Friday, November 6, 2015

အော်စလုိုမြို့တွင်း ဘတ်စ်ကားစီးခြင်း

မွန်းတည့်နေ၊ (အတွဲ ၂၊ အမှတ် ၃၃)
၁-၁၁-၂၀၁၅။

ဘတ်စ်ကား ခုိုးစီးရဲသလား

နော်ဝေးကုိုစရောက်ရောက်ချင်း ပထမ ဆုံးသတိထားမိတာက ဘတ်စ်ကားတွေမှာ စပယ်ယာမပါခြင်းပါ။ ရန်ကုန်နဲ့ ဘန်ကောက်မှာ ၁၀ နှစ်လောက် ဘတ်စ်ကားတုိုးစီးလာခဲ့ဖူးသူဆုိုတော့ စပယ်ယာမပါတာ တခုခုလုို နေသလုိုပါပဲ။ ကားလက်မှတ် မ၀ယ်ပဲ ခုိုးစီးရင် ဘယ်လိုလုပ်မလဲလုို့တွေးရင်း ဘန်ကောက် ရောက်ကာစအချိန် ပုိုက်ဆံပြတ်လုို့ ဘတ်စ်ခုိုးစီးခဲ့ဖူးတဲ့နေ့တွေကို သွားသတိရမိပါတယ်။


‘’မ၀ယ်ပဲ ခုိုးစီးရဲရင် စီးကြည့်လေ၊ မိရင်တော့ အဆ ၂၀ လောက်ပေးရမယ်၊ ခါလောက်မိရင်တော့ Blacklist စာ ရင်း အသွင်းခံရလိမ်မယ်ဆုိုပြီး ကျနော်အရင် အော်စလုိုသားဖြစ်နေတဲ့ DVB ဒီမုိုကရက်တစ်မြန်မာ့အသံ ၀န်ထမ်း တွေကပြောပါတယ်။ သူတုို့ကသာ အဲဒီလုိုပြောနေတာ၊ ကားပေါ်တက်တော့ ဘာမှအစစ်အဆေးမရှိပါ။ ကားသမား က ကားမောင်းတဲ့အလုပ်ကလွဲပြီး ကျန်တာ သူ့တာဝန်ဟုတ်ပုံမရ။ ကားတွေကလဲ စီးတွဲလုိုမျိုး အရှည်ကြီးဆုို တော့ အနောက်ဖက်ပေါက်ကသာတက်ရင် ကားသမားနဲ့ ကုိုယ်ကအဝေးကြီး။

ကုိုယ့်မှာ လက်မှတ်ပါမပါ ကားဆရာက ဘယ်လိုမှမသိနုိုင်။ မြေအောက်ရထားတုို့၊ ဓာတ်ရထားတုို့ဆုို ပုိုတောင်ဝေး သေး၊ ရထားမောင်းသူက ရှေ့ဆုံးမှာ သူ့သီးခြားအခန်းနဲ့သူ၊ ခရီးသည် ဘယ်နှစ်ဦးရှိပြီး ဘာတွေလုပ်နေမှန်း ဘယ်လုို မှ မသိနုိုင်။ ရထားတွဲကလည်း တွဲလောက်ရှိတယ်ဆုိုတော့ အေးဆေး ခုိုးစီးလုို့ရနုိုင်တာပေါ့။ ဒါပေမဲ့ စပယ်ယာ သာ မရှိတာ၊ ဗီဒီယုို ကင်မရာတွေကတော့ နေရာတုိုင်းမှာရှိနေတဲ့အတွက် သိပ်တော့မလွယ်လှ။ ပြီးတော့ လက်မှတ် စစ်ကလဲ မထင်ထားတဲ့အချိန်မျိုးမှာမှ ရုတ်တရက်တက်လာစစ်တတ်တာမျိုး။

