Saturday, November 5, 2016

သခင်သိန်းဖေသုို့ အလွမ်း

The Voice Daily, 04 Nov 2016.

သခင်သိန်းဖေ ဆုံးရှာပြီ

လွတ်လပ်ရေးတုိုက်ပွဲဝင် ၀ါရင့်နုိုင်ငံရေးသမားကြီး သခင်သိန်းဖေ၊ ၁၀၁ နှစ်ဟာ အောက်တုိုဘာ ၁၉ ရက်နေ့ က ကွယ်လွန်သွားကြောင်းသိရတဲ့အတွက် အထူးစိတ်မကောင်းဖြစ်မိပါတယ်။ သခင်သိန်းဖေကုို လူချင်း မတွေ့ဖူးပေမဲ့ DVB (ဒီမုိုကရက်တစ်မြန်မာ့အသံ-နော်ဝေ) မှာ တာဝန်ထမ်းစဉ်က မကြာခဏ တယ်လီဖုန်း အင်တာဗျုးလုပ်ဖူးတာကြောင့် လေလှိုင်းပေါ်ကနေ ရင်းနှီးနေပါတယ်။ 


စာဖတ်ပရိသတ်အတော်များများလည်း အဲဒီအမှောင်ခေတ်တုန်းက စစ်အစိုးရကို ရဲရဲဝံ့ဝံ့ဝေဖန်ခဲ့တဲ့ သခင်သိန်းဖေရဲ့လေသံကို မှတ်မိနေဦးမယ်ထင်ပါတယ်။ ‘’အခု ဗိုလ်ချုပ်ဖြစ်နေတဲ့လူတွေက အဲဒီတုန်းက မွေးတောင်မမွေးသေးဘူး။ လွတ်လပ်ရေးအကြောင်း၊ တော်လှန်ရေးအကြောင်း သူတို့ဘာသိမှာလဲ’’ ဆုိုပြီး သခင်သိန်းဖေက ပြောခဲ့ပါတယ်။ တခါ မင်းသမီးက ဒီလောက်တော်နေတာမဟုတ်ဘူး။ လူကြမ်းက ဆုိုးလွန်းလုို့ ဇတ်ကပုိုနာသွားတာ။ မဟော်သာဓာသားလုခန်းမှာလုိုပေါ့။ သားလေးနာမှာစိုးလို့ အမေ အရင်းက လွှတ်ပေးလုိုက်တော့ ဘီလူးမလက်ထဲ ပါသွားတာပေါ့စသဖြင့် စီကာပတ်ကုံး စကားလုံးတွေနဲ့  ကြမ်းရမ်းလွန်းလှတဲ့ စစ်ဗုိုလ်ချုပ်တွေကို ဆုံးမခဲ့တဲ့ အင်တာဗျုးတွေက မနည်းလှပါ။

ဒါက သခင်သိန်းဖေနဲ့ စာရေးသူအကြား၊ သခင်သိန်းဖေနဲ့ သောတရှင်တွေကြား တဦးချင်းဆုိုင်ရာ သိကျွမ်းမှု ပါ။ ဒီဆောင်းပါးမှာ အဓိကဆွေးနွေချင်းတာက တဦးချင်းဆုိုင်ရာ ကိစ္စမဟုတ်။ မျိုးဆက်အလုိုက် သိကျွမ်းမှု၊ မျိုးဆက်အလုိုက် ပခုံးပြောင်းတာဝန်ယူမှု လုိုအပ်တဲ့အကြောင်းသာဖြစ်ပါတယ်။ တကယ်တော့ အသက် ၁၀၀ တန်း သခင်တွေနဲ့ ၅၀ တန်း ၈၈ မျိုးဆက်တွေကြားမှာ ၂၀၀၀ ပြည့်လွန်နှစ်တွေအထိ နီးနီးကပ်ကပ် ဆက်ဆံရေး မရှိခဲ့ပါ။ မရှိဆုို အဲဒီကာလတလျောက်လုံး ၈၈ မျိုးဆက်အများစုဟာ ထောင်နန်းစံသူ၊ တောနန်းစံသူတွေချည်း ဖြစ်နေခဲ့တာကိုး။


