Wednesday, March 19, 2014

တော်လှန်ရေး သတင်းသမားတဦးရဲ့ ဒိုင်ယာရီ (အပိုင်း ၂)

DVB စတင်ပေါ်ပေါက်လာခြင်း

မှတ်တန်းတွေအရ DVB ဒီမိုကရက်တစ်မြန်မာ့အသံ စတင်အသံလွှင့်တဲ့နေ့ဟာ ၁၉၉၂ ခုနှစ် ဇူလိုင်လ ၁၉ ရက်နေ့ (အာဇာနည်နေ့) ဖြစ်ပါတယ်။ သူပုန်ဌာနချုပ်တည်ရှိရာ မာနယ်ပလော တောတွင်း စတူဒီ ယိုကနေ ထုတ်လုပ်ပြီး အသံသွင်းတိတ်ခွေနဲ့ ကြိုတင်ပေးပို့ထားတဲ့ မိနစ် ၃၀ စာ သတင်းနဲ့ဆောင်းပါး တွေ ကို နော်ဝေးနိုင်ငံ အော်စလိုရုံးကတဆင့် ငှားရမ်းထားတဲ့ အသံလွှင့်ဌာန (Kvitsøy ကျွန်း။ နော်ဝေး တောင် ပိုင်း Stavanger မြို့ပြင် ပင်လယ်ပြင်ထဲ) ဆီပေးပို့ပြီး အဲဒီညမှာ စတင်ထုတ်လွှင့်ခဲ့တာလို့ ၀န် ထမ်းဟောင်းတွေ ရဲ့ ပြောကြားချက်အရ သိရပါတယ်။


( From left: Francis Sejersted, Chairman of the Norwegian Nobel Committee, Alexander and Kim Aris, sons of Aung San Suu Kyi, with her Nobel Medal and Diploma, and Aung San Suu Kyi's husband, Michael Aris, at the 1991 Nobel Peace Prize Ceremony. Copyright © Norsk Rikskringkasting AS 2012)။

ဒါပေမယ့် အသံလှိုင်းအားမကောင်းတဲ့အတွက် ပထမဆုံး အသံလွှင့်ချက်ကို ဖမ်းယူနားဆင်နိုင်သူ အတော်နည်းခဲ့တယ်လို့ အဲဒီအသံလွှင့်ချက်ကို မာနယ်ပလောကနေ အသေချာဖမ်းယူနားဆင်ဖို့ ကြိုးစားခဲ့ သူ DVB ၀န်ထမ်းဟောင်း ကိုစိုးဝင်းညို (၂၀၀၇ မှာ ကွယ်လွန်) ပြောဖူးတာကို ကျနော်အမှတ်ရနေပါ တယ်။ ကျနော်အပါဝင် ABSDF ရဲဘော်အတော်များများကတော့ ပထမ ဆုံး အသံလွှင့်ချက်ကို ဖမ်းယူ နားဆင်နိုင်ခြင်းမရှိပါဘူး။ အဲဒီကာလဟာ ABSDF တွင်း အကွဲအပြဲတွေ ပြင်းထန်နေဆဲဖြစ်တဲ့အတွက် DVB ကို တောတွင်းကကျောင်းသားတွေ သိပ်စိတ်ဝင်စားမှု မရှိသေးဘူးလို့ ထင်ပါတယ်။

ကျနော် နော်ဝေးကိုရောက်ပြီးနောက် သိရတဲ့အချက်လက်တွေအရဆိုရင် DVB ဖြစ်ပေါ်လာခြင်းဟာ နိုဘယ်လ်ငြိမ်းချမ်းရေးဆုရှင် ဒေါ်အောင်ဆန်းစုကြည်နဲ့ ဆက်စပ်နေပါတယ်။ 
အဲဒီကာလက အကျယ် ချုပ်ကျခံနေရတဲ့ ဒေါ်အောင်ဆန်းစုကြည်ဟာ ၁၉၉၁ မှာ နော်ဝေးနိုင်ငံကချီးမြှင့်တဲ့ နိုဘယ်လ်ငြိမ်းချမ်း ရေးဆု ရရှိသွားပါတယ်။ အဲဒီဆုပေးပွဲဆီ တက်ရောက်လာတဲ့ စင်ပြိုင်အစိုးရ ၀န်ကြီးချုပ် ဒေါက်တာ စိန်ဝင်းတို့အဖွဲ့၊ နောက်တခါ မြန်မာ့ဒီမိုကရေစီအရေး ကူညီအားပေးနေတဲ့ NBC ခေါ် နော်ဝေး-မြန်မာ ကော်မတီမှ မစ္စတာဂူလွှိုင်း (Havard Kåre Kuløy) နဲ့ နော်ဝေးနိုင်ငံရေး အသိုင်းအ၀ိုင်းက ပုဂ္ဂိုလ်တွေ ဆွေးနွေးမိရာကနေ မြန်မာ့ဒီမိုကရေစီအင်အားစုတွေအတွက် အသံလွှင့်ဌာနတခု လုပ်ပေးရင်ကောင်း မယ်ဆိုပြီး နော်ဝေးအစိုးရက သဘောတူလိုက်တာလို့ ဆိုပါတယ်။

