Thursday, January 8, 2015

တော်လှန်ရေးသတင်းသမားတဦးရဲ့ ဒုိုင်ယာရီ (၄၁)

ကင်မရာရှေ့မှာ သတင်းဖတ်တဲ့အခါ

TV အတွက် ကင်မရာရှေ့မှာ သတင်းဖတ်တာနဲ့ Radio အတွက် မုိုက်ကရုိုဖုန်းရှေ့မှာ သတင်းဖတ်ရတာ သဘောတ ရားအရသိပ်မကွာပေမဲ့ တကယ်လက်တွေလုပ်တဲ့အခါမှာတော့ ရင်ခုန်စိတ်လှုပ်ရှား မှုတွေနဲ့ရင်ဆုိုင်ခဲ့ရပါတယ်။ မုိုက်ကရုိုဖုန်းရှေ့မှာ သတင်းဖတ်ရင် ပရိတ်သတ်က ကိုယ်ကုိုမြင်တာမဟုတ်။ အသံပဲကြားရတာဆုိုတော့ ကုိုယ်ဘာ ၀တ်ထားသလဲ၊ သန့်သန့်ရပ်ရပ်ရှိလား၊ ပေပေရေရေလား၊ ဆံပင်တွေ ရှုပ်ပွနေသလား။ ခေါင်းဖီးထားသလား။ ရေမချိုး ပဲ ရုံးလာတက်နေသလား။ ဘယ်သူမှမသိပါ။

(DVB-TV အတွက် ကင်မရာရှေ့မှာ သတင်းဖတ်ဖုို့ ပြင်ဆင်နေသူများ)

ဒါပေမယ့် တီဗွီ မှာတော့ ဒီလုိုမရ။ ကုိုယ်မျက်နှာကြည်ကြည်သာသာရှိရဲ့လား။ ကုတ်အကျီကို သားသားနားနား ၀တ် ထားရဲ့လား။ သူများဆီကငှားဝတ်ထားတဲ့ နက်ကတုိုင်ကြီး တခြမ်းစောင်းနေသလား။ ရုတ်စွအဆုံး မနေ့ညက ရက်သောက်ထားတဲ့ မျက်နှာကြိး ကင်မရာမှာ ပေါ်နေမလားဆုိုပြီး စုိုရိမ်ရင်းနဲ့ အတော်ဒုက္ခများပါတယ်။

ဒီတော့ တီဗွီ ရုိုက်စရာရှိနေတဲ့နေ့၊ တီဗွီ ရှေ့သတင်းဖတ်ဖုို့ တာဝန်ကျတဲ့နေ့တွေမတုိုင်ခင် တရက်မှာ အရက် မသာက်ပဲ အောင့်ထားရပါတယ်။ အခုခေတ်လုို ရန်ကုန်မှာအခြေစုိုက်ရင်တော့ အရက်မသောက်တာအပြင် ကွမ်း မစားဖြစ်အောင်လည်း အောင့်ထားရဦးမယ်ထင်ပါတယ်။ မျက်နှာက အရက်ဆီပြန်၊ ပါးစပ်ပ ကွမ်းသွေးတွေနဲ့နီနေ တယ်ဆိုရင် ဘယ်ကြည့်ကောင်းပါ့မလဲ။

တခါ လက်သည်းရှည်သလား၊ ဆံပင်ရှည်သလား၊ လက်မှာလက်စွပ်တွေအများကြီးလား၊ နားကပ် တပ်ထားသလား၊ မုတ်ဆိတ်မွေးရိတ်ထားရဲ့လား၊ မိတ်ကပ်လိမ်းထားသလား။ နက်ကတုိုင်စည်းထားတာ ပုံကျရဲ့လား၊ သတင်းဖတ် နေရင်းနဲ့ ခေါင်းစောင်းသွားသလားဆုိုပြီး အသေချာလုိုက်ကြည့် ထင်မြင်ချက် ပြန်ပြောတဲ့ ပရိတ်သတ်ကလည်း မနည်းလှဘူး။ ဆုိုတော့ တီဗွီ ရှေ့မှာ သတင်းဖတ်ရတာ ရေဒီယုိုမှာ ဖတ်ရသလုို မလွတ်လပ်ပါ။

