The Voice Daily, 02-10-2015။
ပါတီကြီး၊ ပါတီငယ်နဲ့ တသီးပုဂ္ဂလများ
ရွေးကောက်ပွဲကြီး နီးလာတာနဲ့အမျှ ပါတီအချင်းချင်း အားပြိုင်မှုတွေကို ပုိုမြင်လာ၊ ပုိုကြားလာနေရပါတယ်။ ဒါဟာ ဒီမုိုကရေစီစနစ်ကျင့်သုံးတဲ့ နုိုင်ငံတုိုင်းမှာတွေကြုံနေကြမုို့ အထူးအဆန်းတော့မဟုတ်ပါ။ ဒါပေမဲ့ အခု ကြားနေရတဲ့ အားပြိုင်သံတွေက အဓိကပြိုင်ဖက် ဒီမုိုကရေစီအင်အားစုနဲ့ စစ်အစိုးရလက်ကျန်အင်အားစုတွေကြား အားပြိုင်မှု သက်သက်မဟုတ်ပဲ ဒီမုိုကရေစီအင်အားစုတွေ အချင်းချင်းကြားက အသံတွေဖြစ်နေတဲ့အတွက် နည်းနည်းတော့ ထူးနေပါတယ်။
ပြည်မ အခြေစိုက် ပါတီကြီးတွေနဲ့ ပါတီငယ်တွေကြားမှာဖြစ်စေ၊ ပြည်နယ်အခြေစိုက် တုိုင်ရင်းသားပါတီတွေနဲ့ ပါတီ ကြီးတွေကြားမှာဖြစ်စေ၊ တသီးပုဂ္ဂလနဲ့ ပါတီကြီးတွေကြားမှာဖြစ်စေ ဒီလုို အားပြိုင်မှုတွေကို လူသိရှင်ကြား ထုတ် ပြောလာတဲ့အခါ အချင်းချင်း မဲ ကွဲပြီး စစ်အစိုးရလက်ကျန်အုပ်စုတွေက အသာရသွားမလေမလားဆုိုပြီး စုိုးရိမ်သူ တွေလည်း ရှိလာနေပါတယ်။
ဒီမုိုကရေစီလုိုလားတဲ့အုပ်စုနဲ့ တုိုင်းရင်းသားအုပ်စုတွေကြား ပြိုင်ကက်အဖြစ်သဘောမထားပဲ မဟာမိတ်အဖြစ် သ ဘောထားပြီး ပူးပေါင်းဆောင်ရွက်သင့်ကြောင်း စာရေးသူတင်ပြခဲ့ပြီးဖြစ်ပါတယ်။ ဒါပေမဲ့ တချို့ဒေသခံတွေ၊ တုိုင်း ရင်းသားတွေကတော့ ဒီရွေးကောက်ပွဲကုို အားလုံးလွတ်လပ်စွာဝင်ပြိုင်တဲ့ ပါတီစုံရွေးကောက်ပွဲတခုအဖြစ်မမြင် သေးပဲ စစ်အုပ်စုလက်ကျန်အတွေးအခေါ်ရှိသူတွေနဲ့ ဒီမုိုကရေစီအုပ်စုကြား စီးချင်းထုိုးတဲ့ပွဲတခုအဖြစ်သာ မြင်နေ ကြဆဲဖြစ်ပါတယ်။
