တပ်မဟာ ၇ ဒေသ၊ ခလယ်ဒေးစခန်းကိုသိမ်းဖို့ KNLA နဲ့ မဟာမိတ်တွေက ထိုးစစ်ဆင်နေတဲ့သတင်း ဒီနေ့ ဖတ်ရပါတယ်။
မာနယ်ပလော ဌာနချုပ်ဟောင်းနေရာကို သိမ်းပြီးတဲ့နောက် တပ်မဟာ ၇ ရဲ့ ရှေ့တဆင့် ထိုးစစ်၊ သောင်ရင်းမြစ်ကမ်းတလျောက် ရှင်းလင်းရေးထိုးစစ်လို့ နားလည်ရပါတယ်။
အစောပိုင်းသတင်းတွေအရ သံလွင်မြစ်ကြောင်းတလျောက်ကို တပ်မဟာ ၅ က ရှင်းထားပြီးပြီဆိုတော့ သောင်ရင်းမြစ်တလျောက်ကိုလည်း ရွှေကုက္ကူဖက်မှာ နယ်ခြားစောင့်တွေရှိတာကလွဲရင် နေရာအားလုံးနီးပါးကို တပ်မဟာ ၇ နဲ့ တပ်မဟာ ၆ က ရှင်းထားပြီးသားလို့ ထင်နေတာ...
အခု ခလယ်ဒေးစခန်းကို ထိုးစစ်ဆင်တယ်ဆိုတာ့ သောင်းရင်းမြစ်ဘေးမှာ သိမ်းစရာစခန်း ဘယ်နှစ်ခု ကျန်သေးလဲ...။ ခလယ်ဒေးအပေါ်နားက မယ်သဝေါတောင်ကိုကော ဘယ်တော့သိမ်းမလဲ...
၁၉၈၈ ဒီဇင်ဘာတုန်းက ခလယ်ဒေးစခန်းကို ပထမ အခေါက်ရောက်စဉ် ရေးထားတဲ့ မှတ်စုကို ပြန်သတိရမိပါတယ်။
ခလက်ဒေးစခန်းဆိုတာ DAB တပ်ပေါင်းစုကို စတင်ဖွဲ့စည်းခဲ့တဲ့နေရာပေါ့...
ကိုထူးအိမ်သင် နှစ်သစ်ကူးပွဲမှာ သီချင်းဆိုခဲ့ဖူးတဲ့ နေရာပေါ့...
အခု ၃၇ နှစ်ကြာပြီးမှ ခလက်ဒေးက တခါ ပြန်လည်ရှင်သန် လာတာလား...။
=====
(၁၉၈၈- ဒီဇင်ဘာ ပထမ သတင်းပတ်...
သူပုန်ကျောင်းသားတဦးရဲ့ မာရသွန်ခရီး- အခန်း ၇ မှ)
ကျနော်မှတ်မိသလောက် ဗိုလ်မှူးစိုးစိုးအိမ်မှာ တပတ်လောက်သောင်တင်ပြီး နောက်မှာတော့ ကျနော်တို့ ၆ ဦးကို မယ်သလေ (ခေါ်) ကလက်ဒေး စခန်းဆီ ပို့လိုက်ပါတယ်။
မဲဆောက်ကနေ သောင်းရင်းမြစ်တလျောက် ၃ နာရီလောက် မောင်းရတဲ့ ကားလမ်းကတော့ ကန်ချနပူရီ – တာ့ခ် -မဲဆောက် လမ်းလို မချောမွေ့တော့ပါဘူး။ ကျနော်တို့ ထားဝယ်ဘက်က ကားလမ်းတွေလို ခပ်ကျဉ်းကျဉ်းနဲ့ အကွေ့အကောက်များပြီး တောင်တက်၊ တောင်ဆင်း လမ်းတွေများပါတယ်။
ဒါပေမယ့် သောင်းရင်းမြစ်ကို ကြည့်လိုက်၊ မြစ်ဘေး မြန်မာဖက်အခြမ်းက တောင်ကတုံး တွေကိုငေးလိုက်၊ ထိုင်းဘက်က ကျွန်းသစ်တော စိုက်ခင်းတွေကိုငေးလိုက်၊ လမ်းတလျောက်က ထိုင်း – ကရင်ရွာ ဈေးတန်းမှာရပ်လိုက်နဲ့ အိပ်ငိုက်စပြုချိန်မှာ ကလက်ဒေးစခန်းရဲ့ ထိုင်းဘက်ကမ်း မယ်သရီ ဈေးတန်းကို ရောက်လာပါတယ်။
