန်ပါတယ်။

နတ်အိမ်တောင်ကနေ ကျနော်တို့တပ်တွေ ဆုတ်ပြီးနောက် သုခ အခြေစိုက် ဒီမိုကရေစီ ဒုက္ခသည်ရွာကို အခြေခံပြီး ရတနာဓာတ်ငွေ့ပိုက်လိုင်း စီမံကိန်းအပါဝင် နယ်မြေသတင်းစုဆောင်းရေးအတွက် အဲဒီရွာမှာ ကျနော်နဲ့ ကိုမင်းဇော်ရွှေတို့ သွားရောက် တာဝန်ထမ်းခဲ့ဖူးပါတယ်။ ရွာဥက္ကဋ္ဌ ဦးရှိန်ရဲ့ နေအိမ်မှာတည်းပြီး KNU လယ်ဒိုစိုးမြို့နယ်ဥက္ကဋ္ဌ ပဒိုရေးမွန်ဗူး (ကျနော်တို့ တောခိုကာစက ဆောင်းပါး အခန်း ၃ မှာ ဖော်ပြခဲ့တဲ့ ကဆယ်ဒိုမြို့နယ် ဥက္ကဋ္ဌအဖြစ် တာဝန်ယူခဲ့သူ)၊ ဂိတ်မှူး ပဒိုဒါးကွီးတို့နဲ့ ဆွေးနွေးကာ ကုန်သည်တွေကို မေးမြန်း သတင်းစုဆောင်းခဲ့တာ ဖြစ်ပါတယ်။ နောက်ပိုင်း ရတနာစီမံကိန်းပြီးလို့ ကန်ချနပူရီ-ထားဝယ် ကားလမ်းစီမံကိန်း နီးလာတဲ့အခါမှာတော့ သုခဒေသအပါဝင် မင်းသမီးဒေသတခုလုံးကို န၀တတပ်တွေက ထိုးစစ် ထပ်ဆင်လာတဲ့အတွက် ၁၉၉၇ မှာတော့ ဒီမိုကရေစီရွာသား အားလုံး သုခစခန်းကနေ စန်ခရပူရီမြို့အနီးက ဘန်တုံယန်း ဒုက္ခသည်စခန်းဆီ အပို့ခံလိုက်ရပါတော့တယ်။

ဒါက ဒေသခံ NLD ပါတီဝင်တွေနဲ့ ကျနော်တို့ကျောင်းသားတွေနဲ့ ပူးတွဲဆောင်ရွက်မှုအပိုင်းပါ။ နောက်တပိုင်းကတော့ ဗဟိုကနေ တာဝန်ပေးတဲ့ NCUB တပ်ပေါင်းစုမှ NLD-LA ကိုယ်စားလှယ်တွေနဲ့ ကျနော်တို့အကြား ပူးတွဲဆောင်ရွက်မှု ဖြစ်ပါတယ်။ ၁၉၉၄-၉၅ လောက်မှာ စတင်တဲ့ အဲဒီစီမံကိန်းအရ မာနယ်ပလောအခြေစိုက် NLD-LA ဗဟိုမှ ကိုယ်စားလှယ် ၂ ဦး၊ လူ့ဘောင်သစ် ဒီမိုကရက်တစ်ပါတီဗဟိုမှ ကိုယ်စားလှယ် ၂ ဦး ကျနော်တို့ မင်းသမီးဒေသဆီ ရောက်လာပါတယ်။

အဲဒီနောက် KNU မြိတ်-ထားဝယ်ခရိုင်မှ ကိုယ်စားလှယ် ၂-ဦး။ ကျနော်တို့ ABSDF မင်းသမီးဒေသမှ ကိုယ်စားလှယ် ၂ ဦး၊ အားလုံး ၈ဦးပါဝင်တဲ့ ပူးတွဲကော်မီတီတခုကိုဖွဲ့ပြီး မြိတ်-ထားဝယ် ဒေသအတွင်း နိုင်ငံရေးကိစ္စတွေကို DAB စစ်ကြောင်းတွေနဲ့အတူ ကျနော်တို့ ပူးပေါင်းဆောင်ရွက်ခဲ့ဖူးပါတယ်။
အဲဒီကာလ KNU မြိတ်-ထားဝယ်ခရိုင် ကော်မတီ ဖွဲ့စည်းပုံကတော့ ဥက္ကဋ္ဌအဖြစ် ပဒိုကွယ်ထူးဝင်း (အခု ခရိုင်ဥက္ကဋ္ဌ၊ ဗဟိုကော်မီတီဝင်၊ ငြိမ်းချမ်းရေး ကိုယ်စားလှယ်အဖွဲ့ဝင်)၊ ဒုဥက္ကဋ္ဌအဖြစ်ကတော့ တပ်မဟာ ၄ မှူး ဗိုလ်မှူးချုပ် အော်လီဗာ (အခု KNLA ဒု စစ်ဦးစီးချုပ်)၊ အတွင်းရေးမှူးက ပဒိုနီးနီ၊ တွဲဖက်အတွင်းရေးမှူးက ပဒိုကော်သောင်းတို့ ဖြစ်ပါတယ်။ ဒါပေမယ့် DAB စစ်ကြောင်းကို အဓိက တာဝန်ယူရသူက တပ်မဟာမှူး ဖြစ်တဲ့အတွက် ကိစ္စအတော်များများကို တပ်မဟာမှူးကပဲ ဦးစီးဆောင်ရွက်တဲ့ သဘောမျိုးတွေ့ရပါတယ်။

ဒီပူးတွဲကော်မီတီမှာ ကျနော်တို့နဲ့ အဓိကလက်တွဲဆောင်ရွက်ရတဲ့ KNU အရာရှိကတော့ ခရိုင် စည်းရုံးရေးဌာန တာဝန်ခံ ပဒိုသောသီ (အခု ဗဟိုကော်မီတီ) ဖြစ်ပါတယ်။ ကျနော်တို့ ABSDF ဖက်က ကိုယ်စားလှယ်တွေကတော့ တောင်ပိုင်းဒေသအတွက် တာဝန်ပေးခံရတဲ့ ဗဟိုအတွင်းရေးမှူး ကိုမျိုးဝင်း၊ သူပြန်သွားပြီးနောက် ၁၉၉၇ ဖေဖော်ဝါရီအထိ တာဝန်ယူရသူကတော့ ဗဟိုအလုပ်မှူဆောင် ကော်မတီဝင် ကိုဌေးအောင်နဲ့ သူတို့ ၂ ဦးရဲ့ လက်ထောက်အဖြစ် ဒီအဖွဲ့မှာ အချိန်ပြည့် တာဝန်ယူရသူကတော့ အဲဒီကာလ တောင်ပိုင်းဒေသ ပြန်ကြားရေးတာဝန်ခံ ကျနော်ဖြစ်ပါတယ်။

ကျနော်တို့နဲ့ လက်တွဲဆောင်ရွက်ဖို့ NLD-LA မှ ပထမဆုံး ရောက်လာသူကတော့ ဦးစိုးမြင့် (အခု နော်ဝေ) ဖြစ်ပါတယ်။ သူပြန်သွားပြီးနောက် ဦးမြင့်အောင် (ကွယ်လွန်) နဲ့ လူငယ် ၃ ဦးအဖွဲ့၊ လူ့ဘောင်သစ် ပါတီဖက်ကတော့ ကိုလှမြင့် (အခုအမေရိကန်) နဲ့ ကိုကာကာကြီးတို့ပါ။ ဒီအဖွဲ့တွေ ဗဟိုကိုပြန်သွားပြီး နောက်ပိုင်းရောက်လာတဲ့ NLD-LA ကိုယ်စားလှယ် ၂ ဦးကတော့ ကိုမင်းကိုနဲ့ ကိုအောင်ဆန်းညွန့် (အခုနော်ဝေ) တို့ ဖြစ်ပါတယ်။ သူတို့ ၂ ဦးဟာ ကျနော်တို့ မင်းသမီးစခန်းကျတဲ့ ၁၉၉၇ ဖေဖော်ဝါရီလကုန်အထိ ကျနော်တို့ တပ်တွေနဲ့အတူ ပူးတွဲတာဝန်ထမ်းခဲ့ဖူးတာ၊ မင်းသမီးကနေ ခွာစစ်ဆင်တဲ့အထိ ကျနော်တို့တပ်တွေနဲ့အတူ ထိုင်းနယ်စပ်အထိ ပါလာတာကို ကျနော် အမှတ်ရနေပါတယ်။ 
................................................................................................................

သူပုန်ကျောင်းသားတဦးရဲ့ မာရသွန်ခရီး (၂၅)

နိုင်ငံခြားဘာသာစကား သင်တန်းနဲ့ ခေတ်သစ်သဘောင်္သားများ

အုပ်ချုပ်မှုကိစ္စနည်းနည်း တည်ငြိမ်လာတဲ့အခါမှာတော့ တော်လှန်ရေးရဲ့ ပင်မသင်တန်းတွေဖြစ်တဲ့ စစ်ရေး၊ နိုင်ငံရေး၊ ဆက်သွယ်ရေး၊ကျန်းမာရေး၊ ထောက်လှမ်းရေး ပညာဆိုင်ရာ ရက်ရှည်သင်တန်းတွေအပြင် ဘာသာစကား ရက်တိုသင်တန်း အမျိုးမျိုးဖွင့်ဖို့ ကျနော်တို့ စီစဉ်ခဲ့ပါတယ်။ ပထမဆုံးဖွင်တဲ့ သင်တန်းက အင်္ဂလိပ်စာ အခြေခံသင်တန်းဖြစ်ပြီး အင်္ဂလန်မှ ကျောင်းသားတဦးက စေတနာ့ဝန်ထမ်းအဖြစ် လာသင်ပေးပါတယ်။ ဒါပေမယ့် ပထမ ၃-၄ ရက်လောက်ပဲ သင်တန်းသား ၂၀ လောက် တက်ပြီး တဖြည်းဖြည်းနဲ့ နည်းနည်း သွားတဲ့အတွက် သင်တန်းဆရာလည်း စိတ်ပျက်ပြီး ပြန်သွားပါတယ်။


၂၀၁ တပ်ရင်း ပင်လယ်ပြင်စစ်ကြောင်းမှ တပ်စိပ်တစိပ်ကို မြိတ်ကျွန်းစု ရေပြင်အတွင်း တွေ့ရစဉ်

ဒုတိယဖွင့်တဲ့သင်တန်းကတော့ ထီးထာက ကရင်အမျိုးသမီးနဲ့ လက်ထပ်ထားတဲ့ ထိုင်းကျောင်းဆရာတဦး ဖွင့်တဲ့ ထိုင်းစာသင်တန်းပါ။ A-B-C-D အပါဝင် စကားလုံး ၂၆ လုံးကို အခြေခံထားတဲ့ အင်္ဂလိပ်စာကို မြန်မာနိုင်ငံက ကျောင်းတွေမှာ ကျနော်တို့သင်ဖူးပြီးဖြစ်တဲ့အတွက် သိပ်အထူးအဆန်း မဟုတ်ပါ။ ဒါပေမယ့် ကောကိုင်၊ ခေါ်ခိုင်၊ ခေါခူးဝပ် အပါဝင် စကားလုံး ၄၄ လုံးကို အခြေခံထားတဲ့ ထိုင်းစာကတော့ မြန်မာနိုင်ငံမှာတုန်းက ကျနော် တခါမှမသင်ဖူးသလို ကြားလည်းမကြားဖူး၊ မြင်လည်းမမြင်ဖူးတဲ့အတွက် တကယ့်ကို အသစ်အဆန်း ဖြစ်နေပါတယ်။

"စ၀ါဒီခပ်” … “စဘိုင်ဒီမိုင်” … “ပိုင်-ကန်ချနပူရီ” ထက် ပိုမပြောတတ်ဘဲ ထိုင်းထဲ ခဏခဏသွားနေရတဲ့ ကျနော်အဖို့ ထိုင်းစာဟာ မတတ်မဖြစ် တတ်ထားသင့်တဲ့အတွက် မဖြစ်မနေ သင်မယ်ဆိုပြီး အားခဲထားပါတယ်။ ဒါပေမယ့် ကံကဆိုးချင်တော့ သင်တန်းက တပတ်တောင်မခံပါဘူး။ ဟွေးနန်းခေါင်နဲ့ ထီးထာကြားမှာ ထိုင်းကျောင်းဆရာ ဆိုင်ကယ်မှောက်လို့ ဆေးရုံတက်လိုက်ရတယ်ဆိုပြီး အဲဒီ သင်တန်းပျက်သွားပါတယ်။

နောက်ထပ်ဖွင့်တဲ့ သင်တန်းကတော့ မဟာမိတ်ဆံရေးမှာ မဖြစ်မနေ နေစဉ်အသုံးဝင်မယ့် ကရင်ဘာသာစကား ဖြစ်ပါတယ်။ ဒီတကြိမ်အတွက် ဆရာကတော့ အဝေးကနေ လာသူမဟုတ်။ ကျနော်တို့တပ်ရင်း ဆေးတပ်ဆွယ်မှ ဆရာခင်ဇော်ဖြစ်ပါတယ်။ ဘာကြောင့်မှန်းတော့မသိ။ ကျောင်းသားတွေက သူ့ကို သရာအီးသာလို့ ခေါ်ကြပါတယ်။

ကရင်စာဟာ ထိုင်းစာလို အသစ်အဆန်း မဟုတ်ဘူးလို့ ထင်ရပေမယ့် အသေချာ ဖတ်ကြည့်တော့ တလုံးမှ နားမလည်ပါ။ အခုနော်ဝေးမှာ ကျနော်သင်နေရတဲ့ နော်ဝေးစာနဲ့ အင်္ဂလိပ်စာ ကွာသလို ကရင်စာနဲ့ မြန်မာစာကွာတယ်လို့ ထင်မိပါတယ်။ ဘာကြောင့်လဲဆိုရင် အင်္ဂလိပ်ရော။ နော်ဝေးပါ လက်တင်စကားလုံးကို အခြေခံထားပေမယ့် အသံထွက်မတူ၊ အဓိပ္ပာယ်မတူတဲ့အတွက် ဘာသာစကား ၂ ခုဟာ နီးစပ်သလိုလိုနဲ့ အချင်းချင်း နားမလည်ကြပါဘူး။ ဒီလိုပါပဲ၊ မြန်မာနဲ့ ကရင်စာဟာလည်း သာမန်ကြည့်လိုက်ရင် အခြေခံထားတဲ့ စကားလုံးတွေက အတူတူလို့ ထင်ရပေမယ့် အသံထွက်မတူ အဓိပ္ပာယ်မတူတဲ့အတွက် အချင်းချင်း နားမလည်ကြပါဘူး။

နောက်ပိုင်းမှာ အင်္ဂလိပ်စာသင်တန်းတွေ မကြာခဏ ထပ်ဖွင့်ဖြစ်ပေမဲ့ ထိုင်းစာနဲ့ ကရင်စာကတော့ အဲဒီတကြိမ်ပဲ ဖွင့်ဖူးတယ်လို့ ကျနော်အမှတ်ရနေပါတယ်။ အဲဒီကာလက ကျနော်တို့ ကျောင်းသားတွေ အင်္ဂလိပ်စာ ကျွမ်းကျင်မှု အခြေနေကိုပြောရမယ်ဆိုရင် “ခွေးအလှည်းနင်းခံရသလို” အသံထွက် မမှန်။ ၀ါကျမမှန်တဲ့ အကျိုးအပဲ့ စကားလုံးတွေနဲ့ အလုပ်ဖြစ်အောင် မနည်းပြောနေရတဲ့ အခြေနေမျိုးပါ။
ဗဟိုနဲ့ နယ်မြေကော်မီတီမှာ တာဝန်ထမ်းစဉ်ကဆိုရင် ကျနော်တို့ စခန်းကနေ ဗဟိုနိုင်ငံခြားရေးဌာနမှာ တာဝန်ကျတဲ့ ဦးအောင်ခင် တယောက်ပဲ အင်္ဂလိပ်စကား ကောင်းကောင်းပြောတတ်တာကို တွေ့ရပြီး ကျန်ပုဂ္ဂိုလ်အားလုံး သူလိုကိုယ်လို ခွေးအလှည်းနင်းတဲ့အဆင့်ထက် မကျော်ကြပါဘူး။

ကျနော်တို့စခန်းရဲ့ အခြေနေကို ပြောရမယ်ဆိုရင်တော့ ကျနော်တို့အယင် ပထမဆုံး စခန်းကော်မီတီခေတ်က ရှေ့နေ ကိုမြင့်သိန်း (၁၉၈၉-ဖေဖော်ဝါရီမှာ လုပ်ကြံခံရသလိုလိုနဲ့ ပျောက်ဆုံးသွားသူ) တယောက်ပဲ အင်္ဂလိပ်စကား ကျွမ်းကျွမ်းကျင်ကျင် ပြောတတ်ပြီး ကျန်ကော်မတီဝင်တွေကတော့ သူလိုကိုယ်လို အဆင့်ထက် မကျော်ဘူးလို့သိရပါတယ်။ ကျနော်တို့ ကော်မတီခေတ်မှာတော့ ဆေးကျောင်းသားဖြစ်တဲ့ ကိုဝင်းမင်းက အင်္ဂလိပ်စကား အကောင်းဆုံးဖြစ်ပါတယ်။

နောက်တခါ ကံဆိုးတာလား၊ ကံကောင်းတာလား မပြောတတ်။ ကိုဝင်းမင်းဟာ ထိုင်းထဲ ခရီးသွားရင်း ထိုင်းရဲက ဖမ်းမိပြီး ထောင်ထဲမှာ ၄၅ ရက်ကျခံခဲ့ရာက ထိုင်းစကားပါ နည်းနည်းတတ်လာတဲ့အတွက် ကျနော်တို့ ကော်မီတီထဲမှာတော့ ဒီပုဂ္ဂိုလ်ဟာ ဘာသာစကား အထူးချွန်ဆုံးသူ ဖြစ်ခဲ့ပါတယ်။ ကိုဝင်းမင်း အပါအ၀င် တခြားကျောင်းသားတွေ တောမခိုခင် မြန်မာနိုင်ငံမှာတုန်းက အင်္ဂလိပ်စကား လက်တွေ့ပြောဖူးခြင်း ရှိ မရှိ အသေချာတခါမှ မမေးဖြစ်ခဲ့ပေမယ့် ကျနော်ကိုယ်တိုင်ကတော့ တောခိုပြီး နိုင်ငံခြားသတင်းထောက်တွေ၊ NGO တွေနဲ့တွေ့မှ အင်္ဂလိပ်စကားကို လက်တွေ့ပြောဖူးပါတယ်။

မြန်မာနိုင်ငံမှာတုန်းက အင်္ဂလိပ်စာကို ၅ တန်းကနေ တက္ကသိုလ်နောက်ဆုံးနှစ်အထိ ၁၀ နှစ်နီးပါး သင်ဖူးတယ်ဆိုပေမယ့် အလွတ်ကျက် သင်လာတာသာဖြစ်ပြီး နိုင်ငံခြားသားတဦးဦးနဲ့ တခါမှ လက်တွေ့စကား မပြောဖူးခဲ့ပါ။ ပြီးတော့ သင်ထောက်ကူ ပစ္စည်းတွေဖြစ်တဲ့ ဗီဒီယိုတွေ၊ စီဒီတွေ၊ ကက်ဆက်တွေလည်း မရှိတဲ့အတွက် ကျနော်တို့ကို သင်ပေးနေတဲ့ ဆရာကိုယ်တိုင် အသံထွက်မှန် မမှန်လည်း မသိပါ။ အင်္ဂလိပ်စကား လက်တွေ့ တခါမှမပြောဖူးဘဲ အင်္ဂလိပ်စာပြဆရာ ဖြစ်နေသူတွေ ထွက်တဲ့အသံကို အမှန်လို့ယူပြီး ၁၀ နှစ်နီးပါး အလွတ်ကျက်လာခဲ့တာကို နောင်တရသလိုလို ဖြစ်နေမိပါတယ်။

နောင်တရတယ်ဆိုပေမယ့် အခု အင်္ဂလန်နိုင်ငံသားတွေကိုယ်တိုင် တောထဲအထိ လာပြီး သင်ပေးပြန်တော့လည်း ကျနော်တို့ကျောင်းသားတွေက သိပ်စိတ်ဝင်တစား မရှိလှပါ။ ဘယ်လောက်အထိ စိတ်ဝင်စားမှု မရှိသလဲဆိုရင် စေတနာ့ဝန်ထမ်း လာသင်ပေးတဲ့ အင်္ဂလိပ်ကျောင်းသားတွေသာ တဦးပြီးတဦး မြန်မာလိုတတ်ပြီး ပြန်သွားကြပါတယ်။ ကျနော်တို့ ကျိုးဖိုးတွေက “ခွေးအလှည်းနင်း” တဲ့ အဆင့်က မကျော်ပါဘူး။

တခါ အင်္ဂလိပ်စာ လာပြပေးတဲ့ စေတနာ့ဝန်ထမ်း နိုင်ငံခြားကျောင်းသားတွေနဲ့ ကျနော်တို့ တောခို ကျောင်းသားတွေကြား မတူညီတဲ့အချက်ကတော့ နိုင်ငံခြားကျောင်းသားတွေက Plan နဲ့အလုပ်လုပ်ပြီး ကျနော်တို့က “မီးစင်ကြည့်က” သို့မဟုတ် “ကြည့်လုပ်ကြတာပေါ့” ဆိုတဲ့ Plan မရှိဘဲ လက်တန်းသွားတဲ့ သဘောမျိုးတွေ့ရပါတယ်။ ဆိုလိုတာကတော့ လနဲ့ချီပြီး သင်တန်းအခါခါ တက်ပေမယ့် ကျနော်တို့ တောခိုကျောင်းသားတွေဟာ အင်္ဂလိပ်စာကို မယ်မယ်ရရ မတတ်လိုက်ပါ။ ဒါပေမယ့် နိုင်ငံတကာ ကျောင်းသားတွေကတော့ ၃ လလောက် တောထဲမှာနေပြီးတာနဲ့ မြန်မာစကားနဲ့စာကို အခြေခံ ပြောတတ်၊ ရေးတတ်သွားကြတာကို တွေ့ရပါတယ်။

အဲဒီလို မြန်မာလိုတတ်သွားတဲ့ အင်္ဂလိပ်ကျောင်းဆရာတွေထဲက ထူးခြားသူတဦးကို ဖော်ပြရမယ်ဆိုရင် ၁၉၉၇ ဖေဖော်ဝါရီလ မင်းသမီးခစန်းကျတဲ့အထိ ကျနော်တို့နဲ့ အတူနေခဲ့တဲ့ အင်္ဂလန်မှ စေတနာ့ဝန်ထမ်း ကျောင်းသားတဦးဖြစ်သူ ဂျိမ်းစ် မော်စလီ (James Mawdsley) ပဲ ဖြစ်ပါတယ်။ သူဟာ ကျနော်တို့စခန်းက အပြန်မှာ မြန်မာနိုင်ငံထဲဝင်ပြီး ဆန္ဒပြတဲ့အတွက် န၀တကဖမ်းဆီးပြီး ထောင်ဒဏ်နှစ်ရှည်ချခံခဲ့ရဖူးသူ။ အဲဒီ ထောင်တွင်းအတွေအကြုံတွေကို My terror at the hands of the Burmese junta ဆိုပြီးဆောင်းပါး ရေးသားခဲ့ပါသေးတယ်။

ကျောင်းသားတွေဘက်ကို ပြန်ကောက်ရမယ်ဆိုရင်တော့ ကျောင်းသားအားလုံး အင်္ဂလိပ်စာကို စိတ်မ၀င်စားဘူးလို့တော့ ယတိပြတ် ပြောလို့မဖြစ်ပါဘူး။ အတော့်ကို အနည်းစုလေးကတော့ Dictionary ကိုတောင် အလွတ်ကျက်တဲ့အထိ စိတ်ဝင်စားတာမျိုး ကျနော်တွေ့ဖူးပါတယ်။ ကျနော်ကိုယ်တိုင်လည်း Dictionary ထဲက စာလုံးတွေကို တနေ့ ၁၀ လုံး အလွတ်ကျက်မယ်ဆိုရင် တလ အလုံး ၃၀၀ ရမယ်။ တနှစ်ဆိုရင် စာလုံး ၃၀၀၀ ကျော်တတ်မယ်ဆိုပြီး စီမံကိန်းချ လုပ်တဲ့အဖွဲ့ထဲ ပါခဲ့ဖူးပါတယ်။ ဒါပေမယ့် ထုံးစံအတိုင်း တပတ် ဆယ်ရက်လောက် လုပ်ပြီးရင် အဖျားရှုးသွားလေ့ရှိပါတယ်။
ထူးထူးခြားခြား ကျနော်တို့ကျောင်းသားတွေ တောတွင်းကာလ ၁၀ နှစ်နီးပါးလုံးလုံး မပျက်မကွက် လုပ်နိုင်ခဲ့တာကတော့ စာလုံးဆက် ကစားနည်း (Scrabble) ပဲ ဖြစ်ပါတယ်။ နေ့လုံးပေါက်၊ ညလုံးပေါက် ဆော့ဖူးတဲ့အချိန်တွေကို ကျနော် အမှတ်ရနေဆဲ ဖြစ်ပါတယ်။

အင်္ဂလိပ်စကားလုံးတွေ ကြွယ်အောင်ဆိုပြီး ဒီလိုကစားကြတာဖြစ်ပေမယ့် နောက်ပိုင်းမှာတော့ ကော်ဖီတခွက်ကြေး၊ နေကြာစေ့ တထုတ်ကြေးဆိုပြီး အလောင်းစား သဘောလေးနဲ့ လုပ်လာပါတယ်။ ဒါကြောင့် ဝေါဟာရ ကြွယ်ဝရေးထက် အနိုင်ရရေးဘက်ကိုသာ ဦးစားပေးခဲ့ပြီး စကားလုံးအသစ်တွေ ရှာထည့်ရေးအစား အမှတ်များများရတဲ့ စကားလုံးတွေကိုသာ ထပ်ကာထပ်ကာ ရွေးထည့်နေတာကြောင့် စကားလုံးအသစ်လည်း သိပ်မတိုးလာခဲ့ပါဘူး။

အင်္ဂလိပ်စာအတွက် ကျောင်းသားအနည်းအကျဉ်းက ဒီလို Dictionary ကို အလွတ်ကျက်တဲ့အထိ ကြိုးစားနေပေမယ့် လူများစုကြီးကတော့ ဒါကို သိပ်ကြည့်လို့ ရပုံမပေါ်ပါဘူး။ သူပုန်လုပ်ပါတယ်ဆိုမှ သေနပ်ပစ်နည်း၊ စစ်တိုက်နည်း မသင်ဘဲ အင်္ဂလိပ်စာသင်နေသူတွေကို တခုခုလွဲနေသလို အမြင်ရှိနေကြပါတယ်။ တည့်တည့်ပြောရမယ်ဆိုရင် ဒီလူတွေဟာ တောထဲမှာ မနေရဲသူ၊ ပင်ပန်းဆင်းရဲမှုဒဏ်၊ တော်လှန်ရေးဒဏ်ကို မခံနိုင်လို့ ဘန်ကောက်သွားပြီး ဒုက္ခသည် လျှောက်ချင်နေသူ၊ နိုင်ငံခြားထွက်ပြီးပညာ သင်ချင်နေတဲ့ “ပညာတတ် အချောင်သမား” အဖြစ် အမြင်စောင်းမှုတွေ ရဲဘော်ထုအကြား ဖြစ်ပေါ်နေပါတယ်။

နောက်တခါ အဲဒီကာလက ABSDF စခန်းအသီးသီးကနေ တက္ကသိုလ်ကျောင်းသား ၃၀ ကို ရွေးချယ်ပြီး နိုင်ငံခြားကို ပညာတော်သင် စေလွတ်မယ်လို့ သတင်းတခု ကျယ်ကျယ်လောင်လောင် ထွက်ခဲ့ပါသေးတယ်။ ဒီအတွက် ကျနော်တို့စခန်းက ၃ ဦး ရွေးချယ်ခံရပြီး ၁၉၉၀ နှောင်းပိုင်းမှာ စေလွှတ်မယ်လို့ သိရပေမယ့် ဒီလိုလွှတ်သင့် မလွှတ်သင့်နဲ့ ပတ်သက်လို့ ဗဟိုကော်မီတီအတွင်း သဘောထားကွဲလွဲခဲ့တာကနေ အဲဒီ အစီစဉ် ပျက်သွားတယ်လို့ဆိုပါတယ်။
ဒါပေမဲ့ အခု ဒီအကြောင်း ဆောင်းပါးရေးဖို့ အသေချာလိုက်မေး ကြည့်တဲ့အခါမှာတော့ အဲဒီသတင်းဟာ ကောလာဟလသာဖြစ်ပြီး ပညာတော်သင်စီမံကိန်းဆိုတာ တကယ်မရှိခဲ့ပါဘူးလို့ အဲဒီကာလ ဗဟိုကော်မီတီဝင်ဟောင်းတချို့က ကျနော်ကို ပြန်ပြောပြခဲ့ပါတယ်။

ဘယ်လိုပဲ ဖြစ်ဖြစ် အဲဒီကာလက တက္ကသိုလ်ကျောင်းသားတွေ အင်္ဂလိပ်စာသင်တာကို ရာဇ၀တ်မှု ကျုးလွန်သလိုမြင်ခဲ့ပြီး တက္ကသိုလ်ကျောင်သားက သေနပတ်ပစ်နည်းသင်တာကိုတော့ မှန်ကန်တဲ့ လုပ်ရပ်အဖြစ် မြင်ခဲ့မိတာတွေဟာ အခု နှစ် ၂၀ ကြာပြီးချိန်မှာတော့ မယုံနိုင်စရာတခုလို ဖြစ်နေခဲ့ပါတော့တယ်။


၂၀၁ တပ်ရင်း ပင်လယ်ပြင်စစ်ကြောင်းမှ တပ်စိတ်တစိပ်ကို ပုလောဒေသမှ ကမ်းစပ်ရွာတခုအနီး တွေ့ရစဉ်

ခေတ်သစ်သဘောင်္သားများ ပင်လယ်ပြင်မှာ သင်္ဘောမှောက်ခြင်း

ဒီလို အထွေထွေသင်တန်းတွေ၊ သဘောတရား ငြင်းခုံမှုတွေနဲ့ နေစဉ်အလုပ်ရှုပ်နေတဲ့ ကျနော်တို့ စခန်းကော်မီတီကို လှုပ်နှိုးလိုက်တဲ့ ဖြစ်ရပ်ကတော့ ပင်လယ်ပြင် စစ်ကြောင်းကနေ ၀င်လာတဲ့ အရေးပေါ် ကြေးနန်းစာပဲ ဖြစ်ပါတယ်။ ဖြစ်ပုံကတော့ ရှေ့ပိုင်း (အပိုင်း ၉ မှာ) တင်ပြခဲ့တဲ့အတိုင်း ၁၉၈၈ စက်တင်ဘာ ၁၈ ရက်နေ့မှာ စစ်တပ်က အာဏာသိမ်းပြီးနောက် မြန်မာနိုင်ငံဆီ ပထမဆုံး သွားရောက်လည်ပတ်ခဲ့တဲ့ နိုင်ငံခြားခေါင်းဆောင် ထိုင်းကာကွယ်ရေး ဦးစီးချုပ် ဗိုလ်ချုပ်ကြီး ချာဗလစ် ယောင်ချာယုဟာ သစ်ထုတ်ခွင့်၊ ငါးဖမ်းခွင့်တွေ နဝတအစိုးရနဲ့ သဘောတူချက် ရလာပါတယ်။ ဒီစာချုပ်တွေအရ ထိုင်းငါးဖမ်းလှေတွေဟာ မြိတ်ကျွန်းစုအနီး ငါးလာဖမ်းနေကြပါတယ်။

အဲဒီကာလ ကျနော်တို့ရဲ့ “ရန်သူ့လက္ခာဏာ သတ်မှတ်ချက်” အရ “စစ်အာဏာရှင်စနစ်’” ဟာ ဘုံရန်သူဖြစ်ပါတယ်။ ဒါကြောင့် အဲဒီစနစ်ကို အကောင်ထည်ဖေါ်နေတဲ့ စစ်အစိုးရ သို့မဟုတ် န၀တကို ရန်သူအဖြစ် သတ်မှတ်ထားပါတယ်။ တခါ အဲဒီရန်သူနဲ့ ပူးတွဲစီးပွားလုပ်သူတွေ၊ ရင်းနှီးမြှုပ်နှံမှု လုပ်နေသူတွေကို ရန်သူ့အားပေးအဖြစ် သတ်မှတ်ထားပါတယ်။ ဒီမူဝါဒရဲ့လုပ်ငန်းစဉ်အဖြစ် ပင်လယ်ပြင်မှာတွေ့တဲ့ ရန်သူ့အားပေးလှေကို ဖမ်းဆီးရှာဖွေဖို့၊ ကလန်ကဆန်လုပ်ရင် အရေးယူဖို့ အချက်တွေ ပါဝင်ပါတယ်။

ဒီတာဝန်တွေနဲ့ ပင်လယ်ပြင်ဆီ စစ်ကြောင်းထွက်နေတဲ့ တပ်စုမှူး ကိုကျော်ရ (၁၉၉၂ မှာ ဘန်ကောက်သံရုံး ကတဆင့် ပြန်ဝင်သွားသူ) ဦးစီးတဲ့ စစ်ကြောင်းကနေ ထိုင်းငါးဖမ်း လှေကြီးတစီးကို ဖမ်းမိထားတယ်။ ဒီလှေပေါ်မှာ န၀တနဲ့ ဖက်စပ်လုပ်ထားတဲ့ စာချုပ်တွေလည်းပါတယ်။ အဲဒါ ဘယ်လို ဆက်လုပ်ရမလဲဆိုပြီး ကျနော်တို့ စခန်းကော်မတီဆီ ကြေးနန်းဝင်လာတာပါ။

အဲဒီကာလဟာ မီဇူဟို (Mizuho) ဆက်သွယ်ရေးစက်တွေ ကျနော်တို့ ၀ယ်ထားနိုင်ပြီဖြစ်တဲ့အတွက် “ဒစ်ဒစ် ဒါဒါ” ကြေးနန်းအပြင် ရှေ့တန်းနဲ့နောက်တန်း တိုကရိုက် စကားပြောလို့ ရနေပြီဖြစ်ပါတယ်။ ဒါကြောင့် လှေကိုယ်စားလှယ်တွေ ကျနော်တို့စခန်းဆီလာပြီး အခွန်လာဆောင်ဖို့။ အခွန် မဆောင်မချင်း လှေကိုဖမ်းထားဖို့ စခန်းကော်မတီကနေ ညွှန်ကြားလိုက်ပါတယ်။

ဒါပေမယ့် လှေကိုယ်စားလှယ်တွေ ကျနော်တို့ခစန်းမှာ တကယ်တမ်း လာဆွေးနွေးတဲ့အခါမှာတော့ ရှေ့တန်းက ကိုကျော်ရတို့နဲ့ ပြောတာနဲ့ ဒီမှာလာပြောတာအကြား ကွဲလွဲမှုတွေ ရှိနေပါတယ်။ နောက်တခါ ကျနော်တို့တပ်က လှေဖမ်းထားတဲ့ကိစ္စကို လှေပိုင်ရှင်က န၀တတပ်ဆီ သတင်းပို့ပြီး စစ်သင်္ဘောတွေနဲ့ လာဝိုင်းခိုင်းတယ်လို့လည်း သတင်းတွေထွက်လာပါတယ်။ ဒီလိုနဲ့ လှေကိုယ်စားလှယ်တွေနဲ့ စခန်းကော်မတီ တာဝန်ရှိသူတွေကြား ဆွေးနွေးမှုဟာ သိပ်အဆင်မပြေပါဘူး။ ဒီကြားထဲ ပိုဆိုးတာက အဲဒီညမှာ မိုးတွေရွာပြီး ရာသီဥတုဆိုးတဲ့အတွက် ရှေ့တန်းနဲ့ စက်အဆက်သွယ် လုံးဝပြတ်သွားပါတယ်။

နောက်တနေ့ မိုးလင်းလို့ ကြေးနန်းဝင်လာတော့ န၀တ စစ်သင်္ဘောတွေ တဖြည်းဖြည်းနီးလာလို့ လှေပေါ်ကလူတွေအားလုံးကို လွှတ်ပေး။ အရေးကြီးပစ္စည်းတွေကို သိမ်း၊ ဘတ်ငွေ သန်း ၄၀ လောက်တန်တဲ့ လှေကြီးကို ဖောက်ခွဲဖျက်ဆီးပြီး ဆုတ်ပေးလိုက်ရပါတယ်တဲ့။ ကျနော်တို့လည်း ဘာမှမတတ်နိုင်တော့။ စစ်ရေးအခြေနေအရ မလုပ်မဖြစ် လုပ်လိုက်ရတဲ့ စစ်ဆင်ရေးတခုအဖြစ်သာ သဘောထား ခံယူလိုက်ရပါတယ်။

ဒါပေမယ့် ပြဿနာက အဲဒီမှာတင် ပြီးသွားတာ မဟုတ်ပါဘူး။ ဒီလှေဖောက်ခွဲတဲ့ သတင်းဟာ ဟိုးလေးတကျော် ဖြစ်သွားပြီး ထိုင်းမီဒီယာတွေမှာ ပါလာပါတယ်။ ABSDF ဗဟိုနဲ့ KNU ဗဟိုရှိရာ မာနယ်ပလောအထိ ဒီကိစ္စ ရောက်သွားပြီး အဲဒီကာလ ABSDF ဥက္ကဋ္ဌ ကိုမိုးသီးဇွန်နဲ့ DAB ဥက္ကဋ္ဌ ဗိုလ်ချုပ်မြ တို့ဆီအထိ ထိုင်းလှေ ကိုယ်စားလှယ်တွေက သွားရောက် တိုင်တန်းခဲ့တဲ့အတွက် တော်လှန်ရေး အသိုင်းအ၀ိုင်းကြားမှာလဲ ဒီသတင်းက အတော့်ကို လှုပ်လှုပ်ရှားရှား ဖြစ်သွားခဲ့ပါတယ်။


ပင်လယ်ပြင်တပ်စုမှူး ကိုကျော်ရ (အိတ်အ၀ါ လွယ်ထားသူ) အပါဝင် ကော်မတီဝင် တချို့နဲ့ တပ်မှူးငယ်တချို့ကို တပ်ရင်းညီလာခံအပြီး တွေ့ရစဉ်

အနှစ်ပြန်ချုပ်ရရင်တော့ နိုင်ငံရေး၊ စစ်ရေး အခြေနေတွေအရ လုပ်သင့်လို့ လုပ်လိုက်တဲ့ စစ်ဆင်ရေးတခု ဖြစ်ပေမယ့် ကျနော်တို့ရဲ့ အတွေ့အကြုံ နုနယ်မှုနဲ့ အကျိုးအပြစ်တွေကို သေချာ ကြိုမတွက်နိုင်မှုတွေက ဘေးထွက်ဆိုးကျိုးတွေ ဖြစ်လာစေခဲ့ပါတယ်။ လက်တွေ့ ပထ၀ီအနေထား၊ ထိုင်းနိုင်ငံနဲ့ ဆက်ဆံရေး အနေထား၊ မဟာမိတ်ဆက်ဆံရေး အနေထားတွေအရ ကျနော်တို့ စခန်းတာဝန်ရှိသူတွေနဲ့ ကိုကျော်ရတို့ အတော်လေး ကျဉ်းထဲကျပ်ထဲ ရောက်သွားခဲ့ပါတယ်။

ပင်လယ်ပြင်ထဲမှာ မဟာမိတ်တပ်တွေရဲ့ ဖိအားပေးမှု၊ ထိုင်းနိုင်ငံထဲမှာ ထိုင်းအာဏာပိုင်တွေရဲ့ ဖိအားပေးမှုတွေကို သူအတော်ခံခဲ့ရတယ်လို့ ကိုကျော်ရက သူပြန်မ၀င်ခင်မှာ ပြောပြခဲ့ဖူးတာကို ကျနော်အမှတ်ရနေပါတယ်။

 ..............................................................................................

သူပုန်ကျောင်းသားတဦးရဲ့ မာရသွန်ခရီး (၂၄)

on March 29, 2012 6:12 pm
အောက်မေ့ဖွယ် / ဧရာဝတီ။


တပ်ရင်းညီလာခံနဲ့ ကော်မီတီသစ်၊ တပ်မှူးအသစ်များ ရွေးချယ်ခြင်း

တပတ်လောက်သာ ကြာမယ်ထင်ပြီး ခေါ်လိုက်တဲ့ တပ်ရင်းညီလာခံဟာ ၁၀ ရက်ကျော်တဲ့အထိ ဆွေးနွေးစရာ မကုန်သေးဘူး ဖြစ်နေပါတယ်။ ဒီနေရာမှာလည်း ကျောင်းသားတွေနဲ့ တခြားအဖွဲ့စည်းတွေ မတူတဲ့အချက်ကို တင်ပြလိုပါတယ်။ ပြည်တွင်းမှာပဲဖြစ်ဖြစ် နယ်စပ်မှာပဲဖြစ်ဖြစ် နိုင်ငံရေးအဖွဲ့စည်းတွေ အစည်းဝေးလုပ်တဲ့အခါ ဘယ်နှရက်လုပ်မယ်၊ ဆွေးနွေးမယ့်အကြောင်းအရာက ဘာတွေဖြစ်တယ် စသဖြင့် အတိအကျ သတ်မှတ်ပြီး ၂ ရက် ၃ ရက်နဲ့ ပြတ်အောင်လုပ်လေ့ရှိပေမယ့် ကျနော်တို့ကျိုးဖိုးတွေကတော့ အဲဒီလို မဟုတ်ပါဘူး။ ဒီလို ကြိုတင်ကန့်သတ် ထားတာကို မကြိုက်ဘူး။ လွတ်လပ်စွာ ဆွေးနွေးခွင့်ပေးရမယ်ဆိုပြီး ငြင်းလိုက်ခုန်လိုက်နဲ့ ၁၅ ရက်တိတိ ကြာသွားပါတယ်။


မင်းသမီးစခန်း အတွင်းရေးမှူး ကိုမျိုးဝင်း တပ်ရင်းညီလာခံမှာ သဘာပတိအဖြစ် တာဝန်ယူနေစဉ်
ညီလာခံအတွင်း ဆွေးနွေးတဲ့ အချက်တွေထဲက အရေးကြီးတဲ့အချက်တွေအဖြစ် ကျနော် မှတ်မိ သလောက်ကတော့ ရွေးကောက်ပွဲမှာ NLD က နိုင်သွားတဲ့အတွက် NLD အစိုးရအသစ် ပေါ်လာရင် ABSDF ဘယ်လို ဆက်လက်ရပ်တည်မလဲဆိုတဲ့ နိုင်ငံရေးကိစ္စ ပါပါတယ်။ နောက်တခါ ရှေ့တန်းမှာ KNU နဲ့ ပူးတွဲလှုပ်ရှားတဲ့အခါ ကျောင်းသားတွေက ရွာရှေ့မှာ လူထုတရားဟောပွဲလုပ်။ KNU က နောက်မှာ ရွာအုပ်ချုပ်ရေးချပြီး အခွန်ကောက်နေတဲ့ကိစ္စ ကော်မတီက ဖြေရှင်းပေးပါဆိုတဲ့ မဟာမိတ် ဆက်ဆံရေးကိစ္စ ပါပါတယ်။ နောက်တခါ ပင်လယ်ပြင်ဆီ တိုးချဲ့ထိုးဖောက်ရေးကိစ္စ ပါတယ်လို့ ထင်ပါတယ်။ ဒါပေမယ့် အဲဒီလို အရေးကြီးတဲ့ကိစ္စတွေအတွက် အချိန်သိပ်ကုန်တာ မဟုတ်ဘဲ အစည်းအဝေးဆုံးဖြတ်ချက်၊ မှတ်တမ်းတင်ချက် တကြောင်းချင်းစီကို စကားလုံး စီတာကအစ သတ်ပုံ အမှားအမှန်အထိအဆုံး ညီလာခံမှာ ဆွေးနွေး ငြင်းခုန်နေတဲ့အတွက် အခုလို အချိန် ၁၅ ရက် ကြာသွားတာဖြစ်မလားလို့ ကျနော် ပြန်စဉ်းစားနေမိပါတယ်။

ဒါပေမယ့် ဒီညီလာခံအပါဝင် ABSDF ညီလာခံ အသီးသီး၊ အစည်းဝေးအသီးသီးရဲ့ ဝေါဟာရငြင်းခုန်ပွဲ၊ သတ်ပုံငြင်းခုံပွဲတွေဟာ အလားကား အချိန်ဖြုန်းရုံ သက်သက်တော့ ဖြစ်ပုံမရပါဘူး။ ဘာကြောင့်လဲဆိုရင် Federal ကို မြန်မာမှုပြုတဲ့အခါ “ဖက်-ဒရယ်မူ” လို့ ရေးမလား။ “ဖယ်-ဒရယ်မူ” လို့ရေးမလားဆိုတဲ့ “ဖက်” နဲ့ “ဖယ်” စကားလုံး ၂ လုံးအပေါ် ကျောင်းသားတွေရဲ့ ရွေးချယ်မှုပုံစံကို အထူး စိတ်ဝင်စား မိတယ်လို့ KNU ပဒိုတဦးဖြစ်သူ တပ်မဟာ ၄ ဒေသ ကျောင်းသားရေးရာ တာဝန်ခံ မန်းငြိမ်းမောင်က ပြောဖူးပါတယ်။ “ဖယ်” ဆိုတာဟာ ကျဉ်ဖယ်၊ ရှောင်ဖယ်တဲ့သဘောဖြစ်ပြီး “ဖက်” ဆိုတာက ဖက်တွယ်ခြင်း၊ တဦးနဲ့တဦး ပွေ့ဖက်ခြင်း၊ ချစ်ကြည်ခြင်းသဘောကို ဆောင်တဲ့အတွက် “ဖယ်” အစား “ဖက်” ကို သုံးတယ်လို့ ကျိုးဖိုး ဘာသာဗေဒဆရာတွေရဲ့ ရှင်းလင်းချက်ကို သူ အထူးသဘောကျမိတယ်လို့ ပဒိုမန်းငြိမ်းမောင် ပြောခဲ့ဖူးတာကို ကျနော်အမှတ်ရနေပါတယ်။

ဒီလိုငြင်းခုံမှုမျိုးစုံနဲ့ သတင်း ၂ ပတ်ကြာခဲ့တဲ့ ညီလာခံနောက်ဆုံးနေ့မှာတော့ စခန်းကော်မတီ ပြန်ရွေးတာ၊ တပ်မှူးတွေ ပြန်ရွေးတာ၊ ပြန်လည် အတည်ပြုတာတွေ လုပ်ခဲ့ပါတယ်။ အဲဒီရွေးချယ်မှုတွေအရ အရန်ဗဟိုကော်မတီနဲ့ စခန်းကော်မတီ စည်းရုံးရေးတာဝန်ခံ ကိုဌေးအောင် ဗဟိုဌာနချုပ်ဆီသွားတာကို အတည်ပြုပါတယ်။ နောက် လစ်လပ် စခန်းကော်မတီနေရာအတွက် တပ်ထောက်ဗိုလ်ကြီး ကျနော့်ကို စခန်းကော်မတီ ထောက်ပံ့ရေးတာဝန်ခံအဖြစ် ညီလာခံကနေ ရွေးချယ်လိုက်ပါတယ်။ ရန်ကုန်တက္ကသိုလ် တက်နေတဲ့ ကျောင်းသားတဦးဖြစ်သူ ထားဝယ်မှ ကိုမြင့်လွင်က တပ်ထောက်ဗိုလ်ကြီး ဖြစ်လာပါတယ်။ တပ်ရေးဗိုလ်ကြီး ကိုအေးသော် တခြားတာဝန်ထမ်းဖို့ ရှိတယ်ဆိုပြီး နုတ်ထွက်သွားတဲ့အတွက် တပ်ခွဲ ၁ မှ ဒုခွဲမှူးဖြစ်သူ ကိုပြည်ဆောင်ဦးက တပ်ရေးဗိုလ်ကြီး ဖြစ်လာပါတယ်။ ခွဲ ၁ မှ တပ်စုမှူးတဦးဖြစ်သူ ကိုမျိုးအောင် ခေါ် ဖိုးတုတ်ကြီး (၁၉၉၁-မှာကျဆုံး) က ဒု ခွဲမှူးဖြစ်လာပါတယ်။ တပ်ခွဲ ၃ မှ ခွဲမှူး ကိုမြင့်အောင် ဗဟိုဖက်ဆီ တာဝန်ပြောင်းတဲ့အတွက် ဒုခွဲမှူး ကိုဘုန်းကျော်က တပ်ခွဲမှူးဖြစ်လာပြီး တပ်စုမှူးတဦးဖြစ်သူ ကိုအောင်နိုင် (၁၉၉၄-မှာကျဆုံး) က ဒုခွဲမှူး ဖြစ်လာပါတယ်။ တပ်ရင်း အရာခံဗိုလ်ကတော့ ကိုဝင်းအောင် (အခုအမေရိကန်) ဖြစ်ပါတယ်။

ဒီနေရာမှာ စခန်းကော်မတီနဲ့ တပ်မှူးတွေ ဘယ်လို အာဏာ (တာဝန်) ခွဲဝေသလဲ ဆိုတာကလဲ စိတ်ဝင်စားဖို့ ကောင်းပါတယ်။ ကော်မတီနဲ့ တပ်မှူး ပေါင်းထားတဲ့ဖွဲ့စည်းပုံကို ဘယ်ကနေ ကော်ပီကူးထားမှန်း  ကျနော် အတိအကျမသိပေမယ့် အကြမ်းအားဖြင့်ကတော့ ကျနော်တို့အရင် တောထဲမှာ ရှိသမျှ လက်နက်ကိုင် အဖွဲ့အတော်များများ ဒီဖွဲ့စည်းပုံနဲ့ ခရီးနှင်ခဲ့တာကို ကျနော်သတိပြုမိပါတယ်။ ဥပမာအားဖြင့် ဗကပမှာဆိုရင် ခရိုင်နိုင်ငံရေးမှူးနဲ့ ခရိုင်တပ်မှူးဆိုပြီး ဗိုလ် ၂ ဦးကို ပူးတွဲတာဝန်ပေးထားပါတယ်။ KNU မှာလည်း အလားတူ ခပ်ဆင်ဆင်ပါပဲ။ ခရိုင်ဥက္ကဋ္ဌနဲ့ တပ်မဟာမှူး၊ မြို့နယ်ဥက္ကဋ္ဌနဲ့ တပ်ရင်းမှူး၊ တပ်ခွဲမှူး စသဖြင့် ဗိုလ် ၂ ဦးကို တွဲပြီးတာဝန်ပေးထားတာ တွေ့ရပါတယ်။ အလားတူ ပြည်ချစ်ခေတ်ကလည်း တပ်ရင်းနိုင်ငံရေးမှူးနဲ့ တပ်ရင်းမှူးဆိုပြီး ဗိုလ် ၂ ဦးကို တွဲပြီးတာဝန်ပေးခဲ့တယ်လို့ သိရပါတယ်။


၂၀၁ တပ်ရင်း စစ်ရေးပြကွင်းအတွင်း တန်းစီနေတဲ့ ရဲဘော်တချို့အားတွေ့ရစဉ်
ဒါကြောင့် ကျနော်တို့ ကျိုးဖိုးတပ်မတော်ဟာလည်း ကမ္ဘာမှာ ပထမဆုံး ပေါ်လာတဲ့ တခုတည်းသော တပ်မတော်လို့ ကြွေးကြော်ထားပေမဲ့ ဖွဲ့စည်းပုံကတော့ နောင်တော် သူပုန်တပ်တွေဆီကပဲ ပုံတူ ကူးထားပုံရပါတယ်။ တောတွင်းကာလ ၁၀ နှစ်တာ အတွေ့အကြုံအရ ဒီလိုစခန်းကော်မီတီနဲ့ တပ်မှူးတွေ တွဲဖက်တာဝန် ပေးထားတဲ့ခေတ်ဟာ ကျနော်တို့စခန်းအတွက် အလုပ်အဖြစ်ဆုံး ကာလတွေအဖြစ် ကျနော် အမှတ်ရနေပါတယ်။ ၁၉၉၁ နောက်ပိုင်း စခန်းကော်မီတီကို ဖျက်ပြီး တပ်ရင်းမှူးနဲ့ တပ်မှူးတွေ သက်သက်က ဦးစီးတဲ့ခေတ်မှာတော့ တပ်ရင်းမှူးမှာ အာဏာ (တာဝန်နဲ့ လုပ်ပိုင်ခွင့်) သိပ်များလာပြီး တဦးတည်းရဲ့ ဆုံးဖြတ်ချက်တွေနဲ့ အမိန့်ပေးနိုင်တဲ့ အဆင့်အထိ ရောက်သွားတာကို တွေ့ရဖူးပါတယ်။

ကော်မတီလေးဖြစ်ချင်သည်

ဒါက တပ်ရင်းရုံးရှိရာ အစည်းဝေးခန်းမထဲက ဆွေးနွေးငြင်းခုန်မှုတွေ။ အဲဒီကာလ အသုံးအနှုန်း အတိုင်းဆိုရင်တော့ “နိုင်ငံရေးအဘိဓမ္မာတွေ” ပေါ့။ ဒါပေမယ့် ရဲဘော်အများစုရှိတဲ့ ဘားတိုက်တွေမှာတော့ ဒီကိစ္စတွေကို သိပ်စိတ်ဝင်စားပုံ မပြပါ။ ဂစ်တာတွေဘာတွေနဲ့ သီချင်းဆိုသူဆို၊ ဟိုအကြောင်း ဒီအကြောင်းပွားသူနဲ့ ကော်မတီကို ဝေဖန်နေကြပါတယ်။ ရဲဘော်တွေ သီဆိုနေတဲ့ ဟောဒီသီချင်းကို နားထောင်ကြည့်မယ်ဆိုရင် အဲဒီကာလ ကော်မတီရဲ့ သြဇာကြီးပုံနဲ့ အမြင်ကပ်ခံရပုံကို ခန့်မှန်းနိုင်မယ်လို့ ထင်ပါတယ်။

“… ကော်မီတီလေး ဖြစ်ချင်သည် …
ဘန်ကောက်၊ မဲဆောက်ကို ခဏခဏသွားမည် …
ဘာဘာညာညာ ၀ယ်ခဲ့မည် …”
အဆိုတော်လွှမ်းမိုးရဲ့ “အခုတော့ ပါစပ်ရာဇ၀င်လေးတခု ဖြစ်လို့ကျန်ခဲ့ပြီ” သီချင်းထဲက မူလစာသားတွေဖြစ်တဲ့ “မှော်ဆရာလေးဖြစ်ချင်သည် … ပုံပြင်ဟောင်းကလေး အသက်သွင်းမိတော့မည် …” ကို စာသားပြောင်းဆိုထားတဲ့ ကျိုးဖိုးများရဲ့ ကော်မတီသရော်စာ သီချင်းများစွာထဲက ထင်ရှားတဲ့တပုဒ် ဖြစ်ပါတယ်။

နောက်ထပ် ထင်ရှားတဲ့ တပုဒ်ကတော့ …
“ကော်မတီအတွက်ဆို ကြက်ကိုလည်း ၀ယ်ပါမည် …
နေပါစေ ငါတို့အတွက်တော့ ပဲဟင်းနဲ့တော်ပြီ …”
ဒီသီချင်းကတော့ အခန်း ၈ မှာ ကျနော်တင်ပြခဲ့တဲ့အတိုင်း ကိုထူးအိမ်သင် ရန်ကုန်မပြန်ခင် ရေးပေးခဲ့တဲ့ “အဆုံးသတ်တိုက်ပွဲ” သီချင်းထဲက ပြောင်မြောက်လှတဲ့ မူလစာသားတွေဖြစ်တဲ့ … “နိုင်ငံတော်အတွက်ဆို အသက်ကိုလည်း ဘာမထီ … သေပစေ ခွပ်ဒေါင်းသွေးဟေ့ ရဲရဲရှေ့ကိုချီ” … ကို စာသားပြောင်းထားတဲ့ ကျိုးဖိုးများရဲ့ နောက်ထပ် ကော်မတီသရော်စာ သီချင်းတပုဒ်ဖြစ်ပါတယ်။

