ဖြူ-နီ-၀ါ-စိမ်း အရောင်များနဲ့ ကမ္ဘာ့စက်ဘီးပြိုင်ပွဲ သင်္ကေတများ

(၂၀၁၆ အတွက် အရောင်သတ်မှတ်ခြင်းကုို ဓတ်ပုံနဲ့တကွ အောက်ဆုံးမှာ ဖေါ်ပြထားပါတယ်)။
...

မြန်မာနုိုင်ငံမှာ တာဝေးပြိုင်ပွဲ သိပ်မထွန်းကားသေးတဲ့အတွက် နုိုင်ငံတကာပြိုင် ပွဲတွေက ဖြူ-နီ-၀ါ-စိမ်း အရောင်သင်္ကေတတွေကုို နားလည်သူနည်းသေးတယ် လုို့ထင်ပါတယ်။ ကျနော်ကိုယ်တုိုင် ပြည်နယ်-တုိုင်း ပြိုင်ပွဲ ၄ ကြိမ်နဲ့ တခွန်စုိုက် တကြိမ်ပြိုင်ခဲ့ဖူးပေမဲ့ နုိုင်ငံတကာပွဲတွေအကြောင်း ကောင်းကောင်းလေ့လာ ခွင့်မရခဲ့ပါ။

(၂၀၁၁ ခုနှစ်က Tour de France မှာ အ၀ါ၊ အစိမ်း၊ ပျောက်ကျားနဲ့အဖြူရောင် ရသူများ)

အခု အီတလီနုိုင်ငံမှာ ကျင်းပနေတဲ့ Giro d'Italia ပြိုင်ပွဲဟာ သတင်း ၃ ပတ်ကြာ ကျင်းပတဲ့ မဟာပြိုင်ပွဲ ၃ ခုထဲက တခုဖြစ်ပါတယ်။ အခြားပွဲ ၂ ခုကတော့ လာမဲ့ ဇူလုိုင်လ ၄ ရက်နေ့ကနေ ၂၆ ရက်အထိကျင်းပမဲ့ Tour de France ပွဲနဲ့ သြဂုတ်လ ၂၂ ကနေ စက်တင်ဘာ ၁၃ အထိကျင်းပမဲ့ Vuelta a España တုို့ဖြစ်ပါတယ်။ 

ဒီ ၃ ပွဲမှအပ ကျန်ပွဲတွေဟာ သတင်းတပတ် သို့မဟုတ် ၈ ရက်ကနေ အောက် ပွဲစဉ်များသာဖြစ်ပါတယ်။ အဲဒီထဲက အများစုဟာ ဥရောပမှာဖြစ်ပေမယ့် အခု နောက်ပုိုင်း အမေရိကန်ပွဲတွေဟာလည်း အတော်လူစိတ်ဝင်စားမှုများပါတယ်။

မဟာပြိုင်ပွဲ ၃ ခုရဲ့အရောင်ရွေးချယ်မှုကိုပြောရမယ်ဆုိုရင် အီတလီမှာကျင်းပတဲ့ Giro d'Italia က အမှတ်အများဆုံးနဲ့ ပထမ ရသူကုို ပန်းရောင်အကျီပေး ပါတယ်။ ပြင်သစ်မှာကျင်းပတဲ့ Tour de France က အ၀ါရောင် အကျီပေးပြီး စပိန်မှာကျင်းပတဲ့ Vuelta a España က အနီရောင်အကျီပေးပါတယ်။

အဲဒီ ပထမ အရောင်မှအပ ကျန်တဲ့ အစိမ်း၊ အဖြူနဲ့ အဖြူ-အနီ ကွက်ကြား အကျီတွေကတော့ အတူတူပါပဲ။ အစိမ်းရောင်ရဲ့သင်္ကေတက အမှတ်အများဆုံး လူကုိုပေးတာဖြစ်ပါတယ်။ အဖြူရောင်က လူငယ်ခြေတက်တွေကို ပေးတာဖြစ် ပြီး အဖြူနဲ့-အနီကွက်ကျားကတော့ တောင်တက်ဘုရင်တွေကိုပေးတာဖြစ်ပါ တယ်။

