Monday, February 23, 2015

ပူးခက်မှ မောင်းမကန်သုို့

တနသာင်္ရီ အပတ်စဉ် ၃၆။
(ဖေ ၂၃- မတ် ၁ ရက်)

ပြည်တော်ပြန်ခရီးစဉ် ခေါက်အတွင်း မောင်းမကန်ကမ်းခြေဆီ ကြိမ်ထက်မနည်း ရောက်ခဲ့ပါတယ်။ ရောက်သွားတဲ့အချိန်တုိုင်းဟာ ညနေပုိုင်းဖြစ်တဲ့အတွက် ပင်လယ်ထဲနေလုံးကြီးဝင်သွားတဲ့အလှကုို အသေချာကြည့်ပြီးမှ ပြန်ခဲ့တာချည်းပါပဲ။ အနောက်ဖက်ပင်လယ်မှာ နေ၀င်တဲ့အလှ ဘယ်လောက်အထိ ကြည့်မ၀ဖြစ်ရသလဲဆုိုတာကိုတော့ ရေးပြဖုို့မလွယ်ပါ။ ရောက်ဖူး၊ ကြည့်ဖူးသူတွေမှသာ ခံစားနုိုင်လိမ့်မယ် ထင်ပါတယ်။

(မောင်းမကန်ကမ်းခြေရဲ့ နေ၀င်ချိန်) ဓာတ်ပုံ-ထက်အောင်ကျော်

ဒီလုိုနေ၀င်ချိန်အလှအပကို အမိအရဓာတ်ပုံရုိုက်နုိုင်၊ ခံစားနုိုင်ဖုို့အတွက် နေမ၀င်ခင် တနာရီအလုိုမှာ ကတည်းက ရေကူးတာ၊ စကားဖောင်ဖွဲ့ပြောတာတွေကို အပြီးဖြတ်ထားရပါတယ်။ ထူးခြားတာကတော့ ထားဝယ်ကသူငယ်ချင်း တွေ ရေကူးဖုို့ သိပ်စိတ်ဝင်စားပုံမပြပါဘူး။ အရက်ဝုိုင်း၊ စားသောက်စားပွဲ ၀ုိုင်းတွေမှာလူစည်သလောက် ရေကူးဖုို့ စည်းရုံးတဲ့အခါ တဦးနှစ်ဦးထက် ပုိုရလေ့မရှိပါ။ တနှစ်မှတခေါက်ရောက်တဲ့သူက အသဲအသန်ဖြစ်နေပေမဲ့ အပတ် စဉ်လုိုလုို ရောက်နေသူတုို့အတွက် ရင်မခုန်တော့တာလဲဖြစ်နုိုင်ပါတယ်။

ရောက်ဖူးသလောက်ကမ်းခြေတွေထဲမှာတော့ မောင်းမကန်ကမ်းခြေက အပြေပြစ်ဆုံးနဲ့အရှည်လျားဆုံးပါပဲ။ ဒီလုိုပြောလုိုက်တော့ ‘'ခင်ဗျားက ကမ်းခြေဘယ်နှစ်ခုရောက်ဖူးလုို့လဲ’' ဆုိုပြီးမေးစရာရှိလာနုိုင်ပါတယ်။ မောင်းမကန်နဲ့ စက်စဲလောက်သာရောက်ဖူးပြီး ငပလီ၊ ချောင်းသာ၊ ငွေဆောင်တွေကိုမရောက်ဖူးသေးပါ။ ဒါပေမယ့် တနသာင်္ရီတုိုင်း ရဲ့အခြားတဖက်မျက်နှာမှာရှိတဲ့ ပူးခက်၊ ဖန်င၊ ပရာကျွတ်၊ ဟွာဟင်၊ ချာအမ်းကမ်းခြေတွေဆီ ရောက်ခဲ့ဖူးပါတယ်။

