ဆောင်းခုို လူ
ပြီးခဲ့တဲ့သတင်းပတ်က တပတ်လုံးနီးပါး နှင်းမုန်တုိုင်းကျလုို့ ရထားတွေ၊ ဘတ်စ်တွေ အချိန်မှန် မပြေးနုိုင်ခဲ့ဘူး။ နှင်း တွေက ဒူးလောက်ရှိပြီး ကားတွေလမ်းချော်နေတာ၊ လမ်းပိတ်လုို့ ထရပ်ကားနဲ့လာဆွဲပေးနေတာတွေ အိမ်ပေါ်ကနေ လှမ်းမြင်နေရပါတယ်။ ကုိုယ်ကတော့ အဲဒီအပတ်က အလုပ်လဲမရှိ၊ ကျောင်းလဲမရှိဆုိုတော့ အပြင်မထွက်ပဲ အိမ်ပေါ် ကနေပဲ နှင်းတောကြီးကို ငေးကြည့်နေမိပေါ့။
(ဆီးနှင်းတွေဖုံးနေတဲ့ အော်စလုိုမြို့ပြင်က ရွာလေးတရွာ)
ဒီလုိုငေးရင်းနဲ့ ဒီနှစ်ဆောင်းရာသီဟောလီးဒေး ဘယ်ကုိုသွားရင်ကောင်းမလဲ စဉ်းစားမိပါတယ်။ မနှစ်ကတော့ အ ထူးလျော့ဈေးရလုို့ မြေထဲပင်လယ်ကမ်းခြေက ဆုိုကရေတီးတုို့၊ ပလေတုိုတုို့ရဲ့ရွာ ဂရိနုိုင်ငံ အေသင်မြို့ဆီ သွားဖြစ်ခဲ့ ပါတယ်။ ဒီနှစ်တော့ အခုချိန်ထိ အလျော့ဈေးမတွေ့သေးလုို့ ဘယ်မှသွားဖြစ်မယ်မထင်။ ဒီလုိုစဉ်းစားရင်းနဲ့ ထူထဲစွာ ကျနေတဲ့ နှင်းထုကိုငေးပြီး လွန်ခဲ့တဲ့ ၉ နှစ် ဒီလိုအချိန်မှာ သွားခဲ့ဖူးတဲ့ ဥရောပအနောက်ပုိုင်း မြေထဲပင်လယ် ကမ်းခြေရှိ စပိန်နုိုင်ငံ ဘာစီလုိုးနားနဲ့ ပေါ်တူဂီက လစ်ဘွန်းမြို့ကမ်းခြေတွေဆီ ရောက်သွားပါတယ်။
ကျောင်းသားဘ၀တုန်းက ဆောင်းခုိုငှက် တွေအကြောင်း စာအုပ်ထဲဖတ်ဖူးပေမဲ့ သိပ်သဘောမပေါက်ပါ။ ဥရောပက ရေခဲပြင်ကိုရောက်မှပဲ ဒီလုိုဆီးနှင်းတွေကြားမှာ ငှက်တွေ ဘယ်လုိုရှင်သန်နုိုင်မလဲဆုိုပြီး စဉ်းစားမိပါတယ်။ ဒီတော့ နုိုဝင်ဘာနှောင်းပိုင်းရောက်ပြီဆိုတာနဲ့ ငှက်အမျိုးအစားအတော်များများက မြေထဲပင်လယ်ကုိုဖြတ်ပြီး ဥရောပကနေ အာဖရိကဆီ ခရီးရှည်ချီတက်ကြတာပေါ့။ ခင်မောင်တုိုးရဲ့ ‘’ဂျိုးကြာငှက်တုို့ရဲ့ မုိုင်ထောင်ချီခရီး’’ ဆုိုတာ ဒါမျိုးဖြစ်မယ် ထင်ပါရဲ့။
တချို့ငှက်တွေကတော့ အာရှဖက်သွားတယ်ထင်ပါတယ်။ မြန်မာနုိုင်ငံက မုိုးယွန်းကြီးအင်းတို့၊ အင်းတော်ကြီးတုို့မှာ ဆောင်းခုိုငှက်တွေများတဲ့အကြောင်း သတင်းတွေထဲဖတ်ရပါတယ်။ ဒါက ဗီဇာမလို၊ ခရီးစရိတ်မကုန်ပဲ ‘’တောင် ပံပါ ရင် မင်းဆီသုို့’’ ဆုိုပြီး ကြိုက်တဲ့အချိန် ထသွားနုိုင်တဲ့ ငှက်တုို့ရဲ့ ထူးခြားချက်ပေါ့။