အဲဒီကာလဟာ စခန်းတခုနဲ့တခုအကြား ပုံမှန်ဆက်သွယ်ဖို့ ဆက်သွယ်ရေးစက်တွေ မရှိသေးပေမယ့် သီဘောဘိုးစခန်းဘက်မှာ နာမည်ကြီးနေတဲ့ အဲဒီသီချင်း ကျနော်တို့ခစန်းဆီ ဘယ်လိုကနေ ဘယ်လို ရောက်လာသလဲတော့ မသိပါ။ အဲဒီထက် ပိုဆိုးတာကတော့ ကျောင်းသားတပ်မတော်ရဲ့ သန္နိဌာန် ၄ ချက်ထဲက နောက်ဆုံးအချက်ဖြစ်တဲ့ “ဒီမိုကရေစီတော်လှန်ရေး အောင်မြင်သည်အထိ အသက်စွန့် တိုက်ပွဲဝင်သွားရန် သန္နိဌာန်ပြုပါသည်” ဆိုတဲ့ စကားလုံးကိုတောင် နောက်ပြောင်ပြီး “ဒီမိုကရေစီတော်လှန်ရေး အောင်မြင်သည်အထိ အသက်စွန့် တိုက်ပွဲဝင်သွားရန် ငါ၏မိန်းမနှင့် တိုင်ပင်ပါဦးမည်” ဆိုပြီး လှောင်ပြောင်တဲ့အထိ ကျောင်းသားတွေအကြား ဒီမိုကရေစီအခွင့်ရေးတွေ ရနေတယ်ဆိုပါတော့။

ဘယ်လိုမျိုး ဒီမိုကရေစီကြီးလဲ


၂၀၁ တပ်ရင်း တပ်ခွဲ ၃ မှူး ကိုဘုန်းကျော် (နောက်တန်း ၁၁ ဦးထဲမှ အလယ်လူ) အပါဝင် ရဲဘော် တချို့ကို ရှေ့တန်းတနေရာတွင် တွေ့ရစဉ်
ကော်မတီနဲ့ပတ်သက်ပြီး ဒီလိုလှောင်ပြောင်တဲ့ စကားလုံးတွေ ထွက်နေသလို တချို့စခန်းတွေဆိုရင် ရွေးလိုက်တဲ့ကော်မတီဟာ ၃-၄-လလောက်ပဲခံပြီး မကြာခဏ ကော်မတီရွေးရင်းနဲ့ အုပ်ချုပ်မှု မတည်ငြိမ်တဲ့ စခန်းအတော်များများ ရှိခဲ့တယ်လို့သိရပါတယ်။ ဒီလို ကော်မတီ ခဏခဏပြောင်းတာကို တောင် ဒီမိုကရေစီရဲ့ လုပ်ထုံးလုပ်နည်းအဖြစ် ကျောင်းသားတချို့က မြင်ကြပါတယ်။ ဒါပေမယ့် တချို့ကျောင်းသားတွေကတော့ ဒီမိုကရေစီ အခွင့်ရေးဆိုတာဟာ ဒီမိုကရေစီရပြီးမှသာ ကျင့်သုံးနိုင်တဲ့ အခွင့်အရေးဖြစ်ပြီး ဒီမိုကရေစီရဖို့ တိုက်ပွဲဝင်နေဆဲကာလမှာ ဒီမိုကရေစီကျင့်စဉ်အတိုင်း လုပ်လို့မဖြစ်နိုင်သေးဘူးလို့ ငြင်းချက်ထုတ်ကြပါတယ်။

ကျနော်တို့ ကျောင်းသားတွေကြားမှာ ဒီလို လွတ်လပ်စွာ သဘောထားကွဲပြီး အလွန်အကျွံ ဒီမိုကရေစီ ကျင့်သုံးကာ လွတ်လပ်စွာ ငြင်းခုန်နေကြပေမယ့် ကျနော်တို့ရဲ့မဟာမိတ် KNU နဲ့ တခြားလက်နက်ကိုင် အဖွဲ့တွေအတွက်တော့ ဒါတွေဟာ အထူးအဆန်း ဖြစ်နေပုံရပါတယ်။ လက်နက်ကိုင်အဖွဲ့ဆိုတာဟာ စစ်တပ်ဖြစ်တဲ့အတွက် တပ်မှူးက အမိန့်ပေးတဲ့အတိုင်း တသွေး တသံ တမိန့်နဲ့ သွားရမယ့်အချိန်မှာ ဒီလိုမျိုး လွတ်လပ်စွာ သဘောထားကွဲပြီး ဝေဖန်ငြင်းခုံနေကြပုံကို သူတို့တွေ နားလည်နိုင်ပုံမရပါဘူး။

ကျနော်မှတ်မိသလောက်ဆိုရင် ဒီကိစ္စတွေနဲ့ ပတ်သက်ပြီး ထီးခီးရုံးမှာတွေ့တဲ့ KNU အရာရှိ တချို့နဲ့ ကျနော်တို့ကျောင်းသားတွေကြား ဆွေးနွေး ငြင်းခုံဖူးပါတယ်။ အဲဒီကာလတွေက KNU ဟာ ၄ နှစ်တကြိမ်၊ ၅ နှစ်တကြိမ် ပုံမှန်ညီလာခံတွေ မလုပ်နိုင်တဲ့အတွက် ရာသက်ပန် ဥက္ကဋ္ဌတို့၊ အမြဲတမ်း ဗဟိုကော်မတီဝင်တို့နဲ့ စခန်းသွားနေဆဲ အချိန်ဖြစ်ပါတယ်။ ဒါပေမယ့် KNU ပဒိုတွေဖက်က ပြောတာကလည်း သူ့အမြင်နဲ့သူ၊ သူ့အတွေ့အကြုံနဲ့သူတော့ သဘာဝကျနေသလို ဖြစ်နေပြန်ပါတယ်။ “တောထဲမှာ အချိန်ကြာလာရင် ခင်ဗျားတို့သိလာလိမ့်မယ်။ လက်နက်ကိုင်တော်လှန်ရေးမှာ ခေါင်းဆောင် ခဏခဏပြောင်းလို့ ဘယ်ဖြစ်မလဲ” ဆိုပြီး ပဒိုတဦးက ပြောခဲ့ဖူးတာကို ကျနော်မှတ်မိနေဆဲ ဖြစ်ပါတယ်။

အခုနှစ် ၂၀ ကြာပြီးတဲ့အခါမှာတော့ ကျနော်တို့ကျောင်းသားတွေဟာ ဒီမိုကရေစီကို အလွန်အကျွံ ကျင့်သုံးခဲ့တဲ့ တဖက်စွန်းကိုများ ရောက်ခဲ့လေသလား။ တခြား မဟာမိတ်အဖွဲ့တွေကတော့ အဖွဲ့အစည်း တည်ငြိမ်ရေးကို ဦးစားပေးရင်းနဲ့ ရာသက်ပန် ဥက္ကဋ္ဌထားရေးဘက်ကို အစွန်းရောက်သွားခဲ့လေသလားလို့ ပြန်စဉ်းစားနေမိပါတယ်။ တချိန်တည်းမှာပဲ လက်နက်ကိုင် တော်လှန်ရေးဆိုတာဟာ အချိန်တွေကြာလာတာနဲ့အမျှ ခေါင်းဆောင်အပြောင်းလဲလုပ်ဖို့ ပိုခက်သွားတတ်သလားဆိုပြီးလည်း ကျနော်စဉ်းစားနေမိပြန်ပါတယ်။

ဒါပေမယ့် အဲဒီကာလကတော့ ဒီလိုသဘောတရားတွေကို စဉ်းစားနေဖို့ အချိန်မရပါဘူး။ ရှေ့မှာ တင်ပြခဲ့တဲ့အတိုင်း ဆန်နဲ့ရိက္ခာ အချိန်မီထုတ်ပေးနိုင်ဖို့ အပါအ၀င် နေ့စဉ်ကြုံတွေ့နေရတဲ့ ဗူးသီးဓားထိုးမှုတွေနဲ့ စခန်းကော်မတီအားလုံး အလုပ်ရှုပ်နေပါတယ်။ အဲဒီအမှုတွေထဲမှာ မနက် ၇ နာရီတိုင်း အလံတိုင်ရှေ့မှာ တန်းစီပြီး ခွပ်ဒေါင်းအလံကို အလေးပြုဖို့ ပျက်ကွက်တဲ့အမှုအတွက် ရဲဘော်တွေကို မြက်ရှင်းခိုင်းတာမျိုး၊ အမရာရွာဆီသွားပြီး အရက်ခိုးသောက်သူကို ၁၂ နာရီကြာ ထိပ်တုံးခတ်တာမျိုး၊ နောက်တခါ ညဘက် ကင်းအိပ်တဲ့အမှု၊ ကင်းသမားအတွက် ပေးထားတဲ့ ဓာတ်မီးထဲက ဓာတ်ခဲအသစ်ကို အဟောင်းနဲ့လဲပြီး ခိုးယူမှု၊ အမျိုးသမီးဘားတိုက်ကို ချောင်းကြည့်မှု၊ ရည်စားစာပေးမှု စသဖြင့် စုံနေတာပါပဲ။

အဲဒီလိုအမှုတွေထဲကမှ အများစိတ်ဝင်စားပြီး အခုချိန်အထိ ကျနော်တို့ကြား ပြောစမှတ်ဖြစ်နေတဲ့ အမှုတခုကတော့ ကျနော် မင်းသမီးစခန်းဆီ ပြန်မရောက်ခင်လေး ၁၉၈၉ ဒီဇင်ဘာလောက်မှာ ဖြစ်ပွားခဲ့တဲ့ အချစ်ဇာတ်လမ်းလေးတပုဒ်ပါ။ ရှေ့မှာပြောခဲ့တဲ့အတိုင်း တော်လှန်ရေးအစောပိုင်း ကာလတွေဟာ စည်းကမ်းတွေ အလွန်တင်းကျပ်ပြီး အဲဒီထဲမှာ ရည်းစားစာ မပေးရ၊ ရည်စားမထားရ၊ အများမမြင်နိုင်တဲ့အရပ်မှာ အမျိုးသားနဲ့ အမျိုးသမီး တဦးချင်းမတွေ့ရဆိုတဲ့ အချက်တွေလည်း ပါဝင်နေပါတယ်။ ဒီစည်းကမ်းချက်တွေအတိုင်း အတိအကျ လိုက်နာမှုရှိ မရှိ စုံစမ်းရသူကတော့ စခန်းကော်မတီ စည်းကမ်း ထိမ်းသိမ်းရေးအဖွဲ့ပေါ့ဗျာ။

ဒီလိုနဲ့ ညနေစောင်းတခုမှာတော့ လူမမြင်တဲ့ ကြခတ်ဝါးရုံတောမှာ ချိန်းတွေ့တဲ့ အတွဲတတွဲကို စည်းကမ်းထိမ်းသိမ်းရေးအဖွဲ့က ဖမ်းမိလာတယ်ဆိုပါတော့။
အဲဒီအတွဲကို ကော်မတီရုံးမှာ စစ်တဲ့အခါ စည်းကမ်းထိမ်းသိမ်းရေးအဖွဲ့က စည်းကမ်း ထိမ်းသိမ်းနေတာလား၊ အတွဲလိုက်ချောင်းနေတာလားဆိုပြီး အငြင်းပွားမှု ဖြစ်ခဲ့တယ်လို့ဆိုပါတယ်။ စည်းကမ်း ထိမ်းသိမ်းရေး အဖွဲ့ဘက်က တင်ပြတာကတော့ ဒီအတွဲဟာ စည်းကမ်းဖောက်လို့ ဒီလိုဖမ်းလာတယ်ပေါ့။ ဒါပေမယ့် ဖမ်းဆီးခံ စုံတွဲဘက်ကတော့ ဒါကို လက်မခံဘဲ “ဒါဟာ လူ့အခွင့်အရေး ချိုးဖောက်မှုဖြစ်တယ်” ဆိုပြီး ပြန်စွပ်စွဲတယ်လို့ ဆိုပါတယ်။

ပြီးတော့ အဲဒီအမျိုးသမီး ဆက်ပြောတာက “ကိုယ်ကြိုက်လို့ ကိုယ့်ရည်းစားကိုယ်တွေ့တာ ကော်မတီနဲ့ ဘာဆိုင်လဲ။  ဒီမိုကရေစီအတွက် တိုက်နေတယ်ပြောပြီး ရည်စားတောင် လွတ်လွတ်လပ်လပ် ထားလို့မရတဲ့ ဒီမိုကရေစီက ဘယ်လိုမျိုး ဒီမိုကရေစီကြီးလဲ။ ဒီ ဒီမိုကရေစီမျိုးတော့ ကျမ မလိုချင်တော့ဘူး” ဆိုပြီး ကော်မတီတွေရှေ့မှာ ငိုချလိုက်တယ်လို့ဆိုပါတယ်။ ဒီအမှုကို စိတ်ဝင်တစား နားစွင့်နေတဲ့ ရဲဘော်ထုကြားမှာတော့ ဒီသတင်းက ချက်ချင်းပြန့်သွားပြီး “ဘယ်လိုမျိုး ဒီမိုကရေစီကြီးလဲ” ဆိုတဲ့စကားလုံးက ရေပန်းစားသွားပါတယ်။

ဒီလိုနဲ့ ကျနော်မင်းသမီးစခန်းဆီ ပြန်ရောက်စအချိန်မှာ ဒီစကားလုံးက ရဲဘောထုအကြား အတွင်ကျယ်ဆုံး စကားလုံးဖြစ်နေပြီး တခုခုပြောဖို့အကွက်ဝင်တာနဲ့ “ဘယ်လိုမျိုး ဒီမိုကရေစီကြီးလဲ” ဆိုပြီး နောက်ပြောင်လေ့ရှိတာကို ကျနော်မှတ်မိနေပါတယ်။

...............................................................................................................

သူပုန်ကျောင်းသားတဦးရဲ့ မာရသွန်ခရီး (၂၃)

on March 22, 2012 6:45 pm
အောက်မေ့ဖွယ် / ဧရာဝတီ။

တပ်ရင်းညီလာခံ ခေါ်ယူခြင်းနဲ့ ရှေ့တန်းခရီးစဉ်

ဒီလိုမလွယ်တာတွေ အတော်များများကို ကြုံရပြီးတဲ့အခါမှာတော့ ရှေ့တန်း၊ နောက်တန်းက တပ်မှူးအားလုံးနဲ့ စခန်းကော်မတီဝင်တွေတွေ့ဆုံပြီး ရှေ့လုပ်ငန်းစဉ် ဆွေးနွေးမှဖြစ်မယ်လို့ စခန်းကော်မတီက ဆုံးဖြတ်လိုက်ပါတယ်။ ဒီအတွက် တပ်မှူးတွေ အစုံအညီတက်နိုင်မဲ့ တပ်ရင်းညီလာခံ ခေါ်လိုက်ပါတယ်။ အဲဒီညီလာခံ မတိုင်မီလေးမှာ ရှေ့တန်းတခါမှ မရောက်ဖူးဘဲ ဗိုလ်ဖြစ်နေတဲ့ ကျနော့်အတွက် ရှေ့တန်းသွားရေး ရှားရှားပါးပါး အခွင့်ရေးတခု ပေါ်လာပါတယ်။

ညီလာခံခေါ်ရခြင်းကိစ္စ ရှင်းပြဖို့၊ ကျည်ဆံပို့ရေး၊ မိုးကာပို့ရေး စသည်ဖြင့် အကြောင်းပြပေမယ့် တကယ်ကတော့ အထူးစစ်ကြောင်းကနေ နောက်တန်း ခဏပြန်လာပြီး ရှေ့တန်းပြန်သွားဖို့ပြင်နေတဲ့ တပ်ရေးဗိုလ်ကြီး ကိုအေးသော်နဲ့အတူ လူကြုံ၊ လှေကြုံရှိတုန်း အလည်သဘော လိုက်သွားခြင်းသာ ဖြစ်ပါတယ်။


၂၀၁ တပ်ရင်း တပ်ခွဲ ၁ နယ်မြေ ရှေ့တန်းစစ်ကြောင်းတခုကို တွေ့ရစဉ်
တော်လှန်ရေးသက်တမ်း တနှစ်ကျော်ကြာလာပြီဆိုတော့ ကျနော်တို့ ကျိုးဖိုးတွေလည်း တောခိုခါစကလို ကုန်းကြောင်းချည်း လျှောက်စရာ မလိုတော့ပါ။ တခြားတော်လှန်ရေး အဖွဲ့တွေလို ကားတွေ၊ စက်လှေကြီးတွေ၊ စီးပွားရေးလုပ်ငန်းတွေ ပိုင်ဆိုင်မှု မရှိသေးပေမယ့် လူ ၇ ယောက်လောက် စီးနိုင်တဲ့ စက်လှေငယ်တစီးတော့ ကျနော်တို့တပ်ရင်းက ပိုင်ဆိုင်နေပြီ ဖြစ်ပါတယ်။ အဲဒီလှေကိုစီးပြီး ကျနော်တို့ ခစန်းကနေ တနင်္သာရီမြစ်အတိုင်း စုန်ဆင်းလာတော့ ပထမဆုံး တွေရတဲ့နေရာက အမရာရွာပဲဖြစ်ပါတယ်။


ကျနော်တို့စခန်းနဲ့ မိနစ် ၂၀ ခန့်အကွာ တနင်္သာရီမြစ်ရဲ့ တဖက်တချက်မှာ ရှေးဟောင်းပုံစံ အိမ်တွေကိုတွေ့ရပြီး ထူးထူးခြားခြား အိမ်အများစုဟာ မြစ်ရဲ့အနောက်ဖက်ကမ်း၊ တနည်းအားဖြင့် ပြောမယ်ဆိုရင်တော့ KNU က ဆောက်ပေးထားတဲ့ ထီးထာ၊ အမိုရွာတွေလို မြစ်ရှေ့ဖက်ခြမ်း ထိုင်းဖက်ကို မီခိုဆောက်ထားတာ မဟုတ်ဘဲ မြစ်အနောက်ဘက်ကမ်း မြန်မာဘက်ကို မှီခိုဆောက်ထားတာကို သတိပြုမိပါတယ်။

နောက်တခါ အမရာမှာတွေ့ရတဲ့အိမ်တွေဟာ ထီးထာ၊ အမိုဖက်ကလို အခု ဆယ်စုနှစ်အတွင်း ဆောက်ထားတဲ့ ထိုင်းပုံစံ အိမ်သစ်တွေ မဟုတ်ပဲ ကျနော်တို့ ထားဝယ်ဘက်က အိမ်တွေလို နိုင်တီးဂွမ်တီး ဒီဇိုင်း၊ အိမ်အို၊ အိမ်ဟောင်းတွေ ဖြစ်ပါတယ်။ နောက် ဒီရွာကလူတွေအားလုံးဟာ ခရစ်ယာန် ဘာသာဝင်တွေ မဟုတ်ဘဲ မိရိုးဖလာ ဗုဒ္ဓဘာသာကိုးကွယ်သူနဲ့ နတ်ကိုးကွယ်သူတွေ များတာကို တွေ့ရပါတယ်။ အိမ်ခြေ ၅၀ ကျော်လောက်ရှိမယ်လို့ ခန့်မှန်းရတဲ့ ဒီရွာဟာ ရဲဘော်သုံးကျိပ်အဖွဲ့ အများတောင်ကြားလမ်းကနေ ၀င်မလာခင်ကတည်းက ရှိနေတဲ့ ရွာဟောင်းဖြစ်မယ်လို့ ယူဆရပေမယ့် တောထဲမှာ နေစဉ်တုန်းကတော့ ဒီလိုအရေးကြီးတဲ့ အချက်လက်တွေကို အသေချာမေးမြန်း စုံစမ်းရကောင်းမှန်း ကျနော်မသိခဲ့ပါ။

အဲဒီ ရာဇ၀င်ထဲက အမရာရွာကိုကျော်ပြီး ဆက်ဆင်းလာတော့ ပေါလိုက်တဲ့ ကျောက်ဆောင် ကျောက်တန်းတွေ။ လှေကိုခဏခဏရပ်ပြီး လမ်းဆင်းလျှောက်ရပါတယ်။ တနင်္သာရီမြစ်ဟာ သံလွင်တို့၊ သောင်ရင်းတို့လို မဟုတ်။ ရေတိမ်ပြီး ကျောက်ဆောင်တွေ ပေါတဲ့အတွက် သံလွင်-သောင်ရင်းဘက်ကလို စက်လှေကြီးတွေ သွားလို့မရ။ သစ်လုံးကို ထွင်းထားတဲ့ ထွင်းလှေကို အပေါ်မှာ သစ်ပြားနည်းနည်းထပ်ဆင့်ပြီး ဆောက်ထားတဲ့ ဒေသသုံးလှေတွေနဲ့ပဲ သွားလို့ရပါတယ်။

အဲဒီလို ဆင်းလိုက် တွန်းလိုက် သုံးခါလောက် လုပ်ပြီးချိန်မှာတော့ ရှေ့မှာကျနော်ပြောခဲ့တဲ့ ရတ်ချပူရီ-တဂိုလန်း (အခုထန်းဟင် ဒုက္ခသည်စခန်းအနီးကရွာ) ထောမမောဘက်ကနေ ၀င်ရင် အနီးဆုံးစခန်းဖြစ်တဲ့ မောထာ ကုန်သွယ်ရေးစခန်းကြီးကို တွေ့ရပါတယ်။ ထီးထာ၊ အမိုရွာတွေလိုပဲ တနင်္သာရီမြစ်ရဲ့ အရှေ့ဘက်မှာ ရွာတည်ထားတာကို တွေ့ရပြီး ထိုင်းဒီဇိုင်းတွေ ဖြစ်ပါတယ်။ ဒါပေမယ့် ဒီရွာဟာ တကယ့်ဈေးတန်းကြီးဖြစ်ပြီး ထီးထား၊ အမိုတို့ထက် များစွာ စည်ကားနေပြီး ကုန်စုံဆိုင်ကြီးတွေ၊ ဗီဒီယိုရုံတွေနဲ့ မက်သလေစခန်းနဲ့ ခပ်ဆင်ဆင်တူတဲ့ နယ်စပ်ကုန်သွယ်ရေး စခန်းထောက်ရွာကြီးတရွာအဖြစ် ကျနော် အမှတ်ရနေပါတယ်။

မောထရွာကအထွက်မှာတော့ အခြေခံ ဒေသမြို့နယ်အုပ်ချုပ်ရေးရုံး KNU စစ်ဆေးရေးဂိတ်မှာ ကျနော်တို့အားလုံး အစစ်ဆေးခံရပါတယ်။ ထီးထာ၊ ထီးခီးလမ်းနဲ့ ထိုင်းနိုင်ငံထဲကနေ အထွက်ဂိတ်တွေမှာ တဦးချင်းခရီးသွားရင်းနဲ့ KNU ဂိတ်တွေမှာ အစစ်ခံရတာကို စိတ်ထဲမှာ ကသိကအောက်ဖြစ်ပေမယ့် အထူးအထွေ ခံစားမှုမဖြစ်ခဲ့ပါ။ ဒါပေမယ့် အခုလို ယူနီဖောင်း အပြည့်အစုံ၊ လက်နက်အပြည့်အစုံနဲ့ ခရီးသွားတဲ့တပ်တခုက အရာရှိတွေကို အခြားတပ်တခုက စစ်သားလေးတွေက စစ်ဆေးတဲ့အပေါ်မှာတော့ စိတ်ထဲ အတော်ခံစားလိုက်ရပါတယ်။

KNU နဲ့ ကျနော်တို့ ABSDF ဟာ အိမ်ရှင်နဲ့ ဧည့်သည်လိုဖြစ်နေမလားပါပဲ။ KNU နယ်မြေထဲ ခရီးသွားတာအပြင် အခုလို ရှေ့တန်းထွက်တာကိုတောင် KNU ဆီက ခရီးသွားလက်မှတ်ယူရပြီး ဒီလို စစ်ဆေးရေး ဂိတ်တွေရောက်ရင် အဲဒီလက်မှတ်ကို ထုတ်ပြ အစစ်ခံရပါတယ်။ ဂိတ်တာဝန်ကျ ရဲဘော်လေးတွေရဲ့ စစ်ပုံစစ်နည်းကလည်း ကြည့်ပါဦး။ ကုန်သည်လှေကို စစ်တာထက်တောင် ကျနော်တို့လှေကိုစစ်တာက ပိုအသေးစိတ်နေပါတယ်။

“တပ်ထောက်၊ ခင်ဗျားတို့နောက်တန်းမှာ မမိုက်ပါဘူးဗျာ။ ဟိုဂိတ်မှာ အဟောက်ခံရ၊ ဒီဂိတ်မှာအတားခံရနဲ့။ ကျနော်တို့ရှေ့တန်းကိုသာ လာခဲ့စမ်းပါ။ ဘာလက်မှတ်မှ မလိုဘူး” ဆိုပြီး တပ်ခွဲမှူးတွေ၊ ဒုခွဲမှူးတွေ နောက်တန်းရောက်တိုင်း ပြောခဲ့ဖူးတဲ့စကားတွေကို အခု ဒီဂိတ်မှာ ကိုယ်တိုင်အစစ်ခံရတော့မှာပဲ ကျနော်လည်း နည်းနည်း သဘောပေါက်သလို ရှိလာပါတယ်။

တဆက်တည်းမှာပဲ သူပုန်လေး တခါဖြစ်ဖို့အရေး ဟိုလူ့ကြောက်ရ၊ ဒီလူ့ကြောက်ရလို့ အဓိပ္ပာယ်ရတဲ့ အဲဒီကာလက ကျနော်တို့ သူပုန်ပေါက်စတွေကြား နာမည်ကြီးခဲ့တဲ့ ၆၀၁ တပ်ရင်းမှူး ကိုတိုက်မောင်းရဲ့ ကဗျာ ”မိခင်၏စာမျက်နှာနှင့် မြင့်မိုရ်တောင်တမ်း ခြင်း” ထဲက စာသားတချို့ကို သွားသတိရ မိပါတယ်။

“ကံကောင်းလို့ သူပုန်လေး တခါလာဖြစ်မိ
ဟိုလူ့မျက်နှာကြည့်
သည်လူ့မျက်နှာကြည့်
ကြည့်ရ၊ ရှောင်ရ၊ ကြောက်ရ …

သူပုန် မဖြစ်လိုက်မှာစိုးလို့
ရိုရိုကျိုးကျိုး ဆက်ဆံရ
ဒေါသတွေ ရောင်းလို့ရရင်
ဘီလျံနာတောင် ဆင်ထိန်းခန့်လို့ရမယ် …”


ကျဆုံးသွားပြီဖြစ်တဲ့ တပ်ခွဲ ၁ မှူး ကိုဖေသင်ကို တပ်ရင်းက သင်တန်းဆင်းပွဲတခု တွင် တွေ့ရစဉ်
ကျဆုံးသွားပြီဖြစ်တဲ့ ရဲဘော်ကြီးတိုက်မောင်း ဘယ်နေရာမှာ ဘာတွေကြုံလို့ ဒီကဗျာကို ရေးဖြစ်ခဲ့မှန်း ကျနော်မသိပါ။ ဒါပေမယ့် ကျနော်ကြုံလိုက်ရတဲ့ ခံစားချက်နဲ့ သူ့ကဗျာထဲက စာသားတွေ ကွက်တိဖြစ်နေတာကတော့ အမှန်ပါပဲ။ ဒီလိုနဲ့ “ရောင်းလို့မရတဲ့ ဒေါသတွေကို တနင်္သာရီမြစ်ထဲ မျောချ” ပြီး ရှေ့ခရီး ဆက်နိုင်ဖို့ ကျိုးစားရပါတယ်။

အဲဒီ စစ်ဆေးရေးဂိတ်ကနေ နည်းနည်း ဆက်ဆင်းလာတော့ လှေဆက်သွားလို့ ဘယ်လိုမှ မရနိုင်တော့ဘူးလို့ ထင်ရတဲ့ ရှမ်းသုံးထောင်အကွေ့ကို ရောက်ပါတယ်။ မီတာ ၅၀ ကျော်လောက် အရှည်ရှိတဲ့ ကျောက်ဆောင်၊ ကျောက်တုံးတွေက ရေလမ်းကြောင်းကို ပိတ်ထားပြီး အဲဒီ ကျောက်တုံးတွေကြားကနေ လှေကို ခဲရာခဲဆစ် ဆွဲသွားရတဲ့နေရာ ဖြစ်ပါတယ်။ အဲဒီ ရှမ်းသုံးထောင်ကို ကျော်ပြီး နောက်တွေ့ရတဲ့ရွာက အောင်သာဝရဖြစ်ပါတယ်။ ဒီအမည်ဟာ ကရင်အမည်နဲ့ မတူတဲ့အတွက် ရှေ့မှာပြောခဲ့တဲ့ ရှမ်းသုံးထောင် ရာဇ၀င်၊ အမရာ ရာဇ၀င်တွေနဲ့ ဒီရွာဆက်စပ် နေပုံရပါတယ်။ ဒါပေမယ့် အဲဒီကာလကတော့ ရာဇ၀င်လှန်နေဖို့ အချိန်မရပါ။ (အခုတော့ အဲဒီ အောင်သာဝရရွာဟာ မြန်မာအစိုးရ စစ်ဗျုဟာတခု အခြေစိုက်ထားတဲ့ ရွာကြီးတရွာအဆင့်တောင် ဖြစ်နေပြီလို့ သိရပါတယ်)။

အဲဒီ အောင်သာဝရရွာက ဘုန်းကြီးကျောင်းမှာ တညအိပ်ပြီး ဆက်ဆင်းလာတော့ KNU တပ်ခွဲ ၄ အခြေစိုက်တဲ့ ဒေသအခေါ် ချောင်းမကြီးဆိုတဲ့နေရာကို ရောက်ပါတယ်။ ဒီနေရာမှာ ချောင်းလက်တက်တခုကို တွေ့ရပြီး အဲဒီ ချောင်းရိုးလေးကနေတဆင့် တောင်တန်းတွေကို ကျော်ပြီးဆက်သွားရင် ပြည်ခြား-ပုလောဘက်ကို ရောက်နိုင်ပါတယ်။ ချောင်းလက်တက်ကို ကျော်ပြီး ဆက်ဆင်းလာတော့ မြစ်ပြင်က နည်းနည်းပိုကျယ်လာပြီး ရှမ်းသုံးထောင်လို ကျောက်ဆောင်တွေလည်း မရှိတော့ပါ။ မြစ်ထဲမှာတွေ့ရတဲ့ လှေအမျိုးစားတွေကလည်း ပြောင်းလာတာကို ကျနော် သတိထားမိပါတယ်။ ကျနော်တို့စီးလာတဲ့ သစ်လုံးထွင်းလှေတွေအပြင် တရုတ်တုံကင်းလို လှေကြီးတွေ။ ကမ်းရိုးတန်းသွား လှေကြီးတွေကိုပါ မြင်လာရပြီး ငါးပိ၊ ငါးခြောက်၊ ကုန်မျိုးစုံတင်ကာ လှည့်ပတ် ရောင်းချနေတဲ့ ကုန်တင်လှေကြီးတွေကိုလည်း မြင်လာရပါတယ်။


စော်လ၀ချောင်းဝမှ မြိတ်မြို့ဆင်ခြေဖုံးဒေသသို့

ဒီလိုနဲ့ လှေငယ်လေးပေါ်မှာ နှစ်ရက်ခွဲလောက် အောင့်အည်းသည်းခံ စီးပြီးတဲ့အခါမှာတော့ တနင်္သာရီမြစ်နဲ့ စော်လ၀ချောင်းဆုံရာ KNU တပ်ခွဲ ၅ အခြေစိုက်စခန်းကို ရောက်သွားပါတယ်။ စော်လ၀ချောင်းဖျားမှာ ဗကပ မြိတ်ခရိုင်ဘက်က ဗိုလ်မှူးစိုးလွင် ဦးစီးတဲ့တပ်ဖွဲ့ရှိတယ်လို့ သိရပေမယ့် အဲဒီအခေါက်က ကျနော်သွားဖို့ အချိန် မရလိုက်ပါဘူး။ (ဗိုလ်မှူးစိုးလွင်ဟာ ဗကပတောခိုကတည်းက ပါလာတဲ့ လွတ်လပ်ရေးတိုက်ပွဲဝင် BIA အရာရှိဖြစ်ပြီး တနင်္သာရီတိုင်းတပ်မှူးနဲ့ ဗဟိုကော်မီတီဝင် တာဝန်တွေကိုထမ်းဆောင်ခဲ့ပါတယ်။ ၂၀၀၉ မှာ ကွယ်လွန်သွားပါတယ်။ ဗကပတိုင်း နိုင်ငံရေးမှူးက ပီကင်းပြန် ဦးစောဟန်ဖြစ်ပြီး ၂၀၀၆ ခုနှစ်မှာ ကွယ်လွန်သွားပါတယ်။)

အဲဒီကာလ KNU တပ်ခွဲ ၅ မှူးက ဗိုလ်ဂျဲနီလို့ထင်ပါတယ်။ ဗိုလ်ဂျဲနီ တပ်ခွဲရုံးရဲ့ တဘက်ကမ်းရှိ ကြီးမားလှတဲ့ သစ်သားအိမ်ကြီးပေါ်မှာ တညအိပ်ပြီးတဲ့နောက် ဆင်ငိုတောင် (မြင့်လွန်းလို့ ဆင်တောင်မတက်နိုင်ဘဲ ငိုပြီး လှည့်ပြန်သွားရတယ်လို့ အဆိုရှိပါတယ်) ဆိုတဲ့ တောင်ကြီးကို တမနက်လုံး တက်ရပါတယ်။
ဒီိတောင်ဟာ တောခိုကာစ ဆောင်ပါး အခန်း ၃ မှာ ဖေါ်ပြခဲ့တဲ့ ဗကပ-ထားဝယ်ခရိုင်ဘက်က တောင်သုံးဆယ်ထက် နှစ်ဆလောက်မြင့်မယ်လို့ ထင်ရပါတယ်။ မနက် ၇ နာရီလောက်ကတည်းက တောင်စတက်လိုက်တာ မွန်းတည့် ၁၁ နာရီလောက်မှ တောင်ထိပ်ကို ရောက်ပါတယ်။

ဒါပေမယ့် တောတွင်း သက်တမ်း တနှစ်ကျော် အတွေ့အကြုံရှိနေပြီဆိုတော့ တောခိုခါစကာလို ငိုယိုအော်ဟစ်သူ မရှိတော့ပါ။ တမနက်လုံးတက်၊ တညနေလုံးဆင်းပြီးလို့ ညနေ ၄ နာရီလောက် ရောက်တဲ့အခါ ပင်လယ်ကမ်းစပ်နဲ့ သိပ်မဝေးတော့တဲ့ မြိတ်-ထားဝယ်-ကားလမ်းပေါ်က တပို၊ ကျဲရွာတွေ အနီးဝန်းကျင်ဆီ ကျနော်တို့အုပ်စု ရောက်လာပါတယ်။
ဆင်ငိုတောင် ၀န်းကျင်မှာ တောနက်လွန်းလို့ နေရောင်တောင် ကောင်းကောင်းမမြင်ရပေမယ့် အခု ရွာတန်းနဲ့ နီးလာတာနဲ့အမျှ သစ်ပင်တောအုပ်တွေက တဖြည်းဖြည်းသေးငယ်သွားပြီး တခါတလေဆိုရင် ကျနော်တို့အုပ်စု သွားနေတာကို အဝေးက န၀တတပ်များ မြင်သွားမလားလို့ စိုးရိမ်ရလောက်အောင် တောအုပ်က ပါးလွန်းလှပါတယ်။

“ဒက် ဒက် ဒက် … ဂျိမ်း …”
တောအုပ်ပါးလွန်းလို့ စိတ်ထဲ မလုံမခြုံဖြစ်နေတုန်း သေနတ်သံတွေ ကြားလိုက်ရပါတယ်။ လူတရပ် မရှိတရှိသာမြင့်တဲ့ တောအုပ်ထဲ ကျနော်တို့အုပ်စု ခဏနားပြီး အခြေအနေကို စောင့်ကြည့်ပါတယ်။ “ကျနော်တို့လူတွေနဲ့ ရန်သူတပ် ထိပ်တိုက်တိုးတာဖြစ်မယ်။ ပူစရာမရှိပါဘူး။ ကျနော်တို့လူတွေက နယ်မြေကျွမ်းပါတယ်” လို့ ကိုအေးသော်က ပြောပါတယ်။ သူက ပူစရာမရှိဘူး ပြောနေပေမယ့် ကျနော်တို့ အင်အားက တပ်ရေးဗိုလ်၊ တပ်ထောက်ဗိုလ်နဲ့ ရုံးအဖွဲ့သား သုံးဦးပေါင်းမှ ငါးဦးတည်းရယ်။ ရန်သူနဲ့သွားတိုးလို့ မဖြစ်။ ပြီးတော့ ကျနော်တို့မှာ တယောက်ကို AK ကျည် ၅၀၀ စီလောက် သယ်လာတဲ့အတွက် ကျောပိုးအိတ်ကလည်း အတော်လေးနေပြီး ပြေးလွှားဖို့ သိပ်မကောင်းလှပါ။ ကျနော်တို့ရှေ့တန်းတပ်တွေနဲ့ ဆက်သွယ်ဖို့ ဝေါ်ကီတော်ကီကလည်း မပါပါဘူး။


ကျဆုံးသွားပြီဖြစ်တဲ့ တပ်ခွဲ ၂ မှူး ကိုသိန်းမြင့်ကျော်က တပ်ရင်းညီလာခံ အတွင်း ဆွေးနွေးတင်ပြနေစဉ်
နောက်ဆုံးမှာတော့ သေနတ်တွေကို အသင့်ပြင်ပြီး ရှေ့မှာမြင်နေရတဲ့ ရော်ဘာပင်တန်းအောက်က ရွာကို သတိကြီးစွာနဲ့ ချဉ်းကပ်ရပါတယ်။ အသံမကြားအောင် လျှို့ဝှက်ဝင်လာပါတယ်ဆိုမှ ရွာအ၀င်ဝလည်း ရောက်ရော ခွေးကဟောင်လိုက်တာ လွန်ပါရော။ ဘာမှမတတ်နိုင်။ ရွာသား နှစ်ဦးကို လမ်းပြခေါ်ပြီး ကျနော်တို့တပ်တွေရှိရာ ရွာဆီကို ပို့ခိုင်းရပါတယ်။ “ကြည့်လုပ်နော်ကိုယ့်ဆရာ၊ လူမှားပြီး အပစ်ခံနေရဦးမယ်” ဆိုပြီး ကျနော်ကပြောတော့ သူပိုင်ပါတယ်ဆိုတဲ့သဘောနဲ့ ကိုအေးသော်က လက်ကာပြပါတယ်။ ဒီလိုနဲ့ ရော်ဘာတောတွေအတိုင်း လျှောက်၊ ကားလမ်းကူးပြီးတော့ နောက်တရွာမှာ ကျနော်တို့ တပ်တွေနဲ့တွေနဲ့ ချောချောမောမောသွားတွေ့ပါတယ်။

“ဘာမှမပူနဲ့ တပ်ထောက်။ ဒီကောင်တွေအင်အားက ၂၀ တောင်မပြည့်ဘူး။ သူ့လူနာသူသယ်ပြီး ပြန်ပြေးသွားပြီ” ဆိုပြီး စစ်ကြောင်းမှူး ကိုဂွမ်ရှိက တွေ့တွေ့ချင်း ကျနော်မျက်နှာကိုဝကြည့်ပြီး ရှင်းပြပါတယ်။ ဒီတော့မှ “ငါ့မျက်နှာမှာ ကြောက်ရိပ်များ ပေါ်နေသသလားမသိဘူး” ဆိုပြီး ဗိုလ်ကြီးအိနြေ္ဒကို အမြန် ပြန်ဆည်လိုက်ရပါတယ်။

တကယ်က ဒီလိုရှေ့တန်းမှာ ရင်ဆိုင်တိုက်ပွဲဖြစ်တာနဲ့ ကျနော်ကြုံဖူးတဲ့ ကော့မူးရာက ခံစစ်သေတိုက်ပွဲ ပုံသဏ္ဍန်ချင်းက ဘာမှမဆိုင်။ ခံစစ်သေမှာက ရန်သူ့နေရာ၊ မိမိနေရာ အတိအကျ သိထားပြီး ကတုတ်ကျင်းထဲ နေရာယူပစ်တဲ့အတွက် ဘာမှသိပ်ပူစရာမလို။ ဒါကေမယ့် ဒီလိုရှေ့တန်းမှာကတော့ ရန်သူ့သတင်း ကြိုရမထားဘူးဆိုရင် အခုလို စစ်ကြောင်းသွားရင်းနဲ့ ထိပ်တိုက်တိုးပြီး သူပစ်ကိုယ်ပစ်၊ သူဆုတ် ကိုယ်ဆုတ်နဲ့ နယ်မြေကျွမ်းသူ နေရာယူမြန်သူက အသာစီးရလေ့ရှိပါတယ်။

ဒီလိုတိုက်ပွဲဖြစ်ပြီးရင် တိုက်ပွဲနေရာကနေ အမြန်ရှောင်၊ ရွာထဲမှာ စခန်းမချနဲ့ဆိုပြီး ကျနော် ကြားဖူးနားဝရှိပေမယ့် ကျနော်တို့ ကျိုးဖိုးတပ်သားတွေကတော့ အေးအေးဆေးဆေးပါပဲ။ တိုက်ပွဲဖြစ်တဲ့ရွာရဲ့ နောက်တရွာကိုဆုတ်ပြီး ရွာထဲမှာပဲ စခန်းချ ညအိပ်လိုက်ပါတယ်။ ရွာသားတွေကလည်း ကြောက်လန့်ပုံမပြ။ ကျောင်းသားတွေကို ထမင်းချက်ကျွေးရတာကိုတောင် ပျော်နေသလို မြင်နေရပါတယ်။ နောက်ပိုင်းမှ သိရတာကတော့ ဒီရွာတန်းတလျှောက်မှာ ဒီလိုတိုက်ပွဲဖြစ်တာဟာ အထူးအဆန်း မဟုတ်တော့ဘဲ အမြဲတမ်းလိုလို ဖြစ်လေ့ရှိတယ်လို့ သိရပါတယ်။

ဒီဒေသကို ပပြင်ခွင်လို့ ကျနော်တို့ကခေါ်ဆိုပြီး တပ်ခွဲ ၁ အခြေစိုက်လှုပ်ရှားတဲ့ အဓိကနေရာဖြစ်ပါတယ်။ အဲဒီကာလ စစ်ကြောင်းမှူးက ကိုဂွမ်ရှိဖြစ်ပြီး တပ်ခွဲမှူး ကိုဖေသင်နဲ့အတူ အင်အား ၆၀ ကျော်လောက် ရှိမယ်လို့ ထင်ပါတယ်။ နောက်တရက်မှာတော့ အဲဒီရွာကနေထွက်ပြီး ယာယီရှေ့တန်း ရုံးခန်းဖွင့်ထားတဲ့ တခြားရွာတခုကို ထပ်ပြောင်းရပါတယ်။ ထားဝယ်-မြိတ် ကားလမ်းအရှေ့ဘက်ခြမ်း တောင်ကုန်းလေးပေါ်က ဘုန်းကြီးကျောင်းမှာ ရုံးခန်းဖွင့်ထားတာကို တွေ့ရပြီး ဒေသခံလူထုက ကျောင်းသားတွေကိုလည်း ဘုန်းကြီးလိုပဲ သဘောထားပြီး ရိက္ခာနဲ့စားစရာတွေ လာလှူထားတာ တွေ့ရပါတယ်။ အဲဒီ ၀န်းကျင်မှာ ဒူးရင်းခြံတွေရှိတာ၊ ဒူးရင်းသီးကို မုန်းအောင် စားခဲ့ရဖူးတာကို ကျနော် အမှတ်ရနေပါတယ်။

ရှေ့တန်းရုံးခွဲမှာ တရက်နား၊ ပြီးတော့ တပ်ရင်းညီလာခံ ခေါ်ရခြင်းအခြေအနေ၊ နောက်တန်းက အခြေအနေ၊ ဗဟိုဘက်က အခြေပနေ၊ ရွေးကောက်ပွဲရလဒ် နောက်ဆက်တွဲ အခြေပနေ၊ လက်တလော နိုင်ငံရေး အခြေကနေတွေကို ကျနော်နဲ့ ကိုအေးသော်က ရဲဘော်ထုကို ရှင်းပြခဲ့ပါတယ်။ နောက်တရက်မှာတော့ စစ်ကြောင်းနဲ့အတူ ထားဝယ်-မြိတ် ကားလမ်းပေါ်က ရွာစဉ်တွေကို လမ်းလျှောက်ပြီး စည်းရုံးရေးတရား ဟောခဲ့ပါတယ်။ ဒီလို လွတ်လပ်စွာ သွားနေတာကို ကြည့်ရင်းနဲ့ ခွဲမှူးတွေ၊ ဒုခွဲမှူးတွေ တပ်ရင်း ပြန်ရောက်ရင် ပြောလေ့ရှိတဲ့ “ခင်ဗျားတို့ နောက်တန်းက မမိုက်ပါဘူးဗျာ။ ဟိုလူ့ကြောက်ရ ဒီလူ့ကြောက်ရနဲ့။ ကျနော်တို့ ရှေ့တန်းကိုသာ လာခဲ့စမ်းပါ” ဆိုတဲ့စကားနဲ့ ဘာကြောင့် သူတို့နောက်တန်းမှာ ကြာကြာ မနေချင်ကြတာလဲ ဆိုတာကို ကျနော် ပိုပြီး သဘောပေါက်လာပါတယ်။

ရှေ့တန်းမှာ စစ်မြေပြင်ကင်းထောက်မှုကို ဘယ်လိုလုပ်ရတယ်၊ ရှေ့ပြေးကင်းသမား လေးဦးက ဘယ်လို ပွိုင့်ထွက်ရတယ်၊ စစ်ကြောင်းမှူးနဲ့ ရုံးအဖွဲ့က ဘယ်နားမှာ နေရတယ်၊ ဆက်သွယ်ရေးသမား၊ ဆေးတပ်သားနဲ့ ရုံးအဖွဲ့ကို ဘယ်လိုခေါ်ထားရမယ် စသဖြင့် ရှေ့တန်းတခါမှ မရောက်ဖူးတဲ့ တပ်ထောက်ဗိုလ်ကြီး ကျနော့်ကို စစ်ကြောင်းမှူးကြီး ကိုဂွမ်ရှိက လက်ချာရိုက်ခဲ့တာကိုလည်း မှတ်မိနေဆဲဖြစ်ပါတယ်။ နောက်တခါ လူ ၅၀ ကျော်သာရှိတဲ့ ကျနော်တို့တပ်ဖွဲ့ ကားလမ်းတလျှောက် စစ်ကြောင်း ချီလာတာကို မြင်တဲ့ရွာသားတွေက အင်အား ၁၀၀ ကျော်ရှိတယ်လို့ ထင်ကြာတာကိုလည်း ကျနော် ထူးထူးခြားခြား အမှတ်ရနေပါတယ်။

ယူနီဖောင်း အပြည့်အစုံ၊ လက်နက် အီးကွေးမင့်အပြည့်အစုံပါတဲ့ လူတန်းကြီးဟာ တဦးနဲ့တဦး ၂ လံ အကွာစီလောက် နေရာယူပြီး တန်းစီလျှောက်လိုက်တော့ ရွာဦးကနေ ရွာပြင်အထိ ရှည်သွားတဲ့သဘော။ လူ ၅၀ ကျော်ကို ၁၀၀ ကျော်လို့ မြင်ရတဲ့သဘောတွေကိုလည်း ကျနော် လေ့လာခွင့်ရခဲ့ပါတယ်။
အဲဒီ ရှေ့တန်းမှာ သတင်း ၂ ပတ်ခန့်ကြာပြီး အပြန်မှာတော့ ကျနော်နဲ့အတူ တပ်ခွဲ ၁ မှ ကိုဖေသင် အပါအ၀င် တပ်မှူးတွေ အတော်များများ ပြန်ပါလာပါတယ်။

ဒီညီလာခံဟာ တပ်ရင်းမှူးကနေ တပ်စိပ်မှူးအထိပါတဲ့ ကျနော်တို့တပ်ရင်း သက်တမ်း ၁၀ နှစ် ၀န်းကျင်ကာလမှာ အဲဒီတခါပဲ အစုံအညီလုပ်ဖြစ်ခဲ့ဖူးတဲ့ ညီလာခံလို့ ထင်ပါတယ်။ ကျနော်တို့ တပ်ရင်းဟာ အင်အား ၃၀၀ ကျော်ရှိတဲ့အတွက် ကျောင်းသားနည်း ကျောင်းသားဟန် တပ်ရင်းဖွဲ့စည်းပုံ အပြည့်ဖွဲ့နိုင်တဲ့ တပ်ရင်းဖြစ်ပါတယ်။ တပ်စိပ်တစိပ်မှာ ၁၁ ဦး၊ တပ်စုတစုမှာ ၃၃ ဦး၊ တပ်ခွဲတခွဲမှာ ၁၂၀ ၀န်းကျင်နဲ့ တပ်ခွဲ ၃ ခွဲ ဖွဲ့စည်းပုံအပြည့်နဲ့ နောက်တန်းလခြုံရေး တပ်စုတစုပါ ဖွဲ့ထားနိုင်ခဲ့ပါတယ်။

အဲဒီစာရင်းအရ ရှေ့တန်းကလာတဲ့ တပ်မှူး ၄၀ နီးပါး၊ ဆက်သွယ်ရေးတပ်ဆွယ်၊ ဆေးတပ်ဆွယ်၊ ထောက်လှမ်းရေးတပ်ဆွယ်နဲ့ နောက်တန်းတပ်မှူးများ၊ စခန်းကော်မတီဝင်များပါ အားလုံးပေါင်းလိုက်တော့ ကိုယ်စားလှယ် ၆၀ လောက်အထိ ရှိသွားတဲ့ညီလာခံကြီး ဖြစ်သွားပါတယ်။

...............................................................................................................