ကျနော့်စိတ်ထဲ မော်လမြိုင်မြို့ ဒေါင်းမင်းလမ်းထဲက မှောင်ခိုတန်းကို ရောက်သွားသလိုပါပဲ။ အဝတ်အထည်၊ လျှပ်စစ်ပစ္စည်း၊ ရေချိုးခန်းသုံးပစ္စည်း၊ အစားအသောက်အစုံရတဲ့ တကယ့်ဈေးတန်းကြီးဖြစ်ပါတယ်။
ထိုင်းဘက်ကမ်းက ဈေးဆိုပေမယ့် ထိုင်းလို မတတ်လည်း ပြဿနာ မရှိပါဘူး။ အားလုံးက ကရင်နဲ့ ဗမာစကားကို နားလည်ကြပါတယ်။ နောက် မော်လမြိုင် မှောင်ခိုဈေး ဆိုတာကလည်း ဒီဈေးက ပစ္စည်းတွေ ဖြစ်နေပြီး နွားလာရောင်းတဲ့ လူတွေက နည်းမျိုးစုံနဲ့ ရွေဂွန်း – လှိုင်းဘွဲ့အထိသယ်ပြီး ဘားအံ – မော်လမြိုင် အထိ သွားသွင်းကြတယ်လို့ သိရပါတယ်။
အဲဒီဈေးတန်းမှာ သူများတိုက်တဲ့ အအေးတခွက်စီ သောက်ပြီးနောက်မှာတော့ ကလက်ဒေးဘက်ကို ကျနော်တို့ကူးပါတယ်။ ပေ ၅၀ လောက်အကျယ်ရှိတဲ့ သောင်ရင်းမြစ်ထဲမှာတော့ “ဖုတ် – ဖုတ် – ဖုတ်” မြည်နေတဲ့ အင်ဂျင်အား ကောင်းကောင်း စက်လှေ ၃ဝ လောက် ဟိုဘက်ဒီဘက် ခေါက်တုန့် ခေါက်ပြန် ပြေးနေပါတယ်။ ခရီးသည်ဆိုရင် ၅ ဘတ်၊ ကျိုဖိုး (ကျောင်းသား) ဆိုရင်တော့ အလားကား တင်ပေးပါတယ်။
နောက်မှ ကျနော်ပြန်သိရတာက အဲဒီစက်လှေ ၃ဝ ကျော်ဟာ ဟိုဘက်ဒီဘက် ကူးနေတာ မဟုတ်ဘဲ သောင်ရင်းမြစ် တလျောက်ပြေးနေတဲ့ စက်လှေတွေဖြစ်ပါတယ်။ ဒါပေမယ့် ကျနော်တို့ ရောက်သွားတဲ့အချိန်မှာ ကလက်ဒေးရဲ့ အပေါ်ဘက် (သောင်းရင်းမြစ်က ပြောင်းပြန်စီးတဲ့အတွက် မြစ်ရေစီး အတိုင်း ခေါ်မယ်ဆိုရင် အောက်ဘက်လို့ ခေါ်သင့်ပါတယ်) ၃၊ ၄ မိုင်လောက် အကွာက မဲသဝေါတောင်မှာ တိုက်ပွဲ ဖြစ်နေတဲ့အတွက် လှေအသွားအလာ ရပ်ပြီး ဒီမှာလာစုပုံ နေတာ ဖြစ်ပါတယ်။ အဲဒီ မဲသဝေါ တောင်ကိုလည်း အခု ကျနော်တို့ ရောက်နေတဲ့ ကလက်ဒေးကနေ ခပ်ဝါးဝါးလေး လှမ်းမြင် နေရပါတယ်။
ကလက်ဒေးဘက်ရောက်တော့ KNU အကောက်ဂိတ်က မေးမြန်းစစ်ဆေးပြီး ကျောင်းသား စခန်းဆီ ကျနော်တို့ကို ပို့လိုက် ပါတယ်။ ကျောင်းသားစခန်းဆိုပေမယ့် ကျနော်တို့ မင်းသမီးစခန်းလို တောကြိုအုံကြားမှာ မဟုတ်ပါဘူး။ နယ်စပ်ဂိတ်နဲ့ ၅ မိနစ်တောင် လမ်းလျောက်စရာမလိုတဲ့ ကလက်ဒေးရွာဘေးက တောင်ကုန်းလေးပေါ်မှာပါ။