လူတွေကော ဘယ်လိုနေကြသလဲ။ လူက ငှက်လုိုမပျံနုိုင်တော့ လေယဉ်ဖုိုးတော့ ရှာရတာပေါ့။ ဗီဇာအတွက်က တော့ ဥရောပသားတွေကို နုိုင်ငံအတော်များများက ဗီဇာကင်းလွတ်ခွင့်ပေးထားတယ် မဟုတ်ပါလား။ ဒါပေမဲ့ အများ စုက အာဖရိကအထိမသွားပဲ မြေထဲပင်လယ်ကမ်းခြေက စပိန်တောင်ပုိုင်း၊ အီတလီတောင်ပုိုင်းက ကျွန်းတွေဆီ သွားလေ့ရှိပါတယ်။ ထားဝယ်ပင်လယ်ကနေ တနသာင်္ရီရိုးမကုိုကျော်ပြီး ထုိုင်းပင်လယ် ဟွာဟင်ဖက်ရောက်သွား သလုိုမျိုးနဲ့တူမယ်ထင်ပါတယ်။ ဒါပေမဲ့ ဥရောပမှာက နော်ဝေပင်လယ် (အန္တလန်တိတ်သမုဒရာ) နဲ့ မြေထဲပင်လယ် က အပူချိန်ချင်းအတော်ကွာပါတယ်။
နော်ဝေမှာ အခု အနှုတ် ၁၀ ဒီဂရီစင်တီဂရိတ်လောက်ရှိပြီး ဆီးနှင်းတွေ တပေလောက်ထူနေပေမဲ့ မြေထဲပင်လယ် ကမ်းခြေက ပြင်သစ်တောင်ပုိုင်း၊ အီတလီတောင်ပုိုင်း၊ စပိန်တောင်ပုိုင်း၊ ပေါ်တူဂီနဲ့ ဂရိနုိုင်ငံတွေမှာ အပူချိန်က အ ပေါင်း ၁၅ လောက်ရှိပြီး နေသာနေတတ်ပါတယ်။ ဒီတော့ အနောက်ဥရောပသားအတော်များများလဲ ဆောင်းခုိုငှက် တွေလို နော်ဝေပင်လယ်ကနေ မြေထဲပင်လယ်ဆီ ပျံသန်းကြတာပေါ့။ အထူးသဖြင့် နော်ဝေက ပင်စင်စားတွေဆုို စပိန်တောင်ပုိုင်းမှာ အိမ်ဝယ်ပြီး တဆောင်းလုံး အဲဒီမှာ သွားနေကြပါတယ်။
မြေထဲပင်လယ်ကမ်းခြေက ဘာစီလုိုးနားမြို့သုို့…
ဒါတွေက အခုနောက်ပုိုင်း ဟုိုသွားဒီသွား၊ ဟုိုဖတ်ဒီဖတ်နဲ့သိလာတာတွေပါ။ လွန်ခဲ့တဲ့ ဆယ်နှစ်နီးပါး ၂၀၀၉ ခုနှစ် ဖေဖေါ်ဝါရီခရီးစဉ်တုန်းကတော့ ဘာမှကိုကြိုဖတ်ထားတာမရှိပါဘူး။ ၆ လတကြိမ်ကျင်းပနေကြ ဥရောပရောက် မြန်မာ့ဒီမုိုကရေစီ အင်အားစုတွေရဲ့ဆွေးနွေးပွဲနဲ့ မြန်မာ့အရေးကူညီနေတဲ့ ဥရောပအခြေစုိုက် NGO တွေရဲ့ နှစ်ပတ် လည်ဆွေးနွေးပွဲတွေ ဘာစီလုိုနားမှာကျင်းပဖို့ရှိတယ်။ အဲဒီပွဲမှာ စကားပြောဖုို့ (၂၀၀၈ ဒီဇင်ဘာမှာထုတ်ဝေတဲ့ Far from Home: 20 Years in Exile စာအုပ်ကြောင့်) ဖိတ်ကြားခံရတာကြောင့် ရောက်သွားခြင်းသာဖြစ်ပါတယ်။
