Thursday, October 27, 2011

သူပုန်ကျောင်းသားတဦးရဲ့ မာရသွန်ခရီး ပထမ-ပိုင်း။

၂၀၁၁-ခုနှစ် နိုဝင်ဘာ ၁-ရက်နေ့ဟာ ABSDF စတင်တည်ထောင်ခြင်း ၂၃-နှစ်ပြည့်တဲ့နေ့ ဖြစ်ပါတယ်။ ABSDF အမှတ်တရအဖြစ် ဧရာဝတီမဂဇင်းမှာဖေါ်ပြပီးသား အပိုင်း ၁၁-ပိုင်းစလုံးကို တစုတည်းတင်ပြပေးထားပါတယ်။

..............................................................................................................
သူပုန် ကျောင်းသားတဦးရဲ့ မာရသွန်ခရီး ၁

ထက်အောင်ကျော် Thursday, 11 August 2011 18:47

အောက်မေ့ဖွယ်။ ဧရာဝတီမဂဇင်း

အခု ကျနော်ရေးမယ့် အဖြစ်အပျက်တွေဟာ ကျနော်ကိုယ်တွေ့တွေကို ကိုယ်ပိုင် ရေးဟန်နဲ့ ရေးသား ထားခြင်းမျှသာ ဖြစ်ပါတယ်။ ABSDF (ကျောင်းသားတပ်မတော်) ရဲ့ သမိုင်းမဟုတ်ပါ။ ABSDF ရဲ့ သမိုင်း တစိတ်တပိုင်းလို့တော့ ပြောမယ်ဆို ပြောလို့ ရနိုင်ပါတယ်။


ABSDF 201-တပ်ရင်းမှကျောင်းသားတဦး ၁၉၉၀-၀န်းကျင်က ရှင်မုတ္ထီးရွာအတွင်း ဟောပြောနေစဉ်(ဓာတ်ပုံ -စာရေးသူရဲ့ Facebook)



ကျနော်တို့ရဲ့ မင်းသမီးစခန်း ဆိုတာဟာ ABSDF မှာ အင်အားအများဆုံး စခန်းတွေထဲက (သီဘောဘိုးနဲ့ သံလွင်ပြီးရင်) တခု ဖြစ်ပြီး ပထ၀ီ အနေထားအရ၊ ပင်လယ်ပြင် စစ်ကြောင်းတွေအရ ထင်ရှားတဲ့ နေရာ တခုဖြစ်ပါတယ်။ ၁၉၈၈ ခုနှစ်ကနေ ၁၉၉၇ ခုနှစ် အထိ ၁၀ နှစ်တာကလအတွင်း ကျဆုံးသွားတဲ့ ကျောင်းသားဦးရေ ၈၀ ကျော်ရှိပြီး အဲဒီထဲက တဒါဇင်လောက်ဟာ တော်လှန်ရေး အစောပိုင်းကာလမှာ လုပ်ကြံ သတ်ဖြတ်ခံရသူတွေ ဖြစ်ပါတယ်။ ဒါဟာ ABSDF ဗဟိုက ထုတ်ပြန်ထားတဲ့ ABSDF တခုလုံးရဲ့ အကျအဆုံးစာရင်း ၃၄၄ ဦးနဲ့ နှိုင်းယှဉ်ရင် တပ်ရင်းတခုတည်းအတွက် အတော် များနေတာကို တွေ့ရမှာ ဖြစ်ပါတယ်။

ဒီမိုကရေစီအရေး တော်လှန်ရေးအတွက် အသက်ပေးသွားကြတဲ့ ကျောင်းသားရဲဘော်တွေကို အမှတ်ရစေဖို့ နှစ် ၂၀ ကျော် ကြာခဲ့ပြီဖြစ်တဲ့၊ မပြီးဆုံးသေးတဲ့ လက်နက်ကိုင် တော်လှန်ရေးအကြောင်း ဖြစ်စဉ် မှတ်တမ်းတချို့ကို သမိုင်းပြုစုသူတွေ၊ နိုင်ငံရေး စိတ်ဝင်စားသူတွေ၊ စာဖတ်သူ လူငယ်တွေ သိရှိ လေ့လာနိုင်ဖို့အတွက် အခုလို ရေးသားလိုက်ရခြင်း ဖြစ်ပါတယ်။

ကျနော်ရေးတာဟာ ကျနော့်ကိုယ်တွေ့ တခုတည်းသာ ဖြစ်တဲ့အတွက် ဘယ်လိုမှ မပြည့်စုံနိုင်ပါဘူး။ ABSDF မှာ တပ်ဖွဲ့ဝင်ပေါင်း ၅၀၀၀ နီးပါး၊ စခန်းနဲ့ တပ်ရင်းပေါင်း ၂၀ နီးပါး ရှိတဲ့အတွက် တခြားစခန်းက တခြားရဲဘော်တွေလည်း ကိုယ် ကြုံတွေ့ခဲ့တာတွေကို ပြန်ရေးကြ စေချင်ပါတယ်။

နှစ် ၂၀ ကျော် ခရီးစဉ်ရဲ့ ပထမဆုံးနေ့ ...။


တောစခိုဖြစ်တဲ့ နေ့အကြောင်း တွေးမိတိုင်း ပထမဆုံး သတိရတာကတော့ “လမ်းကြုံလို့ တောခိုလာသူ” ဆိုပြီး ရဲဘော် တချို့က ကျနော့်ကို စ နောက်လေ့ ရှိတဲ့ စကားလုံးလေးပါ။ သူတို့ပြော မယ်ဆိုလဲပြောစရာပါပဲ။ တောခိုဖို့ ကြိုတင် စီစဉ်ထားခြင်း မရှိတဲ့ ကျနော်ဟာ တောခိုမယ့်လူတွေ ကျနော်တို့ ရွာဆီ ရောက်လာရာကနေ အဲဒီလူတွေနဲ့အတူ လိုက်ပါလာရင်းနဲ့ တောထဲရောက်လာတဲ့ သူဆိုရင် မမှားပါဘူး။

ကျနော့် စိတ်ထဲ မှတ်မိသလောက်ကို ပြန်ကောက်ရမယ်ဆိုရင် အဲဒီနေ့က ၁၉၈၈ စက်တင်ဘာလ ၁၉ ရက်နေ့ ညနေပိုင်း ၄ နာရီလောက် ရှိမယ်လို့ ထင်ပါတယ်။

“အတွင်းရေးမှုး၊ ရွာထဲမှာ ကျောင်းသားတွေ ရောက်နေတယ်။ အဲဒါ နေရာချပေးဖို့ အတွင်းရေးမှူးကို စောင့်နေကြတယ်” လို့ စက်ဘီးစီးပြီး ရောက်လာတဲ့ ရွာသားတဦးက ကျနော့်ကို လာသတင်းပို့ပါတယ်။

အတွင်းရေးမှုးဆိုလို့ နားရှုပ် မသွားပါနဲ့။ ၈ လေးလုံး အရေးတော်ပုံ ကာလအတွင်း ဖွဲ့စည်းခဲ့တဲ့ လောင်းလုံးမြို့နယ် ကျောင်းသားသမဂ္ဂမှာ ကျနော်က အတွင်းရေးမှူးတာဝန် ယူထားသလို၊ မင်းရပ်ရွာ အုပ်ချုပ်ရေးအဖွဲ့မှာလည်း ကျနော့်ကို အတွင်းရေးမှူး တာဝန်ပေးထားပါတယ်။

အရင် ရပ်ကွက်၊ မြို့နယ်ကောင်စီဝင်တွေ အားလုံး ၈ လေးလုံး ကာလမှာ ပြုတ်ပြီးတဲ့နောက် ကိုယ့်ရွာကို သင့်သလို အုပ်ချုပ်နေတဲ့ ကာလမှာ ကျနော်တို့ ကျောင်းသားတွေကို ဥက္ကဋ္ဌ အတွင်းရေးမှူးတွေအဖြစ် ရပ်မိရပ်ဖတွေက တင်မြှောက် ရာကနေ အုပ်ချုပ်ရေးအတွေ့အကြုံ ဘာမှမရှိသေးဘဲနဲ့ အတွင်းရေးမှူး ဖြစ်နေသူပါ။

ရွာသား သတင်းပို့တဲ့အတိုင်း ကျောင်းသားတွေရှိရာ ရွာတောင်ပိုင်းက နန္ဒသီရိ ဘုန်းတော်ကြီးကျောင်းဆီ ကျနော့်ရဲ့ ပြိုင်ဘီးလေးကို စီးပြီးထွက်သွားတော့ ကျနော်နဲ့သိတဲ့ မော်လမြိုင်တက္ကသိုလ်၊ ရန်ကုန်တက္ကသိုလ်တွေမှာ တက်နေတဲ့ ကျောင်းသားတွေ၊ ထားဝယ်ကောလိပ်က ကျောင်းသားတွေအပြင်၊ အဖြူအစိမ်းဝတ် အထက ကျောင်းသားတွေ အပါအ၀င် လူ ၄ဝ ကျော်၊ ၅ဝ လောက် တွေ့ရပါတယ်။

ဒီကျောင်းသားတွေနဲ့အတူ ကျောင်းသူတချို့ ပါလာတာကိုလည်း ကျနော် သတိထားမိပါတယ်။ သူတို့ရဲ့ မျက်နှာပေါ်မှာတော့ ၀မ်းနည်းကြေကွဲမှုနဲ့ သည်းမခံ နိုင်မှုတွေ ပေါ်လွင်နေပြီး ကျောင်းသူတချို့ဆိုရင် ငိုထားတဲ့ မျက်နှာက သိသာနေပါတယ်။

“ဘယ်လိုဖြစ်တာလဲ။ ဘယ်ကို သွားကြမှာလဲ။ ဘယ်လို ကူညီပေးရမလဲ” ဆိုပြီးမေးတော့ သူတို့လည်း ၀မ်းနည်းကြေကွဲ နေလို့လား၊ အစီအစဉ်ကို မသိလို့လားမပြောတတ်၊ ဘာမှ အတိအကျ ပြန်မဖြေနိုင်ကြပါဘူး။

အဲဒီချိန်မှာ ဆိုင်ကယ်စီးပြီး နောက်ထပ် ရောက်လာတဲ့ ကျောင်းသားအုပ်ထဲက တဦးက ထွက်လာပြီး “အသေးစိတ်ကို ကိုတင်လေး ရောက်လာမှ ခင်ဗျားကို ရှင်းပြလိမ့်မယ်။ လောလောဆယ်ကတော့ စစ်တပ်က ပစ်လို့ ထွက်ပြေးလာတာတဲ့။ ဆရာ ဦးပန်းကျော်တို့လည်း ကျကုန်ပြီ” လို့ ပြောပါတယ်။

ကိုတင်လေး ဆိုတာကတော့ နောက်ပိုင်း မင်းသမီးဒေသမှာ အသတ်ခံရသလိုလိုနဲ့ ပျောက်ဆုံး သွားသူပါ။ ကျနော့်ရဲ့ အရင်းနှီးဆုံး သူငယ်ချင်းတွေထဲက တဦးဖြစ်ပြီး ထားဝယ်ကောလိပ်နဲ့ မော်လမြိုင် တက္ကသိုလ်တွေမှာ ၄ နှစ်ကျော် ၅ နှစ် နီးပါး အတူတူ တက်ခဲ့သူပါ။ သူဟာ ရုက္ခဗေဒ နောက်ဆုံးနှစ် ကျောင်းသားဖြစ်ပြီး ထားဝယ်ကောလိပ်နဲ့ မော်လမြိုင်တက္ကသိုလ်ရဲ့ ရေးကူးချန်ပီယံ၊ မီတာ ၄၀၀ အပြေး ချန်ပီယံဖြစ်တဲ့အပြင် ထားဝယ်မြစ်ကိုတောင် လက်ပစ်ကူးဖူးသူအဖြစ် ထင်ရှားခဲ့ပါတယ်။

ကျနော်ကတော့ တနင်္သာရီတိုင်း လက်ရွေးစင် စက်ဘီးသမားဖြစ်ပြီး နေရာတကာမှာ ပြိုင်ဘီးတစီးနဲ့ သူများမျက်စိ နောက်စရာ ဖြစ်နေသူ နောက်ဆုံးနှစ် မြန်မာစာ ကျောင်းသားပါ။

သူနဲ့ကျနော်ဟာ ၁၉၈၇ စက်တင်ဘာ စာမေးပွဲကာလအတွင်း ဖြစ်ပေါ်ခဲ့တဲ့ ငွေစက္ကူ အရေးအခင်း၊ မတ်လ၊ ဇွန်လ အရေးအခင်းတွေအတွင်း မော်လမြိုင်တက္ကသိုလ်မှာ အတူတူလှုပ်ရှားခဲ့သူတွေပါ။ ပါမောက္ခချုပ် တက္ကသိုလ် ဘုန်းနိုင်ရဲ့ သတိပေးခြင်းခံရတဲ့ ထားဝယ် ကျောင်းသားခေါင်းဆောင် တွေထဲ ပါဝင်သူတွေဖြစ်ပါတယ်။ ကျောင်းတွေပိတ်လိုိက်လို့ ထားဝယ်ပြန်ရောက်ပြီး ၈ လေးလုံးလှုပ်ရှားမှု စတင်တဲ့ အခါမှာတော့ ကိုတင်လေးဟာ ထားဝယ်တနယ်လုံး ဆိုင်ရာ ကျောင်းသားသမဂ္ဂ ဥက္ကဋ္ဌ ဖြစ်လာပါတယ်။

၈ လေးလုံးကာလ ကျောင်းသားလှုပ်ရှားမှုနဲ့ လူထုလှုပ်ရှားမှု အားလုံးကို ကိုတင်လေး ဦးဆောင်တဲ့ ထားဝယ် ဒေသလုံးဆိုင်ရာ ကျောင်းသား သမဂ္ဂနဲ့ ဆရာကြီးဦးပန်းကျော်တို့ ဦးဆောင်တဲ့ ထားဝယ် တနယ်လုံးဆိုင်ရာ (တနင်္သာရီတတိုင်းလုံး ဆိုင်ရာ လည်း ဖြစ်နိုင်ပါတယ်) ဒီမိုကရေစီ တပ်ဦးတို့က ဦးစီးဆောင်ရွက်နေတာပါ။ ကျနော်ကိုယ်တိုင်ကတော့ သြဂုတ်လ ၉ ရက်နေ့ ထားဝယ်မြို့ပေါ် ဆန္ဒပြပွဲနဲ့ တချို့နေ့တွေမှာ သူလိုကိုယ်လို ပါဝင်ခဲ့တာကလွဲရင် ထားဝယ်မြို့ပေါ်က ကျောင်းသားတွေလို နေ့စဉ် ကိစ္စတွေကို ဦးစီး ဆောင်ရွက်နေတဲ့ထဲ ပါဝင်နိုင်ခြင်း မရှိခဲ့ပါဘူး။ ဒါကြောင့်လည်း ပစ်ခတ်မှုဖြစ်တဲ့ ဒီနေ့ ဆန္ဒပြပွဲ အတွင်း ဆရာကြီး ဦးပန်းကျော်အပါဝင် ကျနော်တို့ရဲ့ ရဲဘော်ရဲဘက် ၅ ဦး အသတ်ခံ လိုက်ရတာကို ကျနော်မသိသေးပါဘူး။

ဟို မေးဒီမေးနဲ့ တစစီ သိလိုက်ရပေမယ့် အသေးစိတ်ကိုတော့ နောက်ပိုင်း နယ်စပ်ရောက်တော့မှ အဲဒီပစ်ခတ်မှု အတွင်း ဆရာဦးပန်းကျော်ရဲ့ ဘေးမှာရှိနေသူ ဆရာဦးအောင်မြင့် (နောက်ပိုင်း ၂၀၁ တပ်ရင်း၊ ဒု- ရင်းမှူးဖြစ်လာသူ) ပြန်ပြောပြမှ အသေးစိတ်ကို သိရပါတယ်။

စက်တင်ဘာ ၁၈ ရက်နေ့ညနေ ၄ နာရီမှာ စစ်တပ်က အာဏာသိမ်းကြောင်း ရေဒီယိုက ကြေညာသံ ကြားရပြီးတဲ့နောက် တပ်ဦး ခေါင်းဆောင်တွေ ညဘက်မှာ အစည်းဝေးလုပ်ခဲ့ကြောင်း၊ ဒါပေမယ့် အစည်းအဝေးက ဆုံးဖြတ်ချက် မချနိုင်တဲ့အတွက် မနက် ၈ နာရီမှာ ပြန်လုပ်ဖို့ ဆင့်ခေါ်လိုက်ကြောင်း၊ မနက် ၇ နာရီလောက် ကတည်းက သူနဲ့ ဆရာဦးပန်းကျော်တို့ တပ်ဦး ရုံးခန်းဆီ ရောက်လာပြီး စားပွဲတွေ၊ ထိုင်ခုံတွေပြင်နေတုန်း အထက ၁ က ကျောင်းသား ၃ ဦး ရောက်လာပြီး “ဆရာ၊ ကျနော်တို့ကျောင်းကို စစ်တပ်က၀ိုင်းထားလိုက်ပြီ။ အဲဒါ ဘယ်လို လုပ်ရမလဲ။ အမြန်ကူပါဦး” လို့ လာပြောတယ်လို့ ဆိုပါတယ်။

ဒီအတွက် တပ်ဦး အထွေထွေ အတွင်းရေးမှူးအဖြစ် တာဝန်ယူထားသူ အသက် ၄၆ နှစ်အရွယ် မြောင်းပုလဲ အလက ကျောင်းအုပ်ကြီး ဦးပန်းကျော်က တပ်ဦး အတွင်းရေးမှူး ရှေ့နေ ဦးမြင့်သိန်း (နောက်ပိုင်း မင်းသမီးဒေသမှာ အသတ် ခံရသလိုလိုနဲ့ ပျောက်ဆုံးသွားသူ) နဲ့ စည်းရုံးရေးမှူး ဆရာဦးအောင်မြင့်တို့ကို တာဝန်ပေးလိုက် တယ်လို့ သိရပါတယ်။

အထက ၁ ဆီ သူတို့ ၂ ဦး ရောက်လာပြီး ကျောင်းဝန်း အတွင်း သပိတ်စခန်းဖွင့်ထားတဲ့ ကျောင်းသားတွေကို ငြိမ်ငြိမ်သက်သက်နေဖို့၊ စစ်တပ်ကို ထိပ်တိုက်ရင်ဆိုင်မှု မလုပ်ဖို့ ဆွေးနွေးဟောပြောခဲ့ကြောင်း၊ ဒီလို ဟောပြောနေစဉ်မှာ ဦးမြင့်သိန်းက “တပ်ဦးရုံးကို လွှတ်ထားလို့ မဖြစ်ဘူး။ ဆရာအောင်မြင့်က အခြေအနေ ပြန်သွားကြည့်ပါ” လို့ တာဝန်ပေးတဲ့အကြောင်း ဆရာဦးအောင်မြင့်က ပြောပြပါတယ်။

ဒီလိုနဲ့ အထက ၁ နောက်ဘက်ပေါက်ကနေ ထွက်လာပြီး ဥတ္တားကြီးလမ်းဆုံရှေ့က တပ်ဦးရုံးဘက် သူထွက်လာတော့ လမ်းမှာ စစ်တပ်နဲ့တိုးတယ်လို့ ဆိုပါတယ်။ အဲဒါနဲ့ စစ်တပ်ထက် ဦးအောင် တပ်ဦးရုံးဆီ သူပြေးလာပြီး ဆရာ ဦးပန်းကျော်တို့ကို အခြေအနေ သတင်းပို့ခဲ့တယ်လို့ သိရပါတယ်။ အဲဒီအချိန်မှာ ကျောင်းသားတွေ၊ အရပ်သားတွေ ထောင်နဲ့ချီပြီး တပ်ဦးရုံးရှေ့နဲ့ ဥတ္တားကြီး လမ်းလေးဆုံမှာ ပြည့်ကျပ်နေပြီဖြစ်ပါတယ်။

“ဒီမိုကရေစီအရေး တို့အရေး” ဆိုတဲ့ ကြွေးကြော်သံတွေကိုလည်း လော်စပီကာနဲ့ အော်နေကြတယ်လို့ ဆိုပါတယ်။ အဲဒီ အချိန်မှာပဲ ဘရင်းကယ်ရီယာပါတဲ့ စစ်ကြောင်းတခုက တပ်ဦးရုံးရှေ့ ပေ ၁၀၀ လောက်အကွာအထိ ရောက်လာပြီး ဦးပန်းကျော်၊ ဦးပန်းလှနဲ့ ဦးအောင်မြင့်တို့ကို စစ်ကြောင်းမှူးက ခေါ်ထုတ်ဆွေးနွေးခဲ့တယ်လို့ သိရပါတယ်။

ဆွေးနွေးတယ် ဆိုပေမယ့် တကယ်ကတော့ သူတို့ကို သေနတ်နဲ့တေ့ အမိန့်ပေးတာသာဖြစ်ပြီး “တပ်ဦးရုံးမှာ တပ်ထားတဲ့ ဆိုင်းဘုတ်နဲ့ ခွပ်ဒေါင်းအလံကို အမြန်ဆုံး ဖြုတ်ပေးပါ” လို့ စစ်ကြောင်းမှူး ဒုတိယဗိုလ်မှူးကြီးမြင့်သိန်းက အမိန့်ပေးခဲ့တယ်လို့ ဦးအောင်မြင့်က ပြောပါတယ်။

သူတို့ဘက်ကလည်း တပ်ဦးဆိုင်းဘုတ်နဲ့ ခွပ်ဒေါင်းအလံကိုဖြုတ်ချပေးဖို့ ဘယ်လိုမှမဖြစ်နိုင်ကြောင်း တင်ပြခဲ့ပြီး လူထုကို ငြိမ်ငြိမ်သက်သက်နေဖို့ ပြန်လည် ရှင်းပြနေရကြောင်း၊ ဒီအတောအတွင်းမှာပဲ ဥတ္တားကြီး လမ်းဆုံရဲ့ ထောင့်မှာရှိတဲ့ ဘုရားကြီးဝန်းထဲ ၀င်တဲ့ လမ်းဘက်ကနေ လူငယ်အုပ်စုတစုက ကြွေးကြော်သံတွေ၊ ခွပ်ဒေါင်းအလံတွေနဲ့ ချီတက်လာပြီး စစ်တပ်နဲ့ တပ်ဦးရုံး ထိပ်တိုက်တွေ့ နေရာအရပ်ဆီ ဦးတည်လာတယ်လို့ ဆိုပါတယ်။

အခြေနေဟာ စစ်တပ်နဲ့ လူထုအကြား အတော်တင်းမာနေပြီး စစ်သားတွေ အားလုံးက လူအုပ်ဘက်ကို သေနတ်နဲ့ အဆင့်သင့် ချိန်ထားတယ်လို့ သိရပါတယ်။ အဲဒီအချိန်မှာ စစ်ကြောင်းမှူးက “တပ်ဦးဆိုင်းဘုတ်နဲ့ ခွပ်ဒေါင်းအလံကို ၅ မိနစ် အတွင်း ဖြုတ်ပေးပါ” လို့ အမိန့် ထပ်ပေးပါတယ်။

သူတို့ဘက်ကလည်း ဖြုတ်မပေးနိုင်ကြောင်း ထပ်ပြောပြီး ၅ မိနစ်မပြည့်ခင် ၃ မိနစ်လောက်မှာပဲ ဗိုလ်ကြီးတင်ဝင်း ဆိုသူက ပစ်စတိုကို မောင်းတင်လိုက်တဲ့အတွက် လူတွေ စတင် ထွက်ပြေးကြတယ်လို့ ဦးအောင်မြင့်က ပြောပါတယ်။ သူလည်း ချက်ချင်းဆိုသလို လမ်းဘေးကမြောင်းထဲ လှိမ့်ချလိုက် ပြီးတာနဲ့ သေနတ်သံတွေ ဆက်တိုက်ကြားရကြောင်းနဲ့ သူ့ခေါင်းပေါ်ကနေ ကျည်ဆံတွေဖြတ်သွားနေပြီး ခဏငြိမ်ချိန်မှာပဲ တပ်ဦးရုံး အနောက်ဘက်ဆီ ထွက်ပြေးလာတယ်လို့ ဦးအောင်မြင့်က ပြောပါတယ်။

စုရပ် နေရာတခုဆီ ပြန်ရောက်လို့ သတင်းပြန်စုတော့ ဗိုလ်ကြီးတင်ဝင်းက ဆရာဦးပန်းကျော်ရဲ့ ဦးခေါင်းကို ပစ်စတိုနဲ့ အနီးကပ်ပစ်လို့ ပွဲချင်းပြီးသေဆုံးသွားတယ်၊ နောက်တော့ ဆရာဦးချမ်းလှ၊ ဦးကြည်ရှိန်နဲ့ တခြား တဦး တို့လည်း သေဆုံးခဲ့ရတယ်လို့ သိလိုက်ရတယ် ဆိုတဲ့အကြောင်း ဦးအောင်မြင့်က ပြောပါတယ်။

နောက်တရက်မှာတော့ ဒဏ်ရာ ပြင်းတဲ့ မမူမူအေး ဆိုတဲ့အမျိုးသမီးတဦး ထားဝယ်ဆေးရုံကြီးမှာ ထပ်မံ သေဆုံးခဲ့တဲ့အတွက် သေဆုံးသူ အားလုံး ၅ ဦး၊ ဒဏ်ရာရသူ ၃၇ ဦး ရှိခဲ့တယ်လို့ ဆရာဦးအောင်မြင့်က ကျနော့်ကိုပြောပြခဲ့ပါတယ်။

ဒီလိုပစ်ခတ်မှု ဖြစ်ပြီးပြီးချင်း ကျောင်းသားတွေက အခင်းဖြစ်ရာနေရာကနေ ထားဝယ်မြစ်ကို ဖြတ်ပြီး ကျနော်တို့ရွာဆီ ထွက်ပြေးလာကြတာဖြစ်ပါတယ်။ ဒီကတဆင့် တောခိုဖို့ စဉ်းစား ထားပုံရပါတယ်။ ဒီလိုပြောလိုက်လို့ ကျနော်တို့ရွာက ထားဝယ်မြို့နဲ့ ထိုင်းနယ်စပ် ကရင်အမျိုးသား အစည်းအရုံး (KNU) စခန်းတွေ ကြားမှာ ရှိတဲ့ နေရာလို့မထင်လိုက်ပါနဲ့။

ထားဝယ်မြစ်ရဲ့ အနောက်ဘက်ကမ်းမှာရှိတဲ့ နေရာဖြစ်လို့ နယ်စပ်နဲ့ ဆန့်ကျင်ဘက် နေရာကိုတောင် သူတို့က ရောက်လာတဲ့ သဘောပါ။

နောက်တခါ ကိုတင်လေးနဲ့ ကျနော်က ၅ နှစ်နီးပါး ရင်းနှီးပြီး အားကစားအတူတူ လုပ်ခဲ့တဲ့ သူငယ်ချင်းတွေ ဖြစ်ပေမယ့် စစ်တပ်က အာဏာသိမ်းရင် တောခိုမယ်လို့ တခါမှ ကြိုတင် ဆွေးနွေးခဲ့ဖူးတာ မရှိတော့ ကျနော်လည်း ဘာလုပ်လို့ ဘာကိုင် ရမှန်းမသိ ဖြစ်နေပါတယ်။

နောက်ပိုင်း မေးမြန်းချက်တွေအရ ပြန်သိရတာကတော့ စစ်တပ်က အာဏာသိမ်းရင် တောခိုမယ် ဆိုတာကို ကျောင်းသား တချို့က ကြိုတင်စီစဉ်ထားတာတွေ ရှိခဲ့ပြီး မွန်ပြည်သစ်ပါတီ။ KNU၊ ဗကပ (ဗမာပြည် ကွန်မြူနစ်ပါတီ) တို့က ယူဂျီတွေနဲ့ ဆက်သွယ်ခဲ့ကြောင်း၊ ဒါကြောင့် အာဏာမသိမ်းခင် ၁၆ ရက်နေ့ လောက်ကတည်းက အင်အား ဒါဇင်ဝက်လောက်ပါတဲ့ ထားဝယ် ကျောင်းသား ကိုယ်စားလှယ် အဖွဲ့တခုဟာ ထားဝယ်ကနေ ကံပေါက်ဒေသဘက်ကို ထွက်ခွာသွားပြီး မွန်ပြည်သစ်၊ KNU အဖွဲ့ဝင်တွေနဲ့ အသေးစိတ် ဆွေးနွေးနေတယ်လို့ သိရပါတယ်။

ကျနော်တို့နဲ့အတူ တောစခိုတဲ့ အဖွဲ့ထဲ ပါလာတဲ့ ဗကသ (ဗမာနိုင်ငံလုံးဆိုင်ရာ ကျောင်းသားများသမဂ္ဂ) အဖွဲ့ဝင် ဦးဆောင်ကျောင်းသား တဦးဖြစ်သူ ဆလိုင်းကိုကိုဦးရဲ့ ပြန်လည် ပြောကြားချက်အရ ဆိုရင် သူနဲ့ ကိုတင်လေးတို့ဟာ ကိုသောင်းညွန့် (ခေါ်) ကိုလေဘေး (နောက်ပိုင်း ၂၀၁ ဘက်မလိုက် အဖွဲ့ရဲ့ တပ်ရင်းမှူး ဖြစ်လာသူ) နဲ့အတူ အာဏာ မသိမ်းခင် ရက်ပိုင်းအတွင်း တောင်သုံးလုံး ကျေးရွာဘက်သွားပြီး KNU ဗိုလ်မှူး ဒါးကျော် (အခု KNU တပ်မဟာ ၄ - မှူး ဖြစ်နေ သူ) နဲ့ တောခိုဖို့ကိစ္စ ဆွေးနွေးခဲ့ဖူးတယ်လို့ သိရပါတယ်။

ဒါ့အပြင် ဗကပ ဥက္ကဋ္ဌ သခင်ဘသိန်းတင်ရဲ့ ဆွေမျိုးတွေနဲ့လည်း ထားဝယ်မှာ တွေဆုံဆွေးနွေးပြီး စစ်တပ် အာဏာသိမ်းရင် ဗကပ နယ်ထဲဝင်ဖို့ ကြိုတင် ညှိနှိုင်းမှုတွေ ရှိခဲ့တယ်လို့ သိရပါတယ်။ ဒါပေမယ့် ထားဝယ်မှာ ပစ်ခတ်မှု ဖြစ်ချိန်မှာ ဗကပ နယ်ဘက်ထွက်တဲ့ ပေါက်တိုင်း တံတားဂိတ်၊ KNU နယ်ဘက်ထွက်တဲ့ ဗျောတောဝ ဂိတ်တွေကို စစ်တပ်က အသေအချာ စစ်ဆေးမှု လုပ်နေတဲ့အတွက် ဘာဂိတ်မှမရှိတဲ့ ကျနော်တို့ရွာဆီ မင်းရပ်ကူးတို့ကနေ လှေတွေနဲ့ကူးပြီး မြင်းလှည်းတွေနဲ့ ဆင်းလာကြတာလို့ ဒီဆောင်းပါးရေးချိန်မှာ ပြန်လည် မေးကြည့်တော့မှ ကျနော် သိခွင့်ရခဲ့တာပါ။

ဒါပေမယ့် အဲဒီကာလက ဒီအခြေနေတွေကို ဘာမှကြိုမသိတဲ့ ကျနော့်ခမျာတော့ ဘာဖြစ်လို့ သူတို့အဖွဲ့ ကျနော့်ရွာဆီ ရောက်လာမှန်း နားမလည်နိုင်ခဲ့ပါဘူး။ လောလောဆယ်မှာတော့ ဘုန်းကြီးကျောင်းက ရသမျှထမင်းဟင်းနဲ့ အနီးအနား အိမ်တွေက ရသမျှ ထမင်းဟင်းတွေကို မှာယူပြီး သူတို့ကို ကြွေးရပါတယ်။ အဲဒီအချိန်မှာပဲ လောင်းလုံကနေ ထားဝယ်ဘက်သွားတဲ့ စစ်ကားတွေ ဘုန်ကြီးကျောင်းရှေ့ ကားလမ်းပေါ်ကနေ ဖြတ်သွားနေတယ်လို့ သတင်းရပြီး ခွေးဟောင်သံတွေလည်း ဆူညံနေတဲ့အတွက် လူစုခွဲဖို့ ပြင်ရပါတယ်။ ဘုန်းကြီးကျောင်းနဲ့ ခပ်လှမ်းလှမ်းက အိမ်တွေဆီ လူခွဲပို့ပြီး ဘာဆက်လုပ်ရင် ကောင်းမလဲ ဆိုတာကို ဆွေးနွေးဖို့ ကိုတင်လေးကို စောင့်နေရပါတယ်။

ည ၆ နာရီဝန်းကျင်မှာတော့ ကိုတင်လေးနဲ့ အဖွဲ့ရောက်လာပြီး သူနဲ့အတူ ဗကသ က ကိုကိုဦးနဲ့ အဖွဲ့လည်း ပါလာတယ်လို့ ကျနော့်စိတ်ထဲ မှတ်မိနေပါတယ်။ ကိုကိုဦးနဲ့ အဖွဲ့ဟာ ဗကသ စည်းရုံးရေး ခရီးစဉ်အဖြစ် ထားဝယ်ဒေသဆီ ရောက်နေစဉ် အာဏာသိမ်းတဲ့ အချိန်နဲ့တိုးပြီး ကျနော်တို့နဲ့အတူ တောခိုတဲ့အထိ ပါလာခဲ့သူတွေပါ။ ခရီးစဉ်အကြောင်း အသေအချာ ဆွေးနွေးတော့ သူတို့မှာလည်း ကြိုတင်စီစဉ်ထားတာ ဘာမှရှိပုံမရပါဘူး။ ဒါမှမဟုတ် ကြိုတင် စီစဉ်ထားတဲ့အတိုင်း မဖြစ်တော့လို့ ကျနော့်ကို ဘာမှ ပြောမပြနိုင်တာလည်း ဖြစ်နိုင်ပါတယ်။

“ဒီည အနောက်ဘက်တောင်ကို ကျော်ပြီး မိုးမလင်းခင် စက်လှေတွေနဲ့ ရနောင်းကို ထွက်ချင်တယ်။ ရန်ကုန်နဲ့ မော်လမြိုင် ဘက်က လူတွေလည်း အဲဒီကို သွားနေကြတယ်။ အဲဒါ မင်း ဘယ်လိုကူညီ ပေးနိုင်မလဲ” ဆိုပြီး ကိုတင်လေးက ကျနော့် ကိုပြောပါတယ်။

ကျနော်ကလည်း စက်ဘီးစီးပြီး၊ ကားစီးပြီးသာ မောင်းမကန်ဘက်ကို ရောက်ဖူးပေမယ့် တောင်ကျော်ပြီး တခါမှ မသွားဖူးဘူး။ စက်လှေအကြောင်းလည်း ဘာမှမသိတော့ ဒီအကြောင်းသိတဲ့ ရွာထဲက လူတချို့ကိုခေါ်ယူ အကြံတောင်းရပါတယ်။

ဒီလိုနဲ့ ကျနော်တို့ရဲ့ ဆွေးနွေးပွဲဟာ ည ၁ နာရီလောက် ရောက်တဲ့အထိ အဖြေက မထွက်သေးဘူး။ အိပ်တဲ့လူက အိပ်ကုန်ကြပြီ။ အဲဒီလိုအချိန်မှာ ဘယ်ကနေ ဘယ်လို သတင်းရောက်လာမှန်းမသိ။ ကင်းအဖွဲ့က ကျနော့်ကို ထူးခြားတဲ့ အရေးပေါ်သတင်း လာပို့ပါတယ်။

“အတွင်းရေးမှူး၊ အစီအစဉ်က ရနောင်းဘက်မဟုတ်တော့ဘူး။ ဝေဒီကနေ ထားဝယ်မြစ်ကိုဖြတ်ပြီး ဗကပ နယ်ထဲဝင်မယ်။ ချောင်းဝမှာ သူတို့ အဆင့်သင့် စောင့်နေမယ်” ဆိုပြီး ကင်းတာဝန်ခံက ပြောပါတယ်။

ကိုတင်လေးကို မေးကြည့်တော့ “ဟုတ်တယ်။ အဲဒီအစီစဉ်အတိုင်း လုပ်မယ်” လို့ သဘောတူ ပါတယ်။

ဒါနဲ့ အိပ်ပျော်နေတဲ့ ကျောင်းသားတွေ အားလုံးကို တအိမ်တက်ဆင်း လိုက်နှိုးပြီး ည ၂ နာရီ လောက်မှာ ခရီးထွက်ဖို့ ပြင်ရ ပါတယ်။ အဲဒီညက လရောင်က လင်းနေတဲ့အတွက် တဦးနဲ့တဦး မသဲမကွဲ လရောင်အောက်မှာ မြင်နေရပါတယ်။

လူအင်အား ၅၀ လောက်ရှိမယ့် ကျောင်းသားအုပ်စုကြီးဟာ ကျနော်တို့ ရွာကနေ ရာဟောင်းဝ၊ ပန်းတလဲ၊ အင်းစောင့်၊ ကုန်းဇရပ် ရွာတွေကိုဖြတ်ပြီး ၈ မိုင်၊ ၉ မိုင် လောက်ရှိတဲ့ ခရီးကို ကုန်းကြောင်း လျှောက်ပြီးတဲ့ အခါမှာတော့ မနက် ၄ နာရီခွဲလောက်မှာ ဝေဒီရွာကို ရောက်လာပါတယ်။

လမ်းတလျှောက် ခွေးဟောင်သံတွေ ဆူညံနေပေမယ့် ဝေဒီအ၀င်မှာတော့ ထူးခြားစွာ တိတ်ဆိတ်နေပါတယ်။ ဘယ်သူတွေက ဘယ်လို ကြိုတင်စီစဉ်ထားလဲ မသိပါဘူး။ လှေ ၇ စီး၊ ၈ စီးလောက်က ကျနော်တို့ကို စောင့်နေပါတယ်။ အဲဒါနဲ့ နီးတဲ့ လှေဆီ တက်ပြီး ဝေဒီကနေ ထားဝယ်မြစ် တဘက်ကမ်းက စော်ဝရွာဆီ လှော်ပြီးထွက်တော့ ဝေလီဝေလင်း အရုဏ်တက်စ ပြုနေပါပြီ။

.................................................................................................................................

