ABSDF ရဲဘော်ဟောင်း အများစုရှိရာ Fort Wayne မြို့သို့ ခရီးသွားခြင်း... (အပိုင်း- ၁)
(၂၄ အောက်တိုဘာ ၂၀၂၆)
(၁) - နယူးယောက်မြို့က UN ဌာနချုပ်ရုံးရှေ့သို့...
ဒီတခေါက် အမေရိကားခရီးစဉ်ရဲ့ အဓိက ဦးတည်ချက်က Fort Wayne မြို့ ဆိုပေမယ့် တကယ် ပထမဆုံး ဝင်ဖြစ်တဲ့နေရာက UN ဌာနချုပ်တည်ရှိရာ နယူးယောက်မြို့...
ဘာကြောင့်လဲဆို... အဲဒီ Fort Wayne က ရဲဘော်တွေကပြောပါတယ်။ စက်တင်ဘာ ၁၉၊ စနေနေ့မှာ သံအမတ်ကြီး ဦးကျော်မိုးထွန်း ထောက်ခံပွဲ UN ရုံးရှေ့မှာ လုပ်ဖို့ရှိနေတယ်၊ အဲဒီမှာ လူစုံမယ်၊ သူတို့လည်း အဲဒီပွဲကို လာဖို့ရှိတယ်၊ အခြားရဲဘော်ဟောင်းတွေအများကြီးကိုလည်း အဲဒီမှာ အူးလေးတွေ့ခွင့်ရလိမ့်မယ်တဲ့...။
သံအမတ်ကြီး ဦးကျော်မိုးထွန်း ထောက်ခံဆန္ဒပြပွဲလုပ်မယ့်နေရာဆီ ကျနော်ရောက်သွားတဲ့အချိန်က မနက် ၁၁ နာရီကျော်ကျော်လောက်ပဲ ရှိဦးမယ်။ ပွဲက နေ့လည် တနာရီမှာစမှာဆိုတော့ လူသိပ်မရှိသေး...
ဟိုနားဒီနားလျောက်ကြည့်တော့ ဒီနေရာဟာ လွန်ခဲ့တဲ့ နှစ် ၂၀၊ ... ၂၀၀၆ တုန်းက ကျနော် ပထမ အခေါက်ရောက်စဉ်... (သမ္မတ George W. Bush ရဲ့ ကတော် Laura Bush က ဒေါ်အောင်ဆန်းစုကြည်လွတ်မြောက်ရေး၊ မြန်မာ့အရေးဆွေးနွေးပွဲတခု UN မှာကျင်းပစဉ် DVB ကို တကူးတကာ့ဖိတ်ကြားတဲ့အတွက် ရောက်ခဲ့ဖူးပါတယ်)...
ကျနော်တို့မင်းသမီးခစန်းက ဦးဟန်လင်းနဲ့အဖွဲ့ ဆန္ဒပြနေတဲ့နေရာဆိုတာ ပြန်အမှတ်ရလာပါတယ်။ အဲဒီခေတ်က ဆန္ဒပြပွဲတွေ၊ လမ်းလျောက်ချီတက်ပွဲတွေကို ဦးဆောင်ခဲ့တဲ့ ဦးဟံလင်း၊ ကိုအောင်ကြည်ဦးတို့ကတော့ ကွယ်လွန်သွားခဲ့ပါပြီ...။
အခုက ၂၀၂၁ မျိုးဆက်သစ် လူငယ်တွေက ဦးဆောင်တဲ့ ဆန္ဒပြပွဲ၊ အင်အားကလည်း အရင် လူ ၃၀ လောက်ရှိရာကနေ အခုက လူ ၃၀၀ ကျော်မလားပဲ...
