Monday, December 28, 2015

ဆောင်းရာသီမှာ စက်ဘီးစီးခြင်း...။

(၁)- ရေခဲပြင်ထဲက ဘော်လုံးကွင်း...။
...
မနေ့ညက နှင်းတွေကျထားလုို့ ဒီမနက် ဓတ်ပုံလျောက်ရုိုက်မယ်ဆုိုပြီး အိမ်နောက်ဖက် တောတန်းထဲက ရေကန်ဆီ ထွက်လာခဲ့ပါတယ်။ ပထမ စိတ်ကူးက ဘောလုံးကွင်းအနီးရှိ ရေကန်ငယ်လေးအနီးက သစ်ပင်တွေပေါ် ကျန်နေဆဲဖြစ်တဲ့ နှင်းတွေကို ရုိုက်ဖုို့။

နွေရာသီမှာ ကလေးတွေ ဒါဇင်နဲ့ချီဆော့နေတဲ့ ဘောလုံးကွင်းထဲမှာ နှင်းတွေပြည့်နေပြီး သူရဲကောင်းတဦးတည်း ဘော်လုံးဆော့နေတာတွေ့ရပါတယ်။ ညနေပုိုင်းမှာ နှင်းတွေကိုပြန် ရှင်းပြီး ကလေးတွေဆော့နုိုင်အောင် ပြန်လုပ်ပေးမယ်ထင်ပါရဲ့။ ဒါမှမဟုတ် ဘော်လုံးကွင်း ကနေ စကီးကွင်းအဖြစ် ပြောင်းပေးလုိုက်မလား မပြောတတ်။
အဲဒီဘော်လုံးကွင်းနောက်နားရှိ နွေရာသီမှာ ရေကူးနေကြ ရေကန်ဆီရောက်တော့ ဆီးနှင်း တွေဖုံးပြီး ရေကန်က စကီးကွင်းဖြစ်နေပြီ။ ဘယ်လောက်မာသလဲဆုိုပြီး ရေထဲဆင်းရပ်ကြည့် တော့ အတော့်ကိုမာနေပြီ။ ရေခဲပြင် စကိတ်စီးလုို့ရတဲ့အနေအထားဖြစ်နေပြီ။
ဘေးနားကတောအုပ်ထဲဝင်လုိုက်တော့ ထင်းရူးပင်တွေကြားမှာ ဆီနှင်းတွေက လှလှပပ။ တယောက်ထဲဆုိုတော့ တောအုပ်ထဲဝင်ရမှာခပ်လန့်လန့်။ အအေးဓတ်ကလည်း အနှုတ် ၃ လောက်ရှိတယ်ဆုိုတော့ မတော်လုို့ကြွက်တက်ရင် တယောက်ထဲ ဂန့်သွားနုိုင်တယ် မဟုတ်ပါလား။
အဲဒီလုိုတွေးနေတုန်း ချာတိတ်တယောက် ခွေးတကောင်နဲ့အတူ တောအုပ်ထဲကနေထွက်လာ ပါတယ်။ ပြီးတော့ ကုိုယ့်အရင်လျှောက်ထားတဲ့ လူခြေရာ၊ ခွေးခြေရာတွေကိုလဲ ဆီးနှင်းပေါ် တွေ့ရတော့ နည်းနည်းအားရှိလာပါတယ်။ တောလမ်းထဲမှာ လူတွေ တွေ့နုိုင်ကောင်းရဲ့ပေါ့။
...
(၂)- ဆောင်းရာသီမှာ စက်ဘီးစီးခြင်း...။
...
ဒီလုိုနဲ့ နှစ်ကီလုိုနီးပါးဝေးတဲ့ နွေရာသီတုန်းက လမ်းလျောက်ခဲ့ဖူးတဲ့ သောက်ရေကန်ဆီ တကိုယ်တော်ဆက်လျောက်ခဲ့ပါတယ်။ ဆီးနှင်းတွေကြားမှာ ခြေရာတွေတွေ့ပေမဲ့ လူ တော့တဦးမှ မတွေ့မိ။ အအေးဓာတ်ကလည်းအတော်များတဲ့အတွက် ကြွက်တက်ရင် တော့ တယောက်တည်း ဒုက္ခပဲဆုိုပြီးတွေးနေတုန်း တောတုိုးသံတချက်ကြားလုိုက်ရပါတယ်။
ဝက်ဝံထွက်လာရင်တော့ ဒုက္ခပဲဆုိုပြီး လှည့်ကြည့်လုိုက်တော့ လား၊ လား။ သူရဲကောင်း စက်ဘီးသမား ၃ ဦး ဆောင်းတွင်းစက်ဘီးကြီးစီးလုို့ ရုတ်တရက်ထွက်လာပါတယ်။ မြင်တဲ့ အတုိုင်း ဧရာမတာရာကြီးနဲ့။ လမ်းတောင်မနည်းလျှောက်နေရတဲ့ ရေခဲတောင်စောင်းမှာ သူတုို့မုို့ မကြောက်မလန့် စီးရဲတယ်။
ဝတ်စုံကိုလည်းကြည့်လုိုက်ဦး။ စက်ဘီးဆုိုတာ နွေရာသီအားကစားလုို့ မြန်မာနုိုင်ငံမှာ နည်းလည်ထားပေမဲ့ ဒီကပုဂ္ဂိုလ်တွေကတော့ ဆောင်းမှာလည်းစက်ဘီးစီးနုိုင်ဖုို့ အထူး ၀တ်စုံတွေ၊ အထူးစက်ဘီးတွေ ထွင်ထားလေရဲ့။ ၀တ်စုံကတော့ ပရုိုဖက်ရှင်နယ် စက်ဘီး သမားတွေဝတ်တဲ့အတုိုင်းပါပဲ။ နွေဝတ်စုံနေရာမှာ ဆောင်းဝတ်စုံနဲ့အစားထုိုးပေါ့။
နွေဝတ်စုံတောင် ဒေါ်လာ ၁၀၀၀ လောက်ရှိတော့ ဆောင်းဝတ်စုံဆုို ၁၅၀၀ ထက် ဘယ်နည်း ပါ့မလဲ။ ဒါပေမဲ့ ရေခဲပြင်စကီးစီးမယ်ဆုိုရင်လည်း ၀တ်စုံဖုိုးက ဒီထက်မနည်းပါ။ ၀တ်စုံက သိပ်မထူးပေမဲ့ စက်ဘီးကတော့ ဆောင်းရာသီအထူးဘီးပါ။ တာယာက ဆုိုင်ကယ်တာယာ လောက်ကြီးပါတယ်။ တချို့ဘီးတွေဆုို သံဆူးတွေပါ တပ်ထားပါတယ်။ ဈေးကတော့ ပရုိုဖက် ရှင်နယ်စက်ဘီးသမားတွေရဲ့ တာဝေးဘီးတွေလုို ဒေါ်လာ ၂၀၀၀ ကနေ ၃၀၀၀ ကြားရှိနုိုင် ပါတယ်။

ဒီလုိုစက်ဘီးလည်းမ၀ယ်နုိုင်၊ ဆောင်းရာသီဝတ်စုံလည်းမ၀ယ်နုိုင်လုို့ နွေရာသီမှာစီးနေကြ စက်ဘီးစုတ်လေးကို ဂုိုထောင်ထဲထည့်သိမ်းပြီး လမ်းလျောက်လေ့ကျင့်ခန်းလောက်သာ လုပ်နုိုင်တဲ့ ကျနော့်က သူတို့ပုံတွေကို အမိအရ ရုိုက်ကူးပြီး မ်ိတ်ဆွေတွေဆီ မျှဝေပေး လုိုက်ပါတယ်။
..........