သူပုန် ကျောင်းသားတဦးရဲ့ မာရသွန်ခရီး ၂
ထက်အောင်ကျော်
Thursday, 25 August 2011 19:29
အောက်မေ့ဖွယ်။ ဧရာဝတီမဂဇင်း။

ကံဆိုးချင်းတော့ မြစ်လယ်တည့်တည့်မှာ စစ်သင်္ဘောကြီးတစီး ရပ်ထားတာကို တွေ့လိုက်ရပါတယ်။



“ဘုရားရေ။ သွားပြီထင်တယ်။ ဒီတခါတော့ ဆန္ဒပြပွဲအတွင်းမသေဘဲ ရေလယ်မှာ ပစ်သတ်ခံရတော့မယ်ထင်ပါတယ်” လို့ စိတ်ထဲက အတော်စိုးရိမ်ပြီး ဘုရားတလိုက်မိပါတယ်။ ဒါပေမယ့် ကံကောင်းတယ်လို့ ပြောရမလား၊ တမင် သိရက်နဲ့ လွှတ်ပေး လိုက်တာလားတော့ မပြောတတ်၊ အဲဒီသင်္ဘောကြီးက တချက်မှမလှုပ်ဘူး။ ဆလိုက်မီးနဲ့ ထိုးပြီး သတိပေးတာမျိုးလည်းမရှိဘူး။

မင်းသမီး စခန်းမှ ဆေးတပ်ဖွဲ့ (ဓာတ်ပုံ -စာရေးသူရဲ့ Facebook)

ရင်တမမနဲ့စီးလာရတဲ့ လှေခရီးဟာ မနက် ၅ နာရီခွဲလောက်မှာတော့ စော်ဝရွာကို ဆိုက်ပါတယ်။ အဲဒီမှာ သေနတ်ကိုင်ထားတဲ့ ဗကပ ဆိုတာကို ကျနော့်ဘဝမှာ ပထမဆုံးအကြိမ်မြင်ဖူးပြီး ထားဝယ်က ကျောင်းသားတချို့လည်း သူတို့နဲ့အတူ ရှိနေတာကို အံ့သြစွာတွေ့လိုက်ရပါတယ်။ လက်နက်ကိုင် တော်လှန်ရေးအတွက် စိတ်ကူးယဉ်နေတဲ့ (တကယ်ကတော့ အဲဒီအချိန်အထိ လက်နက်ကိုင် တော်လှန်ရေးဆိုတဲ့ လှပတဲ့ စကားလုံးမျိုး အတိအကျမသုံးတတ်သေးပါ) ကျနော်ဟာ ဗကပ - ရဲဘော် ၃ ဦး ကိုင်ထားတဲ့ လက်နက်တွေကို အသေအချာကြည့်မိပါတယ်။ အဲဒီတုန်းက ဂျီသရီး လောက်ကိုသာ အဝေးကနေ မြင်ဖူးသေးတဲ့ အတွက် သူတို့ကိုင်ထားတဲ့ လက်နက်ကို ဘာအမျိုးအစားမှန်း ကျနော်မခေါ်တတ်ပါဘူး။ KNU နယ်ထဲ ရောက်ဖူးတဲ့ ကျနော့်ဘေးက ကျောင်းသားတဦး ပြောတာကတော့ နေ၀င်း စတင်းကတလက်။ AK 47-ခေါက်ဒင်က တလက်နဲ့ M 79 လောင်ချာက တလက်ဖြစ်တယ် ဆိုတာကို သိခဲ့ရပါတယ်။

တကယ်တမ်း ပြန်စဉ်းစားမယ်ဆိုရင်တော့ ကျနော်တို့ သက်စွန့်ဆံဖျား သွားခဲ့တဲ့ အဲဒီ တညတာ လမ်းကြောင်းဟာ ဘေးကနေ ကြည့်နေသူအတွက် ရယ်ချင်စရာ ဖြစ်နေနိုင်ပါတယ်။ ဘာကြောင့်လဲ ဆိုတော့ အခု ကျနော်တို့ ရောက်နေတဲ့ စော်ဝရွာနဲ့ ထားဝယ်မြို့ဟာ ၅ မိုင်လောက်ပဲ ကွာပြီး စက်ဘီးနဲ့ လာမယ်ဆိုရင် နာရီဝက်အတွင်းရောက်နိုင်တဲ့ နေရာဖြစ်နေလို့ပါ။

ဒါပေမယ့် ကိုယ်သွားရမယ့် လမ်းကြောင်းကို ကြိုမသိတာရော၊ စစ်တပ်က ဂိတ်တွေကို ပိတ်ထားတာရော အခြေနေ တွေကြောင့် ၅ မိုင်ခရီးကို သက်တောင့်သက်သာ စက်ဘီးလေး၊ ဆိုင်ကယ်လေးနဲ့ မသွားနိုင်ဘဲ ထားဝယ်မြစ်ကိုဖြတ်ပြီး ၃၊ ၄ မိုင်ဝေးတဲ့ အနောက်ဘက်က ကျနော်တို့ရွာဆီ လှေတတန်၊ မြင်းလှည်းတတန်နဲ့ အရင်လာ၊ အဲဒီကနေ ၁ဝ မိုင်ခရီးကို ညကြီးမင်းကြီး လမ်းပြန်လျှောက်၊ တမိုင်ကျော်လောက် ကျယ်မယ့် ပင်လယ်ဝကို လက်လှော်လှေတွေနဲ့ ဖြတ်ပြီးမှ ဒီရွာလေးကို ခဲရာခဲဆစ် လာခဲ့ရတာကိုက ဒီခရီးစဉ်ဟာ စနစ်တကျ ပြင်ဆင်ထားတာမဟုတ်ဘဲ အရေးပေါ် သင့်သလို သွားခဲ့ရတယ်ဆိုတာ ထင်ရှားနေပါတယ်။

တကယ်ကတော့ ဒီရွာကိုရောက်တာနဲ့ ဗကပ ထိမ်းချုပ်နယ်ထဲ ရောက်ပြီလို့ မဆိုနိုင်သေးပါဘူး။ စစ်တပ် တပ်စုတစု အခြေစိုက်တဲ့ ရှင်မုတ္တီးကျေးရွာနဲ့ ရဲစခန်းတခု အခြေစိုက်စိုက်တဲ့ ပေါက်တိုင်းတံတား ကြားမှာ စော်ဝရွာက ရှိနေတဲ့အတွက် လုံခြုံရေးအရ ဘယ်လိုမှစိတ်မချရပါဘူး။ ဒါကြောင့် စော်ဝရွာကနေ ထွက်ပြီး ထားဝယ် - သရက်ချောင်း ကားလမ်းမကို ဖြတ်ဖို့ ပြင်ရပါတယ်။ တညလုံး အသံတိတ်စွာနဲ့ လျှို့ဝှက်သဲဖို ခရီးကို ဖြတ်လာခဲ့တဲ့ ကျောင်းသားတွေဟာ ဒီမနက်မှာကျတော့ မနေ့ကလို အသံမတိတ်တော့။ ထားဝယ်မြို့ပေါ်ကနေ စော်ဝဆီ ဒီမနက်ရောက်လာသူတွေနဲ့ သတင်းမေးရင်း၊ ဟိုပြောဒီပြော လုပ်ရင်းနဲ့ အသံတွေက နည်းနည်းဆူညံနေလို့ မနည်း ထိမ်းချုပ်ခိုင်းရပြီး မနက် ၈ နာရီ လောက်ကျမှ ကားလမ်းမကိုဖြတ် နိုင်ခဲ့ပါတယ်။

ကျောင်းသားတွေ ကားလမ်း ဖြတ်ကူးပုံကလဲ ကြည့်ပါဦး။ ဗကပ စစ်သားတွေရဲ့ အကြံပေးချက်အရ ၃ ယောက် တစုလောက် ခွဲပြီး ကားလမ်းကိုဖြတ်ပြေး၊ ပြီးတော့ ကားလမ်းရဲ့ ဟိုမှာဘက်က ယောင်းမော်ရွာထဲကိုဝင်ကြတာ။

အားလုံး စနစ်တကျနဲ့ လျှို့ဝှက်တဲ့ စစ်ကြောင်းတခုလို ပြင်ဆင်ထားပေမယ့် တကယ်ကတော့ အဲဒီလို ကျနော်တို့ ပြေးနေတာကို လမ်းဘေးကနေ ထိုင်ကြည့်နေတဲ့ ရွာသားတွေက အများကြီးပါ။ မနက် ၈ နာရီဆိုတော့ ရှင်မုတ္တီး ဈေးက ဖွင့်နေပြီ ဖြစ်တဲ့အပြင် စော်ဝနဲ့ ထားဝယ်ကြား ဆိုင်ကယ်နဲ့ အသွားအပြန် လုပ်နေတဲ့ ကျောင်းသားတွေကို အားလုံးက ရိပ်မိတဲ့ အတွက် အခုလို လာကြည့်နေတာ ဖြစ်ပုံရပါတယ်။

ဒါပေမယ့် ဘာပဲဖြစ်ဖြစ် ကံကောင်းတာကတော့ ရှင်မုတ္တီးက စစ်တပ်ရော၊ ပေါက်တိုင်း တံတားဂိတ်က ရဲ တွေရော၊ နောက်တခါ အဲဒီ ရဲစခန်းရှေ့ ညောင်ဇင်ရွာက စစ်တပ်တွေပါ နည်းနည်းမှ လှုပ်ရှားတာ မတွေ့ရပါဘူး။ ဒါဟာ ကျနော်တို့ အစီအစဉ်တွေ သိပ်လျှို့ဝှက် သေသပ်လွန်းလို့ စစ်တပ်က မသိတာမျိုးတော့ မဖြစ်နိုင်ပါဘူး။ အခြေနေအရ လွတ်ပေး ထားလိုက်တာ၊ ဒါမှမဟုတ် အမိန့်မရလို့ စခန်းထဲကနေ မထွက်တာမျိုး ဖြစ်ဖို့များတယ်လို့ တွက်ဆမိပါတယ်။

လျှို့ဝှက်သိပ်သည်းမှု ရှိလှတဲ့ ကျနော်တို့ ကျောင်းသားစစ်ကြောင်း အကြောင်းကို ရှင်မုတ္တီးတဈေးလုံးနဲ့ လမ်းသွားလမ်းလာ အားလုံး သိသွားပြီး ကျနော်တို့အတွက် ထမင်းထုပ်တွေ လာပို့ကြပါတယ်။ နောက်တခါ စော်ဝ - ထားဝယ် အသွားအပြန် လုပ်နေတဲ့ ဆိုင်ကယ်စီးသူတွေရဲ့ ကောင်းမှုကြောင့် အထက ကျောင်းသားတွေ အများစုပါတဲ့ နောက်ထပ် ကျောင်းသား ၄၀၊ ၅၀ လောက် ထားဝယ်ကနေ ထွက်ပြီး ကျနော် တို့ဆီ ထပ်ရောက်လာပြန်ပါတယ်။ အဲဒီညက ကျနော်တို့ စခန်းချဖြစ်တဲ့ ယောင်းမော်ရွာမှာ ကျောင်းသားအင်အား ၁ဝဝ လောက်ဟာ ရွာလယ်မှာ တရုန်းရုန်းဖြစ်နေပြီး အိမ်တိုင်းက ထမင်းဖိတ်ကြွေး ကြ၊ သူ့အိမ်မှာတည်းပါ၊ ငါ့အိမ်မှာတည်းပါဆိုပြီး ဖိတ်ခေါ်ကြနဲ့ အဲဒီညဟာ အရင်ညလို မျိုး ပင်ပန်းမှု မဖြစ်ခဲ့ပါဘူး။

နောက်တနေ့ မနက်စောစောမှာတော့ ကျနော်တို့ ညအိပ်တဲ့ ယောင်းမော်ရွာရဲ့ရှေ့က ကင်းရှေ့ဆိုတဲ့ရွာရဲ့ မူလတန်း ကျောင်းမှာ လူစုပြီး တော်လှန်ရေး ခရီးရှည်အကြောင်း ဟောပြော၊ တောတွင်းခရီးကို စတင်ဖို့ ပြင်ပါတယ်။

“တောလမ်းခရီးက ကြမ်းမယ်။ ၃၊ ၄ ရက်သွားမှ KNU နယ်မြေဆီ ရောက်မယ်၊ အဲဒီကမှ ထိုင်းနယ်စပ်ကို နောက်ထပ် ၃၊ ၄ ရက် ထပ်သွားရမယ်၊ ခရီးကြမ်းမယ်၊ ထမင်း ငတ်နိုင်တယ်၊ ငှက်ဖျားမိမယ်၊ တိုက်ပွဲနဲ့လည်း တိုးနိုင်တယ်။ ဒါကြောင့် အသေအချာ စဉ်းစားဆုံးဖြတ်ကြပါ ဆိုပြီး ဗကပ အရာရှိ တဦးက ပြောပါတယ်။ အဲဒီနောက် ကျနော်တို့လည်း ဒီတိုင်း ဆိုရင်တော့ မိန်းကလေးတွေ လိုက်လို့မဖြစ်ဘူးထင်တယ်၊ မိန်းကလေးအားလုံး ဒီမှာပဲနေခဲ့တော့၊ ကျန်တဲ့လူတွေ ခရီးဆက်မယ် ဆိုပြီး စီစဉ်ပါတယ်။

အဲဒီမှာ မိန်းကလေးတွေကို တောထဲခေါ်သင့်၊ မသင့်နဲ့ ပတ်သက်ပြီး သဘောထားကွဲမှု စတာပါပဲ။

ကျောင်းသားတွေရဲ့ ထုံးစံအတိုင်း တယောက်တမျိုးစီ ပြောပြီးတဲ့နောက် ကျောင်းသူ ၁၀ ယောက်ကျော်နဲ့ အဲဒီကျောင်းသူ တွေနဲ့ မခွဲနိုင်တဲ့ ကျောင်းသား ၂ဝ လောက်ဟာ အဲဒီရွာမှာကျန်နေခဲ့ပါ တော့တယ်။

“ဖွန်ကြောင်တဲ့ကောင်တွေ နေခဲ့ကွာ။ အသက်စွန့် တော်လှန်ရေး လုပ်ပါမယ်ဆိုမှ ဖွန်ကြောင်တဲ့ကောင်က ရှိသေး” ဆိုပြီး လှောင်တဲ့ သူကလှောင်၊ ကျန်တဲ့လူက ကျန် ဖြစ်ခဲ့ပါတယ်။

“ကျမတို့လည်း တော်လှန်ရေး လုပ်ခွင့်ရှိတာပဲ။ အမျိုးသမီးဖြစ်လို့ တောထဲလိုက်ခွင့် မပြုဘူးဆိုတာကတော့ တရားမျှတမှု မရှိဘူး” ဆိုပြီး ကျောင်းသူတဦးက ဆွေးနွေးပွဲအတွင်း ပြောခဲ့တာကိုလည်း ကျနော် မှတ်မိနေဆဲဖြစ်ပါတယ်။



နောက်ပိုင်း ကျနော်တို့ မင်းသမီးစခန်းရောက်ပြီး ကံပေါက်နဲ့ ပုလောဘက်က လာတဲ့ ကျောင်းသူ ၁၀ ဦးကျော်ကိုတွေ့တော့ မှပဲ အမျိုးသမီးတွေကို မခေါ်ဘဲ ချန်ထားခဲ့တာ မှားပြီလို့ တွေးမိကြပါတယ်။

တကယ်ကတော့ ဒီလိုကျန်ခဲ့သူတွေထဲမှာ အားလုံးဖွန်ကြောင်ပြီး ကျန်နေသူတွေတော့ မဟုတ်ပါဘူး။

ကျနော်တို့ ရွာကဆို ၃ ဦးပါလာပေမယ့် တဦးက သူ့မိသားစု ကိစ္စရှိသေးတယ်။ ကျနော်နဲ့အတူ ချက်ချင်း လိုက်လို့ မဖြစ်သေးဘူး ဆိုပြီး ဒီရွာမှာ ကျန်နေခဲ့ပါတယ်။ အလားတူ တခြားကိစ္စတွေနဲ့ ချန်နေခဲ့သူတွေလည်း ရှိနိုင်ပါတယ်။

ဘယ်လိုပဲဖြစ်ဖြစ် နောက်ဆုံးမှာတော့ ခိုင်ထူးရဲ့သီချင်း “တွေဝေလမ်းခွဲ” ဆိုပြီး သူတို့ကို ထားရစ်ခဲ့လို့ ကျနော်အပါဝင် ကျန်တဲ့လူ ၅ဝ ကျော်ကတော့ ဗကပ လမ်းပြနဲ့အတူ တောတွင်းခရီး ကြမ်းကိုစတင်ခဲ့ပါပြီ။

အဲဒီမှာ တောတွင်းခရီး စပြီ၊ တောခိုပြီဆိုပေမယ် ကျနော်တို့ လက်ထဲမှာ ဘာတွေပါလာသလဲ ဆိုတာကိုလည်း ကြည့်ပါဦး။ ကျနော်ဆိုရင် ရွာမှာ ညစဉ်ကင်းစောင့်ရင်း အဆင်သင့်ပြင်ထားတဲ့ လွယ်အိတ်တလုံး၊ အဲဒီထဲမှာ စောင်ပါးပါးလေး တထည်နဲ့ လောက်လေးခွတခု၊ ကိုယ်ပေါ်မှာတော့ စက်ဘီးစီး အင်္ကျီတထည်။ အဲဒီပေါ်မှာ ဂျင်းဂျက်ကင်တထည်၊ အောက်မှာက ပလေကပ် လုံချည်၊ ဖိနပ်က မြမာလာ ကတ္တီပါဖိနပ်။ ကျန်တဲ့သူတွေလည်း ဒီလိုပါပဲ။ အ၀တ်တထည် ကိုယ်တခုနဲ့ ထွက်လာသူတွေချည်း ဖြစ်ပြီး ကျောပိုးအိတ်နဲ့ စနစ်တကျ ပြင်လာသူကို ကျနော်မတွေ့မိဘူး။

တောတွင်းခရီး ဆိုပေမယ့် တကယ့်တောထဲကို ရောက်သေးတာမဟုတ်ဘဲ ဗကပ သြဇာလွှမ်းတဲ့ တောရွာတွေကို ဖြတ်သွားရတဲ့ ခရီးသာ ဖြစ်ပါတယ်။ ထားဝယ်မြို့ကနေ ၇ မိုင် ၈ မိုင် သာဝေးတဲ့ ဒီဒေသမှာ တောရွာတွေ ဒီလိုရှိနေမှန်း၊ ဗကပ လက်နက်ကိုင်တွေက ဒီရွာတွေကို ထိမ်းချုပ်ထားမှန်း ကျနော် လုံးဝ ကြိုမသိခဲ့ပါဘူး။ တောရွာတွေ ဆိုတဲ့အတိုင်း ကားလမ်းက မရှိတော့ လှည်းလမ်းနဲ့ လူသွားလမ်းတွေ အတိုင်း ကျနော်တို့ ကျောင်းသားစစ်ကြောင်းကြီး လျှောက်လာခဲ့ပါတယ်။

တောင်အဆင်းအတက် မရှိသေးဘူး ဆိုပေမယ့် ချောင်းတချို့ကိုဖြတ်ရတာ၊ မိုးက တဖွဲဖွဲ ရွာနေတာကြောင့် အ၀တ်အစား တွေက ရေစိုတဲ့အပြင် မြမာလာဖိနပ်ကြောင့် မိုးရေထဲမှာ ချော်လဲတာ၊ ဖိနပ်ကြိုပြတ်တာတွေ စဖြစ်ခဲ့ပါတယ်။

ဗကပ ဒေသမှာ ကျနော် မှတ်မှတ်ရရဖြစ်ခဲ့တဲ့ နောက်တချက်ကတော့ ရွာသားတွေဟာ ဆင်းရဲကြပြီး ထားဝယ်မြို့နဲ့ မြို့ဝန်းကျင်က ရွာတွေလို စားသောက်ရေး အဆင်မပြေတာပါ။ ဗကပ ထားဝယ်ခရိုင် ရုံးစိုက်တဲ့ မကဲ ကျေးရွာကိုမရောက်မီ တောင်ဇင်းရွာမှာ ကျနော်တို့ ညအိပ်ပြီး နောက်တနေ့ မနက်စာ ကြွေးတော့ နွားနို့ရယ်၊ ထားဝယ်ငါးပိထောင်းနဲ့ ထမင်းပန်းကန် ရယ်ပဲ တွေ့ရလို့ ဘယ်လိုစားရမှန်း မသိခဲ့ပါဘူး။ နောက်တခါ ညနေစာကို ၄ နာရီလောက်မှာ ကျွေးပြီး ညစာ မကျွေးတော့ပါဘူး။ ဒါဟာ ဒီဒေသက ရွာတွေရဲ့ ထုံးစံမှန်း နောက်မှသိရပြီး ကရင်ရွာတွေနဲ့ တောတွင်းကာလ ၁ဝ နှစ်ကျော် လုံးလုံးမှာလည်း တနေ့ ထမင်း ၂ နပ်နဲ့ပဲ တင်းတိမ်ခဲ့ရပါတယ်။

တခြားဒေသတွေမှာ တနေ့ ထမင်းဘယ်နှခါ စားသလဲ ကျနော်အသေအချာ မသိပေမယ့် ကျနော်တို့ ရွာတွေမှာတော့ တနေ့ ထမင်း ၃ ခါ စားကျင့် ရှိခဲ့ပါတယ်။ မနက် လယ်ထဲမဆင်းခင် ထမင်းကြမ်းစား၊ နေ့လယ် ၁၁ နာရီမှာ နေ့လယ်စာနဲ့ ညနေ ၆ နာရီမှာ ညစာစားပါတယ်။ နောက် ထမင်းစားပွဲပေါ်မှာ ထားဝယ်ငါးပိ ထောင်းဘူး အမြဲတမ်း ရှိနေပြီး အဲဒါကို ဒီတိုင်းစားမလား၊ သံပုရာသီး ညှစ်ပြီး ဒါမှမဟုတ် ပအုန်းရည်နဲ့ ငါးပိဖျော်လုပ်မလား၊ ငါးပိဖုတ်ပြီး ဆီးဆမ်း၊ ကြက်သွန်နီနဲ့ စားမလား။ စသဖြင့် စားလေ့ရှိပါတယ်။ နောက်နေ့ နေ့လယ်စာနဲ့ ညစာမှာ ငါးပိတမျိုးမျိုးနဲ့ တို့စရာအပြင် ဟင်းချိုတမျိုး၊ အသားဟင်းတမျိုး။ ဒါမှမဟုတ် ငါးဟင်းတော့ ပါကြပါတယ်။ ဒါပေမယ့် အခု ကျနော်ပြောနေတဲ့ ဗကပ ရွာတွေမှာတော့ ငါးပိနဲ့ တို့စရာကိုသာ ပြင်ပေးထားတဲ့အတွက် တခုခု ထပ်ပြင်နေဆဲထင်ပြီး ၃ မိနစ်လောက် ထမင်းမစားသေးဘဲ ကျနော်တို့ထိုင်စောင့် နေပါတယ်။ နောက်ပိုင်းမှ သဘောပေါက်ပြီး ပြုံးခဲ့ရတာတွေကို အခုထိ သတိရနေဆဲပါ။

ဒါပေမဲ့ တောခိုရင် ငတ်မယ်ပြတ်မယ်လို့ ပြောထားတဲ့အတွက် ဒီလိုစားရတာကိုတောင် ကျေးဇူးတင်ရမှာပါ။ ဒီလိုနဲ့ ဟင်းမပါတဲ့ ထမင်းကိုစားပြီး ခရီးဆက်၊ တောစပ်ကိုကျော်၊ ရွာတွေကိုဖြတ်၊ ချောင်းတွေကိုကူးပြီး မွန်းလွဲပိုင်းမှာတော့ ဗကပ ထားဝယ်ခရိုင် ရုံးစိုက်တဲ့ မကဲ ကျေးရွာကို ရောက်ပါတယ်။ အဲဒီမှာ ပစ္စည်းမဲ့ အလံတော် တူ - တံစဉ် ဆိုတာတွေကို စ တွေ့ရပါတော့တယ်။

.................................................................................................

သူပုန်ကျောင်းသားတဦးရဲ့ မာရသွန်ခရီး ၃
ထက်အောင်ကျော်

Friday, 09 September 2011 17:07
အောက်မေ့ဖွယ်။ ဧရာဝတီမဂဇင်း။

ကျနော်တို့ကို ခရိုင် နိုင်ငံရေးမှူးရဲဘော် တင်ရှိန်၊ ခရိုင်တပ်မှူး ရဲဘော်တင်ထွန်း ဆိုတဲ့ ညီအစ်ကို နှစ်ဦး ဦးဆောင်တဲ့ အဖွဲ့က ကြိုဆို စကားပြောခဲ့ ပါတယ် (ဗကပ – တင်္သာရီတိုင်း ဟာ နောက်ပိုင်းမှာ မြိတ်-ထားဝယ် ညီညွတ်ရေး တပ်ဦး အဖြစ် အသွင် ပြောင်းလိုက်ပြီး ရဲဘော်တင်ထွန်းက တိုက်ပွဲမှာကျဆုံးသွားခဲ့ပါတယ်) အဲဒီတုန်းကတော့ သူတို့ပြောတဲ့ အထဲမှာ သူတို့ပါတီရဲ့ ကြိုးပမ်းဆောင်ရွက်မှုတွေ၊ ထားဝယ်လူထုရဲ့ ထောက်ခံမှုအခြေနေတွေ၊ လက်နက်ကိုင် လှုပ်ရှားမှု အခြေအနေ အတော်လေး စုံစုံလင်လင် ပါဝင်ပါတယ်။ အဲဒီထဲက အရေးကြီးဆုံးအချက် တခုကတော့ KNU နယ်မြေဆီမသွားဘဲ သူတို့ နယ်မြေမှာ အခြေစိုက်ပြီး ကျောင်းသားလှုပ်ရှားမှု လုပ်လည်းရပါတယ်၊ သူတို့မှာလည်း လက်နက်တွေရှိပါတယ် ဆိုတဲ့ အချက်အဖြစ် ကျနော် မှတ်မိနေပါတယ်။


ကျောင်းသားရဲဘော်သစ်များ ဝါးရင်းတုတ်ဖြင့် စစ်ရေးလေ့ကျင့်စဉ် (ဓါတ်ပုံ- စာရေးသူရဲ့ Face Book)


ဒါပေမယ့် ကျနော်တို့က အဲဒါကိုလက်မခံဘဲ KNU နယ်မြေကိုဖြတ်ပြီး ထိုင်းနယ်စပ်ကို အမြန်ဆုံး အရောက်သွားမှဖြစ်မယ်၊ အဲဒီမှာ ကျောင်းသားအားလုံးဆုံပြီး ကျောင်းသားတပ်ဖွဲ့မယ်၊ ဒါ ကြောင့် KNU နယ်မြေကိုသာ အမြန်ဆုံးပို့ပေးပါ ဆိုပြီး တောင်းဆိုခဲ့ပါတယ်။ နောက်တနေ့မနက် မှာတော့ မကဲ - ကျောက်အိုင်ကနေ KNU နယ်မြေဆီ ခရီးဆက်ဖို့ ကျနော်တို့ ပြင်ပါတယ်။ တချိန်တည်းမှာပဲ ကိုတင်လေးနဲ့ ရန်ကုန်ကနေရောက်နေတဲ့ ဗကသ က ဆလိုင်းကိုကိုဦးတို့ အဖွဲ့ကလည်း ကျနော်တို့နဲ့ အတူသွားနေရင် မဲဆောက်နဲ့ သီဘောဘိုးဆီ အချိန်မီ မရောက်မှာစိုးတဲ့အတွက် ရနောင်းကို အမြန်ဆုံး ဆင်းပြီး အဲဒီက တဆင့် မဲဆောက်ဘက် အမြန်သွားနိုင်ဖို့ ပြင်ဆင်နေပါတယ်။

မနက် ၇ နာရီ ကျော်ကျော်လောက်မှာတော့ ကိုတင်လေးနဲ့ ကိုကျော်အောင်၊ ကိုအောင်မိုးမြတ် (သူတို့ ၂ ဦးဟာလည်း နောက်ပိုင်း မင်းသမီး ဒေသမှာ အသတ်ခံရသလိုလိုနဲ့ ကိုတင်လေးနဲ့အတူ ပျောက်ဆုံးသွားပါတယ်) အတိုး အပါအ၀င် ထားဝယ် ကျောင်းသား ကိုယ်စားလှယ်အဖွဲ့။ ကိုကိုဦး၊ မင်းသူ၊ ကျော်ဇော၊ ထွန်းလင်းနဲ့ တခြားတဦးအပါဝင် ဗကသ-ရန်ကုန် ကိုယ်စားလှယ် အဖွဲ့နဲ့ ထားဝယ်ဆန္ဒပြပွဲကို သတင်းယူနေတဲ့ ထိုင်း TV ချယ်နယ် တခုက မောင်မောင်လို့ ခေါ်တဲ့ ထိုင်းသတင်းထောက် တဦးအပါအ၀င် လူတဒါဇင်လောက်ဟာ ရနောင်းသွားရေးအတွက် မကဲ - ကျောက်အိုင်ကနေ သရက်ချောင်းဘက် ထွက်သွားပါတယ်။ ကျနော်တို့အုပ်စုလည်း မကဲ ချောင်းကို ဖြတ်ပြီး KNU နယ်မြေဆီသွားဖို့ ထွက်လာခဲ့ပါတယ်။

မှတ်မှတ်ရရ ကျနော်တို့စစ်ကြောင်းရဲ့ လူဦးရေက ၃၉ ဦး တိတိ။ ဒီနေ့ခရီးကတော့ တကယ့်ကို တောတွင်း ခရီးစဉ်ပါပဲ။ အရင်လို ထားဝယ်ရွာတွေကို မတွေ့ရတော့ဘဲ ကရင်ရွာလေးတွေ၊ တဲအ်ိမ်လေးတွေ ဟိုတစု ဒီတစုကိုသာ တွေ့ရပြီး ကျနော်တို့ကို ထမင်း ထုပ်ပေးမယ့်လူ၊ ထမင်းဖိတ်ကျွေးမယ့် လူလည်းမရှိတော့ပါဘူး။ လမ်းဆိုလို့ မယ်မယ်ရရမရှိဘဲ ရှေ့ကလမ်းပြ ဗကပ ရဲဘော်သွားတဲ့အတိုင်း ကျနော်တို့ တန်းစီပြီး နောက်ကလိုက်၊ ရေချောင်းဖြတ်တဲ့ အခါမှာတော့ သူချပေးတဲ့ ကြိုးတန်းကို ကိုင်ပြီး ကူးကြ၊ မြမာလာဖိနပ်စီးတဲ့ ကိုရွှေကျောင်းတော်သားတွေ ခမျာမှာလည်း ညည်းသူညည်း၊ “အမေရေ အမေ့သား အဖြစ်ကို ကြည့်လှည့်ပါဦး” လို့ အော်သူအော်၊ ပုဆိုးကို ကွင်းသိုင်းသူသိုင်း၊ မြမာလာကို လွှင့်ပစ်ပြီး ဖိနပ် မပါဘဲ လျှောက်သူ လျှောက်နဲ့ ညနေ ၄ နာရီ ကျော်လောက်မှာတော့ တောင်သုံးဆယ် အတက် စမ်းချောင်းလေး ဘေးက တောအုပ်လေး ထဲမှာ ကျနော်တို့ စစ်ကြောင်း စခန်းချ ညအိပ်ဖို့ ပြင်ပါတယ်။

အချိန်က စောနေသေးတယ် ဆိုပေမယ့် တောထူပြီး နေရောင် ကောင်းကောင်း မရတဲ့အတွက် လမ်းဆက်လျှောက်လို့ မရတော့ ပါဘူး။ အဲဒီညဟာ ကျနော်တို့အတွက် ပထမဆုံးအကြိမ် ကိုယ့်ထမင်းကိုယ်ချက်၊ ကိုယ်စားဖို့ငါးကို ချောင်းထဲမှာ ကိုယ့်ဟာကိုယ် ဖမ်း၊ နီးတဲ့ သစ်ရွက်ကိုခူးပြီး ဟင်းချိုချက်တဲ့အိုးထဲထည့်တဲ့ အမှတ်တရည ဖြစ်တဲ့အပြင် အိုးအိမ်မဲ့ ဘဝနဲ့ ကျောက်တုံးတွေ၊ မြေကြီးတွေပေါ်မှာ သစ်ရွက်တွေခင်းပြီး အိပ်ရတဲ့ ပထမဆုံး ညလည်းဖြစ်ပါတယ်။

ကျနော်တို့ထဲမှာ ပါလာတဲ့ လူ ၄ဝ ကျော်ထဲက အများစုဟာ ကျနော့်လိုပဲ ကျောင်းသားတွေ ဖြစ်တဲ့အတွက် ထမင်း မချက်ဖူး ကြတဲ့ အပြင် အခုလို မီးဖိုမရှိတဲ့ တောထဲမှာ ဘယ်ကစပြီး မီးမွှေးရမှန်းတောင် မသိဖြစ်နေကြပါတယ်။ ဒါပေမယ့် လုံခြုံရေး လိုက်ပေးတဲ့ ဗကပ ရဲဘော် ၂ ဦးက တောတွင်း ထမင်းချက်နည်းကို ပြပေးပြီး ကျောင်းသားမဟုတ်တဲ့ ရွာသား ၅ ဦးလောက်က ဦးဆောင်စီမံပေးခဲ့တဲ့ အပြင် ချောင်းထဲက ငါးပါဖမ်းပြီး ဟင်းချက်ပေးတဲ့အတွက် အတော်အဆင်ပြေ ခဲ့ပါတယ်။