ပြီးတော့ တီဗွီရှေ့နဲ့ ရေဒီယုိုရှေ့ သတင်းဖတ်ရတဲ့ နည်းစနစ်ချင်းကလည်းမတူပြန်ပါဘူး။ ရေဒီယုိုမှာက ကုိုယ်ရေး ထားတဲ့သတင်း။ ဒါမှမဟုတ်တခြားသူရေးထားတဲ့သတင်းကုို စာရွက်ကြည့်ဖတ်တာဆုိုတော့ အမှားအယွင်းမရှိ သလောက်ပါပဲ။ မှားရင်လည်း သီးခံပါခင်ဗျားပြောပြီး ပြန်ဖတ်ရုံပေါ့။ တီဗွီ ကျတော့ ဒီလုိုမဟုတ်။ စာရွက်ပေါ် ကြည့် ပြီး ခေါင်းငုံဖတ်နေရင် မြန်မာရုပ်မြင်ကြားလုိုဖြစ်နေတော့မှာပေါ့။

ဒီတော့ Teleprompter ခေါ်တဲ့ ကင်မရာပေါ်မှာထောင်ထားတဲ့ ဖတ်ရမဲ့စာပေါ်နေတဲ့ ကရိယာကြီးကုို (မြန်မာလုို ပြန်ထားတာမတွေ့မိသေးပါ။ စာတန်းထုိုးစက်လုို့ပြောရင် မမှားဘူးထင်ပါတယ်) ကြည့်ပြီးဖတ်ရပါတယ်။ ကွန်ထရုို ခန်းထဲရှိ တဦးဦးက အဲဒီစာတွေကို တင်ပေးနေတာဖြစ်တဲ့အတွက် သူတင်ပေးတဲ့အရှိန်နဲ့ ကွက်တိဖြစ်အောင် လုိုက်ဖတ်ရပါတယ်။ ကုိုယ်ဖတ်တာကနှေးပြီး စာတင်ပေးသူက မြန်နေရင် အဲဒါ ဒုက္ခတွေ့ပြီလုို့သာမှတ်။ တခါလေ အရေးပေါ်သတင်းဆုိုရင် သတင်းစာသားက ဒီ Teleprompter ပေါ်မှာပဲရှိပြိး ကုိုယ့်လက်ထဲမှာ ကော်ပီရှိမနေပါ။ အဲဒီ လုိုအချိန်မျိုးမှာ ကွန်ထရုိုးခန်းကလူ ပညာပြရင်တော့ သေပြီဆရာပဲ။

ပြီးခဲ့တဲ့အခေါက် ရန်ကုန်ပြန်တုန်းက မြန်မာ့ရုပ်မြင်သံကြားသတင်းကြေငြာတာကိုကြည့်မိပါတယ်။ ကြည့်ရတာ သူတုို့လည်း ကျနော်တို့လုိုပဲ ရေဒီယုိုကနေ တီဗွီ ဖက်ပြောင်းလာသူတွေ ဖြစ်ပုံရပါတယ်။ ဒီတော့ ချောင်းဆုိုးချင်တဲ့ အခါ ရေဒီယုိုသမားတွေလုပ်နေကြအတုိုင်း စားပွဲပေါ်က မုိုက်ကရုိုဖုန်းခလုပ်လေးကုို အသံမထွက်အောင်ဖိပြီး ချောင်းဆုိုးလုိုက်ပါတယ်။ ဒါပေမယ့် အခုသူ့ဖတ်နေတာက ရေဒီယုိုသတင်းမဟုတ်။ တီဗွီသတင်းဆုိုတော့ ချောင်းဆုိုးသံကုို ပရိတ်သတ်က မကြားရပေမဲ့ သူချောင်းဆုိုနေတာကို အားလုံးကမြင်နေရတာပေါ့။