သူပုန်ကျောင်းသားတဦးရဲ့ မာရသွန်ခရီး (၂၂)


နယ်မြေစိုးမိုးရေးနဲ့ တောတွင်းအုပ်ချုပ်ရေး

အဲဒီကာလ ကျနော်တို့တပ်တွေ လှုပ်ရှားတဲ့နေရာတွေကတော့ မြောက်ပိုင်းမှာဆိုရင် နတ်အိမ်တောင်စခန်းမှာ အခြေစိုက်ပြီးမွန်ပြည်သစ်ပါတီနဲ့ KNU နယ်စပ် နတ်ကြီးစင်၊ ရာဖူး၊ ကံပေါက်၊ ကလိန်အောင်ကနေ ထားဝယ်မြို့ အရှေ့ဘက်ရှိ မေတ္တာကျေးရွာနားအထိကို ဘိုင်သိန်းမြင့် ဦးဆောင်တဲ့ တပ်ခွဲ (၂) က တာဝန်ယူထားပါတယ်။ မေတ္တာ၊ ဖေါင်းတောဒေသကနေ ဘန်းချောင်းဒေသ၊ သရက်ချောင်းဒေသ၊ ပလောက်၊ ပြည်ခြားအထိကို ကိုဘုန်းကျော် ဦးဆောင်တဲ့ တပ်ခွဲ (၃) က တာဝန်ယူထားပါတယ်။ ပြည်ခြား၊ ထမင်းမစားကနေ မြိတ်မြို့အနီးက ပပြင်၊ ကျွဲကူးဒေသတွေအထိကို ကိုဖေသင် ဦးဆောင်တဲ့ တပ်ခွဲ (၁) က တာဝန်ယူထားပါတယ်။ (မြိတ်အောက်ပိုင်းနဲ့ တနင်္သာရီဒေသမှာတော့ တပ်ရင်း ၂၀၃ က လှုပ်ရှားနေပါတယ်)။


(၂၀၁) တပ်ရင်း တပ်ခွဲ (၂) မှ ကျောင်းသား စစ်သည်တချို့ကို ရေး-ထားဝယ် ကားလမ်းပေါ်တွင် တွေ့ရစဉ်
တကယ်ကတော့ ကျနော်တို့ ကျောင်းသားတပ်တွေ လှုပ်ရှားနေတဲ့ဒေသဟာ KNU တပ်မဟာ (၄) လှုပ်ရှားဒေသ သို့မဟုတ် အဲဒီကာလ ကျနော်တို့အခေါ် “အခြေခံဒေသ” တွေ ဖြစ်တဲ့အတွက် နေရာအတော်များများမှာ ABSDF-KNU ပူးတွဲ လှုပ်ရှားကြတာ ဖြစ်ပါတယ်။
ကျောင်းသားတွေရဲ့ အားသာချက်ကတော့ အရင်ရှိပြီးသား KNU အုပ်ချုပ်ရေးနယ်မြေ အနက်ရောင်ဒေသ၊ နှစ်ဖက်တပ်တွေ ရောက်လေ့ရှိတဲ့ အညိုရောင်ဒေသတွေကို ကျော်ပြီး မြို့ပြအနီးက အဖြူရောင်ဒေသလို့ခေါ်တဲ့ ကျေးလက်ဒေသဆီ ထိုးဖောက် စည်းရုံးနိုင်ခဲ့ခြင်း ဖြစ်ပါတယ်။

အဲဒီကာလက ကျနော်တို့ရဲ့ စကားလုံးအတိုင်း ဆိုရင်တော့ “ကျေးလက်ကိုအခြေခံ မြို့ပြကိုဝန်းရံ” ပေါ့။ ထားဝယ်မြို့ပေါ်က ခလရ (၂၅) တပ်ရင်းကို လက်နက်ကြီးနဲ့ ၀င်ပစ်နိုင်ခဲ့ပြီး ထားဝယ်နဲ့ ၆ မိုင်အကွာ၊ ကျနော်တို့ တောစခိုစဉ်က ဖြတ်လာခဲ့ဖူးတဲ့ ရှင်မုတ္တီးရွာအထိဝင်ပြီး စည်းရုံးရေးတရား ဟောနိုင်ခဲ့တာတွေဟာ ထင်ရှားတဲ့ သာဓကတွေ ဖြစ်ပါတယ်။
နောက်တခါ ရေဖြူမြို့နယ်အလွန် နှမ်းကျဲကျေးရွာကနေ ရေးမြို့နယ်အ၀င် မလွဲတောင်အကြား ရေး-ထားဝယ် ကားလမ်းတလျှောက် မိုင် ၆၀-၇၀ ခန့်၊ သရက်ချောင်းမြို့နယ် အောက်ပိ်ုင်းကနေ မြိတ်မြို့အ၀င်နားအထိ မိုင် ၁၀၀ နီးပါးအရှည် ထားဝယ်မြိတ် ကားလမ်းပေါ်က ကျေးရွာတွေအားလုံးနီးပါးကိုလဲ KNU-ABSDF (နောက်ပိုင်းမှာတော့ DAB စစ်ကြောင်း) ပူးတွဲတပ်တွေက ထိမ်းချုပ်ထားနိုင်ခဲ့ဖူးပါတယ်။

ဒါ့အပြင် ကျနော်တို့ရဲ့ အမာခံရှေ့တန်း အခြေစိုက်စခန်းတွေဖြစ်တဲ့ ပြည်ခြား၊ လိပ်ဥသောင် ရွာတွေကနေတဆင့် ပင်လယ်ပြင်အထိထွက်ပြီး ထားဝယ်ကနေ ကော့သောင်ကြား ရေပြင်တလျှောက်ကိုလည်း ထိမ်းချုပ်ထားနိုင်တဲ့ ကာလတွေရှိခဲ့ဖူးတာကို ကျနော်မှတ်မိနေပါတယ်။

ကျနော်ဟာ နယ်မြေကော်မီတီမှာ တနှစ်ခန့် တာဝန်ထမ်းဖူးတယ်ဆိုပေမယ့် အထက်က လူတွေရဲ့ထုံးစံအတိုင်း ကျနော်တို့နဲ့ ရဲဘော်ထုကြား တိုက်ရိုက်ဆက်ဆံဖူးတာမျိုး မရှိသလောက်ပါပဲ။ ဒါပေမယ့် အခု တပ်ရင်း (၂၀၁) ရဲ့ တပ်ထောက်ဗိုလ်ကြီးတာဝန် ယူရတဲ့အခါမှာတော့ ရဲဘော်ထုရဲ့နေ့စဉ်လိုအပ်ချက်ကို ဖြည့်ဆည်းပေးရတာတွေ၊ အထွေထွေ အုပ်ချုပ်ရေးကိစ္စတွေနဲ့ အတော့်ကို အလုပ်ရှုပ်လာပါတယ်။ ရိက္ခာကို ၇ ရက်တခါ ထုတ်ပေးရပြီး အဲဒီလိုထုတ်တဲ့နေ့ဆိုရင် တမနက်လုံး မအားပါဘူး။

အဲဒီကာလ ရိက္ခာခွဲတမ်း နှုန်းထားတွေကတော့ ရဲဘော်တဦးအတွက် တနေ့ဆန် ၃ ဗူး (နို့ဆီဗူးခွက်နဲ့)၊ ဆား အကန့်အသတ်မရှိ၊ ငါးပိ၊ ဆီ၊ ပဲ၊ ငရုတ်သီး၊ ကြက်သွန်တို့ကတော့ အကန့်အသတ်နဲ့ အနည်းအကျဉ်းသာ ထုတ်ပေးနိုင်ပြီး ဟင်းလျာအတွက် ငွေတပြားမှ မပေးနိုင်ပါ။ ဒါဟာ BCG ကနေ မင်းသမီးစခန်းအတွက် တလတလ ဘတ်ငွေ ၅ သောင်း၊ ၆ သောင်းလောက်အထိ လှူဒါန်းနေတဲ့ အချိန်မှာရတဲ့ ခွဲတမ်းဖြစ်ပြီး နောက်ပိုင်းမှာတော့ အလှူငွေ ကျဆင်းတာနဲ့အမျှ ရိက္ခာခွဲတမ်းကလည်း တဖြည်းဖြည်း ထပ်နည်းသွားပါတယ်။

တပတ် ၁၀ ရက်လောက်နဲ့ တော်လှန်ရေးအောင်မယ်ထင်ပြီး တောခိုလာတဲ့ ကျနော်တို့ဟာ ဒီလို မလောက်ငှတဲ့ ရိက္ခာတွေကို တောထဲမှာ တွေ့သမျှ သစ်သီးသစ်ရွက်တွေ၊ ၀ါးမျှစ်တွေနဲ့ ပေါင်းစပ်၊ တောထဲမှာ တွေ့သမျှ တောကောင်တွေ၊ ငှက်တွေ၊ မျောက်တွေ၊ ခွေးတွေ၊ ကြောင်တွေ၊ မြွေတွေ၊ ကင်းတွေ၊ တောက်တဲ့နဲ့ ကင်းခြေများပါမကျန် စားလို့ရသမျှ စားစရာတွေကို ဖြစ်သလိုစားပြီး ၁၀ နှစ်နီးပါး ရှင်သန်နိုင်ခဲ့တဲ့ဘ၀တွေဟာ အခု နော်ဝေးနိုင်ငံလို တနေ့ခရိုနာ ငွေ ၁၀၀ (၁၈ ဒေါ်လာနီးပါး) စားစရိတ်အဖြစ် အသုံးပြုတဲ့နိုင်ငံက လူတွေသာဆိုရင် ကျနော်တို့လို မရှင်သန်နိုင်ဘဲ အားလုံးအဟာရ ပြတ်ပြီး သေကုန်မလားလို့တောင် စဉ်းစားနေမိပါတယ်။

BCG ကနေ တလ ၅ သောင်းကျော် ရတယ်ဆိုတာကလည်း ကျနော်တို့လက်ထဲ ငွေသားတွေ ပေးသွားတာမျိုး မဟုတ်ပါ။ ထောင်ဂဏန်းလောက်ကိုပဲ စီမံခန့်ခွဲမှုစရိတ်အဖြစ် ငွေသားထုတ်ပေးပြီး ကျန်တာ အားလုံးကိုတော့ သူတို့ကိုယ်တိုင်လိုက်ပြီး ကန်ချနဘူရီမှာ ရိက္ခာတွေ ၀ယ်ပေးသွားတာဖြစ်ပါတယ်။ နောက်ပိုင်းမှ ပြန်သိရတာကတော့ ဒီလိုငွေသားပေးလိုက်ရင် ကျောင်းသားတွေဟာ အဲဒီငွေကို ရိက္ခာမ၀ယ်ဘဲ လက်နက်ဝယ်မှာစိုးလို့၊ သူတို့ရဲ့အလှူငွေဟာ လူသားချင်းစာနာတဲ့ အကူညီသာဖြစ်တဲ့အတွက် စစ်ဘက်မှာ အသုံးပြုခွင့် မရှိဘူးလို့ သိရပါတယ်။

ဒါပေမယ့် အဲဒီကာလကတော့ လူသားချင်းစာနာတဲ့ အကူညီလား၊ ဘာအတွက်ပေးတဲ့ အကူညီလည်း စဉ်းစားဖို့ အချိန်မရ။ သူတို့ဝယ်ပေးခဲ့တဲ့ ရိက္ခာတွေကို ပြန်ရောင်းပြီးဖြစ်စေ၊ တခြားနည်းနဲ့ဖြစ်စေ ရသမျှငွေတွေစုပြီး လက်နက်ဝယ်ရေးကိုပဲ အဓိကဦး စားပေးခဲ့ပါတယ်။
တနည်းအားဖြင့်ပြောမယ်ဆိုရင်တော့ ကျနော်တို့ဟာ သူပုန်စစ်သားကြီးတွေ၊ သူပုန်တပ်မတော်တွေလို့ ကိုယ်ဖာသာ ကြေညာထားပေမယ့် နိုင်ငံတကာအလှူရှင်တွေနဲ့ သတင်းထောက်တွေရဲ့ အမြင်မှာတော့ ကျနော်တို့ဟာ စစ်တပ်ရဲ့ဖိနှိပ်မှုကို မခံနိုင်လို့ နယ်စပ်ဆီထွက်ပြေးလာတဲ့ ကျောင်းသားဒုက္ခသည်လေးတွေလို့ပဲ သဘောထားပုံရပါတယ်။ ဒါကြောင့်လည်း ဘယ်နိုင်ငံကမှ လက်နက်နဲ့စစ်ရေး အကူညီမပေးဘဲ ရိက္ခာ၊ ဆေးဝါးနဲ့ စာအုပ်စာတမ်းတွေပဲ လာပေးနေတာ ဖြစ်ပုံရပါတယ်။


(၂၀၁) တပ်ရင်း မင်းသမီးစခန်းတွင် စစ်သင်တန်းတက်နေသော ကျောင်းသား ကျောင်းသူတချို့
တခါ ကျနော်တို့ ကျောင်းသားတွေကြားမှာလည်း နိုင်ငံတကာဘက်က အဲဒီလိုအမြင် ရှိနေတဲ့အပေါ် သဘောထား ၂ မျိုး ရှိနေပုံရပါတယ်။ ကျနော် မှတ်မိသလောက်ဆိုရင် အဲဒီကာလဟာ Asiaweek မဂ္ဂဇင်းရဲ့ အအောင်မြင်ဆုံး ကာလတွေဖြစ်ပြီး အဲဒီမဂ္ဂဇင်းထဲက Eyewitness ကဏ္ဍဟာ ရေပန်းစားပါတယ်။ တောခိုကျောင်းသားတွေ အကြောင်း ဓာတ်ပုံတွေ Eyewitness မှာ အပတ်စဉ်လိုလို ပါရှိခဲ့ပြီး သီဘောဘိုးစခန်းရောက် ဘုန်းတော်ကြီးတပါး AK 47 ကိုင်နေပုံ၊ မင်းသမီးစခန်းမှ ရဲမေတချို့ ၁၀ ပေ လောက်အမြင့်ရှိတဲ့ သစ်ပင် ၂ ပင်ကြားက ကြိုးတန်းပေါ်တွားသွားပြီး စစ်ရေးလေ့ကျင့်နေပုံတွေဟာ အဲဒီကာလက အတော်ထင်ရှားခဲ့ပါတယ်။

အဲဒီပုံတွေကိုကြည့်ပြီး “ကောင်းလိုက်တဲ့ပုံတွေကွာ။ ငါတို့ရဲ့လက်နက်ကိုင်တိုက်ပွဲကို ကမ္ဘာသိအောင် ဆက်လုပ်ရမယ်” လို့ ဗဟိုနဲ့ နယ်မြေကော်မတီ ခေါင်းဆောင်တချို့က ပြောဆိုဖူးပါတယ်။ ဒါပေမယ့် တချို့ကတော့ “ပြဿနာပဲ၊ သေနတ်ကိုင်ထားတဲ့ပုံတွေ မီဒီယာမှာ ပေါ်တင်ကြီးပါလာရင် ဒုက္ခရောက်လိမ့်မယ်၊ နိုင်ငံတကာအလှူတွေ လျော့သွားနိုင်တယ်” လို့ စိုးရိမ်မှုနဲ့ ပြောကြတာကိုလည်း ကျနော်အမှတ်ရနေပါတယ်။

ကျောင်းသားတပ်မတော်ဆိုတာ ကမ္ဘာမှာ တခုပဲရှိတယ်

ဒါက ရိက္ခာနဲ့ လက်နက်အပိုင်းပါ။ အုပ်ချုပ်ရေးဘက်ကို ပြန်လှည့်ရမယ်ဆိုရင်တော့ တပ်ထောက်တာဝန် ယူနေတဲ့ ကျနော်ရော၊ စခန်းကော်မတီတာဝန်ယူနေတဲ့ ပုဂ္ဂိုလ်တွေရော အားလုံးဟာ အခု တန်းစီပြီး ဆန်လာထုတ်နေတဲ့ ရဲဘော်တွေနဲ့ အတန်းတူတူ၊ အသက်အရွယ် အတူတူနီးပါးတွေ ဖြစ်တဲ့အတွက် ပေးအပ်ထားတဲ့ တာဝန်အပေါ် ရဲဘော်ထုက လေးစာအသိမှတ်ပြုဖို့၊ အမိန့်နာခံဖို့အရေးဟာ အတော်အချိန်ယူခဲ့ရပါတယ်။ တပ်ဖွဲ့ဝင်အများစုကြီး ဒီလို သက်တူ၊ ရွယ်တူ၊ အတန်းတူတွေ ဖြစ်နေတာကိုက ကျောင်းသားတပ်မတော်ရဲ့ထူးခြားချက်ဖြစ်တယ်လို့ ကျနော်ထင်ပါတယ်။

ဘာကြောင့်လဲဆိုရင် ကျနော်တို့အရင် တောခိုခဲ့တဲ့ ဟိုး လွတ်လပ်ရေးခေတ်ဦးကာလ ဗကပ (ဗမာပြည်ကွန်မြူနစ်ပါတီ) ခေတ်ကနေ ပြည်ချစ်ခေတ်အထိ၊ အခုကျနော်တို့ရဲ့ မဟာမိတ် KNU အပါဝင် တိုင်းရင်းသားလက်နက်ကိုင် အဖွဲ့အားလုံးမှာ အသက်ကြီးသူတွေ၊ ၀ါကြီးသူတွေက သူတို့ရဲ့ နောက်လိုက်တပည့်တွေကို ဦးဆောင်ပြီး တောခိုလာကြတာဖြစ်ပါတယ်။
ဥပမာအားဖြင့် ဗကပဆိုရင် လွတ်လပ်ရေးလှုပ်ရှားမှု ကာလကတည်းက ဖွဲ့စည်းထားတဲ့ ပါတီကြီးဖြစ်ပြီး အဲဒီကနေ ပါတီအလိုက် တောခိုလာတာဖြစ်ပါတယ်။

အလားတူ ပြည်ချစ်လွတ်မြောက်ရေးတပ်ဦးဆိုရင်လည်း ၀န်ကြီးချုပ်ဟောင်းဦးနု၊ ကာကွယ်ရေးဦးစီးချုပ်ဟောင်း ရဲဘော်သုံးကျိပ်ဝင် ဗိုလ်လက်ျာတို့လို အစဉ်လာကြီးတဲ့ ပုဂ္ဂိုလ်တွေက ဦးဆောင်ပြီး တောခိုလာတဲ့အဖွဲ့စည်းဖြစ်ပါတယ်။ KNU ဆိုရင်လည်း စောဘဦးကြီးကနေ အခု ဗိုလ်ချုပ်မြအထိ အစဉ်အလာရှိတဲ့ပုဂ္ဂိုလ်တွေကနေ မျိုးဆက်အလိုက် ဦးဆောင်လာတဲ့ သက်ကြီးဝါကြီး အဖွဲ့တွေဖြစ်လို့ အုပ်ချုပ်ရေးကိစ္စမှာ ကျနော်တို့လောက် မခက်ခဲဘူးလို့ ထင်မိပါတယ်။

ဒါပေမယ့် ကျနော်တို့ ကျိုးဖိုးတပ်မတော်မှာတော့ ဒီလိုမဟုတ်။ အုပ်ချုပ်ရေးအတွေ့အကြုံနဲ့ပတ်သက်ပြီး ၀န်ကြီးချုပ်တွေ၊ ကာကွယ်ရေးဦးစီးချုပ်တွေကို မဆိုထားနဲ့ ရွာသူကြီးလုပ်ဖူးသူတောင် ပါမလာဘူးလို့ ထင်ပါတယ်။ တကယ်လို့ သူကြီးပါလာရင်လည်း အဲဒီလူက သူကြီးလို့ ပြောရဲမှာမဟုတ်ဘူး။ ဘာကြောင့်လဲဆိုရင် မဆလမှာ တာဝန်ထမ်းခဲ့သူအားလုံးကို ကျောင်းသားတွေက အမြင်ကပ်နေလို့ ဖြစ်ပါတယ်။ ဆိုတော့ ကျနော်တို့ အားလုံးနီးပါးဟာ အသက် ၂၀ ကျော်ကာစ လူငယ်တွေ၊ တက္ကသိုလ်က ဘွဲ့ရခါစ၊ ဘွဲ့ရခါနီးပုဂ္ဂိုလ်တွေ။ စိတ်ဓာတ်အရရော၊ ရုပ်ပိုင်း ဆိုင်ရာအရရော ကိုယ်ထက်တော်သူတောင် ကိုယ့်လောက်မတော်ဘူးဆိုပြီး သွေးနားထင်ရောက်နေချိန်မှာ တောခိုလာတဲ့လူတွေဆိုတော့ အားလုံးဗိုလ်တွေချည်း ဖြစ်နေပါတယ်။

“မဆလကို မကြိုက်လို့ တောခိုလာပါတယ်ဆိုမှ ခင်ဗျားက မဆလစတိုင်နဲ့ အမိန့်လာပေး နေပြန်ပြီ” ဆိုပြီး တိုးတိုးတမျိုး၊ မကြားတကြားတမျိုး မကြာခဏ ကျနော်အပြောခံရဖူးပါတယ်။ “ကျောင်းသားတပ်မတော်ဆိုတာ ကမ္ဘာမှာ တခုပဲရှိတယ်၊ ဘယ်အဖွဲ့နဲ့မှ မတူနိုင်ဘူး၊ လွတ်လပ်တဲ့တပ်မတော် ဖြစ်တယ်၊ တင်းကျပ်တဲ့ စည်းကမ်းတွေမလိုဘူး” လို့ ပြောဆိုပြီး ထုတ်သမျှ စည်းမျဉ်းစည်းကမ်းတွေကို မလိုက်နာနိုင်ဘူးလို့ လုပ်နေသူတွေကိုလည်း တွေ့ရဖူးပါတယ်။

ကျနော်မှတ်မိသလောက်ဆိုရင် အဲဒီအချိန်ထိ တောထဲမှာ ပေးခဲ့သမျှ သင်တန်းတွေထဲမှာ စစ်သင်တန်းနဲ့ နိုင်ငံရေးသင်တန်းလောက်ပဲ ရှိသေးပြီး အုပ်ချုပ်မှုအတတ်ပညာ သင်တန်းပေးတယ်လို့ တခါမှမကြားမိသေးပါ။ နိုင်ငံရေးပညာနဲ့ အုပ်ချုပ်ရေးပညာ ခပ်ဆင်ဆင်လို့ထင်ရပေမယ့် တကယ်ကတော့ မတူပါဘူး။ နိုင်ငံရေးသဘောတရား သိပ်တော်တဲ့လူတွေ အုပ်ချုပ်ရေးကိုင်တဲ့အခါ အဆင်မပြေတာတွေ၊ လူအများစုနဲ့ အဆင်ပြေအောင် မနေတတ်တဲ့ နိုင်ငံရေးသမားတွေကို ကျနော်တွေ့ဖူးပါတယ်။

ဒီလိုနဲ့ အုပ်ချုပ်ရေးပညာ လေ့လာမှဖြစ်မယ်ဆိုပြီး စာအုပ်စာတမ်းတွေ လိုက်ရှာတော့ ဒေါက်တာမောင်မောင်ရေးထားတဲ့ “စီမံခန့်ခွဲမှု အတတ်ပညာ” ဆိုတဲ့စာအုပ်ကို ရှေ့မှာပြောခဲ့တဲ့ တပ်ရင်းစာကြည့်တိုက်မှာ သွားတွေ့ပါတယ်။


စစ်အာဏာသိမ်း တနှစ်ပြည့် ဆန္ဒပြပွဲ မင်းသမီးစခန်းတွင် ကျင်းပနေစဉ်
ဒါပေမယ့် စိတ်ဓာတ်တွေ သိပ်တက်ကြွလွန်းနေတဲ့ ကျနော်တို့ဟာ လူနဲ့စာ၊ သို့မဟုတ် မဆလ သမ္မတတာဝန် ထမ်းခဲ့ဖူးတဲ့လူနဲ့ အဲဒီလူရဲ့အတတ်ပညာကို သီးခြားစီ ခွဲမြင်နိုင်စွမ်းမရှိဘဲ မဆလ သမ္မတဟောင်း ရေးတဲ့စာအုပ်ဆိုရင်တော့ မဆလစနစ်လိုပဲ ဆိုးလိမ့်မယ်လို့ ကောက်ချက်ဆွဲလိုက်ပါတယ်။ စာအုပ်ထဲမှာပါတဲ့ ပညာရပ်ဆိုင်ရာကိစ္စတွေကို အသေချာမလေ့လာတော့ဘဲ စာရေးသူရဲ့အမည်ကို ကြားတာနဲ့ပဲ အဲဒီစာအုပ်ဟာ ပယ်စာရင်း ၀င်သွားပါတော့တယ်။

“အဲဒါကြီးနဲ့တော့ မဖြစ်ဘူးထင်တယ် ဟေ့လူ။ မဆလကို တော်လှန်ဖို့ ထွက်လာသူတွေကို မဆလ သမ္မတ ရေးထားတဲ့ စာအုပ်ကိုင်ပြီး သွားအုပ်ချုပ်ရင် ပြဿနာတက်လိမ်မ့ယ်” ဆိုပြီး ကျနော်တို့ အုပ်ချုပ်ရေး ကိုင်ရသူတွေကြား ငြင်းခုန်ကြတာကိုလည်း အမှတ်ရနေပါတယ်။ “အဲဒီစာအုပ်တွေ မလိုပါဘူးကွာ။ အုပ်ချုပ်ရေးမှူးကောင်းဆိုတာ ကိုယ်တိုင်ဘာမှ တတ်စရာမလိုဘူး။ တတ်ထားသူတွေကို စနစ်တကျ ခိုင်းတတ်ဖို့ပဲလိုတယ်” လို့ ပြောသူတွေလည်း ရှိပါတယ်။

ဒါက အုပ်ချုပ်ရေးနဲ့ သဘောတရား အပိုင်းပါ။ ဒါပေမယ့် စစ်ရေးအပိုင်းမှာတော့ ကျနော်တို့ ကျိုးဖိုးတွေဟာ န၀တတပ်ရဲ့ ဖွဲ့စည်းပုံနဲ့ အမိန့်နာခံမှုကို အားကျနေပြန်ပါတယ်။ မဆလ၊ န၀တ တပ်ထွက်တွေပေးတဲ့ စစ်သင်တန်းကို KNU ကပေးတဲ့ စစ်သင်တန်းထက် ပိုအလေးထားတာကို ကျနော်တွေခဲ့ရပါတယ်။ အဲဒီကာလက အသုံးများတဲ့ စကားလုံးအတိုင်းဆိုရင်တော့ “သဘောတရားပါတဲ့ အမိန့်နာခံမှု” အပေါ်အခြေခံထားတဲ့ တပ်မတော်မျိုးကို တည်ဆောက်ရမယ်လို့ ကျောင်းသားတွေကခံ ယူထားပါတယ်။

ဒီလိုနဲ့ ကျနော်တို့ ကျိုးဖိုးတပ်မတော်ဟာ ရှေ့မှာတင်ပြခဲ့တဲ့ နောင်တော်သူပုန်တပ်မတော် အသီးသီးလို နိုင်ငံတကာဆီကလည်း စစ်ဖက်ဆိုင်ရာအကူညီ ဘာမှမရ၊ ရန်ပုံငွေလည်းမရှိ၊ အခွန်ကောက်ဖို့ နယ်မြေလည်းမရှိ၊ ဘာဆိုဘာမှကို မရှိတာပါ။ စားဖို့အတွက် ရိက္ခာကို အလှူရှင်ဆီက အလှူခံ၊ စစ်တိုက်ဖို့ သေနတ်ကို KNU ဆီက ၀ယ်ယူ၊ တောင်းယူ။ ဒါမှမဟုတ် ရှေ့တန်းမှာရှိတဲ့ န၀တ စခန်းတွေ၊ ရဲစခန်းတွေကို ၀င်သိမ်းပြီးရအောင်ယူ။ ပို့ဆောင်ဆက်သွယ်ရေးအတွက် ယာဉ်တွေကို သူများဆီက အကူညီတောင်း။

ဒီလို ဘာမှမရှိတဲ့ တပ်မှာ ရှေ့ကရဲဘော်တွေ ပြောခဲ့တဲ့ စကားလုံးအတိုင်းဆိုရင် “ကမ္ဘာမှာ တခါမှ မပေါ်ဖူးသေးတဲ့ ပထမဆုံး ကျောင်းသားတပ်မတော်” မှာ ဗိုလ်လုပ်ပြီး နေ့စဉ် တပ်ရင်းလည်ပတ်ရေး ကိစ္စတွေကို တကယ်တမ်း ဦးစီးဆောင်ရွက်တဲ့အခါ တကယ့်ကို မလွယ်ပါဘူးခင်ဗျာ။
.............................................................................................................

သူပုန်ကျောင်းသားတဦးရဲ့ မာရသွန်ခရီး (၂၁)

on March 8, 2012 6:06 pm
အောက်မေ့ဖွယ် /ဧရာဝတီ။

စခန်းကော်မတီသစ်နဲ့ မင်းသမီး-အမာရာ

ကန်ချနပူရီကနေ မင်းသမီးစခန်းဆီ ကျနော် ရောက်တဲ့အချိန်မှာ စခန်းကော်မတီက အသစ် ဖြစ်နေ ပါပြီ။ ရှေ့ပိုင်းမှာပြောခဲတဲ့ကိုမင်းအောင်၊ ကိုဌေးအောင်တို့ခေတ် မဟုတ်တော့။ မော်လမြိုင်တက္က သိုလ် နောက်ဆုံးနှစ် သမိုင်းကျောင်းသားတဦးဖြစ်သူ ကံပေါက်ဒေသမှ ကိုအောင်သန်းဝင်းက ဥက္ကဋ္ဌ (နောက်ပိုင်း ဗဟိုတွဲဖက် အတွင်းရေးမှူး၊ အခု အမေရိကန်တွင် နေထိုင်)၊ ဒု ဥက္ကဋ္ဌကတော့ ဖွဲ့စည်းပုံအရ တပ်ရင်းမှူး ဖြစ်လာမယ့်သူ ကို ပေးမှာဖြစ်တဲ့အတွက် တပ်ရင်းမှူးရွေးပွဲကို စောင့်နေဆဲကာလ ဖြစ်ပါတယ်။

(စခန်းကော်မတီဝင် ၈ ဦးကို ရဲဘော်ထုရဲ့ဆန္ဒမဲနဲ့ တိုက်ရိုက်ရွေးချယ်ပြီး တပ်ရင်းမှူးကိုတော့ ကော်မတီ ရဲ့တင်ပြချက်အပေါ် အခြေခံကာ ဗဟိုစစ်ကော်မရှင်က အတည်ပြုခန့်အပ်ပါတယ်)။

မင်းသမီးဒေသရောက် ကျောင်းသားတွေရဲ့ ပထမဆုံး တပ်တည်နေ ရာ မောင်တော်စခန်းအား ၁၉၈၉ ခုနှစ် အစောပိုင်းက တွေ့ရပုံ
အတွင်းရေးမှူးအဖြစ် စက်မှုတက္ကသိုလ်နောက်ဆုံးနှစ် ကျောင်းသားဖြစ်သူ ထားဝယ်မှ ကိုမျိုးဝင်း (အခု လက်ရှိ ABSDF ဗဟို ဒုဥက္ကဋ္ဌ၊ DAB အတွင်းရေးမှူးအဖြစ် တာဝန် ထမ်းနေဆဲ)၊ တွဲဖက်အတွင်းရေးမှူး ကတော့ ဖွဲ့စည်းပုံအရ ဒု တပ်ရင်းမှူး ဖြစ်လာသူကို ပေးရ မှာဖြစ်ပါတယ်။ ကော်မတီဝင်တွေထဲမှာတော့ ပုလောမှ ကျောင်းဆရာ ဦးဟန်လင်း က  ပြန်ကြားရေးတာဝန်ခံ၊ ကံပေါက်မိုင်းမှ ၀န်ထမ်း ကိုဉာဏ်စိုး က ထောက်ပံ့ရေးတာဝန်ခံ၊ ကံပေါက်မိုင်းကပဲ အင်ဂျင်နီယာ ကိုသိန်းဆောင်က ဘဏ္ဍာရေးတာဝန်ခံ၊ မြိတ်မြို့မှ ကျောင်း ဆရာ ကိုဂွမ်ရှီက စည်းကမ်းထ်ိမ်းသိမ်းရေးတာဝန်ခံ၊ ဆေး တက္ကသိုလ် ကျောင်းသား ကိုဝင်းမင်းက ကျန်းမာရေးတာဝန်ခံ၊ အရန်ဗဟိုကော်မတီ ၀င်ဖြစ်သွားတဲ့ ကိုဌေးအောင်က ဗဟိုကို မသွားရသေးတဲ့အတွက် စခန်းစည်းရုံးရေး တာဝန်ခံအဖြစ် ဆက်လက်တာဝန်ယူ ထားဆဲလို့ မှတ်မိနေ ပါတယ်။


ကျနော် ပြန်ရောက်တဲ့အချိန်ဟာ တပ်ရင်းမှူးနေရာအတွက် အပြိုင်အဆိုင် မဲဆွယ်နေတဲ့ကာလဖြစ်ပြီး တချို့ရဲဘော်တွေကတော့ ရှေ့တန်းထွက်နေကြပြီဖြစ်ပါတယ်။ ကျနော်ပြန်မရောက်ခင် စခန်းကော်မတီက လုပ်ထားတဲ့ ရွေးချယ်မှုတွေအရ ကျနော့်ကို တပ်စုမှူးအဖြစ် တာဝန်ပေးထားပြီး ကျနော်တို့ စတင်တောခိုရာ ဘန်းချောင်းဒေသမှာ တာဝန်ယူဖို့ နေရာချပေးထားပါတယ်။ အဲဒီကာလ ကျနော့်တပ်ခွဲမှူးက ကိုမြင့်အောင် (နောက်ပိုင်း ဗဟိုရုံးအဖွဲ့မှူး၊ အခု နယူးဇီလန်)၊ ဒုခွဲမှူးက ကိုဘုန်းကျော် (နောက်ပိုင်း ၂၀၁ ရဲ့ နာမည် အကြီးဆုံး တပ်မှူးဖြစ်လာသူ၊ အခု အမေရိကန်)၊ တပ်စုမှူးတွေအဖြစ်ကတော့ ကျနော်၊ ကိုမင်းဇော်သူ (နောက်ပိုင်းမှာ ဒုရင်းမှူးဖြစ်လာပြီး ၁၉၉၃ နှောင်းပိုင်းမှာ ကိုဇော်မင်းနဲ့အတူ ရနောင်းမှာ လုပ်ကြံခံရ သလိုလိုနဲ့ ပျောက်ဆုံးသွားသူ) နဲ့ ကိုခင်မောင်သိန်း (ပြန်ဝင်) တို့ဖြစ်ပြီး ကျနော်တို့ တပ်ခွဲနံပါတ်က အမှတ် ၃ ဖြစ်ပါတယ်။

အလားတူ နတ်အိမ်တောင်ဘက် တာဝန်ကျတဲ့ တပ်ခွဲ ၂ မှူးက ကိုသိန်းမြင့်ကျော် ခေါ် ဘိုင်သိန်းမြင့် (၁၉၉၇ ပင်လယ်ပြင်တိုက်ပွဲအတွင်း ကျဆုံး)၊ ဒုခွဲမှူးက ကိုတင်ထွန်း (ပြန်ဝင်) တို့ ဖြစ်ပါတယ်။ မြိတ်-ပုလောဘက် တာဝန်ကျတဲ့ တပ်ခွဲ ၁ မှူးကတော့ ကိုဖေသင် (၁၉၉၁ မှာ ကျဆုံး)၊ ဒု ခွဲမှူးက ကိုပြည်ဆောင်ဦး (ပြန်ဝင်) တို့် ဖြစ်ပါတယ်။ တပ်ခွဲမှူးနဲ့ တပ်ရေး၊ တပ်ထောက်အဆင့်အထိ စစ်ဖက်တာဝန်တွေကို စခန်းကော်မတီက တာဝန်ယူခန့်အပ်ပြီး တပ်ရင်းမှူးနဲ့ ဒုရင်းမှူးကိုတော့ စခန်းကော်မတီရဲ့တင်ပြချက်နဲ့ ဗဟိုစစ်ကော်မရှင်က အတည်ပြု ခန့်အပ်မှာဖြစ်တဲ့အတွက် အခုလို စောင့်ဆိုင်းနေရတာဖြစ်ပါတယ်။

အဲဒီကာလ တပ်ရေးဗိုလ်ကြီးကတော့ ရန်ကုန်တက္ကသိုလ်မှာ တက်နေတဲ့ ပုလောမြို့မှ ကိုအေးသော် (အခု အမေရိကန်)၊ တပ်ထောက်ဗိုလ်ကြီးကတော့ စက်မှုတက္ကသိုလ် စတုတ္တနှစ်ကျောင်းသား၊ ထားဝယ်မြို့မှ ကိုမျိုးသိန်း (အခု ကနေဒါ)၊ ထောက်လှမ်းရေး ဗိုလ်ကြီးက မော်လမြိုင်တက္ကသိုလ် တတိယနှစ် ဓာတုဗေ ဒ ကျောင်းသား၊ ထားဝယ်မှ ကိုသောင်းညွန့် (အခုထိ နယ်စပ်မှာရှိနေဆဲ) တို့ ဖြစ်ပါတယ်။

အမရာစခန်းရဲ့ အခင်းအကျင်းက မောင်တော်ထက်တော့ အများကြီး သာပါတယ်။ ရှေ့ပိုင်းမှာ တင်ပြခဲ့တဲ့ ထီးထာ KNDO ကုန်းကနေ တနင်္သာရီ မြစ်ရိုးတလျှောက် ဖောက်ထားတဲ့ သစ်မှောင်ခိုလမ်း အတိုင်း လျှောက်လိုက်တာနဲ့ သမိုင်းဝင် အများတောင်ကြားလမ်းထိပ်မှာ ကျနော်တို့ ကျောင်းသားစခန်း ကို တွေ့ရမှာဖြစ်ပါတယ်။ အရင်ကတော့ ဒီနေရာဟာ အမရာရွာက ဘုန်တော်ကြီးကျောင်းဟောင်း ရှိတဲ့နေရာဖြစ်ပြီး KNU ကနေ ကျောင်းသားတွေကို ဒီမှာနေရာချပေးတဲ့အတွက် “အမာရာ ကျောင်း သားစခန်း” ဆိုပြီး ဖြစ်လာတာလို့ သိရပါတယ်။

စခန်းနေရာဟာ တနင်္သာရီမြစ်ဘေး တောင်ကုန်းလေးပေါ်မှာ ရှိနေတဲ့အတွက် မောင်တော်စခန်း လို နွေရာသီမှာ ရေပြတ်တဲ့ပြဿနာအတွက် ဘာမှပူစရာမလိုတော့။ နောက်တခါ အပေါ်ဘက် ဘန်းချောင်း၊ ကွမ်းချောင်းရှိရာ ထားဝယ်-ရေဖြူ ဒေသကနေ တနင်္သာရီမြစ် ပင်လယ်ထဲရောက်တဲ့ မြိတ်-တနင်္သာရီဒေသအထိ တနင်္သာရီ မြို့ရိုးတလျှောက်ကို အသုံးပြုပြီး ပြည်တွင်းရေကြောင်း ခရီးသွားနိုင် ပါတယ်။ KNU နဲ့ သစ်မှောင်ခို ကုမ္ပဏီတွေ ဖောက်ထားတဲ့ ကားလမ်းကြမ်းကို အသုံးပြုပြီး နယ်စပ်နဲ့ ထိုင်းနိုင်ငံထဲ ကုန်ကြောင်းဆက်သွယ်ရေးတွေကို အလွယ်တကူ ဆောင်ရွက်နိုင်တဲ့နေရာ တခုဖြစ်ပါတယ်။

ရှိပြီးသား ဘုန်ကြီးကျောင်းဟောင်းကို ပြန်လည်ပြုပြင်ပြီး တပ်ရင်း ခန်းမအဖြစ် အသုံးပြုနေတာတွေ့ရပါ တယ်။ အဲဒီဘေးက ဘုန်ကြီးကျောင်း စတိုခန်းကိုတော့ စာကြည့်တိုက်အဖြစ် ပြန်လည်စုဖွဲ့ထားတာ တွေ့ရပါ တယ်။ အဲဒီမှာ သခင်သန်းထွန်းရဲ့ နောက်ဆုံးနေ့များ၊ အရှေ့ကနေ၀န်း ထွက်သည့်ပမာ၊ ဘုံဘ၀မှာဖြင့် အပါအ၀င် မြန်မာ့တော်လှန်ရေးအကြောင်း စာအုပ်တွေ၊ ရဲဘော် ချေ (Ernesto “Che” Guevara)၊ ကက် စထရိုတို့ ဦးဆောင်တဲ့ လူ ၁၂ ဦးသူပုန်တပ်ဖွဲ့ကနေ နိုင်ငံတခုလုံးကို သိမ်းပိုက်နိုင်ခဲ့တဲ့ ကျုးဘားတော် လှန်ရေးအပါဝင် နိုင်ငံတကာ လက်နက်ကိုင် တော်လှန်ရေးအကြောင်း စာအုပ်တွေကို လေ့လာဖတ်ရှုခွင့် ရခဲ့ပါတယ်။

မင်းသမီးစခန်းကော်မတီ ဥက္ကဋ္ဌသစ် ကိုအောင်သန်းဝင်း (အလယ်တွင် ထိုင်နေသူ) အား တပ်ရင်းညီလာခံတွင် မြင်ရစဉ်
စာကြည့်တိုက်ဘေးမှာတော့ ဆေးဘားတိုက်၊ စခန်းအ၀င်ဂိတ်ဟိုဘက်မှာတော့ ဆေးခန်း၊ ဘုန်းကြီးကျောင်း ရဲ့ ဒီဘက်မှာတော့ တပ်ရင်းစတိုကြီး၊ အဲဒီဘေးမှာ တပ်ခွဲ ၁၊ ၂၊ ၃ အတွက် ဘားတိုက်တလုံးစီ။ ဘား တိုက်တွေ အပြီး မှာတော့ စခန်းကော်မတီရုံး (တပ်ရင်းရုံးလို့လည်း ခေါ်ပါတယ်)။ ကော်မတီရုံး ရဲ့ နောက်ကျော ဘက်မှာတော့ ဆက်သွယ်ရေးရုံးခန်း။ ကော်မတီရုံးရဲ့ မျက်စောင်းထိုးမှာတော့ အမျိုး သမီးဆောင်။ စခန်းအ၀င်ဝ ဆေးဘားတိုက်ကနေ အမျိုးသမီးဆောင်အထိ ဘားတိုက်တွေ အားလုံးဟာ သစ်သားတိုင်၊ ၀ါးကြမ်းခင်း၊ တောထန်းရွက်မိုး အဆောင်တွေဖြစ်ပြီး တပ်ရင်းရုံးနဲ့ ဆေးခန်း ကတော့ မြေစိုက်အဆောင်တွေ ဖြစ်ပါတယ်။

အ၀င်ဝကနေ ကြည့်လိုက်မယ်ဆိုရင် ဒီဘား တိုက် ၁၀ လုံးနီးပါးဟာ လေးကိုင်းပုံ နေရာယူ ဆောက် ထားသလို မြင်ရပြီး အဲဒီဘားတိုက်တွေရှေ့က ကွင်းပြင်ထဲမှာတော့ တပ်ရင်း စိုက်ခင်းကြီးရှိပါတယ်။ ပဲသီးပင်၊ ခရမ်းသီးပင်၊ ချဉ်ပေါင်ပင်တွေနဲ့အတူ ပီလောပီနန်ဥပင်တွေပါ စိုက်ထားတာ တွေ့ရပါတယ်။

တပ်ရင်းမှူးရွေးပွဲနဲ့ မထင်မှတ်ဘဲ တပ်ထောက်ဖြစ်သွားသူ
ကျနော်နေရတဲ့ အဆောင်ကတော့ တပ်ရင်းရုံးနဲ့ ကပ်လျက်မှာရှိတဲ့ တပ်ခွဲ ၃ ဘားတိုက်၊ အမရာစခန်းက ဘားတိုက်တွေဟာ မောင်တော်မှာ ကျနော်ဆောက်ခဲ့ဖူးတဲ့ ဘားတိုက်လို ရင်ကွဲဘားတိုက် တွေမဟုတ်ဘဲ သာမန်တဲအိမ်လို သဲဖုတ်ကြမ်းခင်းကို တပြေးတည်း လုပ်ထားတာတွေ့ရပါတယ်။ ညဘက် အိပ်လို့ကောင်း တုန်း တယောက်ယောက်ထသွားရင် တကျွိကျွိမြည်ပြီး ကျန်တဲ့လူတွေအကုန် ဆက်မအိမ်နိုင်တဲ့အထိ ဆူညံတဲ့ ဘားတိုက်တွေဖြစ်ပါတယ်။

ဘာကြောင့်မှန်းတော့မသိ။ စခန်းမှာသတင်း နှစ်ပတ်ကျော် ကြာတဲ့အထိ တာဝန်ကျတဲ့ ဘန်းချောင်းခွင်ကို ကျနော် မသွားဖြစ်သေးပါ။ အဲဒီအချိန်မှာ “တပ်ရင်းမှူးနေရာအတွက် မင်းဝင်ပြိုင်ပါလား” ဆိုပြီး ဘော်ဒါ တချို့ က ကျနော်ကို မြှောက်ပေးပါတယ်။ ကျနော်ဟာ ၁၀ တန်းအောင်စဉ်က DSA လျှောက်ဖို့ အသက်မီ တဲ့အတွက် ၀င်လျှောက်ခဲ့ဖူးပါတယ်။ ဒါပေမယ့် ရှေ့မှာပြောခဲ့တဲ့ အများတောင်ကြားလမ်းကနေ ထားဝယ် မြို့ဆီ ၀င်လာတဲ့ ရဲဘော်သုံးကျိပ် စစ်ကြောင်း၊ ဗိုလ်ဗထူးတို့နဲ့အတူ ပါသွားပြီး ဖက်ဆစ်တော်လှန်ရေးမှာ ပါဝင်ရင်းနဲ့ ဗမာ့တပ်မတော်မှာ ဗိုလ်ကြီးဖြစ်သွားသူ ကျနော့်ဦးလေးက “စစ်ဗိုလ်တော့ မလုပ်ချင်စမ်းပါနဲ ကွာ” ဆိုတဲ့ ကန့်ကွက်မှုကြောင့် စာမေးပွဲရက်မှာ သွားမဖြေဖြစ်ခဲ့ပါ။

ဒီလိုနဲ့ စစ်ဗိုလ်ဘ၀နဲ့ဝေးခဲ့တဲ့ ကျနော်ဟာ အခုတကြိမ် သူပုန်ဗိုလ်ဖြစ်ဖို့ အရွေးခံရေး အခြေနေ က ပေးလာပြန်ပါတယ်။ ဒါပေမယ့် အသေအချာ ပြန်စဉ်းစားကြည့်တော့ ကျနော်ဟာ စစ်တိုက်ချင်လို့ စစ်ဗိုလ်ဖြစ်ချင်တာ မဟုတ်ဘဲ  ခေတ်ပေါ် ဘန်းစကားနဲ့ ပြောရရင် “ဆော်ကြည်ဘဲ” ဖြစ်ချင်လို့၊ လစာနဲ့ အခွင့်ရေးကောင်းကောင်း ရချင်လို့ စစ်ဗိုလ်ဘ၀ကို လိုလားနေတာသာဖြစ်ပြီး တိုက်ရေးခိုက်ရေးကို သိပ်စိတ်ဝင်စားပုံမရခဲ့ပါ။

နောက်တခါ သူပုန်ဗိုလ်အဖြစ် အရွေးခံဖို့အရေးမှာလည်း ကျနော်ဟာ အခုချိန်အထိ ၀ါးရင်းတုတ် သင်တန်းမှအပ စစ်သင်တန်းကို ဖြစ်ဖြစ်မြောက်မြောက် တခါမှမတက်ဖူးသေးပါ။ သင်တန်းဆင်း လက်မှတ်တွေ၊ ထူးချွန်ဆုတွေဆိုတာ ဝေလာဝေး။ ကော့မူးရာမှာ တိုက်ပွဲအတွေ့အကြုံ ရှိခဲ့ဖူးတယ်ဆိုပေ မယ့် သေနတ်ပစ်တတ်တာနဲ့ စစ်တိုက်တတ်တာ မတူလောက်ဘူးဆိုတာကို ကျနော် သဘောပေါက်လာ ပါတယ်။ နောက်တချက်ကတော့ စည်းရုံးရေး စကားကလည်း ကောင်းကောင်း မပြောတတ်သေး။ စခန်းနဲ့ ဝေးနေတာကလည်း တနှစ်နီးပါးရှိပြီဆိုတော့ ကိုယ့်အခြေနေကိုယ် သဘောပေါက်ပြီး ၀င်ပြိုင်ဖို့ စိတ်ကူးကို လက်လျှော့လိုက်ပါတယ်။

နောက်ဆုံးမှာတော့ ကျနော်တို့ ဖိုင်နယ်ရီးယား နောက်ဆုံးနှစ် ကျောင်းသားတွေထက် အသက်ငယ်တဲ့ ထားဝယ် ကောလိပ် ဒုတိယနှစ် ဓာတုဗေဒကျောင်းသား၊ စစ်သင်တန်းအဆင့်ဆင့်မှာ ထူးချွန်ပြီး စံပြဆုရခဲ့ သူ ကိုဇော်သန်း (၁၉၉၇ အောက်တိုဘာမှာ ပင်လယ်ပြင်စစ်ကြောင်းအတွင်း ကျဆုံး) ကို တပ်ရင်းမှူးအဖြစ် ဗဟိုစစ်ကော်မရှင်နဲ့ စစ်ရေးဌာန အတွင်းရေးမှူး ကိုထွန်းဦးက အတည်ပြုခန့်အပ် လိုက်ပါတယ်။ ဒု ရင်းမှူး အဖြစ်ကတော့ အများက လေးစားတဲ့ ထားဝယ် အထက ၁ က ကျောင်းဆရာ ဦးအောင်မြင့် (နောက်ပိုင်း ဗဟိုတရားသူကြီး၊ အခုချိန်အထိ နယ်စပ်က မြန်မာနိုင်ငံရှေ့နေများကောင်စီမှာ တာဝန်ထမ်းနေဆဲ) ဖြစ် လာ ပါတယ်။

တပ်ရင်းမှူးခန့်ပွဲတွေပြီးလို့ သတင်း နှစ်ပတ်လောက် ကြာတဲ့အချိန်မှာ မမျှော်လင့်တဲ့ ပြဿနာတခု ဖြစ် ပွားပြီး ကျနော့်ကို ယာယီ တပ်ထောက်ဗိုလ်ကြီးအဖြစ် စခန်းကော်မတီက ခန့်အပ်လိုက်ပါတယ်။ ဖြစ်ပုံ ကတော့ တပ်ထောက်ဗိုလ်ကြီးက သူ့ဌာနအောက်ရှိ စက်လှေသမား ဓာတ်ဆီခိုးသုံးတာကို ဖော်ထုတ် တဲ့အမှုမှာ လှေသမားက ၀န်မခံဘဲ ဗြောင်လိမ်နေတာကို သည်းမခံနိုင်လို့ဆိုပြီး တရားသူကြီးရှေ့မှာ တင် လှေသမားကို နဘန်ကျင်းမိရာကနေ တာဝန်ကနေ ရပ်စဲခံလိုက်ရပါတယ်။

အဲဒီအချိန်မှာ ယောင်လည်လည်နဲ့ မျောက်သစ်ကိုင်းလွတ်ဖြစ်နေတဲ့ ဗဟိုပြန်ရဲဘော်ကြီး ကျနော့်ကို စခန်းကော်မတီက တပ်ထောက်ဗိုလ်ကြီး တာဝန်ပေးလိုက်တာပါ။ ကျနော့်အထင် တပ်ထောက်ဘ၀ နဲ့ ၆ လနီးပါး တာဝန်ထမ်းလိုက်ရပါတယ်။ အဲဒီကာလတွေအတွင်း BCG ကပေးတဲ့ ရိက္ခာငွေကို လက်ခံတာ၊ ကိုဉာဏ်စိုးနဲ့အတူ ကန်ချနဘူရီမြို့ဆီ ဈေးသွားဝယ်တာ၊ ရှေ့တန်းအတွက် လိုအပ်တဲ့မိုးကာစတွေ၊ ကျောပိုး အိတ်တွေ၊ ယူနီဖောင်းတွေ ကန်ချနဘူရီမှာ သွားဝယ်ဖူးတာတွေကို မှတ်မိနေပါတယ်။

ဒါ့အပြင် စစ်လက်နက်နဲ့ ပတ်သက်ပြီး ထူးထူးခြားခြား မှတ်မိနေတဲ့ ဖြစ်စဉ် နှစ်ခုရှိပါတယ်။ ပထမတချက် ကတော့ အဲဒီကာလဟာ ကျနော်တို့ ကျောင်းသားတွေ လက်နက်ရူး ရူးနေတဲ့ အချိန်ဆိုတော့ သေနတ်ကိုင် ရတာကို အတော်ဂုဏ်ယူနေတဲ့အချိန် ဖြစ်ပါတယ်။ သေနတ်ထဲမှာမှ ဗိုလ်တွေသာ ကိုင်ခွင့်ရတဲ့ ပစ္စတိုကိုင် ရရင် ပိုပျော်တာပေါ့ဗျာ။ အဲဒီအချိန်မှာ ဥက္ကဋ္ဌ ကိုအောင်သန်းဝင်း ဘယ်ကနေ ဘယ်လိုရလာသလဲတော့ မသိဘူး။ ဘရောင်နီ ပစ္စတို အသစ်စက်စက်တလက်ကို ကျနော့်ဆီ လာအပ်ပါတယ်။

“မင်းက တပ်ထောက်ဆိုတော့ ဒါကြီးကို မင်းပဲကိုင်ထားပါ” တဲ့။ ကျနော်လည်း ကိုင်ချင်နေတာနဲ့ အတော် ပဲပေါ့။ ဒါပေမယ့် “ဒါကြီးပျောက်သွားရင် အမှုပိုကြီးမယ်” ဆိုပြီး တဖက်ကလည်း စိုးရိမ်နေပြန်ပါတယ်။ ဒီလိုနဲ့ နေ့ဘက် လူကြားသွားရင် “ဗျောက်တို” ကို ခါးကြားထိုးပြီး ဟန်ရေးပြ၊ ညဘက် အိပ်ရာဝင်ရင် အဲဒါကြီးကို ကျနော့်ခေါင်းရင်းက သွပ်ပြားသေတ္တာထဲ သော့ခတ်ပြီး သိမ်းပေါ့။

ဒုတိယတချက်ကတော့ ကျနော် တပ်ထောက်ဖြစ်နေစဉ်မှာ ပထမဆုံးအကြိမ်အဖြစ် တပ်စုတစုစာ ဖွဲ့စည်းပုံအပြည့် လက်နက်တပ်ဆင်ရေးအတွက် AK 47 အလက် ၃၀၊ AK စက်လတ် တလက်၊ M16 စက်လက် တလက်။ M 79 နှစ်လက်နဲ့ ကျည်တွေကို KNU ဆီကနေ ၀ယ်ယူခဲ့ဖူးတာ ဖြစ်ပါတယ်။

၂၀၁ တပ်ရင်းမှူး ကိုဇော်သန်းကို ဗိုလ်မှူးအေးမြင့် ပို့ချတဲ့ ဗိုလ်သင်တန်း အမှတ်စဉ် ၂ ဆင်းပွဲမှာ စံပြဆုရကျောင်းသားအဖြစ် တွေ့ရစဉ်
“တပ်ထောက်၊ ခင်ဗျားဝယ်လာတဲ့ AK တွေကလည်း ပြောင်းဝကျယ်လိုက်တာဗျာ။ ကျည်ဆံ ကန့်လန့်ထွက် လာမလား မသိဘူး” လို့ ရဲဘော်တချို့က နောက်ပြောတာကို မှတ်မိနေဆဲ ဖြစ်ပါတယ်။ သူတို့ပြောမယ် ဆိုလည်း ပြောချင်စရာပါပဲ။ ရှိစုမဲ့စု ပိုက်ဆံတွေစုပြီး ၀ယ်လာတဲ့လက်နက်တွေက ကမ္ဘောဒီးယား စစ်ကျန် နိုင်တီးဂွမ်တီးက လက်နက်တွေ။ ကျနော်မှတ်မိသလောက်ကတော့ ကျနော် တို့ တောစခိုတဲ့ အချိန်ကနေ ဒီနေ့အထိ အဲဒီလို လက်နက်ဟောင်းတွေနဲ့ပဲ စခန်းသွားခဲ့ရပြီး ပြည်ချစ်ခေတ် ကလို လက်နက်သစ်တွေ တပ်ဆင်နိုင်ခဲ့ဖူးတာမျိုး တခါမှမကြားဖူးသေးပါ။

ဒါပေမယ့် အဲဒီလို ကျည်ဆံကန့်လန့်ထွက်နိုင်တဲ့ လက်နက်ဟောင်းတွေ တပ်ဆင်ထားတဲ့ တပ်စုကို အထူးတပ်စုလို့ ကျနော်တို့က ခေါ်ပါတယ်။ ဘာကြောင့်လဲဆိုရင် ဒီတပ်စုအရင် ရှေ့တန်းထွက်သွားတဲ့ တပ်အားလုံး လက်နက်အပြည့်အစုံ မတပ်ဆင်နိုင်ဘဲ လက်လုပ်သေနတ်တွေ၊ ယမ်းထောင်းတွေ၊ မီးကျိုး မောင်းပျက်တွေကို ၂ ယောက်တလက်၊ ၃ ယောက် တလက် ခွဲတမ်းနဲ့ ထွက်သွားကြလို့ ဖြစ်ပါတယ်။

ဒီအထူးတပ်စုကိုတော့ တပ်ရေးဗိုလ်ကြီး ကိုအေးသော်ကိုယ်တိုင် ဦးစီးပြီး အထူးစစ်ကြောင်း ဆိုတဲ့အမည်နဲ့ ပြည်ခြား-ပုလော ဒေသဘက်ဆီ ဆင်းသွားတာကို ကျနော် အမှတ်ရနေပါတယ်။

.................................................. 