ဒါပေမယ့် တချို့ ကျောင်းသားတွေကတော့ ခရီးပမ်းပြီး သစ်ပင်ခြေရင်းမှာ တုံးလုံးလှဲ အိပ်ပျော်ကုန်တဲ့အတွက် အဲဒီလောက်ကောင်းတဲ့ ပထမဆုံး တောတွင်း ညစာကိုတောင် မစားလိုက်ရရှာပါဘူး။


ပင်ပန်းလွန်းလို့သာ အိပ်ပျော်သွားကြပေမယ့် အိပ်ဖို့ အခင်းအကျင်းက ဘာမှမရှိပါဘူး။ ကျောက်တုံးတွေ ပေါ်မှာ ရသမျှ သစ်ရွက်တွေကို ခင်းအိပ်ကြရပြီး မိုးကလည်း တဖွဲဖွဲရွာ၊ ခြင်ကကိုက်၊ ကျွတ်က တွယ်ဆိုတော့ ကောင်းကောင်း အိပ်ပျော်တယ်လို့ မပြောနိုင်ပါဘူး။ ဒီကြားထဲ ကျားဟိန်းသံ လိုလို ကြားမိတဲ့အတွက် တောကောင်တွေ ထွက်လာရင်တော့ ဒုက္ခပဲလို့ ကျောင်းသားတချို့က စိုးရိမ်နေပါတယ်။ ဒါပေမယ့် ဗကပ လမ်းပြကတော့ သူရဲ့ AK သေနတ်ကိုပြပီး ဘာမှမပူနဲ့ ဟောဒီမှာ တွေ့လားလို့ အားပေးစကား ပြောပါတယ်။ ဒီလိုနဲ့ပဲ ညဟာ ဘယ်လို ကုန်သွားမှန်းမသိပါဘူး။

နောက်တနေ့ မနက်မှာတော့ ကျနော်တို့ ကျောင်းသားတွေကြား အခုအချိန်ထိ ပြောစမှတ် ကျန်နေဆဲဖြစ်တဲ့ တောင်သုံးဆယ် ကို စတက်ရပါတော့တယ်။ ကျနော့်တသက် တက်ဖူးသလောက် တောင်တွေထဲမှာ အမြင့်ဆုံးမဟုတ်ရင်တောင် အခက်ခဲဆုံး တက်ရတဲ့ တောင်တန်းကြီးတခုပါ။ ကျောင်းမှာတုန်းက တက်ဖူးတဲ့ ထားဝယ်က တောင်မိုးတောင်ဟာ အတော်မြင့်ပေမယ့် လူတွေတက်နေကျ လမ်းကြောင်းရှိတဲ့တောင်မို့ ဘာမှအခက်ခဲ မရှိပါဘူး။ ပြီးတော့ ကျောင်းမှာတုန်းက တောင်တက်တယ် ဆိုတာက ဝတ်စုံတွေ၊ ဖိနပ်တွေ အသေအချာနဲ့ နွေရာသီမှာ အပျော်တမ်းတက်တာမျိုးပါ။ ဒါပေမယ့် အခု ကျနော် တက်နေရတဲ့ တောင်ကတော့ အဲဒီလိုမျိုး ကိုယ်ကရွေးချယ်ပြီး နွေရာသီမှာ အပျော်တက်နေရတာ မဟုတ်ပါဘူး။ မိုးတွေက ရွာ၊ လမ်းကလည်းမရှိ၊ တချို့နေရာဆို လက်ဆွဲစရာ သစ်ပင်လည်းမရှိ၊ တချို့ကျောင်းသားတွေဆို ဆွဲမိဆွဲရာကို ကိုင်ရင်းနဲ့ လက်ဖ၀ါးတွေ ကွဲရှ၊ သွေးတွေထွက် ဖြစ်နေတာပါ။ ဒီလိုနဲ့ ရွံ့အနီရောင်တွေနဲ့ ချောနေတဲ့ တောင်နံရံကြီးကို ဒီအတိုင်း တွယ်တက် နေရတဲ့အလုပ်က ကျနော်တို့အဖို့တော့ တကယ့်ကို စွန့်စားခန်းကြီးပါ။

“အမေရေကယ်ပါဦး” ဆိုပြီး ကျောင်းသားတွေ ထုံးစံအတိုင်း အမျိုးမျိုး အော်ဟစ်ပြောဆိုနေတဲ့ ကြားထဲ ထူးထူးခြားခြား ထွက်လာတဲ့ အသံတခုကတော့ “ကျနော်တော့ ဒီတောင်ကို မကျော်နိုင်တော့ဘူး။ ကျနော့်ကို ပစ်သတ်ပြီး ထားချင်လည်း ထားခဲ့တော့၊ ကျနော် ဆက်မတက် နိုင်တော့ဘူး၊ တော်လှန်ရေး မလုပ်ရရင်လည်း နေပါစေတော့” ဆိုပြီး ငိုသံနဲ့ အော်ပြောလိုက်တဲ့ ထားဝယ်ကောလိပ်က စိုးအောင်ခင် (နောက်ပိုင်း မင်းသမီးဒေသမှာ အသတ်ခံရသလိုလိုနဲ့ ရှေ့နေ ဦးမြင့်သိန်းနဲ့အတူ ပျောက်ဆုံးသွားသူ) ရဲ့ အသံဖြစ်ပါတယ်။ ပုံမှန်အားဖြင့် ဆိုရင်တော့ ဒီအော်သံမျိုးကြားရင် ၀ိုင်းဟားကြမှာ ဖြစ်ပေမယ့် အခုတော့ တဦးမှ မဟားနိုင် ကြပါဘူး။ အားလုံးဟာ သူ့လို့ပဲ အော်ငိုချင်တဲ့ လူချည်းဖြစ်နေပုံ ရပါတယ်။ နောက်ဆုံးမှာတော့ ကိုယ့်အချင်းချင်းကလည်း ကူမတွဲနိုင်တဲ့အတွက် ဗကပ ရဲဘော်ကိုပဲ ကူပြီးတွဲခိုင်းလိုက်ရပါတယ်။

တကယ်တမ်း ပြောမယ်ဆိုရင်တော့ ဒီတောင်တက်တဲ့ အရေးဟာ ကျနော်တို့ကျောင်းသားတွေ အဖို့ သေခန်းရှင်ခန်း စွန့်စားမှုကြီးဖြစ်နေပေမယ့် ဗကပ ရဲဘော်အတွက်ကတော့ နေ့စဉ် လုပ်နေကြ ထမင်းစား၊ ရေသောက်တဲ့ အလုပ်ထက် ပိုခက်ပုံ မပေါ်ပါဘူး။ သူ့အတွက် အားလုံးက လွယ်လွယ်လေးပါ။ နောက်ပိုင်း ပြန်စဉ်းစားမိတာကတော့ ဒါတွေအားလုံးဟာ အလေ့အကျင့်နဲ့ ဆိုင်ပုံရပါတယ်။ ဘာကြောင့်လဲဆိုတော့ တောခိုကာစက အဲဒီလို ခဲရာခဲဆစ် သွားခဲ့ရတဲ့ တောင်တွေဟာ နောက်ပိုင်း ကျနော်တို့ ရှေ့တန်းပြန်ဆင်းတဲ့ အခါမှာတော့ အခု ဗကပ ရဲဘော်သွားသလိုပဲ လွယ်လွယ်လေးနဲ့ တောင်တက်၊ ခြုံတိုး လုပ်နိုင်လာခဲ့လို့ ဖြစ်ပါတယ်။

“မယ်ညား … ပါသား ...။ ယော့ထော်ကလိုး...”

“ရှေ့ကြည့် ...သတိ … သေနတ်ထမ်း … ” လို့ ကရင်ဘာသာနဲ့ အမိန့်ပေးသံ၊ သံပြိုင်အော်သံတွေ ပဲ့တင်ရိုက်နေတဲ့ နေရာကတော့ တနင်္သာရီမြစ်ရဲ့ ချောင်းလက်တက် ဘန်းချောင်း နဘေးက KNU တပ်ခွဲ ၁ စခန်း စစ်ရေးပြ လေ့ကျင့်ကွင်းက ကျနော်တို့ ကျောင်းသားတွေရဲ့ အသံတွေဖြစ်ပါတယ်။ လက်နက်ကိုင် တော်လှန်ရေးလုပ်ဖို့၊ စစ်တပ်ကို ပြန်တိုက်ဖို့ ကရင်တွေဆီမှာ သေနတ်သွားယူမယ်၊ စစ်သင်တန်း တပတ်လောက် တက်ပြီးရင် စစ်တပ်ကို ပြန်တိုက်မယ်ဆိုပြီး ထွက်လာတဲ့ ကျနော်တို့အုပ်စုဟာ ကရင်နယ်ဆီ တကယ်ရောက်လာတဲ့ အခါမှာတော့ သေနတ်အစစ်ကို မကိုင်ရဘဲ ၀ါးရင်းတုတ် သေနပ်နဲ့ စစ်သင်တန်း တက်နေရတဲ့အပေါ် အတော်စိတ်ပျက် နေမိပါတယ်။

နောက်တခါ ဗမာလိုမပြောဘဲ ကရင်ဘာသာနဲ့ အမိန့်ပေးမယ် ဆိုတဲ့အပေါ် အငြင်းပွားကြ ပြန်ပါတယ်။ နောက်ဆုံး မှာတော့ တခြားရွေးစရာ သိပ်မရှိတဲ့အတွက် သူတို့ပေးတဲ့သင်တန်းမှာ သူတို့ဘာသာနဲ့မှ ဖြစ်မယ်ဆိုပြီး လက်ခံလိုက်ရပါတယ်။ ဒါပေမယ့် ပေးတဲ့သင်တန်းက ကျနော်တို့ အရေးပေါ်လိုနေတဲ့ သေနတ်ပစ်နည်း၊ ဖြုတ်နည်း၊ ပြင်နည်း သင်တန်းမဟုတ်ဘဲ ဘယ် - ညာ နင်းတဲ့ စစ်ရေးပြ သင်တန်း ဖြစ်နေပြန်ပါတယ်။ ပိုဆိုးတာက ကရင်တွေပြတဲ့ စစ်ရေးပြထဲမှာ ရှေ့လှည့်၊ နောက်လှည့် အကွက်တွေဟာ အတော် ကိုးယိုးကားယားနိုင်ပြီး ကျနော်တို့နဲ့ လုံးဝ အဆင်မပြေပါဘူး။

ကျနော်အပါဝင် ကျောင်းသားအတော်များများက လမ်းစဉ်လူငယ်၊ ရှေ့ဆောင်လူငယ်၊ အရန်မီးသတ်၊ ကြက်ခြေနီ စသဖြင့် တက်ဖူး ပြီးသူတွေဖြစ်တဲ့တွက် အခြေခံ စစ်ရေးပြလောက်ကတော့ ကျွမ်းပြီးသားပါ။ အခု သင်တန်းပေးနေတဲ့ ကရင် တပ်ကြပ်ကြီး ယောက်ဖထက် အများကြီး သာသူချည်းပဲ ဖြစ်ပါတယ် (ယောက်ဖဆိုတဲ့ အသုံးအနှုန်းကို ထားဝယ်မှာ သိပ်မကြားဘူးပေမယ့် KNU နယ်ထဲမှာတော့ ဘာလုပ်လုပ် အဲဒီ စကားလုံးနဲ့ အရင်ဆုံး မိတ်ဆက်ရပါတယ်)

ကျနော်တို့ တတ်ထားတဲ့ စစ်ရေးပြနဲ့ KNU က သင်ပေးနေတဲ့ စစ်ရေးပြ အခြေခံအားဖြင့် သိပ်မကွာပေမယ့် အဲဒီ သေနတ် ထမ်းပြီး နောက်လှည့်တဲ့ အကွက်၊ နောက်တလှမ်းဆုတ်တဲ့ အကွက်မှာတော့ ကျနော်တို့က ခြေတလှမ်း နောက်ဆုတ်ပြီးမှ ကိုယ်ကိုလှည့်တာပါ။ KNU ကတော့ ခြေထောက် ကိုနောက်တလှမ်း မဆုတ်ဘဲ ရှေ့ခြေရဲ့ ဖနောင့်လောက် အထိပဲ ဆုတ်ပြီး ကိုယ်ကို တပတ်လှည့်တဲ့အချက်ဟာ ကျနော်တို့အတွက် တကယ် အဆင်မပြေတဲ့ အချက်ပါပဲ။

တကယ်တမ်း ပြောရရင်တော့ ဒီနေရာမှာ ဒီလို “မယ်ည ... ပါသား” အော်နေဖို့ ကျနော်တို့မှာ စိတ်ကူးမရှိပါဘူး။ KNU က လက်နက် မပေးနိုင်ရင် ထိုင်းနယ်စပ်အထိ အမြန်သွားမယ်၊ ဟိုမှာ ကျောင်းသားတပ် ဖွဲ့နေပြီ၊ အမေရိကန်နဲ့ နိုင်ငံတကာက ပေးမယ့် လက်နက်တွေယူပြီး အမြန်ဆုံးပြန်တိုက်မယ်၊ တိုက်ပွဲက အရေးကြီးတယ်၊ ဘယ်ညာ နင်းတာလောက်ကတော့ ဒီအထိ လာသင်စရာ မလိုပါဘူးဆိုပြီး ကျနော်တို့ဘက်က KNU နယ်မြေတာဝန်ခံတွေကို ထပ်ခါထပ်ခါ ရှင်းပြခဲ့ပါတယ်။ ဒါပေမယ့် KNU ကဆယ်ဒိုမြို့နယ် ဥက္ကဋ္ဌ ဖဒို ရေးမွန်ဗူး၊ တပ်ခွဲမှူး ဗိုလ်မှူး ခဲရိုနဲ့ ဒု ခွဲမှူး ဗိုလ်ကြီးဖားခလေး (အခု နော်ဝေး ရောက်နေသူ) တို့ကတော့ ဘာမှမပြောဘဲ ပြုံးနေကြပါတယ်။

ဘယ်လိုပဲ ဖြစ်ဖြစ် နောက်ဆုံးမှာတော့ ဒီအတိုင်း ထိုင်နေမယ့်အစား KNU က ပေးတဲ့ စစ်သင်တန်းကို တက်နေတာက ပိုကောင်းတယ်လို့ အားလုံးသဘောတူ ဆုံးဖြတ်ပြီး ဝါးတောထဲဝင် စိတ်ကြိုက် ဝါးလုံးတွေခုတ်၊ ဝါးရင်းတုတ်ကို အချောသတ်၊ တချို့ ရဲဘော်တွေကတော့ ဝါးရင်းတုတ်ကို သေနတ်ပုံထွက်အောင် ကျည်ဘောက်စ် ထည့်တာမျိုးနဲ့ ပုံဖော်ကြပါတယ်။ ဒီလိုနဲ့ မိုးရွာနေပူမရှောင် မြို့နယ်မှူး ရုံးရှေ့က KNU အလံတိုင်ကွင်းမှာ ကျနော်တို့တတွေ စစ်သင်တန်း တက်ဖြစ်တယ် ဆိုပါတော့။ ဆိုလိုတာက ကျနော်တို့မှာ အဝတ်အစားအပိုမပါ၊ သင်တန်းတက်ဖို့အတွက် သီးခြား ဝတ်စုံလည်းမရှိ၊ အိမ်က ပါလာတဲ့ လုံချည်နဲ့ပဲ သင်တန်းတက်၊ ညနေ ဘားတိုက် ပြန်ရောက်ရင် ချွတ်ပြီး မီးခိုးတိုက် ပြန်ဝတ် လုပ်ခဲ့ရပါတယ်။

ဘားတိုက်ဆိုလို့ ကျနော်တို့အတွက် သီးခြားဆောက်ပေးထားတာ မဟုတ်ပါဘူး။ မြို့နယ်ရုံးနဲ့ တပ်ခွဲမှူး ရုံးကြားက မြက်တောထဲမှာ ယာယီ အစည်းဝေးခန်းရဲ့ တဲအိုပျက်ထဲ ကျနော်တို့ကို နေရာချပေးထားတာပါ။ မိုးကလည်းရွာ၊ လေကလည်းတိုက်၊ အကာကလည်းမရှိ၊ ဖက်မိုးကလည်းယို၊ ခြင်ကလည်းကိုက်ပေါ့။ နောက်ဆုံးတော့ ဝါးခြမ်းပြား ကြမ်းပြင်ကိုပဲ နည်းနည်းစီခွာပြီး မီးဖိုရင်းနဲ့ ခြင်ရန်ကို ကာကွယ်ရပါတယ်။ အစားအသောက် ထမင်းကြမ်းနဲ့ ညာအိုးထီး (ငါးပိရည်) ကိုတော့ KNU စားဖိုက ကျွေးတဲ့အတွက် တော်ပါသေးတယ်။ ပထမပိုင်းတော့ ငါတို့ ကျောင်းသားတွေကို ငါးပိရည်နဲ့ ထမင်းကျွေးပြီး သူတို့က အသားငါး ဟင်းတွေနဲ့များ အရင်စားသွားသလားလို့ ကျနော် သံသယ ၀င်မိပါသေးတယ်။

တကယ်တော့ အဲဒီလို မဟုတ်ပါဘူး သူတိုလည်း ဒီအတိုင်းပဲ စားနေတာ နှစ်ပေါင်း အတော်ကြာနေပြီလို့ KNU မြို့နယ်မှူးက ကျနော့်ကို ရှင်းပြပါတယ်။

ဒီလိုဆိုရင်တော့ မဖြစ်ဘူး။ အသား မစားနိုင်ရင်တောင် ငရုတ်သီးလေး၊ ကြက်သွန်လေး၊ ငါးခြောက်လေးတော့ ရှာမှဖြစ်မယ်ဆိုပြီး ကျနော်တို့ ကျောင်းသားတွေ အစည်းအဝေးထိုင်ကြပါတယ်။ ပြီးတော့ ထားဝယ်က ပါလာတဲ့ သမဂ္ဂ ရန်ပုံငွေကို ထုတ်သုံးဖို့ ဆုံးဖြတ်ရပါတယ်။ အနီးအနားက ကထောင်းနီ ရွာဆီ ချောင်းသုံးတန်လောက်ဖြတ်၊ လက်လှော်လှေကို အကူအညီတောင်းပြီး ဈေးသွားဝယ်ရပါတယ်။

အဲဒီကာလက ငတ်ပေါက်များ ဘယ်လောက်အထိ ဆိုးသလဲဆိုရင် KNU စားဖိုဆောင်က အစားအစာကို ဘယ်လိုမှ မစားနိုင် တော့တာပါ။ မြို့ပေါ်ကနေ တောထဲရောက်ခါစ မို့လို့လည်း ဖြစ်နိုင်ပါတယ်။ ထမင်းတခါမှ မချက်ဖူးတဲ့ ကျနော်လည်း ဒီစခန်း မှာတော့ မိုးပြဲဒယ်နဲ့တောင် ထမင်းချက်တတ် လာခဲ့ပေါ့။ ဒါပေမယ့် ဟင်းချက်နည်းတော့ မတတ်လိုက်ပါဘူး။ ဘာကြောင့်လဲ ဆိုတော့ ချက်စရာ ဟင်းမရှိလို့ ဖြစ်နိုင်ပါတယ်။ တနေ့တနေ့ ကျနော်တို့ စားရတဲ့ ဟင်းထဲမှာ ငါးပိရည်တမျိုး (ဒီငါးပိက အတော်ဆိုးပါတယ်။ ကျနော်တို့ ထားဝယ်မှာစားနေတဲ့ ငါးပိနဲ့ ဘာမှမဆိုင်ဘူး) အမျိုးအမည်မသိတဲ့ ဟင်းရွက်ပြုတ်တချို့၊ တခါတလေ ကံကောင်းတဲ့နေ့ဆိုရင် ဒန်အိုး အကြီးကြီးထဲ ရေ ၃ ဂါလန်လောက်ထည့်ပြီး ကျောက်ဖရုံသီးလို၊ သဘောင်္သီးလို အတုံး ၂၀ လောက်ထည့်ပြုတ်ထားတဲ့ ဟင်းချိုလိုဟင်း တမျိုးကို စားသုံးခွင့် ရပါတယ်။

အသက်စွန့်ပြီး တိုက်ပွဲဝင်ဖို့ ဆုံးဖြတ်ချက် ချထားကြသူတွေ ဖြစ်ပေမယ့်လည်း ဒီလိုအစားအသောက် မျိုးကိုတော့ သိပ် မခံနိုင်ကြပါဘူး။ ဒါကြောင့် လူတချို့ကဆိုရင် “သင်တန်းကလည်း ၀ါးရင်းတုတ်၊ စားရတာလည်း သစ်ရွက်ပြုတ် ဆိုရင်တော့ တိုက်ပွဲမ၀င်ခင်၊ သေနတ်အစစ်မရခင် လုံးပါးပါး သွားလိမ့်မယ်။ ထားဝယ် ပြန်ပီး ဂျင်ကလိနဲ့ ပြန်တိုက်တာကမှ အလုပ် ဖြစ်ဦးမယ်” လို့ ပြောဆိုပြီး အိမ်ပြန်သွားကြပါတယ်။

ကျနော် မှတ်မိသလောက်ဆိုရင် အဲဒီတလတာ ကာလအတွင်း အသစ်ထပ်ရောက်လာသူ ၂၀ ကျော်လောက် ရှိပြီး ပြန်ဝင်သွားသူက ၁၀ ယောက်ကျော်ပါတယ်။ ဒီကြားထဲ သေနတ်မြန်မြန်လိုချင်ရင် KNU ထဲ ၀င်ပါလားဆိုပြီး မဲဆွယ်တာမျိုး ကလည်း မသိမသာ ရှိနေတဲ့အတွက် ဟိန္ဒားမိုင်းကနေ ၀င်လာပြီး ကျနော်တို့နဲ့ လာရောက် ပူးပေါင်တဲ့ ကျောင်းသား လူငယ် ၉ ဦးဟာ ကျနော်တို့ အုပ်စုကိုစွန့်ပြီး KNU တပ်ထဲ ၀င်သွားပါလေရော။

ဒီလို အခြေနေမှာ ထူးထူးခြားခြား ကျနော်တို့ကို အားပေးစကားလာပြောတဲ့ ကရင် စစ်ဗိုလ်တဦးကတော့ ဗိုလ်ဒါးကျော် (အခု KNU တပ်မဟာ ၄ မှူး ဗိုလ်မှူးချုပ် ဒါးကျော်) ဖြစ်ပါတယ်။ သူ ဘာတွေပြောခဲ့သလဲ ဆိုတာကို ကျနော် မမှတ်မိတော့ပါဘူး။ ဒါပေမယ့် ပညာတတ် ကရင်စစ်ဗိုလ် ထားဝယ်သားတဦးက ထားဝယ်လို အားပေးစကား ပြောတဲ့အပေါ် ကျနော်တို့ အားတက်မိတာကတော့ အမှန်ပါပဲ။ KNU တပ်မဟာ ၄ ခေါင်းဆောင်တွေအကြားမှာ ထားဝယ် ကရင်တွေ အတော်များများ ရှိပေမယ့် ဗိုလ်ဒါးကျော်၊ ဗိုလ်ကက်နက်၊ ဗိုလ်လယ်ဝါး တို့ကလွဲရင် ကျန်တဲ့ကရင် အရာရှိတွေက ထားဝယ်လို မပြောဘဲ ကရင်နဲ့ ဗမာလိုပဲပြောကြပါတယ်။

ဒါပေမယ့် ဗိုလ်ဒါးကျော်ကလည်း ကျနော်တို့စိတ်ထဲမှာ နည်းနည်းလေး အားတက် လာအောင်သာ ပြောနိုင်ခဲ့ပြီး ကျနော်တို့ အရေးပေါ်လိုနေတဲ့ စားနပ်ရိက္ခာနဲ့ လက်နက်တွေကို မဖန်တီး ပေးနိုင်ခဲ့ပါဘူး။

ဒီလိုနဲ့ သီဘောဘိုးဘက်က ဗဟိုကျောင်းသား ညီလာခံ၊ မင်းသမီးဘက်က တနင်္သာရီတိုင်း ကျောင်းသား အစည်းအဝေး အခြေနေတွေကို စောင့်နေရင်းနဲ့ ကျနော်တို့ လူ ၅၀၊ ၆၀ လောက်ဟာ တလလောက် ကြာပြီးတဲ့ အခါ မှာတော့ အင်အား ၄၀ အတိပဲ ကျန်ပါတော့တယ်။

 .............................................................................................................

သူပုန်ကျောင်းသားတဦးရဲ့ မာရသွန်ခရီး ၄
ထက်အောင်ကျော်

Thursday, 06 October 2011 18:53

အောက်မေ့ဖွယ်။ ဧရာဝတီမဂဇင်း။


နောက်ဆုံးမှာတော့ အချိန်တလကြာတဲ့အထိ ဘာမှမထူးဘူး ဆိုရင် ဒီမှာဆက်နေမလား၊ ထား ၀ယ်ပြန်မလားဆိုပြီး ကျနော်တို့အကြား ငြင်းခုံမှုတွေ တိုးပွားလာပါတယ်။ မဲဆောက်နဲ့ သီဘောဘိုးဘက်က ကျောင်းသားတွေ၊ နောက်တခါ မင်းသမီး ဘက်က ကျောင်းသားတွေနဲ့လည်း ကျနော်တို့က ဘယ်လိုမှ တိုက်ရိုက် ဆက်သွယ်မှုမရ၊ KNU ဆီကတဆင့် ကြေးနန်း သတင်းတချို့ကို ရနေပေမယ့် ကျနော်တို့က ဒါကို အယုံအကြည် သိပ်မရှိတော့ပါဘူး။


မင်းသမီးစခန်းဆီ ပထမ ဆုံးရောက်သွားတဲ့ တနသာင်္ရီတိုင်း ကျောင်းသားကိုယ်စားလှယ်များ။ (ဓါတ်ပုံ စာရေးသူရဲ့ Face Book)

နောက်ဆုံးမှာတော့ မင်းသမီးဘက် ရောက်နေသူတွေနဲ့ ဆက်သွယ်နိုင်ဖို့ဆိုပြီး ကျနော်တို့ဆီက ကိုယ်စားလှယ် ၂ ဦးကို ရွေး၊ KNU လက်ထဲ အပ်ပြီး လွှတ်လိုက်ပါတယ်။ အဲဒီ ၂ ဦးကတော့ တနင်္သာရီတိုင်း လက်ရွေးစင် ဘော်လုံးသမား သန်းဝင်း (ခေါ်) အိုဃီးနဲ့ မော်လမြိုင် တက္ကသိုလ်က ဆန်းဇော်ထွန်းတို့ပဲ ဖြစ်ပါတယ်။ ဒါပေမယ့် သူတို့ ခရီးထွက်သွားပြီး တပတ် ဆယ်ရက် ကြာတဲ့အထိ ဘာသတင်းမှ ပြန်မလာတဲ့အတွက် ဒီလူတွေ မင်းသမီးကို ရောက်တာ သေချာရဲ့လား၊ လမ်းမှာများ အဖြောင် ခံလိုက်ရပြီလား ဆိုပြီး ကျနော်တို့နဲ့ KNU အကြား သံသယတွေ ပွားလာပြန်ပါတယ်။ ဒီကိစ္စ စုံစမ်းဖို့ KNU နဲ့ ရင်းနှီးပြီး ကရင်စကားလည်း နည်းနည်းတတ်တဲ့ ကိုသောင်းညွန့် (ခေါ်) ကိုလေပေး (၂၀၁ - ဘက်မလိုက် တပ်ရင်းမှူး ဖြစ်လာသူ) ကို တာဝန်ပေးပြီး မင်းသမီးစခန်းဆီ ထပ်လွှတ်ခဲ့ပါတယ်။ (ဒီဆောင်းပါး ရေးဖို့ ပြန်မေးတော့မှ သိရတာကတော့ ထီးထာရောက် ရောက်ချင်း သတင်းပို့ဖို့ အခက်အခဲ ရှိနေလို့ နောက်ကျသွားတာသာ ဖြစ်ပြီး တခြားပြဿနာ ဘာမှမရှိပါဘူးလို့ ကိုသန်းဝင်းက ရှင်းပြပါတယ်)

ဒီအခြေနေတွေကို မသိတဲ့ ကျနော်တို့အုပ်စု ခမျာတော့ BBC ကို နားထောင်။ KNU ခေါင်းဆောင်ပိုင်းကို သတင်းမေးနဲ့ တချိန်လုံး အားမလို အားမရ ဖြစ်နေခဲ့ပါတယ်။ ဒီလိုနဲ့ တနေ့မှာတော့ မဒတ ဥက္ကဋ္ဌ စောမော်ရယ်ကနေ ကျောင်းသားတွေကို လက်ခံဖို့ သူတို့ပြင်ထားပါတယ်၊ လက်နက်တွေလည်း ထောက်ပံ့မယ်ဆိုတဲ့ အဓိပ္ပာယ်ရတဲ့ စကားမျိုး BBC နဲ့ အင်တာဗျုး အတွင်း ပြောသွားတာ ကြားလိုက်ရတဲ့အတွက် ကျနော်တို့ရဲ့ စိတ်ပျက်မှုတွေဟာ နည်းနည်းတော့ ပြန်လည် နိုးကြား လာပါတယ်။ ဒါပေမယ့် လက်တွေ့ နေ့စဉ် ဘ၀မှာကတော့ ညောင်အိုးထီးကို နှာခေါင်းပိတ်ပြီး သုံးဆောင်၊ ခြုံနွယ်ပိတ်ပေါင်း မျိုးစုံ ဟင်းချိုကို သောက်၊ ငှက်ဖျားမဖြစ်အောင် ရေကိုကြိုသောက်၊ မယ်ညား - ပါသား ကို ခပ်ကျယ်ကျယ် အော်ပြီး ၀ါးရင်းတုတ် သေနပ်ကိုထမ်း စသဖြင့် စိတ်ဓာတ်ကျဖွယ် အချိန် တလတာကို အဓိပ္ပာယ် နည်းပါးစွာနဲ့ ကျနော်တို့ အုပ်စု ဖြတ်သန်းခဲ့ရပါတယ်။

ဘန်းချောင်းဘေးက KNU တပ်ခွဲ ၁ မှာ မယ်ညား - ပါးသား လုပ်နေရင်း အချိန်တလလောက် ကြာသွားခဲ့ပါတယ်။

အဲဒီကာလအတွင်း မမျှော်လင့်ဘဲ ဖြစ်သွားတဲ့ ဖြစ်စဉ်တခုကတော့ ညီညီနိုင် (ခေါ်) ကျနော်တို့ရဲ့ ရဲဘော်တဦး ရေနစ် သေဆုံးသွားခြင်းပါ။ ဒါဟာ ရှေ့မှာ ပြောခဲ့တဲ့ အစားအသောက် ဆင်းရဲ ငတ်ပြတ်မှုနဲ့ ဆက်စပ်နေတဲ့အတွက် တကယ့်ကို ရင်နာစရာ ဇာတ်လမ်းတခုပါပဲ။ သူတို့ မိသားစုဟာ ထားဝယ်မှာ အေး - ထီဆိုင်နဲ့ တခြားဆိုင်တွေလည်း ရှိပါတယ်။ စီးပွားရေးအရ ပြေလည်နေတာကြောင့် သူတို့ရဲ့ သားဟာ အစားအသောက် ငတ်ပြတ်မှုကြောင့် သေဆုံးသွားရတယ် ဆိုတာကို သူ့မိသားစုတွေ ဘယ်လိုမှ လက်ခံမယ် မထင်ပါဘူး။

ကျနော် မှတ်မိသလောက် အဲဒီနေ့ဟာ ကျနော်တို့ တောထဲရောက်ပီး ပထမဆုံး ကြုံရတဲ့ သီတင်းကျွတ် လပြည့်နေ့။ ထားဝယ်မှာဆိုရင်တော့ သီတင်းကျွတ် လပြည့်နေ့မှာ ဘုရားကြီးဝန်းထဲ သွားပြီး ဆီးမီးပူးဇော်တာ။ ဒါမှမဟုတ် ဟိုငေးဒီငေးနဲ့ ယောင်ခြောက်ဆယ် လုပ်တာတွေကို ဆောင်ရွက်လေ့ရှိတဲ့ ကျနော်တို့ မောင်ကျောင်းသား တွေဟာ အခုဘန်းချောင်းဘေးက KNU နယ်မြေထဲမှာတော့ ဘုရားဝန်းလည်း မရှိ၊ ဘုန်းကြီးကျောင်းလည်း မရှိ။ သွားချင်သပ ဆိုရင် ခရစ်ယာန် ဘုရားကျောင်းသွားပြီး ဆုတောင်းဖို့ပဲ ရှိပါတယ်။ ဒါပေမယ့် ကံကောင်းတာလား၊ ကံဆိုတာလား မပြောတတ်။ သီတင်းမကျွတ်ခင် လေးမှာ ထူးထူးခြားခြား ဖိတ်ကြားချက်တခု ကျနော်တို့ ရရှိခဲ့ပါတယ်။

“ကျောက်ထူး ဘုန်းကြီးကျောင်းမှာ သီတင်းကျွတ်ပွဲ ကျင်းပမယ်။ ကျောင်းသားတွေနဲ့ ရွာသားတွေ ဘော်လုံးပြိုင်ပွဲ လုပ်ပေးမယ်။ ၀က်သားဟင်းနဲ့ ထမင်းကျွေးမယ်” ဆိုတဲ့ သတင်းစကား ကျနော်တို့ စခန်းဆီ ဘယ်ကနေ ဘယ်လို ရောက်လာမှန်း မသိပါဘူး။

မယ်ညား-ပါးသား နင်းနေရင်းနဲ့ အဲဒီသတင်းစကားကို တီးတိုးပြောနေကြပြီ။

“၀က်သားတုံး မကိုက်ရတာ ကြာပြီကွာ။ ဒီတခါတော့ အပီဆွဲရတော့မယ် … ရှလွတ်-ရှလွတ်” ဆိုပြီး တယောက်တပေါက် နောက်ပြောင် နေကြပါတယ်။

တကယ်တော့ ၀က်သားဟင်းအတွက် ဘုန်းကြီးကျောင်း တကျောင်းက ဖိတ်တာဟာ ဒါ ပထမဆုံး အကြိမ်ဖြစ်ပေမယ့် ကျနော်တို့ စခန်းဝန်းကျင်က ကရင်ရွာတွေရဲ့ ဘုရားကျောင်းတွေက ဖိတ်တာကတော့ (အကြိမ် အတော်များများကတော့ မဖိတ်ဘဲနဲ့ သွားစားခဲ့တာပါ) ၃ - ၄ ခါ ရှိနေပါပြီ။ အထူးသဖြင့် ကျနော်တို့ ကျောင်းသားတွေ ငတ်ပြတ်နေမှန်း ရိပ်မိတဲ့ တနင်းခူရွာက ကျောင်းအုပ်ဆရာ (သင်းအုပ်ဆရာလည်း ဖြစ်နိုင်ပါတယ်၊ ကျနော် အသေအချာ မမှတ်မိတော့ပါ) က စနေနေ့တိုင်း သူရွာဖိတ်ပြီး ဘော်လုံးပြိုင်ပွဲ လုပ်ပေးပါတယ်။