(၃) လမ်းပေါ်ပွဲတွေ လာတော့မယ်...။
...
ဆောင်းရာသီမှာ စက်ဘီးပွဲမရှိလုို့ ခပ်ပျင်းပျင်းရှိနေပေမဲ့ ရှေ့သတင်း ၂ ပတ်မှာ ကမ္ဘာကျော်ပွဲ တွေပြန်စတော့မှာပါ။ 
ဇန်နာဝါရီ ၁၇ ကနေ ၂၄ အထိ သြစတေလျနုိုင်ငံ Adelaide မှာကျင်းပမဲ့ Tour Down Under သတင်းတပတ်ကြာပွဲအတွင်း သြစတေလျက နာမည်ကြီးစက်ဘီးသမားတွေ အပြင် ကမ္ဘာ့နာမည်ကြီးအသင်းအားလုံးက ၀င်ပြိုင်ကြမှာဖြစ်ပါတယ်။
ပရိသတ်သိတဲ့ အမည်တချို့ကိုကောက်နှုတ်ဖေါ်ပြရမယ်ဆုိုရင် Simon Gerrans က Orica GreenEdge အသင်းကို ဦးဆောင်မှာဖြစ်ပါတယ်။ နောက် နာမည်ကြီး Richie Porte က sky အသင်းကို ဦးဆောင်မှာဖြစ်ပါ တယ်။
တချိန်တည်းစတင်မဲ့ (ဇန်နာဝါရီ ၁၈ မှ ၂၄ အထိ) အာဂျင်တီးနားမှာကျင်းပမဲ့ Tour de San Luis ပွဲ ဖက်လှည့်ရမယ်ဆုိုရင် လက်ရှိ ကမ္ဘာ့ချန်ပီယံ ပီတာဆာဂင် Peter Sagan (Tinkoff)၊ ကုိုလံဘီယာမှ နည်မည်ကြီး ကင်တားနား Nairo Quintana (Movistar)၊ အီတလီမှ ဆရာကြီး နီဘာလီ Vincenzo Nibali (Astana) တုို့ ပါဝင်ကြမှာဖြစ်ပါတယ်။
လာမဲ့သတင်း ၂ ပတ်အတွင်း ပရုိုဖက်ရှင်နယ် စက်ဘီးသမားတွေရဲ့ လမ်းပေါ်ပွဲတွေကို ရှုစား ရတော့မှာဖြစ်ပါကြောင်း နှစ်သစ်ကူး သတင်းကောင်းပါး လုိုက်ရပါတယ်။ ။

Thursday, December 24, 2015

ရွေးကောက်ပွဲအလွန် စိမ်ခေါ်မှုများ

The Voice Daily, 30-12-2015.

စေစပ်ဆွေးနွေးတဲ့နည်းနဲ့ ထွက်ပေါက်ရှာပါ
ရွေးကောက်ပွဲအလွန်ကာလ ဒီမုိုကရေစီနှင့် ငြိမ်းချမ်းရေးအလားအလာ “Democratisation and Peace in the Post-Election Period’’ လုို့ အမည်ပေးထားတဲ့ ဆွေးနွေးပွဲတခု ဒီဇင်ဘာလ ၁၅ ရက်နေ့က နော်ဝေးနုိုင်ငံ အော်စ လုိုမြို့မှာကျင်းပခဲ့ပါတယ်။ နော်ဝေး-မြန်မာကော်မီတီ NBC ကဦးစီးပြီး စာပေဗိမန် Litteraturhuset မှာကျင်းပတဲ့ ဒီပွဲမှာ အဓိကဆွေးနွေးသူတွေကတော့ ၈၈ အဖွဲ့မှ ဦးကိုကုိုကြီး၊ ကရင့်အမျိုး သားအစည်းအရုံး KNU မှ နော်စီပုိုး ရာစိန် (Zipporah Sein) နဲ့ Sandhi Institute မှ ဦးခုိုင်ဝင်း တုို့ဖြစ်ပါတယ်။ 



နုိုဝင်ဘာ ရက်နေ့ ရွေးကောက်ပွဲမှာ NLD ပါတီက အပြတ်အသတ်အနုိုင်ရသွားတာဟာ စစ်အုပ်ချုပ်ရေး၊ စစ်တ ပုိုင်းအုပ်ချုပ်ရေးကို လူတွေကစိတ်ကုန်နေပြီ၊ စစ်တပ်လွှမ်းမုိုးမှုအပေါ် “Enough is enough” ဖြစ်သွားပြီဆုိုတဲ့ သင်္ကေတဖြစ်တယ်လို့ ကုိုကုိုကြီးကပြောပါတယ်။ ပြည်ထောင်စုလွှတ်တော်မှာ အမတ်နေရာ ၃၇၈ အထိရသွားတဲ့ NLD ပါတီက အစုိုးရဖွဲ့ခွင့်ရသွားတဲ့အကြောင်း၊ ဒါဟာ အရပ်သားနဲ့ ယူနီဖောင်းဝတ်တွေအကြား တရားဝင်မှု အားပြိုင်ပွဲဖြစ်ပြီး ဒီရလာဒ်အပေါ် စစ်ဖက်ကရုိုးသားစွာ အသိအမှတ်ပြုဖုို့လုိုကြောင်း ထောက်ပြပါတယ်။

လောလောဆယ်မှာတော့ စေ့စပ်ဆွေးနွေးတဲ့နည်းနဲ့ ပြုပြင်ပြောင်းလဲရေးလုပ်ဖုို့ တဖက်ကကြိုးစားနေသလုို အခြား တဖက်ကလည်း စေ့စပ်ဆွေးနွေးတဲ့နည်းနဲ့ ထွက်ပေါက်ရှာဖုို့ကြိုးစားနေပုံရကြောင်း၊ ရွေးကောက်ခံ NLD အစိုးရကို အာဏာလွှဲပေးဖုို့ စစ်အုပ်စုဖက်က ပြင်ဆင်နေပေမဲ့ ၂၀၁၆ မတ်လမှာ NLD က အုပ်ချုပ် ရေးအာာဏာကုို ချောမွေ့ စွာကုိုင်တွယ်ခွင့်ရဖုို့ဆုိုရင် ဒီနှစ်ဖွဲ့အကြား အပြန်အလှန်ညှိနှိုင်းမှုရှိဖုို့လုိုနေဆဲလုို့ ကုိုကုိုကြီးက ပြောပါတယ်။