ဆုိုလုိုတာက ဒီပွဲဟာ ဒီမုိုကရေစီသဘောတရားအရ အားလုံးလွတ်လပ်စွာယှဉ်ပြိုင်ရေးဆုိုတာထက် မပြီးပြတ်သေး တဲ့ စစ်အာဏာရှင်စနစ်ပြုတ်ကျရေးတုိုက်ပွဲရဲ့အဆက် လူထုဆန္ဒထုတ်ဖေါ်ပွဲသာဖြစ်တယ်။ ဒါကြောင့် အာဏာရှင် ပြုတ်ကျရေးကုို ဦးဆောင်နုိုင်တဲ့ပါတီ၊ အစိုးရဖွဲ့နုိုင်တဲ့ပါတီကုိုသာမဲပေးပါ။ နောက်တဆင့်ကျမှ တုိုင်းရင်းသားတွေ၊ ဒေသဆုိုင်ရာ ပါတီတွေ၊ တသီးပုဂ္ဂလတွေ၊ ဒေသဖွံ့  ဖြိုးရေးလုပ်မဲ့ ပါတီတွေကိုစဉ်းစားပါဆုိုတဲ့သဘောမျိုး သူတုို့ ဆီမှာရှိနေတာကို တွေ့ရပါတယ်။
ထားဝယ်နယ်က ပါတီငယ်လေးများ
ဒီအယူအဆနဲ့ပတ်သက်ပြီး ဗမာမျိုးနွယ်စုထဲမှာပါဝင်တဲ့၊ အခု ၂၀၁၅ ရွေးကောက်ပွဲမှာ ပထမ ဆုံးအကြိမ်ဝင်ပြိုင်မဲ့ ထားဝယ်တုိုင်းရင်းသားများပါတီရှိရာ တနသာင်္ရီတုိုင်းက မတူတဲ့အမြင် ၂ ခုကို ဒီနေရာမှာ ကောက်နှုတ်တင်ပြ ချင်ပါတယ်။
‘’ထားဝယ်သား အာဏာရဖို့ထက်၊ တပြည်လုံး စစ်ဖိနပ်အောက်က လွတ်မြောက်ဖို့ NLD ကို မဲပေးစို့’’ ဆုိုတဲ့ ကြွေး ကြော်သံတခု ပြီးခဲ့တဲ့သီတင်းပတ်က ကျနော်ရဲ့ Facebook စာမျက်နှာပေါ်ရောက်လာပါတယ်။ ရေးတဲ့သူက လွန်ခဲ့ တဲ့ ၂၇ နှစ်က တောခုိုခဲ့ပြီး အခု တတိယ နုိုင်ငံတခုဆီရောက်နေတဲ့ ၈၈ မျိုးဆက် အဝေးရောက် ထားဝယ်သားတဦး ပါ။
သူရဲ့ Status ကုို အတော်များများက Like လုပ်ထားတာ၊ ထောက်ခံကြောင်း Comment ရေးထားတာတွေ့ရပါ တယ်။ ဒါပေမဲ့ ထားဝယ်တုိုင်းရင်းသားများပါတီ အဖွဲ့ဝင်ဖြစ်ပုံရတဲ့ လူငယ်တဦးရဲ့ တုန့်ပြန်ချက်ကတော့ နည်းနည်း ထူခြားနေတာကိုတွေ့ ရပါတယ်။
‘’ကျွန်တော် ဆွေးနွေးပါရစေ။ မဲပြားက သုံးပြားရှိပါတယ်။ အမျိုးသား၊ ပြည်သူနဲ့ တိုင်း လွှတ်တော်ပါ။ အဲဒီ မဲသုံးပြား မှာ အပေါ်ထပ် အဆောက်အဦပြင်ဖို့ ဘယ်မဲပြားတွေက အဓိကကျလဲ၊ ဒေသအဆင့်အတွက် ဘယ်မဲပြားက အဓိက ကျလဲ။ စဉ်းစားကြပါ။ တစ်ပြည်လုံးအရေးကြီးကြောင်းပြောပြီး တိုင်းရင်းသားတွေရဲ့ ပါဝင်မှုကို ဖယ်ထုတ်နေတာ မကောင်းပါဘူး။ မဲသုံးပြားကို ဗျူဟာကျကျပေးရင်း အားလုံးပူးတွဲပါနုိုင်အောင် လုပ်လို့ရပါတယ်’’ တဲ့။