သူပုန်ကျောင်းသားတဦးရဲ့ မာရသွန်ခရီး ၂၀


ကန်ချနဘူရီ (သို့) မြန်မာ့တော်လှန်ရေးသမိုင်းထဲကမြို့

ကန်ချနဘူရီမှာ ကျနော်တို့ တည်းခိုလေ့ရှိတဲ့နေရာက River Kwai ဟိုတယ်ရဲ့ မျက်နှာချင်းဆိုင်မှာရှိတဲ့ V-Guest House ဖြစ်ပါတယ်။ ဘုရားသုံးဆူဘက်ကလာတဲ့ ကျောင်းသားတွေလည်း ဒီမှာတည်း လေ့ရှိ တယ်လို့ ကြားရပေမယ့် ကျနော်နဲ့တော့ တခါမှမဆုံဖြစ်ပါဘူး။ ကန်ချနဘူရီမြို့ဟာ ကျနော်တို့ မင်းသမီးခစန်းရှိတဲ့ ထိုင်းနယ်စပ်က ဖုနန်းလွန် သို့မဟုတ် ရေပူရွာ (အခု ကန်ချနပူရီ-ထားဝယ် အဝေးပြေးကားလမ်းပေါ်က ထိုင်းနယ်စပ်ရွာ) နဲ့ တနာရီခွဲ ခရီးလောက်သာရှိပေမယ့် အဲဒီခေတ်က လမ်းသိပ်မကောင်းသေးဘဲ မြေနီလမ်းအဆင့်ပဲ ရှိပါသေးတယ်။

နောက်တခါ ဖုနန်းလွန် နယ်စပ်ကနေ ထီးခီးကိုဝင်တဲ့လမ်း၊ အထူးသဖြင့် ထီးခီးကနေ ထီးထာ ဆင်းတဲ့လမ်းဟာ အတော်ဆိုးနေပါတယ်။ နယ်စပ်ရှိ KNU တပ်မဟာ (၄) ဌာနချုပ် ထီးခီးကနေ ကျနော်တို့ စခန်းရှိတဲ့ အမာရာဆီ နောက်ထပ် တနာရီကျော်ကျော် ထပ်မောင်းရပါသေးတယ်။ ဒါက နွေရာသီ ကို ပြောတာပါ။ မိုးရာသီဆိုရင်တော့ ထီးခီးအထိပဲ ကားသွားနိုင်ပြီး ထီးခီးကနေ ကျနော်တို့ စခန်းရှိရာ အမာရာရွာဆီ ၃ နာရီကျော်ခရီးကို ဆန်အိတ်တွေ၊ ရိက္ခာတွေထမ်းပြီး လမ်းလျှောက်သွားရပါတယ်။ နောက်တခါ ကန်ချနဘူရီကနေ နယ်စပ် ဖုနန်းလွန်ရွာဆီ အဲဒီကာလက လိုင်းကား မပြေးသေးပါဘူး။


အများတောင်ကြားလမ်းထိပ်အနီးမှာ စိုက်ထူထားတဲ့ ABSDF (၂၀၁) တပ်ရင်း ဆိုင်းဘုတ်
ဆိုလိုတာကတော့ မင်းသမီးခစန်းဟာ ကန်ချနဘူရီနဲ့အနီးဆုံး၊ ဘန်ကောက်နဲ့အနီးဆုံး စခန်းလို့ ပထ၀ီအနေအထားအရ ပြောနိုင်ပေမယ့် တကယ့်လက်တွေ့ ကားလမ်းအခြေနေအရတော့ ဘုရားသုံးဆူစခန်းနဲ့ နတ်အိမ်တောင်စခန်းတို့က ပိုပြီးအ၀င်အထွက်လုပ်လို့ ကောင်းတဲ့နေ ရာတွေဖြစ်နေပါတယ်။


ကန်ချနဘူရီကနေ ဘတ်စကားနဲ့ တနာရီခွဲလောက် ဆက်သွားရင် ထုံပါဖုံ သို့မဟုတ် ထားဝယ်သားတွေ အခေါ် ထပ်ခနောင်မြို့ (ရေအိုင်ကြီးဘေးက လှေဆိပ်) ကို ရောက်ပါတယ်။ အဲဒီမြို့မှာ ထားဝယ်နဲ့ ကံပေါက်သားတွေ အများအပြားနေထိုင်ပြီး နတ်အိမ်တောင် နယ်စပ်ဂိတ်ဆီသွားတဲ့ လမ်းဆုံမြို့ဖြစ်ပါတယ်။ ထပ်ခနောင်-နတ်အိမ်တောင် လိုင်းကားတွေ တနာရီတစီးနှုန်းရှိနေပြီး ကားသမားရော၊ ကားနောက်လိုက်ရော၊ ခရီးသည်တွေရော အားလုံးနီးပါးဟာ ထားဝယ်သားတွေဖြစ်ပြီး ထားဝယ်သံ အော်ကျယ် အော်ကျယ်နဲ့ ပြောနေကြတာကို ကြားရနိုင်ပါတယ်။

အဲဒီ ထပ်ခနောင်ကနေ လိုင်းကားနဲ့ တနာရီဝန်းကျင် တောင်ပေါ်တက်သွားလိုက်ရင် နတ်အိမ်တောင်စခန်းကို ရောက်ပါတယ်။ အဲဒီမှာ KNU တပ်မဟာ ၄ ရဲ့ လက်အောက်ခံ တပ်ရင်း (၁၀) ကတပ် တွေရှိသလို ကျနော်တို့ ABSDF (၂၀၁) တပ်ရင်းရဲ့ တပ်ခွဲ (၂) အခြေစိုက်တဲ့နေရာလည်းဖြစ်ပါတယ်။ ၁၉၉၁ ခုနှစ်မှာ နတ်အိမ်တောင်ကို န၀တအစိုးရတပ်တွေ မသိမ်းမီအထိ၊ တနည်းအားဖြင့် ရတနာဓာတ်ငွေ့ပိုက်လိုင်း စီမံကိန်း မစမီအထိ နတ်အိမ်တောင်စခန်းဟာ ဒီဒေသအတွင်း အစည်ကားဆုံး နယ်စပ်ကုန်သွယ်ရေး စခန်းတခုဖြစ်ခဲ့ပါတယ်။

နောက်တခါ ဘုရားသုံးဆူဘက်ကို သွားမယ်ဆိုရင်လည်း ခုနက ထပ်ခနောင်ကနေ နောက်ထပ် တနာရီ ဘတ်စကားဆက်စီးရင် စံခရဘူရီမြို့ကိုရောက်ပါတယ်။ စံခရဘူရီကနေ ၁၅ မိနစ်လောက် လိုင်းကား ထပ်စီးလိုက်ရုံနဲ့ ကျောင်းသားစခန်းတွေနဲ့ မွန်ပြည်သစ်ပါတီဌာနချုပ်ရှိရာ နန်းမကိတ်ရွာကို တန်းပြီး ရောက်နိုင်ပါတယ်။ ဒါကြောင့်လည်း ဘုရားသုံးဆူစခန်းဟာ ဘန်ကောက်နဲ့ ဆက်သွယ်မှု အလွယ်ကူဆုံး၊ ပြင်ပကမ္ဘာက လူတွေနဲ့ဆက်သွယ်မှုလုပ်လို့ အကောင်းဆုံးနေရာဖြစ်ခဲ့တဲ့အတွက် မင်းသမိးစခန်းထက် ဘုရားသုံးဆူကို နိုင်ငံတကာသတင်းထောက်တွေ ပိုအသိများခဲ့တယ်လို့ ကျနော်တွက်ဆမိပါတယ်။

တဆက်တည်း စဉ်းစားမိတာကတော့ နတ်အိမ်တောင်နဲ့ စံခရဘူရီဟာ ဒီလိုလမ်းပန်း ဆက်သွယ်ရေး လွယ်ကူတာကြောင့် ကျနော်တို့အရင် နှစ် ၂၀ လောက်စောပြီး လက်နက်ကိုင်တော်လှန်ရေး လုပ်ဖူးတဲ့ ပြည်ချစ်တပ်မတော်က နတ်အိမ်တောင်မှာ တောင်ပိုင်းတိုင်း စစ်ဌာနချုပ်အခြေစိုက်စခန်း ဖွင့်ခဲ့တာလို့ ထင်ပါတယ်။ ပြည်ချစ်လက်ကျန် တော်လှန်ရေးသမားတချို့ကို KNU နယ်မြေနဲ့ ထိုင်းနယ်စပ်တလျှောက်မှာ တွေ့ခဲ့ဖူးပေမယ့် သူတို့ရဲ့လှုပ်ရှားမှုအကြောင်း အသေချာတခါမှ မမေးဖြစ်ခဲ့ပါ။

သေမင်းတမန်ရထားလမ်းနဲ့ စစ်သင်္ချိုင်း


(၂၀၁) တပ်ရင်း မင်းသမီးစခန်း ဆက်သွယ်ရေးတပ်ဆွယ်မှ ရဲမေတချို့
ဒီလို အစဉ်လာရှိခဲ့တဲ့ တောင်ပိုင်းဒေသ သူပုန်စခန်းတွေအားလုံးအတွက် လမ်းဆုံဖြစ်တဲ့ ကန်ချနဘူရီမြို့အကြောင်းကို ပြန်ကောက်ရမယ်ဆိုရင် ဒီမြို့ဟာ စိုက်ပျိုးရေး အလွန်ဖြစ်ထွန်းတဲ့မြို့ဖြစ်သလို သမိုင်းဝင်နေရာ အများအပြားရှိတဲ့မြို့လည်းဖြစ်ပါတယ်။ အထူးသဖြင့် ဒုတိယကမ္ဘာစစ်အတွင်းက ဖောက်လုပ်ခဲ့တဲ့ ကန်ချနဘူရီ-သံဖြူဇရပ် သေမင်းတမန်ရထားလမ်းရဲ့ လက်ကျန်ပြယုဂ်တွေကို ဒီမြို့မှာ အသေချာပြသထားတာ တွေ့နိုင်ပါတယ်။ ဒါကြောင့် ရှေ့မှာပြောခဲ့တဲ့ V-Guest House မှာတည်းပြီး ကျနော်တို့ ပထမဆုံးသွားလည်ဖြစ်တဲ့ နေရာဟာလည်း အဲဒီ ရထားလမ်းမှာ လုပ်အားပေးရင်းနဲ့ သေဆုံးသွားတဲ့ ထောင်နဲ့ချီရှိတဲ့ မဟာမိတ်တပ်သားတွေရဲ့ စစ်သင်္ချိုင်း ဖြစ်ပါတယ်။

မြန်မာနိုင်ငံမှာတုန်းကလည်း ပြိုင်ဘီးစီးလေ့ကျင့်ရင်းနဲ့ ထောက်ကြံ့နဲ့သံဖြူဇရပ်ဘက်က အလားတူ စစ်သင်္ချိုင်း ၂ ခုကို ကျနော်မကြာခဏ ၀င်ကြည့်ခဲ့ဖူးပါတယ်။ ဒါပေမယ့် သမိုင်းကြောင်းကို စိတ်ဝင်စားရကောင်းမှန်းမသိဘဲ လေ့ကျင့်ခန်းလုပ်ဖို့ တခုတည်းကိုပဲ စိတ်ဝင်စားခဲ့လို့ အုတ်ဂူတွေမှာ ဘာတွေရေးထားမှန်း ကျနော်မသိခဲ့ပါ။ ဒီသင်္ချိုင်း ၃ ခုစလုံးဟာ သေမင်းတမန် ရထားလမ်းစီမံကိန်းအတွင်း ကျဆုံးသွားတဲ့ မဟာမိတ်တပ်သားတွေရဲ့ အုတ်ဂူတွေဖြစ်ပြီး နှင်းဆီပန်းတွေ၊ မြက်ခင်းစိမ်းစိမ်းတွေနဲ့ အသေချာ ပြင်ထားလို့ သင်္ချိုင်းနဲ့မတူဘဲ ပန်းခြံနဲ့ ပိုတူနေတာတွေ့ရပါတယ်။

နောက်တခါ ထောက်ကြံ့နဲ့သံဖြူဇရပ်ရှိ စစ်သင်္ချိုင်းဆီ ကျနော်ရောက်ခဲ့စဉ်က နိုင်ငံခြားသားဧည့်သည်တွေကို တဦးစနှစ်ဦးစသာ တွေ့ရပေမယ့် ဒီ ကန်ချနဘူရီ စစ်သင်္ချိုင်းမှာတော့ ထောင်နဲ့ချီပြီးရှိမလားပဲ။ နိုင်ငံခြားဧည့်သည်တွေ အတော်စိတ်ဝင်စားတဲ့ နေရာတခုအဖြစ် ကျနော် သတိထားမိပါတယ်။
စစ်သင်္ချိုင်းရဲ့ဘေးမှာတော့ သေမင်းတမန်ရထားလမ်း သမိုင်းပြတိုက်၊ ရထမ်းလမ်းဖောက်စဉ်က မဟာမိတ်စစ်သုံ့ပန်းတွေကို ဂျပန်တပ်က ခိုင်းစေနေပုံ၊ နောက်တခါ မြန်မာနိုင်ငံက ချွေးတပ်ဆွဲခံရတဲ့ အရပ်သားတွေကို ခိုင်းစေနေပုံ၊ အာဟာရပြတ်၊ ဆေးဝါးပြတ်ပြီး သေဆုံးသွားပုံတွေကို ဓာတ်ပုံ၊ ဗီဒီယိုမှတ်တမ်းတွေနဲ့ အသေချာ ပြသားထားတာ တွေ့ခဲ့ရပါတယ်။

ဒါပေမယ့် ၀မ်းနည်းဖို့ကောင်းတာကတော့ ကျဆုံးသွားတဲ့ မဟာမိတ်စစ်သည်တွေကိုပဲ ဒီသင်္ချိုင်းတွေမှာ အုတ်ဂူတွေနဲ့ မှတ်တမ်းတင်ထား တာတွေ့ရပြီး ကျနော်တို့မြန်မာနိုင်ငံက ထောင်နဲ့ချီတဲ့ ချွေးတပ်သားတွေရဲ့ အုတ်ဂူတွေ ဘယ်နားရှိမှန်းတော့ သိခွင့်မရခဲ့ပါဘူး။ ကျနော် မြန်မာနိုင်ငံမှာတုန်းက ဖတ်ဖူးတဲ့ လင်းယုန်သစ်လွင်ရဲ့ “ထိုင်း-မြန်မာ မီးရထားလမ်း ကိုယ်တွေ့ချွေးမှတ်လမ်း” စာအုပ်ကို အမှတ်ရမိပါတယ်။
အဲဒီပြတိုက်ကနေ ၁၀ မိနစ်လောက် စန်လွန့် (ဆိုက်ကား) စီးပြီး ဆက်သွားတော့ ဒီရထားလမ်းရဲ့ သမိုင်းဝင် ကွေးမြစ်တံတားကြီး (River Kwai Bridge) ကို ရောက်ပါတယ်။

ဒီတံတားနဲ့ သေမင်းတမန် ရထားလမ်းအကြောင်း ရိုက်ကူးထားတဲ့ ကွေးမြစ်ပေါ်က တံတား (The Bridge on the River Kwai) ရုပ်ရှင်ဟာ အတော် နာမည်ကြီးတယ်လို့ သိရပါတယ်။ သေမင်းတမန်ရထားလမ်းနဲ့ ဒီတံတားကြီးကို ၁၉၄၂ ခုနှစ်မှာ ဂျပန်က ဆောက်လုပ်ခဲ့ပြီး ၁၉၄၄ ခုနှစ် နိုဝင်ဘာလ ၂၈ ရက်နေ့မှာ မဟာမိတ်တပ်တွေက ဗုံးကြဲဖောက်ခွဲခဲ့တာ ဖြစ်ပါတယ်။ ဒါကြောင့် နိုဝင်ဘာနှောင်းပိုင်းနဲ့ ဒီဇင်ဘာမှာ နှစ်ပတ်လည်ပွဲတွေ တခမ်းတနားကျင်းပလေ့ရှိပြီး နိုင်ငံတကာဧည့်သည်တွေနဲ့ အတော်စည်ကားနေပါတယ်။

ဒီရထားလမ်းဟာ မြန်မာနိုင်ငံ သံဖြူဇရပ်မြို့ကနေ ထိုင်းနိုင်ငံ ဘန်းပေါင်မြို့ (ကန်ချနဘူရီနဲ့ ဘန်ကောက်ကြားကမြို့တမြို့) အထိ မိုင်ပေါင်း ၂၅၀ အရှည်ရှိတယ်လို့ မှတ်တမ်းတွေမှာ ဖော်ပြထားပါတယ်။ အခုချိန်မှာတော့ သေမင်းတမန်ရထားလမ်း အမှတ်တရအဖြစ် ကန်ချနဘူရီရှိ ဒီတံတားကြီးကနေ ဘုရားသုံးဆူဘက်သွားတဲ့ လမ်းပေါ်က စိုင်ယွတ် (Sai Youk) မြို့အထိ ကမ္ဘာလှည့်ခရီးသည်ရထား ပြေးဆွဲနေဆဲ ဖြစ်ပါတယ်။


အမာရာ သို့မဟုတ် အများတောင်ကြားလမ်းနဲ့ ရာဇ၀င်ထဲက စစ်သည်တော်များ

ဒီတံတားဆီ ပထမဆုံးအခေါက်ရောက်ခဲ့တဲ့ ၁၉၈၉ ခုနှစ် ဒီဇင်ဘာဝန်းကျင်တုန်းက စစ်သင်္ချိုင်း၊ သေမင်းတမန် ရထားလမ်းနဲ့ မြန်မာနိုင်ငံက ချွေးတပ်စခန်းတွေလောက်ကိုသာ ကျနော်ဆက်စပ်စဉ်းစားဖြစ်ခဲ့ပေမယ့် အခု နှစ်  ၂၀ ကျော်ကြာပြီး ဆောင်းပါး တကယ်ရေးတဲ့အခါမှာတော့ အဲဒီ ၃ ချက်အပြင် ဒီရထားလမ်း၊ ကန်ချနပူရီမြို့နဲ့ ကျနော်တို့ မင်းသမီးခစန်း ဆက်စပ်နေပုံကိုပါ စဉ်းစားနေမိပါတယ်။


(၂၀၁) တပ်ရင်း မင်းသမီးစခန်း ဆေးတပ်ဆွယ်မှ ရဲမေတချို့
သမိုင်းမှတ်တမ်းတွေအရ ဖော်မိုဆာကျွန်းမှာ စစ်ပညာသင်ပြီး ပြန်လာတဲ့ ဗိုလ်ချုပ်အောင်ဆန်းနဲ့ ရဲဘော်သုံးကျိပ်ဟာ ဒုတိယကမ္ဘာစစ် အစောပိုင်းကာလ ၁၉၄၁ ခုနှစ် ဒီဇင်ဘာလ ၂၆ ရက်နေ့မှာ ဘန်ကောက်မှာ ဗမာ့လွတ်လပ်ရေးတပ်မတော် (BIA) ကို စတင်ဖွဲ့စည်းခဲ့ပါတယ်။ အဲဒီ BIA ထဲက စစ်ကြောင်းတခုဟာ ဘန်ကောက်နေ ကန်ချနဘူရီမြို့၊ ကန်ချနဘူရီကနေတဆင့် နယ်စပ်ကိုဖြတ်ပြီး အများတောင်ကြားလမ်းကနေ ကျနော်တို့ မင်းသမီးခစန်းရှိရာ တနင်္သာရီမြစ်ဝဆီ ဆင်းလာတာ။ အဲဒီက တဆင့် (အခု ကန်ချနဘူရီ-ထားဝယ် အဝေးပြေးကားလမ်း ဖောက်နေတဲ့) ထီးထာ၊ အမို၊ ဆင်ဖြူတိုင်၊ အိုင်ဝိုင်း၊ မေတ္တာ၊ တောင်သုံးလုံးကနေ ထားဝယ်မြို့ကို ၀င်သိမ်းခဲ့တာတွေကို ကျနော် ဆက်စပ်စဉ်းစား နေမိပါတယ်။

ဒီလိုစဉ်းစားဖို့ ဖြစ်လာစေတဲ့အချက်တခုကတော့ ကန်ချနဘူရီကနေ ကျနော်တို့ မင်းသမီးစခန်းဆီ အ၀င်လမ်းမှာရှိတဲ့ ဖုနန်းလွန်ရွာကို မရောက်ခင် ဟွေးနန်းခေါင် သို့မဟုတ် ရေဖြူဆိုတဲ့ရွာကနေ ကျနော်တို့ ကျောင်းသားစခန်း ဂိတ်ဝအနီးက အများသွားလမ်းကြားထိပ်အထိ ကားလမ်းကြမ်းရှိနေလို့ ဖြစ်ပါတယ်။ ထိုင်းနိုင်ငံထဲကနေ မင်းသမီးစခန်းဆီ ၀င်နိုင်တဲ့ လမ်းကြောင်း ၄ ခုလောက်ရှိပြီး အပေါ်ဆုံး လမ်းကြောင်းက စိုင်ယွတ်-ဘောတီ-အမို-လမ်းကြောင်းဖြစ်ပါတယ်။ ဒုတိယလမ်းကြောင်းကတော့ ကန်ချနဘူရီ-ဖုနန်းလွန်-ထီးခီးလမ်းကြောင်း ဖြစ်ပါတယ်။ တတိယလမ်းကြောင်းကတော့ ကန်ချနဘူရီ-ဟွေးနန်းခေါင်-အမာရာ-လမ်းကြောင်းဖြစ်ပါတယ်။ စတုတ္တလမ်းကြောင်းကတော့ ရတ်ချပူရီ-တဂိုလမ်း (အခု ထန်းဟင် ဒုက္ခသည်စခန်းအနီးကရွာ) မောထာလမ်းကြောင်း ဖြစ်ပါတယ်။

ဒီလမ်းကြောင်း ၄ ခုထဲက ဖုနန်းလွန်-ထီးခီး-လမ်းကြောင်းတခုကိုပဲ ကျနော်တို့ ကျောင်းသား တွေကို KNU က သုံးခွင့်ပေးထားတဲ့အတွက် တခြားလမ်းကြောင်းတွေဆီ ကျနော်တခါမှ မရောက်ဖူးခဲ့ပါ။ ဒါပေမယ့် ၁၉၉၀ ပြည့်လွန်နှစ်တွေထဲက တနေ့မှာတော့ ဟွေးနန်းခေါင်ရှိ ကျောင်းဆရာလည်းဖြစ်၊ သစ်မှောင်ခို ကုန်သည်လည်းဖြစ်တဲ့ ထိုင်းအရာရှိတဦးရဲ့ ကားကြုံနဲ့ လိုက်သွားရင်း မမျော်လင့်ဘဲ ဟွေးနန်းခေါင်-အမာရာ၊ သို့မဟုတ် ဟွေးနန်းခေါင်-အများတောင်ကြားလမ်းအတိုင်း ကျနော်ရောက်ဖူးသွားတာ ဖြစ်ပါတယ်။

အဲဒီကာလ ကျနော်တို့ခစန်း တပ်တည်နေရာဟာ တနင်္သာရီမြစ် တဖက်ကမ်းက မောင်တော်စခန်းမှာ မဟုတ်တော့ဘဲ တနင်္သာရီမြစ် ဒီဘက်ကမ်းက အမာရာရွာအနီး ရောက်နေပြီဖြစ်ပါတယ်။ တနည်းအားဖြင့် ပြောမယ်ဆိုရင်တော့ ကျနော်တို့မင်းသမီးခစန်း အခြေစိုက်တဲ့ အမာရာ သို့မဟုတ် အများတောင်ကြားလမ်း ဒေသဆိုတာဟာ ရဲဘော်သုံးကျိပ်ရဲ့ သမိုင်းဝင် စစ်ချီလမ်းကြောင်းပေါ်ကနေရာ တခုဖြစ်တယ်။

ဒုတိယကမ္ဘာစစ်၊ ဖက်ဆစ်တော်လှန်ရေး၊ နယ်ချဲ့တော်လှန်ရေးတွေနဲ့ ငါတို့စခန်းနေရာ ဆက်စပ်နေတယ်။ ငါတို့ရဲ့ စစ်အာဏာရှင်တော်လှန်ရေးနဲ့ ရဲဘော်သုံးကျိပ်ရဲ့ ကိုလိုနီနယ်ချဲ့ တော်လှန်ရေး ဆက်စပ်နေတယ်။ ဗိုလ်မှူးဗထူးလို ပုဂ္ဂိုလ်တွေ ငါတို့စခန်းကနေ ပေါ်ပေါက်လာစေရမယ်၊ ရဲဘော်သုံးကျိပ်နဲ့ ဗိုလ်မှူးဗထူးတို့အဖွဲ့ ထားဝယ်ကို သိမ်းသလိုမျိုး ငါတို့တပ်တွေလည်း ထီးထာ၊ အမို၊ ဆင်ဖြူတိုင်၊ အိုင်ဝိုင်း၊ မေတ္တာ၊ တောင်သုံးလုံးလမ်းအတိုင်း ချီတက်ပြီး ထားဝယ်ကို ၀င်သိမ်းနိုင်ရမယ်၊ အဲဒီကတဆင့် တနိုင်ငံလုံးကို သိမ်းနိုင်ရမယ်ဆိုိပြီး တချိန်က စိတ်ကူးယဉ်ခဲ့ဖူးတာတွေကို အမှတ်ရနေပါတယ်။
.........................................................................................................................................

သူပုန်ကျောင်းသားတဦးရဲ့ မာရသွန်ခရီး (၁၉)


ဒုတိယ အကြိမ်ညီလာခံနဲ့ နယ်မြေကော်မီတီကို ဖျက်သိမ်းခြင်း

၁၉၈၉ နှောင်းပိုင်း နိုဝင်ဘာလမှာတော့ ကျနော်တို့ KNU နယ်မြေကော်မတီကို ဆက်ထားဖို့ မလိုတော့ဘူး၊ စခန်းတွေအားလုံးကိုဗဟိုကော်မီတီကနေ တိုက်ရိုက်အုပ်ချုပ်တော့မယ်လို့ ဒုတိယအကြိမ် ညီလာခံနေက ဆုံးဖြတ်ချက် ထွက်လာပါတယ်။ နိုဝင်ဘာလအစောပိုင်းက မင်းသမီးစခန်းမှာ ကျင်းပတဲ့ ဒုတိယအကြိမ် ဗဟိုညီလာခံကနေ အခုလို ဆုံးဖြတ်လိုက်တာပါ။ ဒါကြောင့် မဲဆောက်မြို့ပြင်က ကျနော်တို့ရဲ့ ရုံးခန်းကို ဗဟိုကော်မတီဆီ ထိုးအပ်၊ နယ်မြေ ကော်မတီဝင်တွေအားလုံး ကိုယ့်မိခင်စခန်း ကိုယ်ပြန်ဖို့ပြင်ရပါတယ်။ ကျနော်လည်း တနှစ်ကျော် သွားလိုက်လာလိုက် (ထိုင်းလို ပိုင်ပိုင် မာမာ) နေထိုင်ခဲ့ဖူးတဲ့ မဲဆောက် ရွှေမြို့ေ တာ် ကို နှုတ်ဆက်ပြီး ကန်ချနဘူရီဘက်က မင်းသမီးစခန်းဆီ ပြန်ဖို့ပြင်ဆင်ရပါတယ်။


မင်းသမီးစခန်းတွင် ကျင်းပသည့် ဒုတိယအကြိမ် ညီလာခံမှ ရွေးကောက်ခံ ဗဟိုကော်မီတီများ
ဗဟိုကော်မတီအသစ်ရဲ့ စာရင်းကို ပြောရမယ်ဆိုရင် လူဘောင်သစ်ဒီ မိုကရက်ပါတီ ခေါင်းဆောင် အဖြစ်ကနေ တောခိုပြီး သီဘောဘိုးစခန်း ကိုယ်စားလှယ်ဖြစ် လာတဲ့ ကိုမိုးသီးဇွန်က ဥက္ကဋ္ဌ၊ ဘုရားသုံးဆူဒေသ (၁၀၁) တပ်ရင်းမှ ဒေါက်တာ နိုင်အောင်က ဒု ဥက္ကဋ္ဌ၊ မင်းသမီးစခန်း (၂၀၁) တပ်ရင်းမှ ကိုကျော်ကျော်က အထွေထွေ အတွင်းရေးမှူး၊ ဘုရားသုံးဆူဒေသ (၁၀၂) တပ်ရင်းမှ ကိုသီရိညွန့်က တွဲဖက်အတွင်းရေးမှူး ဖြစ်လာပါတယ်။


ဗဟိုဦးဆောင် ကော်မီတီဝင်တွေထဲမှာတော့ ကော့မူးရာစခန်းမှ ဒေါက်တာသောင်းထွန်းက နိုင်ငံခြားရေး၊ စောထစခန်းမှ ကိုဆန်းလင်းက ထောက်ပံ့ရေး၊ ဘုရားသုံးဆူစခန်းမှ (နောက်ပိုင်းတွင် သံလွင်စခန်း ကိုယ်စားလှယ်) ကိုထွန်းဦးက စစ်ရေး၊ ရေကျော်စခန်းမှ ဒေါက်တာ ကျော်သက်ဦးက ကျမ်းမာရေး၊ သီဘောဘိုးစခန်းမှ ကိုအောင်ထူးက စည်းရုံးရေး၊ မင်းသမီးစခန်းမှ ကိုခင်မောင်ဝင်းက ပြန်ကြားရေး၊ ဟွေစေတီစခန်းမှ ကိုမန်းထွန်းက ဘဏ္ဍာရေး၊ ကော့မူးရာစခန်းမှ ဦးယုနွယ်က တရားရေး၊ အနောက်ဘက်ဒေသ အိန္ဒိယနယ်စပ်မှ ကိုလှဌေးက လုပ်ငန်းစစ်ဆေးရေး အတွင်းရေးမှူးတွေ ဖြစ်လာပါတယ်။

ဗဟိုကော်မတီဝင်တွေထဲမှာတော့ မောတောင်စခန်းမှ ကိုထွန်းမြတ်သူ၊ မင်းသမီးစခန်းမှ ကိုကျော်ထင်၊ ဘုရားသုံးဆူစခန်းမှ ကိုကိုဦးနဲ့ ကိုမောင်မောင်ကြီး၊ ရေကျော်မှ ကိုထွန်းသိန်းနဲ့ ကိုအောင်ဟိန်း၊ မြောက်ပိုင်းဒေသ ကချင်နယ်မြေမှ ကိုကျော်ကျော် (ကချင်)နဲ့ ပအို့ဝ်နယ်မြေ အောင်ဟန်းရိုင်း စခန်းမှ မသက်တို့ ဖြစ်ပါတယ်။ မသက်ဟာ ဗဟိုကော်မတီဝင်ဖြစ်လာတဲ့ ပထမဆုံး အမျိုးသမီးပါ။ နောက်တခါ အရန်ဗဟိုကော်မတီ ၃ ဦးကိုလည်း ဒီညီလာခံကနေ ရွေးချယ်ခဲ့တယ်လို့ သိရပါ တယ်။ အဲဒီထဲက ၂ ဦးကတော့ သီဘောဘိုးစခန်းရဲ့ အတွင်းရေးမှူး ကိုအောင်နိုင်ဦးနဲ့ မင်းသမီးစခန်းရဲ့ ဒု ဥက္ကဋ္ဌ ကိုဌေးအောင်တို့ ဖြစ်ပါတယ်။

ဒုတိယအကြိမ် ညီလာခံကျင်းပနေစဉ်အတွင်း မင်းသမီးစခန်းမှ ရဲဘော် ၃၀ ခန့် ညီလာခံ ခန်းမရှေ့ရောက်လာပြီး ဆန္ဒပြပွဲတခု လုပ်ခဲ့သေးတယ်လို့ သိရပါတယ်။ သူတို့ရဲ့တောင်းဆိုချက်တွေကို အတိအကျ မမှတ်မိတော့ပေမယ့် အကြမ်းအားဖြင့်ကတော့ ပထမအကြိမ် သက်တမ်းအတွင်း နာမည်ပျက်ရှိသူ၊ လူမှန်နေရာမှန် မဖြစ်သူတွေကို ဖယ်ရှားပေးဖို့၊ အောက်ခြေရဲဘော်ထုရဲ့ ဘ၀ကို ဗဟိုခေါင်းဆောင်တွေက ဦးစားပေးစဉ်းစားဖို့ အချက်တွေ ပါတယ်လို့ သိရပါတယ်။ အဲဒီတောင်းဆိုချက်ပါတဲ့ စာတမ်းကို ညီလာခံခန်းမရှေ့မှာ ဖတ်ပြခဲ့ပြီး စခန်းဆီ ငြိမ်းချမ်းစွာ ပြန်လာခဲ့တယ်လို့ အဲဒီဆန္ဒပြပွဲအတွင်း ပါဝင်ခဲ့သူတဦးက ကျနော်ကိုပြောပြပါတယ်။

မဲဆောက်ဘက်က အခြေနေကို ပြန်ကောက်ရမယ်ဆိုရင်တော့ ဒီလိုဆုံးဖြတ်ချက်အရ ကျနော်ဟာ မဲဆောက်ရွှေမြို့တော်ကို နှုတ်ဆက်၊ ဘန်ကောက်ဘက်ကို ဦးလှည့်လာခဲ့ပါတယ်။ မဲဆောက်ကနေ တာ့ခ်မြိ်ု့အထိ ထောက်လှမ်းရေးကားကြုံနဲ့ လိုက်လာနိုင်တဲ့အတွက် တာ့ခ်နဲ့ ဘန်ကောက်ကြားမှာတော့ ဘာမှ အစစ်အဆေး မရှိတော့ပါ။ အခုခရီးစဉ်ဟာ အရင်အခေါက်တွေကလို အရေးပေါ်တာဝန်နဲ့ လူကြိုပို့ မဟုတ်တော့ဘဲ တကိုယ်တော်လေလွင့်ခြင်း အိမ်ပြန်ခရီးဆိုတော့ မော်ချစ်ကားဂိတ်ကို ရောက်တဲ့အခါမှာ ရုံးကိုချက်ချင်း မသွားသေးဘဲ ဟိုငေးဒီငေးနဲ့ ဘန်ကောက်ရွှေမြို့တော်ကို လေ့လာဖို့ အချိန်ရခဲ့ပါတယ်။

အဲဒီကာလက ဘန်ကောက်အခြေနေက အခုခေတ်လောက်အထိ သိပ်မတိုးတက်သေးပါ။ မိုးပျံရထားတွေ၊ မြေအောက်ရထားတွေ မရှိသေး။ မိုးပျံရထား ဂိတ်ဆုံးနေရာအဖြစ် အခုလူသိများနေတဲ့ မော်ချစ်ဆိုတာဟာ အဲဒီကာလက မဲဆောက်၊ ချင်းမိုင်အပါဝင် မြောက်ပိုင်းဒေသကလာတဲ့ ကားတွေစုဝေးရာ ကားဂိတ်ကြီးပေါ့။ ခေတ်မီအဆောက်ဦးတွေကလည်း အခုခေတ်လောက် မများသေးပါဘူး။

ကျနော် မှတ်မိသလောက်ဆိုရင် အဲဒီ ၁၉၈၉ ဒီဇင်ဘာ ကျနော် ဘန်ကောက်ရောက်ချိန်မှာ မော်ချစ်ကားဂိတ် ဘေးနားက Thai Military Bank အဆောက်ဦသစ်ကြီး ပြီးစီးကာစပေါ့။ မှန်တွေနဲ့ကာထားတဲ့ အထပ်ပေါင်းများစွာပါတဲ့ အဲဒီဘဏ်ကြီးကို မော်ချစ်ပန်းခြံထဲကနေ ငေးကြည့်ရင်း “RPG နဲ့ ထုထည့်လိုက်ရရင်တော့ကွာ ပြိုလိုက်မယ်ဖြစ်ခြင်း” ဆိုပြီး စိတ်ရိုင်းဝင်လာလို့ မလုံမလဲနဲ့ ဘေးဘီကို လိုက်ကြည့် မိပါသေးတယ်။

မြက်ခင်းစိမ်းစိမ်းပေါ် နေစာလှုံနေသူ၊ ကန်ထဲမှာ လှေစီးနေသူ၊ ဘီယာသောက်လိုက် အသားကင်ကိုက်လိုက် လုပ်နေသူတွေအားလုံး သူအလုပ်နဲ့သူ ရှုပ်နေပြီး ကျနော့်ကို ဘယ်သူကမှ စောင့်ကြည့်နေပုံမရ။ ဒီနိုင်ငံကလူတွေ ဒီလောက် အေးအေးချမ်းချမ်းနဲ့ ဇိမ်ခံနေချိန်မှာ ငါတို့နိုင်ငံကလူတွေက ဘာလို့အချင်းချင်း တိုက်ခိုက်နေကြသလဲဆိုပြီး ကျနော် စဉ်းစားနေမိပြန်ပါတယ်။ တချိန်တည်းမှာပဲ မြန်မာနဲ့ထိုင်းတွေရဲ့ သမိုင်းကွာခြားပုံ၊ ရန်ကုန်နဲ့ ဘန်ကောက်ရဲ့ တိုးတက်မှုကွာခြားပုံတွေအကြောင်း နှိုင်းယှဉ်စဉ်းစားနေမိပါတယ်။


မင်းသမီးစခန်းရောက် ဗဟိုကိုယ်စားလှယ်တချို့နှင့် စခန်းမှ ရဲဘော်တချို့ကို စခန်းဆေးရုံရှေ့တွင် တွေ့ရစဉ်
အဲဒီကာလ ဘန်ကောက်မြို့လယ် အခင်းအကျင်းက အခုလိုမဟုတ်သေး။ လမ်းဆုံးလမ်းခွ ဂုံးကျော် တံတားတွေ သိပ်မရှိသေး။ ကျောင်းသားရုံးတွေနဲ့ မြန်မာကျောင်းသားတွေ အများစုနေခဲ့ဖူးတဲ့ ဘန်းကပိလမ်းဆုံမှာ သီမော ဘန်းကပိ မရှိသေး။ Ramkhamhaeng တက္ကသိုလ်အနီးမှာ အာရှအားကစားရုံ မရှိသေး။ ဘန်းကပိကနေ မြောင်းပုပ်အတိုင်း လှေစီးသွားရတဲ့ ပတူနန်းအရပ်မှာ ဝေါထရိတ်စင်တာ မရှိသေး။ ဘိုင်ယုတ်တာဝါ မရှိသေး။ ယုတ်စွအဆုံး ကျောင်းသားတွေကို တတိယ နိုင်ငံသွားနိုင်ရေးအတွက် အဓိကကူညီပေးခဲ့တဲ့ UN ရုံးကြီးတောင် ဆောက်လို့မပြီးသေးပါဘူး။

အဲဒီရုံးကြီး စတင်ဆောက်လုပ်နေဆဲဖြစ်ပီး အဲဒီရုံးနောက်ကျော ရေမြောင်းဘေးနားက James Guest House မှာတောင် ကျနော် တည်းဖြစ်လိုက်ပါသေးတယ်။ တကယ်ကတော့ ကိုယ့်စရိတ်နဲ့ကိုယ် သွားတည်းတာ မဟုတ်ပါဘူး။ ကျနော်တို့ မဲဆောက်ရုံးမှာတုန်းက ကူညီခဲ့ဖူးတဲ့ အာရပ်နိုင်ငံတခုမှ အပ္ဗဒူလာ ဆိုတဲ့ ပုဂ္ဂိုလ်ဆီ သွားလည်ရင်း၊ နောက် မြန်မာ ဒုက္ခသည်တွေအတွက် စကားပြန်လုပ်ပေးနေတဲ့ အဲဒီမှာတည်းနေတဲ့ မြန်မာတချို့၊ ဒုက္ခသည်အောင်ကာစ ကျောင်းသားတချို့နဲ့ စကားပြောရင်း ရောက်သွားခြင်းမျှသာ ဖြစ်ပါတယ်။

မြို့ပြသူပုန်နဲ့ ဒုက္ခသည် ခေတ်ဦးကာလ

အထက်မှာ ပြောခဲ့တဲ့ အဆောက်အဦတွေ မရှိသေးပေမယ့် စီးလုံလမ်းက ပက်ပုန်း၊ ရမ်ဂဟန်လမ်းနဲ့ ဆူခွန်ဗစ် ဆွိုင် ၇၁ လမ်းထိပ်က နာဆာနိုက်ကလပ်ရုံတွေ ရှိနေပါပြီ။ ဘန်ကောက်ကို အစောဆုံးရောက်လာတဲ့ ကျောင်းသားဒုက္ခသည် အနည်းအကျဉ်းနဲ့ ဘန်ကောက်မှာ သောင်တင်နေတဲ့ သဘောင်္သား အနည်းအကျဉ်းကြားမှာ ဒီညကပွဲရုံတွေက အတော်ခေတ်စားနေပါပြီ။ ဒီလိုနဲ့ အဲဒီသဘောင်္သားတွေရဲ့ လမ်းပြမှု၊ တလကို ဘတ် ၂၅၀၀ စီ ထောက်ပံ့ကြေးရနေပြီဖြစ်တဲ့ ဒုက္ခသည်အောင်ပြီးသူ မောင်ကျောင်းသားတွေရဲ့ စပွန်ဆာပေးမှုနဲ့ ၁၉၈၉ ဒီဇင်ဘာမှာကတည်းက အဲဒီနေရာတွေကို ကျနော် ရောက်ဖူးခဲ့တယ်ဆိုပါတော့။

နိုက်ကလပ်သွားပြီး ဘီယာသောက်တယ်ဆိုတာဟာ အခုလို တတိယနိုင်ငံကိုရောက်ပြီး လွတ်လပ်တဲ့ လူ့အဖွဲ့စည်းက ပုဂ္ဂိုလ်တဦးအဖို့ ဘာမှအထူးဆန်းမဟုတ်တဲ့ လူ့သဘာဝ တခုသာဖြစ်ပေမယ့် တောထဲက တက်လာကာစ အဲဒီအချိန်ကတော့ ဒါတွေဟာ တကယ့်ပြဿနာ။ တောခိုကာစမှာ အရက်မသောက်ရ၊ ရည်စားမထားရ၊ မိန်းမ မယူရ၊ ဘာမလုပ်ရ၊ ညာမလုပ်ရဆိုးပြီး ပညတ်ချက်များစွာနဲ့ သူတော်စင်တွေလို ကျင့်ကြံနေတဲ့အချိန်မှာ ဒီလိုမျိုးနေရာကိုသွားပြီး ဘီယာထိုင်သောက်ခဲ့တယ်ဆိုတာဟာ ရာဇာဝတ်မှု ကျုးလွန်သလိုမျိုး အမြင်ခံရနိုင်ပါတယ်။ ဒါကြောင့် ဒီနေရာမျိုးမှာသွားပြီး ဘီယာသောက်ဖူးတယ်ဆိုတာကို တောထဲမှာနေစဉ်တုန်းက ကျနော်သိပ် မပြောရဲခဲ့ပါဘူးခင်ဗျား။

ဒါပေမယ့် အခုနှစ် ၂၀ကျော်ကြာပြီးလို့ ကမ္ဘာလှည့်ခရီးသည်တဦးအဖြစ် အဲဒီနေရာတွေဆီ နောက်တခေါက် ရောက်သွားချိန်မှာ အရင်လို စိတ်ခံစားမှုမျိုး ကျနော်မှာ မရှိတော့ပါ။ တဆက်တည်း ကျနော် စဉ်းစားမိတာကတော့ ကျနော့်ကို စပွန်ဆာပေးပြီး ပက်ပုန်းခေါ်သွားတဲ့ ခေတ်ဦးပိုင်း ဒုက္ခသည်နဲ့ တတိယနိုင်ငံကိစ္စပါ။ ၁၉၈၉ ဒီဇင်ဘာမှာ တောထဲကနေ ဘန်ကောက်တက်ပြီး ဒုက္ခသည် လျှောက်သူဦးရေ ဒါဇင်ဂဏန်းလောက်ပဲရှိသေးပြီး မနီလိုင်စခန်းတွေ၊ တတိယနိုင်ငံသွားရေး အစီစဉ်တွေလည်း မပေါ်ပေါက်သေးပါ။ နောက်တခါ နယ်စပ်နဲ့ တောတွင်းအခြေနေကလည်း ကောင်းနေဆဲ။ စိတ်ဓာတ်တွေလည်း  တက်ကြွနေဆဲဆိုတော့ ဒုက္ခသည်လျှောက်သူတွေကို သိပ်အကောင်းမမြင်ကြပါ။ တကိုယ်တော် ထွက်ပေါက်ရှာသူတွေ၊ အချောင်သမားတွေအဖြစ် အမြင်ရှိကြပြီး ကျနော်ကိုယ်တိုင်လည်း အဲဒီ အချိန်က အဲဒီလိုအမြင်မျိုး ရှိခဲ့ပါတယ်။

ကျနော် မှတ်မိသလောက်ဆိုရင် ၁၉၉၀ နှစ်လယ်လောက်မှာ အဲဒီမြို့ပြသူပုန် ဒုက္ခသည်တွေကို ဝေဖန်တဲ့ “သုံးထောင်စားများသို့ အိတ်ဖွင့်ပေးစာ” ဆိုပြီး စာတစောင် ကျနော်ထုတ်ခဲ့ဖူးပါတယ်။ တောတွင်းက ကျောင်းသားတဦးဆိုတဲ့ အမည်နဲ့ မင်းသမီးစခန်းကနေ ကျနော် ရေးပို့လိုက်တဲ့ အဲဒီအိတ်ဖွင့်ပေးစာကို စိတ်ဆိုးမာန်ဆိုးနဲ့ တုန့်ပြန်သူကတော့ ဒုက္ခသည်အောင်ပြီးသူ ကဗျာဆရာ တောကျောင်းသားအမည်ရ ကိုကျော်ဇေယျ (အရေးပေါ်ညီလာခံအခန်းမှာ ကျနော်တင်ပြဖူးတဲ့ ပုသိမ်ကောလိပ်မှ) ဖြစ်ပါတယ်။ “သုံးထောင်စား၊ သုံးထောင်စားဆိုပြီး၊ အမုန်းဘောင်မပွားကြပါနဲ့” လို့ အစချီတဲ့ ကဗျာရှည်တပုဒ်နဲ့ သူက တုန့်ပြန်လိုက်တာပါ။ အဲဒီနောက်ပိုင်းမှာတော့ တောတွင်းကသူပုန်နဲ့ မြို့ပြရောက် သူပုန်လူထွက်တွေကြား သဘောတရားအရ အတော်လေး အငြင်းအခုန် ဆက်ဖြစ်ခဲ့ပါတယ်။

ဒါပေမယ့် ၁၉၉၁ အစောပိုင်းမှာတော့ ပြည်ပရောက်ကျောင်းသားတွေ စုဖွဲ့ထားတဲ့ ပြည်ပရောက် အမျိုးသား ကျောင်းသားများအဖွဲ့ – မြန်မာနိုင်ငံ (ONSOB) ကနေ မင်းသမီးခစန်းအတွက် ပေးအပ်တဲ့ အလှုငွေ ဘတ် ၃၀၀၀ ကို ကျနော်လက်ခံခဲ့ဖူးပါတယ်။ မင်းသမီးစခန်း ထောက်ပံ့ရေးတာဝန်ခံအဖြစ် အဲဒီငွေကို ကျနော် လက်မှတ်ထိုးပြီး လက်ခံခဲ့တဲ့နေရာကတော့ အခု TACDB (Thai Action Committee for Democracy in Burma) ရုံးရှိတဲ့  SCC ခေါ် ခရစ်ယာန်ကျောင်းသားစင်တာမှာ ဖြစ်ပါတယ်။ အဲဒီ နောက်ပိုင်း တောတွင်းကျောင်းသားနဲ့ မြို့ပြကျောင်းသားတွေအကြား အပြန်အလှန် စွပ်စွဲငြင်းခုန်မယ့်အစား ပူးပေါင်းဆောင်ရွက်တာက ပိုအကျိုးရှိမယ်လို့ ကျနော်ထင်ခဲ့ပေမယ့် အများစုကြားမှာတော့ ငြင်းခုန်မြဲ ဆက်လက်ငြင်းခုန်ခဲ့ကြပါတယ်။

အခုအနှစ် ၂၀ ကျော်ကြာပြီးတဲ့ အခါမှာတော့ မြို့ပြသူပုန်နဲ့ တတိယနိုင်ငံရောက် ဒုက္ခသည်ဦးရေက တကယ့်အများစုကြီး ဖြစ်သွားပြီး တောထဲမှာကျန်နေသူက အတော်လေးကို နည်းသွားပြီ ဖြစ်ပါတယ်။ နောက်တခါ ABSDF ဗဟို ကိုယ်တိုင်လည်း သဘောထားတွေ ပြောင်းလဲလာပြီး တတိယနိုင်ငံရောက် ရဲဘော်ဟောင်းတွေဆီကနေ ရန်ပုံငွေ အလှူခံတဲ့အလုပ်ကို တရားဝင်လုပ်လာတာကိုလည်း တွေ့လာရပါတယ်။ ဆိုတော့ လူတွေရဲ့ တန်ဖိုးထားမှု၊ စံသတ်မှတ်မှု၊ ဥပဒေ ပြုမှုတွေဆိုတာတွေဟာ ကာလ၊ ဒေသ၊ ပယောဂအပေါ်လိုက်ပြီး ပြောင်းလဲသွားတတ်သလားဆိုပြီး ကျနော် စဉ်းစားနေမိပြန်ပါတယ်။

ထူးဆန်းတဲ့ ဘန်ကောက်ညခင်းတွေ၊ နေ့ခင်းတွေကို သီတင်းတပတ်လောက် တကိုယ်တော် လေလွင့်ခြင်းခရီးနှင် လေ့လာပြီးတဲ့အခါမှာတော့ မင်းသမီးစခန်းဆီ ပြန်ဖို့အတွက် ဆူခွန်ဗစ် ဆွိုင် ၇၁ ထဲမှာ ဖွင့်ထားတဲ့ မင်းသမီးစခန်းရဲ့ ရုံးခန်းဆီ ကျနော်ရောက်လာခဲ့ပါတယ်။ ရုံးခန်းဆိုပေမယ့် ဗဟိုရုံးလို ၂ ထပ်အိမ် Town House မျိုးမဟုတ်။ ၁၅ ပေ၊ ၁၀ ပေ ပတ်လည်လောက်ရှိတဲ့ အခန်းတခုကို ငှားထားခြင်းသာ ဖြစ်ပါတယ်။ အခန်း ၉ မှာ တင်ပြခဲ့တဲ့အတိုင်း ဗဟိုရုံးနဲ့ နယ်မြေရုံး၊ ဗဟိုရုံးနဲ့ စခန်းရုံး ဘာကြောင့်တရုံးတည်း မလုပ်နိုင်ဘဲ တဖွဲ့တရုံးစီ ဖွင့်ထားသလဲဆိုတာကိုတော့ အဲဒီ ကာလက ကျနော်စဉ်းစားဖို့ တကယ်ကို သတိမရခဲ့ပါဘူး။


ထိုင်းနိုင်ငံ ဘန်ကောက်မြို့ရှိ န၀တအစိုးရ သံရုံးရှေ့တွင် ဆန္ဒပြနေကြသော ONSOB မှ ကျောင်းသားများ
မင်းသမီးခစန်း ဘန်ကောက်ရုံးခွဲမှာ ကျနော် ပထမဆုံး တွေ့ရသူတွေကတော့ ဦးဟန်လင်း၊ ကိုဉာဏ်စိုး၊ ကိုဇော်မင်းနဲ့ ကိုဝင်းမင်းတို့ ဖြစ်ပါတယ်။ ဦးဟန်လင်းကတော့ ကိုတင်လေးနဲ့အတူ ပထမဆုံး ABSDF ဖွဲ့စည်းရေး သီဘောဘိုးအစည်းဝေးကို တက်ခဲ့သူ၊ ပြီးတော့ စခန်းကော်မီတီ အဆက်ဆက်ရဲ့ ပြန်ကြားရေးတာဝန်ခံလည်း ဖြစ်ပါတယ်။ နယူးယောက် ကုလသမဂ္ဂရုံးချုပ်ဆီလမ်းလျှောက် ချီတက် ဆန္ဒပြသူအဖြစ်လည်း လူသိများပါတယ်။ ၂၀၀၈ ခုနှစ်မှာ ကွယ်လွန်သွားပါပြီ။

ကိုဉာဏ်စိုးက စခန်းကော်မတီ ဘဏ္ဍာရေးမှူးပါ။ ၂၀၀၀ ပြည့်နှစ်ဝန်းကျင်မှာ ကွယ်လွန်ပါတယ်။ ကိုဇော်မင်းကတော့ စခန်းကော်မတီဝင်၊ ပြီးတော့ (၂၀၁) တပ်ရင်းရဲ့ ပင်လယ်ပြင် စစ်ကြောင်းမှူးပါ။ ၁၉၉၃ ခုနှစ်နှောင်းပိုင်းက ရနောင်းမှာ လုပ်ကြံခံရသလိုလိုနဲ့ ပျောက်ဆုံးသွားသူပါ။ ကိုဝင်းမင်းကတော့ မင်းသမီးစခန်းမှာ ဆရာဝန်မရှိလို့ ဘုရားသုံးဆူကနေ လာကူပေးနေတဲ့ ဆေးကျောင်းသားပါ။ နောက်ပိုင်း စခန်းကော်မတီ ကျန်းမာရေးတာဝန်ခံ၊ ဗဟိုကော်မတီဝင် တာဝန်တွေ ယူခဲ့ပါတယ်။ အခု ဗဟုဖွံ့ဖြိုးရေးအဖွဲ့ဝင်၊ နိုင်ငံရေးအကဲခတ်အဖြစ် လူသိများနေသူပါ။

အဲဒီရုံးခန်းမှာ စခန်းအခြေနေတွေကို အကြမ်းဖျဉ်းဆွေးနွေးပြီး နောက်တရက်မှာတော့ မင်းသမီး စခန်းဆီပြန်ဝင်ဖို့ ဘန်ကောက်ကနေ ကန်ချနဘူရီမြို့ဆီ ကျနော်တို့ဆင်းလာပါတယ်။

...............................................................................................................................................