ပြီးရင် ဖတ်ရတာအဆင်မပြေလို့ဖြစ်စေ၊ ကွန်ထရုိုခန်းကလူနဲ့ အပြောအဆိုအဆင်မပြေလုို့ဖြစ်စေ မျက်နှာကြီး မဲ့ ထားလုို့မရ။ မဲ့ထားရင် မဲ့ထားတုိုင်း ကင်မရာမှာပေါ်နေမှာပေါ့။ ရေဒီယုိုမှာကတော့ မျက်နှာမဲ့ထားလည်း ဘယ်သူ မှမြင်ရတာမဟုတ်။ အသံကြည်နေရင် ပြီးတာပါပဲ။ ဒီအတွက် ကင်မရာရှေ့ သတင်းဖတ်နည်းဆုိုတာကုို အသေချာ လေ့ကျင့်သင်ကြားဖုို့လုိုမယ်ထင်ပါတယ်။ ဒါပေမယ့် ၂၀၀၅ ကနေ ၂၀၁၁ DVB-TV ကနေ အလုပ်ထုတ်ခံရတဲ့ အထိ ကင်မရာရှေ့သတင်းဖတ်နည်းဆုိုတာကို ကျနော်တခါမှ မသင်ကြားခဲ့ဖူးပါ။


ခေါင်းပြတ်ကြီးနဲ့ အင်တာဗျုးများ

မြန်မာ့မီဒီယာသမုိုင်းမှာ ပထမ ဆုံးပေါ်လာတဲ့ သူပုန် တီဗွီ သတင်းဌာနဆိုတော့ ဒီလောက် အလွဲအချော်လေးတော့ ရှိမှာပေါ့။ ကင်မရာရှေ့မှာသတင်းဖတ်နေတဲ့ ပရီစန်တာတွေ အဲဒီလုိုလေ့ကျင့်ပြီးသားဖြစ်မနေသလုို နယ်ကနေ တင်းပို့နေတဲ့ သတင်းထောက်တွေကလည်း လေ့ကျင့်ပြီးသူက အတော်နည်းပုံရပါတယ်။ ပုိုဆုိုးတာကတော့ အဲဒီ ၂၀၀၇ ရွှေဝါရောင်တော်လှန်ရေးမတုိုင်မီကာလလေးဟာ အဖမ်းဆီးကများ၊ ထောက်လှမ်းရေးကဆုိုး၊ တချက်မှား တာနဲ့ထောင်နန်းစံရမဲ့ခေတ်ဆုိုတော့ ဘယ်သူကမျှ DVB ကုို ပေါ်တင် အင်တာဗျုးမပေးရဲပါ။ 

(Teleprompter သုို့မဟုတ် ကင်မရာ စာတန်းထုိုးစက်)

ပြောသူက ပေါ်တင်ပေးရဲရင်တောင် ကိုယ့်ကြောင့် ပရိသတ်အဖမ်းခံရနုိုင်တဲ့ကိစ္စမုို့ သတင်းထောက်ဖက်က စောင့် စည်းရမှာပေါ့။ ဒီလုိုစည်းစောင့်ရင်းနဲ့ ရန်ကုန်ကသတင်းထောက်တွေပုို့လုိုက်တဲ့ပုံတွေထဲမှာ တပုံမှ မျက်နှာပါမလာ ပါ။ နုိုင်ငံတကာသတင်းဌာနတွေမှာဆုိုရင်တော့ မျက်နှာမပေါ်အောင် အမှောင်ချပြီးရုိုက်တာ၊ နေရောင်ကုို ပြောင်း ပြန်ထားပြီးရုိုက်တာ၊ နောက်ကျောဖက်ကနေရုိုက်တာ စသဖြင့် တွေ့ရပါတယ်။