ဒီရွာဟာ ကျနော်တို့စခန်းနဲ့ အနီးဆုံးရွာဖြစ်ပြီး စမ်းချောင်းလေး ၂ - ခုလောက်ကိုကျော်၊ နာရီ ၀က်လောက် လမ်းလျှောက်ရင် ရောက်တဲ့ နေရာပါ။ အဲဒီရွာမှာ အိမ် ဘယ်နှလုံး ရှိမှန်း ကျနော်အသေအချာ မမှတ်မိတော့ပေမယ့် ကျနော်တို့ ဘောလုံးကန်တဲ့ ကွင်းဘေးမှာ ဘုရားကျောင်း တကျောင်း ရှိပါတယ်။ အဲဒီဘေးနားမှာ ခုနကပြောတဲ့ ကျောင်းအုပ်ဆရာရဲ့ အိမ်ရှိပါတယ်။ ဘုရားကျောင်းရော၊ အိမ်ရောဟာ ယာယီသဘောဆောင်ပြီး သစ်တိုင်၊ ၀ါးကြမ်းခင်း၊ ဖက်မိုး အဆောက်အဦတွေ ဖြစ်ပါတယ်။ ဘောလုံးကွင်းကလည်း ယာယီသဘောကို ဆောင်ပြီး ထိကရုဏ်းပင်တွေ၊ မြက်ရိုင်းတွေနဲ့ပေါ့။ ဒါပေမယ့် ၀က်သားဟင်း စားရရေး တို့အရေးဖြစ်နေတဲ့ ကျနော်တို့ ကျိုးဖိုး (ကျောင်းသားကို ကရင်လိုအခေါ်) တွေ ခမျာမှာတော့ ဖိနပ် ဗလာနဲ့ အဲဒီ ဆူးခင်းပေါ်မှာ ပြေးပြီး ဘောလုံး ကစားခဲ့တာ အခုအချိန် ပြန်စဉ်းစားမိတိုင်း ကိုယ့်ခြေဖ၀ါး ကိုယ်ပြန် စမ်းမိပါတယ်။

“စစ်ထွက်တိုက်ဖို့ … သေနတ်မရသေးလို့ ဘောလုံးကို ကျုံးကျုံး ကန်” နေရတဲ့ ကျနော်တို့ အဖြစ်ပါ။

စနေမှာ ဘောလုံးပွဲနဲ့ အလုပ်များကြသလို တနင်္ဂနွေမှာလည်း အဲဒီ ဘောလုံးကွင်းဘေးက ဘုရားကျောင်းဆီ လာပြီး “အာမင်” (ခရစ်ယာန် ဘုရားရှိးခိုးပွဲ အပြီးမှာ နောက်ဆုံး ဆုတောင်းတဲ့ စကားလုံးပါ။ အားလုံးကို ကရင်ဘာသာနဲ့ ပြောတဲ့အတွက် နောက်ဆုံးတလုံးကိုပဲ ကျနော်တို့က အသေမှတ်ထားပြီး အဲဒီစကားလုံး ကြားရင် ဦးရှင်ကြီးပွဲ လုသလိုမျိုး စားဖို့ရယ်ဒီဖြစ်ပြီလို့ မှတ်ထားတာ ဖြစ်ပါတယ်) ကို စောင့်ရ တာကလည်း အမော။ ဒါပေမယ့် ဒီပွဲကိုတော့ ဘောလုံးကန် သွားသလိုမျိုး ဖြစ်သလို သွားလို့မရပါဘူး။ ရေမိုးချိုးပြီး အ၀တ်အစား သန့်သန့် ပြန့်ပြန့်နဲ့ လာမှ ဘုရားကျောင်းလာတဲ့ ကရင်ဒေသခံတွေက နှစ်သက်တဲ့ သဘောရှိတာကြောင့် အကောင်းဆုံး အ၀တ်တွေကို တယောက်တလှည့် ငှားဝတ်ပြီး ကျိုးဖိုိးတပ်သားများ အလှည့်ကျ သွားခဲ့ကြပေါ့။ ကျန်တဲ့လူတွေ စိတ်ထဲ ဘယ်လိုရှိလည်းတော့ မသိဘူး။ ဘုရားကျောင်း တခါမှ မတက်ဘူးတဲ့ ကျနော့် ခမျာတော့ ဘုရားရှိခိုးမှု တခါနားတိုင်း ပိုက်ဆံအလှူခံတဲ့အခါ တပြားမှ မလှူနိုင်ဘဲ ပြုံးပြီး နေရတဲ့ ဘ၀ကို မခံစားနိုင်လို့ နောက်ပိုင်းတော့ မသွားဖြစ်တော့ပါဘူး။

အဲဒီလို စနေမှာ ဘောကန်၊ တနင်္ဂနွေမှာ ဘုရားကျောင်းတက် လုပ်ရင်း ၃ ပတ်လောက် ကြာတဲ့ အခါမှာတော့ ရှေ့မှာပြောခဲ့တဲ့ ထူးဆန်းတဲ့ ၀က်သားဟင်း ဖိတ်ခေါ် ဘောလုံးပွဲဖိတ်စာ ကျနော်တို့စခန်းဆီ ရောက်လာပါတယ်။ အဲဒီအတွက် စစ်ကြောင်း တခုလုံး သောကြာနေ့ ညနေကတည်းက ခရီးထွက်လာပြီး ခုနက တနင်းခူရွာမှာ ဘောကန်ရင်း ... အဲ ... ထမင်းလည်းစားရင်း တည အိပ်ပါတယ်။ နောက်တနေ့ မနက်မှာတော့ တနင်းခူ ကနေ နောက်ထပ် တရွာကိုဖြတ်၊ စမ်းချောင်း ၂ ခုနဲ့ ချောင်း ခပ်ကြီးကြီး တခုကို ကျော်ပြီးသွားရတဲ့ ကျောက်ထူဘုန်းတော်ကြီး ကျောင်းဆီ ကျနော်တို့ ချီတက်လာပါတယ်။ အဲဒီလို ချီတက်ရင်း မွန်းတည့် ၁၂ နာရီ လောက်မှာ ပြဿနာက စတာပါပဲ။

ကျနော် မှတ်မိသလောက်ဆိုရင် အသားညိုညို အရပ်ပုပု ဗလကောင်းကောင်း ရွာသားတဦးက ကျနော်တို့ကို လမ်းပြအဖြစ် ဦးဆောင်လာတာ ဖြစ်ပြီး ကျောက်ထူးချောင်းကို ကူးတဲ့အခါမှာလည်း သူကပဲ ချောင်းထဲ အရင်ဆင်းပြီး “ရေစီးတော့ အတော် သန်တယ်၊ ဒါပေမယ့် ကူးလို့ ရပါတယ်” လို့ အော်ပြောပါတယ်။ ကျနော်တို့ကတော့ (အဲဒီကာလက ကျနော်တို့မှာ နေ့စဉ် တာဝန်ကျ တာဝန်မှူး တဦးစီကို အလှည့်ကျ ပေးထားပြီး သူ့အမိန့်နဲ့ သွားနေကြတာ ဖြစ်ပါတယ်) “တာဝန်မှူး အမိန့်ရမှဆင်း” “ခဏ စောင့်ပါဦး” “ကြိုးနဲ့ကူးမှ ဖြစ်မယ်ထင်တယ်” … စသဖြင့် ချောင်းဘေးမှာ ရပ်ရင်း ဟိုပြောဒီပြော ပြောနေဆဲပါ။ မနေ့ညက မိုးရွာထားလို့လားမသိ၊ ၁၀ ပေလောက်ပဲ အကျယ်ရှိတဲ့ ချောင်းထဲမှာ ရေစီးက အတော်အစီးသန်ပြီး ရေအနက်ကလည်း ရင်ဗတ် ကျော်ကျော် လည်ပင်းလောက် အထိ ရှိနေပါတယ်။

မြို့ပေါ်က ကျိုးဖိုးတွေ ဆိုတော့လည်း သိတဲ့အတိုင်း ဒီလုိုချောင်းမျိုးမှာ ရေကူးဖူးပုံမရပါဘူး။ မောင်းမကန် ကမ်းခြေနဲ့ လက်ဝဲကျွန်းဘက်က နော်စီကန်တို့၊ ဘော်ဦးကန်တို့ လောက်မှာသာ ကူးဖူးပုံရပြီး ဒီလိုရေစီးနဲ့ သူတို့နဲ့ မဖြစ်ပါဘူး။ ဒါကို မသိရှာတဲ့ လမ်းပြရွာသားက “ရပါတယ်၊ ဒီလိုကူး၊ ငါကူးပြနေတာ တွေ့တယ်မဟုတ်လား” ဆိုပြီး ဖိနပ်နဲ့ ပုဆိုး ကိုင်ထားတဲ့ လက်နှစ်ဘက်ကို အပေါ်ထောင်၊ ရေစီးထဲမှာ လမ်းလျှောက်ပြီး ဟိုဘက် ကမ်းဆီ ကူးပြသွားပါတယ်။ ပြီးတော့ အထက ကျောင်းသားတချို့က ချောင်းထဲ အရင်ဆုံး ဆင်းသွားပြီး သူ့နောက် လိုက်ကူးဖို့ ပြင်ပါတယ်။ ဒါပေမယ့် ရေလယ်ရောက်တာနဲ့ အောက်ခြေ လွတ်သွားလို့ ဘေးကလူက လှမ်းဆွဲ၊ ဖိနပ်တွေ ရေထဲမျောပါသွားလို့ အော်သူကအော်နဲ့ပါ။

“ဟေး တယောက်လက် တယောက်ဆွဲထား။ လက်ကို မလွတ်စေနဲ့၊ ရေစီးသန်တယ် သတိထား” ဆိုပြီး ကျနော်နဲ့အနီးက ရဲဘော်တွေက အော်ပြောသေးတာကို မှတ်မိနေပါတယ်။

အစားတလုတ် အတွက် အသွားမတော်တဲ့ ခြေတလှမ်းလို့ ပြောရင် မမှားပါဘူး။

ကျနော်တို့ရဲ့ သတိပေးချက်က နောက်ကျသွားပါပြီ။ အသားဖြူဖြူ တရုတ်ကပြားလေး ညီညီနိုင်ဆိုတဲ့ ထားဝယ်ကောလိပ် ဒုတိယနှစ် ကျောင်သားလေး ရေစီးထဲ မျောပါသွားပါပြီ။

“ဟေ့ ရပ်ကြည့်မနေနဲ့ လိုက်ဆယ်မှ ဖြစ်မယ်” လို့ အော်ပြောပြီး လမ်းပြကို အရင်ဆုံး လိုက်ဆယ်ခိုင်းပါတယ်။ ညီညီနိုင်ဟာ ရေထဲမြုပ်သွားပြီး တချက်ပြန်ပေါ်လာတာကို ကျနော် မြင်လိုက်ပါသေးတယ်။ အဲဒီနောက်မှာတော့ လုံးဝ ပြန်ပေါ်မလာတော့ ပါဘူး။ ဒီတော့မှ ကျနော်အပါဝင် ရေနည်းနည်းပါးပါး ကူးတတ်သူတချို့က ချောင်းထဲခုန်ချပြီး ရေငုပ်လိုက်ရှာပေမယ့် ဘယ်လိုမှ ရှာမတွေ့တော့ပါဘူး။ ရေငုပ်တယ် ဆိုပေမယ့် ရေစီးကသန်ပြီး အောက်ခြေမှာ ပြိုလဲထားတဲ့ သစ်ပင်အမြစ်တွေ၊ သစ်ကိုင်းတွေ ရှိနေတဲ့အတွက် အဲဒီအောက် အထဲအထိလည်း ကျနော်တို့ ကမ၀င်ရဲဘဲ နေ့လယ် ၂ နာရီ ထိုးတဲ့အထိ ဘယ်လိုမှ ရှာမတွေ့တော့လို့ နောက်ဆုံးမှာတော့ လက်လျှော့ပြီး ဘုန်းကြီးကျောင်းကိုပဲ ဆက်လက် ခရီးနှင်ခဲ့ ရပါတယ်။

ညီညီနိုင် ကျဆုံးခဲ့ရတဲ့ အဲဒီချောင်းကနေ မိနစ် ၂၀ လောက် တောင်ကုန်းလေးအတိုင်း လမ်းလျှောက်ပြီးတဲ့ အချိန်မှာတော့ တကယ်ပဲ ဘုန်းကြီးကျောင်းတဆောင်ကို ကျနော်တို့ တွေ့လိုက်ရပါတယ်။ ဒါဟာ သတင်း ၃ ပတ်ကျော် ကာလအတွင်း ပထမဆုံး တွေ့ရတဲ့ ဘုန်းကြီးကျောင်းဖြစ်လို့ အားလုံး ထိုင်ရှိခိုးကြပါတယ်။ ဒါပေမယ့် ဒီကျောင်းမှာ ဘုန်းကြီး မရှိဘဲ ဘုရားဆင်းတုတော် ၂ ဆူ၊ ၃ ဆူကိုသာ တွေ့ရလို့ မေးကြည့်တဲ့ အခါမှာတော့ “ဒီလို အညိုရောင်ဒေသ ကရင်တောထဲမှာ ဘယ်ဘုန်းကြီးကမှ ကြာကြာ မနေရဲဘူး။ ကြာကြာနေရင် ကြားညပ် အသတ်ခံရမှာ စိုးလို့ ဘုန်းကြီး ထားဝယ်ကို ပြန်ပြေးသွားပြီ” လို့ ရွာသားတဦးက ကျနော့်ကိုပြောပြပါတယ်။

သူဆိုလိုတာကတော့ ခရစ်ယာန်ဘာသာ ကြီးစိုးတဲ့ KNU ထိမ်းချုပ်ရာ ဒေသမှာ ဗုဒ္ဓဘာသာ ဘုန်းကြီးတပါးအတွက် နေရေးထိုင်ရေး အဆင်မပြေသလို၊ ဒီဘုန်းကြီးဟာ အစိုးရ လူလားလို့ KNU ဘက်က သံသယပွား၊ အစိုးရဘက်ကလည်း ဒီဘုန်းကြီး ကရင်တောထဲအထိ သွားနေတာ KNU နဲ့ အဆက်သွယ်ရှိလို့လား ဆိုပြီး သံသယ၀င်၊ အဲဒီ ၂ ဘက်ကြား ညပ်မှာ စိုးတာနဲ့ ပြန်ပြေးသွားတဲ့သဘော ဖြစ်တယ်ဆိုတာကို နောက်ထပ်အလားတူ ရွာတွေကို တွေ့ရတော့မှ ကျနော် ပို သဘောပေါက်ခဲ့ ရပါတယ်။

ညနေ ၄ နာရီ လောက်မှာတော့ စီစဉ်ထားတဲ့အတိုင်း ဘောလုံးပွဲကို စတင်ခဲ့ပေမယ့် ကျောင်းသားတွေရော၊ ရွာသားတွေ ရောရဲ့ စိတ်ထဲမှာ ညီညီနိုင် သေသွားတာကိုသာ သတိရနေကြပြီး ကစားပွဲထဲမှာ စိတ်ဝင်စားမှု မရှိကြတော့ပါဘူး။ ဘောလုံးပွဲ အပြီးမှာ ကျွေးတဲ့ ၀က်သားဟင်းဟာလည်း ဘယ်လိုမှ အရသာမရှိတော့ပါဘူး။

နောက်ဆုံးတော့ ကျောက်ထူရွာရဲ့ သီတင်းကျွတ်ပွဲဟာ ညီညီနိုင့်အတွက် အမျှဝေပွဲဖြစ်သွားပြီး ဆုတောင်းမေတ္တာပို့မှုတွေကို ကျနော်တို့ လုပ်ဆောင်ခဲ့ပါတယ်။ ဒါပေမယ့် ပြဿနာက ဒီကျောင်းမှာ ဘုန်းကြီးမရှိတဲ့အတွက် ငါးပါးသီလ ဘယ်လိုယူမလဲ၊ ညီညီနိုင့်အတွက် သရနဂုံ တင်တာကို ဘယ်လိုလုပ်မလဲ ဆိုတော့ ... ကျနော်တို့အုပ်စုထဲက တဦးက ထွက်လာပြီး သူဘုန်းကြီးလူထွက်လာတာ မကြာသေးဘူး၊ သူဆိုတဲ့ အတိုင်းသာ နောက်ကလိုက်ဆိုကြလို့ ဦးဆောင်ပြီး ဘုရားရှိခိုးတာနဲ့ပဲ ငါးပါးသီလခံယူ လိုက်ပါတယ်။ ဒီတော့မှပဲ ဘာဆက်လုပ်ရမှန်း မသိဖြစ်နေတဲ့ ကျနော်တို့ ကျိုးဖိုးစစ်ကြောင်းမှူးလည်း အဆင်ပြေ သွားပါတော့တယ်။

နောက်တနေ့ အဲဒီကျောင်းကနေ စခန်းကိုပြန်လာတဲ့ အချိန်ှမှာလည်း ကျနော်အပါဝင် ကျောင်းသား ၅ ဦးလောက်နဲ့ ရွာသား ၂ ဦးလောက်က အဲဒီချောင်းမှာ ရေကူးပြီး ညီညီနိုင်ရဲ့ အလောင်းကို ၂ နာရီလောက် လိုက်ရှာပါသေးတယ်။ နောက်ဆုံးတော့ ဘယ်လိုမှ မတွေ့လို့ လက်လျှော့ပြီး စခန်းကိုပဲ ပြန်လာခဲ့ရပါတယ်။ ဒီလိုနဲ့ ၄ ရက်လောက် ကြာတဲ့အခါမှာတော့ ညီညီနိုင့် အလောင်းကို တွေ့တယ်ဆိုပြီး KNU ကတဆင့် ရွာသားတွေက သတင်းပို့ လာပါတယ်။ ကျနော်နဲ့ တခြားကျောင်းသား ၃ – ၄ ဦး လိုက်သွားပြီး သွားကြည့်တော့ ဟုတ်ပါတယ်။ အလောင်းက ပုပ်ပွ ဖောယောင်နေပြီ။ အတွင်းခံ ဘောင်းဘီတထည်သာ ကျန်ပြီး တခြားအ၀တ်တွေ ဘာမှမရှိတော့ပါဘူး။ လက်တဘက်က အပေါ်ကိုထောင်နေပြီး အဲဒီလက်မှာ လက်ပတ်နာရီ တလုံး ရှိနေဆဲ ဖြစ်ပါတယ်။

သက်သေခံပစ္စည်းအဖြစ် သူရဲ့ လက်ပတ်နာရီကို ဖြုတ်သိမ်း၊ အလောင်းကိုမြေမြှုပ်ဖို့ပြင်တော့ “သရနဂုံ တင်ရဦးမယ်လေ” လို့ ကျနော့် သူငယ်ချင်းတဦးက သတိပေးပါတယ်။ ဒါပေမယ့် ဘုန်းကြီး မရှိတဲ့ ဒီဒေသမှာ ဘယ်လို သရနဂုံတင်မလဲ။ နောက်ဆုံးမှာတော့ ကရင်ရွာသားတွေနဲ့အတူ ညီညီနိုင့်အလောင်းကို မြေမြှုပ်။ သူရဲ့လက်ပတ်နာရီကို ယူပြီး စခန်းဆီပြန် လာခဲ့ရပါတယ်။

အဲဒီနာရီနဲ့အတူ စာတစောင်ရေးပြီး ထားဝယ်မြို့က သူ့ရဲ့မိသားစုဆီ ကျနော်တို့ ပို့လိုက်ပေမယ့် အဲဒီစာရ၊ မရနဲ့ နောက်ပိုင်း အခြေအနေကို ဘာမှ မသိတော့ပါဘူး။ တချို့သတင်းတွေ အရဆိုရင် သူတို့ရဲ့မိသားစုဟာ အခုချိန်အထိ ညီညီနိုင် တောထဲမှာ ရှိနေဆဲ၊ ဒါမှမဟုတ် တတိယနိုင်ငံ တခုခုဆီ ရောက်နေတယ်လို့ ထင်နေပြီး ရေနစ်သေသွားပြီလို့ ပြောတာကို မယုံသေးဘူးလို့ ထားဝယ်ဘက်က လာတဲ့ သတင်းတွေ ကြားနေရဆဲ ဖြစ်ပါတယ်။

 .....................................................................................................................

သူပုန်ကျောင်းသားတဦးရဲ့ မာရသွန်ခရီး ၅

ထက်အောင်ကျော် October 13, 2011 5:01 pm
အောက်မေ့ဖွယ်။ ဧရာဝတီိမဂဇင်း

မောင်တော် ကျိုးဖိုးနဲ့ မင်းသမီး အမရာတို့တွေ့ပြီ။

ဒီစာကို ဖတ်ပြီး ထက်အောင်ကျော် တယောက် တောထဲမှာ နှစ်ပါးသွား ကဖို့ ပြင်နေသလားလို့တော့မထင်လိုက်ပါနဲ့။

 
မောင်တော် (မင်းသမီး) စခန်း တနေရာ (ဓာတ်ပုံ - စာရေးသူ၏ face book မှ)

ကရင်စကား နှစ်လုံးကို ဗမာမှုပြုထားတဲ့ ကျနော်တို့ ကျောင်းသားစခန်း တပ်တည်နေရာ နှစ်ခုကိုတွဲပြီး ပြောလိုက်တာပါ။ မောင်တော် ဆိုတာက ကျနော်တို့ ကျောင်းသားတွေရဲ့ ပထမဆုံးစခန်းနေရာ ဖြစ်ပြီး အမရာကတော့ ဒုတိယနဲ့ နောက်ဆုံးနေရာပါ။ မင်းသမီးဆိုတာကတော့ မင်းသမီးချောင်းဖျားနဲ့ ချောင်းဝမှာရှိတဲ့ KNU စခန်းနဲ့ ကရင်ရွာတွေကို ဆိုလိုတာပါ။

မင်းသမီးစခန်း (မူလ ကရင်စကားကတော့ မင်တမီ ပါ) ဆိုတာက ခုနက ကျနော်ရှေ့မှာ ပြောခဲ့တဲ့ ထားဝယ်ဘက်မှာ မြစ်ဖျားခံတဲ့ ဘန်းချောင်းနဲ့ ရေဖြူဘက်မှာမြစ်ဖျားခံတဲ့ ကွမ်းချောင်းတို့ မေတ္တာရွာမှာဆုံပြီးဖြစ်ပေါ်လာတဲ့ တနင်္သာရီမြစ်နဲ့ ထိုင်းနယ်စပ် အနီးက မင်းသမီးချောင်းဖျား (မူလ ကရင်စကားကတော့ မင်တမီချောင်းဖျား- ဒါမှမဟုတ် ထီးခီး) ကနေ ဆင်းလာတဲ့ ရေတွေ မြစ်ထဲစီးဝင်တဲ့နေရာ (ချောင်းဝ သို့မဟုတ် ထီးထာ) ကိုခေါ်တာပါ။

ရှေ့မှာပြောခဲ့တဲ့ ဘန်းချောင်းဘေးက ခွဲ ၁ – ကနေ အခု ထီးထာ ချောင်းဝဆီအထိ နှစ်ညအိပ် ခရီး နှင်ခဲ့ရပြီး နောက်တနေ့ ၁၂ နာရီ ၀န်းကျင်လောက်မှာတော့ ထီးထာ ချောင်းဝနဲ့ တနင်္သာရီမြစ်ဘေးမှာ ထိုးထိုးထောင်ထောင် အဖြူရောင် နှစ်ထပ် တိုက်တလုံးကို မြစ်ရဲ့ ဒီဘက်ကမ်းကနေ ကျနော်တို့ မြင်လိုက်ရပါတယ်။ ဒါဟာ တောတွင်းကာလ တလကျော် အချိန်အတွင်း ပထမဆုံး မြင်ရတဲ့ အသားနားဆုံး အဆောက်အအုံ ဖြစ်တဲ့အတွက် “ကရင်သူပုန်စခန်းက တယ်ဟုတ်ပါလား” ဆိုပြီး ကျနော့်စိတ်ထဲ ကြိတ်လေးစား မိလိုက်ပါတယ်။ နောက်ပိုင်းမှ ပြန်သိရတာက အဲဒါဟာ KNDO (ကရင်အမျိုးသား ကာကွယ် ရေးအဖွဲ့) ရုံးခန်းဖြစ်ပြီး လက်ရှိ KNDO တပ်ရင်း ၇ ရင်းမှူး ဗိုလ်မှူး ဘော်ဒွင်ဇန် (ဥက္ကဋ္ဌကြီး မန်းဘဇံရဲ့ သားငယ်) ရုံးထိုင်တဲ့နေရာ ဖြစ်ပါတယ်။ သူက ကျနော်တို့ တောထဲရှိစဉ်မှာ ကွယ်လွန်သွားပါတယ်။ သားကြီးကတော့ ဗိုလ်မှူး ရောဘဇန် ဖြစ်ပြီး အခုအမေရိ ကားမှာပါ။

တနင်္သာရီမြစ်ကို လက်လှော်လှေ တစီးနဲ့ ခေါက်တုန့်ခေါက်ပြန် ကူးအပြီးမှာတော့ ကျနော်တို့ ရဲဘော် ၄ ကျိပ် တပ်ဖွဲ့ကြီးဟာ ခုနက KNDO ရုံးဘေးက ဗိုလ်မှူးဘော်ဒွင်ဇန်ရဲ့ နေအိမ်ကိုရောက်လာပါတယ်။ ဥက္ကဋ္ဌကြီးရဲ့သား ကရင်စစ်ဗိုလ်ရဲ့ နေအိမ် ဆိုပေမယ့် ခုနက ရုံးခန်းနဲ့တော့ ဘာမှမဆိုင်ပါဘူး။ သစ်တိုင်၊ သစ်ကာ၊ သွပ်ပြားမိုး အိမ်လေးသာဖြစ်ပြီး အဲဒီအိမ်ရှေ့မှာ ကျနော်တို့တတွေ ခြေကုန်လက်ပန်း ကျစွာနဲ့ နေရာယူလိုက်ပါတယ်။ အဲဒီမှာ ကျနော်တို့ ပထမဆုံး တွေ့ရတဲ့ ပုဂ္ဂိုလ်တွေ ကတော့ နတ်အိမ်တောင်ဘက်ကနေ ရောက်နေတဲ့ အခု စစ်ရေး အကဲခတ်အဖြစ် လူသိများနေသူ ကိုဌေးအောင်၊ နောက် ကျနော်တို့စခန်းရဲ့ ဥက္ကဋ္ဌနဲ့ ဗဟိုကော်မတီဝင် ဖြစ်လာသူ ကိုအောင်သန်းဝင်း၊ နောက်တခါ ကျနော်တို့ ဆီကနေ မင်းသမီးကို ကြိုထွက်သွားတဲ့ ကိုသောင်းညွန့်နဲ့ ကိုကျော်အောင်အပါဝင် အားလုံး ၁ဝ ဦး လောက်ကို ကယ်ဆယ်ရေးပစ္စည်း တချို့နဲ့ တွေ့ရပါတယ်။

ကျနော်တို့ ရဲဘော် ၄ ကျိပ်ရဲ့ အမည်တွေ အားလုံးကို ဒီနေရာမှာ ဖေါ်ပြဖို့ စာမျက်နှာ အကန့်အသတ် ရှိနိုင်တဲ့အတွက် အကျဉ်းရုံး တင်ပြရမယ်ဆိုရင် အခုလက်ရှိ ABSDF ဒု ဥက္ကဋ္ဌနဲ့ DAB အထွေထွေ အတွင်းရေးမှူးအဖြစ် တာဝန်ယူနေသူ ကိုမျိုးဝင်း၊ နောက် အဲဒီအချိန်က အသက် ၄၀ ကျော် အရွယ်ရှိနေပြီဖြစ်တဲ့ ဦးမျိုးမြင့် (ခေါင်းဖြူကြီးမျိုးမြင့်လို့ ကျနော်တို့က ခေါ်ကြပါတယ်) နဲ့ အသက် ၁၅ နှစ် ၀န်းကျင်သာ ရှိသေးပေမယ့် တကိုယ်လုံး တခေါင်းလုံး ဥရောပ တိုက်သားတဦးလို ဖြူဖွေးနေသူ မောင်ဘို (ဘိုခေါင်းနီလို့ ကျနော်တို့ ခေါ်ကြပါတယ်) တို့ကို ကျနော် ထူးထူးခြားခြား သတိထား မိပါတယ်။

ဗိုလ်မှူး ဘော်ဒွင်ဇန်အိမ်နဲ့ မျက်နှာချင်းဆိုင်မှာတော့ မြိတ် – ထားဝယ် ခရိုင် တွဲဘက်အတွင်းရေးမှူး ပဒိုနီနီရဲ့အိမ်နဲ့ တခြားအိမ် ၄၊ ၅ လုံးလောက် ရှိပါတယ်။ အဲဒီအိမ်တွေမှာ ကျနော်တို့ အုပ်စု သင့်သလို နေရာယူလိုက်ပြီး ငါးသေတ္တာဟင်းလေးနဲ့ အဲဒီညက ညစာ သုံးဆောင်ခွင့် ရခဲ့ပါတယ်။

နောက်တနေ့ မနက်မှာတော့ KNDO ရုံးရဲ့ ဟိုမှာဘက်က ထီးထားရွာကို သွားရောက် လည်ပတ်ခွင့်ရပြီး ကွိတီယို (ကျနော်တို့ ထားဝယ် ကျောင်းသားတွေကတော့ ခွေးတရုတ်လို့ နောက်ပြောင် ခေါ်ဝေါ်ကြပါတယ်) ဆိုတာကို ပထမဆုံးအကြိမ် စားဖူးခဲ့ပါတယ်။ စားဖူးတယ်ဆိုပေမယ် တယောက်တခွက် မှာစားနိုင်တာမျိုးတော့ မဟုတ်ပါဘူး။ ၂ ခွက်လောက်မှာပြီး လူ ၁၀ ယောက်ကျော်လောက် တယောက်တဇွန်းစီ စားကြသလား ကျနော် အသေချာ မမှတ်မိတော့ပါဘူး။

ကျနော်တို့အုပ်စုဟာ တောသားမြိုရောက်တဲ့ပုံစံနဲ့ ထီးထားရွာကို ဟိုငေးဒီကြည့် လုပ်နေခဲ့ပါတယ်။ ဒီရွာက ကျနော်တို့ ဘန်းချောင်း ဘေးမှာ တလတာနီးပါးအတွင်း တွေ့ခဲ့ရတဲ့ ရွာတွေနဲ့မတူပါဘူး။ အိမ်တွေဟာ ထိုင်းပုံစံ (အဲဒီတုန်းကတော့ ထိုင်းလည်း မရောက်ဘူးသေးတော့ ထိုင်းပုံစံမှန်းလည်း မသိသေးပါ) နှစ်ထပ်အိမ်လေးတွေ ဖြစ်ပြီး သစ်တိုင်၊ ပျဉ်ကာ၊ သွပ်မိုးနဲ့ အသေချာ အခိုင်အမာ ဆောက်ထားတာကို တွေ့ရပါတယ်။ ဒါ့အပြင် အထက ကျောင်းတခုနဲ့ ခရစ်ယာန် ဘုရားကျောင်း တခုကိုလည်း အခိုင်အမာ တွေ့ရပါတယ်။ ရွာရဲ့ ဟိုဘက်ထိပ်မှာ ဆေးရုံနဲ့ သစ်စက်ကြီးတခု ရှိတယ်လို့ သိရပေမယ့် အဲဒီ ပထမ အခေါက်မှာတော့ စာသင်ကျောင်းဝန်းကျင်လောက်ပဲ ကျနော်တို့ ရောက်ပြီး ပြန်လှည့်လာခဲ့ပါတယ်။

ကံကောင်းချင်တော့ ခုနက ကွိတီယိုဆိုင်နား ပြန်အရောက်မှာ ခဲမဖြူတွေ အလယ်စတိုအထိ သယ်ပေးနိုင်မလား ဆိုတဲ့ ကမ်းလှမ်းချက်တခုကို ကျနော်တို့ ရလိုက်ပါတယ်။ ကရင် ဖဒိုအိမ်တခုမှာ (ဟိန္ဒားနဲ့ ကျောက်မဲတောင် မိုင်းကနေ ခိုးထုတ်ပြီး လာရောင်းထားတယ်လို့ ယူဆရတဲ့) စုထားတဲ့ ခဲမဖြူအိတ်တွေကို အလယ်စတိုအထိ သယ်ပေးနိုင်ရင် တကီလိုအတွက် ဘတ်ရမယ်လို့ ဆိုပါတယ်။

ဒီ သတင်းကိုလည်းသိရော ကျနော်တို့ ကျိုးဖိုးတွေ အလုအယက် ၀ိုင်းသယ်လိုက်တာ ကျနော်ဆိုရင် ကီလို ၃၀ ထမ်းပြီး ဘတ်ငွေ ၆၀ လောက် ရလိုက်ပါတယ်။ အဲဒါဟာ ကျနော့်ဘ၀မှာ ပထမဆုံး မြင်ရတဲ့ နိုင်ငံခြားငွေကြေးဖြစ်ပီး ကွိတီယို တခွက်ကို ကိုယ်ပိုင် ၀ယ်စားနိုင်လိုက်ပါတယ်။

အဲ … ဘတ် ၆၀ ရဖို့အတွက် ဘယ်လောက် ရုန်းကန်လိုက်ရသလဲ ဆိုတာကိုလဲကြည့်ပါဦး။ ထီးထားရွာကနေ အလယ်စတို စခန်းဆီအထိ ခရီးက ၆ မိုင်ကျော်လောက် ရှိမယ်လို့ယူဆရပြီး ၂ နာရီကျော် သွားရပါတယ်။ တကယ်ကတော့ ဒီလမ်းကြောင်းဟာ နွေရာသီမှာ ကားလမ်းကြမ်းရှိပေမယ် အခုလို အောက်တိုဘာမှာတော့ မိုးရွာပြီး တောင်ကျရေစီးထားလို့ မင်းသမီးချောင်း တလျောက် ဖောက်ထားတဲ့ အဲဒီကားလမ်းပျက်နေလို့ ကျနော်တို့က သယ်ခွင့်ရလိုက်တာမျိုးပါ။ ခဲမဖြူ ကီလို ၃၀ ကိုထမ်း၊ ချောင်းငယ် ၂၀ ကျော်ကိုဖြတ်၊ ကျောက်တုံး ကျောက်ခဲတွေကြား ၂ နာရီကျော် လမ်းလျှောက်ရတဲ့ အရေးဟာ တက္ကသိုလ်ကျောင်းသား တဦးအဖို့ သိပ်မလွယ်ပေမယ့် အဲဒီလို သယ်ခွင့်ရလိုက်တာကို ကျနော်တို့ မောင်ကျောင်းသားတွေ အားလုံးက ၀မ်းသာ ပျော်ရွှင်နေကြပါတယ်။

အလယ်စတိုကနေ ထိုင်းဘက်ကိုထွက်တဲ့ သီးခြားကားလမ်းတခု ရှိသလို ထီးခီးလို့ခေါ်တဲ့ KNU – မြိတ် – ထားဝယ်ခရိုင်နဲ့ တပ်ရင်း ၁၀ ဌာနချုပ် (ကျနော်တို့ တောခိုကာစက တပ်ရင်း ၁၀ အဖြစ်သာ ရှိသေးပြီး နောက်ပိုင်းမှာမှ တပ်မဟာ ၄ ဖြစ်လာပါတယ်) ရုံးစိုက်ရာ အရပ်ဆီသွားတဲ့ ကားလမ်း တခုလည်းရှိပါတယ်။ ဒါပေမယ့် အဲဒီဒေသ နှစ်ခုစလုံးဆီ ခွင့်ပြုချက် မရဘဲ သွားလို့မရပါဘူး။

ကျနော်ကတော့ အရင်ရောက်နေတဲ့ ကျောင်းသားတဦးနဲ့အတူ ထီးခီးကို လိုက်ပါခွင့်ရတဲ့အတွက် အလယ်စတိုကနေ နောက်ထပ် တနာရီကျော် လမ်းဆက်လျှောက်လိုက်ရပါတယ်။

“၀ိုး … ရုံးခန်းကြီးက တယ်သားနားပါလား” လို့ KNU ခရိုင်ရုံးကိုကြည့်ပြီး ကျနော့်နှုတ်က ထွက်သွားပါတယ်။