နောက် အရင် NCGUB ခေတ်က UN ကိုယ်စားလှယ်က ဒေါက်တာသောင်းထွန်း၊ ဒီ UN ရုံးကြီးနဲ့ သိပ်မလှမ်းတဲ့နေရာက အဆောက်ဦအကြီးကြီးတခုထဲက အခန်းသေးလေးတခုမှာ ရုံးခန်းဖွင့်ထားပါတယ်။
အဲဒီအချိန်က DVB ဟာ NCG ရဲ့ အသံလွှင့်ဌာနဆိုတာ့ မောင်ထက်အောင်ကျော်တို့ရဲ့ နယူးယောက်ရုံးခန်းဟာလည်း ဒေါက်တာသောင်းထွန်းရဲ့ ရုံးခန်းပဲပေါ့။
အခုတော့ ဦးကျော်မိုးထွန်းဟာ အရင် NCG ခေတ်ကလို UN ရုံးဘေးမှာ ရုံးခန်းငယ်ဖွင့်ပြီး ဘေးတိုက် စည်းရုံးရေးဆင်းနေရတဲ့ အနေအထား မဟုတ်ဘူး။ UN ရုံးထဲမှာ တရားဝင် နေ့စဉ် တင်ပြခွင့်ရနေတဲ့အထိ နေရာရနေတာဖြစ်ပါတယ်။
ပြီးတော့ ဆန္ဒပြလူထုအင်အားက ၃၀၀ ကျော်၊ ခုနက UN ရုံးရှေ့မှာ စုရုံးထောက်ခံ ဆန္ဒပြတာအပြင် နယူးယောက်မြို့လယ်မှာ တနာရီလောက် စီတန်းလှည့်လည်ဆန္ဒပြခွင့်ရနေတာကိုပါ မြင်ရတော့ အတော်အားတက်မိပါတယ်။
ဒီလို ဆန္ဖ္ဒပြပွဲမျိုး လွန်ခဲ့တဲ့ နှစ် ၂၀ က မရှိခဲ့ဖူးပါဘူး။ အဲ... မောင်ထက်အောင်ကျော်တို့ရဲ့ ဥရောပမဲဇာနဲ့ ဥရောပ အခြားမြို့ကြီးတွေမှာလည်း လူ ၃၀၀ ကျော် မြို့ထဲ လှည့်လည် ဆန္ဒပြတာမျိုး မတွေ့ဖူးသေးပါဘူး။
ဒါတောင် ၅ နှစ်ကြာလို့ လူနည်းသွားတာ... အရင်နှစ်တွေကဆို ဒီထက်ပိုများတယ်လို့ နှစ်စဉ် ဆန္ဒပြပွဲထဲ ပါနေတဲ့ ရဲဘော်ဟောင်းတွေက ပြောပါတယ်။
ရဲဘော်ဟောင်းတွေဆိုမှ Albany ကလာတဲ့ ရဲဘော်ဟောင်း ကိုဇော်ကိုကိုနိုင်က ABSDF ကိုယ်စား စစ်ယူနီဖောင်းဝတ်ပြီး အဲဒီအခန်းနားမှာ စကားပြောပါတယ်။ ပြီးတော့ Fort Wayne က လာတဲ့ ရဲဘော်ကိုကောင်းရှိန်၊ မေရိလန်းက ရဲဘော်ကိုယဉ်ထွေး...
နောက် ၈၈ မျိုးဆက် နိုင်-ကျဉ်း ဟောင်းတွေထဲက ကိုနေတင်မြင့်၊ ကိုဇော်ဝင်း... စသဖြင့် ပြည်နယ်အလိုက်၊ အဖွဲ့အစည်းအလိုက်ပြောနေကြတာ တယောက်ပြီးတယောက်...
ပြီးတော့ အခု ၂၀၂၁ နောက်ပိုင်း အမေရိကားရောက်လာတဲ့ မျိုးဆက်သစ် လူငယ်တွေအများကြီး... တယောက်ပြီးတယောက်...။ ရှေ့ထွက်စကားပြောသူ ၃၀ ခန့်၊ အားပေးထောက်ခံသူ ၃၀၀ ကျော်ရှိတယ်ဆိုတော့ အတော်အရှိန်အဟုန်ကောင်းတဲ့ပွဲ လို့ပြောနိုင်ပါတယ်။
ဒါပေမယ့် သတင်းလာယူတဲ့ သတင်းထောက်တွေထဲမှာတော့ ကျနော့်လို ဆိုရှယ်မီဒီယာ သတင်းသမားတွေကိုပဲတွေ့ရပြီး အမေရိကန်အစိုးရ ဘတ်ဂျက်နဲ့ ဝါရှင်တန်မှာ အခြေစိုက်ပြီး အသံလွှင့်နေတဲ့ VOA, RFA သတင်းဌာနတွေက လူတွေကို မတွေ့မိပါ။ (VOA က လုံးဝရပ်နားထားပြီး RFA ကတော့ အွန်လိုင်းမှာ နည်းနည်းပြန်လွှင့်နေဟုဆို)
ပြီးတော့ လွန်ခဲ့တဲ့နှစ် ၂၀ တုန်းက... အော်စလိုကနေ နယူးယောက်အထိလာပြီး UN ရုံးမှာ သတင်းယူရတဲ့ဖြစ်စဉ်မျိုး၊ အိမ်ဖြူတော်ကပါ မြန်မာသတင်းထောက်တွေကို တကူးတကာ့ဖိတ်ပြီး ဒေါ်အောင်ဆန်းစုကြည်လွတ်မြောက်ရေး၊ မြန်မာ့အရေးဆွေးနွေးပွဲတွေကို First Lady ကိုယ်တိုင် ဦးစီးကျင်းပတဲ့ပွဲတွေလည်း မကြားမိတော့ပါ။
အိမ်ဖြူတော်က ဒေါ်အောင်ဆန်းစုကြည်လွတ်ပေးရေး၊ မြန်မာ့ဒီမိုကရေစီအရေး ပြောဖို့နေနေသာသာ အခုဆိုရင် အာဏာသိမ်း စစ်အစိုးရနဲ့တောင် တိုက်ရိုက်စကားပြောနေပြီလို့ သတင်းတွေထွက်လာနေပါတယ်။
ဘာကြောင့် ဒီလိုပြောင်းသွားတာလဲ...