ကျနော်လက်လှမ်းမီသမျှ သိရှိရသလောက်ကတော့ DVB ဟာ ပထမဆုံးပေါ်ပေါက်လာတဲ့ သူပုန် အသံလွှင့်ဌာနမဟုတ်ပါဘူး။ ဒါပေမယ့် ပထမဆုံးပေါ်ပေါက်လာတဲ့ နိုင်ငံခြားအခြေစိုက် သူပုန်အသံ လွှင့်ဌာနလို့တော့ ပြောနိုင်မယ်ထင်ပါတယ်။ ဘာကြောင့်လဲဆိုရင် သူ့အရင်ပေါ်ခဲ့တဲ့ သူပုန်အသံလွှင့်ဌာ နအားလုံးဟာ ပြည်တွင်းမှာအခြေစိုက်ပြီး DVB တခုပဲ ထူးထူးခြားခြား ပြည်ပမှာ၊ မြန်မာနိုင်ငံနဲ့ မိုင် ပေါင်းများစွာဝေးတဲ့အရပ်မှာမှာ အခြေစိုက်ခဲ့တာဖြစ်ပါတယ်။

မြန်မာနိုင်ငံရဲ့ အစောဆုံးနဲ့ အင်အားအကြီးဆုံး သူပုန်အဖွဲ့ဖြစ်တဲ့ ဗမာပြည်ကွန်မြူနစ်ပါတီဟာ ၁၉၇၁ ခု နှစ် မတ်လက ''ပြည်သူ့အသံ'' People’s Voice of Burma ကို တရုတ်-မြန်မာနယ်စပ် ''၀'' တောင်တန်းကနေ စတင်အသံလွှင့်ခဲ့တယ်လို့ မှတ်တမ်းတွေမှာ ဖော်ပြထားပါတယ်။ တခါ ၀န်ကြီးချုပ် ဟောင်း ဦးနု ဦးဆောင်တဲ့ ပြည်သူ့ပြည်ချစ်ပါတီနဲ့ မဟာမိတ်အဖွဲ့တွေကလည်း သူတို့ရဲ့သြဇာအကြီးဆုံး ကာလ ၁၉၇၀ ပြည့်လွန်နှစ်တွေမှာ ''ပြည်ချစ်အသံ'' ကို ထိုင်း-မြန်မာနယ်စပ် တောင်တန်းပေါ်ကနေ ထုတ်လွှင့်ခဲ့ပါတယ်။ အလားတူ KNU ကရင့်အမျိုးသားအစည်းရုံးကလည်း ၁၉၈၀ ပြည့်လွန်နှစ်တွေမှာ ''ကော်သူးလေအသံ'' အဖြစ် ထုတ်လွှင့်ခဲ့ဖူးတယ်လို့ သိရပါတယ်။

ဒါပေမယ့် ဒီအသံလွှင့်ဌာနအားလုံးဟာ သူပုန်အဖွဲ့တွေရဲ့ အင်အားနဲ့ နယ်မြေထိန်းချုပ်နိုိင်မှုပေါ်လည်း မူ တည်နေပြီး အသံလွှင့်ဌာနရှိရာအရပ်ဆီ အစိုးရတပ်ဘက်က ထိုးစစ်ဆင်လာတဲ့အချိန်မှာ အသံလွှင့် လုပ်ငန်းတွေ ရပ်ဆိုင်းသွားခဲ့ရတယ်လို့ မှတ်တမ်းတွေက ဆိုပါတယ်။ ဒါပေမယ့် DVB ကတော့ သူပုန် နယ်မှာ အခြေစိုက်တာမဟုတ်ဘဲ နော်ဝေးမှာအခြေစိုက်ပြီး ဥရောပနဲ့ အာဖရိကရှိ အသံလွှင့်ရုံတွေက နေတဆင့် ထုတ်လွှင့်တာကြောင့် မာနယ်ပလောအပါဝင် နယ်စပ်က သူပုန်စခန်းတွေ ကျသွားပေမယ့် DVB အသံလွှင့်မှုကတော့ အခုချိန်ထိ ပုံမှန်အတိုင်း ဆက်သွားနေတာကို တွေ့ရမှာဖြစ်ပါတယ်။