ရခုိုင်ပြည်နယ်ဖက်က ငပလီ၊ ဧရာဝတီတုိုင်းဖက်က ချောင်းသာနဲ့ငွေဆောင်ကိုခဏထားပြီး တနသာင်္ရီတုိုင်း ဟုိုဖက် ဒီဖက်က ကမ်းခြေ ခုကို ဒီနေရာမှာရွေးချယ်ဆွးနွေးချင်ပါတယ်။ ထုိုင်းနုိုင်ငံတောင်ဖက်အငူရှိ ပူးခက်မြို့က ဖန် တောင်းကမ်းခြေနဲ့ မြန်မာနုိုင်ငံတောက်ဖက်အငူ ထားဝယ်မြိှု့ရှိ မောင်းမကန်ကမ်းခြေ တုို့ဟာ သဘာဝအနေထား အရအတော်တူတယ်လို့ ထင်မိပါတယ်။

ဖူးခက်မြိုနဲ့ဖန်တောင်ကမ်းခြေဟာ ၂၈ ကီလုိုမီတာဝေးတယ်ဆုိုပေမဲ့ လမ်းတွေကောင်းတာ၊ ဘတ်စ်ကားတွေ၊ လုိုင်း ကားတွေပုံမှန်ပြေးနေတာကြောင့် နာရီဝက်အတွင်းရောက်နုိုင်ပါတယ်။ ထားဝယ်နဲ့မောင်းမကန်ကတော့ ၁၂ မုိုင် (ကီလုို ၂၀ နိးပါး) သာဝေးပေမဲ့ လမ်းတွေပြင်နေဆဲ၊ ပုံမှန်ဆွဲတဲ့ ဘတ်စ်ကား၊ လုိုင်းကားမရှိသေးတဲ့အတွက် မော်တော်ဆုိုင်ကယ်တွေ၊ အငှားကားတွေကုိုသာ အားကိုးနေကြရဆဲဖြစ်ပါတယ်။ အကွာအဝေးချင်းမနီးမဝေးတူ သလုို တောင်တွေကျော်ပြီးလာရတာ၊ တောင်ပေါ်ကနေအနောက်ဖက်ပင်လယ်ကိုမြင်ရတဲ့ မြင်ကွင်းတွေဟာ အတူတူလုိုခံစားမိပါတယ်။

ဒါပေမယ့် ဖူးခက်မှာ နုိုင်ငံတကာလေယဉ်ကွင်းရှိပြီး ထားဝယ်မှာ ပြည်တွင်း လေယဉ် - စီးလောက်သာ ဆင်းနုိုင် တဲ့ ကွင်းသာရှိပါတယ်။ ပူးခက်မြို့ဟာ နုိုင်ငံတကာအဆင့်မှီမြို့ကြီးတခုလုိုဖြစ်လာနေပြီး ထားဝယ်ကတော့ အခုမှ အာဏာရှင်စနစ်အောက်ကနေ နုိုးထခါစ၊ နုိုင်ငံတကာဈေးကွက်ဆီ တုိုးဝင်ဖို့ခြေလှမ်းပြင်ကစပဲ ရှိပါသေးတယ်။ ဒီတော့ ဖန်းတောင်ကမ်းခြေဆီရောက်လာတဲ့ ကမ္ဘာလှည့်ခရီးသည်ဦးရေနဲ့ မောင်းမကန်ဆီရောက်လာတဲ့ ဦးရေကုို ဘယ်နှိုင်းယှဉ်လို့ဖြစ်ပါ့မလဲ။ ဖန်းတောင်းဆီ တနေ့ တထောင်ဝင်ရင် မောင်းမကန်ဆီ တနေ့ ၁၀ ဦးက နေ ၅၀ အထိ လာဖို့ မသေချာသေးပါ။

(နေ၀င်ချိန်မှာ အေးအေးလူလူ လမ်းလျောက်နေတဲ့ ကမ္ဘာလှည့်ခရီးသည်စုံတွဲတတွဲ) ဓာတ်ပုံ-ထက်အောင်ကျော်။

