သဘာဝအလှကုို ခြံစည်းရုံးခတ် ကာကွယ်ဖုို့ မလုိုပါ

Sunday, July 26 , 2015. The Voice Daily. 

ဟောလီးဒေးရာသီမှာ ဘယ်သွားခဲ့ကြသလဲ

ဝါဆို ၀ါခေါင် ရေဖောင်ဖောင်ဆုိုတဲ့အတုိုင်း မြန်မာနဲ့ အာဆီယံ ဒေသနုိုင်ငံတွေမှာ ရေးကြီး ရေလျှံမှုတွေ ဖြစ်နေပေမဲ့ နော်ဝေးနဲ့ ဥရောပမှာတော့ ဒီအချိန်ဟာ နွေရာသီဖြစ်ပါတယ်။ အထူးသဖြင့် ဇူလုိုင်လဟာ ဥရောပသားတွေ ဟောလီးဒေး (Vacation) ထွက်တဲ့လ ပါ။

လူ ၅ ဦးမှာ ၄ ဦး ဒီရာသမီမှာ ဟောလီးဒေးထွက်တယ်လို့ နော်ဝေးမီဒီယာတွေကရေးပါတယ်။ အဲဒီထဲက ၅၁ ရာခုိုင်နှုန်းဟာ နုိုင်ငံရပ်ခြားဆီထွက်ကြပြီး နေရာအသစ်၊ ယဉ်ကျေးမှုအသစ်၊ အစားအသောက်အသစ် အဆန်းတွေကို ရှာဖွေကြတယ်လုို့ဆုိုပါတယ်။ ဒါကြောင့် ဖြစ်မယ်။ ဇူလုိုင်လဆန်းပုိုင်းကစပြီး အခု တတိယ သတင်းပတ်အထိ အော်စလုိုမြို့လယ်လမ်းတွေ၊ ကုန်တုိုက်တွေ၊ ကားဂိတ်တွ၊ မြေအောက်ရထားဘူတာ တွေမှာ လူအတော်နည်းသွားတာ၊ ချောက်ကပ်ကပ်ဖြစ်သွားတာကို သတိထားမိပါတယ်။ 

ဒီနှစ်နွေမှာ ပြည်ပခရီးမသွားဖြစ်တဲ့ ကျနော်ကတော့ နော်ဝေးနုိုင်ငံရဲ့ အနောက်တောင်အရပ်ရှိ ကမ္ဘာကျော် ကျောက်ဖျာတခုဆီ သွားလည်ဖုို့ ဆုံးဖြတ်လုိုက်ပါတယ်။ နော်ဝေးဘာသာနဲ့ Preikestolen ၊ အင်္ဂလိပ် ဘာသာနဲ့ the Pulpit Rock လုို့ခေါ်တဲ့ ဒီကျောက်ဖျာဟာ ချင်းတုိုင်းရင်းသားအများစုပါတဲ့ မြန်မာနုိုင်ငံသားတွေ ရာနဲ့ချီအခြေချနေထုိုင်တဲ့ ရေနံမြို့တော် Stavanger ဒေသမှာရှိပါတယ်။ 

လေယဉ်လက်မှတ်ဝယ်ပြီး အဲဒီမြို့ဆီ ကျနော်ရောက်သွားတဲ့အချိန်က မနက် ၁၁ နာရီလောက်ပဲရှိပါ သေးတယ်။ ကျောက်တုံးကြီးဆီ ဘယ်လုိုသွားရမလဲ၊ အခုသွားရင် ညနေပြန်ရောက်နုိုင်သလားဆုိုပြီး မေးကြည့်တော့ “ဟောဒီ ဆိပ်ကမ်းကနေ Ferry စီးပါ။ ဟုိုဖက်ကမ်းရောက်ရင် ဘတ်စ်ကားကြိုနေပါလိမ့် မယ်။ ကားဂိတ်ဆုံးကနေ ကျောက်တုံးဆီလျောက်မယ်ဆုိုရင် အနည်းဆုံး ၂ နာရီခွဲ ကြာနုိုင်ပါတယ်” ဆုိုပြီး ဟုိုတယ်ဝန်ထမ်းကဖြေပါတယ်။

