Monday, January 11, 2016

အားလုံးပါတဲ့ ငြိမ်းချမ်းရေးဖြစ်အောင် ဘယ်လုိုလုပ်မလဲ

The Voice Daily, 11-01-2016.

ကိုယ်စားလှယ် ၇၀၀ ကျော်တက်မယ့် ညီလာခံ

၁၉၄၈ ခုနှစ် မြန်မာနိုင်ငံ လွတ်လပ်ရေးရပြီး ကတည်း စတင်ဖြစ်ပွားခဲ့တဲ့ ပြည်တွင်းစစ် (အစိုးရအခေါ် တိုင်းရင်းသား လက်နက်ကိုင် ပဋိပက္ခများ) အဆုံးသတ်နိုင်ရေးအတွက် ဦးသိန်းစိန် အစိုးရက ကြိုးပမ်းခဲ့တာကို အားလုံးသိပြီး ဖြစ်ပါတယ်။ အစိုးရသက်တမ်း ၅ နှစ်တာကာလ ကြိုးပမ်းချက်ရဲ့ နောက်ဆုံးရလဒ်တော့ တိုင်းရင်းသား လက်နက်ကိုင်အဖွဲ့ ရှစ်ဖွဲ့နဲ့ (NCA) တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ်ကို ၂၀၁၅ ခုနှစ် အောက်တိုဘာလ ၁၅ ရက်နေ့မှာ ချုပ်ဆိုနိုင်ခဲ့ခြင်းပါပဲ။

ဒီစာချုပ်ပါ သဘောတူညီချက်တွေအရ စာချုပ်ကို လက်မှတ်ထိုးပြီး ရက်ပေါင်း ၆၀ အတွင်း နိုင်ငံရေးမူဘောင် ချမှတ်ခြင်း၊ ရက်ပေါင်း ၉၀ အတွင်း နိုင်ငံရေးဆွေးနွေးပွဲ စတင်ခြင်းတွေ ဆောင်ရွက်ရမှာဖြစ်တဲ့ အတွက် စာချုပ်လက်မှတ်ရေးထိုးခဲ့တဲ့နေ့ကနေ ရက် ၉၀ အကွာ ဇန်နဝါရီလ ၁၂ ရက်နေ့မှာ အခုလို ငြိမ်းချမ်းရေး ညီလာခံခေါ်ဖို့ ဆုံးဖြတ်ရတာ ဖြစ်တယ်လို့ အစိုးရဘက်က ပြောပါတယ်။

ဒီညီလာခံကို တက်ဖို့အတွက် ကိုယ်စားလှယ် ၇၀၀ ခန့်ကို ရွေးချယ်ထားပြီး ဖြစ်တယ်လို့လည်း ဆိုပါတယ်။ အဲဒီထဲမှာ တပ်မတော်ဘက်က ၁၅၀၊ လွှတ်တော်ဘက်က ၇၅၊ အစိုးရဘက်မှ ၇၅၊ လက်မှတ်ထိုးထားတဲ့ တိုင်းရင်းသား လက်နက်ကိုင်အဖွဲ့ ရှစ်ဖွဲ့မှ ၁၅၀၊ နိုင်ငံရေးပါတီတွေဘက်က ၁၅၀၊ တိုင်းရင်းသား ကိုယ်စားလှယ် ၅၀ နဲ့ အခြားဖိတ်ကြားသင့်သူ ၅၀ ပါတယ်လို့ ငြိမ်းချမ်းရေး အကျိုးတော်ဆောင် (MPC) မြန်မာငြိမ်းချမ်းရေးစင်တာ တာဝန်ရှိသူတွေက ပြောပါတယ်။

ဒါပေမဲ့ ဝေဖန်သူတွေကတော့ ညီလာခံ ကျင်းပချိန်အထိ တိုက်ပွဲဖြစ်နေဆဲဖြစ်တဲ့ ရှမ်းပြည်နယ်၊ ကချင်ပြည်နယ်နဲ့ ရခိုင်ပြည်နယ်ဘက်က လက်နက်ကိုင်အဖွဲ့တွေ မပါတာကြောင့် ဒီညီလာခံဟာ တစ်နိုင်ငံလုံးကို ကိုယ်စားမပြုတဲ့အပြင် လက်ရှိဖြစ်ပွားနေတဲ့ တိုက်ပွဲတွေကိုတောင် ရပ်စဲအောင် လုပ်နိုင်ဖွယ် မရှိဘူးလို့ ထောက်ပြနေပါတယ်။