ပျဉ်းကတိုးလို သစ်တွေနဲ့ ဆောက်ထားတဲ့ အင်္ဂလိပ်အက္ခရာ Lပုံစံ နှစ်ထပ်ရုံးကြီးဟာ ပေ ၅၀၊ ပေ ၂၀ လောက် ရှိမယ်လို့ ခန့်မှန်းရပါတယ်။ အဲဒီရှေ့က ဂိတ်တဲလေးမှာတော့ ကျနော်တို့ကျောင်းသားတွေအတွက် စခန်းထောက်အဖြစ် နေရာပေး ထားပါတယ်။ ခရိုင်တောင်ကုန်းရဲ့ ဟိုမှာဘက် တခြားတောင်ကုန်းတခုမှာတော့ တပ်ရင်း ၁၀ ရုံးခန်းနဲ့ ဘားတိုက်တွေကို ခပ်ဝါးဝါး မြင်နေရပါတယ်။ ဒီတောင်ကုန်း နှစ်ခုရဲ့ကြားမှာတော့ မင်းသမီးချောင်းဖျား သေးသေးလေးကို တွေ့ရပြီး အဲဒီဘေးမှာ ထောက်လှမ်းရေးမှူး ဗိုလ်ကြီးဘိုနီ (နောက်ပိုင်းမှာ စစ်အစိုးရရဲ့ ဖမ်းဆီးခြင်းကို ခံလိုက်ရသူ) ရဲ့ လက်ဖက်ရည်ဆိုင် အပါဝင် လက်ဖက်ရည်ဆိုင်တချို့၊ အချိုရည်ဆိုင် တချို့နဲ့ နေအိမ်တချို့ကို တွေ့ရပါတယ်။ ထီးခီးဟာ ထီးထားလို ရွာတခုမဟုတ်ဘဲ ရုံးခန်းတွေနဲ့ ၀န်ထမ်းတွေနေတဲ့ နေရာတခု အဖြစ် ကျနော် သတိပြုမိပါတယ်။

နောက်ထပ် ထူးထူးခြားခြား မှတ်မိနေတာ တခုကတော့ ထောက်လှမ်းရေးမှူး ဗိုလ်ကြီးဗိုလ်နီဟာ နက်စ်ကော်ဖီထဲ နို့ဆီများများ ထည့်ပြီး လင်မနစ် ဖန်ခွက်ကြီးနဲ့အပြည့် ဖျော်သောက်လေ့ရှိပြီး ကျနော်တို့ကိုလည်း အဲဒီလိုခွက်ကြီးနဲ့ ခွက်အပြည့် တိုက်လိုက်တဲ့ အတွက် ဒါဟာ ပထမဆုံး ကျနော်သောက်ဖူးတဲ့ KNU စတိုင် ကော်ဖီချိုဆိမ့်အဖြစ် အခုချိန်အထိ အမှတ်ရနေပါ တယ်။

ထီးခီးကနေ ထီးထာပြန်ဆင်းပြီး နောက်တရက်မှာတော့ ကျနော်တို့ ကျိုးဖိုးတွေအတွက် သီးခြားစခန်းနေရာတခု ပေးမယ်လို့ KNU က ပြောပြီး ရှေ့မှာပြောခဲ့တဲ့ KNDO ရုံးကနေ တနင်္သာရီမြစ်ကို ပြန်ကျော်၊ ကျနော်တို့ လာရာလမ်းကြောင်းဘက်ကို လှေနဲ့တင်ပြီး ကျနော်တို့ကို ခေါ်သွားပါတယ်။ မြစ်ကမ်းဘေးကနေ တောထဲကို နာရီဝက်လောက် လမ်းလျှောက် ပြီးတဲ့ အခါမှာတော့ ကရင်တဲ တလုံးကို တွေ့ရပါတယ်။ အဲဒီတဲနဲ့ မလှမ်းမကမ်းက ချောင်းသေးသေးလေး တခုရဲ့ နဘေးမှာ ကျနော်တို့ကို နေရာယူစေပါတယ်။

ကျနော် မှတ်မိသလောက်ဆိုရင် မောင်တော် စခန်း စတည်တဲ့နေ့ဟာ ၁၉၈၈ နိုဝင်ဘာလ ၄ ရက်နေ့၊ တနည်းအားဖြင့် ကျနော်တို့ တောထဲထွက်လာပြီး ၄၅ ရက်ကြာမှ စခန်း စဆောက်ရတဲ့ သဘောဖြစ်ပါတယ်။

“ငါ့ညီတို့ … တော်လှန်ရေး ဆိုတာ ဒီလိုပဲ။ ခက်ခဲမယ်၊ ပင်ပန်းမယ်” ဆိုပြီး ခရိုင်အတွင်းရေးမှူး ဖဒိုနီနီ (အခု နယူးဇီလန် ရောက်နေသ) က အဲဒီချောင်းဘေးမှာ ကျနော်တို့ကို အမှာစကား ပြောပါတယ်။ မန္တလေးဇာတိ ဖဒိုနီနီဟာ စကားပြော အလွန်ကောင်းသူဖြစ်ပါတယ်။ လက်တဘက်ကို ပတ်တီး အမြဲတန်း စည်းထားပြီး လက်ဟန်၊ ကိုယ်ဟန် အပြည့်နဲ့ စကား ပြောတတ်သူ ဖြစ်ပါတယ်။ သူစကားပြောတဲ့ အခါတိုင်း “င့ါညီတို့ … ငါ့ညီတို့” လို့ ကျနော်တို့ကို ခေါ်လေ့ရှိတဲ့အတွက် သူ့ကို “ငါ့ညီတို့” ဆိုပြီး ကျနော်တို့ကြားမှာ နာမည် ပေးထားပါတယ်။ ဒါ့အပြင် ကျနော်တို့ အချင်းချင်း စကားပြောရင်တောင် သူပုံစံကိုယူပြီး လက်ဟန်ကိုယ်ဟန်နဲ့ “င့ါညီတို့ နားထောင်စမ်း” လို့ နိဒါန်းချီ နောက်ပြောင်ပြောဆိုလေ့ ရှိတဲ့အထိ
သူ့စတိုင်က လွှမ်းမိုးခဲ့ပါတယ်။

ကျနော့်စိတ်ထဲ မှတ်မှတ်ရရ ရှိနေတာကတော့ ဖဒိုနီနီက အဲဒီလို နေရာပေးပြီးပြီးချင်း ကျနော် ပထမဆုံး လုပ်လိုက် တာကတော့ “တပ်မြေ – မကျုးကျော်ရ” ဆိုတဲ့ စာတန်းကို A4 – စာရွက်ပေါ်မှာရေးပြီး ကရင်တဲနဲ့ ကျနော်တို့ စခန်းဆောက်မယ့် ချောင်းရိုးလေးအကြားက သစ်ပင်မှာ ကပ်လိုက်တာပဲ ဖြစ်ပါတယ်။

အဲဒီမှာ ဖဒိုနီနီက တရားဟောတော့ တာပါပဲ။

“ငါ့ညီတို့ရဲ့ စိတ်ကူးတွေက မဆလ နဲ့ တူနေပြီ။ ပြည်သူတွေရဲ့ မြေတွေကိုသိမ်းပြီး စစ်တပ်ပိုင် လုပ်နေတဲ့ သဘော ဖြစ်နေတယ်” စသဖြင့် အတော်များများ သူ့ ပြောကွက်ထဲ ကျနော်ခံလိုက် ရပါတယ်။ တကယ်က ကျနော်လည်း စိတ်ထဲမှာ ဘာမှရှိတာမဟုတ်ပါဘူး။ စက်ဘီးစီးရင်းနဲ့ အမြဲတမ်း မြင်မြင်နေရတဲ့ ရန်ကုန် ထောက်ကြံ့ ဗိုလ်ရွေးတောင်နားက “တပ်မြေ မကျူးကျော်ရ” ဆိုတဲ့ လမ်းဘေး ဆိုင်းဘုတ်ငယ်လေးတွေနဲ့ ကျနော်တို့ ထားဝယ်-မောင်းမကန် ကားလမ်းပေါ်ရှိ ခလရ -၁၀၄ အနီးတဝိုက် ရေးထားတဲ့ စာတန်းတွေကို အမှတ်ရပီး တပ်မြေဆိုရင်တော့ ဒီလိုရေးမှ တခြားလူ တွေမလာမှာ ဆိုပြီး ကောက်ရေးလိုက် မိတာ ဖြစ်ဖို့များပါတယ်။

ဒီလိုနဲ့ အနီးနားက ၀ါးရုံတွေကိုခုတ်လှဲ၊ ဘားတိုက်ဆောက်၊ စားဖိုးဆောင် ဆောက်၊ တောငှက်ပျော ရွက်တွေကို အမိုးလုပ်၊ ချောင်းသေးသေးလေးက ရေကို ခပ်လို့ရအောင် ပြုပြင်ပြီးတော့ “မောင်တော်စခန်း” ဆိုတာကို ကျနော်တို့ စတင် တည်ဆောက်ခဲ့ ပါတယ်။ စခန်းအသစ်တခု ဆောက်ရတဲ့အလုပ် ဘယ်လောက်ပင်ပန်းသလဲ ဆိုတာကို စာမဖွဲ့ ချင်တော့ ပေမယ့် ကျနော်ဦးစီးပြီး ဆောက်လိုက်တဲ့ ပထမ ဘားတိုက် ပန္နက်ချရာမှာ ၉၀ ဒီဂရီ မကျတဲ့အတွက် တချမ်းစောင်း ဘားတိုက်ကြီး ဖြစ်သွားတာကို အခုထိ အမှတ်ရနေဆဲ ဖြစ်ပါတယ်။

နောက်တခါ ကျနော်ရောက်ဖူးတဲ့ တခြားကျောင်းသား စခန်းတွေနဲ့စာရင် ကျနော်တို့စခန်းဟာ တကယ် အသစ်ကနေ စလုပ်ရတာမျိုပါ။ တခြားစခန်း အတော်များများကတော့ KNU စခန်းတွေနဲ့ ဆက်စပ်နေတာ၊ တချို့ဆိုရင် KNU က ပေးထားတဲ့ ဘားတိုက်တွေ ပေါ်မှာ၊ ဒါမှမဟုတ်လည်း KNU သစ်စက်တွေက ထွက်တဲ့ သစ်သားတွေနဲ့ ခိုင်ခိုင်မာမာ ဆောက်ထား တာကို တွေ့ရပါတယ်။

ဒါပေမယ့် ကျနော်တို့ ဘားတိုက်ကတော့ သစ်တချောင်းမှ မပါပဲ တကယ့်ကို ဝါးတိုင်၊ ဝါးခင်း၊ ဝါးနဲ့ ငှက်ပျောရွက်အမိုးနဲ့ လုပ်ထားတဲ့ ထူးထူးခြားခြား ဘားတိုက်တွေ ဖြစ်နေပါတယ်။ ။

...............................................................................................................

သူပုန်ကျောင်းသားတဦးရဲ့ မာရသွန်ခရီး ၆

ထက်အောင်ကျော် on October 21, 2011 3:04 pm
အောက်မေ့ဖွယ် / ဧရာဝတီမဂဇင်း။
အင်အားသစ်များ ထပ်ရောက်လာခြင်းနဲ့ ကိုယ်စားလှယ်ရွေးချယ်ခြင်း

ကျနော်တို့အဖွဲ့ မောင်တော်မှာ စခန်းဆောက်နေချိန် ပထမဆုံး ရောက်လာတဲ့ အုပ်စုကတော့ကိုကျော်ကျော် (နောက်ပိုင်း ABSDF ရဲ့ အထွေထွေအတွင်းရေးမှူး ဖြစ်လာသူ။ NDD နဲ့ PDC မှာ လက်ရှိ ခေါင်းဆောင် တာဝန်ယူနေသူ) နဲ့ ရန်ကုန်က လာတဲ့ ကျောင်းသား ၄၊ ၅ ဦးပဲဖြစ်ပါတယ်။


သီဘောဘိုး စခန်းမှာ ကျင်းပသော ပထမအကြိမ် ABSDF အစည်းအဝေး တက်ရောက်ခဲ့သည့် ကိုတင်လေး၊ ဦးဟန်လင်း၊ ဦးစံရွှေအောင်နဲ့ ဦးအောင်ခင် အပါဝင် မင်းသမီးစခန်းဆီ အစောဆုံး ရောက်သွားသည့် တနင်္သာရီတိုင်း ကျောင်းသား ကိုယ်စားလှယ်များ (ဓာတ်ပုံ - စာရေးသူ၏ facebook မှ)


ဒုတိယရောက်လာတာကတော့ နတ်အိမ်တောင် စခန်းကနေ (ကျနော်တို့ ခွဲ ၁ မှာသောင်တင်နေသလို သူတို့အုပ်စုလည်း နတ် အိမ်တောင်မှာ သောင်တင်နေတာပါ) ရောက်လာတဲ့ အင်အား ၁၀၀ ကျော်ရှိတဲ့ ထားဝယ်နဲ့ ကံပေါက်အုပ်စု ဖြစ်ပါတယ်။

တတိယ ရောက်လာတာကတော့ မြိတ်နဲ့ ပုလောဒေသက လာတဲ့ အင်အား ၇၀၊ ၈၀ လောက်ရှိတဲ့ အုပ်စုဖြစ်ပါတယ်။ ဒီအုပ်စုကတော့ ကျနော်တို့ ဘန်းချောင်းဒေသခွဲ ၁ ရောက်ကတည်းက ထီးခီး ရေကန်ကြီးနားက KNUစစ်သင်တန်း ကျောင်းဆီ တခါတည်း တန်းရောက်သွားသူတွေဖြစ်ပြီး အဲဒီမှာ တလတာ အခြေခံ စစ်သင်တန်းပြီးလို့ ကျနော်တို့ စခန်းဆီ ရောက်လာတာပါ။

ကျနော်တို့ ရဲဘော် ၄ ကျိပ်ဟာ တလကျော် ဆိုးတူကောင်းဖက် ဖြတ်ကျော်လာခဲ့ပြီး ဖြစ်တဲ့အတွက် အချင်းချင်းကြားမှာ သိပ်ပြဿနာ မရှိတော့ပါဘူး။ ဒါပေမယ့် အင်အားသစ်တွေ ရောက်လာပြီး လူအင်အား ၂၀၀ ကျော် ၃၀၀ နီးပါး ရှိလာတဲ့ အခါမှာတော့ ထားဝယ်အုပ်စု၊ ကံပေါက်အုပ်စု၊ ပုလောအုပ်စု၊ မြိတ်အုပ်စု၊ ရန်ကုန်အုပ်စု စသဖြင့် အုပ်စုစွဲလေးတွေနဲ့ ဟိုပြောဒီပြော ဝေဖန်တိုက်ခိုက် တာလေးတွေ နည်းနည်း ရှိလာခဲ့ပါတယ်။ အဲဒီမှာ ကျနော်ကိုယ်တိုင် ကြုံလိုက်ရတဲ့ ပထမဆုံး အုပ်စု ပြဿနာကတော့ ၀က်သားဟင်း ဝေတာကို ထားဝယ်သားဆိုရင် ၂ တုံး ထည့်ပေးပြီး မြိတ်သားဆိုရင် တတုံးပဲ
ပေးတယ်ဆိုပြီး စွပ်စွဲ ခံလိုက်ရတာပါ။

ကျနော်မှတ်မိသလောက် ဆိုရင် အဲဒီနေ့က စားရတဲ့ ၀က်သားဟင်းဟာ ကျနော်တို့ မောင်တော် စခန်းရောက်ပြီး ပထမဆုံး စားရတဲ့ ၀က်သားဟင်းပါ။ နတ်အိမ်တောင်ဘက်ကနေ ရောက်လာသူတွေနဲ့အတူ အဲဒီဝက်သား ပါလာတာလို့ ကျနော် မှတ်မိ နေပါတယ်။ နတ်အိမ်တောင်စခန်းဟာ (၁၉၉၁ မှာတော့ စစ်အစိုးရက သိမ်းပိုက်လိုက်ပြီး ၁၉၉၆ မှာ ရတနာ ဓါတ်ငွေ့ပိုက်လိုင်း ဖြတ်သွားတဲ့ အဓိကနယ်စပ် နေရာ ဖြစ်လာပါတယ်) ကျနော်တို့ တောမခိုခင်ကတည်းက ထင်ရှားတဲ့ နယ်စပ်မှောင်ခို ကုန်သွယ်ရေး လမ်းကြောင်းကြီး တခုဖြစ်တဲ့အတွက် အဲဒီမှာ တာဝန်ကျတဲ့ KNU အုပ်ချုပ်ရေး အဖွဲ့ဟာ ကျနော်တို့ ဘန်ချောင်းက အဖွဲ့ထက် ပို ၀င်ငွေကောင်းပါတယ်။

ဆုိုိလိုတာကတော့ နတ်အိမ်တောင်ဘက် ရောက်သွားတဲ့ ကျောင်းသားတွေဟာ ကျနော်တို့ ဘန်းချောင်း ဒေသ ရောက်လာ သူတွေလို အစားအသောက်ဆင်းရဲမှု သိပ်မကြုံရဘဲ ငါးသေတ္တာဟင်းကိုတောင် မုန်းအောင် စားခဲ့ရတယ်လို့ ဆိုပါတယ်။ နောက်တခါ အဲဒီကာလက နတ်အိမ်တောင်ဒေသမှာရှိတဲ့ ကွမ်းချောင်းမြို့နယ်ရဲ့ KNU အုပ်ချုပ်ရေးမှူးကလည်း ၁၉၆၂ ဆဲဗင်းဇူလိုင် ကျောင်းသားလှုပ်ရှားမှုအတွင်း ပါဝင်ခဲ့တဲ့ ဖဒိုသမိန်ထွန်း (အခု KNU ဗဟိုကော်မတီဝင်) ဖြစ်တဲ့အတွက် ကျောင်းသားတွေကို အထူးအလေးပေး ဆက်ဆံခဲ့တယ်လို့ သိရပါတယ်။

နောက်တချက်ကတော့ နတ်အိမ်တောင် ကုန်သွယ်ရေး လမ်းကြောင်းမှာ နေ့စဉ်လူတွေ ရာနဲ့ချီ သွားနေတဲ့အတွက် ခရီးသွား ပြည်သူတွေကလည်း ကျောင်းသားတွေကို နိုင်သလောက် ကူညီထောက်ပံ့ ပေးခဲ့ကြတယ်လို့ သိရပါတယ်။

ဒီလိုနဲ့ ကျနော်တို့အုပ်စု မင်းသမီးဒေသဆီ ရောက်ပြီး မောင်တော်မှာ ကျောင်းသားခစန်း အသစ် စဆောက်နေပြီဆိုတဲ့ သတင်းရပြီးတာနဲ့ သူတို့အုပ်စုလည်း ကျနော်တို့ရှိရာ အရပ်ဆီ ကုန်းကြောင်းခရီး နှင်လာတာ ဖြစ်ပါတယ်။

ထိုင်းနယ်မြေထဲကနေ ကားနဲ့လာမယ်ဆိုရင် နတ်အိမ်တောင်နဲ့ မင်းသမီးစခန်းဟာ ၁၀ နာရီလောက်နဲ့ ရောက်နိုင်ပေမယ့် ဒီလောက် လူအများကြီးကို ကားနဲ့သယ်ဖို့ကမလွယ်၊ ထိုင်းနယ်မြေထဲ ဖြတ်ဖို့မလွယ်တဲ့အတွက် ၁၀ ရက်ကြာ ကုန်းကြောင်း ခရီးနှင် ချီတက်လာရတာ ဖြစ်ပါတယ်။ နတ်အိမ်တောင်စခန်းဟာ ရှေ့မှာ တင်ပြခဲ့တဲ့ တနင်္သာရီမြစ်လက်တက် ကွမ်းချောင်း ဖျားမှာ ရှိပြီး အဲဒီချောင်းရိုးနဲ့ တနင်္သာရီ မြစ်ကမ်းတလျှောက် နားလိုက်သွားလိုက်နဲ့ ၁၀ ရက်ကျော်ကြာအောင် လမ်းလျှောက် ချီတက်လာကြတာ ဖြစ်ပါတယ် (သူတို့လျှောက်ခဲ့တဲ့ ကလက်ကီး၊ အိုင်ဝိုင်း၊ ဆင်ဖြူတိုင်၊ အမိုရွာတွေ ရှိတဲ့ တနင်္သာရီ မြစ်ရိုး တလျှောက် လမ်းကြမ်းဟာ အခုတော့ ထားဝယ် – ကန်ချနပူရီ အဝေးပြေးကားလမ်း ဖြစ်သွားခဲ့ပါပြီ)

ဆိုခဲ့သလို နတ်အိမ်တောင်က လာခဲ့တဲ့ သူတို့နဲ့အတူ အဲဒီ ၀က်သားပါလာတာပါ။

မှတ်မှတ်ရရ အဲဒီနေ့က ကျနော် စားဖိုမှူးတာဝန် ကျတဲ့နေ့ပါ။ စားဖိုးမှူးဆိုပေမယ့် ဘန်းချောင်းကနေ တတ်လာတဲ့ မိုးပြဲဒယ်နဲ့
ထမင်းချက်နည်း လောက်သာ ကျွမ်းကျင်ပြီး ဟင်းချက်နည်းကိုတော့ မောင်တော်ရောက်တဲ့အထိ မတတ်သေးပါဘူး။

ဒီနေရာမှာ ဘန်းချောင်းဘက်က ထမင်းဟင်းနဲ့ နယ်စပ် မောင်တော်စခန်းက ထမင်းဟင်း ဘယ်လိုကွာသလဲ ဆိုတာကို
နည်းနည်း တင်ပြလိုပါတယ်။ ဘန်းချောင်းမှာ နေတုန်းက ကျနော်တို့စားရတဲ့ ထမင်းဟာ ကရင် တောင်ယာတွေက ထွက်တဲ့ ၀ါကျင်ကျင် အရောင်ရှိတဲ့ မောင်းထောင်း ဆန်ကြမ်းဖြစ်ပြီး အခု မောင်တော်ရောက်တဲ့ အခါမှာတော့ ထိုင်းကလာတဲ့ ၃ ပိုင်းကျိုး ဆန်ပျော့ကိုစားရပါတယ်။ ပိုဆိုးတာက အဲဒီ ၃ ပိုင်းကျိုး ဆန်ထဲမှာ ကြွက်ချေးလိုလို အနက်ရောင် မြက်ပင် ထိပ်ဖူးလေးတွေ ရောပြီး ပါလာတဲ့အဖြစ်ပါ (နောက်ပိုင်း ထိုင်းနိုင်ငံထဲရောက်မှ သိရတာက တောထဲမှာ ကျနော်တို့ စားခဲ့တဲ့ ဆန်တွေဟာ ထိုင်းမှာ ၀က်မွေးမြူရေး သမားတွေ သုံးတဲ့ ဆန်ကွဲတွေ ဖြစ်နေပါတယ်)

နောက်ထပ် ကျနော်သတိပြုမိတဲ့ ဆန်အရည်အသွေး ကွာခြားချက် တခုကတော့ ဘန်ချောင်းဆန်ကြမ်းဟာ အရောင်မလှ ပေမယ့် အဆာပိုခံနိုင်ပေမယ့် ထိုင်းဆန်ပျော့ကတော့ အဆာမခံဘဲ ခဏခဏ ပြန်ဆာနေလေ့ ရှိပါတယ်။ ဆန်အမျိုးစား ကွာသွားတဲ့အတွက် ထည့်ရတဲ့ ရေအချိုးအစားကလည်း ကွာသွားပါတယ်။ အိုးသူကြီး အတွေ့အကြုံ ရှိလာတာနဲ့အမျှ ဒယ်အိုးဖင်မှာ ကပ်ပီးကျန်နေတဲ့ ထမင်းချိုးကိုခွာ ဆီးလေးဆမ်း၊ ဆားလေး ပါးပါးဖြူးပြီး စားတဲ့အရသာဟာလဲ အိုးသူ
ကြီးနဲ့ အဖွဲ့အတွက် မဟာအခွင့်ထူးပါပဲ။

မောင်တော်စခန်းရောက် ကျနော်တို့ ကျောင်းသားတွေအတွက် နိုင်ငံတကာအလှူရှင်တွေက ဆန်နဲ့ဆားကို ဖောဖောသီသီ လာလှူထားပြီး ဆီပုံး၊ ငါးပိပုံး၊ ငရုတ်သီးခြောက်၊ ကြက်သွန်နီတွေကိုတော့ အကန့်အသတ်နဲ့ လာလှူထားပါတယ်။

ဘန်ချောင်းမှာတုန်းက ကျနော်တို့စားရတဲ့ ညာအိုးထီး (ငါးပိရည်) ထက် ထိုင်းကလာတဲ့ ငါးပိပုံးတွေက နည်းနည်း သာတယ် ဆိုပေမယ့် ကျနော်တို့စားနေကျ အစိမ်းစား ထားဝယ်ငါးပိကိုတော့ မမီပါဘူး။ ဒါပေမယ့် တောတွင်းအစားအစာနဲ့ နည်းနည်း ယဉ်ပါးလာပြီဖြစ်တဲ့ ကျနော်တို့ဟာ အရင်လို စားမ၀င် အိပ်မပျော် ကာလလိုမျိုး မဟုတ်တော့ဘဲ တယောက်ကို အနည်းဆုံး ၂ ပန်းကန်လောက် ဆွဲနိုင်လာပြီဖြစ်ပါတယ်။ ဒီနေ့လိုမျိုး ၀က်သားဟင်းနဲ့ ဆိုရင်တော့ ၃ ပန်းကန်လောက် ဆွဲဖို့ပြင်ထားတဲ့ သဘောရှိပါတယ်။

ဒါပေမဲ့ ၀က်သားက ၅ ကီလိုလောက်ပဲ ပါလာတဲ့အတွက် လူ ၂၀၀ ကျော်ကို လောက်ငှအောင် ဝေပေးနိုင်ဖို့ သိပ်မလွယ်ပါဘူး။ အတုံးသေးသေးလေး တယောက်တတုံးစီ ပေးနိုင်ဖို့ မှန်ဘီလူးနဲ့ကြည့်ပြီး အသဲအသန် ခွဲခြမ်းစိတ်ဖြာ နေရတဲ့အတွက်
၃ ပန်းကန်အတွက် ၃ တုံး ရဖို့ဆိုတာ မဖြစ်နိုင်ပါဘူး။

ဒါကြောင့် ဟင်းအိုးရှေ့ တန်းလာစီသူတွေကို ပထမတကြိမ် လာစီတဲ့လူသစ် စစ်စစ်တွေ ဟုတ်ရဲ့လား။ တခါစားပြီးသား ပန်းကန်ဟောင်းကို ချောင်းထဲမှာ အမြန်ဆေးပြီး ထမင်းအသစ်ထည့်၊ ဒုတိယအကြိမ် ပုံမှားရိုက် တန်းလာစီသူလား ဆိုပြီး စားဖိုးမှူးက အသေအချာ စိစစ်နေရတဲ့ သဘောပါ။ ဒါကို သဘောမပေါက်တဲ့ မြိတ်အုပ်စုက ကိုဂွမ်ရှီ (တနသာင်္ရီတိုင်း လက်ရွေးစင် ဘောလုံးသမား၊ နောက်ပိုင်းမှာ စခန်းကော်မတီဝင်၊ နောက် ဗကပ ဆီ ပြောင်းသွားပြီး ပျောက်ဆုံးသွားသူ) က အခုလို စွပ်စွဲလိုက်တာ ဖြစ်ပါတယ်။

“ဒယ် စားဖိုမှူး အား ဆိုးမား ဟေး။ တို့ မျက်နှာကို အသေချာကြည့်ပြီး ဘိတ်သားမှန်းလည်းသိရော ဟင်းတတုံးပဲ ပေးတယ်။ သူတို့ ထားဝယ်သားအချင်းချင်း ကျတော့ ၂ ခါတန်းစိရင် ၂ တုံးပေးတယ်။ ဘယ်နယ်မျိုး စားဖိုမှူးလဲ” ဆိုပြီး ကိုဂွမ်ရှီက မြိတ်လေသံနဲ့ လူပုံအလယ်မှာအော်ပြီး ကျနော့်ကို စွပ်စွဲပါ တော့တယ်။

ကျနော်လည်း အတော်ဒေါကန်သွားပြီး “ဘာအသားမှ မစားရဘဲ ငါတို့ တလကျော်နေလာတာ ဘာမှပြဿနာမှ မရှိဘူး။
အခု အသားစားရတော့မှ၊ ပိုင်ဆိုင်မှုလေး နည်းနည်း ရှိလာတော့မှပဲ ပြဿနာတက် တော့တယ်” လို့ ညည်းညူ လိုက်မိ ပါတယ်။

ဒီနေရာမှာ မြိတ်လေသံနဲ့ ထားဝယ်လေသံ ဘယ်လိုကွာသလဲ၊ တနင်္သာရီ တိုင်းမှာ ဘာသာစကား ဘယ်နှမျိုး ပြောသလဲ ဆိုတာကိုလည်း အကျဉ်းရုံး တင်ပြလိုပါတယ်။

တနင်္သာရီ တိုင်းဘက် မရောက်ဘူးသူတွေက ဘိတ်နဲ့ထားဝယ်ကို အတူတူလို့ ထင်ကြပေမယ့် တကယ်က မတူတာတွေ အများကြီးပါ။ ထားဝယ်စကားကို ရေဖြူ၊ လောင်းလုံ၊ သရက်ချောင်းနဲ့ ထားဝယ် ၄ မြို့နယ်မှာပဲ သုံးပြီး ပုလောမြို့က သီခြား လေသံနဲ့ စကားတမျိုး သုံးပါတယ်။ မြိတ်၊ ကျွန်းစု၊ တနင်္သာရီနဲ့ ဘုတ်ပြင်း ၄ မြို့နယ်က မြိတ်စကားကို သုံးပြီး ကော့သောင် မြို့နယ်ကတော့ ဗမာအသံနဲ့ ပိုတူတယ်လို့ ကျနော့်နားထဲ သတိထားမိပါတယ်။

ဒီလေသံ ၃၊ ၄ မျိုးအပြင် ကိုဌေးအောင်တို့၊ ကိုစံရွှေအောင်တို့၊ ကိုသိန်းဆောင်တို့လို ထားဝယ်မှာ အနေကြာသူ ဗမာတွေ ပြောတဲ့ လေသံကလည်း တမျိုးရှိပါသေးတယ်။ ဗမာအသံလည်းမဟုတ် ထားဝယ်လည်း မပီတဲ့အတွက် သူတို့ကို ဂံပျက် (ဗမာစကားကို ဂံစကားလို့ ထားဝယ်ဘက်မှာ ခေါ်ပါတယ်) တွေလို့ ခေါ်ကြပါတယ်။ ဗမာ စကားစစ်စစ် ပြောသူကတော့ ကိုကျော်ကျော်နဲ့ ရန်ကုန်သားအနည်းငယ်ပဲ ရှိပါတယ်။ အနှစ်ချုပ်လိုက်ရင်တော့ အရင်တုန်းက တခါမှမတွေ့ဖူးတဲ့ လူမျိုးစုံ၊ ဘာသာစကားမျိုးစုံ၊ စရိုက်မျိုးစုံ လူငယ် ၂၀၀ ကျော်ကို တောတွင်းစခန်းတခုမှာ စုထားတဲ့အချိန်မှာ ပြဿနာတွေ ကြုံရတယ်ပဲ ဆိုပါတော့။

အစားအသောက်နဲ့ ဘာသာစကား ပြဿနာအပြင် နောက်ထပ်ကြုံရတဲ့ ပြဿနာ တခုကတော့ စစ်သားနဲ့ အရပ်သား ပြဿနာပါ။ ထီးခီးရှိ KNU စစ်သင်တန်းကနေ သင်တန်းဆင်းပြီး ပြန်လာတဲ့ ပုလောနဲ့ မြိတ်အုပ်စုဟာ ကျနော်တို့လို အရပ်သား မဟုတ်တော့ဘူး။ သူတို့က စစ်သားဖြစ် သွားပြီဆိုတော့ ကျနော်တို့နဲ့အတူ ဘားတိုက်မှာ မနေတော့ဘဲ ခုနက ချောင်း သေးသေးလေးရဲ့ တခြားတဘက်မှာ သူတို့ဘာသာသူတို့ ဖြစ်သလို တဲထိုးပြီး နေလိုက်ပါတယ်။ ပြီးတော့ သူတို့ နေတဲ့ဘက်ကမ်းကို စစ်တပ်ကမ်းလို့ သတ်မှတ်လိုက်ပါတယ်။

တကယ်ကတော့ သူတို့ကိုယ်သူတို့ စစ်သားလို့ဆိုနေပေမယ့် KNU က ပေးလိုက်တဲ့ G3 ခပ်အိုအိုတလက်က လွဲပြီး သူတို့မှာ သေနတ်မရှိသေးပါဘူး။ ယူနီးဖေါင်းလည်း မရှိသေးပါဘူး။ ဒါပေမယ့် ကျနော်တို့ အချင်းချင်းကြားမှာတော့ သူတို့က
ခြေတလှမ်း ရှေ့ပြေးနေတဲ့ စစ်သင်တန်း ဆင်းပြီးသား၊ သေနတ်မရှိသေးတဲ့၏ သူပုန် စစ်သားကြီးတွေ ဆိုပါတော့။

အဲဒီအချိန်မှာပဲ ဆေးသင်တန်းပေးမယ်၊ အင်္ဂလိပ်စာ အခြေခံရှိသူတွေ လျှောက်နိုင်တယ်ဆိုပြီး KNU ဘက်က ကမ်းလှမ်း လာပါတယ်။ ဆက်သွယ်ရေး သင်တန်းကိုတော့ ကျနော်တို့ဆီက ပို့လိုက်တဲ့ အိုဃီးနဲ့ ဆန်းဇော်ထွန်း အပါအ၀င် မင်းသမီး ဒေသဆီ အစောဆုံး ရောက်လာသူတွေထဲက အင်္ဂလိပ်စာ အခြေခံရှိတဲ့ အမျိုးသား၊ အမျိုးသမီး ၁၀ ယောက်လောက်ကို ရွေးပြီး ထောက်လှမ်းရေးမှူး ဗိုလ်ကြီးဗိုလ်နီက ထီးခီးမှာ ပေးနေတာ တလကျော်ကြာနေပြီဖြစ်ပါတယ်။

ဆေးသင်တန်းကို ထီးထားဆေးရုံမှာ ပေးမှာဖြစ်ပြီး ဆေးမှူးနဲ့ အနောက်တိုင်းက ဗော်လန်တီယာတွေက သင်ပေးမှာ ဖြစ်ပါတယ်။ နောက်တခါ ထီးထားဟာ ကျနော်တို့စခန်းထက် နေသာထိုင်သာရှိတဲ့ နေရာဖြစ်တာကြောင့် အတော်များများ အဲဒီ သင်တန်းကိုဝင်လျှောက်ကြပြီး ကျနော်တို့ ရဲဘော် ၄ ကျိပ်ထဲက ကိုညီညီလွင်ခေါ် ကိုဖိုးချို အပါဝင် ၁၀ ဦးနီးပါး ပါသွားပါတယ်။

ကျနော်နဲ့ ကျန်တဲ့လူတချို့ကတော့ နိုင်ငံရေးနဲ့ စစ်ရေးကိုသာ အားသန်နေတဲ့အတွက် အဲဒီသင်တန်းတွေကို မလျှောက်ဖြစ် လိုက်ပါဘူး။

နောက်ဆုံး KNU ဘက်က ကမ်းလှမ်းလာတဲ့ သင်တန်းကတော့ ကျနော်တို့မျှော်နေတဲ့ စစ်သင်တန်းပါပဲ။ ဒါပေမယ့် သင်တန်းပေးမယ့်လူက ဗိုလ်စိုးသိန်းနဲ့ ဦးချစ်လွင်တို့ ဖြစ်နေတဲ့အတွက် ဒါကို လက်မခံနိုင်ဘူးဆိုပြီး ကျောင်းသားတွေက ငြင်းဆိုခဲ့ပါတယ်။ ဗိုလ်စိုးသိန်း ဆိုတာကတော့ KNU လက်အောက်ခံ ထားဝယ်သားတပ်ဖွဲ့ (နောက်ပိုင်းမှာ နအဖဆီ လက်နက်ချသွားသူ) က တပ်မှူးဖြစ်ပြီး ဦးချစ်လွင် ဆိုတာကတော့ ထားဝယ်ဆန္ဒပြပွဲတွေ အတွင်း ကျောင်းသားတွေနဲ့ ဆက်ဆံရေး အဆင်မပြေဖြစ်ခဲ့သူလို့ သိရပါတယ်။