(မှတ်ချက်- ၂၀၁၃ ခုနှစ် နိုဝင်ဘာလမှာတော့ ပြောင်းလဲလာနေတဲ့နိုင်ငံရေးအခြေနေအရ DVB ဟာ နော်ဝေးနိုင်ငံကနေ မြန်မာနိုင်ငံဆီအပြီးပိုင် ထွက်ခွာသွားပြီ ဖြစ်ပါတယ်)။   

ဆွဲခန့် သတင်းထောက်ရဲ့ ပထမဆုံး သတင်းပေးပို့ချက်

အမှန်တိုင်းဝန်ခံရရင် သတင်းထောက်ဖြစ်တဲ့အချိန်ထိ သတင်းစာပညာအကြောင်း နကန်းတလုံးမျှ မသိ သေးပါ။ သတင်းအခြေခံ ဘ ၆ လုံး (ဘယ်သူ၊ ဘယ်မှာ၊ ဘယ်လို၊ ဘာကြောင့်၊ ဘာဖြစ်၊ ဘယ်အချိန်) ကိုတောင် ကောင်းကောင်းမသိသေးပါဘူး။ အဲဒီကာလက ကျနော်တို့ကြား ခေတ်အစားဆုံး သတင်း အမျိုးစားက လူ့အခွင့်ရေးချိုးဖောက်မှုသတင်း။ ABSDF ဗဟိုကထုတ်တဲ့ ဒေါင်းအိုးဝေစာစောင် အပါဝင် နယ်စပ်တကြောမှာထုတ်တဲ့ စာစောင်မှန်သမျှ ဦးစားပေးသတင်းက စစ်အစိုးရရဲ့ လူ့အခွင့်အရေး ချိုး ဖောက်မှုသတင်းဖြစ်ပြီး အဲဒါတွေကို ဓာတ်ပုံမှတ်တမ်းတွေနဲ့တကွ လအလိုက်၊ နှစ်အလိုက် မြန်မာ-အင်္ဂလိပ်နှစ်ဘာသာနဲ့ အစီရင်ခံစာတွေ၊ စာအုပ်တွေ ထုတ်ဝေမှု ခေတ်စားဆုံးအချိန်လည်း ဖြစ်ပါတယ်။ ဒီတော့ အဲဒီစာစောင်တွေထဲက အရေးအသားကို အတုခိုးပြီး သတင်းရေးတယ်ဆိုပါတော့။

ရှေ့တန်းရဲဘော်တွေဆီက လာတဲ့သတင်းကို ပြန်ရေးတာအပြင် ကျနော်ကိုယ်တိုင် မျက်မြင်ကိုယ်တွေ့ ပို့တဲ့ ပထမဆုံးသတင်းက စစ်ပြေးဒုက္ခသည်တွေ နယ်စပ်ဆီထွက်ပြေးလာတဲ့သတင်းပါ။ ၁၉၉၅ နှောင်း ပိုင်းမှာလို့ ထင်ပါတယ်။ ကျနော်တို့ ပထမဆုံးတောခိုခဲ့တဲ့နေရာ ဘန်းချောင်းဒေသဆီ န၀တက ထိုးစစ် ဆင်လာတဲ့အတွက် ကထောင်းနီ၊ ကျောက်ထူ၊ သပြုချောင်းဘက်က ဒေသခံလူထု ၅၀၀ နီးပါး ကျနော် တို့ ကျောင်းသားစခန်း အောက်ဘက်နားရှိ အမရာကျေးရွာဆီ ထွက်ပြေးလာကြပါတယ်။ သပြုချောင်း ကနေ အမရာကိုရောက်ဖို့ တညအိပ် ၂ ရက်ခရီးနှင်လာရပြီး ကလေးကလောက်တွေ၊ သက်ကြီးရွယ် အိုတွေနဲ့ဆိုတော့ သူတို့ပြေးရတာ သိပ်မလွယ်လှ။