(ဘာစီလုိုးနားမှာကျင်းပတဲ့ ဥရောပရောက် မြန်မာများအစည်းဝေး)
အခုချိန်မှာ ပြည်ပရောက် အင်အားစုတွေရဲ့အသံ အရေးမပါတော့ပေမဲ့ အဲဒီခေတ်ကတော့ ပြည်တွင်းမှာ ဘာမှ လုပ်ခွင့်၊ ပြောခွင့်မရတော့ ပြည်ပရောက်တွေက ပြည်တွင်းရဲ့ရင်ခုန်သံကုို နုိုင်ငံတကာက ကြားခွင့်ရအောင် အား သွန်ခွန် စုိုက်ကြိုးပန်းနေကြတဲ့ကာလပေါ့။ အဲဒီလုို ၆ လတကြိမ်ဆွေးနွေးပွဲတွေကိုတက်ရင်း၊ သတင်းယူရင်းနဲ့ ဥရောပနုိုင်ငံ အတော်များများဆီ စာရေးသူရောက်ဖူးခဲ့တယ်ဆုိုရင်လဲ မမှားပါဘူး။ ဥရောပအလယ်ပုိုင်းနုိုင်ငံတွေ ဖြစ်တဲ့ ဒိန်းမတ်၊ ဖင်လန်၊ နယ်သာလန်၊ ဘလဂျီယံ၊ ဆွင်ဇလန်၊ ပြင်သစ်၊ ဂျာမဏီ၊ ဗြိတိန်နုိုင်ငံတွေဆီ ရောက်ဖူးပြီးဖြစ်ပေမဲ့ စပိန်က ဘာစီလုိုးနားကိုတော့ ဒါ ပထမ ဆုံးရောက်ဖူးခြင်းပါ။
အော်စလိုမှာ အနှုတ် ၁၀ လောက်ရှိနေချိန်မှာ ဘာစီလုိုနားမှာ အပေါင်း ၁၀ နီးပါးရှိနေပါတယ်။ ပြီးတော့ အပူပုိုင်းဒေသမှာသာမြင်ရလေ့ရှိတဲ့ ဆီအုန်းပင်တွေ၊ ပေပင်တွေပါမြင်ရတော့ အတော်အံ့သြသွားပါတယ်။ လမ်းတွေက ကျယ် ပြီး မြို့ကလဲ အတော်လှပါတယ်။ ပင်လယ်ကမ်းခြေလဲရှိ၊ တောင်ကုန်း တောင်တန်းတွေ လဲရှိပြီး အဲဒီတောင်တန်းပေါ် ကနေ မြို့ထဲကိုပြန်ကြည့်ခွင့်ရတဲ့ ဆည်းဆာချိန်ဟာ အလှပဆုံးလုိုထင်ပါတယ်။ အပူချိန်က ၁၅ လောက်ရှိတယ်ဆုို တော့ ကမ်းခြေသွားပြီး ဘာဘီကျုးကင်တဲ့လူတွေတောင်ရှိသေး။
ကုိုယ်တွေက တုိုးရစ်အဖြစ် လာလည်တာမဟုတ်ပဲ အစည်းဝေးကတဖက်ရှိနေတယ်ဆုိုတော့ အစည်းဝေးပြီးတဲ့ အချိန်မှ Tourist Bus စီးပြီးလျောက်လည်တာပါ။ တုိုးဘတ်စ် စီးတုိုင်းသတိရတာက မိတ်ဆွေတယောက်ဝေဖန်လေ့ ရှိတဲ့ စကား။ အစီစဉ်ကြိုဆွဲမထားသူတွေသာ တုိုးဘတ်စ်စီးလေ့ရှိပြီး အစီစဉ်ဆွဲထားသူတွေက ကုိုယ့်အစီစဉ်နဲ့ ကုိုယ် သွားလေ့ရှိတယ်တဲ့။ သူပြောတဲ့အတုိုင်းပါပဲ။ ဘာစီးလုိုးနားကိုရောက်ရင် ဘယ်နေရာတွေကို အဓီကဦးစား ပေးလေ့လာမယ်ဆုိုပြီး ဇယားဆွဲထားတာမျိုးမရှိပါ။ တုိုးဘတ်စ်ကပြတဲ့အတုိုင်း နာမည်ကြီးနေရာတွေကိုလျောက် ကြည့်တာပါပဲ။ အဲဒီထဲမှာမှ ရုိုနယ်ဒင်ဟုိုတုို့၊ မက်ဆီတုို့ခြေစွမ်းပြနေတဲ့ Camp Nou ကုိုရောက်ပြီးမှ အထဲမ၀င်ဖြစ်ပဲ ပြန်လာခဲ့ရတာကို နှမျောနေမိပါတယ်။