လှေနဲ့ ကားစီးချိန်ကလည်း တနာရီလောက် ထပ်ကြာဦးမယ်တဲ့။ အားလုံးပေါင်းလုိုက်တော့ အသွားတခြမ်း တင် ၃ နာရီကျော်နေပြီ။ အပြန်နဲ့ပေါင်းရင် ၇ နာရီထားလုိုက်။ တောင်ပေါ်မှာ ဟုိုငေး၊ ဒီ ကြည့် လုပ်မဲ့အချိန်ပါ ပေါင်းရင် အနည်းဆုံး ၈ နာရီလောက် အချိန်ယူရမဲ့ခရီးပေါ့။ နွေရာသီဖြစ်လုို့ ၁၀ နာရီမှ နေ၀င်တယ်ပဲထား။ အဲဒီကပြန်တဲ့ နောက်ဆုံးဘတ်စ်ကားက ည ၉ နာရီအထိပဲ ရှိသတဲ့။

ဒါတွေကို ကုိုယ်က အသေးစိပ်သိမထားပါ။ Stavanger နဲ့ Preikestolen က ၂၅ ကီလုိုပဲဝေးတယ်ဆုိုတော့ နာရီဝက်လောက် ဘတ်စ်ကားစီးရင် အေးဆေးရောက်ပြီပေါ့။ တောင်ပေါ်တက်တယ်ဆုိုရင်လည်း ကျိုက်ထိးရုိုးစေတီဆီ တက်သလုိုမျိုး ကားနဲ့တက်ပြီး နည်းနည်းပဲ လမ်းလျောက်ရမယ်လုို့ ထင်ထားခဲ့တာပါ။

သစ်သားအိမ်နဲ့ ရေနံပြတုိုက်

အခုတော့ အဲဒီလုိုမဟုတ်။ ရာသီဥတုကလည်း နေ မသာပဲ မုိုးက ခပ်အုပ်အုပ်။ လမ်းမှာမုိုးမိရင် ဒုက္ခ။ လေကလည်း တုိုက်သလားမမေးနဲ့။ ဒီတုိုင်းဆုိုရင်တော့ ဒီနေ့အတွက် စိတ်လျော့မှ ဖြစ်မယ်။ မနက်ဖြန်စောစောမှ ထတက်တော့မယ်လုို့ ဆုံးဖြတ်လုိုက်ပါတယ်။ 

ဒါပေမဲ့ ဒီအထိလာပြီးမှ ဟုိုတယ်ပေါ်ဒီတုိုင်းတက်အိပ်နေလုို့ ဘယ်ဖြစ်မလဲ။ တန်အောင်လျောက်လည်မှ ဆုိုတဲ့ စိတ်ကူးနဲ့ မြို့ထဲလမ်းလျောက်ထွက်လာခဲ့ပါတယ်။ Stavanger ဟာ နော်ဝေးနုိုင်ငံရဲ့ စတုတ္တ အကြီးဆုံးမြို့ဖြစ်ပြီး လူဦးရေ တသိန်းခွဲနီးပါးရှိတဲ့ ဆိပ်ကမ်းမြို့ဖြစ်ပါတယ်။ နုိုင်ငံတကာရေနံကုပ္ဗဏီတွေ ရုံးစုိုက်တဲ့မြိုံ၊ ပင်လယ်ကူးသဘောင်္တွေ ဆုိုက်ကပ်တဲ့မြို့ဖြစ်တဲ့အတွက် အတော်စည်ကားပါတယ်။

ပြီးတော့ ထူးထူးခြားခြား အဖြူရောင်၊ အ၀ါနုရောင်ဆေးသုတ်ထားတဲ့ သစ်သားအိမ်ဟောင်း အတော် များများကို မြို့လယ်မှာ တွေ့ရပါတယ်။ ဒါတွေဟာ ၁၈ ရာစုနဲ့ ၁၉ ရာစုက သစ်သားအိမ်တွေဖြစ်ပြီး heritage ရှေ့းဟောင်းအမွေ အနှစ်ဖြစ် ထိမ်းသိမ်းထားတာဖြစ်တယ်လို့ ဆုိုပါတယ်။ ထိမ်းသိမ်းထားတယ်ဆုိုတာ ပြတုိုက်လုိုမျိုး ဘယ်သူမှ မတုို့မထိပဲ ထားတာမျိုးမဟုတ်ပါ။ သူ့အိမ်ကိုယ့်အိမ်လုိုပဲ သာမန်လူတွေ မိသားစုအလိုက်နေထုိုင်နေတဲ့ မြို့ထဲကပုံမှန် လူနေအိမ်တွေသာ ဖြစ်ပါတယ်။