အဓိကညှိနှိုင်းဖုို့လုိုနေတဲ့အချက်တွေကတော့ ဒီမုိုကရေစီဖေါ်ဆောင်ရေး၊ ၂၀၀၈ ဖွဲ့စည်းပုံအခြေခံဥပဒေ ပြင်ဆင် ရေး၊ ပြည်တွင်းစစ်ရပ်စဲရေးနှင့် လူမျိုးရေး၊ ဘာသာရေးပဋိပက္ခပြေလည်စေရေး၊ နုိုင်ငံရေးအခြေခံ စီးပွါးရေးကိစ္စတွေ ဖြစ်တဲ့ မြစ်ဆုံဒဏ်၊ မြေသိမ်းပုိုက်မှုနဲ့ မူးယစ်ဆေးကိစ္စ၊ ပထ၀ီ နုိုင်ငံရေးကိစ္စတွေဖြစ်တယ်လို့ သူကထောက်ပြပါတယ်။



ဒါပေမဲ့ စစ်တပ်ဟာ ၂၀၀၈ ဖွဲ့စည်းပုံကို အသုံးချခြင်းနှင့် ဥပဒေပြင်ပကနေ တုိုင်းရင်းသားတွေအပေါ် ထုိုးစစ်ဆင်ခြင်း၊ သုို့မဟုတ် ဘာသာရေး၊ လူမျိုးရေး ပဋိပက္ခဖန်တီးခြင်း၊ ဗျုရုိုကရေစီယန္တယားကိုထိမ်းချုပ်ခြင်းတွေ လုပ်ကောင်းလုပ် နုိုင်တဲ့အတွက် ဒါမျိုးမဖြစ်အောင် ဆွေးနွေးအဖြေရှာဖို့လုိုတယ်လုို့ သူက တုိုက်တွန်းပါတယ်။

NLD ဖက်ကိုကြည့်မယ်ဆုိုရင်တော့ လူထုလှုပ်ရှားမှုပါတီကနေ အာဏာရပါတီအဖြစ် အသွင်ပြောင်းရဖုို့ရှိ်နေ ကြောင်း၊ ဒါကြောင့် တချိန်က သူနဲ့တဖက်တည်း ရပ်တည်အားပေးခဲ့တဲ့ အရပ်ဖက်အဖွဲ့အစည်းနဲ့ မီဒီယာတွေကို လွတ်လပ်ပြီး အားကောင်းလာအောင်လုပ်ပေးမလား၊ အသွင်မတူတော့တဲ့ ဒီအဖွဲ့တွေကြား ဆက်ဆံမှုပုံစက ဘယ်လုိုဖြစ်လာလမလဲဆုိုတာဟာ စိတ်ဝင်စားဖွယ်ဖြစ်လာမယ်လုို့ ဆုိုပါတယ်။

ရေရှည်လုပ်ငန်းစဉ်တွေထဲမှာတော့ လူမျိုးစုအရေးနဲ့ပတ်သက်ပြီး လက်ရှိသွားနေတဲ့ NCA ငြိမ်းချမ်းရေးကိစ္စကုို အသေအချာကုိုင်တွယ်ဖုို့လုိုနေကြောင်း၊ ပြီးတော့ တရားဥပဒေစုိုးမုိုးရေး၊ အားလုံးကို စီးပွါးရေးတန်းတူခွင့်ပေးရေး (ခရိုနီတွေအပေါ် သဘောထား) တွေကို ဆောင်ရွက်ဖုို့လုိုနေတယ်လုို့ ကိုကုိုကြီးကပြောပါတယ်။

ဒီအတွက် သူရဲ့အကြံပြုချက်ကတော့ အများပြည်သူတွေပါဝင်ခွင့်ရတဲ့ ဆွေးနွေးငြင်းခုန်မှုတွေ များများလုပ်ပေးဖုို့၊ နုိုင်ငံတကာဖက်ကလည်း အစုိုးရအဖွဲ့အစည်းအရည်ချင်းပြည့်လာအောင်ကူတဲ့အပြင် လူမှုအဖွဲ့အစည်းတွေ အရည် အချင်းပြည့်လာအောင်ပါ ကူဖုို့လုိုကြောင်း၊ လူသားချင်းစာနာတဲ့ အကူအညီအပြင် ကျမ်းမာရေး၊ ပညာရေးနဲ့ သယ်ယူ ပို့ဆောင်ရေး (PublicTransport System) အတွက် ဖွံ့ဖြိုးမှုအကူအညီတွေကုိုပါပေးဖုို့လုိုတယ်လုို့ ကုိုကုိုကြီးက တုိုက်တွန်းသွားပါတယ်။ 

ငြိမ်းချမ်းရေးအတွက် အားလုံးပါဝင်ခွင့်ရှိရမယ်

ဒုတိယ ဆွေးနွေးသူ တုိုင်းရင်းသားလက်နက်ကုိုင်တော်လှန်ရေးအဖွဲ့များ (EAO) ရဲ့ခေါင်းဆောင်၊ KNU အဖွဲ့ရဲ့ ဒုဥက္ကဌ နော်စီဖုိုးရာစိန်ကတော့ NCA တနုိုင်ငံလုံး အပစ်ရပ်စာချုပ်ကိစ္စကို အားလုံးပါဝင်ခွင့်ရအောင် အချိန်ယူ ပြင်ဆင်သင့်ကြောင်း အလေးပေးပြောကြားခဲ့ပါတယ်။ ဒါပေမဲ့ တုိုက်ဆုိုင်မှုဖြစ်ချင်တော့ သူက အဲဒီလုို ပြောနေချိန် မှာ နေပြည်တော်မှာတော့ လက်မှတ်ထုိုးလုိုက်တဲ့ အဖွဲ့ ဖွဲ့ကနေ ‘’နိုင်ငံရေးဆွေးနွေးမှုဆုိုင်ရာ မူဘောင်သဘော တူညီချက်ကုိုအချောသတ်ပြီး သမ္မတဆီအပ်နှံပွဲ အခမ်းအနား ကျင်းပတဲ့ အချိန်ဖြစ်နေပါတယ်။


ပြီးတော့ ဇန်နာဝါရီလ ၁၅ ရက်မတုိုင်ခင် နုိုင်ငံရေးဆွေးနွေးမှုတွေ စတင်မယ်။ ဒါဟာ NCA သဘောတူညီချက်ထဲမှာ ပါတဲ့အတုိုင်း ရက် ၆၀ အတွင်း နုိုင်ငံရေးမူဘောင် အပြီးသတ်ရေးဆွဲပြီး ရက် ၉၀ အတွင်း နုိုင်ငံရေးဆွေးနွေးမှုစရ မယ်ဆုိုတဲ့ မူအရ လုပ်တာဖြစ်တယ်လုို့ ဖွဲ့ပါပုဂ္ဂိုလ်တွေနဲ့ မြန်မာငြိမ်းချမ်းရေးစင်တာ MPC တာဝန်ရှိသူတွေက ပြောပါတယ်။