စာဖတ်သူတွေကော ဘယ်လုိုမြင်ပါသလဲ။ ဆိုလုိုတာက ဖွဲ့စည်းပုံအခြေခံဥပဒေပြင်ဆင်ရေးအပါဝင် ဗဟုိုအရစိုးရ ဖြစ်ရေးကို အဓိကထားတဲ့ NLD အနေနဲ့ ပြည့်သူ့လွှတ်တော်နဲ့ အမျိုးသားလွှတ်တော်ကိုသာ အဓိကထားပါ။ ကျန် ပြည်နယ်-တုိုင်းဒေသကြီးတွေအတွက်တော့ တုိုင်းရင်းသားပါတီတွေ၊ ဒေသဆုိုင်ရာပါတီတွေ၊ တသီးပုဂ္ဂလတွေကို ဦးစားပေးလုိုက်ပါ ဆုိုတဲ့သဘောလုို့ ကျနော်နားလည်ပါတယ်။
ဒါ ဗမာတပုိုင်းဖြစ်နေတဲ့၊ ဗမာမျိုးနွယ်စု ဆုိုပြီးခံယူထားကြတဲ့ ထားဝယ်ဒေသက ကွဲပြားတဲ့အမြင် ဥပမာတခုပါ။ ရှမ်း၊ ကချင်၊ ကရင်၊ မွန် စသဖြင့် နှစ်ပေါင်းရာနဲ့ချီပြီး သီးခြားယဉ်ကျေးမှုနဲ့ ရပ်တည်ခဲ့တဲ့ တခြား တုိုင်းရင်းသားတွေရဲ့ အမြင်ဆုိုရင် ဒီထက်ပုိုကွဲပြား နုိုင်ပါတယ်။
တတောလုံးကိုလည်းကြည့်၊ တပင်ချင်းကိုလည်း မေ့မထားသင့်
လတ်တလော NLD ပါတီရဲ့ မဲဆွယ်မှု မူ အတုိုင်းဆုိုရင်တော့ အစိုးရမဖွဲ့နုိုင်တဲ့ပါတီတွေ၊ တသီးပုဂ္ဂလတွေကို မဲပေး လုို့ အပြောင်းအလဲ ဖြစ်လာမှာမဟုတ်ဘူး။ အချင်းချင်းကြား မဲကွဲပြီး စစ်အစိုးရပါတီဖက်က စားသွားလိမ့်ဆုိုတဲ့ သဘောမျိုး ကြားနေရပါတယ်။ ပါတီခေါင်းဆောင်ပုိုင်းက အဲဒီလုိုပြောပြီးတဲ့နောက် သူတို့ကို ထောက်ခံသူတွေက ပါတီငယ်အမတ်လောင်းတွေ၊ တသီးပုဂ္ဂလအမတ်လောင်းတွကို ဝေဖန် ထုိုးနှက်တဲ့အသံတွေ ပုိုကျယ်လောင်လာ နေပါတယ်။
ရှေ့မှာတင်ပြခဲ့တဲ့ ထားဝယ်လူငယ်တဦးအဆိုပြုခဲ့သလုို ပြည်သူ့လွှတ်တော်နဲ့ အမျိုးသားလွှတ်တော်အတွက် NLD ကုို မဲပေးပြီး ပြည်နယ်-တုိုင်းဒေသကြီးလွှတ်တော်အတွက် ဒေသဆုိုင်ရာပါတီတွေ၊ တုိုင်းရင်းသားပါတီတွေ၊ တသီး ပုဂ္ဂလတွေကို မဲပေးမယ်ဆိုရင်ကော ဒီကိစ္စတစုံတရာပြေလည်သွားနုိုင်မလား။ အချင်းချင်း ပြိုင်ဖက်မဟုတ်တော့ပဲ ရွေးကောက်ပွဲအလွန်မှာ ဒေသဆုိုင်ရာကိစ္စအတွက် ပူးပေါင်းဆောင်ရွက်နုိုင်တဲ့ မဟာမိတ်ဖြစ်လာနုိုင်လေမလား။