ဆောက်ထားတဲ့ အဆောက်အဦ တွေကလည်း ကျနော်တို့စခန်းလို ဝါးတဲစုတ်မဟုတ်ပါဘူး။ တောင်ကုန်းထိပ်က အဆောက် အဦဆိုရင် ရှေမှာကျနော်ပြောခဲ့တဲ့ ထီးထားက KNDO ရုံးထက် ၂ ဆ လောက် သားနားပြီး အထက ကျောင်းတခု ပုံစံလိုမျိုး ဖြစ်နေပါတယ်။
အဲဒီဘေးက ကျောင်းသားတွေနေတဲ့ ဘားတိုက်ကလည်း သစ်သားတွေနဲ့ အသေအချာ ဆောက်ထားလို့ အတော်ကောင်းတဲ့ နေရာတွေပါ။ တကယ်ကတော့ ခုနက အသားနားဆုံးလို့ ကျနော်ပြောလိုက်တဲ့ အဆောက်ဦဟာ မနေ့တနေ့ ကမှ DAB (ဒီမိုကရက်တစ် မဟာမိတ်အဖွဲ့) ညီလာခံ လုပ်ခဲ့တဲ့နေရာလို့ သိရပါတယ်။
DAB ရဲ့ ထူးခြားချက်ကတော့ အရင်ကရှိပြီးသား တိုင်းရင်းသား လက်နက်ကိုင် ၁ဝ-ဖွဲ့ဖြစ်တဲ့ (ကရင်၊ ကရင်နီ၊ ကချင်၊ မွန်၊ ရခိုင်၊ ပလောင်၊ ပအိုဝ်း အပါဝင်) NDF ခေါ် အမျိုးသား ဒီမိုကရေစီ တပ်ပေါင်းစုနဲ့ အသစ်ရောက်လာတဲ့ ၁၂ ဖွဲ့၊ (ABSDF, CRDB, ABYMU, အပါဝင်…) အထူးသဖြင့် ကျောင်းသားအုပ်စုတွေနဲ့ ပူးတွဲဖွဲစည်းလိုက်တဲ့ အသစ်စက်စက် မဟာမိတ် တပ်ပေါင်းစု ဖြစ်ပါတယ်။
ဥက္ကဋ္ဌ ကတော့ အဲဒီကာလရဲ့ ထုံးစံအတိုင်း KNU ဥက္ကဋ္ဌ ဗိုလ်ချုပ်မြ၊ ဒုတိယဥက္ကဋ္ဌ တွေကတော့ KIO ဥက္ကဋ္ဌ ဘရန်ဆိုင်း၊ မွန်ပြည်သစ် ဥက္ကဋ္ဌ နိုင်ရွှေကျင်၊ ပြည်ချစ်ပါတီဥက္ကဋ္ဌ ဦးသွင်နဲ့ အတွင်းရေးမှူး အဖြစ်ကတော့ ကျောင်းသားတွေနဲ့ အတူ အသစ်ပါလာတဲ့ အမေရိကန်ပြန် CRDB အဖွဲ့က ပြည်ချစ် လက်ဟောင်း ဦးတင်မောင်ဝင်းတို့ပါ။ တွဲဘက်အတွင်းရေးမှူး အဖြစ်ကတော့ ကျနော်တို့ ABSDF ရဲ့ အထွေထွေအတွင်းရေးမှူး ကိုသန်းဝင်း ဖြစ်ပါတယ်။
အဲဒီ DAB ညီလာခံ လုပ်ပြီးသွားတဲ့နေရာမှာ ကျနော်တို့အုပ်စုကို နေရာချပေးပါတယ်။ အဲဒီကာလ ABSDF ဗဟိုကော်မတီဝင်တွေကတော့ ဥက္ကဋ္ဌ ကိုထွန်းအောင်ကျော်၊ ဒု – ဥက္ကဋ္ဌ ကိုဝင်းမိုး၊ အထွေထွေ အတွင်းရေးမှူး ကိုသန်းဝင်း၊ တွဲဘက် အထွေထွေအတွင်းရေးမှူး ၁ – ကိုအောင်နိုင် (အခု VOA – မြန်မာပိုင်း ဌာနမှူး ကိုသန်းလွင်ထွန်း) တွဲဘက် အတွင်းရေးမှူး ၂ – ဆလိုင်းကိုကိုဦးတို့ ဖြစ်ပါတယ်။