ဒါပေမဲ့ NCA ဆွေးနွေးပွဲတွေမှာ ထဲထဲဝင်ဝင်ပါခဲ့ပြီး လက်မှတ်ရေးထုိုးတဲ့အဖွဲ့ ဖွဲ့ထဲက အဓိကအဖွဲ့တခုဖြစ်တဲ့ KNU ဒုဥက္ကဌကတော့ သတ်မှတ်ချိန်အတုိုင်း ဆက်သွားရေးဆုိုတဲ့ လုပ်ငန်းစဉ်ထက် အားလုံးပါဝင် လက်မှတ်ထုိုး ရေးဆုိုတဲ့ အနှစ်သာရက ပုိုအရေးကြီးတယ်၊ အသွင်သဏ္ဍန်ထက် အနှစ်သာရကို ဦးစားပေးဖုို့လုိုတယ် လုို့ပြောပါ တယ်။

လက်မှတ်မထုိုးရသေးတဲ့ အဖွဲ့တွေကို မစောင့်ပဲ၊ အသစ်တက်လာမဲ့ NLD အစိုးရကို မစောင့်ပဲ လက်ရှိဦးသိန်းစိန် အစိုးရသက်တန်းအတွင်း တက်သုတ်ရုိုက်ဆောင်ရွက်သွားမယ်ဆုိုရင် ပန်းတုိုင်ဆီမရောက်ပဲ ရှုတ်ထွေးမှုတွေ ကိုသာ ပုိုဖြစ်လာစေမှာဖြစ်တယ်လုို့ သတိပေးပြောဆုိုခဲ့ပါတယ်။

တချိန်တည်းမှာပဲ ဒီငြိမ်းချမ်းရေးလုပ်ငန်းစဉ်အတွက် အဓိကအကူအညီပေးနေတဲ့ နော်ဝေးအပါဝင် နုိုင်ငံတကာ အလှူရှင်တွေကိုလည်း သူကဝေဖန်ခဲ့ပါတယ်။ ငြိမ်းချမ်းရေးအတွက်အကူအညီပေးတာကို မူအရ ကန့်ကွက်စရာ မရှိပေမဲ့ နုိုင်ငံတကာအလှူရှင်တွေဟာ တကယ့်ကွင်းထဲကအခြေအနေမှန်တွေကို အချိန်ယူ လေ့လာနားထောင် မှုလုပ်ဖုို့ ပျက်ကွက်ခဲ့တယ်လို့ထောက်ပြပါတယ်။

အပစ်ရပ်လက်မှတ်ထုိုးပြီးတဲ့နောက် ချက်ချင်းဝင်လာမဲ့ များပြားကြီးမားလှတဲ့ နုိုင်ငံတကာရင်းနှီးမြှုပ်နှံမှုတွေအတွက် EAO ဖက်က အဆင်သင့်မဖြစ်သေးတဲ့အကြောင်း၊ နောက်တခါ နုိုင်ငံတကာအဖွဲ့အစည်းတွေဟာ EAO နဲ့ ဒေသခံ တုိုင်းရင်းသားတွေဖက်က ဘာတွေလုိုအပ်နေသလဲ၊ ဘာတွေဆောင်ရွက်ချင်သလဲဆုိုတာကို မေးမြန်းခြင်းမရှိပဲ လှူရှင်နုိုင်ငံတွေဖက်က ဘာတွေလုပ်ချင်သလဲဆုိုတာကိုသာ လက်ခံဖုို့ လာရောက်ပြောဆုိုတာမျိုး၊ သူတို့လုပ်ငန်း စဉ်တွေကို တုိုင်းရင်းသားနယ်မှာ အကောင်အထည်ဖေါ်ဖုို့ ၀င်လာတာမျိုးတွေသာဖြစ်နေတယ်လုို့ ထောက်ပြပါ တယ်။ 

အပစ်ရပ်လက်မှတ်ထုိုးတယ်ဆုိုတာဟာ နုိုင်ငံတကာအကူအညီ၊ နုိုင်ငံတကာရင်းနှီးမြှုပ်နှံမှု ၀င်လာစေရေးအတွက် လက်မှတ်ထုိုးတာမျိုးမဖြစ်သင့်ပဲ ရေရှည်နုိုင်ငံရေးပြသာနာ ပြေလည်စေရေးအတွက်ဖြစ်သင့်တယ်လုို့ သူက ပြော ပါတယ်။ 

ဒါကြောင့် လက်ရှိအလျင်စလုိုသွားနေတဲ့ NCA လုပ်ငန်းစဉ်ကုို ဆုိုင်းငံ့ထားဖုို့၊ လက်မှတ်မထုိုးရသေးတဲ့၊ အထူး သဖြင့် ရှမ်းပြည်နဲ့ကချင်ပြည်ဖက်မှာဖြစ်ပွါးနေတဲ့ ထုိုးစစ်တွေကုို ချက်ချင်းရပ်တန့်ပေးဖုို့၊ အသစ်တက်လာမဲ့ အစိုးရ သစ်နဲ့ လက်တွဲဆောင်ရွက်ဖုို့၊ NLD နဲ့ EAO ကလုိုလားနေတဲ့အတုိုင်း ၂၀၀၈ ဖွဲစည်းပုံကုို ပြန်လည်ပြင်ဆင် ရေးလုပ်ဖုို့၊ ဖက်ဒရယ်ပြည်ထောင်စုကုိုဦးတည်ရေးနဲ့ လောလောဆယ်မှာ ဒေသဆုိုင်ရာအုပ်ချုပ်ရေးအဖွဲ့တွေကို အာဏာတုိုးပေးဖုို့ စသဖြင့် နော်စီဖုိုးရာစိန်က အကြံပြုသွားခဲ့ပါတယ်။

လက်ဖက်ရည်ဆုိုင်မှာ အချိန်ဖြုန်းမနေသင့်ပါ

နောက်ဆုံးဆွေးနွေးသူ Sandhi Governance Institute မှ ဦးခုိုင်ဝင်းကတော့ လက်ရှိအပြောင်းအလဲ အပေါ် သာမန် နုိုင်ငံသားတွေရဲ့အမြင်ကုိုတင်ပြပါတယ်။လဖက်ရည်ဆုိုင်တွေအားလုံး မကြာခင် ပိတ်ရတော့မယ်ဗျလုို့ တက္က စီ ဆရာတဦးက သူကုိုပြောတော့ သူအံသြသွားကြောင်း၊ ဘာကြောင့်လဲဆုိုပြီးမေးကြည့်တော့ဒေါ်စု အစိုးရ တက်လာရင် ကျနော်တုို့အားလုံး အလုပ်တွေအများကြီးလုပ်ရတော့မယ်လေ၊ အခုလုို အချိန်ဖြုန်းနေလုို့မဖြစ် တော့ဘူးဆုိုပြီး တက္ကစီဆရာကပြောတယ်လို့ဆုိုပါတယ်။ ဒါဟာ သာမန်နုိုင်ငံသားများစွာထဲက တဦးရဲ့အမြင်ပါ။