သူပုန်ကျောင်းသာတဦးရဲ့ မာရသွန် ခရီး (၁၈)

လက်ပလောင်အိုမှသည် တောတွင်းတက္ကသိုလ်ဆီသို့

စန်ခရဘူရီကနေ ကန်ချနဘူရီအထိ ရိုးရိုးဘတ်စကားအနီ၊ ကန်ချနဘူရီကနေ ဘန်ကောက်ကိုတော့ အဲယားကွန်းအစိမ်းရောင်ကားကို စီးပြီး ညနေ ၆ နာရီကျော် ၇ နာရီလောက်မှာ ဘန်ကောက် စိုင်တိုင်းမိုင် (တောင်ပိုင်းဒေသကားဂိတ်) ဆီ ကျနော်တို့ ၅ ဦး ချောချောမောမော ဆိုက်ရောက်လာပါ တယ်။ ဒါပေမယ့် ဘန်ကောက်ကိုရောက်တာနဲ့ ပြဿနာက စပါလေရော။


သီဘောဘိုးစခန်းမှ တောတွင်းတက္ကသိုလ်နဲ့ လုံခြုံရေးတာဝန်ကျ တပ်ဖွဲ့ဝင်တချို့
ကိုယ့်ပုံကိုယ် မြို့သားပုံပေါက်နေပြီလို့ ထင်ထားပေမယ့် ထိုင်းရဲတွေ မျက်စိထဲမှာတော့ ကျနော်တို့ပုံတွေက ဖမ်းချင်စရာကြီး ဖြစ်နေပုံရပါတယ်။ ကျနော်တို့ ၀တ်စားထားတဲ့ပုံက ထိုင်းထောက်လှမ်းရေးလိုလို ပုံဖမ်းထားပေမယ့် တရုတ်လုပ် စစ်ကျောပိုးအိတ်တလုံးစီ လွယ်လာမိတယ်ဆိုတာကို သတိမထားဖြစ်လိုက်ပါ။ ဆိုတော့ ငွေညှစ်ဖို့ စောင့်နေတဲ့ ရဲတွေအတွက် သားကောင်ဖြစ်ခဲ့ရပြန်ပေါ့။
ဒါပေမယ့် ကျနော်တို့ကို ငွေညှစ်တဲ့ရဲက ယူနီဖောင်းဝတ်မထားဘူး။ ကျနော်တို့ငှားတဲ့ တက္ကစီပေါ် အတင်းတက်လာပြီး မင်းတို့ ဘယ်သူတွေလဲ၊ ဘယ်ကိုသွားမှာလဲ၊ ဘတ် (အလုပ်သမားလက်မှတ်) ပါလားဆိုပြီး စစ်ပါတယ်။ တကယ်ကတော့ စိုင်တိုင်းမိုင်ကနေ လပလောင် (Lat Phrao) လမ်းရှိ ဗဟိုဆက်သွယ်ရေးရုံးဆီ သွားဖို့ တက္ကစီငှားစဉ် လပလောင်ကို မြန်မာတွေခေါ်တဲ့အတိုင်း လက်ပလောင်အို ဆိုပြီး ပြောလိုက်တာမှာ ကားသမားက နားမလည်လို့ ဘေးကလူကို မေးရာကနေ အဲဒီငွေညှစ်တဲ့လူ ကားပေါ်ရောက်လာတာ ဖြစ်ပါတယ်။

ဒါပေမယ့် အဲဒီရဲက ယူနီဖောင်း ဝတ်မထားတော့ ကျနော်တို့က ရဲမှန်းမသိ။ ငွေညှစ်မယ့် လူဆိုး၊ လူလိမ်တဦးဦး လို့ထင်ပြီး “ဒီကောင် ငါတို့ကို တခုခုလုပ်ရင်တော့ ၀ိုင်းချမယ်” ဆိုပြီး ကျနော်က ပဒိုလောင်း ၄ ဦးကို အမိန့်ပေးထားပါတယ်။ အဲဒီလူနဲ့ ကားသမားကလည်း ကျနော်တို့ပြောနေတဲ့ ထားဝယ်စကားကို နားမလည်ပေမယ့် ကျနော်တို့ရဲ့ မျက်နှာအနေထားနဲ့ တကယ်လုပ်မယ့်ပုံကိုများ ခန့်မှန်းမိသလားမသိပါ။ ထောက်လှမ်းရေးလက်မှတ်ကို ဖင်ပြန်ခေါင်းပြန် ကြည့်ပြီးတဲ့နောက် အဲဒီလူ ကားပေါ်ကနေ ပြန်ဆင်းသွားပါတယ်။ ပြီးတော့ တက္ကစီသမားက တောင်းတောင်းပန်ပန်နဲ့  လပလောင်အို ၁၀၁ ဆွိုင် ၁ ထဲက ရုံးခန်းရှေ့အထိ လိုက်ပို့ပေးခဲ့ပါတယ်။ ကျနော်တို့လည်း ဒီတော့မှ သက်ပြင်းချနိုင်ပြီး ထိုင်းစကား မပီတဲ့ဒုက္ခကို ပြောရင်း ၀ိုင်းရယ်ကြပါတယ်။

ဘန်ကောက်ကနေ မဲဆောက်အဆင်းမှာတော့ နာမည်ကြီး တာခ်ခရိုင် တောင်ကြားဂိတ်မှာ အစစ်ခံရပြန်ပါတယ်။ ဒီတောင်ကြားဂိတ်ဟာ မြန်မာတွေကို ဖမ်းတဲ့နေရာမှာ နာမည်အကြီးဆုံးနေရာဖြစ်ပြီး အခုချိန်အထိ နာမည်ကြီးနေဆဲ ဖြစ်ပါတယ် (တချို့ကုန်တင်ကားတွေကို သံဆူးချွန်နဲ့ထိုးပြီး ရှာတဲ့အတွက် သစ်သီးသစ်ရွက်တွေကြား ပုန်ပြီးလိုက်လာတဲ့ မြန်မာနိုင်ငံသားတွေ ဒဏ်ရာရတာတွေ၊ အသက်ရှု ပိတ်ပြီး သေဆုံးတဲ့အထိ ဖြစ်ခဲ့ရတာတွေ ရှိခဲ့ပါတယ်)။

မဲဆောက်-ဘန်ကောက်ကို အသွားအလာများတဲ့ ဗဟို ကော်မီတီဝင်တွေဆီကနေ  ကြားဖူးတဲ့စကားတွေအရ အိပ်ပျော်နေသူကို ရဲကနှိုးပြီး စစ်လေ့မရှိဘူးဆိုပါတယ်။ ဒါကြောင့် စစ်ဆေးရေးရဲ ကားပေါ်တက်လာရင် အားလုံး အိပ်ပျော်ချင်ယောင်ဆောင်နေဖို့ ပဒိုလောင်း ၄ ဦးကို ကျနော်က ညွှန်ကြားထားပါတယ်။ ဒါပေမယ့် ကျောင်းသားတွေနဲ့ ခဏခဏ တိုးဖူးပြီး မြန်မာစကားတောင် နည်းနည်းတတ်နေပြီဖြစ်တဲ့အထိ တိုးတက်ပြောင်းလဲနေတဲ့ ရဲတွေရဲ့အခြေနေကို ကျနော်တို့က မသိလိုက်။ ကားပေါ်တက်လာတဲ့ ရဲက တခါတည်းတန်းပြီး အိပ်ပျော်နေတဲ့လူတွေကိုမှ ရွေးပြီး အရင်ဆုံး စစ်တော့တာပါပဲ။ ဒီလိုနဲ့ အိပ်ပျော်ချင်ဟန် ဆောင်နေတဲ့ ကျနော်တို့ ၅ ဦးထဲက အသားအညိုဆုံး ပုဂ္ဂိုလ် ကိုတင်စိုးကို ရဲက ဆွဲပါလေရော။

“ဘတ်ရှိလား၊ လက်မှတ်ပါလား” ဆိုပြီး အဲဒီရဲက မြန်မာလို မပီတပီနဲ့ မေးနေပါတယ်။ ဒီတော့မှ ခပ်တည်တည်နဲ့ ထိုင်းယောင်ဆောင်နေတဲ့ ကျနော်လည်း မနေသာတော့ပဲ ထောက်လှမ်းရေးလက်မှတ်ကို ထုတ်၊ ထိုင်းတ၀က်၊ အင်္ဂလိပ်တ၀က် လက်ဟန်ခြေဟန်တ၀က်နဲ့ တတ်သမျှမှတ်သမျှ ၀င်ရှင်းရပါတယ်။ ဒါပေမယ့် အဲဒီရဲက လက်မခံဘဲ ကျနော်တို့ ၅ ဦးကို ကားပေါ်ကဆွဲချပြီး ဂိတ်တဲထဲ ခေါ်သွားပါတယ်။ နောက်ဆုံးမှာတော့ တာဝန်အကြီးဆုံး ရဲအရာရှိက ထောက်လှမ်းရေးလက်မှတ်ကို ဖင်ပြန်ခေါင်းပြန် ကြည့်ပြီး ကားပေါ်ပြန် တင်ပေးလိုက်မှပဲ ဒုတိယမ္ပိ သက်ပြင်းချနိုင်ပါတယ်။


တောတွင်းတက္ကသိုလ်နဲ့ နိုင်ငံရေးမှူးသင်တန်း

မဲဆောက်ကိုရောက်ပြီး နောက်တရက်မှာတော့ မဲဆောက်-မော်လီချိုင်း (မလူးချိုင်း) လိုင်းကားကိုစီးပြီး သီဘောဘိုးစခန်းဆီ ကျနော်တို့ ၅ ဦး ခရီးနှင်ခဲ့ပါတယ်။ သီဘောဘိုးဟာ ကျနော်တို့ ကျောင်းသားတွေအကြား နာမည်အကြီးဆုံး စခန်းတခုဖြစ်ပေမယ့် အဲဒီအချိန်ထိ ကျနော်တခါမှ မရောက်ဖူးသေးပါ။ ကားဂိတ်ဆုံးတဲ့ ထိုင်းရွာကနေ သောင်ရင်းမြစ်ဖျားကို ဖြတ်သွယ်ထားတဲ့ ကြိုးတံတားလေးကို ၁၀ မီတာလောက် ဖြတ်လျှောက်လိုက်တာနဲ့ KNU လုံခြုံရေးဂိတ်ကို ရောက်ပါတယ်။

ကံကဆိုးချင်တော့ KNU လုံခြုံရေးဂိတ် အနီးနားမှာ ကျနော်နဲ့သိတဲ့ ကျောင်းသားတဦးမျှမရှိ။ ကျနော်တို့မှာ ထိုင်းထောက်လှမ်းရေး လက်မှတ်ရှိနေတယ်ဆိုပြီး ဗိုလ်မှူးစိုးစိုးဆီက လက်မှတ်ကို ယူမလာခဲ့တာကလည်း ကျနော်တို့ အမှားပါပဲ။ နယ်မြေကော်မီတီက ရေးပေးလိုက်တဲ့ ခရီးသွားလက်မှတ်ကို ထုတ်ပြပေမယ့် KNU ဂိတ် စစ်ဆေးရေးအရာရှိက လက်မခံပါဘူး။


တောတွင်းတက္ကသိုလ်မှာ နိုင်ငံရေးသင်တန်းတခု ပေးနေစဉ်
သီဘောဘိုးမှာ ဘယ်သူနဲ့သိလဲ၊ ဘယ်ကနေ ဘယ်လိုရောက်လာတာလဲ၊ မေးခွန်းတွေက စုံနေတာပါပဲ။ ကျနော်တို့ကလည်း ဘန်ကောက်က ထိုင်းရဲကိုတောင် ရိုက်မယ်နှက်မယ် ဟန်ရေးပြပြီး လုပ်လာသူတွေဆိုတော့ အဲဒီအရှိန်က မပျောက်သေး။ ဒီလိုနဲ့ ဂိတ်မှူးနဲ့ကျနော် အခြေအတင်စကားများရင်း ၁၅ မိနစ်လောက် ကြာသွားတယ်လို့ ထင်ပါတယ်။

နောက်ပိုင်းမှ ပြန်သိရတာကတော့ ကျနော့်ပုံစံဟာ မြို့ပေါ်က ထိုင်းရဲတွေအတွက် ထိုင်းနိုင်ငံသားတဦးလို ပုံမှားရိုက်လို့ ရလောက်အောင် ထိုင်းတဦးနဲ့ တူနေပေမယ့် တောထဲက KNU စစ်ဆေးရေးအရာရှိတဦးရဲ့ အမြင်မှာတော့ တောထဲကကျောင်းသားနဲ့ မတူဘဲ ဘန်ကောက်က ဆင်းလာတဲ့ ကျောင်းသားလိုလို၊ သံရုံးကလူလိုလို၊ ပွဲစားလိုလို ပုံပေါက်နေတဲ့အတွက် မယုံသင်္ကာဖြစ်ပြီး အခုလို အသေချာအစစ်ခံခဲ့ရတာလို့ ပြန်သိခဲ့ရပါတယ်။
နောက်ဆုံးမှာတော့ သီဘောဘိုး စခန်းကော်မီတီနဲ့ ၀ါကီတော်ကီ အဆက်အသွယ် ရသွားပြီး သွားလို့ရပြီလို့ ဂိတ်မှူးက ပြောပါတယ်။ တကယ်က နယ်စပ်ဂိတ်နဲ့ သီဘောဘိုးရွာက သိပ်မဝေး၊ ၁၅ မိနစ်လောက် လမ်းလျှောက်လိုက်ရုံနဲ့ ရောက်ပါတယ်။

ဟော … သီဘောဘိုးရွာကို ရောက်ပါပြီ။ ဓာတ်ပုံထဲမှာ မြင်ထားရတဲ့အတိုင်းပါပဲ။ ကလက်ဒေးရွာနဲ့ အတော်အဆင်တူပါတယ်။ ဒါပေမယ့် သီဘောဘိုးက ပိုစည်းကားပြီး ရေလိုင်း၊ မီးလိုင်း ဆက်သွယ်ထားမှုက ပိုစနစ်ကျတယ်လို့ ကျနော် ထင်မိပါတယ်။ အဲဒီမှာ ခနနား၊ အအေးတခွက်စီသောက်ပြီး နောက်ထပ် ချောင်းတခုကိုဖြတ်၊ တောလမ်းတွေအတိုင်း နာရီဝက်ကျော်ကျော် လမ်းလျှောက်ပြီးချိန်မှာတော့ ကျောင်းသားတွေရဲ့ သီဘောဘိုးစခန်းနဲ့ တောတွင်းတက္ကသိုလ်ကို ရောက်ပါတယ်။

သီဘောဘိုးမှာ တွေ့ရတဲ့ အဆောက်ဦတွေက ကျနော်တို့ မင်းသမီးနဲ့ ဘုရားသုံးဆူကလို ၀ါးတဲ၊ သက်ကယ်မိုးတွေ မဟုတ်သလို ကလက်ဒေး သံလွင်ဘက်ကလို သစ်စက်ကထွက်တဲ့ ကျွန်းသစ်တွေနဲ့ အခိုင်အမာ ဆောက်ထားတာမျိုးလဲ မဟုတ်ပါ။ ဒီ ၂ ခုကြားက အခြေနေလို့ မြင်မိပါတယ်။ ခြေသလုံး လောက်ရှိတဲ့ ကျွန်းသစ်နဲ့ အခြားသစ်မာတွေကို တောထဲကနေ အပင်လိုက် ခုတ်ယူလာပုံရတဲ့ တိုင်ငယ်တွေနဲ့ ဆောက်ထားတဲ့ မြေစိုက်တဲတွေဖြစ်ပြီး အမိုးကတော့ အင်ဖက်ဖြစ်ပါတယ်။ ပြီးတော့ ကျွန်းတောတွေကြားမှာ စခန်းဆောက်ထားတာမို့ ကျနော်တို့ မင်းသမီး၊ ဘုရားသုံးဆူစခန်းတွေနဲ့စာရင် အရိပ်ကောင်းပြီး နည်းနည်း ပိုအေးတဲ့သဘော၊ ငှက်ဖျားပိုထူမယ့်သဘောရှိပါတယ်။

အဲဒီကာလ စခန်းကော်မီတီ ဥက္ကဌက အက်စ်အောင်လွင် (အခု ဂျာမနီ)၊ အတွင်းရေးမှူးက ကိုအောင်နိုင်ဦး (နောက်ပိုင်း ဗဟိုနိုင်ငံခြားရေးဌာန တာဝန်ခံ၊ အခု ဗဟုဖွံ့ဖြိုးရေးအင်စတီကျု အဖွဲ့သားနဲ့ နိုင်ငံရေးအကဲခတ်အဖြစ် လူသိများနေသူ) ဖြစ်ပါတယ်။ တောတွင်းတက္ကသိုလ် ကျောင်းအုပ်ကြီးကလည်း ကိုအောင်နိုင်ဦးပဲဖြစ်ပြီး ပဒိုသင်တန်း သို့မဟုတ် နိုင်ငံရေးမှူးသင်တန်းကို တာဝန်ယူထားတဲ့ သင်တန်းမှူးကတော့ ရှေ့နေ ဦးအောင်ထူး (နောက်ပိုင်း ဗဟိုအတွင်းရေးမှုး ၁ နဲ့ မြန်မာနိုင်ငံ ရှေ့နေများကောင်စီ အတွင်းရေးမှူးဖြစ်လာသူ) ဖြစ်ပါတယ်။ ဦးအောင်ထူးဆီမှာ ပဒိုလောင်းလျာ ၄ ဦးကို အသေချာ အပ်နှံပြီးတဲ့နောက် သီဘောဘိုးကနေ မဲဆောက်ကို ကျနော် ပြန်လာခဲ့ပါတယ်။

မဲဆောက်ဒေသကနေ မင်းသမီးဘက်ဆီ အပြီးမပြန်ခင်မှာ နိုင်ငံခြားဧည့်သည်တွေကို ပို့ရင်းနဲ့ သီဘောဘိုးစခန်းကို နောက်ထပ် ၃ ခေါက်လောက် ထပ်ရောက်သေးတယ်လို့ ထင်ပါတယ်။ နောက်တခါ သီဘောဘိုးရဲ့ စခန်းခွဲတခုဖြစ်တဲ့ မောကဲစခန်းကိုလည်း ၂ ခေါက်လောက် ကျနော်ရောက်ခဲ့ပါသေးတယ်။ အဲဒီကာလ မော်ကဲစခန်းဥက္ကဌဟာ ဦးတင်ရွှေ (ကွယ်လွန်) ဖြစ်ပြီး စာရင်းစစ်တာဝန်နဲ့ ရောက်ခဲ့တာပါ။ နောက်တခါ ဝေါလေရွာဘက်ကိုလည်း ကျနော် တခေါက်ရောက်သေးပေမယ့် တပ်မဟာ ၆ အတွင်းပိုင်းကိုတော့ တခါမှ မရောက်ဖူးလိုက်ပါ။ နောက်ထပ် စာရင်းစစ်တာဝန်နဲ့ ကျနော်ရောက်ဖြစ်ခဲ့တဲ့ခစန်း တခုကတော့ ရေကျော်စခန်းဖြစ်ပါတယ်။

စောထစခန်းကိုတော့ Burma Coordinating Group (BCG) မှ နိုင်ငံခြားအလှူရှင် ဧည့်သည်တွေကို လိုက်ပို့ရင်းနဲ့ တခေါက်ရောက်ခဲ့ပါတယ်။ BCG ဟာ အဲဒီကာလက ကျောင်းသားစခန်းတွေကို ရိက္ခာနဲ့ နေရေးထိုင်ရေး အဓိက ကူညီထောက်ပံ့ပေးနေတဲ့ အဖွဲ့ကြီးဖြစ်ပါတယ်။ ကျန်းမာရေးကိစ္စကိုတော့ နယ်စည်းမခြား ဆရာဝန်များအဖွဲ့ (MSF) က ကူညီပေးပါတယ်။
အဲဒီကာလဟာ ကျောင်းသားလှုပ်ရှားမှုသတင်း အထွတ်အထိပ် ရောက်နေချိန်ဖြစ်တာမို့ နိုင်ငံတကာက အလွတ်သတင်းထောက် အတော်များများကိုလည်း ကျောင်းသားစခန်းတွေမှာ လနဲ့ချီနေပြီး သတင်းယူနေတာကို တွေ့ရဖူးပါတယ်။ အဲဒီထဲက ကျနော်မှတ်မိနေသူ ၂ ဦးကတော့ ABSDF အကြောင်း ရုပ်သံ မှတ်တမ်းရိုက်နေတဲ့ Image Asia မှ သြစတေလျးသူ သတင်းထောက် ညီအစ်မနှစ်ဦး ဖြစ်ပါတယ်။ သူတို့ဟာ မြန်မာစကားကိုလည်း အတော်ပြောတတ်ပြီး ကျောင်းသားတွေနဲ့ ရင်းရင်းနှီးနှီးနေခဲ့တဲ့ အနောက်တိုင်းသူတွေအဖြစ် ကျနော်အမှတ်ရ နေပါတယ်။


သီဘောဘိုးစခန်းမှ တပ်ဖွဲ့ဝင်တချို့ စစ်ကြောင်းထွက်ရန် ပြင်နေစဉ်
KNU နယ်မြေရှိ ကျောင်းသားစခန်း ၇ ခုထဲက ကျနော် မရောက်ဖူးလိုက်တဲ့ တခုတည်းသော စခန်းကတော့ မင်းသမီးစခန်းနဲ့ အနီးဆုံး၊ မင်းသမီးစခန်းရဲ့ အောက်ဘက်နား မြိတ်ဒေသမှာရှိတဲ့ မောတောင်စခန်းပဲ ဖြစ်ပါတယ်။

ကျနော်ဟာ မြန်မာနိုင်ငံမှာနေစဉ် ကျောင်းသားဘ၀တုန်းကလည်း ထားဝယ်ကနေ မော်လမြိုင်၊ ပဲခူး၊ ရန်ကုန်၊ မန္တလေး၊ စစ်ကိုင်းကနေ မုံရွာ၊ ဖိုးဝင်းတောင် အထိ ရောက်ခဲ့ဖူးပေမယ့် ထားဝယ်ရဲ့အောက်ဘက်နားက ပုလော၊ မြိတ်၊ ကော့သောင်းဘက်ကို တခါမှ မရောက်ဖူးခဲ့ပါ။ ဒါကြောင့် လူတွေဟာ အပေါ်ဘက် သို့မဟုတ် ဗဟိုဘက်ကို ဦးစားပေးတဲ့ အလေ့အထရှိတာကြောင့် အောက်ဘက်ကို မဆင်းဖြစ်ဘဲ အပေါ်ဘက်ကိုချည်း သွားဖြစ်ခဲ့ကြတာ ဖြစ်နေလေမလားလို့ ပြန်စဉ်းစားနေမိပါတယ်။

 ..................................................................................................................................................

သူပုန်ကျောင်းသားတဦးရဲ့ မာရသွန်ခရီး ၁၇ 

ထက်အောင်ကျော် on February 2, 2012 4:40 pm 

အောက်မေ့ဖွယ် / ဧရာဝတီ။

မင်းသမီးနဲ့ ဘုရားသုံးဆူမှသည် တောတွင်းတက္ကသိုလ်ဆီ

KNU နယ်မြေကော်မတီမှာ တာဝန်ထမ်းနေစဉ်အတွင်း မင်းသမီးခစန်းကို ၂ ခေါက် ပြန်ဖြစ်တယ်လို့ ထင်ပေမယ့် နေ့ရက်အတိအကျကိုတော့ မမှတ်မိတော့ပါ။ ပထမတခေါက် ပြန်ဖြစ်တာကတော့ ကလက်ဒေးမှာ ကျင်းပတဲ့ နယ်မြေကော်မတီဖွဲ့ပြီးကာစ ဇန်နာဝါရီလ လယ်လောက်မှာလို့ ထင်ပါတယ်။ ကျနော်နဲ့ ကိုကျော်ထင်တို့ ၂ ဦးဟာ KNU ပဒိုတဦးရဲ့ ကားကြုံနဲ့ ကလက်ဒေးကနေ မင်းမသီးစခန်းဆီ ပြန်လိုက်သွားပြီး နယ်မြေအစည်းဝေး အတွေ့အကြုံနဲ့ ဗဟိုဘက်က အခြေနေတွေကို စခန်းမှာ ရှင်းပြခဲ့ပါတယ်။


အဲဒီကာလ ဗဟိုဥက္ကဋ္ဌ ကိုထွန်းအောင်ကျော် (ဝဲဘက်မှ ဒုတိယမြောက်) နဲ့ မင်းသမီးစခန်းဥက္ကဋ္ဌ ကိုမင်းအောင် (ဝဲစွန်)၊ ဒု ဥက္ကဋ္ဌ ကိုဌေးအောင် (ယာဘက်မှ ဒုတိယမြောက်)၊ ရုံးအဖွဲ့မှူး ကိုခင်သန်း (ယာစွန်) တို့ စကားပြောနေစဉ်
ကျနော်တို့ ပြန်သွားတဲ့အချိန်မှာ စခန်းက မောင်တော်မှာ ဆက်ရှိနေဆဲဖြစ်ပေမယ့် ထားဝယ်ဘက်က ကျောင်းသားတချို့ကတော့ ရှေ့ပိုင်းမှာ တင်ပြခဲ့တဲ့ ဗိုလ်စိုးသိန်း (ပြည်ချစ်လက်ကျန်၊ KNU လက်အောက်ခံ ထားဝယ်သားတပ်ရဲ့ တပ်ရင်းမှူး) ပေးတဲ့သင်တန်းကို မတက်ချင်တာကြောင့် KNU ကပေးတဲ့ သင်တန်းကို တက်နိုင်ဖို့ ထီးခီးက ရေကန်ကြီးရှိရာ စစ်သင်တန်းကျောင်း မှာ ရောက်နေကြပါတယ်။

ထီးခီးကနေ မိနစ် ၃၀ ကျော် လမ်းလျှောက်သွားရတဲ့ ရေကန် စစ်သင်တန်းကျောင်းဟာ ကန့်သတ်နေရာဖြစ်ပြီး ခွင့်ပြုချက်မရဘဲ သွားခွင့်မရှိပါ။ အဲဒီလမ်းမှာ လက်နက်ပြင်စက်ရုံနဲ့ တခြားအရေးကြီးတဲ့နေရာတွေ ရှိပါတယ်။ KNU ကားကြုံနဲ့ အဲဒီရေကန်ဆီ ကျနော်တို့ရောက်သွားတော့ သင်တန်းသားတွေနေတဲ့ ၂ ထပ် သစ်သားဆောင် အကောင်းစား အကြီးကြီးတခုကို တွေ့ရပါတယ်။ အဲဒီမှာ ဆရာအောင်မြင့် (နောက်ပိုင်း ဒု တပ်ရင်းမှူးဖြစ်လာသူ) အပါဝင် ထားဝယ်အုပ်စုမှ ကျောင်းသား ၄၀ ခန့်ကိုတွေ့ရပြီး နယ်မြေကော်မတီရဲ့ အခြေနေတွေကို ကျနော်တို့ ရှင်းပြခဲ့ပါတယ်။ သူတို့ဘက်ကလည်း လက်ရှိစခန်း အခြေအနေနဲ့ အခက်ခဲတွေကို ရှင်းပြခဲ့တယ်လို့ ကျနော်မှတ်မိနေပါတယ်။

အဲဒီမှာ ကျနော် ခပ်သဲ့သဲ့ကြားခဲ့ရတဲ့ သတင်းတခုကတော့ ကိုတင်လေးနဲ့ တခြားကျောင်းသား ၂ ဦး ကျနော်တို့ မရောက်ခင် ၂ ပတ်လောက်ကတည်းက ထိုင်းထဲထွက်သွားတာ အခုအထိ ဘာ အဆက်သွယ်မှ မရဘဲ ပျောက်ဆုံးနေတယ် ဆိုတဲ့သတင်း ဖြစ်ပါတယ်။ ဒီသတင်းကို ခပ်ဝါးဝါးသာကြားရပြီး အသေချာလည်း ဘယ်သူမှမသိကြပါ။

ကိုတင်လေး၊ ကိုအောင်မိုးမြတ်နဲ့ ကိုကျော်အောင်တို့ဟာ ဒီသင်တန်းသားတွေနဲ့အတူ ရေကန်သင်တန်းကျောင်းမှာ လာနေတာလည်းမဟုတ်၊ မောင်တော်စခန်းမှာ နေတာလည်း မဟုတ်ဘဲ ထီးခီး-KNU ခရိုင်ရုံးရှေ့က ကျောင်းသားတွေအတွက် ပေးထားတဲ့ ဆက်သွယ်ရေး ခစန်းထောက် ဂိတ်တဲလေးမှာနေရင်း ထိုင်းနဲ့ အ၀င်အထွက် အဆက်သွယ်အလုပ်ကို အဓိကလုပ်နေတာလို့ သိရပါတယ်။ ဒါကြောင့် သူတို့ပျောက်သွားတာကို ရေကန်သင်တန်းကျောင်းကလူတွေက အတိအကျ မသိတာလည်း ဖြစ်နေနိုင်ပါတယ်။


မွန်ပြည်သစ်နယ်မြေရောက် ကျောင်းသားများ ဘုရားသုံးဆူရှေ့တွင် အမှတ်တရ
ရေကန်စခန်းကနေ မောင်တော်စခန်းဆီသွားပြီး စခန်းကော်မီတီနဲ့ တွေ့သေးတယ်လို့ ကျနော် အမှတ်ရပေမယ့် အသေးစိတ်ကိုတော့ မမှတ်မိတော့ပါ။ (ကျနော် မင်းသမီးစခန်းမှာ တာဝန်ပြန်ကျပြီး ၁၉၉၀ ပြည့်လွန်နှစ်တွေမှာ အလားတူ ပျောက်ဆုံးမှု၊ သေဆုံးမှုတွေအတွက် ABSDF-KNU ပူးတွဲ စုံစမ်းမှုတွေ လုပ်ခဲ့ဖူးတဲ့အတွက် အဲဒီအခန်းရောက်မှ ဒီကိစ္စအပါဝင် ပျောက်ဆုံး၊ သေဆုံး ဖြစ်ခဲ့ရတဲ့ ရဲဘော်တွေ အကြောင်းကို ဆက်လက် ဖော်ပြပါမယ်။)

ဒုတိယတခေါက် မင်းသမီးခစန်းဆီ ကျနော်ပြန်ရောက်တဲ့ အချိန်ကတော့ ဇူလိုင်လကုန်ပိုင်း သို့မဟုတ် သြဂုတ်လ အစောပိုင်းလို့ ထင်ပါတယ်။ ဘာကိစ္စအတွက် ပြန်သလဲဆိုတာ မမှတ်မိတော့ပေမယ့် ကျနော် ပြန်ရောက်တဲ့အချိန်မှာ ကျနော်တို့စခန်းက မောင်တော်မှာ မဟုတ်တော့ဘဲ အမရာဆီ ရောက်နေပါပြီ။

အဲဒီကာလ စခန်းကော်မတီမှာ တာဝန်ယူထားသူတွေကတော့  မော်လမြိုင်တက္ကသိုလ်ကနေ ဓာတုဗေဒနဲ့ ကျောင်းပြီးကာစ ပုလောမြို့နယ်မှ ကိုမင်းအောင်က ဥက္ကဋ္ဌ (နောက်ပိုင်း ဗဟိုကော်မတီဝင်၊ အခု အမေရိကန်)၊ ကံပေါက်ဒေသမှ တိ-မွေးကု ဆရာဝန်တဦးဖြစ်သူ ကိုဌေးအောင်က ဒု ဥက္ကဌ (နောက်ပိုင်း ဗဟိုကော်မတီဝင်၊ အခု စစ်ရေးအကဲခတ်အဖြစ် လူသိများနေသူ)၊ ကံပေါက်မိုင်းမှ အင်ဂျင်နီယာတဦးဖြစ်သူ ကိုသိန်းဆောင်က အတွင်းရေးမှူး (နောက်ပိုင်း တောင်ပိုင်းဒေသကော်မတီ၊ အခု အမေရိကန်)၊ မော်လမြိုင်တက္ကသိုလ်ကနေ သတ္တဗေဒနဲ့ ကျောင်းပြီးကာစ ထားဝယ်မှ ကိုမင်းဇော်ရွှေက တွဲဖက် အတွင်းရေးမှူး (နောက်ပိုင်း တပ်ရေးဗိုလ်၊ အခု နယူးဇီလန်)၊ ကံပေါက်မိုင်းမှ ရုံးအဖွဲ့မှူး ကိုခင်သန်းက စခန်းကော်မတီရုံး အဖွဲ့မှူး (နောက်ပိုင်း ဗဟိုသုတေသနဌာနမှူး၊ ABSDF က ပို့တဲ့ သတင်းတွေကို DVB အတွက် တည်းဖြတ်ပေးရသူ၊ ၁၉၉၉ မှာ အော်စလိုကနေ မဲဆောက်ကိုအပြန်မှာ မြ၀တီ ဘက် ပြန်ဝင်သွားသလိုလိုနဲ့ ပဟေဠိဆန်ဆန် ပျောက်သွားသူ) တို့ ဖြစ်ပါတယ်။


မွန်ပြည်သစ်နယ်မြေဆီ ရောက်သွားခြင်း

အဲဒီကနေ မဲဆောက်ကိုအပြန်မှာ စခန်းကော်မတီက ကျနော့်ကို ပေးလိုက်တဲ့တာဝန်တခုက သီဘောဘိုးစခန်းမှာ ဖွင့်ထားတဲ့ တောတွင်းတက္ကသိုလ်ဆီ တပ်ဖွဲ့ဝင် ၄ ဦးကို ခေါ်သွားပေးဖို့ပါ။ ပဒို သင်တန်းတက်ဖို့ (အဲဒီကာလက နိုင်ငံရေး စိတ်ဝင်စားသူတွေကို ပဒို၊ စစ်ရေး စိတ်ဝင်စားသူတွေကို သူးခို စသည်ဖြင့် ကရင်ဘာသာစကားနဲ့ ခေါ်ဝေါ်လေ့ရှိပါတယ်) ကျနော်နဲ့အတူပါလာတဲ့ ပုဂ္ဂိုလ်တွေကတော့ ကိုကြည်ဝေ (အခု သြစတေးလျ)၊ ကိုလှဝေ (အခု အမေရိကန်)၊ ကိုတင်စိုး (ပြည်တွင်းထဲပြန်ဝင်) နဲ့ ကျနော် အမည် မမှတ်မိတော့တဲ့ နောက်တဦး ဖြစ်ပါတယ်။ ကျနော်တို့ ၅ ဦးဟာ မင်းသမီးစခန်းကနေ ဘုရားသုံးဆူ စခန်းဆီ KNU ကားကြုံနဲ့ လိုက်လာခဲ့ပါတယ်။


ဘုရားသုံးဆူဒေသမှာ ကျင်းပတဲ့ ရှစ်လေးလုံး တနှစ်ပြည့် အခမ်းအနားမှာ မိန့်ခွန်းပြောရင်း နှလုံးရောဂါဖောက်ပြီး ကွယ်လွန်ခဲ့တဲ့ မွန်ပြည်သစ်ပါတီ ဒု ဥက္ကဋ္ဌ နိုင်နွန်လာ
အဲဒီကာလဟာ သူပုန်တွေ အင်အားအကောင်းဆုံးအချိန် ဖြစ်နေတဲ့အတွက် ဘုရားသုံးဆူကနေ မဲဆောက်ဘက်က KNU တပ်မဟာ ၆ နယ်မြေ ကျိုက်ဒုံ-သီဘောဘိုးအထိ KNU ကားတွေ တောလမ်းကနေ သွားလို့ ရနေဆဲပါ။ ရှေ့ပိုင်းမှာ တင်ပြခဲ့တဲ့ DAB စစ်ကြောင်းအတွက် မာနယ်ပလောနဲ့ ကော့မူးရာစခန်းရောက် မင်းသမီးခစန်းမှ ရဲဘော် ၂၀ ဦးပါ စစ်ကြောင်းဟာ အသွားရော အပြန်ရော ဒီလမ်းကြောင်းအတိုင်း သွားခဲ့တာဖြစ်ပါတယ်။ ဒါပေမယ့် ကံဆိုးချင်တော့ ကျနော်တို့ရောက်သွားတဲ့ အချိန်ကျမှ မက္ကသာဒေသမှာ စစ်ကြောင်းတွေရှုပ်နေလို့ ဘုရားသုံးဆူ၊ မက္ကသာ၊ ကျိုက်ဒုံ၊ ဝေါလေ၊ သီဘောဘိုး ဘက်သွားတဲ့ကား မရှိဘူး။

“ခင်ဗျားတို့ ဘန်ကောက်ဘက်ကနေပဲ ပြန်ပတ်ပြီးသွားပါ” လို့ KNU ကားသမားက ပြောပါတယ်။ ဒါပေမယ့် ကျနော်တို့မှာ ဘာလက်မှတ်မှ မပါဘဲနဲ့ ဘန်ကောက်ကို ဒီတိုင်းသွားလို့ ဘယ်ဖြစ်မလဲဆိုပြီး ကျနော်က မေးခွန်းထုတ်ပါတယ်။

ဒီလိုငြင်းခုန်ရင်း အဖြေမထွက်တဲ့အတွက် နောက်ဆုံးမှာတော့ ကျနော်တို့ ၅ ဦးကို ဘုရားသုံးဆူကနေ စံခရဘူရီဘက် ပြန်မောင်းလာပြီး နန်းမကိတ်ရွာအနီးရှိ ကားလမ်းဘေးက တောင်ထိပ်မှာ ခွပ်ဒေါင်းအလံ လွှင့်ထူထားတဲ့ ABSDF ၁၀၁ စခန်းမှာ ချပေးထားခဲ့ပါတော့တယ်။ ဒီလိုနဲ့ မမျှော်လင့်ဘဲ နန်းမကိတ်မှာ သတင်း ၂ ပတ်လောက် သောင်တင်သွားပါတယ်။

အဲဒီကာလက စံခရ-သုံးဆူကားလမ်းဟာ မြေနီလမ်းအဆင့်ပဲရှိသေးပြီး လိုင်းကားတွေကတော့ အခုလိုပဲ တနာရီ တစီးနှုန်း ပြေးဆွဲနေပါတယ်။ ဒါပေမယ့် ကားလမ်းတလျှောက်လုံးကို မွန်ပြည်သစ်က ထိန်းချုပ်ထားပြီး ကားလမ်းရဲ့တဘက်ခြမ်းက ထိုင်းနယ်မြေ။ ကျောင်းသားစခန်းနဲ့ မွန်ပြည်သစ်ပါတီ ဌာနချုပ်ရှိတဲ့ အခြမ်းကိုတော့ မြန်မာနယ် မြေဖြစ်တယ်လို့ သတ်မှတ်ထားပါတယ်။

ပြီးခဲ့တဲ့ ၂၀၀၈ ခုနှစ် ထိုင်းခရီးစဉ်အတွင်း ဘုရားသုံးဆူဘက်ကို ကျနော်ရောက်ခဲ့ပေမယ့် နန်းမကိတ်ရွာ နေရာကို ဘယ်လိုမှ ရှာမတွေ့တော့ပါ။ ဒါပေမယ့် ကျနော်လိုပဲ နယ်စပ်ကိုလွမ်းတဲ့ ဘုရားသုံးဆူစခန်းမှ အမေရိကန်ပြန် ရဲဘော်တဦးရဲ့ ပြောပြချက်အရ အခု တောချတော နယ်ခြားစောင့်တပ်က စစ်ဆေးရေးဂိတ် ဖွင့်ထားတဲ့နေရာဟာ နန်းမကိတ်ရွာ ရှိနေတဲ့နေရာလို့ သိရပါတယ်။ နန်းမကိတ်ရွာ၊ မွန်ပြည်သစ်ပါ တီဌာနချုပ်နဲ့ ကျောင်းသားတပ်ရင်း ၂ ခုစလုံးရဲ့ နေရာတွေဟာ ၁၉၉၀ မတ်လလောက်မှာ န၀တ လက်ထဲ ကျဆုံးခဲ့ပါတယ်။

ကျနော်တို့ ၅ ဦးကို ယာယီနေထိုင်ခွင့်ပေးထားတဲ့ ၁၀၁ တပ်ရင်းဟာ စံခရ-သုံးဆူကားလမ်းပေါ်ရှိ နန်းမကိတ်ရွာနဲ့ ၁၀ မိနစ်လောက်ပဲ လမ်းလျှောက်ရပြီး ကားလမ်းကို နည်းနည်းကျော်လိုက်တာနဲ့ ကျောင်းသားစခန်း လုံခြုံရေးဂိတ်တဲကို ရောက်ပါတယ်။ ဒီစခန်းက ကျနော်တို့ မောင်တော်စခန်းနဲ့ ခပ်ဆင်ဆင်တူပြီး တဲတွေ၊ ဘားတိုက်တွေ၊ ရုံးခန်းတွေ အားလုံးဟာ သက်ကယ်မိုး၊ ၀ါးတဲတွေသာဖြစ်ပါတယ်။ အဲဒီကာလ စခန်းကော်မတီ ဥက္ကဋ္ဌက ကိုတင်စိုးနောင်လို့ ထင်ပါတယ်။ လူစာရင်းကို အသေချာ ကျနော် မမှတ်မိတော့ပေမယ့် ထိုင်းစကားပြောတတ်ပြီး ကျနော်တို့ကို ထောက်လှမ်းရေးလက်မှတ် လိုက်လုပ်ပေးတဲ့ ကိုစိုးအောင်ကိုတော့ ကျနော် မှတ်မိနေပါတယ်။

အခု ဒီဆောင်းပါးရေးဖို့ ပြန်လည်မေးမြန်းချိန်မှာ ဆက်စပ်သိရသလောက်ကတော့ ကျနော်တို့အဖွဲ့ ဘုရားသုံးဆူကို ရောက်တဲ့အချိန်ဟာ ၁၉၈၉ သြဂုတ်လလယ်လို့ ယူဆရပါတယ်။ ရှစ်လေးလုံးအရေးတော်ပုံ တနှစ်ပြည့်အခမ်းအနား ကျင်းပပြီးကာစ။ အဲဒီအခမ်းအနားအတွင်း မွန်ပြည်သစ်ပါတီ ဒု ဥက္ကဋ္ဌ နိုင်နွန်လာ မိန့်ခွန်းပြောနေရင်း နှလုံးရောဂါ ဖောက်လာပြီး သေဆုံးမှုဖြစ်ပြီးကာစ အချိန်လေးလို့ သိရပါတယ်။
အဲဒီချိန်မှာ ကိုတင်စိုးနောင်က ၁၀၁ ဥက္ကဋ္ဌဖြစ်နေပြီး ကိုအောင်သူငြိမ်းနဲ့ အဖွဲ့က ၁၀၁ ကနေ ထွက်သွားကာစလို့ ဆိုပါတယ်။

နောက်တခါ ကိုသီရိညွန့်အပါဝင် ၁၀၂ ရဲဘော်တွေကတော့ ၁၀၁ ကနေ မိနစ် ၂၀ ခန့် လမ်းလျှောက်ရတဲ့ ဂျပန်ရေတွင်းရွာအနီး အခြေစိုက်ထားတယ်လို့ သိရပါတယ်။ အခု ဗဟုအဖွဲ့ရဲ့ ညွှန်မှူးတာဝန်ယူနေသူ ကိုဇော်ဦးကတော့ မွန်နယ်မြေ (ကျနော်တို့ရဲ့ KNU နယ်မြေကော်မတီနဲ့ပုံစံတူ၊ ဒါပေမယ့် သူတို့အောက်မှာ ၁၀၁ နဲ့ ၁၀၂ တပ်ရင်း ၂ ရင်းပဲရှိပါတယ်) ကော်မတီဥက္ကဋ္ဌအဖြစ် တာဝန်ယူနေတဲ့အချိန်လို့ ဘုရားသုံးဆူစခန်း ရဲဘော်ဟောင်းတွေဆီကနေ သိရပါတယ်။

ဒီလိုနဲ့ ဘုရားသုံးဆူမှာ သောင်တင်နေစဉ် ၂ ပတ်တာ ကာလအတွင်း နန်းမကိတ် ဗီဒီယိုရုံဆီ တခြား ကျောင်းသားတွေနည်းတူ လက်မှတ်ကို မိတ္တူပွား ခိုးကြည့်တဲ့အထဲ ကျနော်တို့အုပ်စုလည်း အပါဝင်ဖြစ်ပါတယ်။ မိတ္တူကူးတယ်ဆိုပေမယ့် အခုခေတ်လို မိတ္တူကူးစက်ကြီးနဲ့ ကူးတယ်လို့ မထင်လိုက်ပါနဲ့။ အဲဒီကာလက လက်မှတ်ကို စက္ကူနဲ့ ထုတ်ပေးတာမျိုး မဟုတ်ဘဲ ရုံထဲဝင်သူတဦးချင်းရဲ့ လက်ဖျံမှာ မှင်နီတုံးနဲ့ ထုပေးလိုက်တာသာ ဖြစ်ပါတယ်။

ထုံးစံအတိုင်း ၀င်ငွေတပြားမှမရှိတဲ့ ကျနော်တို့ ကျိုးဖိုး။ အဲ .. ဒီဒေသမှာတော့ ကျိုးဖိုး မဟုတ်တော့ပါဘူးခင်ဗျား။ “ကွတ်ဖယ်” လို့ မွန်ဘာသာနဲ့ခေါ်ပါတယ်။ ဆိုတော့ ကွတ်ဖယ်တွေလည်း အများသူငါလို ရုပ်ရှင်ကြည့်ချင်တာပေါ့။ ဒီတော့ ငွေ ၂ ဘတ်လောက်ကို ၀ိုင်းစုပြီး သူရဲကောင်းတဦးကို ရွေးချယ်၊ အဲဒီပုဂ္ဂိုလ်က ရုံထဲဝင်ပြီး သူ့လက်ဖျံမှာ မှင်နီတုန်းတံဆိပ် ရအောင်အရင်လုပ်။ မှင်နီတံဆိပ် ရပြီးတာနဲ့ ချက်ချင်း အပြင်ကိုပြန်ထွက်။ အပြင်ရောက်တာနဲ့ တန်းစီစောင့်နေတဲ့ ဘော်ဘော်တွေကို အဲဒီမှင် မခြောက်ခင်မှာ လက်ဖျံချင်းထိ တိုက်ရိုက် မိတ္တူကူးကြလေသတည်းပေါ့။ ဒီလိုနဲ့ ရုံသာလူပြည့်သွားတယ်၊ ၀င်ကြေးက သိပ်မရလို့ ဗီဒီယိုရုံပိုင်ရှင်လည်း စိတ်ညစ်နေမလားပဲ။

ဒေသခံစကားတွေနဲ့ ပတ်သက်ပြီး မှတ်မိသမျှကို ထပ်ပြောမယ်ဆိုရင် “ကွတ်ဖယ်-ဟမယ်” (မြန်မာကျောင်းသား) ဆိုတဲ့စကားလုံးကို မှတ်မိနေဖို့လိုသလို ထမင်းစားပြီးပြီလား၊ ထမင်းစားမယ်စသည်ဖြင့် မွန်စကားလုံးတွေကို မပြောတတ်ရင်လည်း ထမင်းငတ်နိုင်ပါတယ်။

“မောင်မု မောင်ဟ” ဆိုတဲ့ နေကောင်းလား၊ ကျန်းမာလားကိုလည်း နားလည်နေဖို့လိုပါတယ်။ စသည်ဖြင့် စသည်ဖြင့် မွန်ဒေသရောက်တဲ့ ကျောင်းသားတွေက မွန်ဘာသာ၊ ကရင်ဒေသရာက်သူက ကရင်ဘာသာ အခြေခံလေးတွေတော့ တတ်အောင် လေ့ကျင့်ထားကြရပါတယ်။ ရှေ့တန်းဒေသမှာဆိုရင် စကားမတတ်တဲ့ပြဿနာက ပိုဆိုးပါတယ်။ ရွာအတော်များများမှာ ဗမာလို မပြောကြပါဘူး။ ကရင်ရွာမှာ ကရင်လို မပြောတတ်ရင်၊ မွန်ရွာမှာ မွန်လိုမပြောတတ်ရင် ထမင်းငတ်ခြင်းအပါအ၀င် အခက်အခဲမျိုးစုံနဲ့ကြုံရနိုင်ပါတယ်။

ကျနော်လည်း အဲဒီလို ဟိုသွားဒီသွားနဲ့ သူ့ဒေသမှာ သူ့စကားပြောတတ်မှဖြစ်မယ်၊ သူ့စကားကို ကိုယ်မတတ်တိုင်း သူက ကိုယ့်စကား လိုက်ပြောရမယ်ဆိုတာ မဟုတ်သေးဘူး၊ တိုင်းရင်းသားတွေက ဗမာစကားပြောတတ်ပြီး ဗမာတွေက တိုင်းရင်းသားစကား တခုမှ မတတ်ဘူးဆိုတာ သိပ်တရားမျှတမှု မရှိဘူး၊ သဘာဝ မကျဘူးဆိုတာကို ဒီဆောင်းပါးရေးရင်းနဲ့ ပြန်စဉ်းစားနေမိပါတယ်။

နောက်တခါ မြို့ပြဒေသမှာ ဗမာတွေက လူများစုဖြစ်ပြီး တိုင်းရင်းသားတွေက လူနည်းစု ဖြစ်နေလေ့ရှိပါတယ်။ ဒါပေမယ့် အခု ကျနော်တို့ရောက်နေတဲ့ နယ်စပ်မှာတော့ ကျနော်တို့ကျောင်းသားတွေက လူနည်းစုဖြစ်နေပြီး တိုင်းရင်းသားတွေက လူများစုဖြစ်နေပြန်ပါတယ်။ ဆိုလိုတာကတော့ ကိုယ်က လူများစုဖြစ်နေစဉ်မှာ လူနည်းစုရဲ့ ခံစားချက်ကို နားလည်ဖို့ မလွယ်ပေမယ့် ကိုယ်က လူနည်းစုဖြစ်သွားတဲ့အခါမှာတော့ လူနည်းစုရဲ့ခံစားချက်ကို ကိုယ်တိုင်ခံရသလို ဖြစ်သွားပြီး တိုင်းရင်းသား လူနည်းစုတွေရဲ့ခံစားချက်အပေါ် ပိုပြီး နားလည်လာတယ်လို့ စိတ်ထဲမှာ ထင်နေမိပါတယ်။

အဲဒီ “ကွတ်ဖယ်-ဟမယ်” စခန်းအနီးက ဗီဒီယိုရုံရှိတဲ့ နန်းမကိတ်ရွာဟာ မွန်ပြည်သစ်ပါတီက မိသားစုတွေနဲ့ ဒေသခံ မွန်တိုင်းရင်းသားတွေနေထိုင်တဲ့ ရွာတရွာဖြစ်ပြီး အဲဒီရွာကနေ ၁၅ မိနစ်လောက် လမ်းလျှောက်လိုက်ရုံနဲ့ မွန်ပြည်သစ်ပါတီဌာနချုပ်ကို ရောက်နိုင်ပါတယ်။ ကိုတင်စိုးနောင်နဲ့အတူ မွန်ဌာနချုပ်ဆီ ကျနော် တခေါက်ရောက်ဖူးတာကို မှတ်မိနေပေမယ့် အသေးစိတ်ကိုတော့ မသိတော့ပါ။ နောက်တခါ ထူးထူးခြားခြား KNU နယ်မြေမှာ တခါမှမတွေ့ဖူးတဲ့ (ထိုင်ဝမ်ကလို့ ထင်ပါတယ်) ဗုဒ္ဓဘာသာ ကူညီကယ်ဆယ်ရေး NGO တခုကိုလည်း မွန်ပြည်သစ်နယ်မြေမှာ တွေ့ခဲ့ရပါတယ်။

နောက်တရက်မှာတော့ နန်းမကိတ်ကနေ လိုင်းကားစီးပြီး ဘုရားသုံးဆူရွာကို ကျနော်တို့ သွားလည်ဖြစ်ပါတယ်။ ဒီနေ့ကာလလိုမျိုး စေတီ သုံးဆူနဘေးမှာ ဈေးတန်းမရှိသေးပေမယ့် အဲဒီစေတီတွေဆီ မရောက်ခင် အပေါ်ဘက်နားက ဈေးတန်းကတော့ အခုရှိနေတဲ့ ဈေးတန်းအတိုင်း စည်းကားနေပါတယ်။ ပစ္စည်းမျိုးစုံ၊ စားသောက်ဖွယ်မျိုးစုံ၊ ကုန်သည်မျိုးစုံနဲ့ မက်သလေဈေးထက်တောင် ပိုစည်နေတယ်လို့ ကျနော်စိတ်ထဲ ထင်မိပါတယ်။

ဒါပေမယ့် မြန်မာဘက် ဘုရားသုံးဆူကတော့ ဒီနေ့အခြေနေနဲ့ ဘာမှမဆိုင်ပါ။ စစ်ပြီးကာစ ပြန်လည်ထူထောင်ရေး ကာလဆိုတော့ အခုလို ဈေးဆိုင်တွေ၊ တိုက်တာတွေ ဘာမှမရှိသေး။ ကျနော်တို့ ကျောင်းသားတွေ ရန်ကုန်နဲ့ တခြားမြို့ကြီးတွေမှာ ရှစ်လေးလုံးအရေးတော်ပုံနဲ့ အလုပ်ရှုပ်နေစဉ် နယ်စပ်က ဒီဒေသမှာတော့ မွန်ပြည်သစ်နဲ့ KNU တပ်တွေ အကြီးအကျယ် တိုက်ပွဲဖြစ်နေခဲ့တယ်လို့ သိရပါတယ်။ စက်တင်ဘာလနှောင်းပိုင်း ကျောင်းသားတွေ ဘုရားသုံးဆူဒေသဆီ ရောက်တဲ့အချိန်ဟာ မွန်ပြည်သစ်နဲ့ KNU စစ်ပွဲပြီးကာစ အချိန်လေးဖြစ်ပြီး မဒတ၊ NDF က ကြားဝင်ပြီး ဆွေးနွေးပွဲတွေလုပ်၊ ဘုရားသုံးဆူကို မွန်-ကရင် ပူးတွဲ အုပ်ချုပ်ရေး ချထားတဲ့အချိန် ဖြစ်ပါတယ်။

သုံးဆူရွာထဲဝင်ပြီး ဟိုကြည့် ဒီကြည့် လုပ်ခဲ့ပေမယ့် တရွာလုံးအနှံ့တော့ မရောက်ဖြစ်ပါ။ အဲဒီက အပြန်မှာတော့ ဘုရားသုံးဆူအနီးက ကျောင်းသားတချို့ အလုပ်လုပ်နေတဲ့ သစ်စက်တခုဆီဝင်ပြီး စကားပြောဖြစ်ခဲ့ပါတယ်။ ပြီးတော့ အဲဒီကနေ လမ်းလျှောက်ပြန်လာပြီး ဂျပန်ရေတွင်းရွာအနီးက ၁၀၂ တပ်ရင်းဆီ ၀င်ရောက်ခဲ့သေးတယ်လို့ ကျနော်မှတ်မိနေပါတယ်။ ဒီလိုနဲ့ သုံးဆူဒေသမှာ သတင်း ၂ ပါတ်လောက် ကြာပြီးတဲ့အခါမှာတော့ ထောက်လှမ်းရေး လက်မှတ်ရလို့ ဘန်ကောက်မြို့ဆီ ကျနော်တို့ ၅ ဦး ချီတက်လာပါတယ်။

............................................................................................................................................