မြန်မာနုိုင်ငံမှာတော့ လူနေအိမ်ကို ဒီလုိုထိမ်းထားဖုို့နေနေသာသာ ရှေးဟောင်း တုိုင်တရာဘုန်းကြီး ကျောင်းတွေတောင် မရှိတော့ပါဘူး။ သစ်သားကျောင်းအုိုတွေအစား တုိုက်သစ်ကျောင်းဆောက်လှူမှ ခေတ်မီတယ်ဆုိုတဲ့ တကာတွေရဲ့ဆန္ဒအရ နှစ် ၁၀၀ ၀န်းကျင်က ပျဉ်းကတုိုးကျောင်းတွေကိုဖြိုချပြီး ကွန်ကရစ်ကျောင်းဆောင်တွေကို လက်ခံလုိုက်ရတယ်လို့ ကျနော်တုို့ရွာက တောရကျောင်းဆရာတော် မိန့်တာကို သွားအမှတ်ရမိပါတယ်။ 

နောက်ထပ် ထူးထူးခြားခြားတွေ့မိတာက ရေနံပြတုိုက်။ မြန်မာနုိုင်ငံမှာလည်း ရေနံထွက်ပေမဲ့ ရေနံပြတုိုက်ရှိ တယ် လုို့ တခါမှမကြားမိပါ။ ဒီမှာတော့ ရေနံကုို ဘယ်လိုရှာဖွေတယ်၊ ဘယ်လုိုတူးတယ်၊ ရရှိတဲ့ငွေတွေကို ဘယ်လုို သုံးစွဲတယ် စသဖြင့် အသေးစိပ်ပြသထားပါတယ်။

၁၉၆၀ လွန်နှစ်တွေအတွင်း နော်ဝေးကမ်းလွန်မှာရေနံစတွေ့တဲ့အချိန်ဟာ မြန်မာနုိုင်ငံမှာ စစ်တပ်က အာဏာ စသိမ်းတဲ့အချိန်ပေါ့။ အဲဒီလုိုရေနံမတွေ့မီအထိ နော်ဝေးဟာ ဘာမှတုိုးတက်ကြီးပွါးမှု မရှိသေးပါ။ မြန်မာနုိုင်ငံက အဲဒီ အချိန်မှာ အာဆီယံရဲ့ စီးပွါးရေးထိပ်ဆုံး။ ဒါပေမယ့် အခု ၅၅ နှစ်လောက်ကြာ ပြီးတဲ့ အခါမှာတော့ ရေနံထွက်တာခြင်းတူတဲ့ နုိုင်ငံ ၂ ခု ဘယ်လောက်အထိ ကွာခြားသွားသလဲ။ ဘာကြောင်လဲ။

တကယ်တော့ ရေနံဆုိုတာ တူးပြီးရောင်းစားရုံနဲ့ ကိစ္စပြီးတာမဟုတ်။ ရေနံတွေတူးလုို့ကုန်သွားရင် ဘယ်လုို လုပ်မလဲ၊ ဒီအတွက် ရေနံအစား တခြားစွမ်းအင်တွေကိုရှာဖုို့ နော်ဝေးကကြိုးစားနေပါတယ်။ လောင်စာကို မီးရှို့ရာကနေ ထွက်လာတဲ့ အပူငွေ့တွေဟာ လေထုညစ်ညမ်းမှုကို အတော်ဆုိုးဝါးစေတယ်လုို့ဆုိုပါတယ်။ ဒါကြောင့် ရေနံ၊ ဓာတ်ငွေ့၊ ကျောက်မီးသွေးလုို တွင်းထွက်လောင်စာတွေအစား မီးခုိုးမထွက်တဲ့ (ကာဗွန် မထွက်တဲ့) ရေအား၊ လေအား၊ နေ အားနဲ့ လည်နုိုင်မဲ့ စွမ်း အင်တွေကို နော်ဝေးက ဦးဆောင်ပြီး ရှာဖွေနေတယ်။