၂၀၀၀ ပြည့်လွန်နှစ်တွေမှာတော့ ၈၈ မျိုးဆက်တချို့ နှစ်ရှည်ထောင်ဒဏ်ကနေပြန်လွတ်လာကြပါတယ်။ သခင်သိန်းဖေဦးဆောင်တဲ့ ၀ါရင့်နုိုင်ငံရေးသမားတွေကလည်း စစ်ထောက်လှမ်းရေးကနည်းမျိုးစုံနဲ့ ဖိနှိပ် ချုပ်ချယ်ထားတဲ့ ကြားထဲကနေ ဖက်ဆစ်တော်လှန်ရေးနေ့၊ အမျိုးသားအောင်ပွဲနေ့၊ လွတ်လပ်ရေးနေ့ အခမ်းအနားတွေကို သခင်သိန်းဖေရဲ့ ခြံထဲမှာ (အခြားနေရာမှာ ကျင်းပခွင့်မပေးပါ) နှစ်စဉ်မပျက်ကျင်းပခဲ့ပါ တယ်။ တနည်းအားဖြင့်ပြောမယ်ဆုိုရင်တော့ ၁၉၈၈ ကနေ ၂၀၀၀ ပြည့်လွန်နှစ်တွေကြား ဘယ်သူမှ ဘာမှ မလှုပ်ရဲတဲ့အချိန်မှာ ၀ါရင့်နုိုင်ငံရေးသမားကြီးတွေက စစ်အစိုးရ အာခံရေးကို တာဝန်ယူပေးခဲ့တယ်လို့ ဆုိုချင်ပါတယ်။

အကျဉ်းထောင်အသီးသီးကနေ ပြန်လွတ်လာကြတဲ့ ၈၈ မျိုးဆက်တွေ၊ တုိုင်းရင်းသားခေါင်းဆောင်တွေ၊ မျိုးဆက်သစ်နုိုင်ငံရေးသမားတွေ နုိုင်ငံရေးလုပ်ဖို့ စုရပ်နေရာပျောက်နေစဉ်မှာ သခင်သိန်းဖေခြံထဲက အခမ်းအနားတွေက စုရပ်ဖြစ်လာပါတယ်။ နောက်ပုိုင်းမှာတော့ မပြီးဆုံးသေးတဲ့ တော်လှန်ရေးတာဝန်တွေ ကို မျိုးဆက်အလုိုက် ပခုံးပြောင်း ဆက်လက်ထမ်းဆောင်ဖို့ ဒေါ်အောင်ဆန်းစုကြည်နဲ့ မင်းကုိုနုိုင်ဆီ ၀ါရင့်နုိုင်ငံရေးသမားတွေက တော်လှန်ရေးအလံ လွှဲအပ်ပွဲ အခမ်းအနားကျင်းပခဲ့တာကို စာရေးသူအမှတ် ရနေပါတယ်။

ဒါက အများမြင်သာတဲ့ သခင်မျိုးဆက်နဲ့ ၈၈ မျိုးဆက် (သခင်ခေတ်နောက်ပုိုင်း မျိုးဆက်သစ်အားလုံးကို ဆုိုလို) တုို့အကြား ဆက်ဆံရေးဆုိုပါတော့။ ဒါဖြင့် အများမမြင်သာတဲ့ ဆက်ဆံရေးကောရှိသေးလုို့လားလုို့ မေးစရာရှိပါတယ်။ ရှိပါတယ်။ အဲဒီမမြင်သာတဲ့ဆက်ဆံရေးက မြင်သာတဲ့ဆက်ဆံရေးထက်တောင် ပုိုသြဇာကြီးသေးတယ်လို့ စာရေးသူကဆုိုချင်ပါတယ်။

စာရေးသူအပါဝင် အသက် ၅၀ တန်းနဲ့အောက် မျိုးဆက်သစ်အားလုံးဟာ နယ်ချဲ့ဆန့်ကျင်ရေး၊ ဖက်ဆစ် တော်လှန်ရေးကုို အသက်စွန့်ဆောင်ရွက်ခဲ့တဲ့ သခင်နုိုင်ငံရေးသမားတွေ၊ ရဲဘော်သုံးကျိပ်ဝင်တွေရဲ့ စွန့်လွှန်စွန့်စားမှု ကြောင်း စာပေတွေကို ဖတ်မှတ်လေ့လာပြီး ကြီးပြင်းလာခဲ့သူတွေပါ။ တနည်းအားဖြင့် သခင်တွေ၊ ရဲဘော်သုံးကျိပ်ဝင်တွေဟာ ကျနော်တုို့မျိုးဆက်ရဲ့ သူရဲကောင်းတွေပေါ့။ 