ဒါကြောင့်ဖြစ်မယ်၊ အော်စလုိုသားတွေ နုိုင်ငံကြီးသားပီသလုိုက်ပုံများ လက်မှတ်မ၀ယ်ပဲခုိုးစီးသူ မရှိသလောက် နည်းပါတယ်။ ဒါက အော်စလုို ရောက်ကစက စက္ကူလက်မှတ်တွေကို စက်ထဲထုိုးရတဲ့ခေတ်က အခြေအနေကုိုပြော တာပါ။ အခုတော့ စက္ကူခေတ်မဟုတ်တော့၊ လျှပ်စစ်လက်မှတ်ခေတ် ရောက်သွားပြီ။ ကားပေါ် ဒါမှမဟုတ် ရထား ဘူတာတွေက စက်တွေမှာ အဲဒီလက်မှတ်ကို ပြရပါတယ်။ တချို့ဆုို လက်မှတ်တောင်မကိုင်တော့၊ လက်ကုိုင်ဖုန်း ထဲကနေတန်းဝယ်ပြီး ပြလုိုက်ရုံ။

ဒီလုိုလုပ်လုိုက်တော့ ကားဆရာလည်း အများကြီးသက်သာသွားတာပေါ့။ နုို့မုို့ရင် ကားမောင်းရင်းနဲ့ လက်မှတ်လည်း ရောင်းနေရတော့ သူ့ခမျာအလုပ်ရှုပ်တာပေါ့။ အခုနောက်ပုိုင်း အော်စလိုမှာ လူဦးရေတုိုး လာလုို့လား မသိပါ။ လက် မှတ်ကို မှတ်တုိုင်မှာ (မှတ်တုိုင်တွေမှာ ဘစ်ကားလက်မှတ်ရောင်းတဲ့ စက်တွေရှိပါတယ်) ၀ယ်လာရမယ်လို့ သတိ ပေးထားပါတယ်။ တကယ်လို့ မှတ်တုိုင်က စက်မှာမ၀ယ်ပဲ ကားပေါ်ရောက်မှဝယ်ရင် ကားသမားအလုပ်များတဲ့ အတွက် ဒဏ်ကြေးအဖြစ် အပို ၃၀ ခရုိုနာထပ်ပေး ရပါတယ်။

တနာရီစာ မူရင်းလက်မှတ်ကလည်း ၃၀ ခရုိုနာဆုိုတော့ ဒဏ်ရုိုက်တဲ့သဘောပါ။ တနည်းအားဖြင့် ကားမောင်း တာရော၊ ကားစပယ်ယာအတွက်ပါ ဦးစာ လုပ်အားခကုို ယူလုိုက်တဲ့သဘော ဆုိုပါတော့။ ဒါက တနာရီစာစီးတဲ့ ကမ္ဘာ့လှည့်ခရီးသွားတွေအတွက်ပါ။ နေစဉ်ခရီးသွားနေတဲ့ အော်စလုိုသားတွေ ကတော့ လပေးကတ်တွေ ၀ယ်ထား ကြပါတယ်။ တနာရီ ၃၀ ပေးမဲ့အစား တလစာ ၆၅၀ ဖုိုးဝယ်ထားလုိုက်ရင် ကိစ္စပြတ်ရော။

လက်မှတ်တခုတည်းနဲ့ ယဉ်မျိုးစုံစီးခွင့်ရှိတဲ့မြို့

အဲဒီ လပေးကတ်ပဲဖြစ်ဖြစ်၊ တနာရီစာလက်မှတ်ပဲဖြစ်ဖြစ်၊ ၂၄ နာရီစာ၊ သီတင်းတပတ်စာလက်မှတ်တွေ ပဲဖြစ်ဖြစ် တခုခုရှိနေရင် ဘတ်စ်ကားတင်မက Public Transportion အများပြည်သူ ခရီးသွားဝန်ဆောင်မှု လုပ်ငန်းထဲမှာပါတဲ့ ယဉ်တုိုင်းကို စီးခွင့်ရှိပါတယ်။ ဘတ်စ်ကား၊ မြေအောက်ရထားနဲ့ မြေပေါ် ဓာတ်ရထားအပြင် အော်စလုိုမြစ်ဝက ကျွန်းငယ်လေးတွေဆီသွားတဲ့ သဘောင်္ငယ်လေးတွေပါ ပါဝင်ပါတယ်။

(အော်စလုိုမြုိ့လယ်က ဓာတ်ရထားများ)