မြို့လယ်က ဘုရားကျောင်းတွေ၊ ပြတုိုက်တွေလဲ အဲလုိုပါပဲ။ အပြင်ကနေပဲ ဓာတ်ပုံရုိုက်ပြီး အထဲ မ၀င်ဖြစ်ခဲ့ပါ။ ရာသီဥတုကပူနွေးတယ်ဆုိုတော့ ဒီလုို ဆောင်းတွင်းမှာတောင် မော်တော်ဆုိုင်ကယ်တွေက အတော်များသား။ ဘာစီလုိုးနားရဲ့ လမ်းထောင့်တွေ (လမ်းထောင့်ရှိ တုိုက်ခန်း) တည်ဆောက်ထားပုံက လေးထောင့်မဟုတ်ပဲ နဲနဲ ထူးခြားနေပါတယ်။ အဲဒီထောင့် ကွက်လပ်တွေမှာ မော်တော်ဆုိုင်ကယ်နဲ့ စက်ဘီး ရပ်ဖုို့နေရာတွေလုပ်ပေးထား ပါတယ်။
ဆွေးနွေးပွဲပြီးတဲ့ရက်မှာ မြန်မာကုိုယ်စားလှယ်တွေနဲ့အတူ ကာတာလုိုးနီးယားပါလီမန် ဆီရောက်သွားပါတယ်။ ဘာ စီလုိုးနားဟာ ကာတာလုိုနီးယား ကိုယ်ပုိုင်အုပ်ချုပ်ခွင့်ရဒေသရဲ့မြို့တော်ဖြစ်တဲ့အတွက် သီးခြားပါလီမန်ရှိပါတယ်။ ဆွေးနွေးမှုအတွင်း ပါလီမန်ဥက္ကဌက မြန်မာ့ဒီမုိုကရေစီအရေးကုိုထောက်ခံကြောင်းပြောခဲ့ပါတယ်။ တလောက တော့ အဲဒီပါလီမန်ကနေ ကာတာလုိုးနီးယားကုို သီးခြားလွတ်လပ်တဲ့ပြည်နယ်တခုအဖြစ်ကြေငြာလုိုက်လုို့ ပြသာနာ တွေတက်ခဲ့တာ ကြားလုိုက်ရပါသေးတယ်။
ဥရောပ တောင်ဖက်စွန်းက လစ်စဘွန်းမြို့ဆီသုို့...
ဘာစီလုိုးနားမှာ အလုပ်ကိစ္စပြီးတော့ ခွင့်တပတ်ယူပြီး ပေါ်တူဂီနုိုင်ငံဆီ သွားလည်ဖုို့စိတ်ကူးထားပါတယ်။ စိတ်ကူး တာနဲ့ အစီစဉ်ဆွဲတာ နဲနဲကွာမယ်ထင်ပါတယ်။ ရှေ့ပုိုင်းမှာအစီရင်ခံခဲ့တဲ့အတုိုင်း အဲဒီကာလခရီးသွားမှုတွေဟာ ဘာမှကြိုတင်အစီစဉ်ဆွဲထားတာမရှိ။ စိတ်ကူးပေါ်လာတဲ့အတုိုင်း ထလုပ်ခြင်းသာဖြစ်လေ့ရှိတာမုို့ ပေါ်တူဂီဆုိုတာ (ကျောင်းသမုိုင်းစာအုပ်ထဲသင်ခဲ့ဖူးတဲ့) ငဇင်ကာတုို့နုိုင်ငံဆုိုတာထက်ပုိုပြီး ဘာမှမသိထားပါ။
(လစ်စဘွန်းမြို့ ကမ်းခြေတနေရာ)