ဒီလို ငြင်းလို့ခုန်လို့ ကောင်းတုန်းမှာပဲ ရှေ့မှာပြောခဲ့တဲ့ မကဲ-ကျောက်အိုင် ကနေ ရနောင်းကို ဆင်းပြီး မဲဆောက်နဲ့
သီဘောဘိုး စခန်းဆီ ရောက်သွားတဲ့ ကိုတင်လေးနဲ့အဖွဲ့ မောင်တော်စခန်းဆီ ပြန် ရောက်လာပြီး အတွေ့အကြုံ ရှင်းလင်းပွဲ လုပ်ပါတယ်။ အဓိက ရှင်းပြသူတွေကတော့ ကိုတင်လေး၊ ဦးဟန်လင်း (နောက်ပိုင်း စခန်းကော်မတီဝင် ဖြစ်လာသူ၊ နယူးယောက် ကုလသမဂ္ဂရုံးအထိ လမ်းလျှောက်ပွဲ လုပ်သူအဖြစ် ထင်ရှားပြီး ၂၀၀၈ မှာ ကွယ်လွန်) နဲ့ ဦးစံရွှေအောင် (နောက်ပိုင်းမှာ ကျနော်တို့နဲ့အတူ နယ်မြေကော်မတီဖွဲ့ဖို့ မဲဆောက်ဘက် အသွားမှာ မြဝတီဘက် ပြန်ဝင်သွားတယ်ဆိုပြီး သတင်းပျောက်သွားသူ) တို့ ဖြစ်ပါတယ်။ နောက်ကိုယ်စားလှယ် တဦးဖြစ်တဲ့ မြိတ်မြို့က အင်္ဂလိပ်စာ ကျွမ်းကျင်သူ ဦးအောင်ခင်ကတော့ စခန်းကို ပြန်မလာဘဲ ဗဟိုမှာ စကားပြန်တာဝန်နဲ့ ကျန်နေခဲ့ပါတယ်။

သူတို့ရှင်းပြတဲ့ အချက်အပေါ် ကျနော်နားလည် သလောက်တော့ “ဗဟိုကော်မတီတော့ ဖွဲ့လိုက်ပြီ။ ငါတို့စခန်းက တယောက်မှမပါဘူး။ အောက်ခြေမရှိတဲ့ လူအများစု ဗဟိုမှာ အရွေးခံရတဲ့အတွက် အလုပ်ဖြစ်မယ့် ဗဟိုကော်မတီ မဖြစ်နိုင်ဘူး။ ဒါကြောင့် တကယ်အလုပ်ဖြစ်နိုင်တဲ့ KNU နယ်မြေရောက် ကျောင်းသားတွေပါတဲ့ နယ်မြေ ကော်မတီဖွဲ့မယ်။
အဲဒီအတွက် ကိုယ်စားလှယ် ရွေးမယ်” ဆိုတာကို ကျနော် မှတ်မိနေပါတယ်။

သူတို့ ၃ ဦးကို ကြည့်ရတာ ဗဟိုကော်မတီ အစည်းဝေးဆီ ထပ်သွားဖို့ အတော်စိတ်ပျက်နေပုံ ရပြီး ကိုတင်လေးနဲ့ ဦးဟန်လင်းကတော့ ဗဟိုဘက်ကို လုံးဝ ပြန်မသွားတော့ဘူး၊ သူတို့ကို ကိုယ်စားလှယ်အဖြစ် ထပ်မရွေးပါနဲ့လို့
ပြောင်ပြောပါတယ်။ ပထမ အကြိမ်ညီလာခံဆီ မင်းသမီးစခန်း ကိုယ်စားလှယ်တွေအဖြစ် တက်ခဲ့သူတွေကတော့ ထားဝယ်က ကိုတင်လေး၊ ပုလောက ဦးဟန်လင်း၊ မြိတ်က ဦးအောင်ခင်နဲ့ ကံဘောက်ဘက်က ဦးစံရွှေအောင်တို့ပဲ ဖြစ်ပါတယ်။

ဒီလိုနဲ့ နယ်မြေကော်မတီအတွက် ကိုယ်စားလှယ်သစ် ၆ ဦးရွေးတဲ့အထဲ ပါဝင်လာသူတွေကတော့ ထားဝယ်အုပ်စုက ကိုအောင်သန်းဝင်း (နောက်ပိုင်း မင်းသမီးစခန်း ဥက္ကဋ္ဌ၊ ကိုမိုးသီးဇွန်ဗဟိုရဲ့ တွဲဘက် အတွင်းရေးမှူး၊ အခု အမေရိကန် ရောက်နေ) နဲ့ ကိုကျော်ထင် (နောက်ပိုင်း ဗဟိုစစ်ဦးစီးချုပ် တာဝန်ယူသူ။ အခုနော်ဝေးမှာ ရောက်နေ) ရန်ကုန်အုပ်စုက ကိုကျော်ကျော် (နောက်ပိုင်း ဗဟိုအတွင်းရေးမှူး၊ အခု NDD၊ PDC အဖွဲ့တွေမှာ တာဝန်ယူနေသူ) ရေဖြူ – ကံပေါက်အုပ်စုက ဦးစံရွှေအောင် (ကျနော်တို့နဲ့ အတူ မဲဆောက်က ဗိုလ်စိုးစိုး အိမ်မှာ တည်းနေစဉ် မြ၀တီဘက် ပြန်ဝင်သလိုလိုနဲ့ ပျောက်ဆုံး သွားသူ) ပုလော – မြိတ်အုပ်စုက ဦးအောင်ခင် (နောက်ပိုင်း ဗဟိုနိုင်ငံခြားရေးဌာန အရာရှိဖြစ်လာသူ။ အင်္ဂလိပ်စာ
ကျွမ်းလွန်းလို့ Mr. Dictionary လို့ ကျနော်တို့က ခေါ်ဝေါ်သူ။ အခု သြစတေးလျမှာလို့ ယူဆရ) နဲ့ လောင်းလုံအုပ်စုက ၀င်းထိန်ခေါ် ကျနော် ထက်အောင်ကျော်တို့ ဖြစ်ပါတယ်။ တကယ်ကတော့ တခြားလူ ၅ ဦးစလုံးဟာ ကျနော့်ထက် ပိုအရည်အချင်းရှိသူတွေ ဖြစ်သလို အရွေးမခံရသူတွေထဲမှာလည်း ကျနော့်ထက် အရည်အချင်း ပိုရှိသူတွေ အများကြီး ကျန်နေနိုင် သေးတယ် ဆိုတာကို ကျနော်စဉ်းစားမိပါတယ်။

ဘာကြောင့်လဲ ဆိုတော့ ကိုယ်စားလှယ်ကို လူဦးရေနဲ့အချိုးကျ ခွဲတာမျိုးမဟုတ်ဘဲ ထားဝယ်က ၂ ဦး၊ ရေဖြူက ၁ ဦး၊ ပုလောနဲ့ မြိတ်က ၁ ဦး။ လောင်းလုံက ၁ ဦး၊ ရန်ကုန်က ၁ ဦး ဆိုပြီး ခွဲတန်းချရာကနေ ၁၀ ယောက်တောင်မပြည့်တဲ့ လောင်းလုံ မြို့နယ်အတွက် ကျနော်က ကိုယ်စားလှယ်ပါသွားပြီး လူဦးရေ ၁၀၀ ကျော်စီရှိတဲ့ ထားဝယ်နဲ့ရေဖြူ အုပ်စုထဲက ကျနော့်ထက်
အရည်အချင်း ပိုရှိသူတွေ ကျန်နေခဲ့ နိုင်လို့ ဖြစ်ပါတယ်။ နောက်တခါ အဲဒီကာလ အခြေအနေအရ ဗဟိုထက် စခန်းကို ပိုအလေးထားသူတွေ ဟာလည်း အတော်များနေဆဲ ဖြစ်တဲ့အတွက် ဗဟိုအတွက် တမင်အရွေးမခံဘဲ စခန်းမှာပဲ တမင်ချန်နေခဲ့ သူတွေလည်း ရှိနိုင်တာကြောင့် ကြားချောင်ပြီး ကျနော်က ဗဟိုကို ပါသွားတာ ဖြစ်နိုင်တယ်လို့ ပြန်စဉ်းစားနေမိ ပါတယ်။

...............................................................................................................................

သူပုန်ကျောင်းသားတဦးရဲ့ မာရသွန်ခရီး (၇)

နယ်မြေကော်မတီ ဖွဲ့စည်းခြင်း (သို့မဟုတ်) မဲဆောက်ဒေသသို့ ပထမခရီးစဉ်။

မဲဆောက်နဲ့ ထိုင်းနိုင်ငံထဲ ပထမဆုံးအကြိမ် ခရီးထွက်ရတဲ့ နေ့ရက်အတိအကျကို

ဥက္ကဋ္ဌ ကိုထွန်းအောင်ကျော်နှင့် ပထမအကြိမ် ရွေးကောက်ခံ ဗဟိုကော်မတီဝင် တချို့ (ဓာတ်ပုံ - စာရေးသူ၏ facebook မှ)

ပြန်မမှတ်မိတော့ပေမယ့် အဲဒီနေ့ဟာ နိုဝင်ဘာလ ဒုတိယပတ်၊ တတိယပတ်လောက် ဖြစ်မယ်လို့ ခန့်မှန်းရပါတယ်။ ကျနော့်ဘ၀အတွက် ပထမဆုံး နိုင်ငံခြားခရီးစဉ် ဆိုပြီး စိတ်ထဲမှာ အတော်လှုပ်ရှား နေပါတယ်။ မြို့ပြ အငွေ့အသက်၊ မော်တော်ကား အခိုးအငွေ့တွေနဲ့ ၂ လကျော် ဝေးနေတဲ့ကျနော့်အဖို့ လွန့်တိုး (ပေါင်မုန့်ကား) မီနီဗင်လေးကို စီးပြီး ထီးခီးကနေ ထိုင်းဘက်ကို ထွက်လာ ကတည်းက အားလုံးဟာအသစ်အဆန်း ဖြစ်နေပါတယ်။

ကားမောင်းသူက ပဒိုသူရယ်၊ သူဘေးမှာက ထိုင်း ထောက်လှမ်းရေး တဦးပါတယ်လို့ ထင်ပါတယ်။ ကားနောက်ခန်း မှာကတော့ ကိုယ်စားလှယ် အသစ်ကျပ်ချွတ် ၅ ဦးဖြစ်တဲ့ ကျနော်၊ ကိုကျော်ကျော်၊ ကိုကျော်ထင်၊ ကိုအောင်သန်းဝင်း၊ ဦးစံရွှေအောင်နဲ့ KNU က တဦးပါတယ်လို့ မှတ်မိနေပါတယ်။
တနာရီကျော်ကျော်လောက် နယ်စပ် တောလမ်းအတိုင်း မောင်းပီးတာနဲ့ ဖြူးနေတဲ့ ကားလမ်းမကြီးကိုမြင်ရပြီး ၄ လမ်းမောင်း ကားလမ်းရဲ့ အလယ်မှာ မြက်ခင်းတွေ၊ ပန်းပင်တွေ၊ သစ်ပင်ငယ်တွေကို စနစ်တကျ စိုက်ထားတဲ့ပုံတွေက ကျနော့်မျက်စိထဲ အခုထိ မြင်နေဆဲဖြစ်ပါတယ်။


ရန်ကုန်-ပြည် လမ်းမမှာ စက်ဘီးစီးရင်း အကောင်းဆုံး ကားလမ်းလို့ ထင်ခဲ့တဲ့ ကျနော့်အဖို့ ထိုင်းနိုင်ငံက ဒီလမ်းပေါ် မှာသာ စက်ဘီးစီးလိုက်ရရင် စံချိန်အများကြီး တက်လာမယ်လို့ စိတ်ကူးယဉ်နေမိပါတယ်။
ဒီလို စိတ်ကူးယဉ်လို့ ကောင်းတုန်း ကျနော်တို့ထဲက တယောက်က ငှက်ဖျား တက်လာပါတယ်။ အကြောင်းလိုက်ရှာတော့ အဲယားကွန်းဖွင့်ထားလို့ အအေးမိတာ တဲ့။ ကံကောင်း တာကတော့ အဲဒီအချိန်အထိ ကျနော်က ငှက်ဖျား တခါမှ မဖြစ်ဘူး သေးတာပါ။ အဲယားကွန်းပိတ်ပြီး မှန်ပြူတင်းဖွင့် မောင်းတော့လည်း လေ တိုက်လွန်းတာကြောင့် အလုပ်မဖြစ်၊ ဒါနဲ့ ဓာတ်ဆီဆိုင်မှာ ခဏနား၊ ဆီဖြည့်၊ ထမင်းစားမယ်လုပ်တော့ ကျနော်တို့ ပုံစံတွေကို ဘေးလူတွေက ကွက်ကြည့် ကွက်ကြည့် လုပ်နေတာကို သတိထားမိလိုက်ပါတယ်။


ကြည့်မယ်ဆိုလည်း ကြည့်စရာပါပဲ။ ကျနော်တို့ရဲ့ ၀တ်စားဆင်ယင်မှုက ထိုင်းတွေနဲ့ ဘာမှမဆိုင်ဘဲ။
“ထိုင်း ထဲသွားရင် အဲဒီလုံချည်တွေနဲ့ မဖြစ်ဘူး။ ငါတို့ဘောင်းဘီတွေ အင်္ကျီတွေယူသွား” ဆိုပြီး ကိုတင်လေးနဲ့အဖွဲ့က သူတို့ရဲ့ အ၀တ်စားတွေကို ပေးလိုက်ပေမယ့် ဆင်ကြယ်ဖိနပ်ကတော့ သူတို့မှာလည်း တရံပဲ ရှိတဲ့အတွက် မပေးလိုက်ကြ ပါဘူး။ အဲဒီတော့ ကျနော်တို့မှာ အပေါ်ပိုင်းကို အငှားဝတ်စုံတွေနဲ့ ပုံမကျ ပန်းမကျဆင်းမြန်း၊ ဖိနပ်ကျတော့ စစ်သင်တန်း တက်ဖို့ ထုတ်ပေးထားတဲ့ ဗိယက်နမ် (ကားတာယာကို လှီးပြီး ကြိုးသိုင်း ဖိနပ်အဖြစ် အသွင်ပြောင်းထားတဲ့) စစ်ဖိနပ်တွေနဲ့။

နင်းဂျား လိုလို ဘာလိုလိုနဲ့ သူများ မျက်စိနောက်စရာ။ ဒါမှမဟုတ် ဘယ်ကလူတွေလဲ ဆိုပြီး ထိုင်းတွေအတွက် ကြောက်ရွံ့ စိုးရိမ်စရာ ဖြစ်နေနိုင်ပါတယ်။

ထမင်းမှာစားတဲ့ အခါမှာလည်း ထိုင်း ထမင်းဟင်းကို ကျနော်တို့ မစားတတ်သေးပါဘူး။ ပန်းကန် တချပ်ထဲမှာ ထမင်းရော ဟင်းပါ ရောထည့်ပြီး တခါစား ထည့်ပေးလိုက်တာကို ကျနော်တို့က ထမင်းကို အကုန်စား၊ ဟင်းဖတ်တွေကို ချန်ပြီး နောက်ထပ် ထမင်းချည်းသက်သက် ထပ်မှာတဲ့ အခါမှာတော့ ဆိုင်ရှင်ရော၊ ကျနော်တို့ကို လိုက်ပို့တဲ့ ထောက်လှမ်းရေးရော ပြုံးစိစိ ဖြစ်သွားပါတယ်။
ဒီတော့မှ ထမင်းကို များများစားပြီး ဟင်းကို နည်းနည်းပဲ စားခွင့်ရခဲ့တဲ့ ငါတို့ရဲ့ အကျင့်ဆိုးက သူများတွေအတွက် ရယ်စရာ ဖြစ်နေပါလား ဆိုပြီး သတိပြုမိပါတယ်။

ဒီလို ထူးဆန်းတဲ့အတွေ့အကြုံ သစ်တွေနဲ့ ခရီးထွက်လာခဲ့တဲ့ ကျနော်တို့ အဖွဲ့ဟာ ည ၈ နာရီ၊ ၉ နာရီ လောက်မှာတော့ မဲဆောက်မြို့က ဗိုလ်မှူး စိုးစိုးအိမ်ကို ရောက်သွားပါတယ်။ ကျနော်မှတ်မိသလောက် အဲဒီတုန်းက ဗိုလ်မှူးစိုးစိုး အိမ်ရှေ့ လမ်းဟာ မြေနီလမ်းပဲ ရှိသေးပြီး မဲဆောက် – မြ၀တီ လိုင်းကားတွေလည်း အဲဒီမြေနီလမ်းပေါ်မှာ ပြေးနေတာကို နောက်တနေ့ မနက်မှာ မြင်ခဲ့ရပါတယ်။

ဗိုလ်မှူးစိုးစိုးအိမ်မှာ ကျနော်တို့ ပထမဆုံး တွေ့ခဲ့တဲ့ ပုဂ္ဂိုလ်တွေကတော့ အခု ဒေါက်တာစင်သီယာမောင် ဆေးခန်းမှာ တာဝန် ထမ်းနေကြတဲ့ ကိုစိန်ဟန်၊ ကိုဝဏ္ဏ၊ နော်ထူးနဲ့ KNU ဆက်သွယ်ရေးက ဗိုလ်တဦးနဲ့ ခရီးသွားလက်မှတ် ထုတ်ပေးတဲ့ ဗိုလ်တဦးတို့ ဖြစ်ပါတယ်။ ဗိုလ်မှူးစိုးစိုး အိမ်ကတော့ အခု ရှိနေတဲ့ အတိုင်းပါပဲ။ ဝင်ပေါက်မှာ အလွန်လေးလံပြီး အားစိုက် တွန်းမှပွင့်တဲ့ သံတံခါးကြီး တခုရှိပါတယ်။ အဲဒီတခါးရဲ့ဘေးမှာ အိမ်ငယ်တလုံးရှိပါတယ်၊ နောက်မှာတော့ ၃ ထပ်တိုက်၊ အောက်ဆုံးထပ်မှာ ဧည့်ခန်း၊ အပေါ်ထပ်မှာတော့ အိပ်ခန်းနဲ့ အထူးဧည့်ခန်း၊ အပေါ်ဆုံး ထပ်မှာတော့ ဗိုလ်မှူးစိုးစိုးရဲ့ နိုင်ငံခြားရေး ရုံးခန်းနဲ့ ဆက်သွယ်ရေး ရုံးခန်းတွေရှိပါတယ်။

ကျနော်တို့ကို နေရာချပေးတဲ့ အခန်းကတော့ စားဖိုဆောင်ဘေးက အိပ်ခန်းတခု။ ၂ ယောက် အိပ်ခန်းဆိုပေမယ့် ကျောင်းသားတွေရဲ့ ထုံးစံအတိုင်း ကျနော်တို့ ၅ ဦးနဲ့ အရင်ရှိနေတဲ့ ဦးအောင်ခင်၊ ကိုဝဏ္ဏ၊ ကိုစိန်ဟန် အပါဝင် အားလုံး ၈ ဦး အိပ်ရပါတယ်။ ရှေ့မှာ ပြောခဲ့သလို တောထဲရောက်ရောက်ခြင်း အသားနားဆုံး အဆောက်အအုံအဖြစ် ပထမဆုံး သတိထားမိတာဟာ ထီးထာချောင်းဝက KNDO ရုံးဖြစ်သလို မဲဆောက်မှာ ပထမဆုံး သတိထားမိတာဟာ ဗိုလ်မှူး စိုးစိုး အိမ်ပဲဖြစ်ပါတယ်။

ထမင်းစား တဲ့စားပွဲကို ကြည့်ပါဦး။ အရောင်တောက်နေတဲ့ ကျွန်းသစ်သား၊ တောပိတောက်သားတွေနဲ့ လုပ်ထားတဲ့ ဆုံလည်စားပွဲကြီး။ ဆုံလည်စားပွဲနဲ့ တခါမှ ထမင်းမစားဘူးတဲ့ ကျနော့်ခမျာ စားပွဲကြီး လည်နေလို့ ကိုယ်စားချင်တဲ့ဟင်းကို ဘယ်လိုယူရမှန်း မသိ ဖြစ်ရပါတယ်။ နောက် ဧည့်ခန်းထဲက စားပွဲတွေ၊ ကုလားထိုင်တွေကိုလည်း ကြည့်ပါဦး။ ကျွန်းသစ်တွေ၊ တောပိတောက်တွေနဲ့ အသေချာလုပ်ထားတဲ့ ပရိဘောဂတွေပါ။ အဝင်အထွက်လုပ်နေတဲ့ ကားတွေကလည်း ကျနော် ဗမာပြည်မှာ တုန်းက မမြင်ဘူးတဲ့ ကားတွေ၊ ဆိုင်ကယ်တွေ။ လူတွေကလည်း ကရင်တွေအပြင် ထိုင်းတွေ၊ လူဖြူတွေ စုံလို့ပါပဲ။

အဲဒီကာလက ဗိုလ်မှူးစိုးစိုးရဲ့ သြဇာကြီးပုံကိုလည်း ကြည့်ပါဦး။ သူ့အိမ်ရှေ့က ဝရံတာမှာ စားပွဲ တလုံးနဲ့ ခရီးသွားလက်မှတ် ထုတ်ပေးနေတဲ့ KNU အရာရှိတဦးဆိုရင် တနေကုန် မအားရပါဘူး။ ဗိုလ်မှူးစိုးစိုး လက်မှတ်ပါတဲ့ ကော်သူးလေအစိုးရ ခရီးသွား လက်မှတ်နဲ့ မဲဆောက်တခွင်လုံး သွားလို့ရတယ်၊ ဘယ်ထိုင်းရဲကမှ မဖမ်းဘူး။ သာမန်အရပ်သားတွေက တစောင် ၁ဝ ဘတ်လား၊ ၂၀ လားမသိ ပေးရပါတယ်။ ကျနော်တို့ ကျောင်းသားတွေကိုတော့ တပြားမှ မယူတဲ့အပြင် (ပေးစရာလည်း တပြားမှ မရှိပါ) ကရင် စစ်သားတွေနဲ့ တန်းတူထားပြီး စပယ်ရှယ် ကရင်စစ်သားအဖြစ် သတင်း ၂ ပတ်စာ လက်မှတ်တွေ ပေးထားပါတယ်။

ကျနော်မှတ်မိသလောက် ဗိုလ်မှူးစိုးစိုးအိမ်မှာ တပတ်လောက်သောင်တင်ပြီး နောက်မှာတော့ ကျနော်တို့ ၆ ဦးကို မယ်သလေ (ခေါ်) ကလက်ဒေး စခန်းဆီ ပို့လိုက်ပါတယ်။ မဲဆောက်ကနေ
သောင်းရင်းမြစ်တလျောက် ၃ နာရီလောက် မောင်းရတဲ့ ကားလမ်းကတော့ ကန်ချနပူရီ – တာ့ခ် -မဲဆောက် လမ်းလို မချောမွေ့တော့ပါဘူး။ ကျနော်တို့ ထားဝယ်ဘက်က ကားလမ်းတွေလို ခပ်ကျဉ်းကျဉ်းနဲ့ အကွေ့အကောက်များပြီး တောင်တက်၊ တောင်ဆင်း လမ်းတွေများပါတယ်။ ဒါပေမယ့် သောင်းရင်းမြစ်ကို ကြည့်လိုက်၊ မြစ်ဘေး မြန်မာဖက်အခြမ်းက တောင်ကတုံး တွေကိုငေးလိုက်၊ ထိုင်းဘက်က ကျွန်းသစ်တော စိုက်ခင်းတွေကိုငေးလိုက်၊ လမ်းတလျောက်က ထိုင်း – ကရင်ရွာ ဈေးတန်းမှာရပ်လိုက်နဲ့ အိပ်ငိုက်စပြုချိန်မှာ ကလက်ဒေးစခန်းရဲ့ ထိုင်းဘက်ကမ်း မယ်သရီ ဈေးတန်းကို ရောက်လာပါတယ်။

ကျနော့်စိတ်ထဲ မော်လမြိုင်မြို့ ဒေါင်းမင်းလမ်းထဲက မှောင်ခိုတန်းကို ရောက်သွားသလိုပါပဲ။ အဝတ်အထည်၊ လျှပ်စစ်ပစ္စည်း၊ ရေချိုးခန်းသုံးပစ္စည်း၊ အစားအသောက်အစုံရတဲ့ တကယ့်ဈေးတန်းကြီးဖြစ်ပါတယ်။ ထိုင်းဘက်ကမ်းက ဈေးဆိုပေမယ့် ထိုင်းလို မတတ်လည်း ပြဿနာ မရှိပါဘူး။ အားလုံးက ကရင်နဲ့ ဗမာစကားကို နားလည်ကြပါတယ်။ နောက် မော်လမြိုင် မှောင်ခိုဈေး ဆိုတာကလည်း ဒီဈေးက ပစ္စည်းတွေ ဖြစ်နေပြီး နွားလာရောင်းတဲ့ လူတွေက နည်းမျိုးစုံနဲ့ ရွေဂွန်း – လှိုင်းဘွဲ့အထိသယ်ပြီး ဘားအံ – မော်လမြိုင် အထိ သွားသွင်းကြတယ်လို့ သိရပါတယ်။

အဲဒီဈေးတန်းမှာ သူများတိုက်တဲ့ အအေးတခွက်စီ သောက်ပြီးနောက်မှာတော့ ကလက်ဒေးဘက်ကို ကျနော်တို့ကူးပါတယ်။ ပေ ၅၀ လောက်အကျယ်ရှိတဲ့ သောင်ရင်းမြစ်ထဲမှာတော့ “ဖုတ် – ဖုတ် – ဖုတ်” မြည်နေတဲ့ အင်ဂျင်အား ကောင်းကောင်း စက်လှေ ၃ဝ လောက် ဟိုဘက်ဒီဘက်
ခေါက်တုန့် ခေါက်ပြန် ပြေးနေပါတယ်။ ခရီးသည်ဆိုရင် ၅ ဘတ်၊ ကျိုဖိုး (ကျောင်းသား) ဆိုရင်တော့ အလားကား တင်ပေးပါတယ်။

နောက်မှ ကျနော်ပြန်သိရတာက အဲဒီစက်လှေ ၃ဝ ကျော်ဟာ ဟိုဘက်ဒီဘက် ကူးနေတာ မဟုတ်ဘဲ သောင်ရင်းမြစ် တလျောက်ပြေးနေတဲ့ စက်လှေတွေဖြစ်ပါတယ်။ ဒါပေမယ့် ကျနော်တို့ ရောက်သွားတဲ့အချိန်မှာ ကလက်ဒေးရဲ့ အပေါ်ဘက် (သောင်းရင်းမြစ်က
ပြောင်းပြန်စီးတဲ့အတွက် မြစ်ရေစီး အတိုင်း ခေါ်မယ်ဆိုရင် အောက်ဘက်လို့ ခေါ်သင့်ပါတယ်) ၃၊ ၄ မိုင်လောက် အကွာက မဲသဝေါတောင်မှာ တိုက်ပွဲ ဖြစ်နေတဲ့အတွက် လှေအသွားအလာ ရပ်ပြီး ဒီမှာလာစုပုံ နေတာ ဖြစ်ပါတယ်။ အဲဒီ မဲသဝေါ တောင်ကိုလည်း အခု ကျနော်တို့ ရောက်နေတဲ့ ကလက်ဒေးကနေ ခပ်ဝါးဝါးလေး လှမ်းမြင် နေရပါတယ်။

ကလက်ဒေးဘက်ရောက်တော့ KNU အကောက်ဂိတ်က မေးမြန်းစစ်ဆေးပြီး ကျောင်းသား စခန်းဆီ ကျနော်တို့ကို ပို့လိုက် ပါတယ်။ ကျောင်းသားစခန်းဆိုပေမယ့် ကျနော်တို့ မင်းသမီးစခန်းလို တောကြိုအုံကြားမှာ မဟုတ်ပါဘူး။ နယ်စပ်ဂိတ်နဲ့
၅ မိနစ်တောင် လမ်းလျောက်စရာမလိုတဲ့ ကလက်ဒေးရွာဘေးက တောင်ကုန်းလေးပေါ်မှာပါ။
ဆောက်ထားတဲ့ အဆောက်အဦ တွေကလည်း ကျနော်တို့စခန်းလို ၀ါးတဲစုတ်မဟုတ်ပါဘူး။ တောင်ကုန်းထိပ်က အဆောက် အဦဆိုရင် ရှေမှာကျနော်ပြောခဲ့တဲ့ ထီးထားက KNDO ရုံးထက် ၂ ဆ လောက် သားနားပြီး အထက ကျောင်းတခု ပုံစံလိုမျိုး ဖြစ်နေပါတယ်။

အဲဒီဘေးက ကျောင်းသားတွေနေတဲ့ ဘားတိုက်ကလည်း သစ်သားတွေနဲ့ အသေအချာ ဆောက်ထားလို့
အတော်ကောင်းတဲ့ နေရာတွေပါ။ တကယ်ကတော့ ခုနက အသားနားဆုံးလို့ ကျနော်ပြောလိုက်တဲ့ အဆောက်ဦဟာ မနေ့တနေ့ ကမှ DAB (ဒီမိုကရက်တစ် မဟာမိတ်အဖွဲ့) ညီလာခံ လုပ်ခဲ့တဲ့နေရာလို့ သိရပါတယ်။

DAB ရဲ့ ထူးခြားချက်ကတော့ အရင်ကရှိပြီးသား တိုင်းရင်းသား လက်နက်ကိုင် ၁ဝ-ဖွဲ့ဖြစ်တဲ့ (ကရင်၊ ကရင်နီ၊ ကချင်၊ မွန်၊ ရခိုင်၊ ပလောင်၊ ပအိုဝ်း အပါဝင်) NDF ခေါ် အမျိုးသား ဒီမိုကရေစီ တပ်ပေါင်းစုနဲ့ အသစ်ရောက်လာတဲ့ ၁၂ ဖွဲ့၊ (ABSDF, CRDB, ABYMU, အပါဝင်…) အထူးသဖြင့် ကျောင်းသားအုပ်စုတွေနဲ့ ပူးတွဲဖွဲစည်းလိုက်တဲ့ အသစ်စက်စက် မဟာမိတ် တပ်ပေါင်းစု ဖြစ်ပါတယ်။ ဥက္ကဋ္ဌ ကတော့ အဲဒီကာလရဲ့ ထုံးစံအတိုင်း KNU ဥက္ကဋ္ဌ ဗိုလ်ချုပ်မြ၊ ဒုတိယဥက္ကဋ္ဌ တွေကတော့ KIO ဥက္ကဋ္ဌ ဘရန်ဆိုင်း၊ မွန်ပြည်သစ် ဥက္ကဋ္ဌ နိုင်ရွှေကျင်၊ ပြည်ချစ်ပါတီဥက္ကဋ္ဌ ဦးသွင်နဲ့ အတွင်းရေးမှူး အဖြစ်ကတော့ ကျောင်းသားတွေနဲ့ အတူ အသစ်ပါလာတဲ့ အမေရိကန်ပြန် CRDB အဖွဲ့က ပြည်ချစ် လက်ဟောင်း ဦးတင်မောင်ဝင်းတို့ပါ။ တွဲဘက်အတွင်းရေးမှူး အဖြစ်ကတော့ ကျနော်တို့ ABSDF ရဲ့ အထွေထွေအတွင်းရေးမှူး ကိုသန်းဝင်း ဖြစ်ပါတယ်။

အဲဒီ DAB ညီလာခံ လုပ်ပြီးသွားတဲ့နေရာမှာ ကျနော်တို့အုပ်စုကို နေရာချပေးပါတယ်။ အဲဒီကာလ ABSDF ဗဟိုကော်မတီဝင်တွေကတော့ ဥက္ကဋ္ဌ ကိုထွန်းအောင်ကျော်၊ ဒု – ဥက္ကဋ္ဌ ကိုဝင်းမိုး၊ အထွေထွေ အတွင်းရေးမှူး ကိုသန်းဝင်း၊ တွဲဘက် အထွေထွေအတွင်းရေးမှူး ၁ – ကိုအောင်နိုင် (အခု VOA – မြန်မာပိုင်း ဌာနမှူး ကိုသန်းလွင်ထွန်း) တွဲဘက် အတွင်းရေးမှူး ၂ – ဆလိုင်းကိုကိုဦးတို့ ဖြစ်ပါတယ်။
ဗဟိုဦးဆောင် ကော်မတီဝင်တွေ အဖြစ်ကတော့ နိုင်ငံခြားရေး ဌာနအတွက် စိုင်းမျိုးဝင်းထွန်း (အခု ရှမ်းခေါင်းဆောင် ဦးခွန်ထွန်းဦးတို့နဲ့အတူ နှစ်ရှည် ထောင်ကျခံနေရသူ)၊ စည်းရုံးရေး ဌာနအတွက် ကိုထွန်းဦး (ကျဆုံး) ပြန်ကြားရေး ဌာနအတွက် ကိုကိုလေး၊ ထောက်ပံ့ရေး ဌာနအတွက် ကိုကြည်မိုး၊ လုပ်ငန်းစစ်ဆေးရေး ဌာနအတွက် ကိုမောင်မောင်သိန်း၊ စည်းကမ်း ထိမ်းသိမ်းရေး ဌာနအတွက် ကိုကျော်လင်း၊ ကျန်းမာရေး ဌာနအတွက် ဒေါက်တာသာသာဦး၊ ဘဏ္ဍာရေး ဌာနအတွက် ကိုကျော်ထင် (မင်းသမီးစခန်းက ကိုကျော်ထင်နဲ့ အမည်တူသူ) တို့ ဖြစ်ပါတယ်။

ကလက်ဒေးစခန်းရဲ့ အခြေအနေက ကျနော်တို့ စခန်းနဲ့ တခြားစီပါ။ ကုန်သွယ်ရေးလမ်းကြောင်း
ဖြစ်တဲ့အပြင် သူပုန်တွေရဲ့ တပ်ပေါင်းစုညီလာခံ ကျင်းပတဲ့နေရာလည်း ဖြစ်နေတဲ့အတွက် ကလက်ဒေးဟာ ကျနော်တို့ ရောက်ခဲ့ဖူးတဲ့ ထီးထာ။ ထီးခီးတွေထက် အဆမတန် စည်ကားဝေဆာ နေပါတယ်။
စခန်းတွင်း အစားအသောက်ကလည်း ကျနော်တို့စခန်းထက် အများကြီး ပိုအဆင်ပြေနေတာကို
တွေ့ရပါတယ်။ ညနေပိုင်း ရွာထဲခဏ၀င်လည်တော့လည်း အိမ်တွေက ဖြစ်သလိုဆောက်ထားတာ မဟုတ်ဘဲ ရပ်ကွက်ပုံစံ အကွက်ချ ဆောက်ထားတာ ဖြစ်ပြီး လျှပ်စစ်မီးလိုင်းတွေ၊ ရေပိုက်တွေပါ တပ်ပေးထားတာကို တွေ့ရတော့ KNU မှာလည်း မြို့ပြ အုပ်ချုပ်ရေးစနစ် ရှိသားပဲလို့ ကျနော် တွေးလိုက်မိပါတယ်။

ဈေးဆိုင်တန်းတွေ အပါအ၀င် ဒီရွာထဲမှာ အိမ်ခြေ ၁၀၀ ကျော်လောက် ရှိမယ်လို့ ခန့်မှန်းရပေမယ့် တရွာလုံးအနှံ့တော့ ကျနော် မသွားဖြစ်ခဲ့ပါဘူး။ ကလက်ဒေးစခန်းမှာ ကျောင်းသားဦးရေ ၁၀၀ ကျော်လောက် ရှိပြီး အများစုဟာ ကရင်ပြည်နယ် ဘားအံ၊ လှိုင်းဘွဲ့နဲ့ ရွေဂွန်းဘက်က ဖြစ်ကြပါတယ်။ အဲဒီကာလက စခန်းကော်မတီထဲမှာ ကျနော် မှတ်မိနေသူ တချို့ကတော့ ဒေါက်တာ ကျော်သက်ဦး၊ ကိုအာယု၊ ကိုဝေလင်းဇင် (အခုထိ ABSDF ဗဟိုမှာတာဝန်ထမ်းဆဲ)၊ ကိုဝင်းမြင့် (အခု BBC သတင်းဌာနမှာ တာဝန်ထမ်းနေသူ) ကိုအောင်ဟိန်း (နောက်ပိုင်းမှာ ဗဟိုကော်မတီ ဖြစ်လာပြီးမှ ငွေဘုန်းပြီး ပြည်တွင်း
ပြန်ဝင်သွားသူ) နောက် တိုင်းဂါးတို့ညီနောင်ကို ကျနော် သတိထားမိပါတယ်။

ဗဟိုဘက်က ရောက်နေတဲ့ ခေါင်းဆောင်တွေထဲက ကျနော်တို့နဲ့ တွဲရသူတဦးကတော့ ရှေ့နေ ကိုကျော်လင်းဖြစ်ပါတယ်။ ကျနော်တို့လိုပဲ KNU နယ်မြေကော်မတီ အတွက် ရောက်နေတဲ့ တခြားစခန်းက ကိုယ်စားလှယ်တွေ ထဲမှာတော့ သီဘောဘိုးက ကို ခင်မောင်စိုးနဲ့ ကိုတင်ဌေး၊ ဝမ်ခါ (ကော့မူးရာ) စခန်းက ကိုသိန်းထွန်းနဲ့ ကိုသိန်းလွင်၊ သံလွင်စခန်းက ကိုသိန်းဆန်း၊ ကိုမောင်မောင်တိတ်နဲ့ ကိုအောင်သူ၊ စောထ စခန်းက ကိုမောင်မောင်စိုး၊ ကိုသိန်းထိုက်နဲ့ ကိုဇော်ခင်တို့ ဆိုတာ ကျနော့်စိတ်ထဲ အမှတ်ရနေပါတယ်။     ။

မှတ်ချက်။     ။ ပြီးခဲ့သည့် နိုဝင်ဘာ ၁ ရက်နေ့က ကျောင်းသားတပ်မတော် (ABSDF) ၂၃ နှစ်ပြည့်ခဲ့ပြီ ဖြစ်သည်။ အထက်ပါ ဆောင်းပါးထဲမှ အဖြစ်အပျက်သည် လွန်ခဲ့သည့် ၂၃ နှစ် ABSDF ဖွဲ့စည်းပြီးကာစ အခြေအနေကို ဖော်ကျူးပါသည် – ဧရာဝတီ။
.......................................................................................................................