ဒီလုို မသိမသာ စိတ်ထဲအားကျနေတဲ့ဖြစ်စဉ်တွေက ဘယ်အချိန်ကျမှ ပေါ်လာသလဲဆိုရင် ၁၉၈၈ ခုနှစ် လေးလုံး အရေးတော်ပုံကြီးဖြိုခွဲခံလုိုက်ရချိန်မှာ ထောင်နဲ့ချီတဲ့ကျောင်းသားတွေ ထောင်ထဲကုို ရဲရဲဝံ့ဝံ့ဝံ ရင်ကော့ပြီးဝင်သွားတာ၊ တောထဲကုို မကြောက်မရွံ လက်နက်ကုိုင်ဖုို့ထွက်သွားတာတွေက သက်သေပြနေ တယ်လို့ ဆုိုချင်ပါတယ်။ 

သခင်ခေတ်အလွန်နိင်ငံရေးနှင့် လုပ်ဖေါ်ကုိုင်ဖက်ဝန်းရံမှု လုိုအပ်ခြင်း

ကျနော်တို့မျိုးဆက်အပေါ် ဒီလုိုသြဇာကြီးခဲ့တဲ့ လွတ်လပ်ရေးတုိုက်ပွဲဝင် ၀ါရင့်နုိုင်ငံရေးသမားသခင်တွေ၊ ရဲဘော်သုံးကျိပ်ဝင်တွေထဲက အခု သခင်သိန်းဖေ ကွယ်လွန်သွားခဲ့ပါပြီ။ ၂၀၁၂ တုန်းကလည်း နောက်ဆုံး လက်ကျန် ရဲဘော်သုံးကျိပ်ဝင် ဗုိုလ်ချုပ်ကျော်ဇောကွယ်လွန်သွားခဲ့တဲ့အတွက် သခင်ခေတ်နုိုင်ငံရေးသမား မကျန်တော့သလောက်ဖြစ် သွားခဲ့ပါပြီ။ ဒါပေမဲ့ သူတုို့ စတင်ခဲ့တဲ့တော်လှန်ရေးက လွတ်လပ်ရေးကုို ရအောင်ယူနုိုင်ခဲ့တာ တခုကလွဲရင် ပြည် ထောင်စုတည်ငြိမ်ရေးနဲ့ တုိုင်းပြည်တည်ဆောက်ရေးဖက်မှာ ဘာမှအသေအချာ မလုပ်နုိုင်သေးပါ။


ဒါကြောင့်လည်း သခင်သိန်းဖေက သူမကွယ်လွန်ခင်မှာ တော်လှန်ရေးအလံကုို ဒေါ်အောင်ဆန်းစုကြည်နဲ့ မင်းကုိုနုိုင်တုို့လက်ထဲ ကြိုတင်လွှဲအပ်ခဲ့တာဖြစ်မယ်ထင်ပါတယ်။ အခု သခင်သိန်းဖေကွယ်လွန်ချိန်မှာတော့ ဒေါ်အောင်ဆန်းစု ကြည်က အာဏာရပါတီခေါင်းဆောင်အဖြစ် အစိုးရသစ်ကိုတာဝန်ယူ ဦးဆောင်မောင်း နှင်နေပါပြီ။ မင်းကုိုနုိုင်တုို့အဖွဲ့ကကော ဘာတွေ ဆက်လုပ်နေသလဲ။ တော်လှန်ရေးအလံ အမွေဆက်ခံသူ နှစ်ဦးကြား ပူးပေါင်းဆောင်ရွက်မှုက ဒီထက်မက နီးနီးကပ်ကပ်ရှိနေရင် ပုိုကောင်းမယ်ထင်ပါတယ်။