ဒီလုို လူတုိုင်းအတွက် အလုပ်အကိုင်အသစ်တွေ ဖန်တီးပေးနုိုင်ဖုို့၊ သာမန်ပြည်သူတွေရဲ့ဘ၀ တုိုးတက်လာစေဖုို့ဆုို ရင် အမျိုးသား (လူမျိုး၊ ဓလေ့၊ ယဉ်ကျေးမှု) တည်ဆောက်ရေးနဲ့ နုိုင်ငံရေးတည်ဆောက်ရေး (Nation-building and State-building) ခုစလုံးကို တပြိုင်တည်းဆောင်ရွက်ဖုို့လုိုတယ်လုို့ ဦးခုိုင်ဝင်းက ပြောပါတယ်။ ဒီလုို တည် ဆောက်ရေးလုပ်နုိုင်ဖုို့အတွက် ပထမ လုိုအပ်တာကတော့ ငြိမ်းချမ်းရေးနဲ့ ဒုတိယက နုိုင်ငံသားတွေအတွက် Welfare လူမှုဖူလုံရေးအဆင်ပြေအောင် ဆောင်ရွက်ပေးရေးဖြစ်တယ်လုို့ သူက ထောက်ပြပါတယ်။

ဒီအတွက် အစိုးရသစ်လက်ထက်မှာ ငြိမ်းချမ်းရေးကို ဦးစားပေးလုပ်ဖုို့လုိုနေကြောင်း၊ ရွေးကောက်ခံတရားဝင်မှုဟာ တုိုင်းရင်းသားပဋိပက္ခ၊ ငြိမ်းချမ်းရေးကိစ္စတွေမှာ များစွာအထောက်အကူဖြစ်နုိုင်ကြောင်း သူကပြောပါတယ်။ NLD အစိုးရသစ်အတွက် အဓိကစိမ်ခေါ်မှုဟာ အရပ်ဖက်-စစ်ဖက်ဆက်ဆံရေးကို ဟန်ချက်ညီအောင်လုပ်ပေးရေးဖြစ် ကြောင်း၊ အဲဒီထဲမှာ စစ်ဖက်က ထိမ်းချုပ်ထားတဲ့ ပြည်သူ့ဝန်ဆောင်မှုလုပ်ငန်း (ပြည်ထဲရေးနဲ့ ထွေ-အုပ် ဌာန) တွေနဲ့ စစ်ဖက်ကချုပ်ကုိုင်ထားတဲ့ နုိုင်ငံပုိုင်စီးပွါးရေး (ဦပုိုင်ကုပ္ဗဏီအပါဝင်) တွေဟာ စိမ်ခေါ်မှုဖြစ်တွေဖြစ်တယ်လုို့ ဦးခုိုင်ဝင်းကပြောပါတယ်။

စီးပွါးရေးကဏ္ဍကိုပြောတဲ့အခါမှာတော့ အသေးစားစီးပွါးရေးလုပ်ငန်းတွေကို တည်ငြိမ်အောင်ဆက်ထိမ်းထားဖုို့၊ အခြားစီးပွါးရေးလုပ်ငန်းကြီးတွေ ဖွံ့ဖြိုးလာအောင်လုပ်ဖုို့၊ သဘာဝအရင်းအမြစ်ခွဲဝေရေးနဲ့ ရင်းနှီးမြ့ပ်နှံမှုစာချုပ်ကုို ပြန်ရေးဖုို့၊ ဈေးကွက်စီးပွါးရေးဆုိုင်ရာမူဝါဒတွေကုိုပြန်လည်ပြုပြင်ဖုို့ကိစ္စတွေပါဝင် ပါတယ်။ 

သံယံဇာတခွဲဝေမှုအတွင်း ပါဝင်နေတဲ့လက်နက်ကုိုင်အဖွဲ့တွေထဲမှာ မြန်မာစစ်တပ်အပြင် တုိုင်းရင်းသားအဖွဲ့တွေ လည်းပါဝင်နေကြောင်း မကြာသေးခင်ကထွက်လာတဲ့ ကျောက်စိမ်းအစီရင်ခံစာကုို ကုိုးကားပြီး သူကထောက်ပြ ပါတယ်။ ဒီအတွက် အဲဒီလက်နက်ကုိုင်တွေ ကျေလည်အောင်ဆွေးနွေးအဖြေရှာရေးဟာလည်း NLD အတွက် နုိုင်ငံရေး-စီးပွါးရေး စိမ်ခေါ်ချက်တခုဖြစ်တယ်လုို့ သူကပြောပါတယ်။

အနှစ်ပြန်ချုပ်ရင်တော့ NLD ကိုထောက်ခံမဲပေးထားတဲ့ပြည်သူတွေဟာ အစိုးရသစ်နဲ့ပူးပေါင်းဆောင်ရွက်ဖုို့ အဆင် သင့်ဖြစ်နေကြောင်း၊ အလားတူ အရပ်ဖက်အဖွဲ့အစည်းတွေကလည်း အစိုးရသစ်ရဲ့ ပေါ်လစီတွေအပေါ် ဝေဖန်ခွင့်၊ ပြန်လည်တင်ပြခွင့် Feedbak ပေးခွင့်ရဖုို့ မျှော်လင့်နေကြောင်း၊ ပွင့်လင်းမြင်သာမှု၊ တာဝန်ခံမှု၊ တာဝန်ယူမှုတွေ ရှိတဲ့ အစိုးရသစ်ကနေတဆင့် လက်ရှိ စစ်ဖက်လွမ်းမုိုးဆဲ အုပ်ချုပ်ရေးအခြေနေတွေကို တဖြေးဖြေးပြောင်းလဲ သွားနုိုင်လိမ့်မယ်လို့ မျှော်လင့်မိကြောင်း၊ နုိုင်ငံတကာဖက်ကလည်း ရွေးကောက်ခံအစိုးရသစ်ကုို အပြည့်အ၀ ထောက်ခံမယ် လုို့ ယုံကြည်ကြောင်း ဦးခုိုင်ဝင်းကပြောပါတယ်။


ဆွေးနွေးပွဲအပြီး မေးခွန်းမေးတဲ့အလှည့်မှာတော့ NCA ငြိမ်းချမ်းရေး ရှေ့အလားအလာ၊ ဒေါ်အောင်ဆန်းစုကြည်ရဲ့ အစိုးရသစ်စွမ်းဆောင်ရည်နဲ့ စစ်ဖက်-အရပ်ဖက်ဆက်ဆံရေး ရှေ့အလားအလာတွေကို အတော်မေးကြပါတယ်။ ဖြေ ဆိုသူတွေဖက်ကတော့ အစိုးရသစ်လက်ထဲ အာဏာရောက်ဖုို့က နောက်ထပ် လနီးပါးလုိုသေးတဲ့အတွက် အသွင် ကူးပြောင်းရေးကာလ ချောမွေဖုို့လုိုကြောင်း၊ ပြီးရင် အစိုးရသစ်ကို လုပ်ပုိုင်ခွင့်ပေးဖုို့လုိုကြောင်း၊ အဲဒီလုိုပေးပြီး ကာလတခုရောက်မှ ဝေဖန်ထောက်ပြသင့်ပါကြောင်း ပြောကြားသွားခဲ့ပါတယ်။          