ဒါပေမယ့် ဒီလုို လူသိပ်မလာသေးတာကိုက ကံကောင်းပါတယ်ဆုိုပြီး နေ၀င်ချိန် ဆည်းဆာအလှကို ထုိုင်ငေးနေတဲ့ ဂျာမဏီက ခရီးသွားဧည့်သည်တဦးကပြောပါတယ်။ ‘’လူအများကြီးလာရင် သဘာဝအလှတွေ ပျက်စီးသွား လိမ့်မယ်။ ပူးခက်မှာ ဒီလုိုအေးအေးဆေး နေ၀င်ချိန်ကို ထုိုင်ငေးခွင့်မရှိတော့ဘူးလေ’’ လုို့သူကဆုိုပါတယ်။ ဒါပေမယ့် ထားဝယ်က သူငယ်ချင်းတွေကတော့ သူ့ပုံကုိုကြည့်ပြီး မျက်စိနောက်နေပုံရပါတယ်။

ဘာကြောင့်လဲဆုိုရင် အတွင်းခံဘောင်းဘီတထည်ကလွဲပြီး သူ့တကုိုယ်လုံး ဘာအ၀တ်မှမရှိပါ။ နေရောင်ခံထား တဲ့အတွက် တကုိုယ်လုံး နီညိုနေပါတယ်။ တကယ်တော့ တဆောင်းလုံး နေရောင်မရတဲ့ ဥရောပသားတွေဟာ ဒီလုိုနေရောင်ခံခွင့်ရဖုို့၊ ဒီလုို အသားအရေရဖို့အတွက် ဒေါ်လာထောင်၊ သောင်းချီအကုန်ခံပြီး အာရှကမ်းခြေတွေဆီ ခရီးထွက်လာတာ မဟုတ်ပါလား။ ဒါက ဥရောပပြန် ကျနော့်အမြင်ပါ။ ဒါပေမယ့် ထားဝယ်ဒေသခံတွေအမြန်မှာ တော့ ဒီလူ့ပုံက နည်းနည်းရုိုင်းသလုိုဖြစ်နေ သလားမသိပါ။ မိတ်ဆွေတဦးကဆုို ‘’ခင်ဗျား ဘာဘာသာကို ကုိုး ကွယ်သလဲ’’ ဆုိုပြီး သွားမေးတဲ့ အထိပါပဲ။ 

မြန်မာနုိုင်ငံသားတွေအတွက် ဒီမေးခွန်းဟာ အထူးအဆန်းမဟုတ်ပေမဲ့ အနောက်တုိုင်းမှာ ကိုးကွယ်ရာဘာသာကို မေးခွင့်မရှိပါ။ မြန်မာနုိုင်ငံကမှတ်ပုံတွေမှာလုို ကုိုးကွယ်ရာဘာသာကို မှတ်ပုံတင်ထဲ ထည့်ရေးလေ့မရှိပါ။ ဆုိုလုိုတာ က ပူးခက်လုိုကမ္ဘာ့ဈေးကွက်ဆီ တုိုးဝင်ဖုို့ပြင်နေတဲ့ ထားဝယ်ဒေသမှာ အသစ်ရောက်လာမဲ့ ဘာသာမတူ၊ ယဉ်ကျေး မှု မတူ။ စဉ်းစားပုံမတူတဲ့ နုိုင်ငံတကာဧည့်သည်တွေကို လက်ခံဖုို့ ရုပ်ပုိုင်း၊ စိတ်ပုိုင်းဆုိုင်ရာအရ အဆင့်သင့်ဖြင့်နေရဲ့ လားဆုိုတာ မေးခွန်းထုတ်စရာပါ။ 

ထူးခြားတာက ဒီပုဂ္ဂိုလ်ဟာ ကျနော်တုို့လုို ရန်ကုန်လေယဉ်ကွင်းကနေ၀င်လာသူမဟုတ်။ ထုိုင်းနုိုင်ငံ ရနောင်းဖက် ကနေ နယ်စပ်ဖြတ်ဝင်လာသူဖြစ်ပါတယ်။ ‘’ရနောင်း-ကော့သောင်းကနေ လှေနဲ့ဝင်လာတော့ စရိတ်လည်း အများ ကြီးသက်သာတယ်။ နီးလည်းနီးတယ်။ လှပတဲ့ကျွန်းတွေ၊ ကမ်းခြေတွေလဲအများကြီးမြင်ခွင့်ရခဲ့တယ်’’ လုို့ သူက ဆုိုပါတယ်။ ‘’ဘာလုို့ ကန်ချနပူရီ-ထီးခီးလမ်းကနေ မ၀င်တာလဲ’’ ဆုိုပြီး ကျနော်ကမေးကြည့်တော့ ဒီလမ်း ကြောင်း သူမသိဘူး။ ထုိုင်းမှာရှိတဲ့ ခရီးသွားကုပ္ဗဏီတွေကလဲ ဒီလမ်းရှိတယ်လို့ သူကိုမပြောကြဘူးလုို့ သူကဆုိုပါ တယ်။