ဗဟိုဦးဆောင် ကော်မတီဝင်တွေ အဖြစ်ကတော့ နိုင်ငံခြားရေး ဌာနအတွက် စိုင်းမျိုးဝင်းထွန်း (အခု ရှမ်းခေါင်းဆောင် ဦးခွန်ထွန်းဦးတို့နဲ့အတူ နှစ်ရှည် ထောင်ကျခံနေရသူ)၊ စည်းရုံးရေး ဌာနအတွက် ကိုထွန်းဦး (ကျဆုံး) ပြန်ကြားရေး ဌာနအတွက် ကိုကိုလေး၊ ထောက်ပံ့ရေး ဌာနအတွက် ကိုကြည်မိုး၊ လုပ်ငန်းစစ်ဆေးရေး ဌာနအတွက် ကိုမောင်မောင်သိန်း၊ စည်းကမ်း ထိမ်းသိမ်းရေး ဌာနအတွက် ကိုကျော်လင်း၊ ကျန်းမာရေး ဌာနအတွက် ဒေါက်တာသာသာဦး၊ ဘဏ္ဍာရေး ဌာနအတွက် ကိုကျော်ထင် (မင်းသမီးစခန်းက ကိုကျော်ထင်နဲ့ အမည်တူသူ) တို့ ဖြစ်ပါတယ်။
ကလက်ဒေးစခန်းရဲ့ အခြေအနေက ကျနော်တို့ စခန်းနဲ့ တခြားစီပါ။ ကုန်သွယ်ရေးလမ်းကြောင်း ဖြစ်တဲ့အပြင် သူပုန်တွေရဲ့ တပ်ပေါင်းစုညီလာခံ ကျင်းပတဲ့နေရာလည်း ဖြစ်နေတဲ့အတွက် ကလက်ဒေးဟာ ကျနော်တို့ ရောက်ခဲ့ဖူးတဲ့ ထီးထာ။ ထီးခီးတွေထက် အဆမတန် စည်ကားဝေဆာ နေပါတယ်။
စခန်းတွင်း အစားအသောက်ကလည်း ကျနော်တို့စခန်းထက် အများကြီး ပိုအဆင်ပြေနေတာကို တွေ့ရပါတယ်။ ညနေပိုင်း ရွာထဲခဏဝင်လည်တော့လည်း အိမ်တွေက ဖြစ်သလိုဆောက်ထားတာ မဟုတ်ဘဲ ရပ်ကွက်ပုံစံ အကွက်ချ ဆောက်ထားတာ ဖြစ်ပြီး လျှပ်စစ်မီးလိုင်းတွေ၊ ရေပိုက်တွေပါ တပ်ပေးထားတာကို တွေ့ရတော့ KNU မှာလည်း မြို့ပြ အုပ်ချုပ်ရေးစနစ် ရှိသားပဲလို့ ကျနော် တွေးလိုက်မိပါတယ်။
ဈေးဆိုင်တန်းတွေ အပါအဝင် ဒီရွာထဲမှာ အိမ်ခြေ ၁၀၀ ကျော်လောက် ရှိမယ်လို့ ခန့်မှန်းရပေမယ့် တရွာလုံးအနှံ့တော့ ကျနော် မသွားဖြစ်ခဲ့ပါဘူး။ ကလက်ဒေးစခန်းမှာ ကျောင်းသားဦးရေ ၁၀၀ ကျော်လောက် ရှိပြီး အများစုဟာ ကရင်ပြည်နယ် ဘားအံ၊ လှိုင်းဘွဲ့နဲ့ ရွေဂွန်းဘက်က ဖြစ်ကြပါတယ်။
အဲဒီကာလက စခန်းကော်မတီထဲမှာ ကျနော် မှတ်မိနေသူ တချို့ကတော့ ဒေါက်တာ ကျော်သက်ဦး၊ ကိုအာယု၊ ကိုဝေလင်းဇင် (အခုထိ ABSDF ဗဟိုမှာတာဝန်ထမ်းဆဲ)၊ ကိုဝင်းမြင့် (အခု BBC သတင်းဌာနမှာ တာဝန်ထမ်းနေသူ) ကိုအောင်ဟိန်း (နောက်ပိုင်းမှာ ဗဟိုကော်မတီ ဖြစ်လာပြီးမှ ငွေဘုန်းပြီး ပြည်တွင်း