Wednesday, December 9, 2015

အမျိုးစောင့်ဥပဒေတွေကုို လွတ်တော်အသစ်က ဘာဆက်လုပ်မလဲ

အော်စလုိုမြို့က ဆွေးနွေးပွဲ

ဗုဒ္ဒဘာသာကုို ဥပဒေဖြင့်ကာကွယ်ခြင်း သုို့မဟုတ် မြန်မာနုိုင်ငံမှ အမျိုးဘာသာ ကာကွယ်ရေး ဥပဒေပြဌဏ်ခြင်း  Protecting Buddhism through Law: Myanmar’s legislation to "protect race and religion" လုို့ အမည်ပေးထားတဲ့ ဆွေးနွေးပွဲတခု ဒီဇင်ဘာလ ရက်နေ့က နော်ဝေးနုိုင်ငံ အော်စလုိုမြို့မှာ ကျင်းပခဲ့ပါတယ်။ ဒါဟာ နုိုဝင်ဘာ ရွေးကောက်ပွဲအပြီး ပထမ ဆုံးအကြိမ်ကျင်းပတဲ့ မြန်မာ့အရေးဆွေးနွေးပွဲဖြစ်ပြီး လာမဲ့ ၁၅ ရက်နေ့ မှာလည်း နောက်ထပ်ဆွေးနွေးပွဲတခု လုပ်ဖုို့ရှိနေပါတယ်။

Norwegian Centre for Human Rights အဖွဲ့က ဦးစီးကျင်းပတဲ့ ဒီပွဲမှာ အဓိကဆွေးနွေးသူတွေကတော့ PRIO အဖွဲ့မှ Dr. Iselin Frydenlund နဲ့ အင်္ဂလန်နုိုင်ငံ Oxford တက္ကသုိုလ်မှ Dr. Khin Mar Mar Kyi တုို့ဖြစ်ပါတယ်။ ဦးသိန်းစိန်အစိုးရရဲ့ နောက်ဆုံးနေ့တွေမှာ ပြဌဏ်းလုိုက်တဲ့ အမျိုးစောင့် ဥပဒေ မျိုးအကြောင်းကို ဒေါက်တာ Frydenlund က ခွဲခြမ်းစိပ်ဖျာ ပြပါတယ်။

ပြီးတော့ ရွေးကောက်ပွဲအလွန် မြန်မာ့ဒီမုိုကရေစီအသွင်ကူးပြောင်းမှု လုပ်ငန်းစဉ်ဟာ လူမျိုးရေး၊ ဘာသာရေး (Ethno-religious) ပဋိပက္ခနဲ့ ဘာသာရေးကို နုိုင်ငံရေးအတွက်အသုံးချမှု တုိုးပွားနေခြင်း စိမ်ခေါ်မှုတွေကို ရင် ဆုိုင်ဖြတ်သန်းနေရတာဖြစ်တယ်လုို့ ပြောပါတယ်။ 

ကုိုးကွယ်ရာဘာသာကူးပြောင်းခြင်း၊ လက်ထပ်ထိမ်းမြားခြင်း၊ တလင်တမယားစနစ် ကျင့်သုံးခြင်းနဲ့ လူဦးရေတုိုးပွါး နှုန်းထိမ်းညှိခြင်းဆုိုင်ရာ ဥပဒေ ခုစလုံးဟာ နုိုင်ငံတကာ စံချိန်စံညွှန်းတွေနဲ့ မကုိုက်ညီကြောင်း။ အထူးသဖြင့် အမျုိုးသမီးများအပေါ်ခွဲခြားဆက်ဆံမှု ကာကွယ်ရေး (CEDAW) လူမျိုးရေး၊ ဘာသာရေးအပေါ် ခွဲခြားဆက်ဆံမှု ကာကွယ်ရေး (ICCPR) မူတွေတုို့နဲ့ မကုိုက်ညီဘူးလုို့ သူကထောက်ပြခဲ့ပါတယ်။

ဒါကြောင့် အခု အသစ်တက်လာမဲ့ ဒေါ်အောင်ဆန်းစုကြည်ရဲ့ NLD ပါတီ အစိုးရသစ်လက်ထက်မှာ ဒီအမျိုးစောင့် ဥပဒေ မျုိုးကို ဆက်ပြီးလက်ခံထားမှာလား။ ပယ်ဖျက်ပစ်မှာလားဆုိုတာကို မကြာခင် ဆုံးဖြတ်ချက် ပေးရတော့ မှာဖြစ်တယ်လုို့ Frydenlund က ပြောကြားသွားခဲ့ပါတယ်။

လင်မယားကိစ္စမှာ ဘာသာရေးနဲ့ နုိုင်ငံတော် ပါဖုို့မလုိုပါ

ဒုတိယ ဆွေးနွေးသူ ဒေါက်တာ ခင်မာမာကြည်ကတော့ နုိုဝင်ဘာရွေးကောက်ပွဲမှာ NLD ပါတီက အပြတ်အသတ် အနုိုင်ရသွားလုို့ အပြောင်းအလဲတွေဖြစ်လာတော့မယ်ဆုိုပြီး အားလုံးက မျှော်လင့်နေပေမဲ့ ရှမ်းပြည်မှာ တုိုက်ပွဲတွေ ဖြစ်နေဆဲ၊ အမျိုးသမီးနဲ့ကလေးငယ်အများစုပါတဲ့ ဒုက္ခသည်တွေထွက် ပြေးနေရဆဲ၊ မကြာသေးခင်ကပဲ အဲဒီ ဒေသကနေ သူပြန်လာတယ်။ အခြေနေဆုိုးတွေကို သူကုိုယ်တုိုင်မြင်ခဲ့ရတယ်လုို့ ပြောပါတယ်။


တုိုင်းရင်းသားအရေးနဲ့ပတ်သက်ပြီး ပြောင်းလဲမှုမရှိသေးသလုို အမျိုးသားရေးအစွန်းရောက်တွေ၊ ဘာသာရေး စွန်းရောက်တွေရဲ့ အမြင်တွေကလည်း မပြောင်းသေးတဲ့အကြောင်း၊ အမျိုးစောင့်ဥပဒေဆုိုတာ တကယ်တော့ မြန်မာ့ ယဉ်ကျေးမှုမှာ မလုိုအပ်ပါဘူးလုို့ သူကဆုိုပါတယ်။ 