ဘယ်လုိုသွားရင်ကောင်းမလဲဆုိုပြီး ဟုိုတယ်မှာစုံစမ်းတော့ လေယဉ်နဲ့သွားပါ။ အဲဒီကနေ အော်စလိုကို ပြန်ရင် ဈေး သက်သာမယ်တဲ့။ ကုိုယ့်မှာက ကင်မရာအထုပ်အပုိုးတွေနဲ့၊ လက်မှတ်ကလည်း အော်စလုို-ဘာစီလုိုးနား အသွား-အပြန်ဝယ်ထားပြီးသားဆုိုတော့ အဲဒိအစီစဉ်နဲ့မဖြစ်သေး။ ဒီလုိုဆုို အခုဝယ်-အခုသွား အမြန်ရထားစီးပါတဲ့။ လက် တန်းလုပ်လေ့ရှိတဲ့ ထုံးစံအတုိုင်း ဟုိုတယ်မှာ ကင်မရာနဲ့အထုပ်အပိုးတွေကိုအပ်၊ ခရီးဆောင်အိတ်ငယ်တလုံးကို ယူပြီး ဘူတာမှာ လက်မှတ်ဝယ်တော့ ဘာစီလုိုးနားကနေ မက်ဒရစ်ကို ယူရွန် ၈၀ တဲ့။ မတတ်နုိုင်ဘူး။ ဘာမှကြို ပြင်မထားတော့ ဒီနည်းကိုပဲ ရွေးလုိုက်ရပါတယ်။
အမြန်ရထားဆုိုတာ ရန်ကုန်-မန္တလေးလုို အမြန်မဟုတ်ဘူး။ ကီလုို ၆၀၀ ကျော်ကုို ၂ နာရီခွဲပဲကြာပါတယ်။ ဥရောပရဲ့ အမြန်ရထားလုိုင်းတဲ့၊ ကျဉ်ဆံရထားလုို့ခေါ်ရမလားမသိပါ။ တချို့နေရာတွေဆုို အမြန်နှုန်းက ကီလုို ၃၀၀ ကျော် ပါ တယ်။ အမြန်ရထားလမ်းတွေကုိုသီးခြားဖောက်ထားပြီး လမ်းတလျောက်လုံး ခြံစည်းရုံကာထားပါတယ်။ မကာလုို့ မရ။ တနာရီ ကီလုို ၃၀၀ နှုန်းမောင်းနေစဉ်မှာ တခုခု ခလုတ်တုိုက်တာနဲ့ ရထားမှောက်နုိုင်တယ် မဟုတ်ပါလား။ ရထားက သိပ်မြန်နေတော့ မြင်ကွင်းကုို ကောင်းကောင်းကြည့်ခွင့်မရခဲ့ပါ။ ရေဘူယျအားဖြင့်ကတော့ မြင်ကွင်းဟာ နော်ဝေဖက်ကမြင်ကွင်းနဲ့မတူပဲ အာရှဖက် ဒါမှမဟုတ် အပူပုိုင်းဒေသတွေနဲ့ ပုိုတူနေတယ်ပြောရမလားပါပဲ။
၂ နာရီခွဲပဲစီးရတယ်ဆုိုတော့ နေ့လည် တနာရီလောက်မှာ မက်ဒရစ်ဘူတာကြီးဆီရောက်လာပါတယ်။ ပေါ်တီဂီမြို့ တော် လစ်စဘွန်းသွားမဲ့ရထားကိုမေးကြည့်တော့ ည ၈ နာရီမှထွက်မှာတဲ့။ ပေါ်တူဂီရထားကတော့ ရန်ကုန်-မန္တ လေးရထားလုိုဖြစ်သွားပြီ။ ဟုိုဖက်မှာ အမြန်ရထားလမ်းမရှိသေးပါ။ ဈေးကလည်း တညလုံး အိပ်စင်နဲ့စီးမှ ယူရွန် ၄၀ တည်းရယ်။ ဒါပေမဲ့ ည ၈ နာရီမှထွက်မှာဆုိုတော့ ၆ နာရီလောက် မက်ဒရစ်ကို လည်ပတ်ချိန်ရသေးတာပေါ့။ ထုံးစံ အတုိုင်း အစီစဉ်ကြိုဆွဲထားတာမရှိလေတော့ ဘာစီလုိုးနားကအတုိုင်း နီးစပ်ရာ တုိုးဘတ်စ်ပဲ တက်စီးရတာပေါ့။ အဲ မက်ဒရစ်က ဘာစီလုိုးနားထက်တောင် ဈေးသက်သာနေသေးတယ်။ ၂၄ နာရီအတွက် ၂၀ ယူရုိုတဲ့။ ဘာစီလုိုးနား မှာ ၂၂ တောင်ပေးခဲ့ရပါတယ်။