ပုံသဏ္ဌာန်နဲ့ အနှစ်သာရ အားပြိုင်မှု

ဝေဖန်သူတွေက ဘယ်လိုပဲ ထောက်ပြနေပါစေ၊ ဦးသိန်းစိန်အစိုးရ ဘက်ကတော့ သူ့သက်တမ်းအတွင်း NCA ကို (ရှစ်ဖွဲ့တည်း ထိုးသည့်တိုင်) လက်မှတ်ထိုးနိုင်တဲ့အပြင် ငြိမ်းချမ်းရေး ညီလာခံကိုတောင် ကျင်းပနိုင်ခဲ့တယ်ဆိုပြီး ပြချင်နေတာ သေချာပါတယ်။ ညီလာခံ အောင်မြင်ခြင်း၊ မအောင်မြင်ခြင်းဆိုတဲ့ ရလဒ်က အဓိကမဟုတ်။ သူ့အစိုးရသက်တမ်းအတွင်း ဘာတွေလုပ်နိုင်ခဲ့တယ်ဆိုတဲ့ လုပ်ရပ်ကိုသာ အဓိက ပြသချင်နေပုံ ရပါတယ်။


ဒါကြောင့် ၁၂ ရက်နေ့ပွဲကို ကြီးသထက်ကြီးအောင် လုပ်ပြမှာ သေချာပါတယ်။ အခုဖိတ်ထားတဲ့ ကိုယ်စားလှယ် ၇၀၀ ကျော်အပြင် ကုလသမဂ္ဂ အပါအဝင် နိုင်ငံတကာ သံတမန်တွေ၊ အထူးဧည့်သည်တွေ၊ လေ့လာသူတွေနဲ့ နိုင်ငံတကာ သတင်းစာဆရာတွေကိုပါ ဖိတ်ကြားထားတဲ့အတွက် ဖွင့်ပွဲနေ့မှာ လူ ၁၀၀၀ တောင် ကျော်သွားနိုင်တယ်လို့ သတင်းသမားတွေက ခန့်မှန်းနေပါတယ်။

ဒါပေမဲ့ အဲဒီလူ ၁၀၀၀ ထဲမှာ လက်ရှိဖြစ်နေဆဲ တိုက်ပွဲတွေကို ရပ်တန့်သွားအောင် နိုင်ငံရေးသြဇာအရ အမိန့်ပေးနိုင်သူ၊ စစ်ရေးသြဇာအရ အမိန့်ပေးနိုင်သူတွေ ပါလာပါ့မလား။ အတိအကျပြောရမယ်ဆိုရင် မကြာခင် တက်လာတော့မယ့် အစိုးရသစ်ရဲ့ခေါင်းဆောင် NLD ပါတီ ဥက္ကဋ္ဌ ဒေါ်အောင်ဆန်းစုကြည်နဲ့ လက်ရှိတပ်မတော်ကို အမိန့်ပေးနိုင်သူ တပ်/ချုပ် ဗိုလ်ချုပ်မှူးကြီး မင်းအောင်လှိုင်တို့ ဒီပွဲကို တက်မတက် မသေချာသေးပါ။

တစ်ခါ NCA မှာ လက်မှတ်မထိုးရသေးတဲ့၊ တစ်နည်းအားဖြင့် တပ်မတော်နဲ့ တိုက်ပွဲတွေဖြစ်နေဆဲ KIA (ကချင်လွတ်လပ်ရေး တပ်မတော်)၊ SAA-N (ရှမ်းပြည်တပ်မတော် မြောက်ပိုင်း)၊ TNLA (တအာင်းအမျိုးသား လွတ်မြောက်ရေး တပ်မတော်)၊ AA (ရက္ခိုင့်တပ်မတော်) အပါအဝင် UNFC (ညီညွတ်သော တိုင်းရင်းသားလူမျိုးများ ဖက်ဒရယ်ကောင်စီ) က ဒီပွဲကို တက်မှာမဟုတ်ဘူးလို့ ပြီးခဲ့တဲ့ ရက်ပိုင်းအတွင်းကပဲ ငြင်းဆိုထားပြီး ဖြစ်ပါတယ်။