‘’ပုဆုိုးတန်းတင် အကြင်လင်မယား’’ ဆုိုပြီး လူသိများတဲ့ မြန်မာ့အစဉ်အလာထိမ်းမြားမှုကိစ္စမှာ ရုံးတော်တက်လက် မှတ်ထုိုးတာတွေ၊ ဘာသာရေးအရ ဘုရားကျောင်းတက် သစ္စာဆုိုတာတွေ အစဉ်အလာ မရှိဘူး။ တနည်းအားဖြင့် မြန်မာတွေ မင်္ဂလာဆောင်တဲ့ကိစ္စမှာ ဘုန်းတော်ကြီးတွေ၊ နုိုင်ငံရေးသမားတွေ ပါဝင်ပတ်သက်စရာ အကြောင်း မရှိ ဘူးလုို့ပြောပါတယ်။

နှစ်ပေါင်းရာနဲ့ချီပြီး ဒီလုိုအစဉ်အလာနဲ့သွားနေတဲ့ မြန်မာအမျိုးသမီးတွေရဲ့ ထိမ်းမြားခြင်းကိစ္စဟာ အခု ၂၀၁၅ ကျမှ ဘာဖြစ်လုို့ ဥပဒေပြဌဏ်းကာကွယ်ဖုို့လုိုလာတာလဲ။ စစ်အစိုးရခေတ်အဆက်ဆက်က ဒါတွေကို ဘယ်သူမှမပြောပဲ ဘာကြောင့် ၂၀၁၂ နောက်ပုိုင်းမှာမှ ဒါတွေကို ပြောလာကြတာလဲဆုိုပြီး သူက မေးခွန်းထုတ်ပါတယ်။ 

ပြီးတော့ ဒီဥပဒေတွေဟာ အမျိုးသမီးတွေအပေါ် ခွဲခြားဆက်ဆံတဲ့သဘော၊ တဆင့်နှိမ့်ချထားတဲ့သဘော၊ ဘုန်း တံခုိုးရူးတဲ့ စစ်ဗုိုလ်တချုို့နဲ့ ဘာသာပေါင်းစုံသင့်မြတ်ရေးကိုအလေးမထားတဲ့ မဘသ သံဃာင်္တချို့ရဲ့ အစွန်းရောက် အတွေးအခေါ်ကနေ စတင်လာတာလုို့ သူက ထောက်ပြပါတယ်။

စစ်ဗိုလ်တချို့ဟာ အခုချိန်ထိ ဘုန်းတံခုိုးဆုိုတာကို ယုံနေဆဲဖြစ်ပြီး ဒါဟာ နုိုင်ငံတကာအမြင်နဲ့ အတော်လွဲနေ ကြောင်း၊ ဒါကုို ပြချင်တဲ့အတွက် ၂၀၀၈ နာဂစ်ကာလက နုိုင်ငံတကာအမျိုးသမီးတွေကနေ အတွင်းခံ ဘောင်းဘီ တွေ သောင်းနဲ့ချီပြီး မြန်မာသံရုံးတွေဆီ ပုို့ခဲ့ဖူးတယ်လို့ သူကပြောတော့ ပရိသတ်ဆီက ရယ်သံတချို့ ထွက်လာပါ တယ်။

တကယ်တော့ အမျိုးသမီးတွေဟာ ဘာသာရေး၊ လူမှုရေးကိစ္စမှာ ဥပဒေအရ ဒီလုိုတားမြစ်ခံရတဲ့အပြင် ကျောင်း ပညာရေးမှာလည်း အမျိုးသားတွေကုိုသာဦးစားပေးထားဆဲဖြစ်ကြောင်း၊ ဥပမာ ဆေးပညာ၊ အင်ဂျင်နီယာပညာ အပါဝင် တချုို့ပညာရပ်တွေသင်ခွင့်ရဖုို့အတွက် အမျိုးသမီးတွေကို အမှတ် ၄၀ ပုိုရရမယ်လို့ သတ်မှတ်ထားတာမျိုး ရှိနေဆဲဖြစ်ကြောင်း၊ ဒါတွေကို အမျိုးသမီးတွေကိုယ်တုိုင်က မတရားသတ်မှတ်ထားတယ်လုို့မမြင်ပဲ အစဉ်အလာ ယဉ်ကျေးမှုအရ ဒါကို လက်ခံသင့်သလုိုလုို အမြင်ရှိနေဆဲဖြစ်တာ အံသြမိကြောင်း သူက ထောက်ပြခဲ့ပါတယ်။

စစ်သားနဲ့ ဘုန်းကြီးကို စံပြအဖြစ် ထားခဲ့မိလေသလား

ဒေါက်တာ ခင်မာမာကြည်ပြောနေတဲ့ စစ်သားတွေ၊ မဟာအဖုိုဝါဒီတွေ ယုံကြည်အလေးထားတယ်ဆုိုတဲ့ ဘုန်းကံ အကြောင်းစဉ်းစားရင်းနဲ့ မကြာသေးခင်က ဆွေးနွေးပွဲတခုမှာ ဦးမင်းဇင်ပြောသွားတဲ့ စစ်သားတွေရဲ့ ယုံကြည်မှုအကြောင်း သွားတွေးမိပါတယ်။


သူတွေ့ခဲ့တဲ့ စစ်ဗိုလ်တွေ၊ စစ်ဗုိုလ်ဟောင်းတွေအားလုံးမှာ တူတဲ့အချက်ကတော့ စစ်သားတွေလောက် ဘယ်သူမှ စည်းကမ်းမရှိဘူး၊ စစ်တပ်လောက် စနစ်တကျ စုဖွဲ့ထားနုိုင်တဲ့ ယန္တယား ဘယ်မှာမှ မရှိဘူးဆုိုပြီး စစ်သားအားလုံးက သူ့တို့ကိုယ်သူတုို့ စံပြပုဂ္ဂိုလ်အဖြစ် ယုံကြည်ထားတာတွေ့ရတယ်လုို့ စစ်ဖက်-အရပ်ဖက် ဆက်ဆံရေးအကြောင်း သုတေသနစာတမ်းပြုစုနေသူ (University of California, Berkeley) မှ ဦးမင်းဇင်ကပြောပါတယ်။

ဒါက စည်ကမ်းနဲ့ဆိုင်တဲ့၊ နုိုင်ငံတော်ကာကွယ်ရေးနဲ့ဆုိုင်တဲ့အပုိုင်း။ ကုိုယ်ကျင့်သိက္ခာအပုိုင်း၊ အမျိုးဘာသာ ကာ ကွယ်ရေးအပုိုင်းကုို ပြောမယ်ဆုိုရင်တော့ သံဃာင်္တော်တွေ၊ ဗုဒ္ဒဘာသာဘုန်းတော်ကြီးတွေကလည်း သူတုို့ လောက် ဘယ်သူမှ သိက္ခာသမာဓိမရှိဘူး၊ သူတုို့အဖွဲ့လောက် စနစ်ကျတဲ့ ဘာသာရေးအသင်း ရှိမှာမဟုတ်ဘူးလုို့ မြင်ကောင်း မြင်နေနုိုင်ပါတယ်။ 