နုိုင်ငံရေးအကဲခတ်တချို့ကတော့ ဒါဟာ သခင်ခေတ်နုိုင်ငံရေးနဲ့ ဒီနေ့နုိုင်ငံရေးသမားတွေအကြား မျီုးဆက် ကွာဟမှုကြောင့် လုပ်ဟန်ကွာသွားတာလုို့ပြောပါတယ်။ ဆိုလုိုတာက နယ်ချဲ့အစိုးရကိုတော်လှန်ခဲ့တဲ့ ၁၉၄၀ ပြည့်လွန်နှစ်တွေတုန်းက သခင်တွေအားလုံးနီးပါးဟာ သက်တူရွယ်တူ မျိုးဆက်တူတွေဖြစ်ပြီး ပြောမနာ ဆုိုမနာ၊ အချင်းချင်း ဝေဖန်ထောက်ပြဖို့ အားမနာသူတွေဖြစ်ပါတယ်။ ဗိုလ်ချုပ်အောင်ဆန်းရဲ့ဘေးမှာ သခင်သန်းထွန်း၊ သခင်သိန်းဖေမြင့်၊ သခင်ဗဟိန်း၊ သခင်နု၊ သခင်သိန်းဖေ (၀ါးခယ်မ) စသဖြင့် သက်တူ၊ ၀ါတူ (အသက်အရွယ် မတိမ်းမယိမ်း) လုပ်ဖော်ကုိုင်ဖက်တွေ အများကြီး ရှိပါတယ်။


ဒါပေမဲ့ ဒီနေ့ခေတ် ဗုိုလ်ချုပ်အောင်ဆန်းရဲ့သမီး ဒေါ်အောင်ဆန်းစုကြည်ဘေးမှာတော့ အဲဒီလုို သက်တူ၊ ၀ါတူ ပြောမနာ၊ ဆုိုမနာ ဝေဖန်ရေးပေးနုိုင်တဲ့ လုပ်ဖေါ်ကုိုင်ဖက်မျိုးမတွေ့မိပါ။ မျိုးဆက်ပြတ်လတ်မှုကြောင့် ဒီလုိုဖြစ်သွားတာလုို့ ထင်ပါတယ်။ ဝေဖန်ရေးအားကောင်းတဲ့ ဒီလုိုလုပ်ဖေါ်ကုိုင်ဖက်မျိုးမရှိခြင်းဟာ ဒေါ်အောင်ဆန်းစုကြည်ရဲ့ နုိုင်ငံရေးမူဝါဒချမှတ်ရေးမှာ အားနည်းစေခဲ့တယ်လုို့ ဝေဖန်သူတချို့ကဆုိုပါတယ်။ ဒါပေမဲ့ တချို့ကတော့ ဒီလုိုအနီးကပ်ဝေဖန်ထောက်ပြနုိုင်သူမရှိတာကုိုက ဒေါ်အောင်ဆန်းစုကြည်ကို ပြိုင်ဖက်မရှိ သြဇာပုိုကြီးစေတယ်၊ လုပ်ငန်းပုိုတွင်ကျယ် စေတယ်လုို့ပြောပါတယ်။

သေချာတာကတော့ စစ်အာဏာရှင်စနစ်ကနေ ဒီမုိုကရေစီစနစ်ဆီအသွင်ပြောင်းရေးလုပ်ငန်းစဉ်ဆုိုတာဟာ ရွေးကောက်ပွဲမှာ ဒေါ်အောင်ဆန်းစုကြည်ဦးဆောင်တဲ့ NLD ပါတီအနုိုင်ရရုံနဲ့ သူ့အလုိုလုို အထမြောက်သွား မည်မဟုတ်ပါ။ ဒါကြောင့် လက်ရှိအစိုးရကသွားနေတဲ့ လုပ်နည်းလုပ်ဟန်တွေ၊ နည်းဗျုဟာတွေကုို ကြိုက်ကြိုက်မကြိုက်ကိုက် ဒီအစိုးရရဲ့မဟာဗျုဟာက စစ်အာဏာရှင်စနစ် ချုပ်ငြိမ်းပြီး ဒီမုိုကရေစီစနစ်ထွန်း ကားရေးဖြစ်တာကြောင့် အစိုးရခေါင်းဆောင်ကုို အားလုံးက ၀န်းရံပေးဖုို့ တာဝန်ရှိပါတယ်။ မျက်စိမှိတ် ထောက်ခံဝန်းရံတာမျိုးမဟုတ်ပဲ မျက်လုံးဖွင့်ပြီး နုိုင်ငံတကာ စံချိန်စံညွန်းတွေနဲ့အညီ ဝေဖန်ဝန်းရံပေးရေးကို ဆုိုလုိုပါတယ်။