အမရာကျေးရွာရှိ စာသင်ကျောင်း၊ ဘုန်းကြီးကျောင်း၊ ခရစ်ယာန်ဘုရားကျောင်းတွေမှာ သူတို့ကို သင့် သလို နေရာချပေးထားပေမယ့် နိုင်ငံတကာကယ်ဆယ်ရေးက ဘာမှရောက်မလာသေးတဲ့ အခြေနေပါ။ မရောက်ဆို သူတို့ပြေးတဲ့နေရာက ထိုင်းနယ်စပ်ထဲအထိ မဟုတ်ဘဲ KNU ရှေ့တန်းနယ်မြေကနေ နောက်တန်းနယ်မြေကိုပြေးလာတဲ့ သဘောသာဖြစ်တဲ့အတွက် နိုင်ငံတကာအလှူရှင်တွေက သိပ်မသိ သေးပါ။ ဒီတော့ KNU နဲ့ ABSDF ပေးထားတဲ့ ဆန်အိတ်အပါဝင် တနိုင်တပိုင်ကယ်ဆယ်ရေးနဲ့ပဲ ဖြစ် သလို နေနေရပါတယ်။ အဲဒီထဲက အဘိုးအိုတဦးဟာ အရိုးပေါ်အရေတင်ဆိုသလို ပိန်လီလွန်းလှပြီး အဲဒီပုံကို ကျနော်က ဗွီဒီယို မှတ်တမ်းရိုက်ခဲ့ပါတယ်။

ဒါဟာ ကျနော်သတင်းထောက်ဘ၀မှာ ပထမဆုံးရိုက်တဲ့ သတင်းမှတ်တမ်းဖြစ်ပြီး အဲဒီအချိန်ထိ ဗွီဒီယို သင်တန်း တခါမှမတက်ဖူးသေးပါ။  မင်းသမီးစခန်း သတင်း-ပြန်ကြားရေးတာဝန်ခံ ဆရာဦးဟန်လင်း (၂၀၀၈ မှာ ကွယ်လွန်) ရဲ့ ကောင်းမှုကြောင့် ကျနော်တို့စခန်းမှာ ဗွီဒီယိုကင်မရာ အကြီးစားတလုံးနဲ့ ဗွီဒီ ယိုပြစက်တွေ၊ တီဗွီတွေရှိပါတယ်။ ဒါပေမယ့် ဗွီဒီယို အက်ဒစ်လုပ်မယ့် ပစ္စည်းက ဘာမှမရှိ။ အက်ဒစ် လုပ်တတ်သူလည်း တဦးမှမရှိတဲ့အတွက် ရိုက်ထားတဲ့အခွေကို စက်ထဲ ဒီတိုင်းပြန်ထည့်ပြီး ၀ိုင်းကြည့် ကြတာကို အမှတ်ရနေပါတယ်။

အဲဒီဒုက္ခသည်တွေ ထွက်ပြေးလာတဲ့အကြောင်း၊ စစ်အစိုးရတပ်တွေက နယ်မြေရှင်းလင်းရေးအတွင်း လူ့အခွင့်ရေးချိုးဖောက်မှုတွေ ဆက်တိုက်လုပ်ဆောင်ခဲ့တဲ့အကြောင်း စသဖြင့် ဒုက္ခသည်တွေ ပြောဆိုမှု အပေါ် အခြေခံပြီး DVB ဆီ ရေးပို့လိုက်တဲ့သတင်းဟာ ကျနော်ရဲ့ ပထမဆုံး ကိုယ်တိုင်ပို့ သတင်းဖြစ်ပါ တယ်။

စစ်ကြောင်းမှူး သတင်းထောက်

ခေါင်းစဉ်ကိုဖတ်ပြီး ထက်အောင်ကျော်တို့ ထွင်လိုက်ပြန်ပြီလို့ မထင်ပါနဲ့။ သတင်းထောက်တာဝန်ယူ ထားတဲ့ ကျနော် စစ်ကြောင်းမှူးတာဝန်နဲ့ ရှေ့တန်းကနေ သတင်းပို့တဲ့အတွေ့အကြုံကို ပြောမလို့ပါ။ ၁၉၉၅ ခုနှစ် ဒီဇင်ဘာလမှာလို့ ထင်ပါတယ်။ သူပုန်ကျောင်းသားတဦးရဲ့ မာရသွန်ခရီးမှာ ဖော်ပြပြီးဖြစ် တဲ့အတိုင်း သြစတြေးလျ ဗွီဒီယိုသတင်းထောက် (Video journalist) တဦးနဲ့အတူ ပုလောမြို့နယ် အတွင်း စည်းရုံးရေးဆင်းတဲ့ခရီးစဉ်ဟာ ကျနော်ရဲ့ပထမဆုံး ရှေ့တန်းသတင်းထောက် ခရီးစဉ်ဖြစ်ပါ တယ်။


