“အီရန်မှာ စစ်ဖြစ်တာနဲ့ ရန်ကုန်ကလူတွေ ဓာတ်ဆီ တန်းစီတိုးရတာ ဘာဆိုင်လို့လဲ...”
(၆ မတ် ၂၀၂၆)
“ညောင်ဦးကမ်းပါးပြိုတာနဲ့ စမ္ပာနဂိုရ်က နွားမပေါင်ကျိုးတာ ဘာဆိုင်လို့လဲ...” ဆိုတဲ့ နိုင်တီးဂွမ်တီးက အဆိုအမိန့်တွေကို ပိတ်သတ်အတော်များများ ကြားဖူးကြပါလိမ်မ့ယ်။
အခုတော့ အဲလို မဟုတ်တော့ဘူး။ မိုင် ၁၀၀ လောက်သာဝေးတဲ့ အညာဒေသနဲ့ အောက်ပြည်အောက်ရွာအခြေနေ ဘာမှမဆိုင်ဘူးဆိုပြီးပြောနေရာကနေ ... အခု မိုင် ၅၀၀၀ လောက်ဝေးတဲ့ အီရန်စစ်ပွဲကြောင့် ရန်ကုန်ကလူတွေ ဓာတ်ဆီ တန်းစီနေရပြီ၊ စုံဂဏန်း- မဂဏန်းတွနဲ့ အလုပ်ရှုပ်နေကြပြီ...
ဘာကြောင့်လဲ...
ဒီနေ့ ကမ္ဘာကြီးက ပိုကျဉ်းလာလို့လား... ကမ္ဘာလွှမ်းခြုံစနစ်ကြီးက ပိုကျယ်ပြန့်လာလို့လား...
ဒါက စီးပွားရေး- လောင်စာပြသာနာ ဂယက်ရိုက်မှုပဲရှိပါသေးတယ်။
---
နိုင်ငံရေး- စစ်ရေးအရပြောစရာတွေက အများကြီး။
စစ်ရေးအရ လက်ဦးမှုရအောင် အရင်တိုက်ရတာပါလို့ စစ်တိုက်သူတွေဘက်က အကြောင်းပြနေပေမယ့် စစ်ရဲ့ဘေးထွက်ဆိုးကျိုးကို ခံရသူတွေက စစ်တိုက်သူတွေချည်း မဟုတ်ပါဘူး။
ခုနက ရှေ့မှာတင်ပြခဲ့တဲ့ မိုင် ၅၀၀၀ အဝေးက လူတွေတောင် ဓတ်ဆီတန်းစီနေရတယ်ဆိုရင် စစ်ပွဲဖြစ်ရာ အနီးနားဝန်းကျင်ကလူတွေ ဘယ်လိုဖြစ်နေလေမလဲ...။ လူဦးရေ ဘယ်လောက်အထိကို ဂယက်ရိုက်မှုရှိနေပြီလဲ...
အခုဆို အရှေ့အလယ်ပိုင်းဒေသက လေယာဉ်ကွင်းတွေ အကုန်ပိတ်ထားရလို့ ဥရောပကနေ အာရှသွားသူတွေ၊ အတော်များများက ဈေးပေါ်တဲ့ အရှေအလယ်ပိုင်း ထရန်စစ် နဲ့ ဝယ်ကြတာဆိုတာ့ အခု တိုင်ပတ်နေကြပြီ။
---
နိုင်ငံရေးအရကတော့ ဒီစစ်ပွဲဟာ နိုင်ငံတကာဥပဒေအရ တရားဝင်မှုရှိရဲ့လား... မေးခွန်းထုတ်မှုတွေ အများကြီးရှိလာနေပါတယ်။
တနည်းအားဖြင့်ပြောမယ်ဆိုရင်တော့ ဟောလီးဝုဒ် ရုပ်ရှင်တွေထဲကလို တရားဝင်လမ်းကြောင်းနဲ့ ဆွေးနွေးပွဲအကြိမ်ကြိမ်လုပ်တာ အဖြေမထွက်ဘူး။ ကုလသမဂ္ဂကလည်း ဒီကိစ္စမျိုးမှာ ဘာမှ အားကိုးမရဘူး။
အာဏာရှင်ဆိုတာ ဒီလိုပဲ နည်းမျိုးစုံနဲ့အချိန်ဆွဲပြီး အာဏကို ဆွဲဆန့်နေကြတာဖြစ်တယ်။ ဒီတော့ ဒီလူတွေကို ဥပဒေပြင်ပကနေ ရတဲ့နည်းနဲ့ တိုက်ခိုက်ဖြိုချမှရမယ်... ဒီလို ဖြိုချတာကို အဖိနှိပ်ခံလူထုက လိုလားကြတယ်... ဒီလို အမြင်တွေလည်းရှိနေပါတယ်။
ဒါပေမယ့် ပြသာနက...
စစ်ပွဲဆိုတာ စရလွယ်သလောက် အဆုံးသတ်ရခက်ပါတယ်။
ဘယ်လောက်ကြာမယ်၊ ဘာတွေဆက်ဖြစ်မယ်ဆိုတာ ထိန်းချုပ်ရခက်ပါတယ်။
အခုပဲ အရှေ့အလယ်ပိုင်းက ရေနံသဘောၤလမ်းကြောင်းတွေပိတ်နေလို့ဆိုပြီး အိန္ဒိယကို ရုရှားဆီကနေ ရေနံဝယ်ယူခွင့် အမေရိကန်က ပြန်ခွင့်ပြုလိုက်ပြီလို့ ကြားရပါတယ်။
---
ဆိုတော့ ဘာတွေဆက်ဖြစ်လာမလဲ...
ဟောလီးဝုဒ်ရုပ်ရှင်ထဲမှာလို ... “နောက် ၆ လကြာပြီးတဲ့အခါ...” ဆိုပြီး စာတန်း ထိုးလိုက်လို့ရရင်တော့ မဆိုးဘူး...
ဒါပေမယ့် အခုက ရုပ်ရှင်ရိုက်တာနေတာ မဟုတ်လေတော့...
ကမ္ဘာသူ ကမ္ဘာသားတွေ ငြိမ်းချမ်းကြပါစေ...။
(ပုံတွေကတော့ မန်းလေးက အူးအူးနေလင်းရဲ့ ဓာတ်ဆီတန်းစီပုံနဲ့ အော်စလိုက စက်ဘီးစီးဖို့ အားပေးတဲ့ပုံပါ။ စက်ဘီးစီးစေချင်ရင် စက်ဘီးလမ်းလည်း လုပ်ပေးဖို့လိုပါတယ်။ ကားလမ်းပေါ် တက်စီးရတာ အဆင်မပြေပါ။ ရန်ကုန်က အူးလေးတယောက်ကတော့ ဘက်ထရီဘီး (e-bike) ဝယ်ထားတာ တွေ့မိပါကြောင်း)
0 comments:
Post a Comment