၂၀၂၀ မှာ အားလုံးအစားထုိုး ပြောင်းသုံးနုိုင်ဖုို့မသေချာသေးပေမဲ့ ၂၀၄၀ လောက်ဆုို တကယ်ဖြစ်လာနုိုင် တယ်လို့ ဆုိုပါတယ်။ မြန်မာနုိုင်ငံမှာတော့ အခုထိ ရေနံတွင်းသစ်တွေ၊ ဓာတ်ငွေတွင်းသစ်တွေ၊ ကျောက်မီးသွေးတွင်းသစ် တွေ ရှာဖွေတူးဖေါ်လုို့ကောင်းတုန်း၊ လျှပ်စစ်မီးမရသူက ၇၀ ရာခုိုင်နှုန်းအထိ ရှိနေတုန်း။

Preikestolen ဆီ ချီတက်ပါတော့မည်

နွေလယ်ရာသီဆုိုပေမဲ့ ကမ်းရုိုးတန်းမြို့ရဲ့အပူချိန်က ၁၅ ဒီဂရီလောက်ပဲရှိပါတယ်။ လေတုိုက်နှုန်းကလည်း ၆-၇ ကီလုို လောက်ပြင်းပါတယ်။ ဒါပေမယ့် ဒီနေ့ မုိုးမရွာဘူးလုို့ပြထားတဲ့အတွက် မနက် ၈ နာရီခွဲလောက် ကတည်းက သဘောင်္ဆိပ်ဆီ ကျနော်ရောက်နေပါတယ်။ ဒီမြို့ကနေ Tau အထိ သဘောင်္စီး၊ ပြီးမှ ဘတ်စ်ကားနဲ့တဆင့် တောင်ခြေအထိသွား၊ အဲဒီကုိုရောက်မှ လမ်းလျောက်တက်ရမယ်တဲ့။ ဒီအတွက် အသွားအပြန် လှေခ၊ ကားခ ၂၅၀ ခရုိုနာ။ 

တကယ်လို့ လမ်းမလျောက်ချင်ဘူး၊ တောင်မတက်နုိုင်ဘူးဆုိုရင် ဒီနေရာကနေ ရေလက်ကြားတလျောက် သွားတဲ့ သဘောင်္ကုိုစီး။ အသွားအပြန်မှ ၃ နာရီဝန်းကျင်ပဲကြာမယ်။ ကျောက်ဆောင်ပေါ် မရောက်နုိုင်ပေမဲ့ ရေထဲကနေ အပေါ်မော်ကြည့်ပြီး ပြန်လာနုိုင်တယ်။ ဒီအတွက် လှေခက ၄၂၀ ခရုိုနာ။ 

ကုိုယ်က ကျောက်ဆောင်ပေါ်တက်ချင်သူဆုိုတော့ ပထမ နည်းကိုပဲရွေးလုိုက်ပါတယ်။ ဒီနည်းက မေလ ၁ ရက်နေ့ ကနေ စက်တင်ဘာ ၃၀ ရက်နေ့အထိ (၆ လ) ပဲ ရှိပါတယ်။ ကျန်တဲ့အချိန်သွားချင်တယ်ဆုိုရင် ဒုတိယ နည်းကုိုသာရွေးပေတော့။ Ferry ဆိုပေမဲ့ မော်လမြိုင်-မုတ္တမ (သံလွင်တံတားမရှိခင်က) ပြေးတဲ့ ဇက်တွေလုို ခပ်သေးသေးမဟုတ် ပါ။ ကားအစိး ၂၀ လောက် တင်နုိုင်တဲ့ ၂ ထပ် ရေယဉ်ကြီး။