ထားဝယ်ပြီးရင် ရေး၊ မော်လမြိုင်၊ ဘားအံဖက်ဆီ ကားလမ်းနဲ့ ဆက်သွားမယ်လို့ သူကပြောပါတယ်။ ဒါဟာ သူရဲ့ ဒုတိယအကြိမ် မြန်မာပြည်ခရီးစဉ်ဖြစ်ပြီး ပထမ အခေါက်တုန်းကတော့ ရန်ကုန်လေယဉ်ကွင်းကိုဝင်၊ ချောင်းသာ၊ ငွေဆောင်ကမ်းခြေတွေ၊ ပုဂံ၊ အင်းလေးဖက်တွေဆီသွားပြီပြီလုို့သိရပါတယ်။ အခု ဘယ်မှာတည်းသလဲဆုိုတော့ Coconut House မှာတည်းတယ်လုို့ဆုိုပါတယ်။ ကျနော် သိသလောက်ဆုိုရင် အခုချိန်ထိ မောင်းမကန်ကမ်းခြေမှာ ဟုိုတယ်တလုံး၊ ဘန်ဂလိုတလုံးနဲ့ တည်းခုိုခန်းတလုံးပဲ ရှိပါသေးတယ်။

အဲဒီထဲမှာမှ Coconut House ဟာ နုိုင်ငံခြားသားတွေကြားမှာ လူသိများနေပါတယ်။ ဘာကြောင့်လဲဆုိုပြီး ကျနော် သွားကြည့်တော့ ကမ်းခြေနဲ့နည်းနည်းအလှမ်းကွာတဲ့ အုန်းပင်တွေကြားမှာ ၀ါးတဲလုိုပုံစံမျိုးနဲ့ အခန်းတွေဆောက် ပေးထားတာတွေ့ရပါတယ်။ တခါပုိုင်ရှင်က အင်္ဂလိပ်စကားအပြင် ပြင်သစ်စကား ပါပြောတတ်တဲ့အတွက် ဘာသာ စကားပုိုပေါက်ပြီး အနောက်တုိုင်းသားတွေအကြိုက်ကုို ပုိုသိတဲ့သဘော၊ ဒါကြောင့် လာသမျှကျောပုိုးအိတ်ဧည့် သည် အတော်များများ သူတုို့ဆီရောက်သွားကြတာဖြစ်မယ် ထင်ပါတယ်။

(သဲသောင်ပြင်တလျောက် ဆက်တုိုက်ဆောက်ထားတဲ့ တဲတန်းများ) ဓာတ်ပုံ-ထက်အောင်ကျော်။

ဒီလုိုတွေးရင်းနဲ့ ကမ်းခြေတလျောက်မှာ ဟုိုတစု ဒီတစုဖြစ်နေတဲ့ ရေသန့်ဗူးခွံ၊ ဘီယာဗူးခွံနဲ့ အခြားအမှိုက်တွေဆီ အကြည့်ရောက်သွားပါတယ်။ ပြီးတော့ သဲသောင်ပြင်တလျောက် နေရာလပ်မကျန်အောင် ဆက်တုိုက် ဆောက်ထားတဲ့ စားသောက်ဆုိုင် တဲတန်းတွေ။ ရောက်ဖူးတဲ့တခြားကမ်းခြေတွေမှာ သဲသောင်ပြင်ပေါ် ဒီလုို တဲဆောက်ထားတာမျိုးမတွေ့မိပါဘူး။ 