ဒါကြောင့် ဒီပွဲကို အသံသာရှိပြီး အဆန်မပါတဲ့ပွဲ၊ အဓိက ဇာတ်ကောင်တွေ မပါဘဲ ဇာတ်ရံတွေချည်း ကပြရမယ့်ပွဲဆိုပြီး ဝေဖန်သူတွေက ထောက်ပြနေတာပါ။ ဒီလိုဝေဖန်သူတွေထဲမှာ NCA ကို လက်မှတ်ရေးထိုးထားတဲ့ တိုင်းရင်းသား လက်နက်ကိုင်အဖွဲ့ ရှစ်ဖွဲ့ထဲက အဓိကအဖွဲ့ဖြစ်တဲ့ KNU အဖွဲ့ရဲ့ ဒုဥက္ကဋ္ဌ ပါပါနေတယ် ဆိုရင်တော့ ဒါဟာ အတော်အလေးထား စဉ်းစားသင့်တဲ့ အဆင့်မှာ ရောက်နေပြီလို့ ထင်ပါတယ်။

“NCA လက်မှတ်မထိုးရသေးတဲ့ အဖွဲ့တွေကို မစောင့်ဘဲ၊ အသစ်တက်လာတော့မယ့် NLD အစိုးရကို မစောင့်ဘဲ လက်ရှိ ဦးသိန်းစိန်အစိုးရ သက်တမ်းအတွင်း တက်သုတ်ရိုက် ဆောင်ရွက်သွားမယ်ဆိုရင် အဖြေမရဘဲ ရှုပ်ထွေးမှုကိုသာ ပိုဖြစ်လာစေမှာ ဖြစ်တယ်” လို့ KNU ဒုဥက္ကဋ္ဌလည်းဖြစ်၊ တိုင်းရင်းသားလက်နက်ကိုင် တော်လှန်ရေးအဖွဲ့များ (EAO) ရဲ့ ခေါင်းဆောင်လည်းဖြစ်တဲ့ နော်စီပိုးရာစိန်က ဒီဇင်ဘာလ ၁၅ ရက်နေ့က ကျင်းပတဲ့ အော်စလို ဆွေးနွေးပွဲအတွင်း အတိအလင်း ဝေဖန်ခဲ့ပါတယ်။

တစ်ဆက်တည်းမှာပဲ ဒီဆွေးနွေးပွဲတွေအတွက် ငွေကြေးအကူအညီပေးနေတဲ့ နော်ဝေ အပါအဝင် နိုင်ငံတကာ အစိုးရတွေကိုလည်း “နိုင်ငံတကာ အလှူရှင်တွေဟာ ကွင်းထဲက အခြေအနေမှန်တွေကို အချိန်ယူ လေ့လာနားထောင်မှုလုပ်ဖို့ ပျက်ကွက်ခဲ့တယ်။ EAO နဲ့ ဒေသခံ တိုင်းရင်းသားတွေဘက်က ဘာတွေလိုအပ်နေသလဲ ဆိုတာကို မေးမြန်းခြင်းမရှိဘဲ သူတို့ လုပ်ချင်တာကို လက်ခံဖို့ လာပြောတာမျိုးသာ ဖြစ်နေတယ်” လို့ သူက ထောက်ပြခဲ့ပါတယ်။

တကယ်တော့ အပစ်ရပ်လက်မှတ်ထိုးတယ် ဆိုတာဟာ နိုင်ငံတကာ အကူအညီတွေ၊ နိုင်ငံတကာ ရင်းနှီးမြှုပ်နှံမှုတွေ ဝင်လာစေရေးအတွက် မဖြစ်သင့်ဘဲ ရေရှည်နိုင်ငံရေး ပြဿနာ ပြေလည်စေရေး အတွက်သာ ဖြစ်သင့်တယ်လို့လည်း သူက ပြောခဲ့ပါတယ်။