ပြန်ဝင်သွားသူ) နောက် တိုင်းဂါးတို့ညီနောင်ကို ကျနော် သတိထားမိပါတယ်။
ဗဟိုဘက်က ရောက်နေတဲ့ ခေါင်းဆောင်တွေထဲက ကျနော်တို့နဲ့ တွဲရသူတဦးကတော့ ရှေ့နေ ကိုကျော်လင်းဖြစ်ပါတယ်။ ကျနော်တို့လိုပဲ KNU နယ်မြေကော်မတီ အတွက် ရောက်နေတဲ့ တခြားစခန်းက ကိုယ်စားလှယ်တွေ ထဲမှာတော့ သီဘောဘိုးက ကို ခင်မောင်စိုးနဲ့ ကိုတင်ဌေး၊ ဝမ်ခါ (ကော့မူးရာ) စခန်းက ကိုသိန်းထွန်းနဲ့ ကိုသိန်းလွင်၊ သံလွင်စခန်းက ကိုသိန်းဆန်း၊ ကိုမောင်မောင်တိတ်၊ ကိုမျိုးသန့်နဲ့ ကိုအောင်သူ၊ စောထ စခန်းက ကိုမောင်မောင်စိုး၊ ကိုသိန်းထိုက်၊ ကိုတင်ဦးလွင်နဲ့ ကိုဇော်ခင်တို့ ဆိုတာ ကျနော့်စိတ်ထဲ အမှတ်ရနေပါတယ်။
---
နယ်မြေကော်မတီအတွက် ကျနော်တို့ အစည်းအဝေးလုပ်တဲ့ နေရာကတော့ ခုနက DAB အစည်းအဝေး လုပ်ရာ အဆောက်အအုံရဲ့ အနောက်ဘက် ခပ်လှမ်းလှမ်းက မူလတန်း ကျောင်းလေးမှာ ဖြစ်ပါတယ်။ ကျွန်းသစ်တွေနဲ့ အခိုင်အမာ ဆောက်ထားတဲ့ အဲဒီကျောင်းလေးရဲ့ နဘေးမှာ ဆီးပင်တန်းလေး ရှိတဲ့အတွက် ဆီးပင် တန်းကျောင်းလို့ အလွယ် မှတ်ထားပါတယ်။
ဖွင့်ပွဲနေ့မှာ အမှာစကား လာပြောသူတွေကတော့ DAB ဒုဥက္ကဋ္ဌ အဖြစ် တာဝန်ယူထားသူ ကချင်လွတ်လပ်ရေး တပ်မတော် (KIO) ဥက္ကဋ္ဌ မရန်ဘရန်ဆိုင်း၊ KNU ဒု ဥက္ကဋ္ဌ ဖဒိုသန်းအောင်နဲ့ ရဟန်းပျိုအဖွဲ့က အရှင် ခေမာစာရတို့ ဖြစ်ပါတယ်။
နောက်တခါ ဒေါက်တာ စင်သီယာမောင်လည်း ကျနော်တို့ အစည်းအဝေးကို တက်တယ်လို့ အမှတ်ရနေပါတယ်။ ဒေါက်တာစင်သီယာမောင်ကို ကျနော်တို့ နယ်မြေကော်မတီမှာ ကျန်းမာရေး တာဝန်ခံအဖြစ် တာဝန်ပေးဖို့ အဆိုပြုခဲ့ပေမယ့် သူက လက်မခံဘဲ တသီးပုဂ္ဂလ အဖြစ်နဲ့သာနေပြီး အတတ်နိုင်ဆုံး ကူပေးမယ်လို့သာ ပြောခဲ့တယ်လို့ ထင်ပါတယ်။
ဧည့်သည်တော် ဥက္ကဋ္ဌ ဘရန်ဆိုင်းနဲ့ ဖဒိုသန်းအောင်တို့ ဘာတွေပြောသွားသလဲ ဆိုတာကို ကျနော် မမှတ်မိတော့ပေမယ့် စတိုင်ကျလှတဲ့ ဘရန်ဆိုင်းရဲ့ ပုံကိုတော့ အခုအချိန်ထိ စိတ်ထဲမြင်ယောင်နေဆဲ ဖြစ်ပါတယ်။
---