ဒါဟာ တုိုင်းအစိုးရ ဟုိုတယ် ခရီးဝန်ကြိးဌာနရဲ့စိတ်ကူးစိတ်သန်းတွေလား။ ဒါမှမဟုတ် ဒီဒေသမှာလုပ်ပိုင်ခွင့်ရ ထားတဲ့ စီးပွါးရေးသမားတွေရဲ့ စိတ်ကူးသက်သက်လား။ သဘာဝအလှကိုအခြေခံပြီး စီးပွါးရှာတဲ့အခါ သဘာဝအလှ မပျက်အောင် လုိုက်နာသင့်တဲ့ အခြေခံမူတွေကိုတော့ လေ့လာထားဖုို့လုိုမယ်ထင်ပါတယ်။

နုိုင်ငံခြားသားတဦးနဲ့စကားပြောရင်း အဲဒီလုိုလျှောက်တွေးနေပေမဲ့ တကယ်တော့ အဲဒီတဲပေါ်မှာ ကျနော်တုို့ သူ ချင်းတွေစုထုိုင်ပြီး စားသောက်နေကြတာပါ။ ဘီယာဗူးခွံတွေ၊ ဆေးလိပ်တုိုတွေကို သဲသောင်ပြင်ဆီ ဒီတုိုင်းပစ် ချနေသူတွေကလည်းမနည်းလှ။ အမေရိကန်ပြန်မိတ်ဆွေတဦးက အဲဒီလုိုမပစ်ချပါနဲ့လုို့ပြောပြီး အမှိုက်တွေကို လုိုက်ကောက်မယ်ပြင်တော့ ‘’လာလုပ်မနေနဲ့၊ ဒါ ဗမာပြည်။ ဗမာပြည်ရောက်ရင် ဗမာလုိုပဲကျင့်ပါ’’ ဆုိုပြီး နယ်ခံ မိတ် ဆွေက ဟောက်လုိုက်တော့ ကျနော့်စ်ိတ်ထဲ တမျိုးခံစားလုိုက်ရပါတယ်။

ကမ်းခြေအနေထားကိုပြောရမယ်ဆုိုရင်တော့ မောင်းမကန်နဲ့ ဖန်တောင်းကမ်းခြေရဲ့ ဆင်ခြေလျောဆင်းသွားတဲ့ သောင်ပြင်အနေထားဟာ အတော်ဆင်တူပါတယ်။ ဒါပေမယ့် မောင်းမကန်ကမ်းခြေက ပုိုရှည်တယ်လို့ ထင်ပါတယ်။ သဘော့ဆိပ်ဖက်ရှိ မြွေကျွန်းကနေ ပန်းတက်အင်းချောင်းဝအထိ ကမ်းခြေအရှည်က မုိုင်ကျော် မယ်ထင်ပါတယ်။ တခါ ပန်းတက်အင်းချောင်းအပေါ်ဖက်ကနေ နဘုလယ်ရေနက်ဆိပ်ကမ်းဒေသရှိ ဖားချောင်းအင်း၊ ယမင်းကြီး ကမ်းခြေတွေကလည်း မောင်းမကန်ထက်တောင် ပုိုလှနေသလုိုပါပဲ။ မောင်းမကန်ကနေ အောက်ဖက်ကုို ဆင်းလာမယ်ဆုိုရင်လည်း စမ်းလမ်း၊ ကျောက်နီမော်၊ ရှင်မော်ကမ်းခြေတွေတန်းစီလုို့။

မောင်းမကန်ဆီသာ နုိုင်ငံခြားဧည့်သည်တွေ တကယ်ဝင်လာပြီဆုိုရင် ဒီကမ်းခြေတွေအားလုံး ပုိုမုိုစည်းကား စိးပွါးဖြစ် လာနိုင်ပါတယ်။ ဒီအတွက် ရန်ကုန်ကနေ၀င်လာမဲ့ ဧည့်သည်ကုိုမျှော်တဲ့အပြင် ရှေ့က ဂျာမဏီဧည့်သည်လုို ပူးခက်၊ ရရောင်းဒေသဖက်ကနေတဆင့် ၀င်လာတဲ့ဧည့်တွေကိုလဲ အလေးထားသင့်ပါတယ်။ တခါ ထားဝယ်နဲ့အနီးဆုံး နယ်စပ်ဂိတ်ဖြစ်တဲ့ ကန်ချနပူရီ-ထီးခီးဂိတ်ကိုလည်း ထုိုင်းရောက် ခရီးသည်တွေ မောင်းမကန်ဆီလာနုိုင်တဲ့ အဓိက၀င်ပေါက်တခုဖြစ်လာအောင် ဒေသခံခရီးသွားလုပ်ငန်းရှင်တွေဖက်ကကြိုးစားသင့်ပါတယ်။