ဒါက ဖွံ့ဖြိုးတုိုးတက်ရေးနဲ့ ဒေသဆုိုင်ရာယဉ်ကျေးမှုကိုအလေးထားတဲ့ ပါတီတွေအတွက် ပြောကြည့်တာပါ။ ဒါပေမဲ့ ဖက်ဒရယ်မူလုိုမျိုးကိစ္စကိုပြောတော့မယ်ဆိုရင်တော့ ဒေသဆုိုင်ရာအစိုးရ၊ ဒေသဆုိုင်ရာလွှတ်တော်လောက်နဲ့ အလုပ်မဖြစ်တော့ပါ။ ဒီအတွက် ပြည့်သူ့လွှတ်တော်၊ အမျိုးသးလွှတ်တော်တွေအထိ တုိုင်းရင်းသား ကုိုယ်စားလှယ် တွေ ပါဖုို့လုိုလာပြန်ပါတယ်။ ဒီအတွက် တုိုင်းရင်းသားပါတီတွေက ပြည်ထောင်စုလွှတ်တော် အတွက်ပါ ၀င်ပြိုင်နေ ကြတာဖြစ်ပါတယ်။
ပါတီကြီးတွေက တုိုင်းရင်းသားအားလုံးကုို ကုိုယ်စားပြုပါတယ်လို့ ဘယ်လုိုပဲပြောပြော၊ တုိုင်းရင်းသားတွေကို သူတို့ ပါတီရဲ့ လွှတ်တော်အမတ်လောင်းအဖြစ် ဘယ်လုိုပဲထည့်ထားထည့်ထား၊ တကယ်တန်း တုိုင်းရင်းသားအရေး၊ ကုိုယ်ပုိုင်ပြဌဏ်းခွင့်အရေး၊ ဖက်ဒရယ်အရေးဆွေးနွေးငြင်းခုန်ရတော့မယ်ဆုိုရင် သူတို့အမတ်တွေက သူတုို့ပါတီက ချမှတ်ထားတဲ့ မူဝါဒအတုိုင်းလုိုက်ရမှာမုို့ တုိုင်းရင်းသားအရေးကို တုိုင်းရင်းသားပါတီတွေက အမတ်တွေလောက် အခုိုင်အမာ ဦးစားပေးပြောဖုို့ဆုိုတာ မဖြစ်နုိုင်ပါ။
ဒါဖြင့် တသီးပုဂ္ဂလအမတ်တွေကော ပြည်ထောင်စုအဆင့်မှာ မလိုပြန်ဘူးလား။ ဒါလဲ စဉ်းစားသင့်တဲ့ကိစ္စတခုပါ။ ပြီးခဲ့တဲ့ ၅ နှစ်တာကာလအတွင်း ရန်ကုန်တုိုင်းလွှတ်တော်မှာ အများပြည်သူလုိုလားတဲ့ ဥပဒေတွေတင်သွင်းခဲ့သူ တသီးပုဂ္ဂလအမတ် ဒေါ်ညုိုညိုသင်းလုို ပုဂ္ဂိုလ်တွေ ဆက်ပါသင့်တယ်လုို့ ထင်မြင်နေသူ မနည်းလှပါ။
“ခေါင်းပါဖို့မလိုဘူး၊ လက်ညှိုးထောင်ဖို့ပဲလိုတယ် ဆိုတဲ့လွှတ်တော်မျိုးသာ ဖြစ်ခဲ့ရင်တော့ ကျွန်တော်တို့မျှော်လင့် ထားတာတွေ၊ ပေးဆပ်ခဲ့ရတာတွေ အရာမထင်ဘူးလို့ပဲ ပြောရမယ်။ လွှတ်တော်ထဲမှာ အသံတသံတည်း သို့မဟုတ် နှစ်ပါတီရှိလို့ နှစ်သံထွက်မဲ့အစား ပြည်သူလူထုဘက်က ရပ်တည်ပေးမဲ့ ပုဂ္ဂိုလ်တွေနဲ့ အသံတွေမြိုင်မြိုင် ဆုိုင်ဆုိုင် တက်တက်ကြွကြွ ပါဝင်တဲ့လွှတ်တော်ကြီး ဖြစ်ဖို့လိုပါတယ်” ဆုိုပြီး ၈၈ မျိုးဆက် ခေါင်းဆောင်တဦးက ဒေါ်ညုိုညုို သင်းရဲ့ အောင်နုိုင်ရေးရုံးခန်းဖွင့်ပွဲမှာ ပြောခဲ့တယ်လုို့သိရပါတယ်။