သူပုန်ကျောင်းသားတဦးရဲ့ မာရသွန်ခရီး ၈

ဆီးပင်တန်းညီလာခံ
နှစ် ၂ဝ ကျော်ကြာပြီးတဲ့နောက် အချက်လက် အတော်များများကို ပြန်မှတ်မိဖို့ ကျနော်မနည်း ကြိုးစားနေရပေမယ့် KNU နယ်မြေ ကော်မတီဖွဲ့တဲ့နေ့ကို စဉ်းစားရင်း အလိုလို သတိရနေတာကတော့ “ကျောက်စရစ် မာခေါင်ခေါင်မှာ အတောင်ကျွတ်တဲ့ ကြိုးကြာပမာ” (ရေရှာ မရသကဲ့သို့) ဆိုတဲ့ စကားလုံးပဲ ဖြစ်ပါတယ်။
အဲဒီ စကားလုံးရဲ့ ပိုင်ရှင်ကတော့ သံလွင်စခန်းရဲ့ ကိုယ်စားလှယ် (နောက်ပိုင်း ၂၀၉ တပ်ရင်းမှူးနဲ့ ဗဟိုကော်မတီဝင် ဖြစ်လာသူ) ကိုသိန်းဆန်းဖြစ်ပြီး လက်ရှိဗဟိုကော်မတီ အောက်ခြေ လွတ်နေပုံကို ဝေဖန်ထောက်ပြ လိုက်တာ ဖြစ်ပါတယ်။

သီဘောဘိုးစခန်းမှာကျင်းပတဲ့ ABSDF ဖွဲ့စည်းရေးအစည်းဝေးဆီ တက်ခဲ့သော စခန်းအသီးသီးက ကိုယ်စားလှယ်တချီု့ (ဓာတ်ပုံ - စာရေးသူ facebook မှ)

သူ့ရဲ့ ဝေဖန်ပြောဆိုချက်တွေဟာ ထိရောက်ပေမယ့် သူများကို ပြောခွင့်မပေးဘဲ၊ သူချည်း နင်းကန်ပြောနေလို့ သဘာပတိက မကြာခဏ တားနေရပါတယ်။ ဒါပေမယ့် ရှေ့မှာ တင်ပြခဲ့တဲ့ အတိုင်း အရည်အချင်း ရှိလွန်းလို့ မဟုတ်ဘဲ ခွဲတမ်းအရ ကိုယ်စားလှယ် ပါလာတဲ့ ကျနော့် ခမျာတော့ ကိုသိန်းဆန်းကိုကြည့်ပြီး ငါလည်း သူ့လို ပြောနိုင်အောင် လေ့ကျင့်ဖို့ လိုနေသေးပါလား ဆိုတာကို သတိရစေပါတယ်။
ဘာကြောင့်လဲဆိုရင် အဲဒီအချိန်ထိ ကျနော်ဟာ နိုင်ငံရေး စကားလုံးတွေကို သူများနားဝင်အောင် ပြောတတ်သူ မဟုတ်သေးလို့ပါ။ လူရှေ့မှာ စကားပြောရတာကိုလည်း အလေ့အကျင့်က မရှိသေးတော့ ခြေတုန်လက်တုန် ဖြစ်နေဆဲပါ။


နယ်မြေကော်မတီအတွက် ကျနော်တို့ အစည်းအဝေးလုပ်တဲ့ နေရာကတော့ ခုနက DAB အစည်းအဝေး လုပ်ရာ အဆောက်အအုံရဲ့ အနောက်ဘက် ခပ်လှမ်းလှမ်းက မူလတန်း ကျောင်းလေးမှာ ဖြစ်ပါတယ်။ ကျွန်းသစ်တွေနဲ့ အခိုင်အမာ ဆောက်ထားတဲ့ အဲဒီကျောင်းလေးရဲ့ နဘေးမှာ ဆီးပင်တန်းလေး ရှိတဲ့အတွက် ဆီးပင် တန်းကျောင်းလို့ အလွယ် မှတ်ထားပါတယ်။

ဖွင့်ပွဲနေ့မှာ အမှာစကား လာပြောသူတွေကတော့ DAB ဒုဥက္ကဋ္ဌ အဖြစ် တာဝန်ယူထားသူ ကချင်လွတ်လပ်ရေး တပ်မတော် (KIO) ဥက္ကဋ္ဌ မရန်ဘရန်ဆိုင်း၊ KNU ဒု ဥက္ကဋ္ဌ ဖဒိုသန်းအောင်နဲ့ ရဟန်းပျိုအဖွဲ့က အရှင် ခေမာစာရတို့ ဖြစ်ပါတယ်။ နောက်တခါ ဒေါက်တာ စင်သီယာမောင်လည်း ကျနော်တို့ အစည်းအဝေးကို တက်တယ်လို့ အမှတ်ရနေပါတယ်။ ဒေါက်တာစင်သီယာမောင်ကို ကျနော်တို့ နယ်မြေကော်မတီမှာ ကျန်းမာရေး တာဝန်ခံအဖြစ် တာဝန်ပေးဖို့ အဆိုပြုခဲ့ပေမယ့် သူက လက်မခံဘဲ တသီးပုဂ္ဂလ အဖြစ်နဲ့သာနေပြီး အတတ်နိုင်ဆုံး ကူပေးမယ်လို့သာ ပြောခဲ့တယ်လို့ ထင်ပါတယ်။
ဧည့်သည်တော် ဥက္ကဋ္ဌ ဘရန်ဆိုင်းနဲ့ ဖဒိုသန်းအောင်တို့ ဘာတွေပြောသွားသလဲ ဆိုတာကို ကျနော် မမှတ်မိတော့ပေမယ့် စတိုင်ကျလှတဲ့ ဘရန်ဆိုင်းရဲ့ ပုံကိုတော့ အခုအချိန်ထိ စိတ်ထဲမြင်ယောင်နေဆဲ ဖြစ်ပါတယ်။

မရန်ဘရန်ဆိုင်းကို အခုမှ လူကိုယ်တိုင် တွေ့ဖူးပေမယ့် တကယ်တော့ သူဟာ တောမခိုခင် သတင်းစာထဲမှာ ကျနော်တွေ့ဖူးတဲ့ တဦးတည်းသော သူပုန်ခေါင်းဆောင် ဖြစ်ပါတယ်။
ဘရန်ဆိုင်းနဲ့အဖွဲ့ ဂျာမနီနဲ့ ဥရောပနိုင်ငံတွေဆီသွားပြီး မြန်မာ့နိုင်ငံရေး အခြေအနေကို ရှင်းပြခဲ့တယ် ဆိုတဲ့ သတင်းဆောင်းပါး တပုဒ်ကို ၁၉၈၆ ခုနှစ် ၀န်းကျင်ကထုတ်ဝေခဲ့တဲ့ လုပ်သားပြည်သူ့ နေ့စဉ်သတင်းစာမှာ ကျနော် ဖတ်ခဲ့ဖူးပါတယ်။ အနောက်တိုင်းဝတ်စုံကို အသေအချာဝတ်ထားတဲ့ ဘရန်ဆိုင်းရဲ့ ဓာတ်ပုံနဲ့တွဲပြီး အဲဒီ သတင်းကို ဖော်ပြထားတာတွေ့တော့ မြန်မာသူပုန်တွေလည်း ဒီလိုနိုင်ငံခြား သွားလို့ရသလား၊ ဒီလိုရှင်းပြနိုင်တဲ့ အရည်အချင်းမျိုး သူပုန်တွေမှာ ရှိသလားဆိုပြီး ကျနော် စဉ်းစားမိပါသေးတယ်။

အဲဒီကာလဟာ တက္ကသိုလ် ကျောင်းသားနဲ့ တောခိုဖို့ကိစ္စ ဘာမှ အဆက်အစပ် မရှိသေးပေမယ့် ဘရန်ဆိုင်းရဲ့ သတင်း ဓာတ်ပုံပါတဲ့ သတင်းဟာ ကျနော့်အတွက်တော့ သူပုန်တွေအပေါ် ပထမဆုံး စိတ်ဝင်စားစေတဲ့ သတင်းတပုဒ် ဖြစ်ခဲ့ပါတယ်။

ဒီနေ့ အခမ်းအနားကို ရောက်လာတဲ့အချိန်မှာလည်း သူ့ပုံစံက ကျနော်တွေ့ဖူးတဲ့ သတင်းစာထဲက ပုံနဲ့ သိပ်မကွာပါဘူး။ အနောက်တိုင်း ၀တ်စုံနေရာမှာ ဖက်စိမ်းရောင် KIA စစ်ယူနီဖောင်းနဲ့ စစ်ဘက် အဆောင်အယောင်တွေက နေရာယူ ထားပါတယ်။ အင်္ကျီအဖြူမှာ နက်ကတိုင်စည်းပြီး အဲဒီအပေါ်ကမှ စစ်ယူနီဖောင်းကို သေသေသပ်သပ် ၀တ်ဆင်ထားတဲ့၊ ဘယ်ဘက် လက်သူကြွယ်မှာ လက်စွပ်အကြီးကြီးတခု စွပ်ထားတဲ့၊ အရပ် ထောင်ထောင်မောင်းမောင်း အသားဖြူဖြူနဲ့ ဘရန်ဆိုင်းရဲ့ပုံဟာ မြန်မာရုပ်ရှင်တွေထဲမှာ မြင်နေကျ သူပုန်တွေနဲ့ သိပ်မတူသလို ဖြစ်နေပါတယ်။

တော်လှန်ရေးကာလတလျှောက် ကျနော်တွေ့ဖူးသမျှ သူပုန်ခေါင်းဆောင် တွေထဲမှာတော့ ဘရန်ဆိုင်းဟာ စမတ်အကျဆုံး ခေါင်းဆောင်တဦး ဖြစ်ပြီး မာနယ်ပလောက ကချင်ကုန်းမှာ တွေ့ဖူးခဲ့တဲ့ KIA ရဲဘော်တွေဟာလည်း စမတ်အကျဆုံး ရဲဘော်တွေအဖြစ် သတိထားမိပါတယ်။

ဘရန်ဆိုင်းနဲ့ ဖဒိုသန်းအောင်တို့ပြောတဲ့ စကားလုံးတွေကို မမှတ်မိတော့ဘူး ဆိုပေမယ့် အခြေခံအားဖြင့်ကတော့ ကျောင်းသားတွေ ညီညီညွတ်ညွတ်နဲ့ စစ်အစိုးရကို တော်လှန်ကြဖို့၊ အဲဒီလို တော်လှန်တဲ့အခါမှာ တပ်ပေါင်းစုအတွင်းကနေ လှုပ်ရှားကြဖို့ ဆိုတဲ့ ၂ ခုကိုတော့ မှတ်မိနေပါတယ်။ ဒီလိုပြောရတာကလည်း ကျနော်တို့ KNU နယ်မြေကော်မတီ ဖွဲ့တာကို ဗဟိုနဲ့ စင်ပြိုင်ဖွဲ့တဲ့ သဘော၊ ကျောင်းသား တွေကြား တယောက်တဖွဲ့ ဖြစ်နေတဲ့သဘောလို့ အထင်ရှိနေတဲ့ အတွက်လို့ ကျနော်ကတော့ သံသယ ၀င်မိပါတယ်။

သူတို့ထင်မယ်ဆိုလည်း ထင်စရာပါပဲ။ အခု ကျနော်တို့ရဲ့ နယ်မြေကော်မတီ အစည်းအဝေးဆီ ဗဟိုကော်မတီ တဦးမှ လာမတက်သလို၊ အဲဒီလူတွေ ဘယ်နားနေမှန်းတောင် ကျနော်တို့ မသိကြသေးပါဘူး (ABSDF ဗဟိုဟာ ၁၉၈၉ ခုနှစ် ဒုတိယ ညီလာခံအပြီးမှာမှ မာနယ်ပလောက လောကွားလူကုန်းမှာ ရုံးခန်းဖွင့်နိုင်ခဲ့ပြီး အဲဒီမတိုင်ခင်အထိ တိကျတဲ့ ရုံးခန်းမရှိခဲ့ဘူးလို့ ထင်ပါတယ်) နောက်တခါ ကျနော်တို့ကြား အငြင်းပွားနေတဲ့ နောက် အချက်တခုကတော့ ငါတို့ကျောင်းသားတွေက သူပုန်တွေနဲ့ပေါင်းပြီး DAB ထဲဝင်တာ မှန်ရဲ့လား၊ ငါတို့ကိုပါ အများက သူပုန်လို့ ထင်သွားမလား ဆိုပြီးစိုးရိမ်သူတွေလည်း
ရှိနေဆဲဖြစ်ပါတယ်။ တကယ်ကတော့ ကိုယ့်ဟာကိုယ် သူပုန်ဖြစ်လို့ ဖြစ်မှန်း မသိသေးတဲ့ ကျနော်တို့ဘ၀ပါ။

ကျနော် နောက်ပိုင်း ပြန်စဉ်းစားမိတာကတော့ ဒီစိုးရိမ်ချက်ဟာ အလကားနေရင်း ထွက်ပေါ် လာတာမျိုးမဟုတ်ဘဲ မြို့ပြက လာသူတွေရဲ့ အစဉ်အလာအရ စိုးရိမ်နေပုံ ရပါတယ်။ ဘာကြောင့်လဲ ဆိုတော့ အဲဒီလိုမျိုး စိုးရိမ်မှုကို ၁၉၉ဝ ရွေးကောက်ပွဲ အပြီးမှာ နယ်စပ်ထွက်လာတဲ့ ဒေါက်တာစိန်ဝင်းတို့ အမျိုးသားညွန့်ပေါင်း အစိုးရ ဖွဲ့ကာစမှာလည်း တခါကြုံဖူးလို့ ဖြစ်ပါတယ်။ ရွေးကောက်ခံ အမတ်တွေနဲ့ လက်နက်ကိုင်သူပုန် ခေါင်းဆောင်တွေပေါင်းပြီး အစိုးရ ဖွဲ့လို့ ဖြစ်ပါ့မလားဆိုတဲ့ စိုးရိမ်ချက်တွေကြောင့် လွှတ်တော်အမတ်ချည်း သက်သက်နဲ့ အစိုးရ ဖွဲ့လိုက်တာက သက်သေ ခံနေတယ်လို့ ကျနော်ယူဆ မိပါတယ်။

ဒီလို စိုးရိမ်မှုတချို့ ရှိနေပေမယ့်လည်း မူအရတော့ တပ်ပေါင်းစုထဲ ပါတာကို ဘယ်သူမှ တရားဝင် ကန့်ကွက်တာမျိုး မရှိပါဘူး။ နောက်တခါ ABSDF ဗဟိုအတွင်းရေးမှူး ကိုသန်းဝင်းကိုလည်း DAB ရဲ့ တွဲဘက် အတွင်းရေးမှူး နေရာမှာ တာဝန်ပေးထားတဲ့ အတွက် နောက်ပိုင်းမှာတော့ DAB စစ်ကြောင်းတွေကို စတင် လုပ်ဆောင် လာနိုင်တာ တွေ့ခဲ့ရပါတယ်။ ဒါပေမယ့် အခု လောလောဆယ် ကျနော်တို့ နယ်မြေကော်မတီ ဖွဲ့ကာစအချိန်မှာတော့ ဗဟိုကော်မတီအပေါ် ကျနော်တို့က အမြင် သိပ်မကြည် ကြပါဘူး။

ဗဟိုဌာနချုပ် ဘယ်မှာရုံးထိုင်လို့ ဘယ်လိုဆက်သွယ်ရမှန်း မသိ၊ ရှေ့မှာတင်ပြခဲ့တဲ့အတိုင်း ရှေ့နေ ဦးကျော်လင်း တဦးကလွဲပြီး ဘယ်ဗဟို ခေါင်းဆောင်တဦးနဲ့မှ ကျနော်တို့ စကားမပြောရသေး၊ ဒီလိုနဲ့ အပြန်အလှန်ငြင်းခုံကြရင်း ၃ ရက်လောက် ဆွေးနွေးအပြီးမှာတော့ KNU နယ်မြေကော်မတီကို တရားဝင် ရွေးချယ်တင်မြှောက် လိုက်ပါတယ်။

ဥက္ကဋ္ဌအဖြစ် ကျနော်တို့စခန်းက ကိုကျော်ကျော်၊ ဒု ဥက္ကဋ္ဌအဖြစ် သံလွင်စခန်းက ကိုမောင်မောင်တိတ်၊ အတွင်းရေးမှူးအဖြစ် သီဘောဘိုး စခန်းက ကိုခင်မောင်စိုးတို့ဖြစ်ပြီး ကျန်တဲ့တာဝန်တွေကို ကျနော် အတိအကျ မမှတ်မိတော့ပါဘူး။

မှတ်မိသလောက်ကို တင်ပြရမယ်ဆိုရင်တော့ နိုင်ငံခြားရေး ဌာနအတွက် ကျနော်တို့စခန်းက ဦးအောင်ခင်က တာဝန်ခံ၊ ကိုအောင်သန်းဝင်းနဲ့ ကလက်ဒေးက ထိုင်းစကား ကျွမ်းကျင်တဲ့ ကိုဝင်းမြင့် (အခု BBC) တို့က အဖွဲ့ဝင်တွေဖြစ်ပါတယ်။ စည်းရုံးရေးနဲ့ ပြန်ကြားရေးအတွက် သံလွင်စခန်းက ကိုသိန်းဆန်းနဲ့ ကလက်ဒေးက ကိုအာယု၊ ထောက်ပံ့ရေး ဌာနအတွက် သံလွင်စခန်းက ကိုအောင်သူနဲ့ စောထက ကိုခင်ဇော်၊ လုပ်ငန်း စစ်ဆေးရေးအတွက် ကျနော်နဲ့ ၀မ်ခစန်း ကိုသိန်းလွင်၊ ကျန်းမာရေးဌာနအတွက် ကလက်ဒေးက ဒေါက်တာကျော်သက်ဦးနဲ့ ၀မ်ခက ကိုသိန်းထွန်းတို့ ဆိုတာကို ကျနော် အမှတ်ရနေပါတယ်။

သီဘောဘိုးစခန်းက ကိုတင်းဌေးကို တွဲဘက်အတွင်းရေးမှူးအဖြစ် အမှတ်ရနေပေမယ့် အဲဒါဟာ စဖွဲ့စဉ် ကတည်းက ရွေးတာလား၊ နောက်ပိုင်း လစ်လပ်နေရာအတွက် ထပ်ရွေးတာလား ဆိုတာကို မမှတ်မိဘဲ ဖြစ်နေပါတယ်။ လူစာရင်းနဲ့ တာဝန်အတိအကျ သိနိုင်ဖို့ ABSDF ဗဟိုမှတ်တမ်းဌာနကို မေးမြန်းထားပေမယ့် အခုအချိန်အထိ မရသေးပါဘူး။ အမည်၊
တာဝန်အမှားအယွင်းနဲ့ ကျန်ခဲ့တာများရှိရင် တောင်းပန်ပါတယ်။

ကော်မတီ ရွေးချယ်မှုပြီးပြီးချင်း ပထမဆုံး ကြုံရတာကတော့ ကျနော်တို့ကို တည်းခိုခွင့် ပေးထားတဲ့၊ သားနားလှတဲ့ အဆောက်အအုံ ဆီကနေ ထွက်ခွာ ပေးရမှာ ဖြစ်ပြီး သောင်ရင်းမြစ် ဘေးနားက ဘားတိုက်ငယ်တခုမှာ ကျနော်တို့ အဖွဲ့ ရုံးစိုက်ရပါတယ်။ ရုံးစိုက်တယ် ဆိုပေမယ့် ရုံးပစ္စည်း ဘာမှမရှိပါဘူး။ စားဖို့အတွက်လည်း ငွေတပြားမှ မရှိပါဘူး။ ဒါပေမယ့် ကုန်သွယ်ရေး လမ်းကြောင်းနဲ့ကပ်နေတဲ့အပြင် အပေါင်းအသင်းတွေလည်း အတော် ရနေပြီ၊ လူရည်လည်း အတော်လည်နေပြီ ဖြစ်တဲ့အတွက် ဘန်းချောင်းဒေသမှာ နေစဉ်ကလို မျိုးတော့ ထမင်း မငတ်တော့ပါဘူး။

ထမင်းမငတ်ဘူးဆိုပေမယ့် လဖက်ရည်ငတ်တာကလည်း အတော် ဆိုးပါတယ်။ ဘန်းချောင်းနဲ့  မောင်တော်စခန်းမှာ လဖက်ရည်ဆိုင်လည်း မရှိ။ တခြားဆိုင်လည်း ဘာမှမရှိတဲ့အတွက် ငတ်ရကောင်းမှန်းလည်း မသိခဲ့ပါဘူး။ ဒါပေမယ့် ကလက်ဒေးမှာ ကတော့ ရွာထဲမှာ လဖက်ရည်ဆိုင်ရော၊ တခြားစားသောက်ဆိုင် တွေပါ စုံနေတဲ့အတွက် ရွာထဲဝင်တိုင်း လဖက်ရည် သောက်ချင်တာ ပါးစပ်ကိုယားနေတာပါပဲ။ တနေ့မှာတော့ ဘယ်သူတွေက ချွေ (ထိုင်းအခေါ် အကူအညီ ပေးတာ ပါ။ ကျောင်းသားတွေကြား အသုံးများပါတယ်) သွားလဲမသိတဲ့ ဘတ် ၁၀၀ လောက်နဲ့ ကျနော်တို့ ကော်မတီ အသစ်စက်စက်လေးဟာ ကော်ဖီတခွက်စီနဲ့ ခါဂျာမုန့် တခုစီကို ၀ယ်စားခွင့် ရခဲ့ပါတယ်။

နောက်တခုကတော့ ကျနော်က ဆေးလိပ်မသောက်လို့ အဲဒီကိစ္စအတွက် သိပ်ပြဿနာ မရှိပေမယ့် ဆေးလိပ်သောက်သူတွေ ခမျာတော့ ဆေးလိပ်ငတ်တဲ့ ဘေးကလဲ အတော်ဒုက္ခများတယ်လို့ ဆိုပါတယ်။ ကျနော်တို့ ဥက္ကဋ္ဌသစ် ကိုကျော်ကျော်နဲ့ ဆေးလိပ် သောက်တဲ့ ရဲဘော်တချို့ဟာ ကရွန်းထစ်ကိုလည်း မကိုင်နိုင်၊ ယာစင်းကိုလည်း အထုပ်လိုက်မ၀ယ်နိုင်တော့ ဆေးတံသောက်တဲ့ စတိုင်တခုကိုထွင်ပြီး အဖိုးကြီးပုံစံနဲ့ ဆေးတံကိုက်လို့ ရွာထဲလှည့်ခဲ့တာကို ကျနော်မှတ်မိနေပါတယ်။

ကျနော်မြင်ရသလောက် ဆိုရင် တယောက်ယောက်ကများ ကရွန်းထစ် ဆေးလိပ်တလိပ် ပေးသွားရင် အဲဒါကို တယောက်တလှည့် အလုအယက် ၀ိုင်းဖွာ၊ ယာစင်းနဲ့ ပွတ်ချွန်းကိုလည်း မီးခိုး ထွက်တဲ့နေရာကို မှန်းဆသွားရှာနဲ့ အတော် အခြေနေဆိုးပါတယ်။ အဲဒီအချိန်က ကျောင်းသားတွေကြား ဟာသ တခုတောင် ထွက်ပေါ်ခဲ့ ပါသေးတယ်။ အဲဒါကတော့ ဆေးလိပ် သမားတွေဟာ မီးခိုးထွက်တဲ့နေရာကိုရှာ၊ လက်ညှိုးနဲ့ လက်ခလယ်ကြား ဆေးလိပ် ညှပ်ထားပုံ ရတဲ့ သူမှန်သမျှကို ရှာရင်းနဲ့ နောက်ဆုံးတော့ အပေါ့သွားနေ သူနဲ့ ဆေးလိပ်သောက်သူကို မှားပြီး ဆေးလိပ် သွားတောင်းတဲ့အထိ ဖြစ်ရတယ်ဆိုတဲ့ ပြက်လုံးပါ။

မော်ဒယ်လ်သူပုန်နဲ့ ထူးအိမ်သင်ရဲ့ ဂီတပွဲတော်

ကျနော်ပြောတဲ့အထဲ အဆင်မပြေမှုတွေ သိပ်များနေလို့ စာဖတ်ပရိသတ် စိတ်ညစ်နေပြီထင်ပါတယ်။ တကယ်ကတော့ တချိန်လုံး အဆင်မပြေ ဖြစ်နေတာမျိုးတော့မဟုတ်ပါဘူး။ အဲဒီ ကလက်ဒေးခစန်းမှာ ကျနော် မော်ဒယ်လ် လုပ်ခွင့် ရတယ်ဆိုရင် ပရိသတ်ယုံပါ့မလားဘဲ။
သောင်ရင်းမြစ် ဘားတိုက်အဟောင်းလေးကို ရုံးသစ်လို့ နာမည်ပေးလိုက်ပြီး အဲဒီနေရာကို ရောက်ပြီးတဲ့ နောက်တရက်မှာ ထင်ပါတယ်။ ရှေ့နေ ဦးကျော်လင်းနဲ့ အတူတွဲနေတဲ့ ရှေ့နေ ဦးမြင့်အေးက ကျနော့်ကို မော်ဒယ်လ်လုပ်ဖို့ ကမ်းလှမ်း လာတာပါ။

မော်ဒယ်လ်ဆိုလို့ စင်မြင့်ပေါ်တက်ပြီး လမ်းလျှောက်ပြမယ့်သူလို့တော့ မထင်လိုက်ပါနဲ့။ ABSDF အတွက် ပို့စ်ကတ် ထုတ်ချင်တယ်၊ အဲဒီအတွက် မင်းသရုပ်ဆောင် ပေးနိုင်မလားလို့ မေးတာပါ။
“ရတာပေါ့ ဒီလောက်ကတော့ ဘာခက်တာမှတ်လို့” ဆိုပြီး ကျနော်ကပြောတော့ ကလက်ဒေးစခန်းက ထုတ်ပေးထားတဲ့ ပြောက်ကျား ယူနီဖောင်းအသစ်တစုံ၊ စစ်ဖိနပ်နဲ့ M 16 သေနတ်တလက်ပေးပြီး ကျနော်တို့ ဘားတိုက်ရှေ့က ချုံတန်းလိုလို၊ ပန်းခြံလိုလိုရဲ့ရှေ့မှာ တိုက်ပွဲအတွင်း နေရာယူတဲ့ပုံနဲ့ မိကျောင်းတွားတက်တဲ့ပုံ ဓာတ်ပုံ အရိုက်ခံရပါတယ်။

ကျနော့်ကို ရိုက်ရတာ သိပ်မဆင်မပြေလို့လား၊ နဂိုကတည်းက အမျိုးသားတဦး၊ အမျိုးသမီးတဦး ရိုက်ဖို့ စီစဉ်ထားတာ လားတော့မသိပါဘူး၊ ကျနော့်ကို ခဏစောင့်ခိုင်းထားပြီး ကလက်ဒေးစခန်းက အလှဆုံး ကျောင်းသူတဦးဖြစ်တဲ့ မစန်းစန်းချိုကို အထက ကျောင်းသူပုံစံ အဖြူအစိမ်းဝတ်ပေး၊ ရိုးရိုးညှပ်ဖိနပ်ကို စီးခိုင်းပြီး M 16 ပေးကိုင်ပြီးတော့ ဆက်ရိုက်ပါတယ်။

သူ့ကိုတော့ ကျနော့်လို တိုက်ပွဲတွင်း နေရာယူခိုင်းတာမျိုးမဟုတ်ဘဲ မဆလ စစ်သားတွေရဲ့ စစ်ခမောက်တလုံးကို သစ်ငုတ်တို ခြေရင်းမှာချ၊ အဲဒီအပေါ်မှာမှ သူ့ရဲ့ ခြေထောက်တဖက်ကို တင်ခိုင်းပြီး M 16ကို မိုးပေါ်ထောင်ထားတဲ့ပုံနဲ့ ရိုက်လိုက်တာ အတော်အိုကေသွားပြီး အဲဒီပုံကို အားလုံးကကြိုက်တဲ့အတွက် ပို့စ်ကတ်အဖြစ် သတ်မှတ်ရွေးချယ် လိုက်ပါတယ်။ ကျနော်က
တော့ အရံမော်ဒယ်လ် ဖြစ်သွားတယ် ဆိုပါတော့။

ရှေ့နေကိုမြင့်အေးရဲ့ မှတ်ချက်အတိုင်း ဆိုရင်တော့ “မောင်ရင်က စစ်သားပုံလည်းပေါက်တယ်။ဘော်ဒီ စထရက်ချာကလည်း မိုက်တယ်။ ဒါပေမယ့် တိုက်ပွဲတွင်းနေရာယူတဲ့ ပုံစံက ရန်သူကိုပြန်တိုက်မယ့် ပုံမပေါက်ဘဲ ရန်သူ့ကျည်မှန်ပြီး ကျသွားတဲ့ပုံ ပေါက်သွားလို့ပါ” တဲ့။
ကျနော် မအောင်မြင်လိုက်တဲ့ မော်ဒယ်လ်ရွေးပွဲ အပြီးမှာတော့ သီချင်းဆိုပွဲ တခု ထပ်ကျင်းပဖို့ ကျနော်တို့ စီစဉ်ပြန်ပါတယ်။ တကယ်ကတော့ စီစဉ်တာ မဟုတ်ပါဘူး။ အချိန်က ဒီဇင်ဘာနှောင်းပိုင်း ခရစ္စမတ် ရာသီရောက်လာပြီ ဖြစ်တဲ့အတွက် ဘာအလုပ်မှ မယ်မယ်ရရမရှိဘဲ တနေကုန် မအားမလပ်ဖြစ်နေတဲ့ ကျနော်တို့ဟာ ခရစ္စမတ် ရာသီမှာတော့ အဲဒီ မရှိတဲ့ အလုပ်ကို ခဏနားပြီး ဂစ်တာငှား၊ သီချင်းတိုက်၊ ကယ်ရယ်စင်းဂင်း (carol singing) ထွက်ဖို့ပြင်ကြတာပါ။

ထားဝယ်မှာနေစဉ် ၂၄ နှစ်တာ ကာလလုံးလုံး ခရစ္စမတ်ပွဲ တခါမှ မနွှဲဘူးတဲ့   တောသားကျနော် ဟာ ဝေလေလေ အခန်းကနေ အားဖြည့်ပေးသူသာ ဖြစ်ပြီး တကယ် တီးခတ်သူကတော့ ဂစ်တာသမား ဥက္ကဋ္ဌကိုကျော်ကျော်နဲ့ အဖွဲ့ ဖြစ်ပါတယ်။

“ဤအိမ်ပေါ်မှာ ကောင်းချီးမင်္ဂလာ ရောက်စေသော် … ရောက်စေသော။ ဤအိမ်ပေါ်မှာ ကောင်းချီးမင်္ဂလာ ရောက်စေသော။
ရောက်စေသော။ ဟားလေးလူးယား … ဟားလေးလူးယား” စသဖြင့် ရသမျှ ခရစ္စမတ်သီချင်းတွေကို ဆိုပြီး ကလက်ဒေး ရွာထဲမှာ ကျနော်တို့ လှည့်လည်ခဲ့ပါတယ်။ အဲဒီနေ့တွေမှာ ဘုရားကျောင်းအတွက် အလှူငွေ ထည့်နိုင်ခဲ့သလို ၀ါးတီး ကိစ္စလည်း အတော်အဆင်ပြေ ခဲ့တာကို ကျနော် အမှတ်ရနေပါတယ်။

ခရစ္စမတ်ပွဲပြီးလို့ နှစ်သစ်ကူးပွဲမှာတော့ ထူးထူးခြားခြား ကိုထူးအိမ်သင်နဲ့ ကိုမွန်းအောင်တို့ကိုယ်တိုင် သီဆိုတီးခတ်တဲ့ ဂီတစင်မြင့်ပွဲကို ကလက်ဒေးမှာ ကျနော်နွှဲလိုက်ရပါတယ်။
နာရီပေါ်ကမျက်ရည်စက်များ၊ အမေ့အိမ် စတဲ့ သီချင်းတွေနဲ့ နာမည်ကြီးနေတဲ့ ထူးအိမ်သင်နဲ့ မိုးလုံးမှိုင်း၊ ၂/ ၈၂ အင်းလျား သီချင်းတွေနဲ့ နာမည်ကြီးနေတဲ့ တက္ကသိုလ်ဝန်းကျင်က အဆိုတော် ၂ ဦးကို ဒီလိုတောထဲမှာ တွေ့ရလိမ့်မယ်လို့ ကျနော် လုံးဝ ထင်မထားခဲ့ပါဘူး။

သူတို့ ၂ ဦးဟာ သီဘောဘိုးနဲ့ ၀မ်ခ (ကော့မူးရာ) မှာ ကျင်းပတဲ့ ပထမအကြိမ် ABSDF အစည်းအဝေးနဲ့ ညီလာခံတွေကို လေ့လာသူတွေအဖြစ် တက်ရောက်ခဲ့ကြသူတွေ ဖြစ်ပြီး အတော်ထူးခြားတဲ့ တောခိုသူပုန် အဆိုတော်တွေ ဖြစ်ပါတယ်။ နာမည်ကြီး အဆိုတော်တွေ ဖြစ်တဲ့အပြင် သူတို့ရဲ့သီချင်းစာသားကိုလည်း ကျနော်က အတော်ကြိုက်တာကြောင့် သူတို့ သီဆိုတဲ့ပွဲကို ကိုယ်တိုင်မြင်လိုက်ရတဲ့အခါမှာ အတော်ပျော်ရွှင်မိပါတယ်။

နှစ်သစ်ကူးပွဲအပြီးမှာတော့ ကိုငှက်ကြီးခေါ် ထူးအိမ်သင်ဟာ အခြေအနေ အမျိုးမျိုးကြောင့် ရန်ကုန် ပြန်သွားပါတယ်။ အဲဒီနောက်ပိုင်း သူရေးစပ်သီဆိုတဲ့ သီချင်းတွေဟာ ပိုပြီးအဓိပ္ပာယ် လေးနက် လာတယ်လို့ ကျနော် ခံစားမိပါတယ်။ နောက်တခါ သူ ကလက်ဒေးကနေ မပြန်ခင်မှာ ရေးပေးခဲ့တဲ့ “အဆုံးသတ်တိုက်ပွဲ” သီချင်းဟာလဲ ကျနော်တို့ကြား အတော်ရေပန်းစား လူကြိုက်များခဲ့ပါတယ်။

“အရေးကြီးပြီ ညီနောင်အပေါင်းတို့၊ သွေးစည်းကာ ညီစေညီကြစို့ …၊ ငါတို့ရဲ့သမိုင်းတခေတ်ကို ငါတို့ သွေးနဲ့ရေးခဲ့ပြီ … သွေး သစ္စာလဲပြခဲ့ပြီ”

“နိုင်ငံတော်အတွက်ဆို အသက်ကိုလည်း ဘာမထီ … သေပစေ ခွပ်ဒေါင်းသွေးဟေ့ ရဲရဲရှေ့ကိုချီ။ လွတ်လပ်ခွင့်နဲ့ ငြိမ်းချမ်းရေးအတွက်ရည် … အဆုံးသတ်တိုက်ပွဲ ငါတို့နွှဲရမည်”

ကိုထူးအိမ်သင်ရဲ့ စကားလုံးတွေဟာ ပြောင်မြောက်လှပြီး ကျောင်းသားတွေရဲ့ရင်ကို တိုက်ရိုက် လာမှန်တဲ့အတွက် နောက်ပိုင်းမှာတော့ ဒီသီချင်းဟာ ကျောင်းသားတပ်မတော်ရဲ့ စစ်ချီသီချင်းတောင် ဖြစ်လာခဲ့ပါတယ်။

ကိုမွန်းအောင်ကတော့ တောထဲမှာဆက်နေပြီး ၁၀၂ တပ်ရင်းရဲ့ တပ်ဖွဲ့ဝင်၊ နောက်ပိုင်းမှာတော့ မာနယ်ပလောက DVB တောတွင်း စတူဒီယိုမှာ တာဝန်ဆက်ထမ်းခဲ့ပါတယ်။ ၁၉၉၂ မှာ ထုတ်ဝေခဲ့တဲ့ ကိုမွန်းအောင်ရဲ့ “ငြိမ်းချမ်းရေတိုက်ပွဲ” စီးရီးဟာ တော်လှန်ရေးနယ်မြေမှာ အအောင်မြင်ဆုံး စီရီးတခုဖြစ်လာခဲ့ပါတယ်။ခုနက ကိုထူးအိမ်သင်ရေးခဲ့တဲ့ အဆုံးသတ်တိုက်ပွဲဟာလည်း အဲဒီစီးရီးထဲမှာ ထိပ်ဆုံးကနေ ပါဝင်ခဲ့ပါတယ်။

အခုအချိန် မှာတော့ ကိုမွန်းအောင်က နော်ဝေးနိုင်ငံမှာ အခြေချနေထိုင်နေပြီး ကိုထူးအိမ်သင်ကတော့ ၂၀၀၄ ခုနှစ် ကတည်းက ရန်ကုန်မှာ ကွယ်လွန်သွားပြီ ဖြစ်ပါတယ်။
.....................................................................................................................