(ABSDF တောင်ပိုင်းဒေသ သတင်းတွေကို စုစည်းပေးပို့ခဲ့တဲ့နေရာ မင်းသမီးစခန်း အမှတ် ၁ တပ်ရင်း ဆိုင်းဘုတ်ကို တွေ့ရစဉ်။)

အဲဒီကာလ ကျနော်တို့ ABSDF ရဲ့ ဖွဲ့စည်းပုံကို ပြောရမယ်ဆိုရင် တောင်ပိုင်းဒေသရှိ (ဒေါက်တာ နိုင် အောင်ဘက်) တပ်ရင်း ၃ ခုဖြစ်တဲ့ ၁၀၁၊ ၂၀၁ နဲ့ ၂၀၃ တို့ကို ပေါင်းပြီး တပ်ရင်း ၁ အဖြစ် ပြန်လည်စုဖွဲ့ ထားချိန်ဖြစ်ပါတယ်။ အဲဒီတပ်ရင်းပေါ်မှာ တောင်ပိုင်းစစ်ဒေသအဖွဲ့က တာဝန်ယူထားပြီး အဖွဲ့ခေါင်း ဆောင်အဖြစ် ဗဟိုအတွင်းရေးမှူး ကိုမျိုးဝင်း (အခု ဗဟို ဒုဥက္ကဋ္ဌ)၊ အဖွဲ့ဝင်တွေအဖြစ် ကိုသိန်းဆောင်၊ ကိုသောင်းထွန်း၊ ကိုမင်းအောင်နဲ့ ကျနော်တို့ဖြစ်ပါတယ်။ တပ်ရင်းမှူးအဖြစ် ချစ်ကိုကို (၁၉၉၇ မှာ ကျ ဆုံး) ဒုရင်းမှူးအဖြစ် ဆရာအောင်မြင့် (အခု ထားဝယ် ABSDF ရဲဘော်ဟောင်းများအဖွဲ့) နဲ့ ရေး-ထောက်အရာရှိအဖြစ် ကိုဝင်းအောင်တို့ ဖြစ်ပါတယ်။ တပ်ရင်းလူအင်အားက ၃၀၀ ၀န်းကျင်လောက် ရှိဦးမယ်လို့ ထင်ပါတယ်။

စစ်ဒေသတာဝန်ခံကိုမျိုးဝင်းက ကျနော့်ကို စစ်ကြောင်းမှူးအဖြစ်တာဝန်ပေးလိုက်ပြီး ဗဟိုကနေရောက် နေတဲ့ ကိုကျော်ကျော် (ကချင်) (အခုထိ ကချင်ပြည်နယ် ABSDF မြောက်ပိုင်းမှာ တိုက်ပွဲဝင်နေဆဲ) က စစ်ကြောင်းစည်းရုံးရေးမှူးဖြစ်ပါတယ်။ ကျနော့်ရုံးအဖွဲ့ဝင်တွေထဲမှာတော့ ပြန်ကြားရေးဌာနက ကိုမင်း ဇော်ရွှေ၊ ကိုသက်ဇော်ထွေး။ ဆေးဌာနက ဆေးမှူးမောင်မျိုး၊ ဆက်သွယ်ရေးက မျိုးမျိုးဦး။ လုံခြုံရေးက ကိုဌေးဝင်းနဲ့ ကိုမြင့်အောင်တို့ ပါဝင်တယ်လို့ ကျနော်အမှတ်ရနေပါတယ်။ ဒါက ရုံးအဖွဲ့သာဖြစ်ပြီး အဓိ က တိုက်ခိုက်ရေးအင်အားက ပြည်ခြား-ငါးတက်ရွာမှာ အခြေစိုက်ထားတဲ့ တပ်ခွဲမှူးဗိုလ်လှဦးရဲ့ အင် အား ၃၀ ၀န်းကျင်ရှိ ရဲဘော်တွေဖြစ်ပါတယ်။