မြန်မာအသင်းတွေနဲ့ နုိုင်ငံတကာအသင်းတွေကြား မတူတဲ့နောက်တချက်က တော့ အသင်းဖွဲ့စည်းပုံပါ။ ၁၉၈၈ အထိ မြန်မာအသင်းတွေရဲ့ဖွဲ့စည်းပုံမှာ ၇ ဦးသာရှိပါတယ်။ ဒါကလည်း မြန်မာနုိုင်ငံမှာကျင်းပနေကြ ကွင်းတွင်းပွဲ ၆ ပွဲနဲ့ လမ်းပေါ်ပွဲတပွဲပေါ်အခြေခံပြီး တပွဲတယောက်နှုန်းနဲ့ ၇ ဦးရွေးထားတာလုို့ ယူဆ ရပါတယ်။

နုိုင်ငံတကာအသင်းတွေမှာတော့ တသင်းမှာစက်ဘီးသမား ၂၀-၃၀ ခန့်ရှိပေမဲ့ တပွဲမှာ ၉ ဦးစီသာဝင်ပြိုင်ခွင့်ရှိပါတယ်။ ၉ ဦးကို ၃ သင်းလောက်ခွဲပြီး နေရာခွဲ ပြိုင်လေ့ရှိပါတယ်။ ဥပမာ အခုဆုိုရင် အီတလီမှာ သတင်း ၃ ပတ်ကြာပွဲကြီး ကျင်းပနေသလုို ကားလီဖုိုးနီးယားမှာလည်း ၈ ရက်ကြာပွဲကြီးတခုကျင်းပနေပါ တယ်။ ဒါကြောင့် တသင်းစီကနေ စက်ဘီးသမား ၁၈ ဦး တပြိုင်တည်း ၀င်ပြိုင် နေတယ်လုို့ဆုိုနုိုင်ပါတယ်။

ဒီစက်ဘီးအသင်းတွေဟာ UCI ခေါ် နုိုင်ငံတကာစက်ဘီးအဖွဲ့ချုပ်က သတ်မှတ် ထားတဲ့ စံချိန်းစံညွန်းတွေနဲ့အညီဖွဲ့စည်းထားတာဖြစ်ပြီး ကြေးစားဘော်လုံးသ မားတွေလုိုပဲ စက်ဘီးသမားတွေကိုလည်း ဈေးကြီးပေး ငှားကြရပါတယ်။ ဘောလုံးသမားတွေလုိုပဲ ရာသီအလုိုက် အသင်းပြောင်းကြပါတယ်။

အဓိကပွဲတွေဟာ ဥရောပနဲ့ အမေရိကားမှာသာရှိပြီး အာရှမှာမရှိပါ။ ကြေးစား စက်ဘီးသမားတွေထဲမှာလည်း အာရှသားတွေကို (တရုတ်ဦး၊ ဂျပန်တဦးမှအပ) မတွေ့မိသလောက်ပါပဲ။ ဒါ ပေမယ့် အာရှလုိုပဲ ဆင်းရဲပြီး ကိုယ်ခန္တာအချိုးအစားငယ်တဲ့ တောင်အမေရိက တုိုက် (အထူးသဖြင့် ကိုလံဘီယာ) က စက်ဘီးသမားတွေ ဒါဇင်နဲ့ချီရှိလာတာ ကတော့ အံ့သြစရာပါ။

မနှစ်က Giro d'Italia ပွဲမှာ ပန်းရောင်အကျီရသွားတဲ့ Nairo Quintana ဆုိုရင် ကုိုလံဘီယာနုိုင်ငံသားဖြစ်သလုို အခုပြိုင်ပွဲဝင်နေဆဲ Rigoberto Uran (Col) ဟာလည်း ကိုလံဘီယာနုိုင်ငံသားပါပဲ။ ကွင်တားနားဟာ ဒီပွဲကိုမ၀င်ပဲနဲ့ ပြင်သစ်ပွဲအတွက် အထူးလေ့ ကျင်နေတယ်လို့ ယူဆရပါတယ်။