လှစီး၊ ကားစီးပြီး တနာရီလောက်အကြာမှာတော့ တောင်ခြေရင်း ဟုိုတယ်ဆီရောက်သွားပါတယ်။ ဟုိုတယ်လည်း လူလျှံနေပြီထင်ပါရဲ့။ ဘေးနားက မျက်ခင်းပြင်နဲ့ သစ်တောစပ်ကကွင်းပြင်ထဲမှာ ရွက်ဖျက်တဲထုိုးပြီး နေရာယူထားသူတွေက ရာနဲ့ချီရှိနေပါတယ်။ အတော်များများက အိပ်ခန်း၊ မီးဖုိုခန်းတွေပါတဲ့ အပန်းဖြေခရီးထွက်တဲ့ ကားတွေနဲ့။ ကျနော်နဲ့အတူ တောင်တက်သူတွေထဲမှာတော့ ဘတ်စ်ကားစီးလာသူက အများစုပါ။

၂ နာရီခွဲစာ တောင်တက်ခရီးကို ဘယ်လုိုသွားရမလဲဆုိုပြီး ကုိုယ်ကစိုးရိမ်နေပေမဲ့ အနောက်တုိုင်းသား ပင်စင်စား အဖုိုး၊ အဖွားတွေက တုတ်ကောက်ကုိုယ်စီနဲ့ ကိုယ့်ကုိုကျော်တက်သွားခဲ့ပေါ့။ တချို့လူလတ်ပုိုင်း တွေက လသားခလေးငယ်လေးကုိုတောင် ကျောမှာပုိုးပြီးခပ်သွက်သွက်တက်လုို့။ ကျောင်းသားလေးတွေ၊ ဆယ်ကျော်သက်လေးတွေကတော့ ခုပေါက်ပြေးလွှားပြီး ဖြတ်ကျော်သွားကြလေရဲ့။ 

တောင်ခြေကနေ ကီလုိုဝက်ခန့် မတ်စောင့်လှတဲ့ တောင်ကိုတက်ပြီးတဲ့နောက် နားနေစခန်း မြေပြန့်နေရာ လေးတခုကုို တွေ့ပါတယ်။ လူသွားလမ်းကြမ်းမှအပ သစ်ပင်ကြီးတွေ၊ ကျောက်ဆောင်ကျောက်တုံးတွေက တကယ့်သဘာဝအတုိုင်း။ သစ်မြစ်တွေက လမ်းပေါ်မှာ ကန့်လန့်ခံလုိုခံ၊ ကျောက်တုံးတွေက မညီညာတဲ့ လှေကားထစ်တွေ။ လွန်ခဲ့တဲ့ နှစ် ၂၀ ကျော်က တက်ခဲ့ဖူးတဲ့ ကျိုက်ထီးရုိုးတောင်တက်လမ်းကို လွမ်းချင် စရာကြီး။

ပထမ ဆုံးတောင်ကုို မြင့်လှပြီလုို့ထင်ပေမဲ့ နောက်ထပ်တွေ့ရတဲ့တောင်အားလုံးက သူ့ ထက်မြင့်တာချည်း ပါ။ ထူးခြားတာကတော့ လူတွေထောင်၊ သောင်းချီသွားနေပေမဲ့ လမ်းကိုအသေချာပြင်ထား မပေးပါ။ သဘာဝအတုိုင်း ရှိနေအောင် တမင်ပစ်ထားပုံရပါတယ်။ တချို့ရေအုိုင်တဲ့နေရာတွေမှာတော့ လူနှစ်ဦး အသွား-အပြန် လျောက်သာရုံ သစ်သားတံတားလမ်းလေးထုိုးပေးထားပါတယ်။ တောင်ခြေကနေ တောင်ထိပ်အထိ ၄ ကီလုိုသာရှိတယ်ဆုိုပေမဲ့ ၁၄ ကီလုိုနဲ့မှား နေသလား၊ မရောက်နုိုင်တော့ပါလားဆုိုပြီး ခံစားရပါတယ်။