DVB သတင်းထောက်တွေကတော့ အဲဒီလုိုမရုိုက်တတ်လုို့လား။ အဲဒီလုိုရုိုက်နေဖို့အချိန်မရလုို့လား မသိပါဘူး။ သူတုို့ပုို့တဲ့ပုံတွေ Footage တွေ၊ (ရုပ်ကဒ် လုို့ခေါ်ကြပါတယ်) ထဲက လူတွေမှာ ခေါင်းပါမလာကြပါဘူး။ ဒါပေမယ့် ပါးစပ်ကနေ တကယ်ပြောနေတယ်ဆုိုတာကိုလည်း သိစေချင်သေးတော့ နှာခေါင်းနဲ့ ပါးစပ်ကြားကနေ ဖြတ်ထားတဲ့ ခေါင်းပြတ်အင်တာဗျုးတွေချည်းဖြစ်နေခဲ့တာကို အမှတ်ရနေပါတယ်။

လူမှန်းမသိအောင် ဒီလုိုခေါင်းဖြတ်ထားတဲ့ ကြားထဲကနေတောင် ဖမ်းဆီးခံလုိုက်ရသူက မနည်းလှ။ ပရိတ်သတ်တွေ ကုိုခဏထား။ သတင်းထောက်စာရင်းကိုပဲ ပြောရမယ်ဆုိုရင် ရွှေဝါရောင်တော်လှန်ရေးကာလအတွင်း ဖမ်းဆီးခံရတဲ့ DVB သတင်းထောက် တဒါဇင်မကရှိပါတယ်။ အဲဒီထဲက လူသိများသူတချို့ကုို ဒီနေရာမှာ တင်ပြရမယ်ဆုိုရင် DVB အတွက် ဗီဒီယုိုသတင်းတွေပုို့ပေးနေသူ ကုိုဝင်းမော် (ရွေ့သံစဉ်)ဟာ ၂၀၀၇ ခုနှစ် နုိုဝင်ဘာလမှာ ဖမ်းဆီးခံရပြီး ထောင်ဒဏ် ၁၀ နှစ်ချမှတ်ခံခဲ့ရပါတယ်။

နောက်တခါ ကုိုငွေစိုးလင်းကတော့ ၂၀၀၉  ဇွန်လမှာဖမ်းဆီးခံရပြီး ထောင်ဒဏ် ၁၃ နှစ်ချမှတ်ခံခဲ့ရပါတယ်။ မလှလှ ၀င်းကတော့ ၂၀၀၉ ခုနှစ် စက်တင်ဘာမှာအဖမ်းခံရပြီး ထောင်ဒဏ်နှစ် ၂၀ ချခဲ့ရပါတယ်။ တခါ သူကုိုကူညီပေးတဲ့ ကုိုမြင့်နုိုင်ကိုတော့ ၂၆ နှစ်အထိချမှတ်ခဲ့ပါတယ်။ 

ကုိုစည်သူဇေယျခေါ် စာကလေးကိုလည်း ၂၀၁၀ ခုနှစ် ဧပြီလမှာ ဖမ်းဆီးပြီး ထောင်ဒဏ် ၁၈ နှစ်ချမှတ်ခဲ့ပါတယ်။ ဦးဇေယျခေါ် မောင်မောင်ဇေကုိုလည်း ၂၀၁၀ ခုနှစ် ဧပြီလမှာပဲဖမ်းဆီးပြီး ထောင်ဒဏ် ၁၃ နှစ်ချမှတ်ခဲ့တယ်လို့ DVB နှစ် ၂၀ ပြည့်အမှတ်တရထုတ်ဝေတဲ့ စာအုပ်ထဲမှာ ဖေါ်ပြထားပါတယ်။


ကိုထင်ကျော်၊ ၈၈ နဲ့ ရွှေဝါရောင်တော်လှန်ရေး နိဒါန်း

ရွှေဝါရောင်တော်လှန်ရေးမစခင်လေးမှာ ကုန်ဈေးနှုံးကျဆင်းရေးလှုပ်ရှားမှုဆိုတာပေါ်ပေါက်ခဲ့ဖူးပါတယ်။ အတိအကျ ပြောရမယ်ဆုိုရင် ၂၀၀၇ ခုနှစ် သြဂုတ်လ ၁၅ ရက်နေ့မှာ ဓာတ်ဆီဈေးတွေကို တဂါလံ ၁၅၀၀ ကနေ ၃၀၀၀ အထိ အစိုးရကဈေးတင်လုိုက်တဲ့အတွက် ကုိုထင်ကျော် ဦးဆောင်တဲ့ ကုန်ဈေးနှုံးကျဆင်းရေးအဖွဲ့ကနေ စတင်လမ်း လျောက်ဆန္ဒပြတာပါ။

(ရွှေဝါရောင်တော်လှန်ရေးကာလ Burma VJ ရဲ့ လှုပ်ရှားမှုတခု)

သြဂုတ်လ ၂၀ ရက်နေ့မှာတော့ ထောင်ကလွတ်ကာစ ၈၈ မျိုးဆက်ကျောင်းသားဆောင် မင်းကိုနုိုင် ဦးဆောင်တဲ့ အဖွဲ့က လူအင်အား ၅၀၀ ခန့်နဲ့အတူ ရန်ကုန်မြို့လယ်မှာ ဆန္ဒပြခဲ့ပါတယ်။ အခုချိန်မှာ ဆန္ဒပြတဲ့သတင်းဟာ အထူး အဆန်းမဟုတ်ပေမဲ့ အဲဒီကာလက ရန်ကုန်မြို့လယ်မှာ လူ ဦးထက်ပုိုစုခွင့်မရှိပါဘူး။ ဒါဟာ ၁၉၈၈ နောက်ပုိုင်းက စပြီး လူအင်အားအများဆုံးဆန္ဒပြပွဲ၊ တနည်းအားဖြင့် စစ်အစိုးရကို ထိပ်တုိုက်စိမ်ခေါ်တဲ့ ဆန္ဒပြပွဲကြီးပါပဲ။ ဒီတော့ စစ်အစိုးရဖက်က လုပ်နေကြထုံးစံအတုိုင်း အားလုံးကုိုဖမ်းဆီးပြီး ထောင်ထဲ ထည့်လုိုက်တာပါပဲ။

ဒါပေမယ့် သူတုို့စတင်ခဲ့တဲ့ ဆန္ဒပြပွဲက အရှိန်လျော့မသွားတဲ့အပြင် တဖြေးဖြေးကြီးထွားလာခဲ့ပါတယ်။ စက်တင် ဘာလဆန်းပုိုင်းရောက်တဲ့အခါမှာတော့ သံဃ်ာတော်တွေရဲ့ ဆန္ဒပြပွဲနဲ့ပေါင်းစပ်မိသွားပြီး ရွှေဝါရောင်တော်လှန်ရေး၊ ၁၉၈၈ နောက်ပုိုင်း လူတွေ သိန်းနဲ့ချီပါဝင်တဲ့ ဒုတိယ အကြိ်မ်အထွေထွေအုံကြွမှုကြိး ရန်ကုန်မြို့လယ်မှာ ဖြစ်ပေါ်လာ ပါတော့တယ်။

အဲဒီကာလဟာ DVB တီဗွီနဲ့ ရေဒီယုိုကုို ပရိတ်သတ်ကစိတ်ဝင်စားမှုအများဆုံးကာလဆုိုတော့ ဒီသတင်းတွေကို ရရချင်း တင်နုိုင်အောင် ကျနော်တုို့ဖက်လည်းကြိုးစားရပါတယ်။ တီဗွီ ကုိုတနေ့တကြိမ်သာလွှင့်နုိုင်သေးပေမဲ့ ရေဒီယုိုကုို တော့ စလောင်းကနေ တနာရီတခါလွှင့်နုိုင်အောင် ကျနော်တုို့လုပ်နုိုင်ခဲ့ပါတယ်။ ယာယီအသံလွှင့်ခန်းတခုကုို ရုံးခန်း ထဲမှာပဲဖွင့်လှစ်ပြီး FM ရေဒီယုိုသဘောဆန်ဆန်ထုတ်လွင့်ခဲ့ပါတယ်။ အဲဒီကလွင့်တာတွေကို အင်တာနက်နဲ့ချိတ်ပြီး တီဗွီ အသံလွှင့်နေတဲ့ စတေရှင်ဆီပုို့လုိုက်တဲ့အခါ အဲဒီအသံတွေ တီဗွီလုိုင်းကနေ ထွက်လာတဲ့သဘောပါ။

ကျနော်တုို့ဖက်က ဒီလုိုတုိုးလုပ်လေ၊ အစိုးရဖက်ကလည်း ကျနော်တုို့သတင်းထောက်တွေ၊ အားပေးသူတွေကို ပုိုပြီး ပစ်မှတ်ထား ဖမ်းဆီးလေပါပဲ။ ကံကောင်းတာကတော့ ၂၀၀၇ မှာ အင်တာနက်ဆုိုင်တွေ မြန်မာနုိုင်ငံအတွင်းမှာ စတင်ပေါ်နေပြီဖြစ်တဲ့အတွက် သတင်းတွေကုိုအမြန်နည်းနဲ့ရနုိုင်ခဲ့ပါတယ်။ ဒါပေမယ့် ကံဆုိုးချင်တော့လည်း အဲဒီ ဆုိုင်တွေမှာပဲ ကျနော်တုို့သတင်းထောက်တွေ၊ စေတနာအလျောက် သတင်းပေးပုို့သူတွေဖမ်းဆီးခံလုိုက်ရတာ မနည်းလှပါဘူး။ 

ဒီလုိုနဲ့ အီလက်ထရောနစ်ဥပဒေဆုိုတာကြီး နာမည်ကြီးလာခဲ့ပေါ့။ အီးမေးသုံးသူတုိုင်းကုို အဲဒီပုဒ်မနဲ့တပ် တရားစွဲ ထောင်ချခဲ့တာ ဘယ်နည်းပါ့မလဲ။ ကျနော်တို့ကို အကူညီပေးခဲ့တဲ့ နာမည်ကြိးလူရွှင်တော် ကိုဇာဂနာလည်း ဒီစာ ရင်းထဲမှာပါသွားခဲ့ပါတယ်။

ဒါပေမယ့် ဒီနည်းကုိုမသုံးလုို့မဖြစ်။ ဘာကြောင့်လည်းဆုိုရင် ဆန္ဒပြပွဲအတွင်း ရုိုက်ထားတဲ့ Footage ရုပ်ကဒ်တွေကို အီးမေးနဲ့မပုို့နုိုင်ရင် လူကိုယ်တုိုင် ထုိုင်းနယ်စပ်အထိထွက်လာပြီး ပုို့ရပါတယ်။ ဒါမှမဟုတ် ဘန်ကောက်အထိ လေ ယဉ်နဲ့ထွက်လာပြီးပုို့ရပါတယ်။ အဲဒီအတွက် ကုန်ကျစရိတ်၊ လုံခြုံရေးစရိတ်၊ ကြန့်ကြာချိန်တွေက နည်းတာမဟုတ်။ ပြီးတော့ လမ်းခရီးမှာ အချိန်မရွေးအဖမ်းခံရနုိုင်ပါတယ်။


ဒီလုိုပြောနေလုို့ ဒီလုပ်ငန်းစဉ်ကြီးတခုလုံးကို အော်စလုိုသတင်းခန်းအယ်ဒီတာတွေက ကြီးကြပ်နေတယ်လို့ မထင် လုိုက်ပါနဲ့။ အဲဒီကာလက ပြည်တွင်းလုပ်ငန်းဆုိုတာ တကယ့် UG မြေအောက်လုပ်ငန်းပါ။ ကျနော်တုို့သတင်းသမား ဆုိုိတာက OG မြေပေါ်လုပ်ငန်းဆုိုတော့ ဒီနှစ်ခု ချိတ်ထားလုို့မရဘူးဆုိုပြီး အဲဒီကာလ ညွန်မှုးတွေကဆုိုပါတယ်။ ဒီလုိုနဲ့ DVB ရဲ့ UG လုပ်ငန်းတွေကုို အဓိကဆောင်ရွက်ပေးတဲ့ Burma VJ အဖွဲ့ဆိုတာ ပေါ်ပေါက်လာခဲ့ပေါ့။
................................................................................................................


0 comments:

Post a Comment

Share

Twitter Delicious Facebook Digg Stumbleupon Favorites More