အမေရိကားရောက် မြန်မာတွေ ရာနဲ့ချီပြီး ဆန္ဒပြနေတာကို အိမ်ဖြူတော်က အစိုးရမင်းတွေ၊ လွှတ်တော်က အမတ်မင်းတွေ မကြားမိ-မမြင်မိလို့လား၊ အမေရိကန်အခြေစိုက် သတင်းဌာနကြီးတွေဖြစ်တဲ့ VOA, RFA က အသံမလွှင့်တော့လို့ အမေရိကန်အမတ်မင်းတွေ မကြားမိတော့တာမျိုး၊ ကြားဖို့ တာဝန်မရှိတော့တာမျိုးလား...
လက်ရှိ သမ္မတလူကြမ်းအဖွဲ့က ပြောင်းချင်းလို့ကိုပြောင်းသွားတာဆိုတော့ ကိုယ်တွေရဲ့ လှုပ်ရှားနိုင်စွမ်းနဲ့တော့ သိပ်မဆိုင်လှဘူးထင်ပါတယ်။ ဒါဖြင့် ဒီလှုပ်ရှားမှုတွေက မထိရောက်တော့ဘူးလား...
ဒီလိုပြောဖို့လည်း ခက်ပါတယ်။ ဘာမှမလုပ်တော့ရင် အခြေနေက ပိုဆိုးမှာပေါ့။ ပြည်တွင်းလှုပ်ရှားမှုတွေ ဒီထက် ပိုအရှိန်ကောင်းလာရင် အခြေနေက တမျိုးပြောာင်းလာနိုင်သလား...
ဒါမှမဟုတ် အချိန်က စကားပြောတယ်ဆိုသလို... လုပ်စရာရှိတာဆက်လုပ်ရင်း နောက် ၂ နှစ်လောက် စိတ်ရှည်ရှည်စောင့်နိုင်မယ်ဆိုရင် ဒီမိုကရေစီနဲ့ လူ့အခွင့်ရေးကို ဦးစားပေးတဲ့ အမေရိကန်အစိုးရနဲ့ ကမ္ဘာ့အခင်းအကျင်း ပြန်ပေါ်လာနိုင်သလား...
ဒါက စင်မြင့်ပေါ်မှာ သံအမတ်ကြီး ဦးကျော်မိုးထွန်း စကားပြောနေတာကို ငေးကြည့်ရင်း... လွန်ခဲ့တဲ့နှစ် ၂၀ အခြေနေနဲ့ ယှဉ်ပြီးတွေးတောမိတာတွေပါ။
လောလောဆယ်ကတော့ လူစုမကွဲခင် တွေ့မိသမျှ ABSDF ရဲဘော်ဟောင်းတွေ၊ လူဘောင်သစ်တွေ၊ နိုင်-ကျဉ်းတွေ၊ NLD တွေ၊ သတင်းသမားတွေ၊ ၂၀၂၁ နောက်ပိုင်းရောက်လာတဲ့ မျိုးဆက်သစ်ထဲက ကိုယ်တွေ့ဖူးသူတွေကို အပြေးအလွှား လိုက်နှုတ်ဆက်ရပါအူးမယ်...။
---
(အပိုင်း ၂ - “မေရိလန်းမှာ ခနတာ”- ကို အောက်တိုဘာ ၂၈၊ အပိုင်း ၃ - “Fort Wayne မြို့အဝင်” ကိုတော့ ABSDF နှစ်ပတ်လည်အမီ အောက်တိုဘာ ၃၁ မှာ တင်ပြရန် စီစဉ်ထားပါကြောင်း)။
0 comments:
Post a Comment