တောင်ပိုင်းနဲ့ မြောက်ပိုင်း အားပြိုင်မှု

ဒါက အစိုးရနဲ့ တိုင်းရင်းသား လက်နက်ကိုင်တွေကြားက မကျေလည်မှုအပေါ် အပြင်ကနေ ကြည့်တဲ့ ယေဘုယျအမြင်ပါ။ ဒါပေမဲ့ လက်နက်ကိုင် တော်လှန်ရေး ထဲထဲထဲဝင်ဝင် ပါဝင်ခဲ့ဖူးသူတွေ၊ တိုင်းရင်းသားအဖွဲ့တွေနဲ့ နီးစပ်သူတွေဘက်က ကြားရတဲ့ သတင်းတွေအရဆိုရင် NCA ဖြစ်စဉ်မှာ အစိုးရနဲ့ MPC ဘက်က အားနည်းချက်တွေရှိတဲ့အပြင် လက်နက်ကိုင်အဖွဲ့တွေကြား တောင်ပိုင်းနဲ့ မြောက်ပိုင်း အားပြိုင်မှုလည်း ရှိကောင်းရှိနေနိုင်တယ်လို့ သိရပါတယ်။

(၂၀၁၂ ခုနှစ် အပစ်ရပ်ရေးအတွက် ဘားအံမှာစတင်ဆွေးနွေးစဉ်ကပုံ။ ဓာတ်ပုံ-ဧရာဝတီ)

တောင်ပိုင်းဆိုတာက လက်ရှိ NCA ကို ဦးဆောင်လက်မှတ်ရေးထိုးလိုက်တဲ့ ထိုင်း-မြန်မာ နယ်စပ်အခြေစိုက် KNU ကရင့်အမျိုးသားအစည်းအရုံးနဲ့ မဟာမိတ်အဖွဲ့တွေကို ဆိုလိုတာပါ။ မြောက်ပိုင်းဆိုတာကတော့ အခုချိန်ထိ တိုက်ပွဲတွေ ဖြစ်နေဆဲဖြစ်ပြီး NCA မှာ လက်မှတ်ရေးထိုးနိုင်ခြင်း မရှိသေးတဲ့ တရုတ်-မြန်မာ နယ်စပ်အခြေစိုက် KIO (ကချင်လွတ်လပ်ရေးအဖွဲ့)၊ USWA (‘ဝ’ အဖွဲ့) အပါအဝင် လက်ရှိ UNFC မဟာမိတ်တွေကို ဆိုလိုတာပါ။

နောက်ကြောင်းကို နည်းနည်းပြောရမယ်ဆိုရင် ၈ လေးလုံး အရေးတော်ပုံ ဖြိုခွဲခံရပြီး နောက်ပိုင်း ကျောင်းသားတွေ ထောင်နဲ့ချီ တောခိုနေစဉ် တရုတ်-မြန်မာနယ်စပ်ရှိ ဗမာပြည်ကွန်မြူနစ်ပါတီမှာ အတွင်းရေး ပြဿနာတချို့ ဖြစ်ပွားခဲ့ပါတယ်။ ဒါကိုအခွင့်ကောင်းယူပြီး အဲဒီကာလက ထောက်လှမ်းရေး အကြီးအကဲဖြစ်တဲ့ ဗိုလ်ချုပ်ခင်ညွန့်က ဗကပ ခွဲထွက်အဖွဲ့တွေဖြစ်တဲ့ (USWA) ‘ဝ’၊ (NDAA) မိုင်းလား အပါအဝင် တရုတ်နယ်စပ် တစ်လျှောက်ရှိ တိုင်းရင်းသား လက်နက်ကိုင်အဖွဲ့တွေ အားလုံးနီးပါးနဲ့ အပစ်ရပ် သဘောတူချက် အလျင်အမြန် လုပ်လိုက်ပါတယ်။

အာဏာသိမ်းခါစ စစ်အစိုးရသစ်နဲ့ ဗကပ ခွဲထွက်အဖွဲ့တွေ အဲဒီလို အပစ်ရပ်လိုက်တဲ့ အချိန်ဟာ တောခိုကျောင်းသားတွေ အပါအဝင် ဒီမိုကရေစီ အင်အားစုတွေနဲ့ တိုင်းရင်းသား အင်အားစုတွေရဲ့ ဗဟိုဌာနချုပ်၊ KNU ရဲ့ ဗဟိုဌာနချုပ် မာနယ်ပလော အင်အားအကောင်းဆုံး၊ သြဇာအကြီးဆုံး အချိန်ဖြစ်ပါတယ်။ DAB (ဒီမိုကရက်တစ် မဟာမိတ် တပ်ပေါင်းစု) ကို KNU နဲ့ KIO က အဓိကဦးဆောင်ပြီး စစ်အစိုးရကို လက်နက်ကိုင်တိုက်ပွဲ အရှိန်မြှင့်နေချိန် ဖြစ်ပါတယ်။