၅ နာရီလောက်ပဲ လည်ခွင့်ရတာဆုိုတော့ ကားပေါ်ကတောင် မဆင်းဖြစ်ပါဘူး။ တုိုးရစ်တွေလည်လေ့ရှိတဲ့ နေရာ တွေကို လျောက်ကြည့်ပြီး ဘူတာမှာရထားစောင့်ပေါ့။ ရန်ကုန်လုို ဘူတာက တခုတည်းရှိတာမဟုတ်။ လစ်ဘွန်း သွားမဲ့ရထားက နောက်ဘူတာဆုိုလုို့ ကမန်းကတန်း မြေအောက်ရထားနဲ့ ထပ်ပြေးလုိုက်ရပါသေးတယ်။ ရထားက မဆုိုးပါဘူး။ ဘန်ကောက်-ချင်းမုိုင် ရထားနဲ့ခပ်ဆင်ဆင်တူပါတယ်။ အိပ်စင်နဲ့ ၄ ယောက်ခန်းဖြစ်ပေမဲ့ ခရီးသွား နည်း လုို့လားမသိပါ။ တညလုံး ကိုယ်တယောက်တည်း။ တခါမှ မသွားဖူးတဲ့ခရီးမှာ တယောက်တည်းဆုိုတော့ အထီးကျန် သလုိုတော့ဖြစ်သား။ ဒါပေမဲ့ တနေကုန်ပင်ပမ်းထားလုို့ ရထားထွက်ကတည်းက အိပ်ပျော်သွားလုိုက်တာ ကြောက်ဖုို့ အချိန်တောင် မရလုိုက်ပါဘူး။
တရေးနုိုးလာတော့ မုိုးလင်းစပြုနေပြီ။ ပေါ်တူဂီက စပိန်ထက် အချိန်တနာရီနောက်ကျသလုို အခြေခံအဆောက်ဦ တွေ၊ လူနေမှုပုံစံတွေ၊ ၀င်ငွေတွေပါ နည်းနည်းနောက်ကျ ကျန်နေခဲ့တယ်ထင်ပါတယ်။ ဘူတာကြီးမှာ ခဏထုိုင်ပြီး သွားရမဲ့ဟုိုတယ်လိပ်စာကုို ကွန်ပြူတာဖွင့်ရှာတော့ လူတွေ ၀ုိုင်းအုံကြည့်နေပုံက တမျိုးကြီး။ ရေပုလင်းက အစ၊ မုန့် တွေ၊ တခြားပစ္စည်းတွေလည်း စပိန်ထက် ဈေး ၅ ပုံတပုံလောက် သက်သာနေပါတယ်။ တုိုးဘတ်စ်ဆုိုရင် ဘာစီလုိုး နားမှာ ၂၂ ယူရွန်ပေးရပေမဲ့ လစ်စဘွန်းမှာ ၁၆ ယူရွန်တည်းရယ်။
ဘာစီလုိုးနားကနေ ထွက်မလာခင်လေးကမှ ကမန်းကတန်း ဘုတ်ကင်လုပ်လုိုက်တဲ့ ဟုိုတယ်က လစ်စဘွန်းမြို့ထဲ မှာမဟုတ်ပဲ မီနစ် ၄၀ နီးပါး ရထားထပ်စီးရတဲ့ ဟုိုပင်လယ်ကမ်းခြေမှာဖြစ်နေပါတယ်။ ဘာစီလုိုနားက ဘာရုပ်မှ မပေါက်တဲ့ မြို့လယ်ကဟုိုတယ်ခန်းအတွက် ယူရွန် ၁၂၀ ပေးရပေမဲ့ ဒီမှာက ပင်လယ်ကမ်းခြေရှိ ကြယ် ၄ ပွင့်အဆင့် ဟုိုတယ်တောင် ၆၀ ယူရွန်ပဲပေးရပါတယ်။ အပူချိန်ကလည်း ၁၇ တဲ့။ အော်စလုိုက နွေရာသီမှာ ကမ်းခြေတခုဆီ ရောက်နေသလုိုပါပဲ။