ကော်မရှင်မှာကော ပြိုင်ဖက်တွေ၊ မဟာမိတ်တွေရှိနေသလား
တဖက်မှာ ဒီလုိုမေးခွန်းထုတ်စရာတွေရှိနေသလုို တခြားတဖက်မှာလည်း ဒီထက်ကြီးမားတဲ့ မေးခွန်းထုတ်စရာတွေ ရှိနေပြန်ပါတယ်။ အဲဒါကတော့ ဒီပွဲမှာ ဒုိုင်လူကြီးလုပ်မဲ့ ရွေးကောက်ပွဲကော်မရှင်ရဲ့ သမာသမတ်ကျမှုပါပဲ။ ရှေ့မှာ တင်ပြခဲ့တဲ့ မဟာမိတ်တွေ၊ ပြိုင်ဖက်တွေ၊ အစိုးရဖွဲ့နုိုင်တဲ့ပါတီတွေဆုိုတာက ဒီရွေးကောက်ပွဲမှာ အနုိုင်ရပြီးမှ၊ အနုိုင် ရသူကုို လက်ရှိဦးသိန်းစိန်အစိုးရက အာဏာလွှဲပေးပြီးမှ ဖြစ်လာမဲ့အရာတွေပါ။
အဲဒီလုိုအနုိုင်ရဖုို့အတွက် လွတ်လပ်မျှတတဲ့ ရွေးကောက်ပွဲဖြစ်ဖုို့လုိုပါတယ်။ ဒီအတွက်
ပါတီတွေအားလုံးပေါင်းပြီး ရွေးကောက်ပွဲကော်မရှင်ရဲ့လုပ်ရပ်တွေကို အသေချာစောင့်ကြည့်ဝေဖန်သင့်ပါတယ်။ အခုချိန်ထိတော့ မှတ်ပုံတင် ထားတဲ့ ပါတီ ၉၁ ခုစလုံးဟာ ဒီလုို စောင့်ကြည့်ဝေဖန်တာ သိပ်မတွေ့ရပဲ ကုိုယ့်ပါတီအောင်နုိုင်ရေးတခုတည်းကုိုပဲ အာရုံစုိုက်လုပ်နေတာမျိုးသာ မြင်နေရပါတယ်။
တနည်းအားဖြင့်ပြောမယ်ဆုိုရင်တော့ ပြိုင်ဖက်လား၊ မဟာမိတ်လား ဆုိုတာဟာ နုိုင်ငံရေးပါတီအချင်းချင်းမှာတင် မေးခွန်းထုတ်သင့်တာမဟုတ်ပဲ ရွေးကောက်ပွဲကော်မရှင်မှာကော မဟာမိတ်တွေ၊ ပြိုင်ဖက်တွေ ရှိနေသလားဆုိုပြီး သံသယ ၀င်စရာ၊ မေးခွန်းထုတ်စရာတွေရှိလာနေပါတယ်။ စစ်ဗိုလ်ချုပ်ဟောင်း၊ ကြံ့ခုိုင်ရေးပါတီထိပ်တန်းခေါင်း ဆောင်ဟောင်း ကော်မရှင်ဥက္ကဌ ဦးတင်အေးက ကြားနေပြီး သမာသမတ်ကြစွာ ဒုိုင်လူကြီးလုပ်ပေးပါ့မယ်လို့ ပြောထားပေမဲ့ ဒီပြောဆုိုချက်အပေါ် မေးခွန်းထုတ်သူတွေ တုိုးတုိုးပြီးရှိလာနေပါတယ်။