၁၉၉၂ မာနယ်ပလော ထိုးစစ်ကို DAB တပ်ပေါင်းစုက ကြံ့ကြံ့ခံ တွန်းလှန်ခဲ့တဲ့အတွက် နဝတတပ်တွေ စစ်ဦးကျိုးပြီး ပြန်ဆုတ်သွားခဲ့ရပါတယ်။ ဒါပေမဲ့ မာနယ်ပလော တိုက်ပွဲအပြီး သိပ်မကြာခင် ၁၉၉၄ မှာတော့ KIO ဟာ DAB တပ်ပေါင်းစုထဲကနေ ထွက်ခွာပြီး နဝတနဲ့ သီးခြားအပစ်အခတ်ရပ်စဲရေး လုပ်သွားခဲ့ပါတယ်။
မာနယ်ပလော ဌာနချုပ်မှာ နိုင်ငံရေး မုန်တိုင်းထန်ပြီး အတော့်ကို လှုပ်လှုပ်ရှားရှား ဖြစ်သွားခဲ့ပါတယ်။ ဒါပေမဲ့ ဒီလမ်းကြောင်းက KIO တစ်ဖွဲ့တည်းနဲ့ ပြီးမသွား။ ရှမ်းပြည်နယ်ထဲက အဖွဲ့ငယ်လေးတွေ တဖြည်းဖြည်းနဲ့ ပဲ့ပါကုန်ပြီး ၁၉၉၅ မှာတော့ KNU နဲ့ နယ်မြေချင်း ထိနေတဲ့ မွန်ပြည်သစ်ပါတီ (NMSP) ကပါ နဝတနဲ့ အပစ်ရပ်ရေး လုပ်လိုက်ပါတော့တယ်။

ဒီလိုနဲ့ DAB တပ်ပေါင်းစုမှာ KNU နဲ့ သူ့နယ်မြေအတွင်း အခြေစိုက်တဲ့ ABSDFင်္ (ကျောင်းသားတပ်မတော်) အပါအဝင် အဖွဲ့ငယ်တချို့သာ ကျန်ပါတော့တယ်။ အဲဒီကာလ ၁၉၉၀ ပြည့်လွန် အပစ်ရပ်တဲ့ နှစ်တွေကို မြောက်ပိုင်းပြိုတဲ့ နှစ်တွေလို့ နယ်စပ်မှာ ခေါ်ကြပါတယ်။ အခု ၂၀၁၀ နောက်ပိုင်း ဝန်ကြီးဦးအောင်မင်းနဲ့ MPC ဦးစီးပြီး အပစ်ရပ်တဲ့ နှစ်တွေကိုတော့ တောင်ပိုင်းပြိုတဲ့ နှစ်တွေလို့ ခေါ်ဝေါ်ကြပါတယ်။

အားလုံးပါလာအောင် ဘယ်လိုလုပ်မလဲ

ဒါဖြင့် ဒီလိုတစ်ပိုင်းစီ မဖြစ်စေဘဲ ရှိသမျှ လက်နက်ကိုင်အဖွဲ့ အားလုံး ပါလာအောင် ဘယ်လိုလုပ်မလဲ။ ဒီမေးခွန်းကို ၁၂ ရက်နေ့မှာ စတင်ကျင်းပမယ့် ညီလာခံကနေ အဖြေရှာပေးဖို့ လိုနေပါတယ်။ ဒီလိုအဖြေရှာနိုင်ဖို့ဆိုရင် အဲဒီညီလာခံမှာ အဓိက ဇာတ်ကောင်တွေ အားလုံး ပါဝင်ခွင့်ရဖို့ လိုပါတယ်။


ဒါပေမဲ့ အခုထိကတော့ အားလုံးပါဝင်ခွင့်ရမယ့် အလားအလာ မတွေ့ရသေးပါ။ ဒါကြောင့် တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး အဖြေကို ဒီညီလာခံထဲမှာ ရှာလို့မတွေ့နိုင်ပါ။ ဒါဖြင့် ဘယ်မှာသွားရှာရမှာလဲ။ တစ်နေ့ကပဲ UWSA ‘ဝ’ အဖွဲ့ တာဝန်ရှိသူတစ်ဦးက မီဒီယာတွေကို ပြောလိုက်တာ ရှင်းရှင်းလေးပါ။ “NLD အစိုးရသစ် တက်လာမှ အစိုးရနဲ့ ပြန်ဆက်ဆံမယ်” တဲ့။