လက်ရှိအနေထားကို ခဏမေ့ထားပြီး ရှေ့ကုိုနည်းနည်းစိတ်ကူးယဉ်လှမ်းမျှော်ကြည့်မယ်ဆုိုရင် အခု သောင်မတင် ရေမကျဖြစ်နေတဲ့ ထားဝယ်ရေနက်ဆိပ်ကမ်းနဲ့ စက်မှုဇုံတွေ၊ နယ်စပ်ဖြတ် ကားလမ်း၊ ရထားလမ်းတွေ လာမဲ့ အစိုးရသက်တန်း နှစ် အတွင်း အကောက်ထည်ပေါ်လာနုိုင်မလား။ တခါ မောင်းမကန်ကမ်းခြေတွေလည်း ဖန်းတောင်ကမ်းခြေလုိုဖြစ်လာရင် ပူးခက်နဲ့ကန်ချနပူရီဒေသရှိ (Tourism Industry) ကမ္ဘာလှည့်ခရီး သွားလုပ်ငန်း မှာလုပ်နေကြတဲ့ သောင်းနဲ့ချီရှိတဲ့ ထားဝယ်သူ ထားဝယ်သားတွေ လာမဲ့ နှစ်အတွင်း ထားဝယ်နယ်က ခရီးသွား လုပ်ငန်းမှာ ပြန်လာလုပ်နုိုင်ဘွယ်ရှိမလား။ 

လက်ရှိအစိုးရထက် နောက်တက်လာမဲ့အစိုးရက ပုိုလုပ်နုိုင်စွမ်းရှိမယ်ဆုိုရင်၊ အခြေခံအဆောက်ဦတွေ လက်ရှိ အနေထားထက် ပိုတုိုးတက်လာမယ်ဆုိုရင် မျှော်လင့်နုိုင်တဲ့အနေထားရှိပါတယ်။ ဒါပေမယ့် အဲဒီမျှော်လင့်ချက်တွေ ဆီ ရောက်နုိုင်ဖုို့  မောင်းမကန်နဲ့ အနီးတ၀ုိုက်က ကမ်းခြေတွေကုို သဘာဝ အတုိုင်းလှပနေအောင် စီမံထားဖုို့နဲ့ ဟုိုတယ်အပါဝင် အနီးဝန်းကျင်ရှိ အခြေခံအဆောက်ဦတွေကို နုိုင်ငံတကာအဆင့်မှီအောင် အရင်ဆုံးလုပ်ရဦး မှာဖြစ်ပါတယ်။

(စွန့်ပစ်ပစ္စည်းတွေနဲ့ ညစ်ပတ်နေတဲ့ကမ်းခြေတနေရာ) ဓာတ်ပုံ-ထက်အောင်ကျော်။

ဒီအတွက် ပထမဆုံးခြေလှမ်းအဖြစ် တဦးချင်းတယောက်ချင်း လုပ်နုိုင်တဲ့နေရာကနေ စတင်သင့်ပါတယ်။ ကမ်းခြေ တလျောက် ပြန့်ကျဲနေတဲ့ ဗူးခွံနဲ့အမှိုက်တွေကို လုိုက်လံကောက်ယူ သိမ်းဆည်းဖုို့လုိုပါတယ်။ ပြီးရင် နောက်ထပ် အလားတူအမှိုက် မပစ်မိအောင် ပညာပေးစည်းရုံးမှုတွေလုပ်ဖုို့လုိုပါတယ်။ သဘာဝကမ်းခြေကို သဘာဝအလှတရား အတုိုင်းခံစားနုိုင်ဖုို့အတွက်  ဒေသခံတွေရော၊ ဧည့်သည်တွေပါ အားလုံးဝုိုင်းကြိုးစားဖုို့ လုိုပါတယ်။

0 comments:

Post a Comment

Share

Twitter Delicious Facebook Digg Stumbleupon Favorites More