ဒီပွဲတွေအားလုံးထဲက မဟာ့မဟာပြိုင်ပွဲကတော့ လာမဲ့ ဇူလုိုင်လ ၄ ရက်နေ့မှာ စတင်မဲ့ Tour de France ပါပဲ။ အခု ကွင်းခွဲပြီး ကစားနေကြတဲ့ စက်ဘီးသမား အားလုံး Tour de France ကုို ၀င်ကြမှာပါ။ အဲဒီပွဲမှာ ပထမ အ၀ါရောင်အကျီရ ဖုို့ဆိုတာ တကယ့်ကုိုမလွယ်တဲ့ကိစ္စ၊ တကယ့်သူရဲကောင်းရွေးပွဲတခုပါပဲ။

ဒီလုိုမလွယ်တဲ့ပွဲကို ၇ နှစ်ဆက်တုိုက် ပထမ ရခဲ့သူကတော့ အမေရိကန်မှ Lance Armstrong ပါပဲ။ ဒါပေမယ့် နောက်ပုိုင်းမှာတော့ တားမြစ်ဆေးသုံးတယ်ဆုို ပြီး ဆုတွေအားလုံးကိုပြန်ရုတ်သိမ်းတဲ့အပြင် ဒေါ်လာသန်း ရာနဲ့ချီရှိတဲ့ စပွန်ဆာတွေကိုပါ ပြန်လျှော်ခုိုင်းနေတဲ့အတွက် ဒုက္ခများနေပါတယ်။

ဒီပွဲတွေဟာ မြန်မာပရိတ်သတ်နဲ့ဝေးတဲ့အပြင် မြန်မာအများစုဟာ ဘော်လုံးကုို သာအဓိကစိတ်ဝင်စား (လောင်းကြတယ်) ကြတယ်လို့သိရပါတယ်။ ဘယ်လုိုပဲ ဖြစ်ဖြစ် ဒီစာမျက်နှာလေးဟာ စက်ဘီးအားကစားကို တကယ်စိတ်ဝင်စားတဲ့ မြန်မာပရိတ်သတ်၊ အထူးသဖြင့် မြန်မာစက်ဘီးသမားတွေအတွက် တစုံတရာ အကျိုးရှိမယ်ဆုိုရင် နေ့စဉ်ရေးသားရကျိုးနပ်တယ်လို့ ယူဆထားပါတယ်။

ခင်မင်လေးစားစွာဖြင့်

ထက်အောင်ကျော်။

......

နောက်တုိုး တင်ပြချက်...

...

အထက်ပါဖေါ်ပြချက်ဟာ ၂၀၁၅ ခုနှစ် မေလကသိထားသမျှကိုရေးထားခြင်းဖြစ်ပါတယ်။ အဲဒီဖေါ်ပြချက်ဟာ Grand Tour ၂၁ ရက်တာပွဲတွေအတွက်မှန်ပေမဲ့ ၁၀ ရက်တာ၊ ၇ ရက်တာ၊ ၄-၅ ရက်တာပွဲတွေမှာတော့ မတူတဲ့ သတ်မှတ်ချက်တွေရှိတာတွေ့ရပြန်ပါတယ်။

ဥပမာ အခု ၂၀၁၆ ရာသီအစကနေ အခု မေလ လယ်လောက်အထိပွဲစဉ်တွေကိုအကြမ်းပြန်သုံးသပ်ကြည့် ပါ။ ဇန်နာဝါရီမှာစတင်တဲ့ သြစတေလျနုိုင်ငံ Tour Down Under ပွဲမှာ ပထမ ရသူ Simon Gerrans (Aus) Orica–GreenEdge ကို အနီရောင်အကျီပေးလုိုက်ပါတယ်။ တချိန်တည်း အာဂျင်တီးနားမှာကျင်းပတဲ့ Tour de san Luis ပွဲမှာ ပထမ ရသူ Dayer Quintana (movistar) ကုိုတော့ အပြာရောင်အကျီပေးပါတယ်။ 