အဖြေက ဒါပါပဲ။ ပြည်သူက ရွေးချယ်တင်မြှောက်ထားတဲ့၊ နိုင်ငံရေးအရ တရားဝင်မှုရှိတဲ့ အစိုးရနဲ့ တိုက်ရိုက်ဆွေးနွေးနိုင်မှ သူတို့ရဲ့ အနာဂတ်အတွက အာမခံချက်ရှိမယ် ဆိုတာကို တိုင်းရင်းသားတွေဘက်က ယုံကြည်ထားပါတယ်။
တစ်နည်းအားဖြင့် ပြောမယ်ဆိုရင်တော့ ၁၉၉၀ ပြည့်လွန်နှစ်တွေက ကြိုးပမ်းခဲ့တဲ့ စစ်ထောက်လှမ်းရေးရဲ့ ဖြိုခွဲရေးနည်း ဗျူဟာရော၊ အခု ၂၀၁၀ နောက်ပိုင်း ဦးသိန်းစိန်အစိုးရခေတ်မှာ ကြိုးပမ်းခဲ့တဲ့ MPC ရဲ့ တစ်ဆင့်ပြီးတစ်ဆင့် သိမ်းသွင်းဆွဲဆောင်ရေး နည်းနာတွေရောဟာ အလုပ်မဖြစ်ပါ။ ဘာကြောင့်လဲဆိုရင် ဒီနှစ်ဖွဲ့စလုံးမှာ၊ ဒါမှမဟုတ် ဒီနှစ်ဖွဲ့ကို တာဝန်ပေးခဲ့တဲ့ အရင်အစိုးရတွေမှာ လူထုက ရွေးချယ်ပေးအပ်ထားတဲ့ တရားဝင် နိုင်ငံရေးအာဏာ (legitimacy) မရှိလို့ ဖြစ်ပါတယ်။

ဒါကြောင့် လူထုက ရွေးကောက်တင်မြှောက်ထားတဲ့ NLD အစိုးရ တာဝန်ရှိသူတွေနဲ့ လက်ရှိတိုက်နေဆဲ အဖွဲ့တွေ၊ NCA မှာ လက်မှတ်မထိုးရသေးတဲ့ အဖွဲ့တွေနဲ့ တိုက်ရိုက်ဆွေးနွေးဖို့ လိုပါလိမ့်မယ်။ ဗိုလ်ချုပ်မှူးကြီး မင်းအောင်လှိုင်ကလည်း လူထုရွေးချယ်ထားတဲ့ NLD အစိုးရသစ်ရဲ့ မူဝါဒတွေကို ပူးပေါင်းဆောင်ရွက်ပြီး သူ့တပ်တွေကို ပြန်ညွန်ကြားမယ်ဆိုရင် ဒီကိစ္စ တဖြည်းဖြည်းနဲ့ ပြေလည်သွားနိုင်ပါတယ်။

ဒီလိုလုပ်နိုင်ဖို့အတွက် NLD ဟာ တိုင်းရင်းသားပါတီ ခေါင်းဆောင်တွေ၊ လက်နက်ကိုင်အဖွဲ့ ခေါင်းဆောင်တွေနဲ့ အခုရှိနေတဲ့ ဆက်ဆံရေးထက် မက ထဲထဲဝင်ဝင် ဆက်ဆံပြောဆိုဖို့ လိုပါတယ်။ တိုင်းရင်းသားတွေ တောင်းဆိုနေတဲ့ ကိုယ်ပိုင်ပြဋ္ဌာန်းခွင့်နဲ့ ဖက်ဒရယ်ပြည်ထောင်စုအပေါ် NLD ရဲ့ မူဝါဒလည်း အခုထက် ပိုတိကျအောင် ထုတ်ပြောဖို့ လိုပါတယ်။ ဒီကိစ္စတွေကို ရှောင်ဖယ်ဖယ် လုပ်မနေဘဲ ရဲရဲတင်းတင်း ကိုင်တွယ်ဖို့ NLD အစိုးရသစ်ရဲ့ပခုံးပေါ် တာဝန်ကျရောက်နေပြီ ဖြစ်ပါတယ်။

ထက်အောင်ကျော်

0 comments:

Post a Comment

Share

Twitter Delicious Facebook Digg Stumbleupon Favorites More