ဥရောပသားတွေက ကျောက်တုံးခင်းလမ်းကို အတော်ကြိုက်တဲ့လူတွေ။ အော်စလိုမှာဆုို နန်းတော်ရှေ့က ဂါရုိုဟန် လမ်းမကြီးတခုလုံးကို ကျောက်တုံးခင်းထားသလုို တခြားရောက်ခဲ့ဖူးတဲ့ ဥရောပမြို့တော် အတော်များများမှာလဲ အဲဒီ လုို ခင်းထားကြတာတွေ့မိပါတယ်။ နေပြည်တော်က ဗုိုလ်ချုပ်တွေသာတွေ့ရင် ကျောက်တုံးတွေအကုန်ခွါပြီး ကွန်က ရစ်လမ်း ခင်းပစ်မယ်ထင်ပါတယ်။ လစ်စဘွန်းကလဲ ဥရောပထဲကမြို့တော်တခုဆုိုတော့ ဒီမြို့ရဲ့အရေးပါတဲ့လမ်းတွေမှာ ကျောက်တုံးတွေ ခင်းထားလေရဲ့။
ဟုိုတယ်ရှေ့က ကမ်းခြေမှာ တုိုးရစ်တချုိ့ရေကူးနေပေမဲ့ ကုိုယ်ကတော့ မကူးရဲသေး။ နေစာလှုံရင်း ကမ်းနား တ လျောက်လမ်းသလားရုံမျှသာ။ မြန်မာတွေရဲ့ထုံးစံအတုိုင်း ရောက်လေရာအရပ်မှာ မြန်မာနုိုင်ငံသားတွေ များရှိမလားဆုိုပြီး စနဲနာပေမဲ့ တယောက်မှမတွေ့ပါ။ ဘာစီလုိုးနားမှာလဲမြန်မာတွေကုို မတွေ့မိပါဘူး။ အရင်ရောက်ခဲ့ဖူးတဲ့ ဥရော ပနုိုင်ငံအားလုံးမှာ မြန်မာတွေနဲ့တွေ့နေကျဆုိုတော့ ဒီမြို့မှာ တခုခုလုိုနေသလုို။
ဒါပေမဲ့ မြန်မာ့အိမ်နီးချင်း ထုိုင်းတွေ ကုိုတော့ ဘာစီးလုိုးနားမှာရော၊ ဒီမြို့မှာတွေ့ရပါတယ်။ မြန်မာစာမရလဲ ထုိုင်းစာစားမယ်ဆုိုပြီး ထုိုင်းစားသောက်ဆုိုင် တခုဆီဝင်သွားပြီး တုံ့ယန်ကူးနဲ့ ဖတ်ကပေါင်ကုိုင် (ပုဇွန်ဟင်းချုို နဲ့ ကြက်သားကြော်) မှာလုိုက်ပါတယ်။ ဥရောပသွားပြီး အရှေ့တောင်အာရှဆီ လွမ်းနေသူတဦးလုို့ပြောရလေ မလား။
နောက်တနေ့မနက်မှာတော့ မြို့နဲ့ခပ်လှမ်းလှမ်းရှိ တောတောင်တွေထဲက သဘာဝပန်းခြံတွေ၊ ရဲတုိုက်တွေဆီ သွား လည်ပတ်ခဲ့ပါတယ်။ အော်စလိုမှာနှင်းကျနေဆဲဖြစ်ပေမဲ့ ဒီမှာကတော့ နွေရာသီလုိုဖြစ်နေပြီး နေရာတုိုင်းစိမ်းစိုလှပ၊ သစ်ပင်တွေ၊ ပန်းတွေပွင့်နေပြီဖြစ်ပါတယ်။ ဒါပေမဲ့ ကုိုယ်က ဆောင်းခုိုငှက်မဟုတ်။ ဆောင်းခုိုလူဆုိုတော့ ဆောင်း တွင်း ၃ လစလုံး ဥရောပတောင်ပုိုင်း အာဖရိကနယ်စပ်မှာ နေလုို့ ဘယ်ဖြစ်မလဲ။ ငဇင်ကာတုို့ရွာမှာ နှစ်ညပဲအိပ်ပြီး လာလမ်းအတုိုင်း လှည့်ပြန်ခဲ့ရပါတော့တယ်။ ။
...
...
0 comments:
Post a Comment