သူပုန်ကျောင်းသားတဦးရဲ့ မာရသွန်ခရီး ၁၆


ပစ်တိုင်း မထိ၊ ထိတိုင်း မသေ

မိုင်းတွေထဲမှာတော့ ရှေ့ထွက်မိုင်းဟာ အသုံးဝင်ဆုံးဖြစ်ပါတယ်။ ဗုံးတွေထဲမှာတော့ M 16 သေနတ် ပြောင်းထိပ်မှာ တင်ပြီးပစ်တဲ့ ခွင်းဗုံးနဲ့ အမေရိကန်လုပ် လက်ပစ်ဗုံးအသေးစားတွေပေါ့။ ဒါပေမယ့် ကျနော်တို့အကြား ဖောဖောသီသီ သုံးနိုင်တဲ့ ဗုံးသီးကတော့ “မဖွားရှင်” ခေါ် KNU ရဲ့ လက်လုပ်ဗုံးပဲ ဖြစ်ပါတယ်။


တိုက်ပွဲဝင် ABSDF ကျောင်းသား ၂ ဦးကို ကော့မူးရာစစ်မြေပြင်မှ ကတုတ်ကျင်း တခုအတွင်း တွေ့ရစဉ်
လက်လုပ်ဗုံးဆိုတဲ့အတိုင်း ပင်တွေ ဘာတွေအသေချာမပါ။ ယမ်းတွေနဲ့ သံတိုသံစတွေ ထည့်ထားတဲ့ ဗုံးသီးထဲကနေ အုန်းဆံကြိုးလိုလို၊ အပ်ချည်ကြိုးလိုလို အဖြူရောင်ကြိုးစ အကြီးကြီးတခု တပေခွဲလောက် အရှည်ထွက်နေပါတယ်။ အဲဒီ အစကို မီးရှို့ပြီးဖြစ်ဖြစ်။ ဆေးလိပ်မီးနဲ့တို့ပြီး ဖြစ်ဖြစ် ပစ်ရတဲ့ဗုံးသီးမျိုးပါ။ မဖွားရှင်လို့အမည်ရတဲ့ ဆေးပေါလိပ်မီးနဲ့တို့ပြီး ပစ်ဖို့ထွင်ထားတဲ့အတွက် မဖွားရှင်ဗုံးဆိုပြီး အမည်တွင်လာတယ်လို့ ဆိုပါတယ်။ လမ်းမှာ မီးငြိမ်းသွားရင်  ဗုံးသီးက မကွဲတော့သလို မီးစ ဗုံးသီးနား မရောက်ခင် ရန်သူက ကောက်ပြီး ပြန်ပစ်ရင်လည်း ကိုယ့်ဘက်မှာလာပြီး ကွဲနိုင်တဲ့ ဗုံးသီးမျိုး ဆိုတော့ ကျောင်းသားတွေက ဒီဗုံးကို သိပ်မကြိုက်လှ။


ဒီနေရာမှာ စိတ်ဝင်စားဖို့ကောင်းတာက လက်နက်ကြီးပစ်တဲ့ အဖွဲ့အချင်းချင်း ပညာပေးပြိုင်ဆိုင်မှုပါ။  ကျနော်တို့ ကျောင်းသားတွေထဲကလည်း KNU ဆီမှာ လက်နက်ကြီးသင်တန်း ဆင်းထားသူတွေ ရှိတဲ့အတွက် အဲဒီပစ်ကွင်းဆီ ကျနော်သွားကြည့်ခွင့် ရခဲ့ပါတယ်။ ၂ ပေလောက်နက်ပြီး ၄ ပေလောက် အကျယ်ရှိတဲ့ မြေကျင်းထဲကနေ ၈၁ မမ ပစ်နေတာတွေ့ရပြီး ၃ ခါပစ်ပြီးတိုင်း နေရာပြောင်းနေတာကို တွေ့ရပါတယ်။ ဒီလို နေရာမပြောင်းလို့မဖြစ်။ ၂ ခါလောက် ပစ်ပြီးတာနဲ့ ဒီကကျည်ထွက်တဲ့နေရာကို န၀တ လက်နက်ကြီးအဖွဲ့က မြေပုံပေါ်မှာ ရှာတွေ့သွားပြီး တန်ပြန်လက်နက်ကြီး ချက်ချင်းပြန်လာလို့ဖြစ်ပါတယ်။

လက်နက်ကြီးအဖွဲ့ရဲ့ စွမ်းရည်နဲ့ပတ်သက်ပြီး ကျနော်တို့အကြား သတင်းကြီးသွားတဲ့ အဖြစ်ပျက်တခုကတော့ ရှေ့မှာတင်ပြခဲ့တဲ့ KNU က ဗိုလ်လှဝေနဲ့ ကျနော်တို့ ကျောင်းသားတပ်ဖွဲ့က ကုလားလေး ကိုတင်ရွှေ (မော်လမြိုင် တက္ကသိုလ်ကနေ ပထ၀ီနဲ့ ကျောင်းပြီးသူ) တို့ ပူးတွဲ မြေပုံဖတ်ပြီး ပစ်လိုက်တဲ့ ၈၁ မမ လက်နက်ကြီးကျည်ဟာ န၀တဘက်ကနေ ကျနော်တို့ဆီ ပစ်ဖို့ပြင်နေတဲ့ ၁၂၀ မမ မော်တာအပေါက်ထဲ တည့်တည့်ကြီးဝင်သွားတဲ့အထိ ပစ်မှတ်မှန်တယ်ဆိုတဲ့ သတင်းပါ။ အဲဒီကာလကတော့ ဒီလိုမျိုး မှတ်တမ်းရေးဖို့လည်း စိတ်ကူးက မရှိသေးတော့ အဲဒီသတင်း ဘယ်လောက်မှန်သလဲ ဆိုတာကို သတင်းစာပညာအရ ဘ ၆လုံး (ဘယ်သူ၊ ဘယ်နေရာက၊ ဘယ်လို … စသည်) စုံအောင် မေးရကောင်းမှန်းလည်း မသိခဲ့ပါ။ ဒါပေမယ့် ဒီသတင်း အဲဒီကာလက ဟိုးလေးတကျော်ဖြစ်ခဲ့ တာကတော့ အမှန်ပါပဲ။

ဒါက ၈၁ မမ မော်တာပစ်ရာမှာ တော်တဲ့အကြောင်းပါ။ ဒါပေမယ့် ၅၇ မမ နောက်ပွင့်လောင်ချာ ပစ်တဲ့အချိန်မှာတော့ နည်းနည်း အခက်အခဲရှိတယ်လို့ ထင်ပါတယ်။ လောင်ချာဆိုတော့ မော်တာလို မြေပုံချ ပစ်တာမျိုးမဟုတ်ဘဲ ရှင်းနေတဲ့မြင်ကွင်းကနေ တိုက်ရိုက်လှမ်းပစ်ရတာမျိုး ဖြစ်တာကြောင့် ကျည်ထွက်တဲ့၊ မီးပွင့်တဲ့နေရာကို န၀တဘက်က ချက်ချင်းမြင်နိုင်ပါတယ်။ တခါတလေဆိုရင် လောင်ချာပစ်ပြီး သိမ်းလို့တောင်မပြီးသေး။ န၀တဘက်က ၈၄ လောင်ချာကျည်က ကျနော်တို့လောင်ချာ ပစ်တဲ့နေရာတည့်တည့်ဆီ တန်းပြီးရောက်လာတတ်ပါတယ်။ ဒါကြောင့် လောင်ချာကိုတော့ တခါပစ် တနေရာပြောင်း အမြန်နည်းနဲ့ လုပ်ရတာတွေ့ရပါတယ်။ ဒီလိုနဲ့ သူများပစ်နေတာကို ကြည့်ရင်း န၀တဘက်ကလာတဲ့ ကောင်တာကျည်ကို ရှောင်ပြီး ဆက်သွယ်ရေး မြောင်းထဲပြေးရင်းနဲ့ တိုက်ပွဲအတွေ့အကြုံ ရလာတယ်ဆိုပါတော့။

ဒီလို တိုက်ပွဲရက် ကြာလာတာနဲ့အမျှ ရှေ့ကကြောက်ရွံ့မှုတွေ၊ ဘုရားတမှုတွေ တဖြည်းဖြည်း လျော့ကျလာပါတယ်။ န၀တဘက်က ပစ်လိုက်တဲ့ ဘယ်လို လက်နက်ကြီးအသံဆိုရင် ကျည်စထွက်သံ ကြားရတဲ့အချိန်ကနေ တကယ့်ကျည်ဆံ ဒီကိုရောက်တဲ့ အချိန်ကြားမှာ စက္ကန့်ဘယ်လောက်ကြာတယ်၊ ဘယ်လို အသံဆိုရင် ဘယ်ဘက်ကို သွားတယ်၊ ဘယ်အသံမျိုးဆိုရင် ကိုယ်ဘက်လာတယ်၊ ဘယ်လို အသံဆိုရင် ကိုယ်ခေါင်းပေါ် ပေဘယ်လောက်အမြင့်ကနေ ဖြတ်သွားတယ် စသည်ဖြင့် ခန့်မှန်း တွက်ချက်လာနိုင်ပါတယ်။

“ဘာမှမပူနဲ့။ ရန်သူ့လက်နက်ကြီးကျည်မှာ လိပ်စာပါတယ်။ ဒီနေ့အထိတော့ မင်းလိပ်စာ သူ မသိသေးဘူး” ဆိုတဲ့ စကားဟာ အဲဒီကာလ ကျနော်တို့ ကျိုးဖိုးတွေရဲ့ လက်သုံးစကားပေါ့။ ဒီစကား ဘယ်လောက်မှန်သလဲဆိုတာ ပြောဖို့ခက်ပေမယ့် “ပစ်တိုင်း မထိ၊ ထိ တိုင်းမသေ” ဆိုတာကိုတော့ စစ်မြေပြင်မှာ အနေကြာလာတာနဲ့အမျှ အတော်လေး နားလည်သိရှိလာပါတယ်။


စစ်မြေပြင်က လက်ဖက်ရည်ဆိုင်

နောက်ပိုင်းမှာတော့ ကျိုဖိုးတွေဟာ ပိုမိုအတင့်ရဲလာပြီး ကွန်ပြူတာတွေ၊ ရေဒါတွေမရှိဘဲ စိတ်ကူးသက်သက်နဲ့ တွက်ဆထားတဲ့ အချက်တွေအပေါ် ယုံကြည်ကာ ကံယုံပြီး ဆူးပုံနင်းတဲ့အလုပ်မျိုးတွေ လုပ်လာခဲ့ပါတယ်။ ဒီလောက် ပူအိုက်စွတ်စိုတဲ့ရာသီမှာ ရေမချိုးဘဲနေရတာ သီတင်းတပတ်လောက် ကြာလာတော့ ကျနော်တို့ ဘယ်လိုမှ ဆက်မနေနိုင်။ ဒီတော့ န၀တတောင်ကုန်းကနေ လှမ်းမြင်နိုင်၊ လှမ်းပစ်နိုင်တဲ့ နေရာမှန်းသိလျက်နဲ့ ကျွန်းတံတားကြီး ဘေးနားဆင်းပြီး သောင်ရင်းမြစ်ထဲ ရေဆင်းချိုးတာမျိုး၊ ကျနော်တို့ ကတုတ်ကျင်းနဲ့ နာရီဝက်နီးပါး လမ်းလျှောက်ရတဲ့ ၀မ်ခဈေးနဲ့ မျက်နှာချင်းဆိုင်အရပ်ရှိ အ၀ီစီတွင်းရှိရာနေရာအထိ သွားပြီး ရေချိုး ရေခပ်လုပ်တာမျိုး၊

နောက်တခါ ထိပ်တိုက်မှာ တာဝန်ကျ နေသူတွေအတွက် ထမင်းချက်ပေးနေတဲ့ စက်ရေတွင်းနဲ့ မနီးမဝေး ကြခတ်ရုံအောက်က ကတုတ်ကျင်းမှာ ခိုလှုံနေတဲ့ အမိုးတို့မိသားစုကို လက်ဖက်ရည်ဆိုင် အတင်းပြန်ဖွင့်ခိုင်းပြီး ကော်ဖီ လဖက်ရည် ထိုင်သောက်ကြတယ်လို့ ပြောရင် စာဖတ်ပရိသတ် ယုံပါ့မလားပဲ။ (အခန်း ၁၄ မှာ ဖော်ပြခဲ့တဲ့အမိုးနဲ့ တဦးတည်းဖြစ်ပါတယ်။ သူတို့မိသားစုဟာ စစ်မဖြစ်ခင်ကတည်းက ကော့မူးရာမှာ ဆိုင်ဖွင့်ထားသူတွေဖြစ်ပြီး စစ်ဖြစ်ချိန်မှာ ဟွေးခလုတ် ဒုက္ခသည်စခန်းဆီ ထွက်ပြေးသွားခဲ့ပါတယ်။ ဒါပေမယ့် စစ်ပွဲကြာလာချိန်မှာတော့ ကော့မူရားဆီပြန်လာ ကူညီနေတာဖြစ်ပါတယ်။)

အဲဒီစစ်ပွဲကာလအတွင်း ကျနော်အမှတ်တရ အဖြစ်ဆုံးဖြစ်စဉ် ၂ ခုရှိပါတယ်။ ပထမတခုကတော့ တိုက်ပွဲကြီးတခုပြီးတိုင်း ဖုတ်ပေါင်းစုံဆီပြေးပြီး ကျဉ်ခွံတွေကောက် ရောင်းစားတာပါ။ အဲဒီကာလက M16 အခွံက ဈေးအကောင်းဆုံးဖြစ်ပြီး AK 47 အခွံက ဒုတိနေရာမှာရှိပါတယ်။ ဂျီသရီးကျည်ခွံကိုတော့ ၀ယ်သူမရှိပါ။ ကျည်ခွံဈေးနှုန်းကို ကျနော်မမှတ်မိတော့ပေမယ့် အဲဒီကာလက AK 47 ကျည် တထောင့်ကိုမှ ၅ ဘတ်ပဲပေးရတဲ့အတွက် ကျည်ခွံတကီလိုကို အစိတ်လောက်ပဲ ရမယ်လို့ထင်ပါတယ်။

တချို့ကျောင်းသားတွေနဲ့ KNU စစ်သားတချို့ကတော့ လက်နက်ကြီးဒဏ်ကြောင့် ပြိုပျက်သွားတဲ့ ကော့မူးရာတခွင် လူနေအိမ်တွေက ကျွန်းသစ်သားတွေကို ခွာယူပြီး မီးသွေးဖုတ်ကြပါတယ်။
လက်နက်ကြီးသံ ငြိမ်နေချိန်မှာ ဒီအလုပ်ကို အချိန်လု လုပ်ရတာဖြစ်ပြီး မီးသွေးဖော်ပြီးရင် ထိုင်းဘက်ကမ်းပို့ ရောင်းစားကြပါတယ်။ ဒီလို ကျည်ခွံဖိုးရတဲ့ငွေ၊ မီးသွေးဖိုးကရတဲ့ငွေ အနည်းအကျဉ်းနဲ့ စစ်မြေပြင်မှာဖွင့်ထားတဲ့ အမိုးရဲ့ကော်ဖီဆိုင်ဆီ သွားထိုင်ပြီး ကျောင်းသားတွေထုံးစံအတိုင်း ပွားကြပါတယ်။

န၀တတောင်ကုန်းပေါ်က လက်နက်ကြီး ထွက်သံကြားရင် သေနတ်ကိုလွယ်၊ ကော်ဖီခွက်ကိုင်ပြီး လျှောက်မြောင်းထဲဆင်းပြေး၊ အသံပြန် ငြိမ်ရင် ကြံခတ်ရုံအောက်က စားပွဲမှာ ပြန်ထိုင်သောက်နဲ့။ အခုချိန်ပြန်စဉ်းစားရင် မယုံနိုင်စရာ၊ ကြက်သီးထစရာ ဖြစ်နေပါတယ်။
ဒုတိယတခုကတော့ မနက်အိပ်ရာထချိန်မှာ အိမ်သာမတက်ရရင် မနေနိုင်တဲ့ကျနော့်အဖို့ အဲဒီမနက် အိမ်သာတက်ချိန်မှာ န၀တဘက်က လက်နက်ကြီး မပစ်ပါစေနဲ့လို့ အိမ်သာတက်နေရင်း ဘုရားတ ဆုတောင်းရတဲ့အချက်ပါ။

“တိုက်ပွဲမှာကျည်မှန်ပြီး ကျသွားတာက အကြောင်းမဟုတ်ဘူး။ အာဇာနည်စာရင်း ၀င်နိုင်သေးတယ်။ ဒါပေမယ့် အီးအီးပါနေတုန်း လက်နက်ကြီးစထိပြီး သေသွားတယ်ဆိုရင်တော့ သမိုင်းကွေးပြီ” လို့ ပြောပြီး အချင်းချင်းကြား ဟားကြတာကိုလည်း အမှတ်ရနေဆဲဖြစ်ပါတယ်။ ထမင်းချက်နေတုန်း၊ တခြားတခုခုလုပ်နေတုန်း န၀တ တောင်ကုန်းဘက်က လက်နက်ကြီး ထွက်သံကြားရင် ကတုတ်ကျင်းထဲဖြစ်ဖြစ်၊ အနည်းဆုံး ဆက်သွယ်ရေး မြောင်းထဲဖြစ်ဖြစ် ပြေးခိုလို့ရပါတယ်။ ဒါပေမယ့် အိမ်သာတက်နေစဉ် လက်နက်ကြီး ထွက်သံကြားရင်တော့ တို့လို့တန်းလန်းနဲ့ ဘယ်လိုမှ နေရာပြေးယူဖို့ မလွယ်ပါ ဘူး။

“ဗုံးခို အိမ်သာကျင်း ဆောက်ပေးထားရင် ကောင်းမယ်ကွာ။ တခြားနိုင်ငံက စစ်ပွဲတွေမှာ ဒီကိစ္စ ဘယ်လို ဖြေရှင်းကြလဲမသိဘူး” ဆိုပြီး ကျနော်ငြီးတွားဖူးပါတယ်။ တခြားရဲဘော်တွေ ကျနော့်လို ဖီလင်ဖြစ်မဖြစ်တော့ အသေချာမမေးဖြစ်။ ကျနော်ကတော့ စစ်မြေပြင်အတွင်း အိမ်သာတက်ချင်တာ၊ စစ်ကြောင်းသွားနေစဉ်အတွင်း ရှုးရှုးပေါက်ချင်တာတွေအတွက် အတော့်ကို စိတ်အနှောက်အယှက်ဖြစ်ခဲ့ဖူးပါတယ်။

ကျနော်ဟာ အဲဒီကာလက အညကြ စစ်သည်တဦးသာ ဖြစ်တယ်ဆိုပေမယ့် သတင်းထောက်ဗီဇ ပါလာလို့လားမသိဘူး၊ KNU တပ်ကြပ်ကြီးတဦး ပေးထားတဲ့ ကင်မရာ ခပ်ညံ့ညံ့တလုံးကို ကိုင်ပြီး မှတ်တမ်းဓာတ်ပုံတွေ ရိုက်နေပြီဖြစ်ပါတယ်။ ဒါပေမယ့် ကံဆိုးချင်တော့ အဲဒီကင်မရာက အလင်းရောင် မလုံတဲ့အတွက် မဲဆောက်မှာ ဖလင်သွားကူးတော့ ဘာပုံမှထွက်မလာ။ ကင်မရာအကြောင်း နကန်းတလုံးမှ နားမလည်သေးတဲ့ ကျနော်ကတော့ စစ်ခမောက်ကို အပီဆောင်း၊ စစ်ဖိနပ်ကို အသေချာစီး၊ စစ်ယူနီဖောင်း အပြည့်ဝတ်ပြီး စစ်မြေပြင်သတင်းထောက်လိုလိုနဲ့ ရိုက်လိုက်ရတာအမော။

ရှေ့မှာ ပြောခဲ့တဲ့အတိုင်း ကော့မူးရာဟာ မဲဆောက်ကနေ မိနစ် ၃၀ သာ လာရတဲ့အတွက် တိုက်ပွဲကြီးတွေဖြစ်ပြီးတိုင်း နိုင်ငံတကာက မျက်နှာဖြူ သတင်းထောက်တွေနဲ့ ထိုင်းတွေအမြဲလာပြီး သတင်းယူနေကြ။  အဲဒီကာလတွေတုန်းကတော့ အေပီ၊ ရိုက်တာ၊ အေအက်ဖ်ပီ စသည်ဖြင့် အေဂျင်စီသတင်းဌာနတွေအကြောင်း နားမလည်သေးတဲ့အတွက် အသေချာ မစပ်စုမိပါ။ ဒါပေမယ့် ဘန်ကောက်ပို့စ် သတင်းထောက် မစ္စတာ ဂျိုးဆိုတဲ့ မြန်မာတ၀က်၊ ထိုင်းတ၀က်၊ အင်္ဂလိပ်တ၀က်ပြောတဲ့ လူကိုတော့ ကျနော်ကောင်းကောင်း မှတ်မိနေဆဲဖြစ်ပါတယ်။


လူလှိုင်းလုံးစစ်ဆင်ရေးနဲ့ လက်ညောင်းသွားတဲ့သူပုန်များ

တနေ့မှာတော့ အဲဒီ သတင်းထောက်တွေနဲ့အတူ ထိပ်တိုက် ကတုတ်တွေရှေ့က သတ်ကွင်းဆီ ကျနော် ရောက်သွားပါတယ်။ အဲဒီနေ့ဟာ ၃ ရက်ခန့်ကြာတဲ့ တိုက်ပွဲအကြီးကြီးတခု ပြီးသွားလို့ နှစ်ဖက်တပ်တွေ ငြိမ်နေချိန်။ န၀တတပ်တွေအားလုံး ထိပ်တိုက်ကနေ ခဏနောက်ပြန်ဆုတ်ပြီး သူတို့ရဲ့ တောင်ကုန်းဆီ ပြန်စုနေချိန်ဖြစ်ပါတယ်။

၃ ရက်တာတိုက်ပွဲအတွင်း န၀တဘက်က ကျန်ခဲ့တဲ့အလောင်းတွေ၊ သေနတ်တွေ၊ ဗုံးသီးတွေ၊ လှံစွပ်တွေ၊ ကိုယ်ပိုင်နံပါတ် ကတ်ပြားတွေ၊ ဂေါ်ပြားတွေ စုံလို့ပါပဲ။ သတ်ကွင်းကို တက်ရှင်းတယ်ဆိုတာ လွယ်တဲ့အလုပ်တော့ မဟုတ်ပါဘူး။ န၀တဘက်က အလောင်းတွေနဲ့အတူ ကျန်နေနိုင်တဲ့ ဗုံးသီးတွေ၊ ကိုယ့်ဖက်ကထောင်ထားတဲ့ မပေါက်သေးတဲ့ မိုင်းတွေကြားမှာ သွားရတာမျိုးပါ။ ဒါ့အပြင် သတ်ကွင်းပေါ် ကျနော်တို့လူအုပ်ကြီး ဒါဇင်နဲ့ချီ ရောက်နေတာကို န၀တတောင်ကုန်းပေါ်ကနေ ကောင်းကောင်းမြင်နိုင်တဲ့အတွက် အချိန်မရွေး အပစ်ခံရနိုင်တဲ့ အခြေနေလည်း ရှိနေပါတယ်။


ကော့မူးရာကို ကောင်းကင်မှ မြင်ရသည့် မြင်ကွင်း
ကျနော်အထင် အဲဒီသတ်ကွင်းထဲမှာ ၁၀ မိနစ်လောက်တော့ ဓာတ်ပုံရိုက်ခွင့်၊ ကြည့်ရှုခွင့်ရခဲ့တယ်လို့ ထင်ပါတယ်။ အလောင်းဘယ်နှစ်လောင်း တွေ့ခဲ့သလဲဆိုတာကို ကျနော်မမှတ်မိတော့။ ဒါပေမယ့် ၁၀၁ ဒုတပ်ရင်းမှူး ဗိုလ်မှူး သန်းအောင်ရဲ့ ရုံးခန်းလေးတခုမှာတော့ ရာနဲ့ချီရှိတဲ့ န၀တ အလောင်းတွေရဲ့ ဦးခေါင်းခွံတွေကို စုစည်းပြီး အသေအချာ မှတ်တမ်းတင်ထားတာ နောက်ပိုင်းမှာ ထုတ်ဝေတဲ့ စာစောင်တွေထဲမှာ ကျနော် တွေ့ဖူးပါတယ်။

ကျနော့်အတွေ့အကြုံအရ ၂ ဘက် အကျအဆုံး စာရင်းကို ပြောရမယ်ဆိုရင် န၀တဘက်က ၁၀ ဦးကျရင် ကျနော်တို့ဘက်က တဦးလောက်ပဲ ဒဏ်ရာရာတဲ့သဘော။ န၀တဘက်က ၄၀-၅၀ လောက်ကျမှ ကျနော်တို့ဖက်က တဦးလောက်ကျတဲ့ သဘောမျိုး တွေ့ရပါတယ်။ ဘာကြောင့် ဒီလို အချိုးစားကွာသလဲဆိုရင်  ရှေ့မှာ ကျနော်တင်ပြခဲ့တဲ့အတိုင်း ကျည်ကွယ်၊ မျက်ကွယ်၊ မြေပိုင်မှုတွေမှာ ကျနော်တို့ဘက်က အစစအရာရာ သာလွန်နေလို့ဖြစ်ပါတယ်။

ဒီလိုသာလွန်နေတဲ့ အခြေနေမှာ ပုံမှန်ထိုးစစ်နဲ့ ကျားတက်ထိုးလို့ မဖြစ်နိုင်တော့တဲ့အတွက် န၀တ တပ်တွေဟာ သူတို့တပ်စခန်းရှိရာ တောင်ခြေရင်းကနေ ကျနော်တို့ရှိတဲ့ ထိပ်တိုက်ခြံစည်းရိုးနားအထိ ဆက်သွယ်ရေးမြောင်းတူးပြီး တဆင့်ပြီးတဆင့် တက်လာနေတာကို နေ့ဘက်မှာတောင် မြင်နေရပါတယ်။ အကွေ့အကောက်များစွာနဲ့ တူးနေတဲ့အတွက် ဂေါ်ပြားနဲ့ကော်ပစ်နေတဲ့ မြေစာတွေကိုသာ ကောင်းကောင်းမြင်ရပြီး လူကိုတော့ ရိပ်ကနဲသာ မြင်ရပါတယ်။ အဲဒီမြင်ရတာကို ပွိုင့်ဖိုက်နဲ့ လှမ်းပစ်တော့ ခဏငြိမ်ပြီး ဆက်တူးမြဲ တူးနေပါတယ်။

ကျနော်အထင် သီတင်းတပတ်ကျော် ကြာတဲ့အခါမှာတော့ အဲဒီတူးမြောင်းဟာ သတ်ကွင်းထိပ်နားအထိ ရောက်လာပြီး အဲဒီအချိန်မှာ အင်အားအလုံးအရင်းနဲ့၊ လူလှိုင်းလုံးနဲ့ ဖိပြီးတက်ထိုးတော့တာပါပဲ။ ကျနော်တို့ဘက်ကလည်း ကတုတ်ကျင်းထဲကနေ အသေချာ ချိန်ပစ်ရုံပါပဲ။

ဒီလောက် ပစ်နေတဲ့ကြားထဲကကို ပစ်နေတဲ့လူရဲ့ ညာဖက်လက်ညှိုး ညောင်းသွားအောင်၊ ဘယ်လက်နဲ့ကိုင်ထားတဲ့ AK 47, M 16 ကိုယ်ထည်တွေ ပူလာပြီး မကိုင်နိုင်တဲ့အထိတောင် လူလှိုင်းလုံးကြီးက တလှိမ့်ပြီးတလှိမ့် တက်လာနေဆဲ ဖြစ်ပါတယ်။ တချို့စစ်သားတွေဆိုရင် မူးယစ်ဆေးတခုခု သုံးစွဲထားပုံရပြီး သေနတ်နဲ့ ဒီလောက်ပစ်နေတဲ့ကြားထဲ တိုးတိုးပြီး တက်လာတာ မပစ်ရက်လောက်အောင်ကို ခံစားခဲ့ရတယ်လို့ ထိပ်တိုက်ကတုတ်မှာ အနေကြာခဲ့တဲ့ ရဲဘော်တွေရဲ့ ပြောကြားချက်အရ သိရပါတယ်။

န၀တဘက်က အကျအဆုံးအများဆုံး တိုက်ပွဲတွေထဲက တခုကို ဥပမာပေးရမယ်ဆိုရင်  စစ်ကူရောက်လာတဲ့ DAB စစ်ကြောင်းနဲ့ စစ်ကြောင်းမှူး ဗိုလ်မှူး ရောဘတ်ဇံ (ဥက္ကဋ္ဌကြီး မန်းဘဇံရဲ့ သားကြီး၊ အခု အမေရိကား) ဦးဆောင်တဲ့အဖွဲ့ ထိပ်တိုက်မှာ တာဝန်ယူစဉ် ၃ ရက်တာ ကာလတိုက်ပွဲပါ။ တခြား စစ်ကြောင်းမှူးတွေ ဆိုရင်တော့ န၀တဘက်ကတပ်တွေ အလုံးအရင်းနဲ့ တက်လာပြီဆိုရင် မိုင်းကွင်း၊ ၀ါးချွန်ကွင်းကိုကျော်ပြီး ပထမ သံဆူးကြိုး ခြံစည်းရိုးကိုရောက်တာနဲ့ ပစ်မိန့် ပေးလေ့ရှိတယ်လို့ဆိုပါ တယ်။

ဒါပေမယ့် ဗိုလ်မှူး ရောဘတ်ဇံကတော့ သတ်ကွင်းနဲ့ ခြံစည်းရိုးအားလုံးကို ကျော်ပြီး နောက်ဆုံး သံဆူးကြိုးရောက်မှ ပစ်မိန့်ပေးတဲ့အတွက် ထိပ်တိုက်ပေါက်ပြီထင်ပြီး တအားလှိမ့်တက်လာတဲ့ န၀တတပ်တွေကို အနီးကပ် ပစ်ခတ်နိုင်ခဲ့တာကို တွေ့ရပါတယ်။ နယ်ကျွံသွားတဲ့ န၀တတပ်တွေဟာ အလောင်းနဲ့ဒဏ်ရာရသူကိုလည်း ပြန်မသယ်နိုင်၊ သေနတ်တွေကိုလည်း ပြန်မယူနိုင်တော့ဘဲ ဆုတ်ခွာခဲ့ရတဲ့အတွက် အရာရှိတွေအပါဝင် အတော်များများ ကျဆုံးခဲ့ရပါတယ်။

ဘာကြောင့်မှန်းတော့မသိ။ စစ်မြေပြင်မှာ သာမန်ရဲဘော်တွေ ကျဆုံးပြီး သူတို့ဆီက ဂျီသရီး သေနတ်ရတာကို ဘယ်သူကမှ သိပ်စိတ်မ၀င်စား။ ဒါပေမယ့် အရာရှိတဦးဦးကျပြီး သူတို့ဆီက ပစ္စတိုသေနတ်ရပြီ ဆိုရင်တော့ အဲဒီသတင်းဟာ ကျနော်တို့ကြား ဟိုးလေးတကျော် ဖြစ်လေ့ရှိပါတယ်။ အဲဒီညက တိုက်ပွဲအတွင်း န၀တဆီက ပစ္စတို ၂ လက်ရခဲ့တယ်လို့ ဗိုလ်မှူး ရောဘတ်ဇံရဲ့ ပီအေတဦးက အဲဒီပစ္စတိုကို ထုတ်ပြပြီး ကျနော်တို့ ကတုတ်ကျင်းရှေ့မှာ ကြွားပြသွားတာကို ကျနော်မြင်ယောင်နေဆဲဖြစ်ပါတယ်။
.......................................................................................................
(အခုသတင်းပါတ်တွေအတွင်း နိုင်-ကျဉ်း တွေလွတ်ပေးတဲ့သတင်းနဲ့ပါတ်သက်ပီး ထောင် အကြောင်း အောက်မေ့ဘွယ်တွေလာနေတဲ့အတွက် တောအကြောင်း အောက်မေ့ ဘွယ် 
အခန်း ၁၇-ကိုလာမဲ့ ကြာသပတေး။ ဖေဖေါ်ဝါရီ ၂-ရက်နေ့မှာမှ ပြန်ထည့်နိုင်မယ်လို့ 
ဧရာဝတီက အကြောင်း ကြားထားပါကြောင်း)


2 Comments

နိင်ငံနှင့်လူမျိုးကိုချစ်သူ
တိုက်ပွဲအကြောင်းကို ဖတ်ရတာ တော်တော်ဘဲ စိတ်မကောင်းဖြစ်မိပါတယ် ကိုယ့်လူမျိုးအချင်းချင်း ပြန်သတ်ကြတာ ကို့အိမ်ကကို့ညီအစ်ကိုအချင်းချင်း ပြန်သတ်သလိုပါဘဲ ကျနော်တို့နိုင်ငံက ဗမာနိုင်ငံမဟုတ်ပါဘူး တိုင်းရင်းသားအားလုံးနဲ့ စုပေါင်းပြီးတော့မှ ကမ္ဘာ့မြေပုံပေါ်မှာမြန်မာ (MYANMAR) ရယ်လို့ပေါ်လာတာပါ နိုင်ငံသားတယောက် သေသွားရင်သူ့နောက်ကမိ ဘ သားသမီး ညီအစ်ကိုမောင်နှမတွေ ဘယ်လောက် အခက်တွေ့ကြမလဲ အဖေမရှိတဲ့ခလေး အစ်ကိုမရှိတဲ့ညီမ လင်မရှိတဲ့မိန်းမ ပြောရရင်တော့အမြားကြီးပေါ့ စာရေးသူရဲ့အတွေ့အကြုံကို ဖတ်ခွင့်ရလို့ကျေးဖူးတင်ပါတယ်ဗျာ
........................................................................................................

soe88
ဆရာလုပ်ချင်မဟုတ်ပါ..သမိုင်းမှန်ဖြစ်စေချင်လို့ပါ…ကိုတင်ရွှေဟာ ပထ၀ီနဲ့ ကျောင်းပြီးတာမဟုတ်ပါ ဘူမိဗေဒနဲ့ပါ..G3 နဲ့ M16 ကျည်ခွံတွေက ကြေးခွံဖြစ်လို့ဝယ်ပြီး AK ကျည်ခွံက သံဖြစ်လို့ မ၀ယ်တာပါ…K.N.U ဒုရင်းမှူးနံမည်က ဗိုလ်မှူးသန်းအောင် မဟုတ်ပါ.ဗိုလ်မှူးသန်းမောင်ဖြစ်ပါတယ်…၀မ်ခ(ဟောင်း)စခန်းကဆုတ်ခွာခဲ့ပုံတွေ.န၀တတပ်တွေ ထိုင်းဘက်ကမ်းက ၀မ်ခ(သစ်)ကိုဝင်တိုက်ပုံတွေ..မင်းကျော်ကျဆုံးခဲ့တဲ့ အဖြစ်အပျက်တွေ ကျနော်ရေးနိင်အောင် ကြိုးစားနေပါတယ်..ခင်ဗျာရေးချင်လဲ ပြောပြဖို့ ၀န်းမလေးပါ…မင်းကျော်ဟာ ခင်ဗျာတို့ စခန်းကပါ…
.................................................................................................

1 comments:

ကျနော်အနေနဲ့ စာဖတ်သူတွေရဲ့ ထင်မြင်ချက်။ အကြံပြုချက်တွေကို အမြဲတန်း ဖိတ်ခေါ်လျက်ရှိပါတယ်။ ဒီဆောင်းပါးတွေမရေးခင်ကတည်းက ဒီ ဘလော့မှာ အားလုံးကို ကျနော်ဖိတ်ခေါ်ခဲ့ဖူးပါတယ်။

အခု ကွန့်မင်းရေးထားသူတွေထဲက Soe88 ရဲ့ ကွန့်မင်းမျိုးကို ကျနော် အရမ်းသဘောကျပါတယ်။ ကိုယ်တိုင်ပါဝင်ခဲ့သူတွေက အဲဒီလိုအမှားတွေ။ အားနဲချက်တွေကို ထောက်ပြမှ ကျနော်က ပြန်ပြင်နိုင်မှာဖြစ်ပါတယ်။

ဒီဆောင်းပါးတွေအားလုံးနီးပါးဟာ ကျနော်စိတ်ထဲ မှတ်မိသမျှကို ပြန်ရေးတာသာဖြစ်တဲ့တွက် အားလုံးအမှန်ဖြစ်ဖို့ သိပ်မလွယ်ပါဘူး။ နောက်တခါ ဆောင်းပါးထဲက အတူနေခဲ့ဖူးသူ တွေကို ဆက်သွယ်မေးမြန်းတဲ့အခါမှာလဲ တော်ယုံနဲ့အဖြေမရပါဘူး။ မမှတ်မိတော့ ဘူးလို့ ဖြေသူတွေနဲ့သာကြုံရလေ့ရှိပါတယ်။

အခု ကော့မူးရာဆောင်းပါး(၃-ခန်းတွဲ) အတွက်ဆိုရင် ဆရာမြင့်ချို။ ကိုဝင်းချို။ ကိုတင်ရွေ။ ဗိုလ်မှုးရောဘဇံ-အပါဝင် အွန်လိုင်းမှာတွေ့တဲ့ ABSDF ရဲဘော်ဟောင်းအတော်များများကို ကျနော်မေးမြန်း ခဲ့ပါတယ်။

ကျနော်တို့စခန်းက မင်းကျော် ကော့မူးရာမှာ ကျဆုံးတာဟုတ်ပါတယ်။ ဒါပေမဲ့ အခုကျနော်ရေးတာက ၁၉၈၉ မေလ-၀န်းကျင်တခုတည်း သာဖြစ်ပီး သူကျဆုံးတာက ၉၀-၉၁ လောက်ဖြစ်မလားဘဲ့။

အလားတူ ဝေဖန်ထောက်ပြမှုတွေကို လက်ကမ်းကြိုဆိုလျက်ပါ။

ဓါတ်ပုံနဲ့အချက်လက်ရှိရင်လဲ ဒီဘလော့မှာပါတဲ့ လိပ်စာအတိုင်း ဆက်သွယ် ပေးပို့ကြစေချင်ပါတယ်။

အားလုံးကိုလေးစားလျက်
........................................................................................................................
သူပုန်ကျောင်းသားတဦးရဲ့ မာရသွန်ခရီး ၁၅

သောင်ရင်းမြစ်လယ်က ကျည်ဆံတွေကြားမှာ

ဒီလူတွေက လမ်းအတော် ကျွမ်းပုံရပါတယ်။ လက်နက်ကြီးကျည် ကျထားလို့ မီးလောင်ထားတဲ့ နေရာတွေကိုရှောင်ကွင်း၊ တချို့နေရာတွေမှာတော့ သစ်ခက်တွေခုတ်ပြီး တောမီးကို ငြိမ်းသတ်၊ ဝေါ်ကီတော်ကီထဲကနေ ကရင်စကားတွေနဲ့ပြော။


အိုမီဂါ ပုံရှိတဲ့ ကော့မူးရာစခန်းကို လေယာဉ်ပေါ်မှ မြင်ရစဉ်

“နာဟူးဃာ … နာဟူးဃာ” (ကြားရလား … ကြားရလား လို့ မြန်မာလို အဓိပ္ပာယ်ရပါတယ်။ ကျနော်တို့ ကျိုးဖိုးတွေရဲ့ စကားလုံးအတိုင်းဆိုရင်တော့ ရထား ဖြစ်လား … ရထား ဖြစ်လားလို့ တဖက်က စက်ကိုင်ထားတဲ့လူကို မေးတဲ့သဘောပါ)။ အဲဒီတလုံးကလွဲရင် ကျန်တာကို ကျနော်က ဘာမှနားမလည်။

ဆိုတော့ ကျနော်စိတ်ထဲမှာ ငါတခါမှ အသေချာမသိဖူးသေးတဲ့ ဒီလူတွေနဲ့လိုက်လာမိတာ မှားပြီလား။
လိုင်းကားပြန်စီးပြီး မဲဆောက်ပြန်သွားရင် ကောင်းသားဆိုပြီး စဉ်းစားနေမိပါတယ်။ နောက်ပြီး န၀တ စစ်သားတွေ နယ်ကျွံပြီး ဒီတောထဲရောက်နေမလား၊ န၀တဖက်က လွှတ်ထားတဲ့ စစ်မြေပြင် ကင်းထောက်တွေနဲ့ပဲ တိုးမလား၊ KNU ဖက်က လွှတ်ထားတဲ့ စစ်သားတွေနဲ့ပဲ တိုးပြီး လူမှားပစ်ခံရမလား စသဖြင့် တွေးပူရင်း တကယ့်ကို စိတ်လှုပ်ရှားနေမိပါတယ်။

“ဟိုမှာရောက်ပြီ”။ ကျနော်စဉ်းစားစိတ်ပူလို့ ကောင်းတုန်းမှာ ဝေါ်ကီတော်ကီဆရာက ကျနော့်ကို လက်တို့ပြီး ပြောလိုက်တာပါ။ ကော့မူးရာစခန်းရဲ့ နောက်ကျောဘက်ရှိ ထိုင်း-ကရင် ဘုန်းကြီးကျောင်းတခုကို ဖြတ်အဆင်း သောင်ရင်းမြစ်ဘေးက တောအုပ်တခုထဲရှိ တဲငယ်တလုံးမှာ ထိုင်နေတဲ့ လူ ၃-၄ ယောက်။ KNU စစ်မြေပြင် ထောက်လှမ်းရေးတွေဖြစ်ပုံရပြီး သူတို့ကို ကျနော်တခါမှ မမြင်ဖူးဘူး။ သူတို့ အချင်းချင်းကြား ကရင်စကားနဲ့ ပြောနေတာကိုလည် “အ၀ဲတကာ …”  မြန်မာလို “ဒီလူတယောက်ကတော့ဖြင့် …” လို့ အဓိပ္ပယ်ရပြီး ကျနော့်ကို ညွှန်းဆိုတဲ့စကားလုံးကလွဲရင် ကျန်တာကို တလုံးမှနားမလည်။

“ဒီနေရာကို ရန်သူ့တောင်ကုန်းပေါ်ကနေ မမြင်ရဘူး အေးဆေးပဲ။ ဒါပေမယ့် မြစ်ကို ဖြတ်ရမှာမို့ အလင်းရောင်ရှိနေတဲ့ အချိန်ဆိုမဖြစ်ဘူး။ မှောင်ရီပျိုးတဲ့အချိန်အထိ ဒီမှာခဏစောင့်” ရမယ်လို့ ဝေါ်ကီတော်ကီဆရာက အနှစ်ချုပ် ဘာသာပြန်ပေးပါတယ် (အဲဒီ တဲနေရာဟာ နောက်ပိုင်း တိုက်ပွဲကြာလာတဲ့ အခါမှာတော့ ကော့မူးရာနဲ့ ထိုင်းဘက်ကမ်းကို ကြိုးဆွဲလှေနဲ့ ဖြတ်ကူးတဲ့ လမ်းကြောင်းနေရာ ဖြစ်လာပါတယ်)။ ဒီလိုနဲ့ ည ၆ နာရီ ကျော်ကျော်လေးမှာ သောင်းရင်းမြစ်ကို ကျနော်တို့ ဖြတ်ပါတယ်။ မြစ်ပြင်ကျယ်က ပေ ၅၀ လောက်ရှိ မလားပဲ။ ရေကတော့ မြစ်ထဲဆင်းကာစမှာ ဒူးဆစ်လောက်သာရှိပေမယ့် မြစ်လယ်ရောက်တော့ ပေါင်လယ်လောက်၊ ခါးဆစ်လောက်အထိ နက်လာပါတယ်။

ကံကဆိုးချင်တော့ ကျနော်တို့ မြစ်လယ်ကျော်ကျော်လေး အရောက်မှာ န၀တ ဘက်ကနေ လက်နက်ကြီးတွေ ထပ်ပစ်တဲ့အတွက် KNU ဘက်ကလည်း ပြန်ပစ်သံတွေ ကြားလိုက်ရပါတယ်။ “သွားပြီ ဒီတခါတော့ ငါလိုက်လာမိတာ တကယ်မှားပြီ်” လို့ စိတ်ထဲတွေးနေတုန်း “ဒက် ဒက် ဒက်” ဆိုတဲ့ M 16 သေနတ် အနီးကပ် ပစ်သံကို ကြားလိုက်ရပြီး “ဖြောက် ဖြောက် ဖြောက်” ဆိုတဲ့ အသံတွေနဲ့အတူ ကျည်ဆံ ထိပ်ဖူးတွေ ကျနော်ဘေးက ရေထဲကျလာပါတယ်။ တိုက်ပွဲအတွေ့အကြုံ မရှိသေးတဲ့ ကျနော်ဟာ တကယ်ပစ်သလား၊ ဘေးကို ခြောက်ပစ်သလားဆိုတာကို ခွဲခြားဖို့အချိန် မရလိုက်။ ဘာလချောင်အိတ်ကိုကိုင်ပြီး ဒိုင်ဗင်ထိုးကာ ရေငုပ်လိုက်ပါတော့တယ်။

“ကျနော်တို့ကို ပစ်နေပြီ၊ အော်ပြောလေ ဆရာ” ဆိုပြီး ဝေါ်ကီတော်ကီဆရာကို ပြောတော့ “ကိစ္စမရှိဘူး၊ ခြောက်ပစ် ပစ်တာပါ” တဲ့။ သူကခြောက်ပစ် ပစ်တယ်လို့ပြောပေမယ့် ဒီလောက်မှောင်မဲနေတဲ့ကြားထဲ ဘယ်လိုလုပ်ပစ်မှတ် ရွေးမှာလဲ။ ပြီးတော့ ကျနော်တို့က တိုက်ပွဲဖြစ်နေချိန် သူတို့စခန်းထဲ ၀င်လာတဲ့လူတွေ။ ရန်သူထင်ပြီး ပစ်မိတယ်ဆိုရင် ကျနော်ဘာမှမတတ်နိုင်။ ဘယ်သူမှလည်း ကျနော်သေသွားတာကို သိလိုက်မှာမဟုတ်။ ဆိုတော့ ကျနော် ခြေဖျားလက်ဖျားတွေ အေးစက်ပြီး အတော်လေးကို တုန်လှုပ်ခြောက်ခြားနေမိပါတယ်။

နောက်ဆုံးတော့ ကျနော်တို့ကိုပစ်တဲ့လူရှိရာ ကတုတ်ကျင်းထဲကိုပဲ ကျနော်တို့အုပ်စုရောက်သွားပြီး ဝေါ်ကီတော်ကီဆရာက ကရင်ဘာသာနဲ့စကားတွေပြောနေပါတယ်။ ထုံးစံအတိုင်း ကျနော်က တလုံးမှနားမလည်။ ကျနော့်ပုံကိုကြည့်ပြီး ကရင်စစ်သားတွေ သနားသွားသလား။ ဒါမှမဟုတ်
ဟားချင်နေမလားတော့ ကျနော်မမှန်းတတ်။


ကော့မူးရာ စစ်ပြေပြင်မှာ တလတာ

နောက်တနေ့မနက်မှာတော့ ကျနော်တို့နယ်မြေရုံးကလူတွေ စခန်းထိုင်ထားတဲ့ ကျွန်းတံတားကြီး နှစ်ခုဘေးနားက ကတုတ်ကျင်းဆီ ကျနော်ကို ပို့ပေးပါတယ်။ မနေ့ညက အဖြစ်ပျက်ကိုပြောပြတော့ ဘယ်သူကမှ စိုးရိမ်ထိတ်လန့်မှုမပြ။ “မောင်ရင်က မောင်ကျော်တွေရဲ့ ပညာပေးမှုကို ခံလိုက်ရတာပေါ့” ဆိုပြီး တ၀ါးဝါးတဟားဟားနဲ့ ၀ိုင်းရယ်ကြပါတယ် (မောင်ကျော်ဆိုတာက KNU ညီအစ်ကိုတွေကို ကျောင်းသားတွေက ခေါ်လေ့ရှိတဲ့စကားလုံးပါ)။

တကယ်ကတော့ ကျနော်တို့လူတွေရှိတဲ့နေရာနဲ့ မနေ့ညက ကျနော်ရောက်ခဲ့တဲ့နေရာဟာ ဟိုဘက်ထိပ် ဒီဘက်ထိပ် ဆန့်ကျင်ဖက်။ မြင်းခွာရာ သို့မဟုတ် အိုမီဂါပုံရှိတဲ့ ကော့မူးရာစခန်းဟာ စတုရန်းမိုင် တမိုင်ကျော်ကျော် သို့မဟုတ် ကျနော့်မျက်မှန်း ဘောလုံးကွင်း ကွင်း ၁၀၀ စာလောက် ရှိမလားပဲ။ မြင်းခွာရာရဲ့ ရှေ့တည့်တည့်က အပေါက်ဟာ န၀တတပ်နဲ့ ထိပ်တိုက်ရင်ဆိုင်ထားတဲ့ မီတာ ၂၀၀ ၀န်းကျင်ရှိ သတ်ကွင်း။


ကော့မူးရာ သို့မဟုတ် ၀မ်ခစစ်မြေပြင် ကတုတ်ကျင်းအတွင်း ဖွင့်လှစ်ထားသော ABSDF ဆေးခန်း

တိုက်ပွဲမဖြစ်မီအချိန်အထိ ရေကျော်စခန်းနဲ့ မြန်မာနိုင်ငံအတွင်းပိုင်းအထိ သွားနိုင်တဲ့ အဲဒီသတ် ကွင်းရှေ့တည့်တည့်က
ကားလမ်းကိုပိတ်၊ သံဆူးကြိုး ခြံစည်းရိုးသုံးထပ်ကာ။ အဲဒီသံဆူးကြိုး သုံးထပ်ရှေ့မှာမှ ၀ါးချွန်ခပ်တိုတိုတွေကို သစ်ရွက်ခြောက်တွေနဲ့ဖုံးပြီး စိုက်ထားတဲ့၊ အဝေးကမမြင်နိုင်တဲ့ ခြံစည်းရိုး သုံးထပ်။ သံဆူးကြိုး သုံးထပ်နောက်မှာတော့ ကွန်ကရစ်တွေနဲ့ အခိုင်မာဆောက်ထားတဲ့ ကတုတ်ကျင်း ဘန်ကာ တဒါဇင်ခန့်။ ဒါပေမယ့် အဲဒီကတုတ်ကျင်းနဲ့ ခြံစည်းရိုးတွေကို န၀တတပ်တွေ စခန်းထိုင်ထားတဲ့ တောင်ကုန်းပေါ်ကနေ မမြင်နိုင်ပါဘူး။ ဘာကြောင့်လဲဆိုရင် ဒီထိပ်တိုက်က ကတုတ်ကျင်း တဒါဇင်ခန့်အပါဝင် သောင်ရင်းမြစ်ပတ်လည်ရှိ ကကုတ်ကျင်းပေါင်း ၁၀၀ ၀န်းကျင်ကို ကြခတ်ဝါးရုံ အကြီးကြီးတွေက မျက်ကွယ်ပေးထားလို့ ဖြစ်ပါတယ်။

ဒီလို ကျည်ကွယ် မျက်ကွယ်ကောင်းပြီး ပထ၀ီအနေထားအရလည်း လုံးဝ အသာစီးရနေတဲ့အပြင် စိတ်ဓာတ်ရေးရာအရလည်း ၈ လေးလုံး အရေးတော်ပုံပြီးကာစ၊ DAB တပ်ပေါင်းစုရဲ့ အင်အားနဲ့ စည်းလုံးညီညွတ်မှု အတောင့်တင်းဆုံးကာလ ဖြစ်ပါတယ်။ KIO, ALP အပါဝင် NDF အမျိုးသားဒီမိုကရေစီ တပ်ပေါင်းစုက တပ်စုတစု၊ ရှေ့မှာ ကျနော်တင်ပြခဲ့တဲ့ မာနယ်ပလောမှာ မဖွဲ့ဖြစ်လိုက်တဲ့ DAB စစ်ကြောင်းကနေ ပြန်လာတဲ့ မင်းသမီးစခန်းက ABSDF တပ်စုတစု၊ ဘုရားသုံးဆူဘက်က တပ်စုတစု၊ သီဘောဘိုးဘက်က တပ်စုတစုနဲ့ မဲဆောက်မှာ သောင်တင်နေတဲ့ ကျောင်းသားအတော်များများ ၀မ်ခတိုက်ပွဲထဲ ၀င်လာကြပါတယ်။

နောက်တခါ ABSDF ကျောင်းသားဟောင်းတွေ အပါအ၀င် လူဆိုး-လူတော်လေးတွေနဲ့ စုဖွဲ့ထားတဲ့ DAB စစ်ကြောင်းတခုရဲ့ နာမည်ကြီးစစ်ကြောင်းမှူး ဗိုလ်မှူး ရောဘတ်ဇံရဲ့ တပ်ဖွဲ့တွေလည်း ကော့မူးရာမှာ စစ်ကူရောက်နေကြပါတယ်။ ဒါကြောင့်လည်း ကော့မူးရာတိုက်ပွဲဟာ ၆ နှစ်နီးပါး ကြာခဲ့ပြီး အရှည်ကြာဆုံး စစ်ပွဲတခုအဖြစ် သမိုင်းဝင်ခဲ့ပါတယ်။

၁၉၈၉ မေလကနေ ၁၉၉၅ ဖေဖော်ဝါရီလကုန်ပိုင်းအထိ ကြာမြင့်ခဲ့တဲ့ ဒီတိုက်ပွဲအတွင်း တကယ့်ပြောင်မြောက်စွာ တိုက်ပွဲဝင်ခဲ့သူတွေ၊ အသက်ပေးသွားသူတွေနဲ့စာရင် ကျနော်ဟာ ဘာမှမဟုတ်။ ၆ နှစ်ကြာစစ်ပွဲမှာ တလနဲ့ ၆ ရက်လောက်သာ ပါဝင်ခဲ့ဖူးတဲ့ အညတြရစစ်သည်တဦးမျှသာ။ ကျနော်ရှိနေစဉ် တလကျော်ကာလအတွင်း န၀တတပ်တွေက သောင်ရင်းမြစ်ကိုဖြတ်ပြီး ၀မ်ခဈေးထဲကိုဝင်၊ အဲဒီကနေ ကော့မူးရာကို နောက်ကျောကနေ ၀င်တိုက်တာ တကြိမ်နဲ့ ထိပ်တိုက်မီတာ ၂၀၀ သတ်ကွင်းမှာ တက်တိုက်တာ ၁၀ ကြိမ်လောက် ကြုံခဲ့ဖူးပါတယ်။ ဒီလိုပြောလိုက်လို့ အဲဒီပွဲမှာ ကျနော်ကိုယ်တိုင် ဦးစီးပါဝင်ခဲ့တယ်လို့ မထင်လိုက်ပါနဲ့။

ရှေ့ပိုင်းမှာ တင်ပြခဲ့တဲ့အတိုင်း မင်းသမီးစခန်းမှာ စစ်သင်တန်းပေးဖို့ စပြင်ဆင်နေချိန်မှာ နယ်မြေကော်မီတီဆီ ပါလာတဲ့ကျနော်ဟာ ၀မ်ခတိုက်ပွဲရောက်တဲ့အထိ တခါမှ စစ်သင်တန်း (၀ါးရင်းတုတ် သင်တန်းမှအပ) အသေအချာ မတက်ဖူးသေးပါ။ ပဒို (နိုင်ငံရေးနဲ့ အုပ်ချုပ်ရေးအရာရှိ) လိုလို သူးခို (စစ်ဖက်အရာရှိ) လိုလိုနဲ့ အပေါ်မရောက် အောက်မရောက် ဘ၀ကနေ ၀မ်ခတိုက်ပွဲထဲ ရောက်လာသူပါ။

ဝမ်ခ ရောက်ရောက်ချင်း AK 47 တလက်ကိုကိုင်ပြီး သေနတ်ပစ်နည်း၊ ဖြုတ်နည်း၊ တိုက်ချွတ်နည်းတွေကို လက်ပူတိုက် သင်ရပါတယ်။ AK 47 ဟာ အကြမ်းခံနိုင်ဆုံး လက်နက်ဖြစ်ပြီး ဖြုတ် တပ် ဆေးကြောရတာလည်း လွယ်ကူလို့ ကျနော်ရွေးလိုက်တာပါ။ ဒါပေမယ့် သူရဲ့ တခုတည်းသော အားနည်းချက်ကတော့ ကျည်ထွက်တဲ့အခါ မီးပွင့်မှုနှုန်း သိပ်မြင့်တဲ့အတွက် ညတိုက်ပွဲနဲ့ ကြုံတဲ့အခါ မိမိရဲ့နေရာကို တဖက်ရန်သူက မြင်နိုင်တဲ့အချက် ဖြစ်ပါတယ်။

M 16 ကတော့ မီးပွင့်တဲ့ပြဿနာ မရှိပေမယ့် မကြာခဏ ဂျမ်းဖြစ်တတ်ပါတယ်။ ဒါကလည်း ကျနော်တို့ ကိုင်နေတဲ့သေနတ်တွေက အမေရိကန်စစ်သားတွေကိုင်နေတဲ့ သေနတ်လို အသစ်စက်စက် မဟုတ်ဘဲ အတော် အိုဟောင်းနေလို့လည်း ဖြစ်နိုင်ပါတယ်။

နောက်တခါ န၀တတပ်ဆီက သိမ်းဆည်းရမိတဲ့ G3, G4 လက်နက် အတော်များများကိုလည်း ကျနော်တို့ ကျောင်းသားတွေ အသုံးပြုခဲ့ပါတယ်။ တချို့ စစ်ရေးအတွေ့အကြုံ ရှိသူတွေရဲ့အဆိုအရ န၀တတပ်သားတွေဟာ AK 47, M 16 ကျည်ကို သိပ်မကြောက်ဘဲ G3, G4 ကျည်ကို ပိုကြောက်တယ်လို့ဆိုပါတယ်။ ဒါပေမယ့် ကျောင်းသားတွေ ကြားမှာတော့ G3, G4 က အလွန် လေးလံပြီး ဒီဇိုင်းကလည်း မလှပတဲ့အတွက် သိပ်မကြိုက်ကြပါဘူး။

အဲဒီလို AK 47 တလက်နဲ့ ဟန်ရေးပြနေတဲ့ ကျနော်ဟာ တကယ် တိုက်ပွဲဖြစ်တဲ့အခါမှာတော့ ကတုတ်ကျင်းထဲမှာ တုန်တုန်ရီရီဖြစ်နေပြီး ဆက်သွယ်ရေးမြောင်းဘောင်ပေါ်မှာ လမ်းလျှောက်မပျက်ဘဲ ဝေါ်ကီတော်ကီ ပြောနေဆဲဖြစ်တဲ့ KNU က စစ်ဗိုလ်တွေကို အားကျငေးကြည့်နေသူ၊ AK 47 သေနတ်ကို ကကုတ်ကျင်းထဲကနေ ခေါင်းမဖော်ရဲဘဲ ပစ်နေသူ၊ သေနတ်ပြောင်းတခုစာသာ ဖွင့်ထားတဲ့ ကတုတ်ကျင်း သေနတ်ပစ် ပေါက်ကနေ န၀တဘက်က ပစ်လိုက်တဲ့ကျည်များ ကိုယ့်မျက်နှာဆီတန်းပြီး ၀င်လာမလားဆိုပြီး ဘုရားတနေသူတဦးမျှသာ ဖြစ်ခဲ့ပါတယ်။

“သူများဖုတ်တွေမှာ ၀တ်လစ်စလစ် ကောင်မလေးပုံတွေ ကပ်ထားပြီး ခင်ဗျားဖုတ်မှာတော့ ဘုရားပုံတွေနဲ့ပါလား။ စစ်တိုက်ရင်းနဲ့ ကုသိုလ်တော့ အတော်ရနေပြီ ထင်တယ်နော်” လို့ ကျနော်နဲ့ တပ်စုတခုတည်း တာဝန်ကျတဲ့ ၂၁၁ ရဲဘော်တချို့က စပါတယ် (ကတုတ်ကျင်း၊ ဘန်ကာတွေကို KNU နဲ့ ကျောင်းသားတွေက ဖုတ်လို့ ခေါ်ပါတယ်။ ဆက်သွယ်ရေးမြောင်းကိုလည်း လျှောက်မြောင်းလို့ ခေါ်ကြပါတယ်)။

သူတို့ ပြောမယ်ဆိုလဲ ပြောချင်စရာပါပဲ။
သာမန်အချိန်မှာ ညအိပ်ရာဝင်ရင်တောင် ဘုရှားရှိခိုးမှုကို ပုံမှန်လုပ်လေ့မရှိတဲ့ကျနော်ဟာ အခုတိုက်ပွဲအတွင်းမှာတော့ မနက်တခါ ညတခါအပြင် အချိန်ရတိုင်း ဘုရားရှိခိုး ဆုတောင်းသလိုဖြစ်နေတဲ့အတွက် သူတို့မျက်စိနောက်နေပုံရပါတယ်။ အဲဒီအချိန်က ကျနော်နဲ့တပ်စုတခုတည်း တာဝန်ကျသူတွေထဲမှာ အခု DKBA ဘက်ကိုပြောင်းသွားတယ်ဆိုတဲ့ KNU တပ်စုမှူးတဦးနဲ့ တပ်ကြပ်ကြီးတဦး၊ နောက် ABSDF ရဲ့ ဆက်သွယ်ရေးဌာန အကြီးအကဲဖြစ်လာပြီး အခု သြစတေးလျကို ရောက်သွားတဲ့ ကိုဗျတ္တနဲ့ မုဒုံဖက်က ကျောင်းသား ၃-၄-ဦး။ နောက်တခါ ၂၁၁ တပ်ရင်းမှူနဲ့ ဗဟိုတပ်ထောက်ချုပ်ဖြစ်လာပြီး အခု မဲဆောက်မှာ ကျောင်းဆရာနဲ့ ဂီတဖျော်ဖြေမှု လုပ်နေသူ ကိုဝင်းချို။ နောက် ကျဆုံးသွားကြပြီဖြစ်တဲ့ ကိုနီမင်း၊ ကိုလှသွင်နဲ့ နယ်မြေရုံးအဖွဲ့မှ ကိုမြင့်ဆွေတို့ကို  ကျနော်အမှတ်ရနေပါတယ်။

စစ်မြေပြင်ဆိုပေမယ့် တိုက်ပွဲက တချိန်လုံးဖြစ်နေတာမျိုးတော့ မဟုတ်ပါ။ မနက်စောစောနဲ့ ညနေ ရေချိုးချိန်မျိုးမှာ န၀တဘက်က ပုံမှန်နီးပါး လက်နက်ကြီးနဲ့ ပစ်ခတ်လေ့ရှိပါတယ်။ ဒါပေမယ့် ထိပ်တိုက်ကို တက်ထိုးတာမျိုးဆိုရင်တော့ ဘာအသံမှမပေးဘဲ ငြိမ်နေစဉ် မနက်လင်းအားကြီးမှာ လက်နက်ကြီးနဲ့ ထရစပ်ပစ်ပြီး ရုတ်တရက် ထလုပ်တာမျိုးတွေ ဖြစ်ပါတယ်။ ထိုင်းဘက်ကမ်းကိုကူးပြီး  ကော့မူးရာစခန်းကို နောက်ကျောကနေ ၀င်တိုက်တာမျိုးကိုတော့ နေ့လည်ဘက်မှာ ဗြောင်လုပ်လေ့ရှိပါတယ်။ န၀တဘက်က ပစ်တဲ့ လက်နက်ကြီးတွေကလည်း တကယ့်ကြောက်စရာကောင်းပါတယ်။

၁၂၀ မီလီမီတာ၊ ၈၁ မီလီမီတာ အဝေးပစ်မော်တာအမြောက်ဆံနဲ့ ကျနော်တို့ရဲ့ ကတုတ်ကျင်းအမိုးကို ပြိုအောင်ထုတဲ့အချိန်၊ နောက် ကတုတ်ကျင်းကို ကာပေးထားတဲ့ ကြခတ်ဝါးရုံနဲ့ ကျွန်းပင်တွေကို ၈၄ မီလီမီတာ လောင်ချာနဲ့ထုတဲ့အချိန်၊ ဆက်သွယ်ရေးမြောင်းထဲ လမ်းလျှောက်နေသူတွေကို ထိနိုင်ဖို့ အော်လီဂန်းစက်သေနတ် (မူလ အမည်က Oerlikon ဖြစ်ပြီး ၂၀ မီလီမီတာကျည်နဲ့ပစ်တဲ့ ဘော်ဗာ သို့မဟုတ် စက်လက်တမျိုး ဖြစ်ပါတယ်) နဲ့ ကျွန်းပင်တွေ၊ သစ်ကိုင်းတွေကို ပစ်ချိုးတဲ့အချိန်တွေဟာ အတော်စိတ်လှုပ်ရှား ဖို့ကောင်းပါတယ်။

အဲဒီလို လက်နက်ကြီးမျိုးစုံနဲ့ ဆက်တိုက်ပစ်နေတဲ့ အချိန်ဆိုရင် ဆက်သွယ်ရေးမြောင်းထဲမှာရော၊ ကတုတ်ကျင်းထဲမှာပါ ပုန်းနေလို့ မလုံခြုံတော့သလို ခံစားရပါတယ်။ နောက်တခါ ညတိုက်ပွဲတွေမှာ န၀တဘက်ကနေ မီးကျည်ပစ်တဲ့ အချိန်မျိုးဆိုရင်လည်း ကော့မူးရာတခွင်လုံး နေခင်းဘက်ထက်တောင် ပိုလင်းထိန်သွားသလို ခံစားရတဲ့အတွက် ကတုတ်ကျင်းထဲမှာ ကိုယ်ပုန်းနေတာကိုတောင်မှ တဘက်ရန်သူက မြင်နိုင်တယ်ဆိုပြီး သံသယ၀င်တဲ့အထိ စိုးရိမ်မှုဖြစ်စေခဲ့ပါတယ်။

အဲဒီကာလ ကျနော်တို့ဘက်က သုံးတဲ့ကျည်တွေကလည်း န၀တထက် သိပ်မညံ့။ ၁၂၀ မမ မရှိပေမယ့် ၈၁ မမနဲ့ ၆၀ မမ မော်တာတွေကို အတော်သုံးနိုင်ခဲ့ပါတယ်။ ၈၄ မမ လောင်ချာမရှိပေမယ့် အဲဒီလောက်နီးပါး အစွမ်းထက်တဲ့ ၈၂ မမ၊ ၅၇ မမ နောက်ပွင့်လောင်ချာတွေ၊ ၆၂ မမ ပုခုံးထမ်း တခါသုံးလောင်ချာ၊ အာပီဂျီ အမှတ်၂၊ အမှတ် ၅၊ အမှတ် ၇ တို့ကို အတော်သုံးနိုင်ခဲ့ပါတယ်။

ပြီးတော့ န၀တရဲ့ အော်လီဂန်း စက်သေနတ်ထက် ပိုအားကောင်းတဲ့ ပွိုင့် ၅ (၅ မမ အချင်းရှိ
ကျည်ကိုသုံးတဲ့စက်လတ်) စက်သေနတ်ကို သုံးနိုင်ခဲ့ပါတယ်။ လက်နက်ငယ်အပိုင်းမှာလည်း M 79 မမ လောင်ချာ။ နောက် M 79 နဲ့ M 16 တွဲထားတဲ့သေနတ်၊ AK စက်လက်၊ M 16 စက်လတ်၊ AK 47, M 16 နဲ့ ကာဘိုင်သေနတ်။ ကျည်တွေကို န၀တလောက် မဖြုန်းနိုင်ပေမယ့် လုံလောက်စွာနီးပါး အသုံးပြုနိုင်ခဲ့ပါတယ်။
..........................................................................................................