လွတ်လပ်ရေးရပြီး နှစ် ၇၀ အကြာ

သခင်တွေ၊ ရဲဘော်သုံးကျိပ်ဝင်တွေရဲ့ဦးဆောင်တုိုက်ပွဲဝင်မှုကြောင့် မြန်မာနုိုင်ငံလွတ်လပ်ရေးရခဲ့တာ အခု ဆိုရင် နှစ် ၇၀ ပြည့်ဖုို့ နှစ်ပဲလုိုပါတော့တယ်။ မြန်မာနုိုင်ငံနဲ့ခေတ်ပြိုင် ၁၉၅၀ ၀န်းကျင်းမှာ လွတ်လပ်ရေး ယူခဲ့ကြတဲ့ တခြားနုိုငံတွေနဲ့ နှိုင်းယှဉ်ရင် ဒီနေ့ကုိုယ့်အခြေအနေက ဘယ်အဆင့်မှာရောက်နေသလဲ။ အဝေးကြီးကိုမကြည့်နဲ့။ အိမ်နီးချင်းနုိုင်ငံတွေကိုပဲ ကြည့်ပါ။ အနောက်ဖက်က အိန္ဒိယနဲ့ ဘဂ်လားဒေ့ရှ်၊ မြောက်ဖက်က တရုတ်၊ အရှေ့ဖက်က လောနဲ့ထုိုင်း၊ ပြီးတော့ တခြား အာဆီယံနုိုင်ငံတွေ။ အားလုံး ကုိုယ့်ထက်သာတာချည်းပါပဲ။


ဘာကြောင့် သာသွားတာလဲ။ နောက်ခံအချက်အလက်တွေ အများကြီးရှိနုိုင်ပေမဲ့ အရေးကြီးဆုံးအချက်က တော့ အဲဒီနုိုင်ငံတွေမှာ မြန်မာနုိုင်ငံလုို နှစ် ၆၀ ကျော် ပြည်တွင်းစစ်ရှိမနေခြင်းပါပဲ။ သခင်သိန်းဖေရဲ့ စကားလုံးကို ကိုးကားရမယ်ဆုိုရင် ‘’အမျိုးသားသွေးစည်းညီညွတ်ရေး၊ အမျိုးသားပြန်လည်ရင်ကြားစေ့ရေး’’ ရအောင် မလုပ်နုိုင်လုို့ပါပဲ။ ဒါကုို တဦးတယောက်၊ တဖွဲ့တစုတည်းက ဆောင်ရွက်လုို့မရ၊ ရှိသမျှအင်အား စုတွေအားလုံး ပူးပေါင်းဆောင်ရွက်မှရမယ်လို့ သခင်သိန်းဖေ မကြာခဏပြောခဲ့ဖူးပါတယ်။ 

အခု NLD အစိုးရသစ်လက်ထက်မှာတော့ အားလုံးနီးပါး ပါဝင်ခွင့်ရတဲ့ ၂၁ ရာစုပင်လုံညီလာခံကျင်းပနေပြီ ဖြစ်လုို့ အမျိုးသားပြန်လည်ရင်ကြားစေ့ရေးလုပ်ငန်းစဉ်ဟာ အရင်စစ်အစိုးရခေတ်နဲ့စာရင် ပန်းတုိုင်နဲ့ပုိုနီးစပ် လာပြီလုို့ မျှော်လင့်နုိုင်ပါတယ်။ ဒါပေမဲ့ NLD အစိုးရနဲ့ တုိုင်းရင်းသားပါတီတွေကြား၊ NLD အစိုးရနဲ့ ၈၈ မျိုးဆက်တွေကြား၊ NLD အစိုးရနဲ ကျောင်းသားလူငယ်တွေကြား ပူးပေါင်းဆောင်ရွက်မှုကတော့ အားရ လောက်တဲ့အဆင့်ထိ ရောက်မလာသေးပါ။