ဒါက နောက်ပုိုင်းမှာ သိလာတာတွေပါ။ အစောပိုင်းတုန်းကတော့ ရန်ကုန်နဲ့ ဘန်ကောက်မှာလုိုပဲ ဘတ်စ်ကား လက် မှတ်ဆုိုတာ ကုိုယ်စီးတဲ့ကား တစီးစာနဲ့ပဲဆုိုင်ပြီး နောက်တစီးပြောင်းစီးရင် နောက်လက်မှတ်အသစ်တခု ထပ်ဝယ်ရ မယ်လို့ပဲ ထင်ထားခဲ့တာပါ။ လက်မှတ်တခုတည်းနဲ့ အားလုံးရတယ်ဆုိုရင်လည်း ဘတ်စ်ကားလက်မှတ်က ဘတ်စ် ကားအတွက်ပဲရပြီး မြေအောက်ရထားနဲ့ သဘောင်္တွေပါ ပါတယ်လို့ မထင်မိပါ။ ဒီတော့ - နှစ်ကြာတဲ့အထိ အော် စလုိုဝန်းကျင်က ကျွန်းတွေကုို ဒီ လက်မှတ်နဲ့ အလကားသွား လည်လုို့ရမှန်း တောသားလူလည်  မသိလုိုက်ဘူးဆုို ပါတော့။

အချိန်ဇယားနဲ့ ပြေးတဲ့ ဘတ်စကား

ဒီထက်ပုိုထူးတာက ရှေ့မှာတင်ပြခဲ့တဲ့ အများပြည်သူ ခရီးသွားဝန်ဆောင်မှုယဉ်တွေအားလုံး အချိန်ဇယား အတိ အကျနဲ့ ပြေးနေခြင်းပါ။ ရန်ကုန်နဲ့ဘန်ကောက်မှာ ဘတ်စကားတွေ အချိန်ဇယားနဲ့ပြေးတယ်ဆုိုတာ မကြားဖူးပါဘူး။ မြိုပတ်ရထားနဲ့ မိုးပျံရထားတွေမှာတောင် အချိန်ဇယားမရှိသေးဘူးမဟုတ်လား။ ဒါပေမဲ့ အော်စလိုမှာတော့ အားလုံး ဟာ အချိန်ဇယားနဲ့၊ ကွက်တိထွက်၊ ကွက်တိရောက်ပါပဲ။ ဒီလုိုမတိကျလုို့မဖြစ်။ ‘’နွေရာသီမှာ ကားထုိုင်စောင့်ရတာ ပြသာနာသိပ်မရှိပေမဲ့ ဆောင်းရာသီဆုိုရင်  ကားစောင့်ရင်း သွေးခဲပြီး သေသွားနုိုင်ပါတယ်’’ ဆုိုပြီး အောစလုိုသား တွေကပြောပါတယ်။

(အော်စလုို ဆင်ခြေဖုံးမှ မြေအောက်ရထားတစီး)

ပြီးတော့ လုပ်ငန်းခွင်ဝင်တဲ့အချိန်။ အချိန်ကိုသိပ်လေးစားတဲ့နုိုင်ငံဆုိုတော့ ဘတ်စ်ကားစောင့်နေရလုို့ နည်းနည်း နောက်ကျသွားတယ်ဆုိုပြီး အလုပ်မှာ သွားဖြီးလုို့မရ။ ယဉ်တွေကို နောက်ကျစရာ အကြောင်းမရှိအောင် စီစဉ်ထားပြီးဖြစ်တဲ့အတွက် အားလုံးဟာ ကွက်တိဖြစ်နေရပါမယ်။ လူအများစုဟာ အော်စလိုမြို့လယ်နဲ့ ၁၀ ကီလုို၊ ၁၅ ကီလုို လောက်ဝေးတဲ့အရပ်ကနေ အလုပ်ဆင်းကြ၊ ကျောင်းလာကြရ သူတွေဖြစ်ပေမဲ့ အများပြည်သူ ခရီးသွားဝန် ဆောင်မှု Public Transportion အဆင်ပြေတဲ့အတွက် မြို့ပြင်နဲ့ မြို့ထဲကြားမှာ အချိန်ဖြုန်းစရာ သိပ်မလိုတော့ပါ။