ဖေဖေါ်ဝါရီအတွင်းကျင်းပတဲ့ Dubai Tour မှာ ပထမ ရသူ Marcel Kittel (Ger) Etixx-QuickStep ကုို အနီရောင်အကျီ ပေးပါတယ်။ တခါ အဲဒီပွဲအပြိး ဆက်တုိုက်ကျင်းပတဲ့ Tour of Qatar မှာ ပထမ ရသူ Mark Cavendish (GBr) Dimension Data ကိုတော့ ရွှေရောင်အကျီပေးတာတွေ့ရပါတယ်။ ဖေဖေါ်ဝါရီလကုန်ခါနီးမှာကျင်းပတဲ့ Tour of Oman မှာ ပထမ ရသူ Vincenzo Nibali (Ita) Astana Pro Team ကုို အနီရောင်အကျီပေးပါတယ်။ ဒါပေမဲ့ အဲဒီအနီရောင်နဲ့ Kittel ရတဲ့ အနီရောင် နဲနဲလေးကွာနေပြန်ပါတယ်။ 

ဒီနှစ်အတွက် ဥရောပမှာ ပထမဆုံးကျင်းပတဲ့ ပေါ်တူဂီက Volta ao Algarve ပွဲမှာ ပထမ ရသူ Geraint Thomas (Gbr) Team Sky ကုို အ၀ါရောအကျီပေးပါတယ်။ စပိန်နုိုင်ငံ မြေထဲပင်လယ်ဖက်မှာ ၅ ရက်ကြာကျင်းပခဲ့တဲ့ Ruta del Sol ပွဲမှာ ပထမ ရသူ Alejandro Valverde Belmonte (Spa) Movistar Team ကုိုတော့ အနီရောင်အကျီပေးပါတယ်။

မတ်လလယ် အီတလီမှာကျင်းပတဲ့ Tirreno-Adriatico ပွဲမှာ ပထမ ရသူ Greg Van Avermaet (BMC) ကိုတော့ အပြာရောင်အကျီပေးပါတယ်။ အဲဒီပွဲ နဲ့တပြိုင်တည်းကျင်းပတဲ့ ပြင်သစ်က Paris-Nice ပွဲမှာ ပထမ ရသူ Geraint Thomas (GBr) Team Sky ကုိုတော့ အ၀ါ ရောင်အကျီပေးပါတယ်။ 

မတ်လကုန်ပုိုင်း စပိန်နုိုင်ငံ ဘာစီးလုိုးနားဒေသမှာကျင်းပတဲ့ Volta a Catalunya ပွဲမှာ ပထမ ရသူ Nairo Quintana (Col) Movistar Team ကိုတော့ အဖြူရောင်အကျီပေးပါတယ်။ ဧပြီလလယ်ပုိုင်းက စပိန်နုိုင်ငံ Basque ဒေသမှာ ၆ ရက်ကြာကျင်းပနေတဲ့ Vuelta al Pais Vasco ပွဲမှာ ပထမ ရသူ Alberto Contador (Spa) Tinkoff Team က အ၀ါရောင် အကျီရပါတယ်။

ဧပြီလကုန်ပုိုင်းက အီတလီနုိုင်ငံ Trentino ဒေသမှာ ၄ ရက်ကြာကျင်းပခဲ့တဲ့ Giro del Trentino ပွဲမှာ ပထမ ရသူ Mikel Landa Meana (Spa) Team Sky ကုိုတော့ ကြက်သွေးရောင်အကျီပေးတာတွေ့ရှိရပါကြောင်း ဓာတ်ပုံတွေနဲ့တကွ ဖေါ်ပြလိုက်ရပါတယ်။         ။

Posted in: