Wednesday, January 22, 2014

(၆ လအတွင်း တိုးတက်ခြင်းတချို့ ) တနသာင်္ရီ အပတ်စဉ် ၃၃။

ထက်အောင်ကျော်။  (ဇန်နာဝါရီ ၂၀- ၂၆-၂၀၁၄)

တနသာင်္ရီအပတ်စဉ် ၃၃။ စာမျက်နှာ ၁၁


၆ လအတွင်း တိုးတက်ခြင်းတချို့ 

ကုန်လွန်သွားခဲ့တဲ့ ၂၀၁၃ ခုနှစ်အတွင်း မွေးရပ်မြေဆီ ၂ ခေါက်ပြန်ရောက်ခဲ့ပါတယ်။ ပထမ တခေါက် ကမေလ၊ ဒုတိယအခေါက်က ဒီဇင်ဘာဆိုတော့ ၆ လအတွင်း ၂ ခေါက်ရောက်ခဲ့တဲ့သဘော။ ဒီခရီးစဉ် ရဲ့ ရည်ရွယ်ချက်ကတော့ သမ္မတဦးသိန်းစိန်ဖိတ်ကြားခဲ့တဲ့အတိုင်း သူတို့အစိုးရက ဦးစီးဆောင်ရွက်နေ တဲ့ ဒီမိုကရေစီပြုပြင်ပြောင်းလဲရေးလုပ်ငန်းစဉ်ဆိုတာကို လေ့လာဖို့ပါ။

ခရီးစဉ်အတွင်း တွေ့ရှိချက်တွေထဲက လိုအပ်ချက်တွေ၊ အားနဲချက်တွေအတော်များများကို ထောက်ပြခဲ့ ပြီးဖြစ်တဲ့အတွက် ဒီတပတ်မှာတော့ တိုးတက်မှုတချို့ကို ရှာဖွေတင်ပြမလားလို့ စဉ်းစားထားပါတယ်။ လွန်ခဲ့တဲ့ ၆ လအတွင်း တိုးတက်မှုတွေအများကြီးရှိကောင်းရှိနိုင်ပေမဲ့ ကိုယ်တွေ့ အဖြစ်အပျက် တချို့ကို သာ ဒီနေရာမှာတင်ပြနိုင်မှာဖြစ်ပါတယ်။

ပထမ ဆုံးတင်ပြချင်တာကတော့ ကျနော်မကြာခဏရေးဖူးတဲ့ Mindset (စဉ်းစားပုံ) ပြောင်းလဲရေးနဲ့ ပတ်သက်ပြီး ထူးခြားတဲ့ဖြစ်စဉ်တခုကို ကျနော်တို့ရွာမှာတွေ့ရပါတယ်။ ''ငါ လူမှုရေးလုပ်ငန်းတခုလုပ် ချင်လို့ကွ။ အဲဒါ ဘယ်လိုလုပ်ငန်းမျိုး လုပ်ရင်ကောင်းမလဲ'' ဆိုပြီး ရွာကမိတ်ဆွေတဦးက ကျနော်ကို အကြံဥာဏ်တောင်းပါတယ်။ အဲဒါ လွန်ခဲ့တဲ့ မေလခရီးစဉ်တုန်းကပါ။ ရွာကမိတ်ဆွေဆိုပေမဲ့ လော လောဆယ်ရွာမှာနေတာမဟုတ်ပဲ ရန်ကုန်မှာ အထည်ချုပ်လုပ်ငန်း လုပ်ကိုင်နေသူ။

သူ့အမည်က ဦးစစ်ထွေး။ ကျနော်ထက် အသက် ၁၀ နှစ်ခန့်ကြီးပါတယ်။ ဒါပေမဲ့ သူဟာ ကျနော်တို့ ကျောင်းသားတွေနဲ့ ဘော်လုံးကန်ဖေါ်ကန်ဖက်။ သူ့အိမ်ကကျနော်တို့အိမ်နဲ့သိပ်မဝေး။ အလုပ်အကိုင် ကတော့ ရွာကလူတွေရဲ့ထုံးစံအတိုင်း လယ်ယာလုပ်ငန်းပေါ့။ သူလိုကိုယ်လို လူတဦးထက် ဘာမှမပို။ ဒါက လွန်ခဲ့တဲ့ ၂၅ နှစ်၊ ကျနော်အိမ်ကမထွက်လာခင်အချိန်က အနေထားကိုပြောတာပါ။ အခုတော့ ဒီလူ့ဆီက ထူးခြားတဲ့ စိတ်ကူးတခုထွက်လာနေပါပြီ။

၆ လကြာပြီးလို့အခုတခေါက် ကျနော်ရွာပြန်ရောက်တော့ ''လင်းလက်ကြယ်စင်'' ဆိုတဲ့ ပညာရေး ဖောင်ဒေးရှင်းတခု ဖွဲ့ထားတာကိုတွေ့ရပါတယ်။ ငွေကြေးမတတ်နိုင်လို့ ကျောင်းမနေနိုင်တဲ့ ကလေး ငယ် ၃၀ ခန့်ကို ကျောင်းထားပေးထားတယ်လို့ ရွာရှိကျောင်းဆရာမတွေက ပြောပါတယ်။ ဒီ ဖောင်ဒေး ရှင်းအတွက် သိန်း ၁၀၀ မတည်ငွေထည့်ထားသူက ရှေ့မှာကျနော်ပြောခဲ့တဲ့ ဦးစစ်ထွေးပါပဲ။

ထူးခြားတာက ဒီလုပ်ငန်းအတွက် သူစိတ်ကူးရလာပုံ။ သိန်း ၁၀၀ လောက်ကုန်ကျမဲ့ အလှူပွဲတခုကို ဆင်တွေ၊ မြင်းတွေနဲ့ကြီးကျယ်ခန်းနားစွာကျင်းပဖို့ပြင်နေစဉ် အဲဒီလိုလှူလိုက်မယ်ဆိုရင် အလှူပွဲကို လာတဲ့လူ ၁၀၀၀ လောက် တနပ်စားပြီးတာနဲ့ ဒီငွေတွေကုန်သွားမယ်။ ဒီငွေတွေကိုစုပြီး ပညာရေး ဖောင်ဒေးရှင်းလေးလုပ်လိုက်မယ်ဆိုရင် လူအများကြီးအတွက် ရေရှည်အကျိုးရှိနိုင်တယ်ဆိုတဲ့ အတွေး ၀င်လာတယ်ဆိုတဲ့ အချက်ပါ။

ဒုတိယ တင်ပြချင်တဲ့တိုးတက်မှုကလဲ Mindset (စဉ်းစားပုံ) နဲ့ပဲဆိုင်ပါတယ်။ ၈ လေးလုံးအရေးတော် ပုံနောက်ပိုင်း ပထမဆုံးအကြိမ်ဆန္ဒပြပွဲကို ပြီးခဲ့တဲ့နိုဝင်ဘာလ ၁၁ ရက်နေ့က ထားဝယ်မှာပြန်တွေ့ရပါ တယ်။ သိမ်းပိုက်ထားတဲ့လယ်ယာမြေတွေပြန်ပေးဖို့ လယ်သမားတွေက ဆန္ဒပြကြတာဖြစ်ပြီး ဒုတိယ အကြိမ်ဆန္ဒပြပွဲကိုလဲ ပြီးခဲ့တဲ့သောကြာနေ့ (၁၇-၀၁-၂၀၁၄) က ပြုလုပ်ခဲ့ပါတယ်။

ဆန္ဒပြပွဲဆိုတဲ့ခေါင်းစဉ်နဲ့မဟုတ်ပဲ သမ္မတရွာဆိုတဲ့ခေါင်းစဉ်နဲ့ဆန္ဒပြတာမျိုးလဲ ထားဝယ်ဒေသမှာဖြစ်ပွါး ခဲ့ပါသေးတယ်။ ထားဝယ်နဲ့ ရေဖြူမြို့နယ်အတွင်းရှိ ကန်ချနပူရီ-ထားဝယ် အဝေးပြေးကာလမ်းပေါ်က ကျေးရွာတချို့နဲ့ လောင်းလုံးမြို့နယ်တွင်းရှိ တရုတ်နိုင်ငံက ရေနံချက်စက်ရုံဆောက်မယ်ဆိုတဲ့ ရွာတွေမှာ ဖြစ်ပွါးခဲ့တာပါ။ သမ္မတဦးသိန်းစိန်ပြောထားတဲ့ နိုင်ငံခြားရင်းနှီးမြှုပ်နှံမှုဆိုင်ရာ မူ ၄ ချက်နဲ့ အခုလက်ရှိ နိုင်ငံခြားစီမံကိန်းတွေ လွဲချော်နေတယ်။ ဒေသခံတွေ နစ်နာနေရတယ်ဆိုပြီး သမ္မတဓာတ်ပုံကိုရွာထိပ် မှာတင်ကာ အနုနည်းနဲ့ဆန္ဒထုတ်ဖေါ်ခဲ့တာဖြစ်ပါတယ်။


လူထုတွေဖက်က ဒီလို Mindset ပြောင်းပြီး ကိုယ့်အခွင့်ရေးအတွက်ကိုယ် တိုက်ပွဲဝင်ရဲလာသလို အစိုး ရဖက်က။ အထူးသဖြင့် လွတ်တော်ဖက်ကလဲ Mindset ပြောင်းပြီး ပွင့်လင်းမြင်သာမှုကိုပြရဲတဲ့ လက္ခာ ဏာအနဲအကျဉ်း တွေ့လာရပါတယ်။ အဒါကတော့ တိုင်းဒေသကြီးလွှတ်တော်အစည်းအဝေးဆီ နိုင်ငံ ရေးပါတီတွေ၊ လူမှုရေးအဖွဲ့အစည်းတွေ၊ သတင်းမီဒီယာတွေကို တက်ရောက်လေ့လာခွင့်ပြုတာ၊ လွှတ် တော်သတင်းလွှာထုတ်တာတွေ အခုလပိုင်းအတွင်းမြင်လာရတဲ့အချက်ပါ။ ဒါပေမဲ့ အုပ်ချုပ်ရေးနဲ့ တ ရားစီရင်ရေးဖက်မှာတော့ လွှတ်တော်ဆိုတဲ့ ဥပဒေပြုရေးမဏ္ဍိုင်လောက် ပွင့်လင်းတာမျိုးမတွေ့ရသေး ပါ။

တိုင်းဒေသကြီးရဲ့ မဏ္ဍိုင် ၃ ရပ်ပွင့်လင်းမှုအခြေနေအပြီးမှာတော့ အဲဒီမဏ္ဍိုင် ၃ ရပ်ကို ဝေဖန်ထောက်ပြ ထိမ်းကြောင်းရမဲ့ စတုတ္တမဏ္ဍိုင် မီဒီယာရဲ့တိုးတက်မှုအခြေနေကိုတင်ပြချင်ပါတယ်။ အခု ဒီဆောင်းပါး ကို စာဖတ်သူတွေဖတ်နိုင်အောင် အပတ်စဉ်ထုတ်ဝေနေတဲ့ တနဿင်္ရီအပတ်စဉ်သတင်းစာဆိုတာ လွန်ခဲ့တဲ့ ၆ လအတွင်းကမှ ပေါ်လာတာပါ။ တကယ်တန်းပြောမယ်ဆိုရင် ထားဝယ်မှာအခြေစိုက်ပြီး သတင်းစာတစောင်၊ ဂျာနယ်တစောင်ထုတ်ဖို့ဆိုတာ လွန်ခဲ့တဲ့ ၂၅ နှစ်က ဘယ်လိုမှမဖြစ်နိုင်တဲ့ အနေ ထား။ ဒါပေမဲ့ ပြီးခဲ့တဲ့ ဇွန်လထဲမှာ တနဿင်္ရီအပတ်စဉ် တကယ်ထွက်လာခဲ့ပါတယ်။

နံပတ် ၅ အချက်အဖြစ်တင်ပြချင်တာကတော့ ''ထားဝယ်တိုင်းရင်းသားများပါတီ'' ပေါ်လာခြင်းနဲ့ ထား ၀ယ်လူမျိုး၊ ထားဝယ်စာပေဆိုတာကို ပွင့်လင်းစွာ စတင်ဆွေးနွေးလာခြင်းဖြစ်ပါတယ်။ ထားဝယ်စကား က အသံပဲရှိပြီး စာနဲ့ချရေးလို့မရဘူးဆိုတဲ့အဆင့်ကနေ ထားဝယ်စာပေကိုအသေချာသုတေသနလုပ် ထားတဲ့ စာအုပ်စာတန်းတွေထွက်လာပါတယ်။ ထားဝယ်ပါတီကဦးစီးပြီး ထားဝယ်အမျိုးသားအခွင့်ရေး အတွက် ဆွေးနွေးဆောင်ရွက်လာတာကို အခုလပိုင်းအတွင်းတွေ့လာရပါတယ်။

နံပတ် ၆ ကတော့ လမ်းပန်းဆက်သွယ်ရေး ကောင်းမွန်တိုးတက်လာခြင်းပါ။ ထားဝယ်မြို့နဲ့ ကျနော်တို့ ရွာဆီသွားတဲ့လမ်း၊ နောက်တခါ မောင်းမကန်ကမ်းခြေဆီသွားတဲ့လမ်းတွေဟာ လွန်ခဲ့တဲ့ ၆ လအတွင်း ၂ ဆလောက်ကျယ်ဝန်းကောင်းမွန်လာပါတယ်။ မောင်းမကန်ကမ်းခြေမှာလဲ နိုင်ငံခြားဧည့်သည်တွေပါ တည်းနိုင်တဲ့အဆင့်ထိ ဟိုတယ်တွေရှိလာပါတယ်။

ထားဝယ်ဒေသကိုကျော်ပြီးကြည့်လိုက်မယ်ဆိုရင်တော့ ထီးခီး-ဖုနန်းလွန် ဆိုတဲ့နယ်စပ်ဂိတ်ဟာ လွန်ခဲ့ တဲ့ သြဂုတ်လ ၂၈ ရက်နေ့ကမှ တရားဝင်ဖွှင့်လိုက်တာပါ။ ဒီဂိတ်ဟာ မြန်မာနိုင်ငံအတွက်အကြီးမားဆုံး နိုင်ငံခြားရင်းနှီးမြှုပ်နှံမှုဖြစ်တဲ့ ထားဝယ်ရေနက်ဆိပ်ကမ်းစီမံကိန်းနဲ့ဆက်စပ်နေပြီး ထားဝယ်-ကန်ချနပူရီ အဝေးပြေးကားလမ်းပေါ်မှာတည်ရှိပါတယ်။ ဒီလမ်းကနေ ထိုင်းနဲ့မြန်မာဒေသခံတွေအပြင် နိုင်ငံတကာ မှ ကမ္ဘာလှည့်ခရီးသည်တွေကိုပါ ၀င်ခွင့်ပေးထားပါတယ်။

ဒါဟာလဲ လွန်ခဲ့တဲ့ ၂၅ နှစ်က ဘယ်လိုမှမဖြစ်နိုင်တဲ့ အခြေနေပါ။ ဒီတိုးတက်မှုဟာ တခုတလော လူ ပြောများနေတဲ့ အပစ်ခတ်ရပ်စဲရေး၊ ငြိမ်းချမ်းရေးဆွေးနွေးပွဲတွေနဲ့ ဆက်စပ်နေပါတယ်။ ထီးခီးဆိုတာ အရင်က KUN (ကရင့်အမျိုးသားအစည်းရုံး) နဲ့ ABSDF (မြန်မာနိုင်ငံလုံးဆိုင်ရာကျောင်းသားများ ဒီမို ကရက်တစ်တပ်ဦး) ထိမ်းချုပ်ထားတဲ့နေရာ။ ဒါပေမဲ့ ဦးသိန်းစိန်အစိုးရတက်လာပြီးတဲ့နောက်ပိုင်း၊ အ ထူးသဖြင့် ၂၀၁၂ ကြားဖြတ်ရွေးကောက်ပွဲအပြီး ဒေါ်အောင်ဆန်းစုကြည်နဲ့ NLD (အမျိုးသားဒီမိုကရေ စီ အဖွဲ့ချုပ်) တို့ ပါလီမာန်ထဲဝင်လာပြီးနောက်ပိုင်းမှာ ဖြစ်ပေါ်လာတဲ့ ငြိမ်းချမ်းရေးဆွေးနွေးပွဲတွေကနေ တဆင့် ဒီလိုရလာဒ်ထွက်လာတာပါ။

အခုလ ၁၂ ရက်နေ့ကတော့ ထီးခီးနယ်စပ်မှာ ထိုင်း-မြန်မာ ၂ နိုင်ငံစီးပွါးရေးသမားတွေ၊ အစိုးရတာဝန် ရှိသူတွေ ဆွေးနွေးပွဲလုပ်ပြီးပြန်လာတဲ့ မြန်မာဖက်ကကားတစီး ဒီလမ်းပေါ်တိမ်းမှောက်ခဲ့ပါတယ်။ အစိုး ရအရာရှိတဦး သေဆုံးပြီး တချို့ဒဏ်ရာရသွားပါတယ်။

တနည်းအားဖြင့်ပြောမယ်ဆိုရင်တော့ ဒီလမ်းနဲ့နယ်စပ်ဂိတ်ဟာ အလုပ်ဖြစ်ရုံဖွင့်ထားရုံနဲ့မပြီး။ ဒေသ တွင်းကလမ်းတွေရဲ့စံချိန်စံညွှန်းတွေ၊ နိုင်ငံတကစံချိန်စံညွှန်းတွေမှီအောင် ဆက်လုပ်ဖို့လိုနေသေးတယ် ဆိုတာကို အချက်ပေးလိုက်တာဖြစ်ပါတယ်။ အလားတူ ရှေ့မှာတင်ပြခဲ့တဲ့ ၆ လအတွင်း တိုးတက်မှု တွေကိုလဲ ဒီထက်မကတိုးတက်လာအောင် ဒေသခံတွေအားလုံး ၀ိုင်းဝန်းကြိုးပန်းသွားဖို့ လိုအပ်နေဆဲ ဖြစ်ပါတယ်။    ။
.................................

0 comments:

Post a Comment

Share

Twitter Delicious Facebook Digg Stumbleupon Favorites More