သူပုန်ကျောင်းသားတဦးရဲ့ မာရသွန်ခရီး (၁၄)


ကော့မူးရာ (သို့) ABSDF ပထမအကြိမ်ညီလာခံကျင်းပရာ

ကော့မူးရာ ခေါ် ၀မ်ခစခန်းဟာ မဲဆောက်မြို့ကနေ  မိနစ် ၃၀ လောက်ပဲ ကားမောင်းရပြီး ထိုင်းဘက်ကမ်း ၀မ်ခရွာအထိ လိုင်းကားတွေတနာရီတစီးနှုန်း ပြေးနေတဲ့နေရာဖြစ်ပါတယ်။ ဒါ့အပြင် ကျွန်းသစ်တွေနဲ့ အခိုင်မာဆောက်ထားတဲ့ တံတားကြီး ၂ ခုက ၀မ်ခနဲ့ ကော့မူးရာ စခန်းကြားရှိ သောင်ရင်းမြစ်ကို ဖြတ်ကူးဖောက်ထားတဲ့အတွက် မဲဆောက်ကလာတဲ့ အရေးကြီးကားတွေဟာ နာရီဝက်အတွင်း ကော့မူးရာစခန်းထဲအထိ
ရောက်နိုင်တဲ့အနေထားဖြစ်ပါတယ်။


ကော့မူးရာစခန်း စစ်သင်တန်းဆင်းပွဲတခုအပြီးမှာ တွေ့ရတဲ့ သင်တန်းမှူး ဒုတိယ ဗိုလ်မှူးကြီး အေးမြင့်နဲ့ ABSDF သင်တန်းသားများ

ဒီလို ဆက်သွယ်ရေးလွယ်ကူပြီး KNU အထူးတပ်ရင်း ၁၀၁ အခြေစိုက်တဲ့စခန်း ဖြစ်တာကြောင့် ABSDF ပထမ အကြိမ်ညီလာခံ ကျင်းပတဲ့နေရာ ဖြစ်လာတာလို့ ကျနော်ထင်ပါတယ်။


ပထမအကြိမ် ညီလာခံကို နိုဝင်ဘာ ၁ ရက်နေ့ကနေ ၅ ရက်နေ့အထိ ကော့မူးရာမှာ ကျင်းပတာဖြစ်ပေမယ့် ABSDF ဆိုတဲ့အမည်ကိုတော့ အောက်တိုဘာလနှောင်းပိုင်းက သီဘောဘိုးစခန်းမှာ ကျင်းပတဲ့ ကရင်နယ်မြေရောက် ကျောင်းသားစခန်း ၅ ခုမှ ကိုယ်စားလှယ်တွေနဲ့ ဗကသကိုယ်စားလှယ်တွေပါတဲ့ အစည်းဝေးကနေ စတင်ရွေးချယ်ခဲ့တာလို့ အဲဒီ အစည်းဝေးကိုတက်ခဲ့တဲ့ ကျောင်းသားတွေကပြောပါတယ်။
ဒါပေမယ့် ABSDF (All Burma Student’s Democratic Front) သို့မဟုတ် မကဒတ (မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ်တပ်ဦး) အမည်နဲ့ ဗဟိုကော်မီတီ တရားဝင် ဖြစ်လာတာကတော့ ကော့မူးရာစခန်းမှာ ကျင်းပတဲ့ ပထမအကြိမ် ညီလာခံပြီးမှ ဖြစ်ပါတယ်။

မူလဖွဲ့စည်းစဉ်က ABSDF တပ်ဦးအမည်သာပါပြီး ကျောင်းသားတပ်မတော်ဆိုတဲ့ အမည်ကတော့ သံလွင်စခန်း အရေးပေါ်ညီလာခံ မတိုင်ခင်လေးမှာမှ ပေါ်လာတယ်လို့ သိရပါတယ်။ အနီရောင် နောက်ခံမှာ အဖြူရောင်နဲ့ရေးထားတဲ့ “ကျောင်းသားတပ်မတော်” အမည်စာတန်းကို ယူနီဖောင်း အင်္ကျီရဲ့ လက်ဝဲဘက် အိတ်ပေါ်မှာ တပ်ဆင်ပါတယ်။ ABSDF စာတန်းနဲ့ မြန်မာပြည်မြေပုံပါတဲ့ လက်မောင်းတံဆိပ်ကို လက်ဝဲပခုံးမှာ တပ်ဆင်ထားပြီး တပ်ရင်းနံပါတ်နဲ့ ဓား၊ လှံပုံပါတဲ့ တံဆိပ်ကိုတော့ လက်ယာပခုံးမှာ တပ်ဆင်ထားတာတွေ့ရမှာ ဖြစ်ပါတယ်။

ဓားနဲ့လှံရဲ့ အဓိပ္ပာယ်ကတော့ လက်နက်ကိုင် အနိုင်ကျင့်နေတဲ့ စစ်အစိုးရကို လက်နက်ကိုင်ပြီး ဓား ဓားချင်း လှံ လှံချင်း ပြန်တော်လှန်မှရမယ်။ ၁၉၆၂ ဇူလိုင် ၇ ရက်မှာ ကျောင်းသားသမဂ္ဂကို ဗုံးခွဲဖျက်ဆီးစဉ်က ဗိုလ်ချုပ်ကြီးနေ၀င်းကနေ ကျောင်းသားတွေကို ဓား ဓားချင်း လှံ လှံချင်းချေမှုန်းမှ ရမယ်ဆိုပြီး စိမ်ခေါ်ခဲ့ဖူးတဲ့အတွက် ဒီတံဆိပ်ကို သုံးတာလို့ သိရပါတယ်။

ပထမအကြိမ် ညီလာခံကျင်းပတဲ့ ဒီလို အရေးကြီးတဲ့နေရာကို ကျနော် ရောက်ဖူးချင်နေတာကြာပြီ ဖြစ်ပေမယ့် တကယ်တမ်း ရောက်ဖူးတာကတော့ ၁၉၈၉ ဇန်န၀ါရီလ နှောင်းပိုင်းမှလို့ အမှတ်ရနေပါတယ်။
ရှေ့မှာတင်ပြခဲ့တဲ့အတိုင်း ကလက်ဒေးစခန်းကနေ မဲဆောက်ဘက်ဆီ ကျနော်တို့ ရုံးရွှေ့ဖို့ ဆုံးဖြတ်ပြီးတဲ့နောက် ကော့မူးရာစခန်းက ကျောင်းသား စစ်သင်တန်းဆင်းပွဲတခုဆီ ဗိုလ်မှူးစိုးစိုးတို့အဖွဲ့နဲ့ အတူသွားဖြစ်တာလို့ ထင်ပါတယ်။

ကော့မူးရာစခန်း ဘောလုံးကွင်းထဲ ကျနော်ရောက်သွားချိန်မှာ စစ်သင်တန်းဆင်းပွဲ အခမ်းအနား ကျင်းပနေပါပြီ။ နိုင်ငံတကာက သတင်းထောက်တွေ၊ ကင်မရာသမားတွေကို အတော်များများ တွေ့ရပြီး သင်တန်းဆရာတွေထဲမှာလည်း KNU အပြင် အနောက်တိုင်း လူဖြူကွန်မန်ဒို တဦး နှစ်ဦးကိုပါ တွေ့ခဲ့ရပါတယ်။ ကားကြုံနဲ့လိုက်သွားတဲ့အတွက် အချိန်သိပ်မရလိုက်။ စခန်းတာဝန် ရှိသူတွေနဲ့ ခဏစကားပြောပြီး ပြန်လာခဲ့ရပါတယ်။

ကော့မူးရာဆီ ဒုတိယအခေါက် ကျနော်ရောက်တော့ ဖေဖော်ဝါရီနှောင်းပိုင်း အရေးပေါ်ညီလာခံ အပြီးမှာလို့ ထင်ပါတယ်။ ၁၅ ဘတ်တန် လိုင်းကားအနီကို မဲဆောက်ကနေ ၀မ်ခအထိ စီးသွားပြီး ၀မ်ခ ဈေးတန်းနောက်ကျောဘက်ကနေ
ကော့မူးရာစခန်းဆီ သွယ်တန်းထားတဲ့ သစ်တိုသစ်စ လက်လုပ်တံတားပေါ်ကနေ သောင်ရင်းမြစ်ကို ဖြတ်သွားရပါတယ်။ KNU စစ်ဆေးရေးဂိတ်မှာ ထူးထူးခြားခြား ကျနော်တွေ့မိတဲ့ ဆိုင်းဘုတ်ကြီးတခုကတော့ မူးယစ်ဆေးဝါးတွေ့ရင်
ပြင်းထန်စွာအရေးယူမယ်လို့ အနီရောင်နောက်ခံ သွပ်ပြားဆိုင်းဘုတ်မှာ အဖြူရောင်စာလုံးကြီးကြီးနဲ့ သတိပေးထားတာပါ။

KNU စစ်ဆေးရေး ဂိတ်ကနေ ကျနော်တို့ ABSDF နယ်မြေရုံးရှိတဲ့ ဘုန်းကြီးကျောင်းဘေးက နေအိမ်ဆီအသွား လမ်းတလျှောက်မှာ လက်ဖက်ရည်ဆိုင်၊ အချိုရည်ဆိုင်၊ ဗီဒီယိုရုံနဲ့ လူနေတဲအိမ်တချို့ကို တွေ့ရ ပါတယ်။ ကျနော်တို့ရုံးအဖြစ် သတ်မှတ်ထားတဲ့ အိမ်ကတော့ ကျွန်းသစ်အကြမ်းထည်နဲ့ ဆောက်ထားတဲ့ နှစ်ထပ် အိမ်လေးဖြစ်ပြီး ကျနော်တို့ မနေခင် ဘယ်သူတွေနေသွားလဲ ဆိုတာကိုတော့ မမှတ်မိတော့။

ကျနော်တို့ရုံးရှေ့မှာ ခန့်ညားထည်ဝါလှတဲ့ ကော့မူးရာ ဘုန်းကြီးကျောင်းကြီးကိုမြင်တော့ KNU မှာလည်း ဗုဒ္ဓဘာသာကို ကိုးကွယ်သူရှိသားပဲ၊ ငါတို့ မင်းသမီးဒေသမှာ ဘာကြောင့်များ ဘုန်းကြီးကျောင်း မရှိတာပါလိ့မ်လို့ စဉ်းစားမိပါတယ်။ အဲဒီဘုန်းကြီးကျောင်းရဲ့ အစွန်မှာတော့ နောက်ထပ်အဆောင်တခုကို တွေ့ရပြီး အဲဒီမှာ အသစ်ရောက်လာတဲ့ ရဟန်းပျိုအဖွဲ့က သံဃာတော် ၂ ပါးနဲ့ ကျောင်းသားတချို့ကို တွေ့ရပါတယ်။ ကျနော်တို့ရုံးအတွက် လိုအပ်တဲ့ရေကို သောင်ရင်းမြစ်အတွင်း သွားခပ်ရပြီး ၁၀ မိနစ်လောက် လမ်းလျှောက်ရပါတယ်။

အဲဒီလမ်းမှာ ကျနော်တို့နဲ့ အဓိက ဆက်စပ်ဆောင်ရွက်ရတဲ့ KNU ၁၀၁ မှ ဗိုလ်လှဝေရဲ့ အိမ်ကို တွေ့ရပါတယ်။ အဲဒီအိမ်နဲ့ သိပ်မဝေးတဲ့ ဘားတိုက်တခုမှာတော့ ၂၁၁ တပ်ရင်းမှ တပ်ဖွဲ့ဝင်တချို့ကို တွေ့ရပါတယ်။ ဒီဘားတိုက်ဟာ ကျောင်းသားအင်အား ၁၃၀ ခန့်ထဲက ဘားအံဘက်ကလာတဲ့ ကျောင်းသား ၆၀ ခန့်အတွက်ဖြစ်ပြီး အဲဒီထဲမှာ ဦးယုနွယ်၊ ဦးရီထွန်း၊ ဦးစိုးထွတ် (အခုအထိ ABSDF ဗဟိုမှာ တာဝန်ထမ်းဆဲ) နဲ့ ဒေါက်တာ မြင့်ချို (နောက်ပိုင်း ဗဟိုအတွင်းရေးမှူး ၁၊ အခု သြစတြေးလျ အခြေစိုက် မြန်မာ့အရေးလှုပ်ရှားသူ) တို့ကို ကျနော်မှတ်မိနေပါတယ်။

နောက်ပိုင်း ပြန်သိရတာကတော့ ဒီအဖွဲ့တွေဟာ အယင်က ကလက်ဒေးစခန်းကဖြစ်ပြီး KNU အထူးတပ်ရင်း ၁၀၁ မှာ မွမ်းမံ စစ်သင်တန်းတက်ဖို့လာရင်းနဲ့ ကော့မူးရာအခြေစိုက် တပ်ရင်းဖြစ်သွားတာလို့ ဒီဆောင်းပါးရေးဖို့ မေးမြန်းစဉ် ဒေါက်တာမြင့်ချိုက ကျနော့်ကို ပြန်ပြောပြခဲ့ပါတယ်။ တခြား ဘားတိုက် ၂ ခုမှာ ရောက်နေသူတွေကတော့ သီဘောဘိုး စခန်းကနေ စစ်သင်တန်းတက်ဖို့ ရောက်လာသူတွေဖြစ်ပြီး ရန်ကုန်၊ မွန်ပြည်နယ်နဲ့ တခြား နယ်ပေါင်းစုံက ပါဝင်တယ်လို့ သိရပါတယ်။


ကျိုးဖိုး၊ ကျည်ခွံနဲ့ ကျွန်းသစ်

အဲဒီ ဘားတိုက်နံပါတ်နဲ့ ပတ်သက်ပြီး အခုအထိ ကျနော်မျက်စိထဲ မြင်နေတဲ့ ထူးခြားချက်တခုကတော့ ကျောင်းသား ၁၀၀ ကျော်အတွက် ထမင်းချက်တဲ့မိုးပြဲဒယ်အိုးကို ကျနော်တို့ မောင်တော်စခန်းမှာလို အုတ်တွေ၊ ကျောက်တုံးတွေပေါ် တည်ထားတာမဟုတ်ဘဲ လက်နက်ကြီး ကျဉ်ဆံအခွန် ၃ ခုနဲ့ထောက်ပြီး တည်ထားတဲ့မြင်ကွင်းပါ။ ၅၇ မမ လောင်ချာ ကျည်ဆံအခွံလို့ ယူဆရပြီး အမြင့် တပေခွဲ၊ အချင်း ၃ လက်မလောက်ရှိပါတယ်။ ဘေးပတ်လည်မှာ အပေါက် သေးသေးလေးတွေပါပြီး အဲဒီကျည်ခွံရဲ့ ထိပ်ဖူးဘက်ကို မြေထဲစိုက်၊ မောင်းတံရိုက်တဲ့ ဖင်ပိုင်းကို အပေါ်ထောင်ကာ အဲဒီအပေါ် မိုးပြဲဒယ် ထမင်းအိုးကြီး တည်ထားတဲ့ပုံကို အခုအထိ ကျနော် မြင်ယောင်နေဆဲဖြစ်ပါတယ်။

နောက်တခါ မီးထိုးထားတဲ့ ထင်းတွေကိုလဲ ကြည့်ပါဦး။ အားလုံးကျွန်းသစ်တွေ။ သစ်စက်က ထွက်လာတဲ့ သစ်တိုသစ်စတွေနဲ့ ကျွန်းသစ် အကိုင်းအခက်တွေ။ ကျွန်းပင်ဆိုတာ ရွှေထက်ရှားတဲ့ ပစ္စည်းတခုလိုလို ကျောင်းစာအုပ်ထဲမှာသာ သင်ခဲ့၊ စာအုပ်ထဲမှာသာ မြင်ခဲ့ဖူးတဲ့ ကျနော့်အဖို့တော့ ကျွန်းသစ်ထင်းနဲ့ ထမင်းချက်နေတဲ့မြင်ကွင်းဟာ တကယ့်ကို အထူးအဆန်းပါပဲ။

ကျနော်မှတ်မိသလောက်ဆိုရင် ၈၉ သင်္ကြန်ကို ကော့မူးရာမှာနွှဲလိုက်ရပြီး အဲဒီအချိန်အထိ ကော့မူးရာကနေ ရေကျော်စခန်းအထိ KNU ကားတွေသွားလာနေဆဲ။ ကျနော်ကိုယ်တိုင်လည်း KNU ကားကြုံနဲ့တခေါက် ရေကျော်ကနေ ကော့မူးရာကို ၀င်ဖူးပါတယ်။ ရေကျော်စခန်းဟာ တပ်မဟာ ၇ အောက်မှာရှိပြီး ဗိုလ်ဂျော်ဖြူ၊ ဗိုလ်ဂျော်နီတို့ အလွန်နာမည်ကြီးတဲ့အချိန် ဖြစ်ပါတယ်။

ကော့မူးရာကတော့ KNU ဗဟိုရဲ့ အထူးတပ်ရင်း ၁၀၁ နေရာဖြစ်ပြီး တပ်ရင်းမှူးက ဗိုလ်မှူးကြီး တောလှ၊ ဒု တပ်ရင်းမှူးက ဒု ဗိုလ်မှူးကြီး သန်းအောင်ဖြစ်ပါတယ်။ ဗိုလ်မှူး တောလှရဲ့နေအိမ်ဟာ ကျွန်းပင်တွေကြားမှာ တည်ရှိပြီး ကျနော်တို့ရုံးရှိရာ ဘောလုံးကွင်းနားကနေ မိနစ် ၂၀ နာရီဝက်နီးပါး လမ်းလျှောက်သွားရပါတယ်။ KNU တပ်ရင်းရုံးနဲ့ တခြား စစ်ဖက် အဆောက်ဦတွေကိုလည်း သူအိမ်ဝန်းကျင်မှာ တွေ့ရပါတယ်။  နောက်တခါ ထူးထူးခြားခြား ဘရင်းကယ်ရီယာ အဟောင်းတစီးကိုလည်း ဗိုလ်မှူး တောလှ အိမ်နဲ့ မလှမ်းမကမ်းက ဂိုဒေါင်ထဲမှာ အသေချာ သိမ်းထားတာကို တွေ့ခဲ့ရပါသေးတယ်။ ကောမူးရာမှာ တပတ်၊ ၁၀ ရက်လောက် နေပြီးတော့ တခြားတာဝန်တခုအတွက် ကျနော်ဟာ မဲဆောက်ရုံးဆီ ပြန်လာခဲ့ရပါတယ်။


တိုက်ပွဲတွင်းက ခရီးသည်

ကော့မူးရာစခန်းဆီ တတိယအခေါက် ကျနော်ရောက်တော့ မေလနှောင်းပိုင်းလို့ ထင်ပါတယ်။ တိုက်ပွဲတွေ စဖြစ်နေတဲ့အချိန်။ ကော့မူးရာစစ်မြေပြင်ရှိ ဥက္ကဋ္ဌ ကိုကျော်ကျော်နဲ့ ကျနော်တို့ ရုံးအဖွဲ့သားတွေအတွက် ဘာလချောင်ကြော်နဲ့ တခြားစားစရာတွေကို သွားပေးဖို့ မဲဆောက်မြို့ကနေ ၁၅ ဘတ်တန် လိုင်းကားအနီးလေးကိုစီးပြီး ထွက်လာပါတယ်။
မဲဆောက်-မယ့်စရိယန် လမ်းမကြီးကနေ မယ်ပ လမ်းချိုးကိုကျော်၊ ဟွေးခလုတ်ဒုက္ခသည် စခန်းဝန်းကျင်ရောက်တော့ လိုင်းကားက ရပ်လိုက်ပါတယ်။ ကျနော်တို့ မဲဆောက်ဘက်ရောက်တဲ့ ၁၉၈၈ ကတည်းက ဟွေးခလုတ်ဒုက္ခသည် စခန်းကြီးရှိနေတာကို တွေ့ရပြီး ဒုက္ခသည် ၅ ထောင်လောက်ရှိမယ်လို့ ထင်ပါတယ်။ အခင်းအကျင်းကတော့ အခု နိုဖိုးစခန်းနဲ့ တူပါတယ်။

“ရှေ့ဆက်သွားဖို့ မလွယ်ဘူး။ ထိုင်းဘက်ကမ်းထဲအထိ လက်နက်ကြီးတွေကျနေတယ်” လို့ ကားသမားက ထိုင်းတ၀က် ဗမာတ၀က်နဲ့ ပြောပါတယ်။ ဟုတ်ပါတယ်။ ကျနော်နဲ့ ခရီးသည်တွေ ကိုယ်တိုင်လည်း လက်နက်ကြီးပေါက်ကွဲသံတွေကို ကြားနေရပါတယ်။ သွားလို့ရသလောက် ဆက်သွားပေးဖို့ ကားသမားကိုပြောတဲ့ အခါမှာတော့ ဒုက္ခသည်စခန်းရှေ့က ရွာအထိ မောင်းလာပြီး အဲဒီအရောက်မှာ ထိုင်းစစ်တပ်က ကားလမ်းကိုပိတ်၊ ၁၀၅ မမ အဝေးပစ် အမြောက်ကြီးတွေနဲ့ န၀တ တောင်ကုန်းဘက်ကို သတိပေး ပစ်ခတ်ဖို့ ပြင်နေတာကို တွေ့လိုက်ရပါတယ်။

ကျနော်လည်း ဘာလုပ်ရမှန်း မသိ။ အဲဒီကာလက အခုခေတ်လို မုန်းဘိုင်းဖုန်းကလည်း မတွင်ကျယ်သေး၊ လမ်းဘေးဖုန်းကလည်း မရှိသေးတဲ့အတွက် မဲဆောက်ရုံးကို ဘယ်လိုမှ ပြန်ဆက်သွယ်လို့မရ။ ကော့မူးရာစခန်းတွင်းရှိ ကိုကျော်ကျော်တို့ဆီ ဝေါ်ကီတော်ကီနဲ့ ဆက်သွယ်နိုင်မလားဆိုပြီး နည်းလမ်းရှာကြည့်ပေမယ့် အဆင်မပြေခဲ့ပါဘူး။

အဲဒီလို ရှေ့ဆက်ရမလား၊ နောက်ဆုတ်ရမလား စဉ်းစားမရဖြစ်နေချိန်မှာ ကော့မူးရာစခန်းမှာ လက်ဖက်ရည်ဆိုင်ဖွင့်ဖူးတဲ့၊ ကျနော်တို့ ကျိုးဖိုးတွေနဲ့ အလွန်ရင်းနှီးတဲ့ အမိုး (ဒေါ်ရွှေလို့ ခေါ်တယ်ထင်ပါတယ်) တို့မိသားစုကို အနီးနားက အိမ်တလုံးပေါ်မှာ ကျနော်တွေ့လိုက်ရပါတယ်။ အမိုးကို အကူအညီတောင်းကြည့်တော့ “ဒီလောက် တိုက်ပွဲတွေဖြစ်နေတာ ဘယ်လိုသွားမလဲ။ ဒီည ဒီမှာအိပ်ပြီး မနက်ဖြန်မှ အခြေနေ ကြည့်ကြည့်ပေါ့” လို့ အကြံပေးပါတယ်။


ကော့မူးရာစခန်းက ကျောင်းသားတွေကို ဒေါက်တာ မြင့်ချို ဆေးသင်တန်းပေးနေစဉ်

ကျနော်ကလည်း မရဘူး၊ ဟိုမှာ ကျနော့်လူတွေ စောင့်နေတယ်။ သွားလို့ရရင် ဒီညနေ သွားချင်တယ်ဆိုတော့ အနီးနားရှိ အရပ်ဝတ် KNU အရာရှိတဦးနဲ့ ကျနော့်ကို မိတ်ဆက်ပေးပါတယ်။
“မင်း ကရင်လို ပြောတတ်လား” ဆိုပြီး အဲဒီအရာရှိက မေးရင်းနဲ့ ကျနော်ရဲ့ ID တွေကိုစစ်။ ဟိုမေး ဒီမေးလုပ်ပါတယ်။ ကျနော်ကလည်း ကရင်စကားကို ၀ါလဲဂေး၊ ဟာလဲဂေးထက် ပိုမပြောတတ်သေး။ ဒီတော့ ထိုင်းလိုရော ပြောတတ်လားလို့ သူက ဆက်မေးပါတယ်။ ထိုင်းစကားကိုလည်း စ၀ါဒီခပ်၊ စဘိုင်ဒီမိုင်ထက် ပိုမပြောတတ်သေးတဲ့ခါမှာတော့ သူကျနော်ကို အတော်စိတ်ပျက်သွားပုံ ရပါတယ်။

နောက်ဆုံးမှာတော့ “မင်းဘာစကားမှ မပြောဘဲ ငါတို့နောက်သာလိုက်ခဲ့။ တိုက်ပွဲအရှိန်နည်းနည်း လျော့ရင် သွားမယ်” လို့
KNU အရာရှိက ကျနော်ကို ပြောပါတယ်။ ဒါနဲ့ ကျနော်လည်း အမိုးတို့တည်းနေတဲ့အိမ်ပေါ်မှာ ခဏနား၊ ပါလာတဲ့ ပစ္စည်းတွေထဲက လိုအပ်သလောက်ကိုပဲ ခွဲယူ၊ စစ်မြေပြင်ဆီသွားဖို့ အဆင်သင့်ပြင်ရပါတယ်။ အဆင်သင့်ပြင်တယ်ဆိုလို့ ကျနော်မှာ ကျောပိုးအိတ်တောင် မပါဘူး။ ဘာလချောင်ကြော်နဲ့ တခြား အကြော်အလှော်တွေ ထည့်လာတဲ့ ပလစတစ်အိတ်တလုံးနဲ့ အ၀တ်တထည် ကိုယ်တခုမျှသာ။ ညနေ ၄ နာရီကျော်ကျော်မှာတော့ တိုက်ပွဲအရှိန် နည်းနည်းငြိမ်သွားတဲ့အတွက် ကျနော်တို့ရဲ့ခရီးစဉ်ကို စတင်ပါတယ်။

ဝေါ်ကီတော်ကီကိုင်တဲ့ ဆရာတဦးရယ်၊ နောက် ကရင်စစ်သားလား၊ ရွာသားလား မသိတဲ့ ၂ ဦးရယ်၊ ကျနော်ရယ် ပေါင်း ၄ ဦးဟာ ကော့မူးရာနဲ့ ၃ မိုင်လောက်ဝေးတဲ့ အဲဒီ ထိုင်းစစ်တပ် ရှိတဲ့နေရာကနေ ၀မ်ခရွာကိုရှောင်၊ တောအုပ်လေးအတိုင်း ခြုံတိုးပြီး တနာရီနီးပါး လမ်းလျှောက်လိုက်ရပါတယ်။ ဝေါ်ကီတော်ကီဆရာမှာ ပစ္စတိုသေနတ် ပါကောင်းပါနိုင်ပေမယ့် ကျန် ၂ ဦးဆီမှာတော့ တောခုတ်ဓား တလက်စီကိုသာ ကျနော်တွေ့ရပါတယ်။ မောင်ကျိုးဖိုးစစ်သားကြီး ကျနော်ဆီမှာတော့ ဘာလချောင်အထုပ် တခုသာပါတဲ့အတွက် စစ်သားနဲ့မတူဘဲ ပေါ်တာနဲ့ ပိုတူနေမလားပဲ။

.........................................................................................................................
သူပုန်ကျောင်းသားတဦးရဲ့ မာရသွန်ခရီး ၁၃

 
ဖက်ဒရယ်မြို့တော်နဲ့ ဖက်ဒရယ်တက္ကသိုလ်

မာနယ်ပလော ကွင်းပြင်ထဲကို ပြန်ကြည့်မယ်ဆိုရင်တော့ ဒီလိုတောကြီးမျက်မည်းထဲက သူပုန်ဌာနချုပ်မှာ လျှပ်စစ်မီး ၂၄ နာရီ လင်းနေတယ်ဆိုရင်မြန်မာနိုင်ငံက စာဖတ်ပရိသတ် ယုံပါ့မလားပဲ။ ကျန်တဲ့မြို့တွေကို အမှောင်ချပြီး နေပြည်တော် ဌာနချုပ်တခုတည်း မီးလင်းနေအောင် စီမံထားတာမျိုး မဟုတ်ပါဘူး။ ခုနက မြင့်မားလှတဲ့ နော်ဒေးတောင်တန်းပေါ်ကနေ ကျလာတဲ့ချောင်းရေကို တမံလုပ်ပြီး အဲဒီကနေ ရေအားလျှပ်စစ်နဲ့ မာနယ်ပလော တခွင်လုံးကို လျှပ်စစ်မီး ပေးထားတာပါ။ ဒါ့အပြင် ရေကိုလည်း ပိုက်တွေနဲ့ သွယ်ပေးထားတဲ့အတွက် ရေ၊ မီး အတော်အဆင်ပြေတဲ့နေရာ။ တီဗီစလောင်း လိုင်းပေါင်းစုံရတဲ့ တောတွင်းမြို့တော်လို့ ပြောရင်ရမယ် ထင်ပါတယ်။


မာနယ်ပလော အစည်းဝေးခန်းမကြီးနဲ့ ဘားတိုက်ကြီးရှေ့မှာ ကျင်းပနေတဲ့ အားကစားပွဲတခု

ပဒိုဘသင် အိမ်ကနေ ဘေးပတ်လည်အိမ်တွေကို ကျနော်လေ့လာကြည့်တဲ့အခါ အနီးဆုံးအိမ်က တွဲဘက်အတွင်းရေးမှူး ပဒိုစံလင်းရဲ့အ်ိမ်။ အိမ်ပုံစံချင်းက အတူတူပါပဲ။ ဒီအိမ်ဟာ KNU ဗဟိုစည်းရုံးရေးဌာန ရုံးခန်းလည်းဖြစ်ပြီး နာမည်ကြီး သနူးထူးစာစောင် ထုတ်ဝေတဲ့ နေရာလည်းဖြစ်ပါတယ်။ ရှေ့မှာတင်ပြခဲ့တဲ့အတိုင်း ကွန်ပြူတာခေတ် မဟုတ်သေးတဲ့အတွက်
ဖရောင်းစက္ကူကို လက်နှိပ်စက်နဲ့ဖောက်။ မီးချောင်းနဲ့လှိမ့်ပြီး ကော်ပီကူးနေတာကို တွေ့ခဲ့ရပါတယ်။ (နောက်ပိုင်းမှာတော့ ABSDF ဗဟိုရုံးအဖွဲ့မှူးတဦးဖြစ်သူ ဦးရီထွန်း တီထွင်လိုက်တဲ့ ဖရောင်းစက္ကူ ကော်ပီကူး သစ်သားကရိယာလေးတခုက အတော်ခေတ်စားသွားပြီး ကွန်ပြူတာ မပေါ်မီအထိ အဲဒီကရိယာကို တော်လှန်ရေး
နယ်မြေတလုံးမှာ သုံးကြတာကိုတွေ့ရပါတယ်)

ပဒိုစံလင်းအိမ်ရဲ့ရှေ့က ပုံစံတူ အိမ်ကတော့ ပို့ဆောင်ဆက်သွယ်ရေးဌာန၊ နောက်တလုံးက သစ်တောဌာန၊ နောက်ထပ် တလုံးကတော့ ဘဏ္ဍာရေးဌာနဖြစ်ပါတယ်။ အဲဒီရုံးတွေပေါ်ကိုတော့ ကျနော်မတက်ဖြစ်လိုက်ပါ။ အဲဒီရုံးတွေ အလွန်မှာတော့ မဒတ (အမျိုးသားဒီမိုကရေစီတပ်ပေါင်းစု) ရုံး၊ ထီးတခီးဘက်ထွက်တဲ့ ကားလမ်းကြောင်းတခုနဲ့ ချောင်းကူးတံတားတခုရှိပါတယ်။ ကားလမ်းကို ကျော်လိုက်တော့ ဒုဥက္ကဌ ပဒိုသန်းအောင်ရဲ့အိမ် (သူကွန်လွန်ပြီးနောက်မှာ ဗိုလ်မှူးချုပ် မောင်မောင် ဆက်နေတဲ့အိမ်)။

အဲဒီအိမ်ကနေ ညာဘက်ကို လှည့်လိုက်မယ်ဆိုရင် တောင်ပေါ်က ဘုရားကျောင်းဆီတက်တဲ့ လူသွားလမ်းတခု။ ပြီးရင် ကျွန်းသစ်တွေနဲ့ အခိုင်မာဆောက်ထားတဲ့ အကောင်းစား ၂ ထပ် အဆောက်ဦကြီးတခု (အစောပိုင်းမှာ ဒေါက်တာ မာတာရဲ့ KNU နိုင်ငံခြားရေးဌာနရုံးဖြစ်ခဲ့ပြီး နောက်ပိုင်းမှာတော့ ADNSC  [Anti-military Dictatorship National Solidarity Committee]  တပ်ပေါင်းစု ရုံးခန်းဖြစ်လာပါတယ်) ရှိပြီး အဲဒီ ဘေးမှာတော့ သစ်ပင်တန်းတခုရှိပါတယ်။ (အဲဒီကာလကတော့ စစ်ရုံးချုပ်အသစ်ကြီး မဆောက်ရ သေးပါ) သစ်ပင်တန်းအဆုံးမှာတော့ ဗိုလ်ချုပ်မြရဲ့ ကော်သူးလေအစိုးရ သမ္မတအိမ်ဖြူတော် စံအိမ်ကြီးကို တွေ့ရမှာဖြစ်ပါတယ်။ စံအိမ်တော်ဆိုတာ တင်စားပြီးခေါ်ဝေါ်ခြင်း မဟုတ်ပါ။ တကယ့်ကို သားနားတဲ့ ၂ ထပ် တိုက်အိမ် အကြီးကြီးဖြစ်ပါတယ်။

အဲဒီဘေးမှာတော့ ဗိုလ်ချုပ်မြ ရုံးထိုင်တဲ့ ကျွန်းသစ်သားအိမ် ခပ်သေးသေးတလုံး။ ပြီးရင် KNU အမျိုးသမီးအစည်းအရုံးနဲ့ အမျိုးသမီးဆောင်တချို့။ ပြီးရင် ဆံသဆိုင်။ ဆံသဆိုင် နောက်ကျောမှာတော့ ကျနော်တို့ ကျိုးဖိုးတွေအတွက် အရေးကြီးတဲ့ မာနယ်ပလော ဗဟိုစားဖိုဆောင်။ စားဖိုဆောင်ဘေးမှာတော့ ကွန်မန်ဒိုကုန်းဘက်နဲ့ ခွေးအိပ်တောင်ဘက်တက်တဲ့ ကားလမ်းကြောင်းတခု။ ကားလမ်းကို ကျော်ပြီး ဘော်လုံးကွင်းအတိုင်း ပြန်လှည့်မယ်ဆိုရင် တပ်ထောက်ဌာနနဲ့ ဂိုဒေါင်ကြီးတခုကို သောင်းရင်းမြစ် ကမ်းနားစောင်းဘက်မှာ မြင်နိုင်ပါတယ်။ ပြီးရင် ဗိုလ်ချုပ် တာမလာဘော၊ ဗိုလ်ချုပ် ကစယ်ဒို တို့ ရုံးထိုင်တဲ့ စစ်ရုံးချုပ်။ စစ်ရုံးချုပ်ဘေးမှာတော့ ကရင်အမျိုးသား ကာကွယ်ရေးအဖွဲ့ (KNDO) ရုံးခန်း။

အဲဒီစစ်ရုံးချုပ်နဲ့ KNDO ရုံးရှေ့တည့်တည့် ဘောလုံးကွင်းဘေးက ကြီးမားပြီး အရိပ်ကောင်းလှတဲ့ ကုက္ကိူပင်တန်းအောက်မှာတော့ ခန့်ညားစွာနေရာယူထားတဲ့ မာနယ်ပလော အစည်းဝေးခန်းမကြီးကို တွေ့ရမှာဖြစ်ပါတယ်။ အစည်းဝေးခန်း ဘေးမှာတော့ ဧည့်သည်တော် စစ်သည်တွေ တည်းခိုလေ့ရှိတဲ့ ခြေခံရှည် ဘားတိုက်အကောင်းစားတခု (၁၉၉၂ နော်တစစ်ပွဲအပြီးမှာ ကျနော်အပါဝင် တပ်ရင်း ၂၀၁ နဲ့ ၁၀၂ က ရဲဘော်တွေ တည်းခိုခဲ့ဖူးပါတယ်)။ အဲဒီနောက်မှာတော့ နိုင်ငံခြားဧည့်သည်တွေအတွက် သားသားနားနား ဧည့်ရိပ်သာတလုံး။ ပြီးရင်တော့ ပဒိုဘသင်အိမ်ဆီ ပြန်ရောက်ပါတယ်။

မာနယ်ပလောကို ဒုတိယအခေါက် ကျနော်ရောက်သွားတဲ့ အချိန်ကတော့ မတ်လ အစောပိုင်းလို့ ထင်ပါတယ်။ ဒီတခေါက်မှာတော့ ကျနော်တယောက်တည်း။ KNU ကနေ ကျနော်တို့ နယ်မြေကော်မီတီဆီ ထောက်ပံ့နေကြ တလ ထိုင်းဘတ်ငွေ ၃၀၀၀ ကို ထုတ်ယူဖို့ ဥက္ကဌ ကိုကျော်ကျော်က ကျနော့်ကို တာဝန်ပေးလိုက်တာပါ။ အဲဒီငွေ ၃၀၀၀ ရဖို့အရေး ပဒိုဘသင်အိမ်မှာ ထိုင်စောင့်လိုက်ရတာ သီတင်းတပတ်ကြာသွားပါတယ်။

အတွင်းရေးမှူးချုပ်အိမ်မှာ တည်းရတဲ့ ဧည့်သည်ဆိုပေမယ့် ငရုတ်သီးထောင်းနဲ့ပဲ နေ့စဉ်တိုးနေတော့ ကျိုးဖိုးတွေရဲ့ ထုံစံအတိုင်း လဖက်ရည်ဆိုင် ရှာပါတော့တယ်။ အဲဒီမှာ ကျနော်တွေ့လိုက်တဲ့ ဆိုင်ကတော့ သောင်ရင်းမြစ်ရဲ့ အလှပဆုံးရှုခင်းကို အပေါ်စီးကနေ မြင်ခွင့်ရနေတဲ့ ပဒိုဝီးရဲ့ လဖက်ရည်ဆိုင်ပါပဲ။ သောင်ရင်းနဲ့ သံလွင်မြစ်ဆုံ ထိုင်းဘက်ကမ်းရှိ စားသောက်ဆိုင်နဲ့ ဘန်ဂလိုနေရာကလွဲရင် ဒီဒေသတ၀ိုက်မှာ ဒုတိယ ရှုခင်း အကောင်းဆုံးနေရာဟာ ပဒိုဝီးဆိုင်လို့ ထင်ပါတယ်။

သူဆိုင်ရှေ့မှာ ကျွန်းပင်အကြီးကြီးတပင်ရှိပြီး အဲဒီအောက်မှာ သစ်သားတွေနဲ့လုပ်ထားတဲ့ သဘာဝ ထိုင်ခုံတွေကလည်း အတော်ကောင်းပါတယ်။ လဖက်သုတ်တပွဲမှာ၊ ရေနွေအိုး တကရားနဲ့ အဲဒီ သစ်ပင်အောက်က ခုံတန်းမှာထိုင်ပြီး သောင်ရင်းမြစ်ကို ငေးကြည့်ရတဲ့အရသာကို အချိန်ထိ သတိရနေဆဲဖြစ်ပါတယ်။ အဲ … အဲဒီသဘာဝအလှအပ ရှုခင်းတွေအပြင်ပေါ့လေ၊ ကျနော်ခဏခဏ သွားဖြစ်တဲ့ နောက်ထပ် အကြောင်းရင်းတခုကတော့ လှပတဲ့ ဆိုင်ရှင်ကောင်မလေး တယောက်ကြောင့်လို့ ၀န်မခံရင် ကျနော် သတင်းထိမ်ချန်ရာ ကျပါလိမ့်မယ်။


မင်းသမီးခစန်းမှ ၂၀၁ တပ်ရင်း စစ်ကြောင်းတခု သောင်ရင်းမြစ်အတွင်း လှေဖြင့် မာနယ်ပလောစခန်းဆီ လာနေစဉ်

နောက်တနေ့မှာတော့ ရှေ့မှာပြောခဲ့တဲ့ ဗိုလ်ချုပ် မောင်မောင်ရဲ့ အိမ်ဘေးကနေ ထီးတခီးဘက်သွားတဲ့ ကားလမ်းအတိုင်း ဆက်လျှောက်ရင်းနဲ့ မဒတရုံးကို ကျနော်ရောက်သွားပါတယ်။ အဲဒီကာလ ရုံးထိုင်နေသူတွေထဲမှာ ရခိုင်ပါတီက ခိုင်စိုးနိုင်အောင်နဲ့ မွန်ပြည်သစ်ပါတီက နိုင်ဟံသာတို့ကို ကျနော်မှတ်မိနေပါတယ်။ အဲဒီရုံးကို ကျော်ပြီးဆက်သွားတော့ တောင်ကုန်းတခုပေါ်မှာ ဖက်ဒရယ်တက္ကသိုလ်ကို တွေ့ရပါတယ်။

ရန်ကုန်တက္ကသိုလ်၊ မော်လမြိုင်တက္ကသိုလ်နဲ့ ထားဝယ်ကောလိပ်တွေကိုသာ တွေ့ဖူးတဲ့ ကျနော့်အဖို့ ဖက်ဒရယ်တက္ကသိုလ် ဆိုတာဟာ အထူးအဆန်း ဖြစ်နေပါတယ်။ မြင်နေရတဲ့ အဆောက်ဦးက မြေစိုက် တဲတလုံးသာသာ ဖြစ်ပေမယ့် သင်ကြားနေတဲ့ဆရာတွေက နိုင်ငံတကာက ရောက်လာသူတွေ။ သင်ရိုးညွှန်းတမ်းကလည်း နိုင်ငံတကာ တက္ကသိုလ်တွေကနေ သင့်တော်တာတွေကို ကောက်နှုတ်ထားတဲ့ အနှစ်ချုပ်သင်ရိုး။ ကျောင်းသားတွေကတော့ ထီးတခီး အထက ကနေ ၁၂ တန်းအထိ အောင်မြင်ပြီးတဲ့ ကရင်ကျောင်းသားကျောင်းသူလေးတွေ။

ဖက်ဒရယ်တက္ကသိုလ်က အပြန်မှာတော့ ကျနော်တို့ မင်းသမီးခစန်းက ရဲဘော် ၂၀ ဦးအပါဝင် ဘုရားသုံးဆူ၊ သီဘောဘိုးနဲ့ တခြားစခန်းအသီးသီးက DAB စစ်ကြောင်းအတွက် ရောက်နေတဲ့ ABSDF ကျောင်းသား ၁၀၀ ခန့်ကို ရှေ့မှာပြောခဲ့တဲ့ ဧည့်သည်တော် ဘားတိုက်မှာ တွေ့လိုက်ရပါတယ်။ မြန်မာနိုင်ငံ ဒီမိုကရက်တစ် မဟာမိတ်အဖွဲ့ချုပ် (DAB) စစ်ကြောင်းတွေ အလုပ်ဖြစ်ခဲ့တယ်လို့ ဆောင်းပါးအခန်း ၈ မှာ ကျနော်ရေးခဲ့မိပေမယ့် တကယ်ကတော့ ဒီ ပထမအကြိမ် စစ်ကြောင်း အလုပ်မဖြစ်ဘူးလို့ ပြန်သိရပါတယ်။

DAB တွဲဖက်အတွင်းရေးမှူးနဲ့ ABSDF ဗဟို အတွင်းရေးမှူး ကိုသန်းဝင်း ခေါ်ယူခဲ့တဲ့ ကျောင်းသားတပ်ဖွဲ့ ၁၀၀ ၀န်းကျင်ဟာ DAB စစ်ကြောင်းမဖွဲ့နိုင်ဘဲနဲ့ မာနာပလောမှာ သတင်း ၂ ပတ်လောက် သောင်တင်ပြီးနောက် မိခင်စခန်းတွေဆီ ကိုယ့်အစီစဉ်နဲ့ကိုယ် ပြန်ခဲ့ရတယ်လို့ အဲဒီစစ်ကြောင်းမှာ ပါဝင်ခဲ့သူ မင်းသမီးခစန်းမှ ကျောင်းသားတဦးက ဒီဆောင်းပါး ရေးနေစဉ် ကျနော်ကို ပြန်ပြောပြခဲ့ပါတယ်။

နောက်ထပ် ထူးထူးခြားခြား ကျနော်မှတ်မိနေတဲ့ အချက်တခုကတော့ နိုင်ငံခြားသား ဧည့်ရိပ်သာမှာ တည်းတဲ့ အမေရိကန်သူ မီမီမြင့်ဖူးပဲ ဖြစ်ပါတယ်။ အားလုံးငှက်ဖျားရုပ် ပေါက်နေတဲ့ဒေသမှာ အမေရိကားကနေ ရောက်လာတဲ့ မီမီမြင့်ဖူးကို ကျောင်းသားတွေ အလုအယက် စိတ်ဝင်စားတာ အဆန်းတော့ မဟုတ်လောက်ပါဘူး။ ပဒိုဘသင်အိမ်မှာ ကျနော်တည်းနေစဉ် နိုင်ငံခြားရေးဌာနက ဦးအောင်ခင်အပါဝင် ကျောင်းသားခေါင်းဆောင် တချို့နဲ့အတူ မိမိမြင့်ဖူးတို့အဖွဲ့ ရောက်လာတာဖြစ်ပါတယ်။

နောက်ပိုင်းမှာတော့ မီမီမြင့်ဖူးပါတဲ့အဖွဲ့ဟာ DAB ရဲ့ ကိုယ်စားလှယ်အဖြစ်နဲ့ ကုလမဂ္ဂအပါဝင် နိုင်ငံတကာဆီ သွားရောက်ဆွေးနွေးတာတွေ၊ နိုင်ငံခြားဆက်ဆံရေးကို တက်ကြွစွာ ဆောင်ရွက်ခဲ့တာ တွေရှိခဲ့ပါတယ်။ တချိန်တည်းမှာပဲ န၀တ ဘက်ကလည်း မြက်ခင်းသစ်မဂ္ဂဇင်းကနေ ကျောင်းသားတွေနဲ့ မီမီမြင့်ဖူးကို အတုံးလိုက်အတစ်လိုက် ဝေဖန်တာတွေကို ဖတ်ရခဲ့ဖူးပါတယ်။

၁၉၈၉ အစောပိုင်းကာလက သွားခဲ့တဲ့ ကျနော်ရဲ့ မာနယ်ပလော ခရီးစဉ်အတွင်း မဒတရုံးနဲ့ ဖက်ဒရယ်တက္ကသိုလ်ကို ကျော်ပြီး တောင်ဘက်ကို မသွားခဲ့ဖူးပါ။ အဲဒီတောင်ဘက်မှာ ၁၉၉၀ ရွေးကောက်ပွဲနောက်ပိုင်း ဒေါ်အောင်ဆန်းစုကြည်လမ်းနဲ့ NLD-LA ရုံး၊ လူဘောင်သစ်ပါတီရုံး၊ ရဟန်းပျိုများသမဂ္ဂရုံး၊ NCG ရုံးတွေ ရှိပါတယ်။

အလားတူ ဆံသဆိုင်နဲ့ ထမင်းရုံကို ကျော်ပြီး မြောက်ဘက်ကိုလည်း မသွားခဲ့ဖူးပါ။ မြောက်ဘက်မှာ ၁၉၉၀ နောက်ပိုင်း ABSDF ဌာနချုပ်ရုံးရှိရာ လောကွာလူကုန်း၊ ကိုမိုးသီးဇွန်တို့ ဗဟိုဌာနချုပ်တောင်ကုန်း၊ ၂၀၈ တောင်ကုန်းနဲ့ ကွန်မန်ဒိုကုန်းတို့ ရှိပါတယ်။ ဒါကြောင့် ကျနော်ရောက်ဖူးတဲ့ မာနယ်ပုလောဆိုတာဟာ ဘောလုံးကွင်းဝန်းကျင်ရှိ ရုံးခန်းတ၀ိုက် သက်သက်မျှသာဖြစ်ခဲ့ပါတယ်။

(မှတ်ချက် ။         ။ ဒါဟာ ၁၉၈၉ ခရီးစဉ်မျှသာဖြစ်ပြီး ၁၉၉၂ မာနယ်ပလောတိုက်ပွဲ စစ်ကူခရီးစဉ်၊ ၁၉၉၃ ABSDF ပြန်လည်ပေါင်းစည်း ရေးဆွေးနွေးပွဲ မာနယ်ပုလောခရီးစဉ်တွေကိုတော့ နောက်ပိုင်းမှာ ဆက်လက်ဖော်ပြပါမယ်)

...............................................................................................................................
သူပုန်ကျောင်းသားတဦးရဲ့ မာရသွန်ခရီး (၁၂)
December 15, 2011 7:10 pm
အောက်မေ့ဖွယ်။ ဧရာဝတီမဂဇင်း။


မာနယ်ပလောဌာနချုပ်သို့ ပထမခရီးစဉ်

KNU နယ်မြေကော်မီတီမှာ တာဝန်ထမ်းစဉ်အတွင်း မာနယ်ပလောကို ၃၊ ၄ ခေါက် ကျနော်ရောက်ဖူးခဲ့ပေမယ့် ပထမအခေါက်ရောက်တာဟာအရေးပေါ်ညီလာခံ မတိုင်မီလား။ ညီလာခံပြီးမှလား ဆိုတာကိုတော့ အသေချာ မမှတ်မိတော့ပါ။ ပထမအခေါက်ဟာ ဥက္ကဋ္ဌ ကိုကျော်ကျော်၊ အတွင်းရေးမှူး ကိုခင်မောင်စိုးတို့နဲ့အတူ ကျနော် ပါသွားတာဖြစ်တဲ့အတွက် နယ်မြေကော်မီတီ ဖွဲ့ပြီးကာစမှာ သွားတာဖြစ်ဖို့များပါတယ်။ အချိန်ကာလကို အတိအကျ မမှတ်မိတော့ပေမယ့် ထူးခြားလှတဲ့ မာနယ်ပလောရဲ့ ပထ၀ီ အနေထားနဲ့ အခင်းအကျင်းကိုတော့ အခုအထိ စိတ်ထဲမှာ မြင်နေဆဲဖြစ်ပါတယ်။


မာနယ်ပလောစခန်းရောက် ABSDF စစ်ကြောင်းတခု

ထုံးစံအတိုင်း မဲဆောက်၊ မယ်လ၊ မက်သလေ၊ ခလေတလူကနေ မာနယ်ပလောအထိ ကားကြုံ၊ လှေကြုံ အဆင့်ဆင့်နဲ့ ရောက်လာတဲ့ ကျနော်တို့အုပ်စု မာနယ်ပုလော လှေဆိပ်ရောက်တော့ ညနေစောင်းနေပါပြီ။ ဗိုလ်မှူးစိုးစိုးအိမ်က ထုတ်ပေးထားတဲ့ ခရီးသွားလက်မှတ်ကို ဗဟိုလှေဆိပ်၊ စစ်ဆေးရေးဂိတ်မှာပြပြီး  သူပုန်ဌာနချုပ်ဆီ ကျနော်တို့ တက်လာခဲ့ပါတယ်။ လှေဆိပ်ကနေ အပေါ်တက်တဲ့ လမ်းကြောင်း ၂ ခုရှိပြီး ကျနော်တို့ တက်လာတဲ့လမ်းမှာတော့ သစ်သားလှေကားထစ်တချို့၊ မြေလှေကားထစ်တချို့နဲ့ မညီမညာ၊ အတို အရှည် လှေကားထစ် ၄၀ လောက် ရှိမယ်လို့ထင်ပါတယ်။


လှေကားထစ်တွေဆုံးလို့ မြေညီလွှာကိုရောက်တာနဲ့ မြက်ခင်းစိမ်းစိမ်းရှိတဲ့ မာနယ်ပလော ဘောလုံးကွင်းနဲ့ ကွင်းပတ်လည်က သစ်သားအိမ်တွေ၊ ရုံးတွေကို မြင်လိုက်ရပါတယ်။ အဲဒီရုံးတွေ၊ အိမ်တွေထဲက ပထမဆုံးတွေ့တဲ့အိမ်ဟာ ကျနော်တို့သွားချင်တဲ့ KNU အတွင်းရေးမှူးချုပ် ပဒိုဘသင်စိန် (နောက်ပိုင်း KNU ဥက္ကဌဖြစ်လာပြီး ၂၀၀၈ မှာ ကွယ်လွန်သွားသူ) ရဲ့ အိမ်ပါပဲ။ “ဟာလဲဂေး ပဒို” လိုိ့ မိတ်ဆက်ပြီး သူအိမ်ပေါ် ကျနော်တို့ တက်သွားပါတယ်။