ကုလသမဂ္ဂအကူအညီနဲ့ သန်းခေါင်စာရင်းကောက်ထားတာ မကြာသေးတဲ့နုိုင်ငံတခုမှာ လူဦးရေစာရင်း အမျိုးမျိုး ဖြစ်နေတာ၊ သန်းခေါင်စာရင်းကိုအခြေမခံပဲ ထွေ-အုပ် စာရင်းကုိုအခြေခံတယ်ဆုိုပြီး ပြောဆိုနေတာ၊ မဲစာရင်း ၃၀ ရာခုိုင်မှုန်းပဲ အာမခံနုိုင်တယ်ဆုိုတာ၊ စာရင်းတွေ ထပ်ကာထပ်ကာမှားနေတာတွေဟာ လုပ်ငန်းမကျွမ်းကျင်လုို့ မတော်တဆမှားယွင်းမှု သက်သက်ဟုတ်ရဲ့လား။ တမင်တကာများ စာရင်းမှားတွေကို ထုတ်ပြန်နေတာလားဆုိုပြီး ဝေန်ဖန်မှုတွေတုိုးလာနေပါတယ်။
တခါ ဘာသာရေးအစွန်းရောက်တွေရဲ့ ဘာသာရေးနဲ့နုိုင်ငံရေးရောထွေးအောင် လုပ်ဆောင်လာမှုတွေ၊ တုိုက်ပွဲ ကြောင့် ပြည်နယ်တချို့က မြို့နယ်တွေမှာ ရွေးကောက်ပွဲမလုပ်တော့ဘူးဆုိုတာတွေ၊ ကြံ့ခုိုင်ရေးပါတီနဲ့ စစ်တပ် ကျောထောက်နောက်ခံပေးထားတဲ့ တသီးပုဂ္ဂလအမတ်တွေဝင်ပြိုင်မဲ့နေရာဆီ စစ်စခန်းရွှေပြီး တပ်ရင်းအလုိုက် မဲ ပေးဖုို့ပြင်နေတာတွေ၊ စသဖြင့် စသဖြင့် ပုံမှန်မဟုတ်တဲ့ လှုပ်ရှားမှုတွေအများကြီးရှိလာနေတယ်လုို့ ဝေဖန်သူတွေ က ထောက်ပြနေပါတယ်။
ဒါကြောင့် နုိုင်ငံရေးပါတီတွေအနေနဲ့ အချင်းချင်းအကြိတ်အနယ်ပြိုင်နေတာအပြင် ရွေး-ကော် ရဲ့ ရပ်တည်ချက်နဲ့ လုပ်ဆောင်ချက်တွေကို နေ့စဉ်မပြတ်စောင့်ကြည့်ဝေဖန် ထောက်ပြဖုို့လုိုနေပါတယ်။
တချိန်တည်းမှာပဲ ကုလသမဂ္ဂ၊ ဥရောပသမဂ္ဂအပါဝင် နုိုင်ငံတကာရွေးကောက်ပွဲ လေ့လာရေးအဖွဲ့တွေ၊ ပြည်တွင်း က ရွေးကောက်ပွဲလေ့လာရေးအဖွဲ့တွေအနေနဲ့လည်း ရွေးကောက်ပွဲကျင်းပတဲ့ နုိုဝင်ဘာလ ၈ ရက်နေ့ တခုတည်း ကုိုသာ စောင့်ကြည့်တာမျိုးမဟုတ်ပဲ အခု ကတည်းက ကော်မရှင်ရဲ့လုပ်ရပ်နဲ့ ရွေးကောက်ပွဲအကြိုကာလ အခြေ အနေအသေးစိပ်ကို အသေချာစောင့်ကြည့် ဝေဖန်ထောက်ပြဖုို့လုိုနေပြီဖြစ်ပါတယ်။ ။
0 comments:
Post a Comment