မင်းသမီးစခန်းကနေ ပြည်ခြားရွာအထိ ၂ ညအိပ်၊ ၄ ရက်ခရီးသွားရပါတယ်။ မင်းသမီးကနေ ကစီထာ ခေါ် ပြည်ချားချောင်းလက်တက်ရှိရာအထိ တနင်္သာရီမြစ်အတိုင်း လှေစီးတာ တနေကုန်ကြာပါတယ်။ တနင်္သာရီမြစ်ဟာ ရေတိမ်ပြီးကျောက်ဆောင်များတဲ့အတွက် လှေပေါ်ကဆင်း၊ ကြိုးနဲ့ဆွဲနေရတာနဲ့ တင် အချိန်အတော်ကုန်ပါတယ်။ ပြီးတော့ ဒီဒေသမှာသုံးတဲ့လှေက သောင်းရင်းတို့၊ သံလွင်တို့ဘက်က လို လှေကြီးတွေမဟုတ်။ သစ်လုံးကိုထွင်းထားတဲ့ လောင်းလှေငယ်တွေသာဖြစ်ပြီး လူ ၇ ဦးထက်ပို မတင်သင့်ပါ။ ဒါပေမယ့် ကျောင်းသားတွေရဲ့ထုံးစံအတိုင်း စုစုပေါင်းမှ လှေတစီးတည်းသာ ပိုင်တဲ့ အတွက် လူ ၁၂ ယောက်အထိ တက်စီးကြပါတယ်။

ဒီလမ်းကြောင်းမှာ လှေမှောက်ပြီဟေ့လို့ သတင်းကြားရင် အဲဒါကျောင်းသားလှေပါပဲ။ ''တိုက်ပွဲမှာ ရန် သူ့ ကျည်မှန်ပြီးကျသွားတယ်ဆိုရင် အာဇာနည်စာရင်းဝင်ဦးမယ်။ လှေမှောက်လို့ သေသွားတယ်ဆိုရင် တော့ ရာဇ၀င်က သိပ်မမိုက်ဘူး'' ဆိုပြီး ကျနော်တို့ကြား ပြောဆိုလေ့ရှိပါတယ်။ ဒါကြောင့် ရေစီးကြမ်း ပြီး ကျောက်ဆောင်ပေါတဲ့နေရာတိုင်း လှေပေါ်ကနေဆင်း လမ်းလျှောက်ကြပါတယ်။ ဒါပေမယ့် ကိုရွှေ သတင်းထောက်က ကျနော်တို့နဲ့အတူ မဆင်းဘူးခင်ဗျာ့။ ဒီလိုခဲရာခဲဆစ်ပုံကို ရအောင်ရိုက်ချင်လို့ဆို ပြီး လှေပေါ်မှာဆက်ထိုင်ကာ မနားတမ်းရိုက်ယူနေပါတယ်။

လှေသမားတွေကတော့ စိတ်ညစ်နေမလားပဲ။ သူ့ကိုယ်လုံးကြီးက ကျနော်တို့ရဲဘော် ၂ ဦးစာလောက် လေးမယ်ထင်ပါတယ်။ ဒါပေမယ့် လှေမြုပ်ရင် သူပါ ပါသွားနိုင်တယ်ဆိုတာကိုသိလျက်နဲ့ မကြောက်မရွံ့ ဘဲ လိုချင်တဲ့ပုံကိုရအောင်ရိုက်ယူတဲ့ သတင်းထောက်တဦးရဲ့ သတ္တိကိုတော့ ကျနော်ချီးကျူးမိပါတယ်။ တချိန်တည်းမှာပဲ နော်ဝေးကိုရောက်ပြီးကတည်းက နယ်စပ်ကတောထဲကို မပြန်ရဲဖြစ်နေတဲ့ ကိုယ့်ဘာ သာဝေဖန်ရင်း ကျနော်သာ သူ့လို နိုင်ငံခြားသတင်းထောက်တဦးဆိုရင် ကိုယ်တခါမှမသိဖူးတဲ့ ဒီသူပုန် တွေနဲ့အတူ တခါမှမရောက်ဖူးတဲ့ တောတောင်တွေထဲ ဒီလိုသက်စွန့်ဆံဖျားခရီးမျိုး သွားရဲပါ့မလားလို့ စဉ်းစားနေမိပါတယ်။     ။

0 comments:

Post a Comment

Share

Twitter Delicious Facebook Digg Stumbleupon Favorites More