၂ ကီလုိုမှတ်တုိုင်အနီးရှိ တောင်ကျောက မတ်စောင့်ဆုံးဖြစ်ပြီး ကျောက်ဆောင်ကို တွယ်တက်ရတဲ့အတွက် လူကုို ''ဟောဟဲ'' ဖြစ်စေပါတယ်။ ရေကလဲစိုနေတော့ ဖိနပ်မကောင်းရင် ဂျိုင့်ထဲချော်ကျနုိုင်ပါတယ်။ ဖိနပ် ဆုိုလုို့ ဒီတောင်ပေါ် တက်မယ်ဆုိုရင် ခပ်ကောင်းကောင်း လမ်းလျောက်ဖိနပ်စီးလာဖုို့လုိုပါတယ်။ ၀တ်စုံ ကလည်း အားကစားဝတ်စုံနဲ့မှ အဆင်ပြေ နုိုင်ပါတယ်။ ပြီးတော့ ခပ်သေးသေးကျောပုိုးအိတ်ကိုလွယ်ပြိး အဲဒီထဲမှာ ရေ၊ အဆာပြေစားစရာနဲ့ သစ်သီးတချို့ ထည့်လာဖုို့လုိုပါတယ်။ ဘာကြောင့်လဲဆုိုရင် အသွား-အပြန် ၅ နာရီကျော်ခရီးစဉ်အတွင်း ဘာဆုိုင်၊ ဘာတဲမှ မရှိပါ။ ကျိုက်ထီးရုိုးတောင်နဲ့ မတူပါ။

တောင်ထိပ်ဆီရောက်ဖုို့ တကီလုိုခန့်အလုိုမှာတော့ ရွှေရင်စုို့ တောင်ကျောလုို့ခေါ်နုိုင်တဲ့ တကယ့်ကို တောင်နံရံ ပါးပါးလေးပေါ် ကပ်လျောက်သွားရတဲ့ လမ်းကျဉ်းလေးကိုဖြတ်ရပါတယ်။ မှတ်မှတ်ရရ လက်ကုိုင်စရာနံရံပါတဲ့ သစ်သားတံတားငယ်ဆုိုလုို့ ဒီနေရာလေးတခုပဲရှိပါတယ်။ ကျန်နေရာတွေအားလုံး ပုိုးလုံးပက်လက်။

အဲဒီ ရွှေရင်စုို့ တောင်ကျောကိုကျော်ပြီးတာနဲ့ ကျောက်ဆောင်ကြီးအောက်က ရေလက်ကြားကို လှမ်းမြင် ရပါတယ်။ ပေ ၂၀၀၀ လောက်နက်တဲ့ ရေလက်ကြားနဲ့ တောင်နံရံကြားက လူသွားလမ်းပါးပါးလေးက ၃ ပေ၀န်းကျင်တောင် မရှိ။ ဘာအကာအရံမှလည်းမရှိ။ အသွားမတော်တလှမ်းဆုိုသလုို ခြေနဲနဲချော် သွားလုို့ကတော့ မတွေးဝံ့စရာ။

ကုိုယ်ကသာ မတွေးဝံ့ဖြစ်နေတာ။ လူငယ်တွေက ပြေးလွှားခုန်ပေါက်လုို့။ အဲဒီ လမ်းကျဉ်းလေးကုို ကျော်လုိုက်တာနဲ့ ကမ္ဘာကျော် Preikestolen သုို့မဟုတ် the Pulpit Rock ဆီရောက်ပြီလေ။ Wow! တကယ့်ကို အံ့မခန်းမြင်ကွင်းပါပဲ။ သဘာဝအလှဟာ တခါတရံမှာ စိတ်ကူးယဉ်ထားတာထက်တောင် ပုိုလှနေတတ်ပါကလား။

ဒီကျောက်ဖျာရဲ့အကျယ်ဟာ ၂၅ မီတာ (၇၅ ပေ၀န်းကျင်) ပတ်လည်ရှိတယ်လို့သိရပေမဲ့ လူများလွန်းလုို့ ခြေချစရာ နေရာတောင် မရှိပါဘူး။ အထူးသဖြင့် လာလည်သူတုိုင်း ဓာတ်ပုံရုိုက်ကြတဲ့ ကျောက်ဖျာရဲ့ အစွန်နေရာမှာ ဓာတ်ပုံရုိုက်နုိုင်ဖုို့အရေး ၁၀ မီနစ်ခန့် တန်းစီစောင့်ရပါတယ်။ ဒီကျောက်ဖျာဟာ အောက်မှာမြင်နေရတဲ့ Lysefjord ရေလက် ကြားမျက်နှာပြင်ထက် ၆၀၄ မီတာ (ပေ ၂၀၀၀ နီးပါး) မြင့်ပါတယ်။ ဒီလောက်သဲထိပ်ရင်ဖုို ကျောက်ဖျာစွန်းမှာမှ ခြေချိတ်ထုိုင်ပြီး ဓာတ်ပုံရုိုက်ရဲတဲ့ သူကရှိသေး။