နုိုင်ငံတော် ဘတ်ဂျက်ခွဲတန်းကိုအများဆုံးအသုံးပြုပြီးတည်ဆောက်ထားတဲ့ အင်အား သိန်းကျော်ရှိ တပ်မတော်နဲ့ ပြည်သူ့တွေရဲ့အလှူငွေနဲ့ တည်ဆောက်ထားတဲ့ အင်အား သိန်းကျော်ရှိ သံဃာင်္အဖွဲ့အစည်း ခုစလုံးမှာ ဒီလုို အမြင်ရှိနေတာကို မှားတယ်လုို့ မဆုိုသာပါ။ ဒါဟာ အရှိတရား တခုဖြစ်ပါတယ်။ ဒါပေမဲ့ ဒီလုို စည်းကမ်းရှိတာ၊ ဒီလုို ကိုယ်ကျင့်တရားကောင်းတာနဲ့တင် တုိုင်းပြည်အုပ်ချုပ်ရေးမှာ ပါဝင်ခွင့်ရှိတယ်၊ ဥပဒေပြုခွင့်ရှိတယ်ဆုိုပြီး အတွေးဝင်လာတာကတော့ မှားတယ်လုို့ ထင်ပါတယ်။ 

နောက်တချက်ကတော့ မြန်မာနုိုင်ငံမှာ အင်အားအကြီးဆုံးနဲ့ သြဇာအရှိဆုံး ဒီအဖွဲ့အစည်း ခုစလုံးရဲ့ ခေါင်းဆောင် ပုိုင်းတချို့ဆီမှာ အမျိုးသမီးတွေအပေါ် တဆင့်နှိမ်ထားချင်တဲ့သဘော။ အမျိုးသားက အမျိုးသမီးထက်မြင့်မြတ်တယ် ဆုိုတဲ့သဘောနဲ့ ဘုန်းတံခုိုးကို ယုံကြည်တဲ့နေရာတွေမှာ သွားတူနေ တာကိုတွေ့ရ ပြန်ပါတယ်။

လွှတ်တော်အသစ်နှင့် အစိုးရအသစ်က ဘာဆက်လုပ်မလဲ

ဒီလုိုအခြေအနေမျိုးမှာ အသစ်တက်လာမဲ့ လွှတ်တော်အမတ်တွေ ဘာဆက်လုပ်ကြမလဲ။ အရင်ခေတ်က ပြဌဏ်း ထားတဲ့ တရားမျှတမှုမရှိတဲ့ ဥပဒေတွေ၊ အထူးသဖြင့် အခုဆွေးနွေးပွဲမှာတင်ပြနေတဲ့ စစ်သားနဲ့ အမျိုးသားရေး အစွန်းရောက်ပုဂ္ဂိုလ်တွေရဲ့ဖိအားနဲ့တင်ထားတဲ့ အမျိုးစောင့်ဥပဒေ မျိုးကို ဒီတုိုင်း လက်ခံထားမှာလား။ ပယ်ဖျက် ပစ်မှာလားဆုိုတာဟာ မေးခွန်းဖြစ်လာနေပါတယ်။


ဒီဥပဒေတွေက ဒီမုိုကရက်တစ်မဆန်ဘူးလေ။ ဥပဒေတခုလုပ်တယ်ဆုိုတာက ကာကွယ်ဖုို့လုပ်တယ် ဆုိုပေမဲ့ မထင် မှတ်ပဲနဲ့ ပုိုဆုိုးသွားတတ်မျိုးရှိပါတယ်။ ဒါကြောင့် ဒီဥပဒေကတော့ ပြန်ပြင်မှကုို ဖြစ်မှာပါလုို့ ဒေါက်တာ ခင်မာမာကြည်ကပြောပါတယ်။

အဲဒီလုိုပြင်နုိုင်ဖုို့အတွက် ဒီဥပဒေ တကယ်ပြန်ဌဏ်းဖုို့ လုိုမလုိုဆုိုတာကုို အသေအချာ အချိန်ယူသုတေသန လုပ်၊ တကယ့်အောက်ခြေလူထုတွေနဲ့ အသေးစိပ်ဆွေးနွေး၊ အားလုံးသေချာပြီဆုိုမှ ပြဌဏ်းမလား၊ ပြန်ဖြုတ်မလားဆုိုပြီး ဆုံးဖြတ်သင့်တယ်လုို့ သူက အကြံပြုပါတယ်။

ဒါပေမဲ့ လွှတ်တော်က အတည်ပြုထားပြီးသား ဥပဒေတရပ်ကုို ပြန်ပြင်ဖုို့၊ ပယ်ဖျက်ဖုို့ဆုိုတာ ချက်ချင်းတော့  ဘယ် လွယ်ပါ့မလဲ။ ပြီးတော့ ဒီထက်အရေးကြီးတဲ့ ပြုပြင်စရာဥပဒေတွေကလည်း အများကြီးရှိနေ ပါသေးတယ်။ အထူးသဖြင့် ဖွဲ့စည်းပုံအခြေခံဥပဒေထဲက ဒီမုိုကရက်တစ်နည်းလမ်းမကျတဲ့ ဥပဒေတွေ၊ အတိအကျပြောရမယ်ဆုိုရင် ဒေါ်အောင်ဆန်းစုကြည်ကုို သမ္မတဖြစ်ခွင့်ပိတ်ပင်ထားတဲ့ ပုဒ်မ ၅၉- လုိုဥပဒေတွေ၊ ဥပဒေပြင်ခွင့်ကို ကို်ယ်စား လှယ် ၇၅ ရာခုိုင်နှုန်းကျော်ထောက်ခံမှပြင်ခွင့်ရှိတယ်ဆုိုတဲ့ ပုဒ်မ ၄၃၆ လုိုဥပဒေတွေကို အရင်ဦးစားပေးပြင်ဖုို့ လုိုနေတယ်မဟုတ်ပါလား။


ဒီအတွက် လက်ရှိသမ္မတ၊ လက်ရှိ တပ်-ချုပ်အပြင် နောက်ကွယ်ကကြိုးကုိုင်နေသူအဖြစ် အများက ထင်ကြေးပေး ထားတဲ့ တပ်-ချုပ် ဟောင်းနဲ့ပါ ရွေးကောက်ပွဲအနုိုင်ရ NLD ပါတီဖက်က ဆွေးနွေးမှုတွေ လုပ်နေပါတယ်။ ဒီဆွေး နွေးမှုတွေပြီးလုို့ ပါလီမန်အသစ်၊ အစိုးရအသစ်လက်ထဲ လုပ်ပုိုင်ခွင့်တွေ တကယ်ရောက်လာပြီဆုိုရင်တော့ အများ ပြည်သူအတွက် အကျိုးမရှိတဲ့ဥပဒေတွေကို လွှတ်တော်အသစ်က စတင်ပြင်ဆင်လာလိမ့်မယ်လိုို့ မျှော်လင့်မိ ပါ တယ်။  

Share

Twitter Delicious Facebook Digg Stumbleupon Favorites More