ဥပမာ အခု ကျနော်နေထုိုင်နေတဲ့ Grorud ဆုိုတဲ့ မြို့ပြင်ရပ်ကွက်လေးဟာ အော်စလုိုမြိုလယ်နဲ့ ၁၅ ကီလုို ဝေးပါတယ်။ ရန်ကုန်မှာဆုို ဆူးလေနဲ့ မင်္ဂလာဒုံ လေယဉ်ကွင်းလောက် ဝေးတာပေါ့။ ဒါပေမဲ့ ဘတ်စ်ကားတွေ၊ မြေအောက်ရထားတွေက မီနစ် တစီးနှုန်ါ်လောက် ရှိနေတဲ့အတွက် မီနစ် ၂၀ အတွင်း မြို့ထဲရောက်နုိုင်ပါတယ်။ မင်္ဂလာဒုံလေယဉ်ကွင်းကနေ ဆူးလေကုို မီနစ် ၂၀ အတွင်းရောက်ဖို့ဆုိုတာ ဘယ်လုိုမှမဖြစ်နုိုင်သေးပါ။ ဘတ်စ်ကား လုိုင်းရှိပေမဲ့ မြေအောက်ရထားလုိုင်း၊ မုိုးပျံရထားလုိုင်းတွေ မရှိသေးပါ။

အနောက်နုိုင်ငံတွေမှာက အားလုံးကို အချိန်နဲ့ကွက်တိလုပ်ကြတာဆုိုတော့ ဘယ်နေရာကနေ ဘယ်အချိန် ထွက်ရင် ဘယ်နေရာကို ဘယ်အချိန်ရောက်မယ်ဆုိုတာ တွက်ထားပြီးသား။ မြန်မာနုိုင်ငံမှာက ထွက်ချိန်လဲမသိတော့ ရောက် ချိန်လဲမသိနုိုင်။ ဒီကြားထဲ အချိန်မေးရင် နမိတ်မကောင်းဘူးဆုိုတဲ့ အယူအဆမျိုးတောင် ပုံဂံနဲ့ အညာဒေသဖက်မှာ ကြုံဖူးခဲ့ပါရော့လား။

မသန်စွမ်းနဲ့ သက်ကြီးရွယ်အုိုတွေအတွက် အထူးနေရာ

ရှေ့မှာတင်ပြခဲ့တဲ့ Public Transportion ယဉ်တွေအားလုံးမှာ မသန်စွမ်းနဲ့ သက်ကြီးရွယ်အုိုတွေအတွက် အထူးနေ ရာတွေလုပ်ပေးထားပါတယ်။ မြေအောက်ရထားရော၊ ဘတ်စ်ကားရော အားလုံးဟာ ဘူတာနဲ့ မှတ်တုိုင်တွေမှာ စနစ်တကျရပ်တဲ့အတွက် ပလက်ဖောင်းနဲ့ ရထားဘောင်၊ ဘတ်စ်ကားတံခါးဘောင်တွေ ဟာ အတက် အဆင်း လုပ်ဖို့ကွက်တိပါပဲ။ 

(ရန်ကုန်မြို့လယ်က ဘတ်စ်ကားနဲ့ ခရီးသွား တုိုက်မိတော့မလုိုလုို)

ရန်ကုန်နဲ့ဘန်ကောက်မှာလုို လှေကားတွေကနေ တုိုးတက်တာ၊ ပြေးတက်တာတွေ လုပ်စရာမလုိုပါ။ ကလေးလှည်း (ဒီမှာက ကလေးကို လက်နဲ့ချီပုိုးတာမရှိပဲ ကလေးလက်တွန်းလှည်းနဲ့ပဲ သယ်ယူလေ့ ရှိပါတယ်) နဲ့ တောင်ဝှေးကုိုင် သက်ကြီးရွယ်အုိုတွေ တက်မယ်ဆုိုရင် တက်ရပုိုလွယ်အောင် ဘတ်စ်ကားကုိုတောင် နဲနဲ စောင်းပေးလုိုက်ပါ သေး တယ်။ မသန်စွမ်းလှည်း (လှည်းလုို့အလွယ်ခေါ်ပေမဲ့ စက်တပ်ယဉ်ငယ်လေးတွေဖြစ်ပါတယ်) တက်မယ်ဆုိုရင် တော့ ဘတ်စ်ကားတံခါးဝမှာတပ်ထားတဲ့ လှည်းတွေအလွယ်တကူအတက်အဆင်းလုပ်နုိုင်တဲ့ တံတားငယ်လေးကို ခရီး သည်တယောက်ယောက် ဒါမှမဟုတ် ကားဆရာကိုယ်တုိုင်က ဆွဲဖွင့်ပေးရပါတယ်။