ကေအန်ယူအရာရှိတွေနဲ့တွေ့ရင် ကရင်လိုနှုတ်ဆက်နိုင်ဖို့ “၀ါ-နီ-ဟာ-နာ” ကို အလွတ်ကျက်ထားရပါတယ်။ မနက်ပိုင်း Good morning ကို ၀ါလဲဂေး။ နေ့လည်ပိုင်း Good afternoon ကို နီလဲဂေး။ ညနေပိုင်း Good evening ကို ဟာလဲဂေးလို့ပြောပြီး ညပိုင်း Good night ကို နာလဲဂေးလို့ သုံးပါ တယ်။ အဲဒါကို အလွတ်မရဘဲ ၀ါ-နီ-ဟာ-နာ ကို နေရာမှားသုံးပြီး ပြောင်းပြန်နှုတ်ဆက်မိရင် “ဗမာလိုပဲ ပြောပါဗျာ။ မင်္ဂလာပါလို့ ပြောရင်လည်း ရပါတယ်” လို့ အပြောခံရတတ်ပါတယ်။ တခါတရံမှာတော့ အဟားခံရတတ်ပါတယ်။ ဒါကြောင့် ဒီ ၄ ခုကိုတော့ နေရာမှားမသုံးမိအောင် ကျနော်တို့ ကျိုးဖိုးတွေ အာဂုံဆောင်ထားရပါတယ်။

နောက်တခါ ဒီလိုမျိုး အချိန်ပိုင်းခြားအလိုက် နှုတ်ဆက်နည်းတွေကို ကရင်နယ်မြေအပါဝင် နိုင်ငံတကာမှာ ကျနော်ကြုံခဲ့ရဖူးပေမယ့် ကျနော်တို့မြန်မာနိုင်ငံမှာတော့ မရှိဘူးလို့ထင်ပါတယ်။ “မင်္ဂလာပါ” လို့ နှုတ်ဆက်တာမျိုးကို ကျောင်းခန်းထဲ ဆရာမ ၀င်လာချိန်မှာ ပြောတာကလွဲရင် တခြားနေရာမှာ သုံးတာ ကျနော်တော့ သိပ်မကြားမိပါဘူး။ “နေကောင်းလား”၊ “ထမင်းစားပြီးပြီလား” စသည်ဖြင့် နှုတ်ဆက်တာက ပိုများတယ်လို့ထင်ပါတယ်။ တဆက်တည်း တင်ပြချင်တဲ့ ထူးခြားမှုကတော့ ကရင်နယ်အပါဝင် နိုင်ငံတကာမှာ ကျနော်တွေ့ဖူးသမျှ လူမျိုးတွေမှာ Family name မိသားစုအမည်တွေရှိပေမယ့် မြန်မာမှာတော့ အမည်တွေက တယောက်တမျိုးစီဖြစ်နေပြန်ပါတယ်။ အဖေအမည်နဲ့ သားသမီးအမည်တွေဟာ ဘာမှအချိတ်အဆက်မရှိဘဲ သီးခြားစီ ဖြစ်နေတာကလည်း မြန်မာနိုင်ငံရဲ့ ထူးခြားမှုအဖြစ် တွေ့မိပါတယ်။

ဝါ-နီ-ဟာ-နာ နဲ့ မိသားစုအမည်ကိစ္စတွေကို စဉ်းစားရင်း ပဒိုဘသင်စိန်ရဲ့ အိမ်ပေါ် ကျနော်တို့ ရောက်သွားပါတယ်။ အတွင်းရေးမှူးချုပ်အိမ်ဆိုပေမယ့် ဘာမှထူးထူးခြားခြား အဆောင်ယောင်တွေမရှိပါ။ နောက်ပိုင်းမှ သိရတာကတော့ ဒီအိမ်တွေဟာ ရုံးနဲ့တွဲထားတဲ့အိမ်တွေသာဖြစ်ပြီး ဗိုလ်ချုပ်မြအပါဝင် ကေအန်ယူ ထိပ်တန်းအရာရှိတွေရဲ့ မိသားစုနေအိမ်တွေဟာ မာနယ်ပလောကနေ မိနစ် ၂၀ ခန့် လှေစီးရတဲ့ ဖွေးဘောလူရွာမှာရှိတယ်လို့ သိရပါတယ်။ ကျောင်းသားတချို့ ရောက်ဖူးကြပေမယ့် ကျနော် မရောက်ဖူးလိုက်ပါ။

တခြမ်းစောင်းနေတဲ့ တောင်နံရံကို မြေမညှိဘဲ တိုင်ကို ညှိပြီးဆောက်ထားတဲ့အိမ်။ ခြေတံရှည် ကျွန်းသစ်သားသစ်တိုင် အတိုအရှည်တွေ စိုက်ထားပြီး အဲဒီပေါ်မှာ သစ်တချို့၊ ၀ါးတချို့နဲ့ အသေချာ ဆောက်ထားတဲ့ ခြေတံရှည် တဲအိမ်တလုံးမျှသာဖြစ်ပါတယ်။ အမိုးက အင်ဖက်၊ အခင်းက ကျွန်းသစ် သားအကြမ်းထည်။ တခြမ်းပဲရှိတဲ့ အကာက ၀ါးထရံ။ ခါးဆစ်လောက်အထိ ၀ါးထရံ ကာထားတဲ့ သူ့အိပ်ခန်းတခုကလွဲရင် တအိမ်လုံးဟင်းလင်းပြင်။ အိမ်အလျားက ပေ ၃၀ လောက်ရှိပြီး အနံက ၁၅ ပေလောက်ရှိမယ်လို့ ထင်ပါတယ်။ အိမ်ရှေ့လှေကားအတက် ကွပ်ပြစ်မှာက ဧည့်ခန်း။ အပေါ် ဆင့်မှာ သူရဲ့ရုံးခန်း။ နောက်ကျောဘက်မှာ မီးဖိုးချောင်။ ဒါပါပဲ။

ရုံးခန်းဆိုပေမယ့် အဲဒီကာလက ကွန်ပြူတာမပေါ်သေးတဲ့အတွက် သူရဲ့အတွင်းရေးမှူးတဦးက လက်နှိပ်စက်တလုံးနဲ့ ကရင်စာ၊ အင်္ဂလိပ်စာတွေကို တဂျောက်ဂျောက်နဲ့ ရိုက်နေတုန်း။ အတွင်းရေးမှူးဆိုပေမယ့် ကော်သူးလေ အ.ထ.က ကနေ ဆယ်တန်းအောင်ခါစ ဖက်ဒရယ်တက္ကသိုလ်ကို တက်နေတဲ့ ကျောင်းသားလေးတဦးက စေတနာ့ဝန်ထမ်းအဖြစ် ကူညီနေတဲ့သဘောမျိုး ဖြစ်ပုံရပါတယ်။ နောက်တယောက်တော့ တိုလီမိုလီလုပ်ပေးရတဲ့ ရဲဘော်ကြီး မူးကလိ။ သူကတော့ ကျနော်တို့ကျောင်းသားတွေနဲ့ အရင်နှီးဆုံးပုဂ္ဂိုလ်ဖြစ်ပြီး နောက်ပိုင်းမှာ NCUB ပို့ဆောင်ရေးဌာနမှာ ဆက်လက် တာဝန်ထမ်းခဲ့ပါတယ် (အခုတော့ သူလည်း နော်ဝေးနိုင်ငံ ရောက်နေပါပြီ) အဲဒီညက ရဲဘော်ကြီး မူးကလိ လက်စွမ်းပြထားတဲ့ ကရင် ငရုတ်သီးထောင်း၊ တာလဘောဟင်းနဲ့ ငါးသေတ္တာသုတ်တို့ကို စားခဲ့ရတယ်လို့ မှတ်မိနေပါတယ်။

ညစာစားပြီးမှာတော့ ပဒိုဘသင်နဲ့ကျနော်တို့ ဆွေးနွေးမှုလုပ်ခဲ့ပါတယ်။ ပဒိုဘသင်စိန်ရဲ့ ပုံကိုတော့ ပရိတ်သတ် အတော်များများ မြင်ဖူးပြီးဖြစ်တဲ့အတွက် အထူးမိတ်ဆက်ပေးစရာ လိုမယ်မထင်ပါ။ ပါဝါမျက်မှန်တလက်ကို တပ်ထားပြီး အမြဲတမ်း ပြုံးရိပ်သန်းနေတဲ့ သူ့မျက်နှာဟာ သူပုန်ခေါင်းဆောင်နဲ့ သိပ်မတူဘဲ ပြည်နယ်အုပ်ချုပ်ရေးမှုးတဦးနဲ့ ပိုတူနေပါတယ်။ စကားပြောရင် လေသံပျော့ပြောင်းပြီး ဆက်ဆံရေး အတော်ကောင်းတဲ့ပုဂ္ဂိုလ်ပါ။ သူဟာ အရင်က ကျနော်တို့စခန်း အခြေစိုက်တဲ့ မင်းသမီးဒေသ မြိတ် ထားဝယ်ခရိုင် ဥက္ကဌအဖြစ် တာဝန်ယူခဲ့သူဖြစ်ပြီး အဲဒီကတဆင့် ဗဟိုအတွင်းရေးမှုးအဖြစ် အရွေးခံရတာလို့ သိရပါတယ်။ မြစ်ဝကျွန်းပေါ်ဇာတိ ပဒိုဘသင်ဟာ ၁၉၄၉ ကတည်းက KNU ထဲဝင် ခဲ့သူဖြစ်ပြီး ၁၉၈၄ မှာ အထွေထွေအတွင်းရေးမှူးအဖြစ် စတင်အရွေးခံရပါတယ်။ ကျနော်တို့တောထဲမှာရှိစဉ် ကျင်းပတဲ့ ၂၀၀၀ ခုနှစ် KNU ညီလာခံမှာတော့ သူဥက္ကဌဖြစ်လာပါတယ်။

စာသင်ခန်းထဲက ပထ၀ီ။ ရုပ်ရှင်ထဲကသူပုန်နဲ့ တကယ့်အခြေနေမတူပါ

သူ့အကြောင်းကိုမှတ်မိနေပေမယ့် သူနဲ့ကျနော်တို့ ဆွေးနွေးတဲ့အကြောင်းရာကိုတော့ မမှတ်မိတော့ပါ။ အကြမ်းအားဖြင့်ကတော့ KNU နယ်မြေကော်မီတီကို ကေအန်ယူက တတ်နိုင်ဆုံး အကူညီပေးဖို့ တင်ပြခဲ့တယ်လို့ ထင်ပါတယ်။ နောက်တနေ့မနက်မှာတော့ သူပုန်ဌာနချုပ်စခန်းကို ကျနော်လေ့လာ ခွင့်ရခဲ့ပါတယ်။ မာနယ်ပလောစခန်း ဆိုတာဟာ တောကြီးမျက်မည်းထဲက လူသူမရောက်နိုင်တဲ့ သူပုန်ဌာနချုပ်စခန်းလို့ မရောက်ဖူးသူတွေက ထင်ကောင်းထင်နိုင်ပေမဲ့ တကယ်ကတော့ အဲဒီလို မဟုတ်ပါဘူး။ မြန်မာနိုင်ငံဘက်ကနေလာဖို့ ခက်ခဲကောင်း ခက်ခဲနိုင်ပေမဲ့ ထိုင်းဘက်ကနေ ကားလမ်း၊ လှေလမ်းတွေနဲ့ အလွယ်တကူ သွားနိုင်တဲ့နေရာဖြစ်ပြီး စစ်ရေးအရ ဗျူဟာမြောက်တဲ့မြေအနေထားရှိပါတယ်။

နောက်ကျောဘက်မှာ သောင်ရင်းမြစ်နဲ့ ထိုင်းနိုင်ငံက တောတန်းတွေ၊ အောက်ဘက်ကို နာရီဝက်နီးပါး ဆင်းသွားမယ်ဆိုရင် သံလွင်နဲ့သောင်ရင်းမြစ်ဆုံ။ အဓိပ္ပာယ်ကတော့ န၀တဘက်ကနေ ကြည်းတပ်တွေ ဒီတိုင်းတက်လာဖို့ မဖြစ်နိုင်အောင် သံလွင်က မာနယ်ပလောကို သဘာဝအရ အကာအကွယ် ပေးထားတဲ့သဘောပါ။

အပေါ်ဘက်မှာတော့ ရှေ့မှာတင်ပြခဲ့တဲ့အတိုင်း နောတခံစစ်ကြောင်းကြီးရှိပါတယ်။ အရှေ့ဘက်မှာတော့ (နေ အ၀င် အထွက်တိုင်းဆိုရင် အနောက်ဘက်လို့ ပြောသင့်ပါတယ်) မြင့်မားလှတဲ့ နော်ဒေးတောင်ကျောကြီးက ကာရံထားတဲ့အတွက် အဲဒီ တောင်ကိုကျော်ပြီး န၀တတပ်တွေ ရုတ်တရက် တက်လာလို့ မရနိုင်ပါဘူး။ အဲဒီတောင်တန်းကြီးနဲ့ သောင်းရင်းမြစ်ကြားက ဘောလုံးကွင်း နှစ်ကွင်းစာလောက်သာရှိတဲ့ မြေပြန့်နေရာလေးမှာ မာနယ်ပလောစခန်းကို ဆောက်ထားတာ ဖြစ်ပါတယ်။



စစ်ရုံးချုပ်သစ်။ နော်ဒေးတောင်တန်းနောက်ခံနဲ့ မြင်နေရတဲ့ မာနယ်ပလောစခန်း

မြင့်မားလှတဲ့ နော်ဒေးတောင်တန်းကိုကျော်ပြီး န၀တဘက်ကနေ လက်နက်ကြီးနဲ့လှမ်းပစ်မယ်ဆိုရင် ကျည်ဟာ မာနာပလောရင်ပြင်ထဲ မကျဘဲ သောင်းရင်းကိုကျော်ပြီး ထိုင်းထဲကျဖို့များပါတယ်။ ၁၉၉၂ စစ်ပွဲတုန်းကဆိုရင် ကျည်အတော်များများ ထိုင်းထဲကျသွားတာက ဒီစခန်းရဲ့ ဗျုဟာမြောက်မှုကို သက်သေပြခဲ့ပါတယ်။ နောက်တခါ လေယဉ်နဲ့ဗုံးကြဲမယ်ဆိုရင်လည်း မြင့်မားတဲ့တောင်တန်းကြီးက ခံနေတဲ့အတွက် သိပ်မလွယ်တဲ့နေရာမျိုးပါ။ ဒါကြောင့်လည်း မာနယ်ပလောဌာနချုပ်ဆိုပြီး နာမည်ကြီးခဲ့တာဖြစ်မယ်လို့ ထင်ပါတယ်။

အဲ … ဘော်လုံးကွင်း ၂ ကွင်းစာလောက်သာရှိတဲ့ ဒီဌာနချုပ်စခန်းကနေ ထိမ်းချုပ်ထားနိုင်တဲ့ နယ်မြေတခုလုံးရဲ့ အခြေနေကို လှမ်းကြည့်လိုက်မယ်ဆိုရင် ပိုတောင် အံ့သြသွားနိုင်ပါတယ်။  အပေါ်ဘက် (မြောက်ဘက်) သံလွင်မြစ်ကြောင်း တလျှောက်ရှိ သံလွင်စခန်း၊ စောထစခန်းကနေ ကရင်နီနယ်စပ်အထိကို တပ်မဟာ ၅ နဲ့ တပ်မဟာ ၂ တို့က ထိန်းချုပ်ထားပါတယ်။ တခါ မာနယ်ပလောရဲ့ နောက်ကျောဖက်ကနေ ပဲခူးတိုင်းအရှေ့ခြမ်းနဲ့ စစ်တောင်းမြစ်ဝှမ်း ဒေသအထိ တပ်မဟာ ၁ နဲ့ ၃ တို့ က လှုပ်ရှားနေပါတယ်။

နောက်တခါ မာနယ်ပလောကနေ တောင်ဘက်ကို သောင်းရင်းမြစ်တလျှောက် ပြန်တက်လာမယ်ဆိုရင် မဲသဝေါတောင်ကို န၀တက ထိမ်းထားတာကလွဲရင် ကလက်ဒေးကနေ ဟိုး တနသာင်္ရီတိုင်း ကော့သောင်အနီးထိ ကျန်နယ်စပ်တကြောလုံးကို ကေအန်ယူက ထိန်းချုပ်ထားဆဲဖြစ်ပါတယ်။ ကလက်ဒေး၊ မယ်လ၊ ရေကျော်၊ ကော့မူရာ၊ သီဘောဘိုး၊ ဝေါလေ၊ ကျိုက်ဒုံ၊ မက္ကသာ စသည်ဖြင့် ဘုရားသုံးဆူဒေသ မွန်ပြည်သစ်ပါတီနယ်မြေအစပ်အထိ ကေအန်ယူ တပ်မဟာ ၇ နဲ့ တပ်မဟာ ၆ တို့က ထိန်းချုပ်ထားပါတယ်။ ဘုရားသုံးဆူဒေသနဲ့ မွန်ပြည်နယ်ကိုကျော်ပြီး ရေဖြူမြို့နယ် နတ်အိမ်တောင်ဒေသကနေ ဟိုးအောက်ဆုံး ကော့သောင်အနီးက ရွာလေလူစခန်းအထိ KNU တပ်မဟာ ၄ က ထိမ်းချုပ်ထားတဲ့အတွက် KNU ထိန်းချုပ်နယ်မြေဟာ တောင်-မြောက် ရှည်မျောမျောနဲ့ အတော်ကျယ် ပြန့်တဲ့သဘောရှိပါတယ်။

တဆက်တည်း KNU နယ်မြေကိုကျော်ပြီး တခြားဒေသတွေကို ကြည့်မယ်ဆိုရင်လည်း စောထစခန်းကနေ သံလွင်မြစ်အရှေ့ဘက်ခြမ်းတကျောလုံးနဲ့ တရုတ်နယ်စပ်တလျှောက်ကိုလည်း ကရင်နီ၊ ရှမ်း၊ ပအို့ဝ်၊ ပလောင်၊ ၀၊ ကချင် တော်လှန်ရေးအဖွဲ့တွေက ထိန်းချုပ်ထားပါတယ်။ ဒါကြောင့် ထိုင်း၊ လာအို၊ တရုတ်၊ အိန္ဒိယ နယ်စပ်တလျှောက်လုံးကို လူမျိုးစုတော်လှန်ရေးအဖွဲ့တွေက ထိန်းချုပ်ထားတဲ့သဘော ဖြစ်ပါတယ်။ တနည်းအားဖြင့်ပြောမယ်ဆိုရင်တော့ ကျနော်တို့ကျောင်းစာအုပ်ထဲမှာ သင်ခဲ့ဖူးတဲ့ ပထ၀ီတွေ မြန်မာ့သမိုင်းတွေနဲ့ ကျနော်တို့ကိုယ်တိုင် အခု မျက်စိနဲ့အမှန်တကယ် မြင်နေရတဲ့ ပထ၀ီတွေ၊ သမိုင်းတွေဟာ အတော့်ကို ကွာခြားနေတာကိုတွေ့ရပါတယ်။

တခါ မြန်မာနိုင်ငံမှာတုန်းက မြင်နေကြ ရုပ်ရှင်တွေထဲက သူပုန်နဲ့ အခု မာနယ်ပလောဌာနချုပ်မှာ တကယ်မြင်နေ။ တွေ့နေရတဲ့သူပုန်တွေဟာလည်း တခြားစီဖြစ်နေပြန်ပါတယ်။ ကြက်ပေါင်ကိုက်လိုက်၊ အရက်သောက်လိုက်၊ မိန်းမကိုဖက်လိုက်နဲ့ လုပ်နေတဲ့ ရုပ်ရှင်ထဲက သူပုန်မျိုး ဒီဒေသမှာ ကျနော်တော့ မတွေ့ဖူးပါဘူး။ ကျနော်တို့ ကျောင်းသားသူပုန်ဆိုရင် အခြေနေက ပိုတောင်ဆိုးပါသေးတယ်။ ကြက်ပေါင်ကိုက်ဖို့နေနေသာ ကြက်ဒူးခေါင်းရိုးကိုတောင် ကီလိုချိန်နဲ့ ၀ယ်မစားနိုင်တဲ့ဘ၀ပါ။

ဒါတွေကို န၀တ၀ါဒဖြန့်ချိရေးဌာနက မြသန်းစံတို့၊ တင်သန်းဦးတို့ကိုယ်တိုင် ရိပ်မိသွားလို့လားတော့ မသိပါဘူး။ ၁၉၈၉-၉၀ ၀န်းကျင်မှာ ထွက်ပေါ်ခဲ့တဲ့ “ပါပီမ” အပါဝင် ၀ါဒဖြန့်ချိရေး ရုပ်ရှင်ကား အတော်များများမှာတော့ သမားရိုးကျ ဇာတ်အိမ်ပုံစံတွေကို ချက်ချင်းပြောင်းပြီး ကျောင်းသားသူပုန်တွေကို ဇာတ်လိုက်နေရာမှာတင်ရိုက်တဲ့ ကားတွေထွက်လာပါတယ်။ အရင်ကဆိုရင် သူပုန်နေရာမှာ လူကြမ်းနဲ့သာ သရုပ်ဆောင်ရမယ်လို့ နားလည်ထားရာကနေ ကျောင်းသားသူပုန်နေရာမှာ နာမည်ကြီးမင်းသားတွေ၊ မင်းသမီးတွေကိုယ်တိုင် ၀င်သရုပ်ဆောင် ရိုက်ကူးပြသခဲ့တာကို ကျနော် သတိထားမိပါတယ်။

အဲဒီမာနယ်ပလောဌာနချုပ်က ပဒိုဘသင်အိမ်မှာတောင် န၀တ ၀ါဒဖြန့်ဌာနရဲ့ ရုပ်ရှင်တွေကို ကျနော်တို့ သူပုန်တွေကိုယ်တိုင် ထိုင်ကြည့်ပြီး လက်ရှိဖြစ်စဉ်နဲ့ န၀တရုပ်ရှင် တခြားစီဖြစ်နေတာကို “ဟား” ခဲ့ ဖူးကြပါတယ်။

....................................................................................................................
သူပုန်ကျောင်းသားတဦးရဲ့ မာရသွန်ခရီး ၁၁
December 8, 2011 7:44 pm
အောက်မေ့ဖွယ်။ ဧရာဝတီမင်္ဂဇင်း။
 
တပ်ရင်းနံပါတ်များ သတ်မှတ်ခြင်း

ညီလာခံအတွင်းဆွေးနွေးတဲ့ နောက်ထပ်အရေးကြီးတဲ့အချက်တခုကတော့ ABSDF
စခန်းတွေအတွက် တပ်ရင်းနံပါတ်တွေ သတ်မှတ်နိုင်ခဲ့ခြင်းဖြစ်ပါတယ်။
ကျောင်းသားတွေရောက်နေတဲ့ လူမျိုးစုလက်နက်ကိုင်နယ်မြေ အလိုက် တပ်ရင်း
နံပါတ်တွေကို သတ်မှတ်လိုက်ပြီး မွန်နယ်မြေ အ တွက် အမှတ် ၁ နဲ့ စဖို့။ ကရင်နယ်မြေကို
အမှတ်၂။ ကရင်နီနယ်ကို အမှတ် ၃။ ရှမ်း၊ ရလလဖ၊ ပအို့ ၊ ပလောင်နယ်တွေကို အမှတ် ၄။
၅။ ၆။ ၈။ ကချင် နယ်ကို အမှတ် ၇။ အိန္ဒိယနဲ့ ဘင်္ဂလားဒေ့ရ်ှနယ်စပ်ကို အမှတ် ၉ နဲ့ စဖို့ သတ်မှတ်လိုက်ပါတယ်။














သံလွင်စခန်းမှာ အရေးပေါ် ညီလာခံကျင်းပနေပုံ (ဓါတ်ပုံ စာရေးသူရဲ့ Face book )

အဲဒီသတ်မှတ်ချက်တွေအရ မွန်ပြည်သစ်နယ်မြေ ဘုရားသုံးဆူဒေသမှာ ၁၀၁ နဲ့ ၁၀၂ တပ်ရင်း တွေပေါ်လာပါတယ်။ KNUနယ်မြေ ဘိတ်(မြိတ်) ဒေသရှိ မောတောင်စခန်းမှာ ၂၀၃။ ထားဝယ်ဒေသ မင်းသမီးမှာ ၂၀၁။ သီဘောဘိုးမှာ ၂၀၄။၂၀၅။၂၀၆ တပ်ရင်းများ။ ရေကျော်မှာ၂၀၇။ သံလွင်မှာ၂၀၈ နဲ့ ၂၀၉။ စောထမှာ ၂၁၀။ ၀မ်ခမှာ ၂၁၁ စသဖြင့် ပေါ်လာပါတယ်။ ကရင်နီဒေသ ဟွေစေတီ စခန်း မှာ ၃၀၃ တပ်ရင်း ပေါ်လာပါတယ်။ ပလောင်နယ်မြေမှာ ၅၀၁။ ပအို့နယ်မြေမှာ ၆၀၁။ ရလလဖ နယ်မြေမှာ ၈၀၁ တပ်ရင်း တွေ ပေါ်လာပါတယ်။ ကချင် နယ်မြေကိုတော့ မြောက်ပိုင်းအဖြစ် သီးခြား သတ်မှတ်ပြီး ၇၀၁ တပ်ရင်းတွေပေါ်လာပါတယ်။ အိန္ဒိယနဲ့ ဘင်္ဂလားဒေ့ရှ် နယ်စပ်ဘက်မှာ ၉၀၁ တပ်ရင်းတွေ ပေါ်လာပါတယ်။
ဒီလိုအရေးကြီးတဲ့ ဆုံးဖြတ်ချက်တွေ။ ငြင်းခုံမှုတွေပြီးတဲ့နောက်မှာတော့ ဗဟိုိကော်မတီ ရွေး ချယ်တဲ့နေ့ဆီရောက်လာပါတယ်။ ကျနော်မှတ်မိသလောက် (မှတ်မိသမျှရေးထားခြင်းသာဖြစ်ပါတယ်။ မူရင်းစာရင်းရနိုင်ဖို့ ABSDF ဗဟိုသုတေသနဌာနဆီ တောင်းခံ ထားပေမယ့် အခုထိမရသေးပါ။ လူစာရင်း အမှားအယွင်းရှိပါက တောင်းပန်အပ်ပါတယ်)

အရေးပေါ်ညီလာခံကနေ ရွေးချယ်လိုက် တဲ့ ဗဟိုကော်မတီ စာရင်းကတော့ ဥက္ကဌ အဖြစ် မူလ ဥက္ကဌ ကိုထွန်းအောင်ကျော်။ ဒု ဥက္ကဌတွေအဖြစ် ဘုရားသုံးဆူ ဘက်က လာတဲ့ ဒေါက်တာ နိုင်အောင်(စီမံ)နဲ့ ကော့မူးရာမှ ဦးယုနွယ်(စစ်ရေး) တို့ ဖြစ်ပါတယ်။ အထွေထွေ အတွင်းရေးမှူး အဖြစ် မူလ အတွင်းရေးမှူး ကိုသန်းဝင်း။ တွဲဖက်အတွင်းရေးမှူး ၁ အဖြစ် ဟွေစေတီ စခန်း(ကရင်နီ) ဘက်ကလာတဲ့ စိုင်းဆိုင်ခေး။ တွဲဖက်အတွင်း ရေးမှုး ၂ အဖြစ် ဘုရားသုံးဆူဘက်ကလာတဲ့ ကိုတင်စိုးနောင် တို့ ဖြစ်လာပါတယ်။ ဗဟိုဦးစီး ကော်မတီဝင်တွေ အဖြစ်တော့ မူလစည်းရုံးရေးတာဝန်ခံ ကိုထွန်းဦး(ကျဆုံး)နဲ့ ပြန်ကြားရေးတာဝန်ခံ ကိုကိုလေးတို့ကို မူလတာဝန်တွေ ဆက်ပေးပါတယ်။

အသစ်တက်လာတဲ့ ဗဟိုဦးစီး ကော်မတီဝင်တွေထဲမှာတော့
ကော့မူးရာစခန်းက ဒေါက်တာ သောင်းထွန်းက နိုင်ငံခြားရေး(လက်ရှိ အဝေးရောက်
ညွန့်ပေါင်းအစိုးရရဲ့ ကုလသမဂ္ဂ ကိုယ်စားလှယ် အဖြစ်တာဝန်ထမ်းနေဆဲ)။ ကလက်ဒေး သို့မဟုတ် ရေကျော်စခန်း က ဒေါက်တာ ကျော်သက်ဦးက ကျန်းမာရေး။
ဟွေစေတီစခန်းက ကိုဆန်နီက စစ်ရေး(လက်ရှိ ABSDF အထွေထွေအတွင်းရေးမှူးအဖြစ် တာဝန်ယူနေဆဲ)။ ဟွေစေတီကပဲ ကိုမန်းထွန်းက ဘဏ္ဍာရေး။ စောထစခန်းက ကိုဆန်းလင်းက ထောက်ပံ့ရေး။ သီဘောဘိုးက ကိုအောင်သန်း(နှုတ်ခမ်းမွေး)က စာရင်းစစ် အဖြစ် ကျနော်မှတ်မိနေပါတယ်။

ဗဟိုကော်မတီဝင်တွေထဲမှာတော့ ၆၀၁ တပ်ရင်းက ကိုတိုက်မောင်း။ စောထစခန်းက ကိုတင်စိုး။ ရေကျော်က ကိုအောင်ဟိန်းနဲ့ ကို ထွန်းသိန်း။ မင်းသမီးစခန်းက ကိုခင်မောင်ဝင်းနဲ့ ကိုကျော်ထင်။ မောတောင်စခန်းက ကိုကျော်ဇေယျ တို့ကိုလည်း ကျနော် အမှတ် ရနေပါတယ်။ ပထမ အကြိမ် ဗဟိုကော်မတီ တုန်းက စခန်းတခုချင်းစီရဲ့ ကိုယ်စားလှယ်တွေစုံအောင်မပါတဲ့အတွက် ဒီတကြိမ်မှာတော့စခန်းတခုစီက အနည်းဆုံး ဗဟိုကော်မတီ တဦးစီ ပါစေရမယ်ဆိုတဲ့ စဉ်းစားချက်ကြောင့် ဗဟိုကော်မတီအများဆုံး ရွေးချယ် ခဲ့တဲ့ ညီလာခံတခုလည်း ဖြစ်ခဲ့ပါတယ်။

ဗဟိုကော်မတီအသစ် ကျမ်းသစ္စာဆိုတဲ့အခါမှာတော့ ဗုိုလ်ချုပ်အောင်ဆန်းတို့ ရဲဘော်သုံးကျိပ်လို လက်မောင်းသွေးဖောက် သွေးသောက် သစ္စာဆိုမယ်လို့ ကိုယ်စားလှယ်တဦးက အဆိုပြုပါတယ်။ ဒီအဆို ပြုချက်ကို အားလုံးနီးပါးက လက်ခံကြပေမယ့် ဟွေစေတီ ဘက်က လာတဲ့ ကိုယ်စားလှယ်တဦးကတော့ ဒီကိစ္စဟာ နိုင်ငံရေးအရမှန်ပေမယ့် ကျန်းမာရေး ရှုထောင့်ကကြည့်ရင် ကျန်းမာရေး ထိခိုက်နိုင်တဲ့အတွက် သူလက် မခံဘူးဆိုပြီး ထ ကန့်ကွက်တာကိုလည်း ကျနော်အမှတ်ရနေပါတယ်။

ညီလာခံအတွင်း ဒီလိုအဆင်မပြေမှုတွေ။ ငြင်းခုံမှုတွေရှိခဲ့ပေမယ့် ညီလာခံပြီးတဲ့ရက်လား။ ကျနော်တို့ ရောက်စဉ်က မယ်ညား- ပါသားနဲ့ ဘယ်ညာနင်းနေတဲ့ သင်တန်းသားတွေရဲ့ သင်တန်းဆင်းပွဲနေ့လား မသိပါ။ အဲဒီတရက်မှာ KNU တပ်ရင်း ၂၀ နယ်မြေ။ ဥသုထ ဒေသအကြီးအကဲနဲ့ ခရိုင် ဥက္ကဌ ပဒိုနော်တော့က ကျနော်တို့ ကျောင်းသားကိုယ်စားလှယ်အားလုံးကို သူ့အိမ်ဆီဖိတ်ပြီး နွား တကောင် ပေါ်ကြွေးခဲ့ပါတယ်။

အဲဒီ ထမင်းစားပွဲမှာ သူပြောတဲ့ အဓိကစကားလုံကတော့ ကျောင်းသားတွေ ညီညွတ်ရေးအတွက် အခုလို ထမင်းဖိတ်ကြွေးတာပါတဲ့။ ဒါပေမယ့် ငတ်ပြတ်နေတဲ့ ကျနော်တို့ကတော့ ထမင်းစားပွဲမတိုင်မီလုပ်လေ့ရှိတဲ့ ဆုတောင်းပွဲ မြန်မြန်ပြီးပါစေ။ “အာမင်” ကိုမြန်မြန်ကြားရပါစေလို့သာ ဆုတောင်းနေတဲ့အတွက် သူ့စကားကို သိပ်နားမ၀င်။ မစားရတာကြာပြီဖြစ် တဲ့ အမဲသားတုံးကိုသာ အလုအယက် ၀ိုင်းအားပေးခဲ့ပါတယ်။


ရန်သူနဲ့မတိုက်ခင် ငှက်ဖျားကို အရင်တိုက်

သံလွင်စခန်းမှာ အရေးပေါ်ညီလာခံတက်နေစဉ်အတွင်း ကျနော်ငှက်ဖျားစဖြစ်ပါတယ်။ သံလွင် မြစ်ရေကို မကြိုမချက်ဘဲ ဒီတိုင်း သောက်မိလို့လား။ အအေးဓာတ်များတဲ့ ဒေသမို့လား။ ဘာကြောင့်မှန်း မသိ တကိုယ်လုံးအေးစက် တုန်ရီဖြစ်ပြီး ငှက်ဖျားတက်ပါလေ ရော။ အဲဒါနဲ့ ရှေ့မှာပြောခဲ့တဲ့ စစ်ရေးပြကွင်း ဘေးနားမှာဖွင့်ထားတဲ့ အရေးပေါ် ဆေးခန်းဆီ ဆေးသွားတောင်းတော့ ကျနော်လို့ ငှက်ဖျား မိနေသူတွေအများကြီး။ ဆေးခန်း ခုတင်ပေါ်မှာ လူနာ ၂၀ ကျော်ရှိမယ် ထင်ပါတယ်။ အားလုံးနီးပါးဟာ အခုမှရောက်လာ တဲ့ ကျောင်းသားလူငယ်တွေဖြစ်ကြပြီး တချို့က စောင်ကိုခေါင်းမြီးခြုံကာ တအီးအီးညည်း နေပါတယ်။ တချို့က ဒရစ် ပုလင်းတွေတန်းလန်းနဲ့ ခွေပျော့လို့။ တချို့ကတော့ ခုတင်ပေါ်ထိုင်။ ဆေးခန်းနံရံ ကိုမှီပြီး သံလွင်မြစ်နဲ့ ဟိုဘက်ကမ်းက တောင်တန်းကြီးဆီ ငေးမောပြီး ငူငူငိုင်ငိုင် ခပ်ကြောင်ကြောင် ပုံစံ တွေနဲ့။

ကျနော့်ကိုတော့ အယင်ဆုံး ပြဒါးတိုင်တခုပေးပြီး ပါးစပ်ထဲငုံခိုင်းလိုက်ပါတယ်။ အပူချိန်က အတော်များနေပုံရပေမယ့် အတိအကျ ကျနော်မမှတ်မိတော့။ ပြီးတော့ သွေးပေါင်ချိန်တိုင်း။ အပေါ်သွေး။ အောက်သွေးကိုမှတ်။ ဟောဒီဆေးတွေကို အယင်သောက် လိုက်။ ၈ နာရီခြား တကြိမ်စီ ဆရာမတွေ က ဆေးလာပေးလိမ့်မယ် လို့ သရမူ (ဆရာမကို ကရင်လိုအခေါ်) တဦးက ဆေးတဆုပ်နဲ့ ရေတခွက် ပေးပြီး ပြောပါတယ်။ “အားပါးပါး မနည်းပါလား”ဆိုပြီး ကျနော့်ပါးစပ်က အော်မိတဲ့အထိ ဆေးတွေက အများကြီး။ ကွီနီး (ကလိုကွင်းလဲဖြစ်နိုင်ပါတယ်) က၂ လုံး။ ပါရာစီတမောက ၂ လုံး။ တက်ထရာ ဆကလင်း က ၂ လုံး။ ဘီဆစ်က ၂ လုံး။ အဲဒါ အားလုံးကို ပါးစပ်ထဲတကြိမ်တည်း ပစ်ထည့်ပြီး သောက်ရမယ်လို့ သရမူက ပြောပါတယ်။ သူပြောတဲ့အတိုင်း လိုက်လုပ်ပေမယ့် ဆေး ကြောက်တဲ့ ကျနော် အံထွက်ပါလေရောပေါ့ ခင်ဗျာ။

ကရင် သရမူကတော့ ခပ်ကြမ်းကြမ်းပါပဲ။ အန်လို့ မရဘူး။ နောက်တခါ ထပ်သောက်ဆိုပြီး ထပ် တိုက်ပါတယ်။ ဒီတခါမှာတော့ ရိုးရိုးရေအစား လိမ္မော်ရည်လား။ ကိုကာကိုလာလားမသိ တခွက် လောက်နဲ့တိုက်တော့ မအန်တော့ပါဘူး။ ပြီးတော့ ဆေး ၈လုံး စလုံး တပြိုင်တည်း မပစ်ထည့်ဘဲ မခါးတဲ့ ဆေး ၄ လုံးကို တကြိမ်။ ခါးလွန်းတဲ့ ကွီနီးနဲ့ ချဉ်စပ်စပ် ဘီဆစ်ကို တကြိမ်သောက် လိုက်တော့ အိုကေ သွားပါတယ်။ ဒီတော့မှ သရမူက ဟာလဲဂေ ပြောပြီး တခြားလူနာဆီ ပြောင်းသွားပါတယ်။ ကျနော်လည်း သရမူရဲနောက်ကျောကို ငေးကြည့်ရင်း စိုင်းထီးဆိုင်ရဲ့“ခွဲစိတ်ခန်းက ဆရာမလေး”ကို သွားသတိရမိပါတယ်။ မန္တလေး တက္ကသိုလ် က သူနာပြုဆရာမနဲ့ သံလွင်စခန်းကဆရာမ ဘာများကွာသလဲဆိုပြီး စဉ်းစားရင်း ပြုံးစိစိဖြစ်နေမိပါတယ်။


ညီလာခံဆီ တက်လာတဲ့စခန်းအသီးသီးက ကိုယ်စာလှယ်များ (ဓါတ်ပုံ စာရေးသူရဲ့ Face book )

ဒါပေမယ့် သေချာတာကတော့ နယ်စပ်ကတောထဲလာပြီး တက္ကသိုလ်ဆေးခန်းက သာယာနာပျော်ဘွယ် ဆရာမလေးကို စိတ်ကူး ယဉ်နေလို့မရ။ တက်နေတဲ့ငှက်ဖျား အချိန်မီအပူချိန်မကျဘူးဆိုရင် ပြာလားဂေ(မူလ ကရင်စကားလုံးတွေဖြစ်တဲ့ ဝေါလဲဂေ။ နီလဲ ဂေ။ ဟာလဲဂေ။ နာလဲဂေ-တွေကို တုပြီး အဆင်မပြေ။ ပြာယာခတ်တဲ့အချိန်။ ဒုက္ခနဲ့ တွေ့တဲ့အချိန်တွေမှာ ကျောင်းသားတွေကြား သုံးလေ့ရှိတဲ့ ဘန်းစကားဖြစ်ပါတယ်) ဖြစ်ပြီး ဒုက္ခများသွား နိုင်ပါတယ်။ ငှက်ဖျားပိုး ဦးနှောက်ထဲဝင်လို့သေသွားသူတွေ။ ဂေါက်
ကြောင် သွားသူတွေ။ ပြီးတော့ ဆီးထဲသွေးပါတဲ့ Black Water နဲ့ သေသွားသူတွေ ကျနော့်ရှေ့မှာ ဒါဇင်နဲ့ချီရှိခဲ့ပြီးဖြစ်တဲ့အတွက် ငှက် ဖျားဟာ တကယ်ကြောက်စရာဖြစ်လာနေပါတယ်။

ဒီဆေးခန်းမှာထူးထူးခြားခြား ကျနော်သတိထားမိတာတခုကတော့ ဒီက ကု-ထုံးတွေက ကျနော်တို့ မြန်မာနိုင်ငံနဲ့မတူ။ မြန်မာနိုင်ငံမှာ တုန်းက ကျနော်ပဲတခါမှ လူနာမဖြစ်ခဲ့ဘူးလို့လားမသိ။ ဒရစ်သွင်းတဲ့လူဆိုရင် အခြေနေ အတော်ဆိုးနေပြီ။ သေဖို့များနေပြီ လို့နားလည်ထားပေမယ့် ဒီမှာကတော့ ဆေးရုံတက်တာနဲ့ ဒရစ် အရင် ချိတ်တာပါပဲ။ နောက်တခု ကွာခြားချက်ကတော့ ကျနော့်အိမ်မှာတုန်းက အအေးမိ။ အပူရှပ်ပြီး အဖျားတက်တယ်ဆိုရင် တခါးတွေအလုံပိတ်။ စောင်ခြုံအိပ်။ ပြီးတော့ အဖျားကျရင်လည်း ဘာ မစားရ။ ညာမစားရဆိုတာတွေရှိပေမယ့် ဒီမှာကတော့ အပူသိပ်များရင် ရေခဲနဲ့ရိုက်မယ်။ ရေခဲ မရှိရင် အေးစိမ့်နေတဲ့ သံလွင်မြစ် ထဲဆင်းခိုင်းပြီး ရေချိုးခိုင်းမယ်။ ပြီးရင် အားရှိတဲ့အစာတွေ ပေးစားမယ်ပေါ့။ ဒါပေမယ့် ကျနော်တို့ ကျိုးဖိုးတွေကတော့ သံလွင်ရေနဲ့ ပဲ တိုးနေရပြီး အားရှိတဲ့အစာအတွက်တော့ မိုက်မီသန် (ပိုက်ဆံမရှိတာကို ထိုင်းလိုအခေါ်) အမြဲတမ်း ဖြစ်နေလို့ မစားနိုင်ခဲ့ပါဘူး။

အဲဒီလို အခြေနေတွေကြားမှာ ဒရစ် တလုံးသွင်း။ ကွီနီး-ပါရာ-တက်ထရာတွေနဲ့ ၃ရက်လောက် နှစ်ပါးသွားပြီးတဲ့အခါမှာတော့ ကျနော် ဆေးရုံကဆင်းခွင့်ရပါတယ်။ ကွီနီး တန်ခိုးပြလို့ မူးဝေေ၀ဖြစ်နေပြီး နားထဲမှာ တချိန်လုံး ရဟတ်ယဉ်အသံ ကြားနေရသလိုလို။ ယင်ကောင်တွေ။ ပိတုန်းတွေ ခေါင်းပေါ်မှာ ၀ဲပျံနေသလိုလို တချိန်လုံးကြားနေရပါတယ်။

အဲဒီကာလက ကျောင်းသားတွေရဲ့ပုံတွေကို အခုချိန်ပြန် ကြည့်မိရင် ငှက်ဖျားမိနေတဲ့ပုံတွေမှန်း သိပ်သိသာပါတယ်။ အဲ သံလွင်က ပေးလိုက်တဲ့ ငှက်ဖျားလက်ဆောင်ဟာ တော်ရုံနဲ့ မပျောက်တော့ပါဘူး။ တလတခါ နှစ်လတခါနီးပါး ငှက်ဖျားကပြန်ပြန်ပေါ်လာ နေ တဲ့အတွက် မဲဆောက်က ဒေါက်တာစင်သီယာ ဆေးခန်းမှာ ၂ ခါ ၃ ခါ ထပ်တက်လိုက်ရပါသေးတယ်။

နောက်ပိုင်း မင်းသမီးစခန်းဘက်ပြန်ရောက်တဲ့အချိန်မှာလည်း ငှက်ဖျားဟာအမြဲလိုလိုဖြစ်နေပြီး ဘန်ကောက် ရောက်တဲ့အထိ မပြတ် ပါဘူး။ ဘန်ကောက်မြို့လယ် အနုစာဝါရီ ကျောက်တိုင်အနီးရှိ မဟိဒေါ တက္ကသိုလ် ရဲ့ ငှက်ဖျားသုတေသနာဆေးရုံကြီးမှာတောင် သတင်းတပတ်ကြာ တက်ရောက် ကုသခံလိုက်ရပါသေးတယ်။ ဒါပေမယ့် ငှက်ဖျားက အမြစ်မပြတ်ဘဲ တခါတရံပြန်ပြန်ပေါ်လာတတ်ပြီး အခု နော်ဝေးကို ရောက်တော့မှပဲ ငှက်ဖျား ဇာတ်လမ်း တခန်းရပ်သွားပါတယ်။

.......................................................................................................................
သူပုန်ကျောင်းသားတဦးရဲ့ မာရသွခန်ခရီး ၁၀ 
on December 1, 2011 8:00 pm
အောက်မေ့ဖွယ် ။ ဧရာဝတီမဂဇင်း။


အရေးပေါ်ညီလာခံနဲ့ ဗဟိုကော်မတီအသစ်

ကျနော်တို့အုပ်စု မဲဆောက်မှာ တရုံးရုံးဖြစ်နေတုန်း ၁၉၈၉ ခုနှစ် ဖေဖော်ဝါရီလ အစောပိုင်းမှာ အရေးပေါ် ညီလာခံ ခေါ်မယ်ဆိုပြီး ဖိတ်စာရောက်လာပါတယ်။
ဘာကြောင့်ခေါ်ဖို့လိုသလဲဆိုတဲ့ အကြောင်းပြ ချက်ကို ကျနော် အတိအကျ မမှတ်မိတော့ပေမယ့် အကြမ်းအားဖြင့်ကတော့ ဗဟို ဦးစီးအဖွဲ့မှာ ဥက္ကဋ္ဌ ကိုထွန်းအောင်ကျော်နဲ့ အတွင်းရေးမှူး ကိုသန်းဝင်းတို့ပဲ ရှိနေပြီး ဒုတိယ ဥက္ကဋ္ဌ ကိုဝင်းမိုး၊ တွဲဘက် အတွင်းရေးမှုး ၂ ဦးဖြစ်တဲ့ ကိုအောင်နိုင် (အခု VOA မြန်မာပိုင်းဌာနမှူး) နဲ့ ဆလိုင်းကိုကိုဦး တို့က မရှိကြပါဘူး။

ထိုင်းရဲက ဖမ်းလို့ ဘန်ကောက်မှာ သောင်တင်နေပြီး နယ်စပ်ကို ပြန်လာလို့မရ ဖြစ်နေတယ်လို့ဆိုပါတယ်။ တချိန် တည်းမှာပဲ သူတို့ ၃ ဦးကို KNU ဥက္ကဋ္ဌ ဗိုလ်ချုပ်မြက ဖမ်းမိန့်ထုတ်ထားလို့ KNU နယ်ဆီ ပြန်မလာရဲဖြစ်နေတယ် လို့လည်း သတင်းတွေ ထွက်ပေါ်နေပါတယ်။

အရေးပေါ်ညီလာခံ ကျင်းပနေစဉ် (ဓာတ်ပုံ - စာရေးသူ၏ face book)

ထိုင်းကဖမ်းတဲ့ သတင်းကို သတင်းစာထဲမှာ တွေ့လိုက်ရပေမယ့် KNU က ဖမ်းမယ်ဆိုတဲ့ သတင်းကိုတော့ တဆင့်စကားနဲ့ ပြောနေကြတာကိုသာ ကြားခဲ့ရပါတယ်။
သေချာတာကတော့ အရေးပေါ်ညီလာခံဆီ သူတို့ ၃ ဦးရောက်မလာခဲ့ပါဘူး။ နောက်တခါ ဗဟိုကော်မတီဝင်တွေ ထဲမှာလည်း ကိုထွန်းဦးနဲ့ ကိုကိုလေးတို့ ၂ ဦးကိုပဲတွေ့ရပြီး ကျန်တဲ့လူတွေကို ကျနော်မတွေ့မိဘူး။ ယူဂျီအတွက် ပြည်တွင်းပြန်ဝင်သွားသူ၊ အဖမ်းခံ လိုက်ရသူ၊ ဘန်ကောက်ကနေ ပြန်မလာတော့သူ စသဖြင့်အမျိုးမျိုးနဲ့ လူမစုံတော့တာကလဲ အရေးပေါ် ညီလာခံ ခေါ်ယူရခြင်း အကြောင်းရင်းတခု ဖြစ်မယ်လို့ စဉ်းစားမိပါတယ်။

ဒီလိုနဲ့ ညီလာခံကျင်းပမဲ့သံလွင်စခန်းဆီ ကျနော်တို့ ကေအန်ယူ-နယ်မြေက ပုဂ္ဂိုလ်တွေဟာ မဲဆောက်ကနေ ကားတွေငှား၊ တချို့လည်း KNU ကားကြုံစီးပြီး လက်ဒေးနဲ့ မယ်သဝေါဘက် ပြန်လာရပါတယ်။ အဲဒီအချိန်မှာ မက်သဝေါတောင်ကို န၀တ-တပ်က သိမ်းထားလိုက်ပီဖြစ်တဲ့ အတွက် မယ်သဝေါ ကနေ လှေမစီးနိုင်တော့ဘဲ တောလမ်းအတိုင်း နောက်ထပ် တနာရီနီးပါး ထပ်မောင်းရတဲ့ ခလေတလူ ဆိုတဲ့နေရာကနေ သောင်ရင်းမြစ်ထဲ လှေစီးရပါတယ်။

အဲဒီလှေဆိပ်ရဲ့ ဒီဘက်မှာတော့ နော်တ ခံစစ်ကြောင်း၊ အဲဒီတောင်တန်းဘေးက သောင်ရင်းမြစ်အတိုင်း နာရီဝက်လောက် စုန်ဆင်းလာတော့ သစ်တောဝန်ကြီး ပဒိုအောင်ဆန်း (နောက်ပိုင်းမှာ နအဖ နဲ့ အပစ်ရပ်သွားသူ) တို့အိမ်နဲ့ အထက ကျောင်းကြီးရှိရာ ထီးတခီးဆိုတဲ့ ကရင်ရွာကြီး တရွာကို လှေပေါ်ကနေ လှမ်းမြင်ရပါတယ်။ ဆက်ဆင်းလာတော့ KNU ဌာနချုပ် မာနယ်ပုလော စခန်း ဖြစ်ပါတယ်။
မာနယ်ပလောကနေ နာရီဝက်လောက် ဆက်မောင်းတော့ သောင်းရင်းနဲ့ သံလွင်ဆုံရာ မြစ်ဆုံ (၁၉၉၄-၉၅ မှာတော့ အဲဒီမြစ်ဆုံနားမှာ ရှိတဲ့ ဘုန်းကြီးကျောင်းကနေ စ ပြဿနာတက်ပြီး DKBA ပေါ်လာခဲ့ပါတယ်။
အဲဒီမှာ မာနယ်ပလော ကျဆုံးခဲ့ရပါတယ်)

သောင်ရင်းမြစ်အတိုင်း စုန်ဆင်းလာတဲ့ စက်လှေဟာ သံလွင်ရောက်တော့ ရေဆန်ဖြစ်သွားပါတယ်။ သံလွင်ဟာ သောင်ရင်းထက် ရေစီးသန်ပေမယ့် စက်အားကောင်းတဲ့ လှေနဲ့မို့ လှေသမားအတွက် ပြဿနာ ရှိပုံမရ ပါဘူး။ သောင်းရင်းကတော့ ရေစုန်ဆင်းရတယ် ဆိုပေမယ့် ရေတိမ်လွန်းတာကြောင့် တချို့နေရာတွေမှာ သောင်တင်တာ၊ ကျောက်ဆောင်တွေ၊ သစ်ပင်တွေနဲ့ ၀င်ဆောက်မိတာမျိုးတွေ မကြာခဏ ဖြစ်လေ့ရှိပါတယ်။ သံလွင်ကတော့ သောင်ရင်းထက် ၃ ဆလောက် ကျယ်ပြီး ရေကလည်း နက်တဲ့အတွက် ကြုံရတဲ့ ပြဿနာချင်း မတူတော့ပါဘူး။

မြစ်ဆုံကနေ သံလွင်ကို ဆန်တက်တဲ့ မြစ်ကြောင်းတလျောက်မှာတော့ စီးပွားဖြစ် သစ်ထုတ်လုပ်ရေး စခန်းတွေနဲ့ ကရင်ရွာလေးတွေကို မြန်မာဘက်ကမ်းတလျောက် မြင်နေရပါတယ်။ သစ်ဆွဲနေတဲ့ ဆင်တွေ။ ခေတ်မီ သစ်ဖြတ်၊သစ်သယ် ယန္တယားတွေ၊ နံပတ်ပြားမပါတဲ့ သစ်တင်ကားတွေ၊ သေနတ်လွယ်ပြီး သွားလာနေတဲ့ ကရင်စစ်သားတွေ၊ သဲသောင်စပ်က
ဟင်းသီးဟင်းရွက် စိုက်ခင်းလေးတွေ၊ ဒေသခံ ကရင်ရွာသူရွာသား တွေကို စက်လှေပေါ်ကနေ လှမ်းမြင် နေရပါတယ်။

ထိုင်းဘက်ကမ်းကို ကြည့်လိုက်တဲ့ အခါမှာတော့ မြန်မာဘက်ကမ်းနဲ့ ပြောင်းပြန်ပါ။
သစ်ခုတ်၊ သစ်ဖြတ် နေတာကို လုံးဝ မတွေ့ရဘဲ ကျွန်းပင် သေးသေးလေးတွေကို စနစ်တကျ တန်းစီစိုက်ထားတဲ့ ကျွန်းခြံတွေကို သံလွင်မြစ်ကမ်း တလျောက်က တောင်ကုန်းတွေမှာ တွေ့နေရပါတယ်။ တနည်းအားဖြင့် ပြောမယ်ဆိုရင်တော့ သူတို့နိုင်ငံမှာ သစ်ခုတ်ခွင့် လုံးဝမရှိပါဘူး။

သစ်တော ထိမ်းသိမ်းရေးကို စနစ်တကျ ဆောင်ရွက်နေပြီ ဖြစ်ပေမယ့် မြန်မာဘက်က သစ်ကိုတော့ ရတဲ့နည်းနဲ့ ၀ယ်ယူ နေဆဲဖြစ်ပါတယ်။ သံလွင်မြစ် တခုခြားလိုက်ရုံ၊ သောင်ရင်းမြစ် တခုခြားလိုက်ရုံ၊ နယ်စပ်မျဉ်း တကြောင်း ခြားလိုက်ရုံနဲ့ သစ်တောပြုန်းတီးမှု၊ သဘာဝ ပတ်ဝန်းကျင် ပျက်စီးမှု၊ ရာသီဥတု ဖောက်ပြန်မှုတွေကို တားဆီးထားနိုင်လိမ့်မယ်လို့ ထိုင်းဘက်က တွက်ဆ ထားဆဲလားလို့ ကျနော်စဉ်းစားနေမိပါတယ်။

ဒီလို အတွေးနယ်ချဲ့ရင်းနဲ့ ငိုငေးဒီငေး တနာရီ နီးပါး ကြာတဲ့အခါမှာတော့ စော်လဲထာ ဆိုတဲ့ လှေဆိပ်နဲ့ ဈေးတန်းကြီး တခုကို ထိုင်းဘက်ကမ်းမှာ တွေ့ရပါတယ်။ အဲဒီ စော်လဲထာမှာ ဆိုက်ထားတဲ့ လှေတွေဟာ အရွယ်အစားမျိုးစုံ ရှိနေပြီး တချို့ လှေကြီးတွေ ဆိုရင် နွားကောင်ရေ ၂၀ လောက်အထိ တင်နိုင်တဲ့ အကြီးကြီးတွေ ဖြစ်ပါတယ်။ ဒီဈေးဟာ မာနယ်ပလော အပါအ၀င် သောင်းရင်းနဲ့ သ