ရွှေကုက္ကိုလ်ရဲ့ အသွင်းပြောင်းချိန်...
(Weekend မှာ တွေးတောစရာ... (၄)
အခုတလော နာမည်ကြီးလာနေတဲ့ ရွှေကုက္ကိုလ်အကြောင်း ဘာရေးရင်ကောင်းမလဲ စဉ်းစားနေတုန်း BBC သတင်းထောက်က အဲဒီမြို့ထဲကနေ သတင်းပို့နေတာ ဒီမနက် တွေ့လိုက်ရပါတယ်။
တကယ်ဆို ရွှေကုက္ကိုလ်က မဲဆောက်နဲ့နီးနီးလေး... ကားမောင်းသွားရင် နာရီဝက် ၄၅ မီနစ်လောက်ပဲ ကြာမယ်ထင်ပါတယ်။ စာရေးသူရောက်ခဲ့တာက မနှစ် စက်တင်ဘာ ဆိုတော့ ၅ လလောက်အတွင်း အခြေအနေက အတော့်ကို ပြောင်းလဲသွား...
၅ လတောင် ဒီလောက်ပြောင်းတယ်ဆိုရင် နှစ် ၃၀ ဆို ဘယ်လောက်များပြောင်းလိုက်လေမလဲ...။ ဆိုလိုတာက စာရေးသူတို့ ၈၈ ကျောင်းသားတွေ တောခိုစဉ်က ဒီနေရာမှာ ရွှေကုက္ကိုလ်မရှိသေး...
မှတ်တမ်းမှတ်ရာတွေ- ကိုယ်တိုင်ရောက်ဖူးတာတွေကို ပြန်ပုံဖေါ်တဲ့အခါ ဒီနေရာဟာ အရင်က ကျိုးဖိုးတွေရဲ့ ရေကျော်စခန်းဟောင်းဝန်းကျင်လို့ဆိုပါတယ်။ စာရေးသူ ပထမ အခေါက်ရောက်ဖူးတာက ၁၉၈၉ အစောပိုင်းကာလ... ရေကျော်က တညအိပ်ထက် မပိုဘူး။ ၃ လလောက် နေခဲ့ဖူးတာက အဲဒီရဲ့ အပေါ်ဖက် ဝမ်ခ သို့မဟုတ် ကော်မူးရာ စစ်မြေပြင်...
အဲတုန်းက ထိုင်းဗိုလ်ချုပ်တွေ၊ ထိုင်းနိုင်ငံရေးသမားတွေ ပြောလေ့ရှိတဲ့စကားက စစ်မြေပြင်ကို စီးပွားရေးဇုန်ဖြစ်အောင် လုပ်ရမယ်တဲ့... ဒါပေမယ့် ဒီလို ကျားဖြန့် မြို့သစ် တည်ရောက်ရေးတော့ ဟုတ်ပုံမရဘူး...
ကြားဖူး ဖတ်ဖူးသလောက် မှတ်မိနေတာက... မြန်မာနယ်စပ် သောင်းရင်းမြစ်- သံလွင်မြစ်တဖက်ကမ်းမှာ မြေတွေငှားပြီး စက်ရုံ- အလုပ်ရုံတွေဆောက်မယ်။ မြန်မာနိုင်ငံက ထွက်လာတဲ့ အလုပ်သမားတွေ ထိုင်း- အတွင်းပိုင်းအထိ ဝင်လာစရာမလိုပဲ အဲဒီနယ်စပ်က စက်ရုံ-အလုပ်ရုံတွေမှာပဲ အလုပ်ရစေရမယ်...
ဒါဆိုရင် ထိုင်းလည်း စီးပွားဖြစ်- မြန်မာတွေလည်းအလုပ်ရ... ပြသာနာတွေလည်း ထိုင်းအတွင်းပိုင်းကို သိပ်မရောက်... ဒီလို မှတ်မိနေပါတယ်။
အခု ၃၅ နှစ်လာက်ကြာပြီး ကော်မူးရာနဲ့ ရေကျော်စခန်းဆီပြန်ရောက်တော့ ဧရာမမြို့သစ်ကြီးတွေကို တွေ့လိုက်ရပါတယ်။.. ဒါပေမယ့် မူလ စီမံကိန်းနဲ့အတော်ကွဲလွဲနေပါလား...
ဘာကြောင့်လဲ... ရွှေကုက္ကိုလ်တွေ၊ KK Park တွေက ထိုင်းစီမံကိန်းမဟုတ်ပဲ တရုတ်စီမံကိန်းတွေဖြစ်နေတာကြောင့်လို့ ထင်ပါတယ်။
မနေ့က ထုတ်ပြန်တဲ့ BGF ရဲ့ကြေညာချက်ကိုကြည့်ရင် သူတို့က မြေငှားတဲ့သဘော- မြေငှားခနဲ့ ဝန်ဆောင်ခပဲ ရတဲ့သေဘာမျိုး ရေးထားပါတယ်။ ထိုင်းဖက်ကလည်း လျှပ်စစ်မီးနဲ့ အခြား ဝန်ဆောင်မှုတွေအတွက်ပဲ အခကြေးငွေ ရတဲ့သဘောရှိပါတယ်။
တကယ့် အော်ပရေးရှင်းကို ကိုင်တာက ကိုရွှေတရုတ်တွေ...။ ရှမ်းမြောက် လောက်ကိုင်ဖက်ကို တရုတ်အစိုးရ ရဲ တွေနဲ့ မြောက်ပိုင်းညီနောင်တွေ ဝင်စီးပြီးမှ ဒီဖက်ကို ပြောင်းလာတဲ့ စီမံကိန်းတွေလား... အရင်ကတည်းက ရှိနေပြီးသားဟာက အခုမှ သတင်းကြီးလာတာလား...
အခုတော့... တခါက ရေကျော်စခန်းကနေ ကမ္ဘာကျော်စခန်းဖြစ်လာတဲ့ ရွှေကုက္ကိုလ်ဟာ တခေတ်ပြောင်းရတော့မယ် ထင်ပါတယ်။ တရုတ်နဲ့ ထိုင်းကသာ တကယ်အရေးယူမယ်ဆိုရင် ဒီနေရာမှာ ဒီလိုဆက်လုပ်နေလို့ ဘယ်ဖြစ်မလဲ...
တရုတ်နဲ့ထိုင်းက တကယ်ပဲ လက်ကုန် ဖိအားပေးမယ်ဆိုရင်ပေါ့...
အဲတော့ ရွှေကုက္ကိုလ်က ဘာဆက်ဖြစ်မှာလဲ...။ ဆောင်းပါး အစပိုင်းမှာပြောခဲ့သလို ၉၀ ပြည့်လွန်နှစ်တွေက စဉ်းစားခဲ့ကြသလို လောင်းကစားမြိုံတွေကို အလုပ်သမားမြို့- စက်ရုံ အလုပ်ရုံတွေမြို့အဖြစ် ပြန်ပြောင်းနိုင်မယ်ဆိုရင်တော့...။
0 comments:
Post a Comment