ရန်ကုန်မှာဆုိုရင်တော့ ဒါမျိုးလုပ်နေတာကို ကျန်တဲ့လူတွေက စိတ်ရှည်သီးခံပြီးစောင့်ဖုို့ မလွယ်ဘူးနဲ့တူ ပါတယ်။ ဒီ မှာတော့ မသန်စွမ်းတွေ၊ သက်ကြီးရွယ်အုိုတွေ၊ ကလေးငယ်တွေကုို အထူးဦးစားပေးကြပါတယ်။ ကားပေါ်ရောက် လာရင်လည်း သူတုို့လှည်းတွေအတွက် သီးခြားနေရာရှိပါတယ်။ သက်ကြီးရွယ်အိုတွေ အတွက် သီးခြားထုိုင်ခုံ လုပ်ပေး ထားပါတယ်။ သူတို့မရှိတဲ့အချိန်မှာ သာမန်ခရီးသွားတွေထုိုင်နုိုင်ပေမဲ့ သူတို့လာရင်တော့ အားလုံးက အလုိုက်တသိ နေရာဖယ်ပေးကြပါတယ်။ မြန်မာနုိုင်ငံမှာ သံဃာင်္တော်တွေ တက်လာရင် နေရာဖယ်ပေးတာနဲ့ တူနေမလားမပြောတတ်ပါ။


ရန်ကုန်မှာကော Public Transportion ဖြစ်လာနုိုင်သလား

အော်စလိုက Public Transportion စနစ်ကိုကြည့်ပြီး ရန်ကုန်မှာလည်း ဒါမျိုးလုပ်နုိုင်ရင်ကောင်းမှာပဲလုို့ စဉ်းစားမိပါ တယ်။ ဒါနဲ့ ၂၅ နှစ်တာအတွင်း ပထမ ဆုံးအကြိမ် ရန်ကုန်ပြန်လည်ခွင့်ရတဲ့ ၂၀၁၃ ခုနှစ် နှောင်းပုိုင်းတုန်းက မြို့ပတ် ရထားနဲ့ ဘတ်စ်ကားတွေကုို သွားစီးကြည့်ပါတယ်။ အခြေအနေက ထင်ထား တာထက် ပိုဆုိုးပြီး ၂၅ နှစ်တာ ကြာ သွားတယ်ဆုိုပေမဲ့ ၁၉၈၈ ကထက် ဘာမှသိပ်တုိုးတက်ပြောင်းလဲမှု မရှိသေး။

(ဘန်ကောက်မြို့လယ်က မုိုးပျံရထားတစီး)

အော်စလုိုကိုထားလုိုက်၊ အိမ်နီးချင်းမြို့တော် ဘန်ကောက်နဲ့ယှဉ်ရင်တောင် ရန်ကုန်ဟာ အတော်နောက်ကျ ကျန်နေခဲ့ပါပြီ။ လူဦးရေ ၁၀ သန်းကျော်ရှိပြီး ဘတ်စ်ကားကျပ်မှု၊ လမ်းပိတ်ဆုို့မှုတွေကြောင့် နာမည်ပျက်ခဲ့ ရတဲ့ ဘန်ကောက် တောင် အခု မုိုးပျံရထားတွေ၊ မြေအောက်ရထားတွေနဲ့ အတော်အဆင်ပြေနေပြီ။ ရန်ကုန်မှာက ကုိုလုိုနီခေတ် လက် ကျန် ပုို့ဆောင်ရေးစနစ်ကနေတောင် ရှေ့ကုိုမတက်နုိုင်သေး။