အမြင့်ကြောက်တဲ့ ကုိုယ်ကတော့ ခြေတွေလက်တွေ တုန်လုို့။ ဒီထက်ပုံကောင်းကောင်းရချင်ရင် ဒီကျောက် ဖျာ နောက်ကျောက တောင်ကုန်းပေါ်တက်ပြီး အပေါ်စီးကနေရုိုက်သင့်ပါတယ်။ အဲဒီလုိုရုိုက်နုိုင်ဖို့ လူငယ်အတော်များများ ကျောက်တုံးတွေကိုဖက်ပြီးတက်နေကြပေမဲ့ ကုိုယ်က ဆက်မတက်ရဲတော့ပါ။ လူတုိုင်းတက်နုိုင်အောင် လူသွားလမ်းအဖြစ်လဲ ပြင်ထားမပေးပါ။

တကယ့်ကုို သဘာဝအတုိုင်းရှိနေတဲ့ ကျောက်တောင်ကြီး။ ဒီကျောက်ဖျာကိုမြင်ရဖုို့အရေး နှစ်စဉ် ဧည့်သည် ၂ သိန်း ခွဲခန့် လာလည်လေ့ရှိတယ်လုို့သိရပါတယ်။ တချို့ဧည်တွေက ကျောက်ဖျာကြီးကုို ဒီတုိုင်း အကာ အရံမရှိပဲ ထားတာဟာ အန္တာရယ်များလွန်းတယ်၊ အချိန်မရွေးပြုတ်ကျနုိုင်တဲ့အတွက် ကျောက်ဖျာ ဘေးနားတလျောက်ကုို သံတုိုင်တွေနဲ့ အခုိုင်အမာခြံစည်းရုိုးခတ်ထားသင့်တယ်လုို့ အကြံပြုဖူးတယ် ဆုိုပါတယ်။ ဒါပေမယ့် နော်ဝေးအာဏာပုိုင်တွေ ဖက်ကတော့ အဲဒီလုိုကာလုိုက်ရင် သဘာဝ အလှ ပျက်သွားမယ်။ သဘာဝကုို သဘာဝအတုိုင်း ပဲထားသင့်တယ်လုို့ ဆုံးဖြတ်ခဲ့ကြောင်းသိရပါတယ်။

တကယ်လို့ ဒီကျောက်ဖျာကြီးသာ နော်ဝေးမှာမဟုတ်ပဲ မြန်မာနုိုင်ငံမှာရှိနေမယ်ဆုိုရင် အာဏာပုိုင်တွေက ခြံစည်းရုံးခတ်ပြီး ကာကွယ်လေမလား။ ကျိုက်ထီးရုိုးစေတီဆီတက်သလုိုမျိုး တောင်ထိပ်အထိ ကားလမ်း ဖောက်လုိုက်လေ မလား။ ကျောက်ဆောင်ဆီသွားတဲ့လမ်းတလျောက်မှာ ဈေးဆုိုင်တွေ၊ ဟုိုတယ်တွေ ဆောက်ခွင့်ပေးလုိုက်လေ မလား။ သစ်ပင်ကြီးတွေ၊ ကျောက်ဆောင်တွေကြားမှာ ဘီယာဗူးခွံ၊ ရေသန်ဗူးခွံ၊ ပလစတစ်စတွေနဲ့ ရှုတ်ပွနေလေ မလား။ တကယ်တော့ သဘာဝအလှဆုိုတာ သဘာဝအတုိုင်းရှိနေမှ တန်ဖုိုးရှိမယ်မဟုတ်ပါလား။         ။

Posted in: TRAVEL