ဘာကြောင့်လဲ။ နုိုင်ငံရေးဆန်းစစ်သူတချို့ကတော့ NLD အစိုးရသက်တန်း နှစ်တာကာလရဲ့ ပထမ နှစ်ပုိုင်းတွေမှာ  မဟာမိတ်ဆက်ဆံရေးတည်ဆောက်မှု၊ ပါတီတွင်းတည်ဆောက်မှု၊ လူထုစည်းရုံးရေး တည်ဆောက်မှုတွေထက် စစ်တပ်နဲ့ ဆက်ဆံရေးပြေလည်အောင် တည်ဆောက်ရေး၊ လူဟောင်းတွေနဲ့ ပြေလည်အောင်တည်ဆောက်ရေး၊ (အိမ်ဟောင်းကိုဖျက်ပြီး အိမ်သစ်ဆောက်မဲ့အစား အိမ်အဟောင်းကို ပြင်ပြီး နေပျော်အောင်လုပ်ရမယ်လုို့ ဒေါ်အောင်ဆန်း စုကြည်ကိုယ်တုိုင် ဂျပန်ခရီးစဉ်အတွင်း ပြောသွားခဲ့ပြီး ပါပြီ) ခရုိုနီခရုိုပြာတွေနဲ့ အဆင်ပြေအောင်ဆက်ဆံရေးတွေလုပ်ပြီး အစိုးရယန္တယား (အာဏာ) သူ့လက်ထဲ တကယ်ရောက်လာအောင်ဆောင်ရွက်ရေးကုို ဦးစားပေးတာ ဘာဝကျတယ်လုို့ဆုိုပါတယ်။


ဒါပေမဲ့ အဲဒီဖက်ကုိုချည်း ဇောင်းပေးရင်းနဲ့ မဟာမိတ်တွေနဲ့ဆက်ဆံရေးပျက်သွားတာမျိုးမဖြစ်အောင်တော့ သတိထားဖုို့လုိုပါလိမ်မ့ယ်။ စစ်တပ်နဲ့အပေးအယူလုပ်တဲ့အထဲမှာ ပြည်တွင်းစစ်ရပ်ပြီး ငြိမ်းချမ်းရေးဆွေးနွေး ပွဲမှာ အားလုံးပါလာတဲ့အဆင့်အထိရောက်အောင် တုိုက်တွန်းဖုို့လုိုနေပါတယ်။ နုိုင်ငံရေးဖက်မှာ ဒီ ချက်ကုို အကောင်ထည်ဖေါ် နုိုင်ပြီဆုိုရင် နှစ် ၇၀ နောက်ကျနေလည်း ပြသာနာမရှိပါ။ အချိန်တုိုအတွင်း လမ်းမှန်ပေါ် ရောက်အောင် မြန်မာနုိုင်ငံ ပြန်တက်နုိုင်ပါလိမ့်မယ်။


တနည်းအားဖြင့်ပြောမယ်ဆုိုရင်တော့ ဗုိုလ်ချုပ်အောင်ဆန်းနဲ့ သခင်သိန်းဖေအပါဝင် ရဲဘော်သုံးကျိပ် ၀င်တွေ၊ သခင်တွေမျှော်မှန်းခဲ့တဲ့ လွတ်လပ်ပြီးဖွံဖြိုးတုိုးတက်တဲ့ မြန်မာနုိုင်ငံဖြစ်အောင် တည်ဆောက်ရေး ဟာ လက်ရှိအစိုးရနဲ့ ကျနော်တုို့မျုိုးဆက်မှာ တာဝန်ရှိပါတယ်။ ဒါကြောင့် သခင်သိန်းဖေ လွဲပြောင်းပေးအပ်ခဲ့ တဲ့ လွတ်လပ်ရေးတုိုက်ပွဲဝင် အလံတော်ကုို စွဲမြဲစွာကိုင်စွဲပြီး ပြည်တွင်းစစ်ရပ်စဲရေး၊ အမျိုးသားညီညွတ်ရေး၊ တုိုင်းပြည်တည်ဆောက်ရေးအတွက် မျိုးဆက်သစ်တွေအားလုံး ပူးပေါင်းဆောင်ရွက်ကြဖုို့၊ ဆောင်ရွက်ခွင့် ပေးဖုို့ လုိုနေပြီဖြစ်ပါတယ်။      


0 comments:

Post a Comment

Share

Twitter Delicious Facebook Digg Stumbleupon Favorites More