ဘယ်လုိုလုပ်ရင်ကောင်းမလဲဆုိုပြီး တခြားပြည်တော်ပြန်တွေကိုမေးကြည့်တော့ ဘတ်စ်ကားနဲ့ မြို့ပတ်ရထားစီးတဲ့ ပြည်တော်ပြန် တဦးမှ မတွေ့မိ။ တခါ ရန်ကုန်မှာရှိတဲ့ မီဒီယာသမားတွေ၊ နုိုင်ငံရေးသမားတွေ၊ ကုိုယ်နဲ့နီးစပ်ခဲ့ဖူးသူ တွေကိုမေးကြည့်တော့လည်း ထုိုနည်းလည်းကောင်း။ ဘယ်သူကမှ Public Transportion ကိုစိတ်ဝင်စးမှုမပြ။ နုိုင်ငံခြားကပြန်လာပြီး ဘတ်စ်ကားတုိုးစီးနေတဲ့ ကုိုယ့်ကိုတောင် ‘’ဘာသွားကြောင်နေတာလဲ’’ ဆုိုတဲ့ အထာမျိုးနဲ့ ပြန်ကြည့်နေတော့ ဒီကိစ္စ ဆွေးနွေးဖုို့မလွယ်သေး။

ဒါဖြင့် ရန်ကုန်မြို့တော် စည်-ပင်တုို့၊ ရန်ကုန်တုိုင်း အစိုးရအဖွဲ့တုို့၊ လွှတ်တော်တုို့ကကော ဒါတွေကို စိတ်ဝင်စားမလား ဆုိုပြီး ကုိုယ်သိတဲ့အမတ်တွေ၊ ပုဂ္ဂိုလ်တွေဆီ အီးမေးလ်၊ Facebook တွေကနေ တဆင့်ဆက်သွယ်မေးမြန်းခဲ့ပေမဲ့ ဘာမှ အကြောင်းပြန်ကြားချက်မရ။ ကျနော်သိတဲ့ နုိုင်ငံရေးသမားတွေ၊ မီဒီယာသမားတွေ၊ ပြည်တော်ပြန်တွေထဲမှာ ဘတ်စ်ကားစီးသူ၊ မြို့ပတ်ရထားစီးသူ တဦးမှမရှိသလုိုဖြစ်နေ ပါတယ်။

ဒါဟာ ရန်ကုန်ရဲ့ ထူးခြားချက်ပါပဲ။ တနည်းအားဖြင့် Public Transportion ကုို လူတွေက အယုံအကြည် မရှိခြင်း လက္ခဏာတခုပါ။ အော်စလုိုမှာတော့ အစိုးရ၀န်ကြီးတွေကအစ အားလုံး ဘတ်စ်ကားတွေ၊ မြေအောက်ရထားတွေ၊ ဓာတ်ရထားတွေနဲ့ပဲ ရုံးတက်ကြပါတယ်။ နွေရာသီဆုိုရင် တချို့က စက်ဘီးတွေနဲ့ ရုံးတက်ကြပါတယ်။ ကုိုယ်ပုိုင် ကားမရှိလုို့မဟုတ်၊ တက္ကစီမစီးနုိုင်လုို့မဟုတ်၊ Public Transportion ကုို ယုံကြည်အလေးထားလုို့၊ ကုိုယ်ပုိုင်ကားတွေ၊ တက္ကစီတွေထက် အချိန်ပိုတိကျလုို့ဖြစ်ပါတယ်။ 


ရန်ကုန်ကလူတွေမှာ ဒီလုိုယုံကြည်မှုမျိုးရှိလာအောင် ဘယ်ကနေစတင်ဆွေးနွေးရင်းကောင်းမလဲ၊ အခု အစိုးရလက် ထက်မှာ ဒီလုိုကိစ္စကိုစိတ်မ၀င်စားသေးဘူးဆုိုရင် ၂၀၁၅ အလွန် အစိုးရ အသစ် တက်လာ ရင်ကော ဒါတွေကို ဦး စားပေး စဉ်းစားလာနုိုင်မလား။ ဒါမှမဟုတ် အောက်ခြေလူထုနဲ့ နေ့စဉ်ထိစပ်နေရတဲ့ မြိနယ်အုပ်ချုပ်ရေးအဖွဲတွေ အထိပါ ရွေးကောက်ပွဲစနစ်နဲ့သွားတဲ့ နော်ဝေးကစနစ်လုို မြန်မာနုိုင်ငံက ထွေ-အုပ် နေရာတွေအထိပါ ရွေးကောက် ပွဲ စနစ်နဲ့သွားနုိုင်မယ်ဆုိုရင် အောက်ခြေလူထုအများစု နေစဉ်ရင်ဆုိုင် နေရတဲ့ Public Transportion ကိစ္စကို ၀န် ကြီးတွေ၊ အမတ်မင်းတွေ၊ နုိုင်ငံရေးသမားတွေ၊ မီဒီယာသမား တွေ ဒီထက်ပုိုပြီး စိတ်ဝင်စားမှု ရှိလာလေမလားလုို့ စဉ်းစားနေမိပါတယ်။           

1 comments:

အော်စလုိုသားတဦးကပြောလာပါတယ်။ ကျနော်ရေးတဲ့အထဲ တခုကျန်ခဲ့ လုို့တဲ့...။ အဲဒါက ဘာလဲဆုိုတော့ တကယ်လုို့ အက်ဆီးဒင်းကြောင့်ဖြစ်စေ၊ တခြားအရေးပေါ်အကြောင်းတခုခုကြောင့်ဖြစ်စေ ကားကျပ်ပြီး နောက်ကျရင် တက္ကစီငှားပြီးလာခွင့်ရှိကြောင်း၊ အဲဒီအတွက် အလုပ်ရှင်၊ ကုပ္ဗဏီက ငွေပြန် ထုတ်ပေးကြောင်းဖြစ်ပါတယ်။

ဟုတ်ပါတယ်။ ကျနော်ကုိုယ်တုိုင်လဲ တခါကြုံဖူးပါတယ်။ အလုပ်ကိစ္စ မဟုတ်ပါ။ မြိုပြင်ရပ်ကွက်တခုက သူငယ်ချင်းအိမ်မှာ မွေးနေ့ပွဲလုပ်လုို့သွား ပါတယ်။ အပြန်ကြတော့ ရထားကမရှိဘူး။ နှင်းများလုို့လား၊ ဘာကြောင့်မှန်းမသိ။ ရထားရော၊ ဘတ်စ်ကားရောမရှိပါ။ အချိန်ကလည်း ည ၁၁ ခွဲလောက်ရှိနေပြီ။

တက္ကစီဌားရင်လည်း အနည်းဆုံး ၃၀၀ ကျော်လောက်ပေးရမှာဆုိုတော့ မလွယ်ဘူး။ ဒါပေမဲ့ တက္ကစီသမားတွေကပြောတယ်။ ဘာမှပေးစရာမလုိုဘူး။ လက်မှတ်သာထုိုးပေးခဲ့ပါ။ အိမ်အထိ လုိုက်ပို့ပေးမယ်တဲ့။

တခါမှမကြားဖူးတော့ ဒီလူတွေ လာနောက်နေတယ်ပဲ ကျနော်က ထင်နေတာ။ ဒါပေမဲ့ တခြားလူတွေအားလုံး တက္ကစီတွေပေါ်တက်ကုန် ကြတော့ ကုိုယ်တယောက်တည်းမနေရဲတာနဲ့လုိုက်သွားပါတယ်။

ဟုတ်တယ်ဗျာ။ တဦးချင်းစီကုို အိမ်ရှေ့အထိလုိုက်ပုို့ပေးပါတယ်။ ပုိုက်ဆံ တပြားမှမယူပါဘူး။ ဒါပေမဲ့ လက်မှတ်တော့ ထုိုးပေးခဲ့ရတယ်။ အဲဒီအတွက် ပျက်ကွက်တဲ့ ရထားနဲ့ ဘတ်စ်ကားကုပ္ဗဏီတွေက တက္ကစီသမားတွေကို ပုိုက်ဆံပြန်ထုတ်ပေးတယ်တဲ့...။

မြန်မာနုိုင်ငံသားတဦးအဖုို့တော့ ဘယ်လုိုမှ ယုံနုိုင်စရာမရှိတဲ့ တကယ့်ဖြစ် ရပ်ပါပဲ...။ ။

Post a Comment

Share

Twitter Delicious Facebook Digg Stumbleupon Favorites More