သူပုန်ကျောင်းသားတဦးရဲ့ မာရသွန်ခရီး ၉

၃/ ၈၉ မဲဆောက်

နှစ်သစ်ကူးပွဲ ပြီးတဲ့နောက်မှာတော့ ဒေသအခြေအနေ လေ့လာရေးခရီးစဉ်အဖြစ် ကလက်ဒေးကနေ ၃ နာရီနီးပါး လမ်းလျှောက်ရတဲ့ ကလက်ဒေး – ရွေဂွန်း ကားလမ်းကြမ်းပေါ်က ကုန်သည်စခန်းထောက် ရှမ်းရွာသစ် ဆိုတဲ့ ရွာလေးတခုကို ကျနော် ရောက်ခဲ့ပါတယ်။
အဲဒီမှာ အိမ်ခြေ ၅၀ လောက်နဲ့ KNU အကောက်စခန်းတခုရှိပါတယ်။ အထူးသဖြင့် နွားမှောင်ခိုသယ်တဲ့ လမ်းကြောင်း ဖြစ်တာကို သတိထားမိပါတယ်။ ကလက်ဒေးစခန်းက ကျောင်းသားတွေကတော့ ဒီရွာကို စခန်းထောက်အဖြစ် အသုံးပြုပြီး ကုန်သည်တွေ၊ ခရီးသွားတွေကို စည်းရုံးဟောပြောတာ၊ လက်ကမ်းစာစောင်ဖြန့်ဝေတာ၊ ရှေ့တန်းသတင်းယူတာတွေကို လုပ်နေတာ ကျနော်တွေ့ရပါတယ်။



အဲဒီရွာကအပြန် သီတင်းတပတ်လောက် ကြာပြီးတဲ့အချိန်မှာတော့ ကျနော်တို့အဖွဲ့ ကလက်ဒေး ကနေ မဲဆောက်နဲ့ ကော့မူးရာ ဘက်ဆီပြောင်းဖို့ ပြင်ပါတယ်။


အကြောင်းပြချက်ကတော့ KNU နယ်မြေထဲက စောထ၊ သံလွင်၊ ကလက်ဒေး၊ ကော့မူးရာ။ သီဘောဘိုး၊ မင်းသမီးနဲ့ မောတောင် ဆိုတဲ့ စခန်း ၇ ခုစလုံးအတွက် အချိတ်အဆက်လုပ်ဖို့ ဆိုရင် ကလက်ဒေးနေရာက အဆင်မပြေ၊ တယ်လီဖုန်းမရှိ၊ ဖက်စ်မရှိ ဖြစ်နေတယ်လို့ ဆိုပါတယ်။ အဲဒီကာလကတော့ အီးမေးလ်တို့၊ အင်တာနက်တို့ မပေါ်သေးပါဘူး။ ပထမအကြိမ် ညီလာခံမှတ်တမ်းနဲ့ ဖွဲ့စည်းပုံတွေကိုတောင် လက်ရေးမူနဲ့ရေး၊ ရောင်းစက္ကူနဲ့  ပြန်ကူး ထားတာတွေ့ရပါတယ်။ နောက်တခါ အဲဒီအချိန်မှာ မယ်သဝေါ တိုက်ပွဲကလည်း အတော်ပြင်းထန်နေပြီး ကလက်ဒေစစခန်းပါ ကျတော့ မလိုလို ဖြစ်နေတာလည်း ပါမယ်လို့ ထင်ပါတယ်။

အဲဒီတိုက်ပွဲမှာ ကလက်ဒေးစခန်းက ကျောင်းသားတဒါဇင်လောက် KNU နဲ့ လက်တွဲပြီး ပါဝင်တိုက်ခိုက် နေတယ်လို့ သိရပေမယ့် အသေးစိပ်ကိုတော့ ကျနော် မေးမြန်းခွင့်မရလိုက်ပါဘူး။ ဒီလို အကြောင်း ၂ ချက်ကို အခြေခံပြီး ကျနော်တို့ အုပ်စုဟာ ကလက်ဒေးကနေ မဲဆောက်နဲ့ ကော့မူးရာဘက်ဆီ ရုံးခန်းပြောင်းလာခဲ့ပါတယ်။

ထုံးစံအတိုင်း ဗိုလ်မှူးစိုးစိုးအိမ်မှာ တပတ်၊ ၁ဝ ရက် လောက် သောင်တင်ပြန်ပါတယ်။ အဲဒီ နောက်မှာတော့ မဲဆောက် – မယ်ပ ကားလမ်းခွဲနဲ့ သိပ်မဝေးတဲ့ အာရှအဝေးပြေး လမ်းဘေး ရပ်ကွက်သစ်တခုထဲက သစ်သားအိမ်လေး တလုံးကို ငှားပြီး ရုံးခန်းဖွင့်လိုက်ပါတယ်။ ရုံးခန်းဆိုပေမယ့် တယ်လီဖုန်း တလုံး၊ စားပွဲတလုံး၊ ဖိုင်တွဲတခုကလွဲပြီး တခြားရုံး ပစ္စည်းဘာမှ မရှိပါဘူး။ ကျောင်းသားတွေရဲ့ အဲဒီကာလရုံးခန်းတွေကတော့ ထုံးစံအတိုင်း လူအားလုံး အဲဒီမှာပဲ အိပ်၊ အဲဒီမှာပဲစား၊ အဲဒီမှာပဲပွားကြတဲ့ နေရာမျိုးပါ။

တထောင်ကျော်တန် လုံးချင်းအိမ် တလုံးကိုငှားထားနိုင်ပြီဆိုပေမယ့် စားဖို့ရိက္ခာက အဆင်မပြေသေးပါဘူး။ ဒီလိုနဲ့ တနေ့မှာတော့ ကျနော်ရယ်၊ ဦးအောင်ခင်ရယ်၊ ကိုဇော်ခင်ရယ်၊ ကိုသိန်းလွင်ရယ်လို့ ထင်ပါတယ်၊ တာ့ခ် – မဲဆောက် – မြ၀တီ အာရှအဝေးပြေး ကားလမ်းဘေးက လမ်းဘေးမြောင်းထဲက သန်မာထွားကြိုင်းလှတဲ့ ကန်စွန်းပင်တွေကို သွားခူးကြတာ မှတ်မိ နေပါသေးတယ်။ မကြီးမငယ်နဲ့ လမ်းဘေးမြောင်းထဲမှာ ဆော့ကစားသလို လုပ်နေကြတဲ့ ကျနော်တို့ကို လမ်းသွား လမ်းလာတွေက ထူးဆန်းတဲ့ သတ္တ၀ါတွေ တွေ့သလို ကြည့်သွားကြပါတယ်။

အဲဒီ ကန်စွန်းရွက် အထုပ်ကြီးကိုသယ်ပြီး ရုံးရှေ့ ပြန်ရောက်တော့ ကာစတန် ၀တ်စုံလို ယူနီဖောင်းအပြည့်အစုံ ၀တ်ထားတဲ့ အမျိုးသမီးတဦးက ကျနော်တို့ကို ထိုင်းဘာသာနဲ့ နှုတ်ဆက်ပါတယ်။ “ဆ၀ါဒီခရပ်” ထက် ပိုပြီး ထိုင်းစကားကို နားမလည် သေးတဲ့ ကျနော်တို့ခမျာ အဲဒီအမျိုးသမီး ဘာတွေပြောနေမှန်းမသိပါဘူး။

“ဟေ့ကောင်၊ ရဲမေလား မသိဘူး။ ငါတို့ရုံးတော့ အဖမ်းခံရပြီထင်တယ်” လို့ ကိုသိန်းလွင်က ပြောပါတယ်။
တကယ့်အခြေနေက ကျနော်တို့ စိုးရိမ်နေသလို မဟုတ်ပါဘူး။ ဒီအမျိုးသမီးက ကျနော်တို့ ငှားထားတဲ့ အိမ်နဲ့ မျက်နှာချင်းဆိုင် ၂ ထပ်တိုက်အိမ်က ကျောင်းဆရာမဖြစ်ပြီး အိမ်နီးချင်းအိမ်မှာ လူ သစ်တွေရောက်လာလို့ ကျနော်တို့ကို လာနှုတ်ဆက်ခြင်း မျှသာ ဖြစ်ပါတယ်။ ဒါပေမယ့်လည်း ယူနီဖောင်းမြင်ရင် လန့်နေတဲ့ ကျနော်တို့ “နန်းစူစန် ဖမာ့” (မြန်မာတက္ကသိုလ် ကျောင်းသားကို ထိုင်းလိုအခေါ်) တွေခမျာတော့ ယူနီဖောင်းဝတ်ကို တွေ့တာနဲ့ ပြေးဖို့ပြင်တာက အရင် ဖြစ်နေလေ့ရှိပါတယ်။

နောက်ပိုင်းကျမှ သိရတာကတော့ ထိုင်းမှာ ကျောင်းဆရာအပါအ၀င် ၀န်ထမ်းတိုင်းလိုလို သက်ဆိုင်ရာ ယူနီဖောင်းတွေကို ၀တ်ထားကြပြီး ဌာနတခုနဲ့တခု အရောင်မတူကြပါဘူး။ ဒါတွေကို မသိတဲ့ ကျနော်တို့ ကျောင်းသားတွေကတော့ ကျောင်းဆရာ ကိုတွေ့လည်း ရဲလို့ ထင်၊ သန့်ရှင်းရေး လုပ်သားတွေ့လည်း ရဲလို့ထင်၊ လမ်းထိပ်က ဒရ၀မ်ကိုတွေ့လည်း ရဲ လို့ထင်နေပြီး ယူနီဖောင်းဝတ်ထားသူကိုတွေ့တာနဲ့ ပြေးဖို့ပြင်၊ ကြောက်နေကြတဲ့ ကာလဖြစ်ပါတယ်။

ကျနော်တို့ နယ်မြေကော်မတီက ကန်စွန်းရွက် မြောင်းဘေးနားမှာ အဲဒီလိုရုံးခန်း ဖွင့်ထားချိန်မှာ ဗဟိုကော်မတီကလည်း မဲဆောက်ဈေး ဘေးနားက ၃ ထပ်တိုက်ကြီး တလုံးကိုငှားပြီး ရုံးခန်းဖွင့်ထားတာ ရှိပါတယ်။ ဘာကြောင့် တရုံးတည်း အတူမလုပ်နိုင်ဘဲ တဖွဲ့ တရုံးစီ ဖွင့်ထားသလဲ ဆိုတာကိုတော့ အဲဒီကာလက ကျနော် အသေအချာ မစဉ်းစားမိပါဘူး။ လူတွေဟာ ဖြစ်စဉ်တခုအတွင်း ကိုယ်တိုင် ထဲထဲဝင်ဝင် ပါနေရင် အဲဒီဖြစ်စဉ် တခုလုံးကို အပြင်က အကဲခတ်တဦး၊
သတင်းထောက်တဦးလို တခါမှ ခြုံငုံ မစဉ်းစားဖြစ်ခဲ့ဘူးလားလို့ ဒီဆောင်းပါးရေးတော့မှ ကျနော် ပြန်စဉ်းစားမိပါတယ်။ ဘောလုံးကန်နေသူနဲ့ ပွဲကြည့် ပရိသတ်အမြင်ကွာသလိုမျိုး၊ ဘောလုံးကန်နေသူနဲ့ ဘော်လုံး ဆောင်းပါးရှင် အမြင် ကွာသလိုမျိုး ကွာနေခဲ့တာ ဖြစ်ဖို့ များတယ်လို့ ထင်ပါတယ်။

ဘာဘဲ့ဖြစ်ဖြစ် ကျနော် တဦးတည်း အတွက်ကတော့ မဲဆောက်မြို့ အခင်းအကျင်း၊ အနီးဝန်းကျင်က ကျောင်းသားစခန်း တွေရဲ့ အခင်းအကျင်းတွေကို လေ့လာခွင့် ရခဲ့ပါတယ်။
ကျနော်တို့ ရုံးကတော့ မြို့နဲ့ဝေးတဲ့အတွက် မဲဆောက်ဈေးကနေ ၄၅ မိနစ်လောက် လမ်းလျှောက်ရပြီး ကံမကောင်းရင် လမ်းမှာ ရဲ ဆွဲတာ ခံရနိုင်ပါတယ်။ ဒါကြောင့် စခန်းက တက်လာတဲ့လူတွေထဲက တာဝန်ရှိသူမှအပ သိပ်မလာကြပါဘူး။ ဒါပေမယ့် ဗဟိုရုံးကတော့ မဲဆောက်ဈေးဘေးမှာ၊ စခန်း အသီးသီးကနေ လာလို့ရတဲ့ လိုင်းကားဂိတ်တွေ ဘေးမှာ ကပ်ပြီးရှိနေတာဆိုတော့ စခန်းကနေ မဲဆောက်ကို တက်လာသမျှလူတိုင်း အလွယ်တကူ ဝင်နိုင်တဲ့ နေရာမျိုးပါ။

ဒါမေပဲ့ အဲဒီကာလက ကျနော်တို့ အချင်းချင်းကြား ဘာတွေလွဲနေသလဲတော့ မသိပါဘူး။ စခန်းက ရဲဘော်တွေ သူတို့ ရုံးဆီလာတာကို ဗဟိုက လူကြီးတွေက မကြိုက်ကြသလို၊ ကျနော်တို့ ကိုယ်တိုင်လည်း ရဲဘော်တွေရုံးလာတာကို သိပ်မကြိုက်ကြပါဘူး။
ဗဟိုရုံးနဲ့ နယ်မြေရုံးဟာ လျှို့ဝှက်နေရာဖြစ်သလိုလို၊ လူတိုင်းပဲ လာလို့မရတဲ့ နေရာလိုလိုနဲ့ အပေါ်ထပ် အဆောက်အအုံက လူတွေနဲ့ ရဲဘော်ထုအကြား အဆင်မပြေကြပါဘူး။ မဲဆောက်ကိုလာတဲ့ ရဲဘော် အများစုကလည်း အနီးဆုံး စခန်းတွေဖြစ်တဲ့ သီဘောဘိုး၊ ဝမ်ခ၊ ကလက်ဒေးကျပြီး ထပ်ပြောင်းတဲ့နေရာသစ် ရေကျော်၊ သံလွင်၊ စောထတို့က များပြီး ဗဟို ကော်မတီကို တခါမှ အကောင်းပြောတာ ကျနော် မကြားမိပါဘူး။

ဗဟိုနဲ့ နယ်မြေအကြား၊ ရဲဘော်ထုအကြား ဒီလို အမြင်မကြည်တာတွေ ရှိပေမယ့်လည်း ကျနော်ကတော့ မဲဆောက်ဈေး အနီးက ဗဟိုရုံးကို မကြာခန ရောက်ဖြစ်ပါတယ်။
တနေ့မှာတော့ အဆိုတော် ကိုမွန်းအောင်နဲ့ တွေ့ခွင့်ရပြီး မိုးလုံးမှိုင်း သီချင်းကို စာသားပြောင်း ဆိုထားတဲ့ မှိုင်းလုံးမိုးသီချင်းကို နားထောင်ခွင့် ရခဲ့ပါတယ်။ ဟော်လိုဂစ်တာ တလုံးတည်းနဲ့ သီဆိုပေမယ့် ရင်ကိုတန်းပြီးထိတဲ့ အထိ ကျနော်ခံစားရ တဲ့သီချင်းတပုဒ်ပါ။

“… ဆုံးရှုံ့းခဲ့တဲ့ လူ့အခွင့်ရေးအတွက် တော်လှန်နေ ….၊ ကျောင်းတော်မြေနဲ့ တမ်းတချစ်သူ ချန်ကာလေ …။ တိုင်တည်ပါတယ် အသက်သွေး စတေးခဲ့ ရဲဘော်သူငယ်ချင်းရေ …”
“… ရဲရင့်သစ္စာ သားပြုခဲ့ပြီ မေမေရေ …၊ အမျှဝေနိုင်ဖို့ သားတို့အတွက်ဆို ဂုဏ်ယူလေ …။ ဒီမိုကရေစီ အခွင့်ရေးအတွက်ဆို အသက်ကိုစွန့်ထားပေ …”

ကိုမွန်းအောင်ပဲ အဆိုကောင်းလို့လား၊ ကျနော်ကပဲ ကျဆုံးသွားတဲ့ ရဲဘော်သူငယ်ချင်းတွေကို မြင်နေမိလို့၊ အမေ့ကို သိပ်လွမ်းနေလို့ လားတော့မသိပါဘူး၊ သူ့သီချင်းကို နားထောင်ရင်း ကျနော် မျက်ရည် စို့ခဲ့ရပါတယ်။

ကိုမွန်းအောင်ရဲ့ နောက်ထပ် နာမည်ကြီးသီချင်းတပုဒ်ကတော့ ကိုရဲနည် ရေးစပ်ပေးခဲ့တဲ့ ၃/ ၈၈ အင်လျား ဖြစ်ပါတယ်။
“… စ်ိမ်းလဲ့ကန်သာ အင်းလျားမြေမှာ … လေပြေတို့ ဆော့ကစားစဉ်။ ကြင်နာသူတို့ရဲ့ အနမ်းတွေ၊ တီးတိုး ချစ်စကားသံတို့ လွမ်းရာမြေ။ တံတားဖြူပေါ် နှစ်ဦးသားခြေရာ သဇင်ရနံ့တို့ ညညဆိုမွှေးလို့ …၊

"...၈၈ ရဲ့ မတ်လမှာ အင်းလျား ရာဇ၀င် ပြောင်းခဲ့ပြီ … စိမ်းမြတဲ့ ရေလှိုင်းတွေ အရောင်းပြောင်းလဲ …။ ဖြူစင်တဲ့ တံတားငယ်လည်း အနီစွန်းခဲ့ပြီ …၊ ရာသီ အလီလီ ပြောင်းပေမယ့် မဟောင်းခဲ့နိုင်ဘူး … ရာသီ အလီလီပြောင်းပေမယ့် မဟောင်းခဲ့နိုင်ဘူး … အင်လျားရေ …”

ဒီသီချင်းကို အဲဒီနေ့က ကိုမွန်းအောင် ဆိုမဆို ကျနော်အသေအချာ မမှတ်မိတော့ပေမယ့် သူ့ရဲ့သီချင်း တွေကို ကြိုက်လွန်း တာရယ်၊ နောက်တခါ အဲဒီသီချင်းထဲက ဇာတ်ကောင်တွေဖြစ်တဲ့ အင်လျားကန်ဘေးမှာ လမ်းသလား နေသူတွေ၊
အင်လျားဆောင် ရှေ့မှာ ဂစ်တာတီးနေသူတွေ အတော်များများဟာ အခု တနှစ်တာ ကြာပီးတဲ့ အချိန်မှာတော့ မဲဆောက်ဝန်းကျင်ဆီ ရောက်နေတာကို တွေ့မိတဲ့အတွက် ဒီဆောင်းပါးရဲ့ ခေါင်းစဉ်ခွဲကို ၃/ ၈၉ မဲဆောက် ဆိုပြီး ကျနော် ပေးလိုက်မိတာ ဖြစ်ပါတယ်။

ကိုမွန်းအောင်အပါဝင် ဗဟိုရုံးမှာ ရောက်နေတဲ့ ဧည့်သည်တွေနဲ့ စကားပြောပြီး ညနေစောင်းချိန်မှာ နယ်မြေရုံးဆီ ကျနော် ကုန်းကြောင်း ချီတက်လာပါတယ်။
အဲဒီကာလက ကျနော်တို့ ကျောင်းသားတွေဟာ အခုခေတ်လို ကားတွေ၊ ဆိုင်ကယ်တွေကို ကိုယ်ပိုင် စီးနိုင်ဖို့ နေနေသာသာ ဆန်လွန့် ဆိုတဲ့ ထိုင်းဆိုက္ကားကိုတောင် ငှားစီးနိုင်တဲ့ အခြေအနေ မရှိသေးပါဘူး။

ပိုဆိုးတာက လမ်းလျှောက်ဖိနပ်လို့ ခေါ်တဲ့ ဝေ့ါကင်းရှူးကိုတောင် မ၀ယ်နိုင်တဲ့အတွက် ဆင်ကြယ်ဖိနပ်၊ မြင်းကြယ်ဖိနပ်တွေနဲ့ ဖြစ်သလိုသွားနေရတဲ့ ဘ၀ပါ။ ဒါ့အပြင် ကျနော်တို့ ၀တ်စားဆင်ရင် ထားမှုကလည်း ထိုင်းတွေနဲ့ မတူပါဘူး။ နိုင်ငံတကာ အလှူရှင်တွေ ပို့ပေးထားတဲ့ ဘေထုတ်ထဲက ကိုယ့်ခွဲတမ်း အတွက် မဲပေါက်တဲ့ အ၀တ်အစားတွေနဲ့ လမ်းသလား နေကြတာဆိုတော့ လာဘ်ငွေရှာနေတဲ့ ထိုင်းရဲတွေ အတွက် ကျနော်တို့ဟာ ဖမ်းချင်စရာကြီး ဖြစ်နေပုံရပါတယ်။

ကံကောင်းတာကတော့ အဲဒီအချိန်ထိ ကျနော် ရဲဖမ်းတာ တခါမှ မခံရသေးပါဘူး။ ဒါပေမယ့် တခြား ကျောင်းသား အတော် များများကတော့ မဲဆောက်ဈေးဝန်းကျင်မှာ လမ်းလျှောက်ရင်း၊ မဲဆောက်ဈေးကနေ ဒေါက်တာ စင်သီယာမောင်ရဲ့ ဆေးခန်းဆီ လမ်းလျှောက်သွားရင်းနဲ့ ခဏခဏအဖမ်းခံရလို့ ထိုင်းရဲရဲ့ ဖမ်းချင်စရာကောင်းတဲ့ “ကိုရဲချစ်” တွေ ဖြစ်နေကြတဲ့ အချိန်မျိုးပါ။

ဒီလိုအခြေနေမှာ ရှေ့မှာ ကျနော်ပြောခဲ့တဲ့ ဗိုလ်မှူးစိုးစိုး အိမ်မှာ ပထမဆုံး တွေ့ခဲ့သူ ကိုဝဏ္ဏ၊ ကိုစိန်ဟန်၊ နော်ထူးနဲ့ ဒေါက်တာ စင်သီယာမောင်တို့ ပေါင်းပြီး အခု လက်ရှိ ဆေးခန်းနေရာမှာပဲ မဲဆောက် – မယ်တော် ကားလမ်းဘေး ဗွက်အိုင်ထဲက
သစ်သား အိမ်အိုကြီးတလုံးကိုငှားလို့ ဆေးခန်းဖွင့် လိုက်ပါတယ်။

ကျနော်နဲ့ နယ်မြေကော်မတီက ရဲဘော်တချို့ သွားပြီး သန့်ရှင်းရေး လုပ်အားပေးခဲ့ပါသေးတယ်။ ဖွင့်ကာစမှာ ပစ္စည်းကလည်း မစုံ။ ရံပုံငွေကလည်း မရှိလို့ အခက်ခဲတွေ ရှိခဲ့ပေမယ့် စခန်းအသီးသီးကနေ မဲဆောက်ကို ရောက်လာတဲ့ ငှက်ဖျားကျောင်းသား တွေ၊ တိုက်ပွဲမှာ ဒဏ်ရာရတဲ့ ကျောင်း သားတွေကို ပြုစုရင်းနဲ့ ကျောင်းသားဆေးခန်း ဆိုပြီး လပိုင်းအတွင်းမှာတင် လူသိများ ထင်ရှားလာပါတယ်။ ထုံးစံအတိုင်း အဲဒီဆေးခန်းဟာ လူနာတွေ အတွက်တင်မကဘဲ မဲဆောက်ရောက် ကျိုးဖိုး အားလုံးရဲ့
စုရပ်တခုလည်း ဖြစ်လာခဲ့ပါတယ်

(၂၀၁၁ ဧပြီလက ကျနော် မဲဆောက်ရောက်ခဲ့လို့ ဒေါက်တာ စင်သီယာမောင် ဆေးခန်းဆီ ၀င်ကြည့်တဲ့အခါ အဲဒီမူလ အဆောက်အအုံဟာ အိုမင်းလွန်းတဲ့အတွက် ဖြိုဖျက်ထားတာကို တွေ့ရပါတယ်။ ဒါပေမယ့်
အဲဒီ မူလအဆောင်အအုံထက် ပိုကောင်းတဲ့ ဆေးခန်း၊ လူနာဆောင်၊ စားဖိုဆောင်၊ စာသင်ဆောင် အပါအ၀င် အုတ်နဲ့ အခိုင်အမာ ဆောက်ထားတဲ့ အဆောက်အအုံသစ်ပေါင်း တဒါဇင်ကျော်ကို ခန့်ခန့်ငြားငြား တွေ့ခဲ့ရပြီး အတွင်း – အပြင် လူနာ တရာကျော်နဲ့ ဆေးသင်တန်းသားအသစ်တွေ၊ ဆေးမှူးအသစ်တွေ၊ နိုင်ငံတကာက စေတနာ့ဝန်ထမ်း တွေကိုပါ စည်ကား သိုက်မြိုက်စွာ တွေ့ခဲ့ရပါတယ်)

ဖြစ်မျိုးစုံလင် မဲဆောက်တခွင်

အဲဒီကာလက မဲဆောက်မြင်ကွင်းလေးကို နည်းနည်း ပြောရမယ်ဆိုရင် ဗဟိုရုံးကနေ ထွက်လိုက်တာနဲ့ အခု နာမည်ကြီးနေတဲ့ “မဲဆောက်လင်း” တိတ်ခွေ၊ ဗီဒီယိုခွေ ရောင်းတဲ့ဆိုင်ကို ရောက်မယ်၊ အဲဒီဆိုင်ဘေး မှာနာမည်ကြီး ကုလား လက်ဖက်ရည် ဆိုင်၊ ကားလမ်းကို ကျော်လိုက်ရင် မဲဆောက် ဘုန်းကြီးကျောင်း၊ ဘုန်းကြီးကျောင်းကနေ ဒီဘက်ထွက်လိုက်ရင် မဲဆောက် ရုပ်ရှင်ရုံ (အခုတော့ အဲဒီရုံကိုဖျက်ပြီး ညဈေး ဖွင့်ထားပါတယ်) ရုပ်ရှင်ရုံရဲ့ ဘေးမှာတော့ ကျနော်တို့ ကျောင်းသားတွေရဲ့ စားအိမ်သောက်အိမ် ဖြစ်နေတဲ့ ဗိုလ်ကြီးစိုးမင်းရဲ့အိမ်ပေါ။ ဒါကတော့ ရုံးကနေညာဖက်ကိုလှည့်သွားတဲ့အပိုင်းပါ၊

ရုံးကနေ ဘယ်ဘက်ကို လှည့်လိုက်မယ်ဆိုရင် မဲဆောက်ဈေးထဲကို တည့်တည့်ရောက်ပါတယ်၊ အဲဒီမှာ ကျနော်တို့ ကျောင်းသားတွေ
ထိုင်လေ့ရှိတဲ့ဆိုင်က အန်တီချစ်လက်ဖက်ရည်ဆိုင်၊ အန်တီချစ်ဆိုလို့ အန်တီမမကြီးလို့မထင်လိုက်ပါနဲ့၊ အန်တီ ဦးဦးကြီးသာ ဖြစ်ပါတယ်။

မဲဆောက်ဈေးတွင်း အခင်းအကျင်းကတော့ အခုနဲ့ သိပ်မကွာလှပါဘူး။ လူရှုပ်တာကလည်း အခုလိုပါပဲ။ အဲဒီ အန်တီချစ် ဆိုင်မှာတောင် ဟိုဖက်က ထောက်လှမ်းရေးတွေရှိသလိုလို သတင်းထွက်လာတဲ့တွက် နောက်ပိုင်းမှာ ကျနော်လည်း သွားမထိုင်ရဲတော့ပါဘူး။ နောက် ခုနကပြောတဲ့ ရုပ်ရှင်ရုံကိုကျော်ပြီး သွားလိုက်ရင် ပတ္တမြားဆိုတဲ့ ဇိမ်ခန်း ရှိပါတယ်။ အဲဒီအခန်း ကိုကျော်ပြီး ဆက်လျှောက်ရင် ရဲစခန်းကို ရောက်မယ်၊ ရဲစခန်းဘေးက First ဟိုတယ်မှာတော့ ဒညတ (ဒီမိုကရက်တစ် ညီညွတ်ရေးတပ်ပေါင်းစု) ရုံးခန်းရှိပါတယ်။

အဲဒီကာလက ဒညတ ရုံး တာဝန်ခံကတော့ ကျနော်တို့ ထားဝယ်သားတဦးဖြစ်တဲ့ ကိုသန်းလွင် (အခု FTUB) ဖြစ်ပါတယ်။
သူ့ရုံးခန်းဆီ ကျနော် ရောက်သွားတဲ့ အချိန်မှာ ABSDF ဗဟိုကော်မတီဝင် တဦးဖြစ်တဲ့ ကိုတင်စိုး (စောထစခန်းမှာ ဗဟိုကော်မတီဝင်။ အခု သြစတေလျမှာလို့ ယူဆရ) ကိုတွေ့ရပါတယ်။
ဒါပေမယ့် ရှေ့မှာပြောခဲ့တဲ့အတိုင်း အဲဒီကာလမှာ ကျောင်းသားတွေဟာ ဗဟိုနဲ့ အောက်ခြေကြား အမြင်မကြည်ကြတဲ့အပြင် မဟာမိတ် အဖွဲ့တွေပေါ်မှာလည်း အကောင်းပြောသူ သိပ်မရှိလှပါဘူး။ ဒညတကို ဒေါ်ညွန့်တင်၊ ဓညင်းသီး စသဖြင့်
အမျိုးမျိုး အပုတ်ချ ခေါ်ဆိုနေကြတဲ့အပြင်၊ ဒီအဖွဲ့ဟာ ငွေအင်အား သိပ်တောင့်ပြီး ကျောင်းသားတွေကို ဆွဲစားလေ့ရှိတဲ့အဖွဲ့၊ ဖောက်ခွဲရေး သင်တန်းတွေပေးပြီး ကျောင်းသားတွေကို အသုံးချနေတဲ့အဖွဲ့ စသဖြင့် ဝေဖန်သံတွေနဲ့ ဆူညံနေခဲ့တဲ့ ကာလလည်း ဖြစ်ပါတယ်။

တိုက်ပွဲမစခင် ပြည်တော်ပြန်ဝင်သွားသူများ

ကျနော်တို့ မဲဆောက်ကိုမရောက်ခင် ဖြစ်ပျက်သွားတဲ့ ထူးခြားဖြစ်စဉ်တခုကိုလည်း ဒီနေရာမှာ တင်ပြလိုပါတယ်။ စက်တင်ဘာ ၁၈ မှာ ဗိုလ်ချုပ်ကြီးစောမောင် အာဏာသိမ်းပြီး နိုင်ငံတကာအသိုင်းအဝန်း တခုလုံးက ရှုပ်နေချိန်မှာ ထိုင်းကာကွယ်ရေး ဦးစီးချုပ် ဗိုလ်ချုပ်ကြီး ချာဗလစ် ယောင်ချာယုက ရန်ကုန်ကို သွားရောက်လည်ပတ် ခဲ့ပါတယ်။ အဲဒီခရီးစဉ်အတွင်း ငါးဖမ်းခွင့်၊ သစ်ထုတ်ခွင့်တွေ ရခဲ့သလို နယ်စပ်ရောက် ကျောင်းသားတွေကို မဲဆောက်လေယာဉ်ကွင်းကနေ ပြန်လည် ပို့ဆောင်ရေး အစီစဉ် တခုလည်း ပါရှိခဲ့ပါတယ်။

မြန်မာနိုင်ငံ ဘက်ကလည်း ကာကွယ်ရေးဦးစီးချုပ် (ကြည်း) နဲ့ ပညာရေးဝန်ကြီး တို့က ၂၆ – ၉ – ၈၈ နေ့စွဲနဲ့ နယ်စပ်ရောက် ကျောင်းသားများ ပြန်လာဖို့ မေတ္တာရပ်ခံချက် တစောင် ထုတ်ပြန်ခဲ့ပါတယ်။
တချိန်တည်းမှာပဲ နယ်စပ်ပြန် ကျောင်းသားတွေဖြစ်တဲ့ လှအောင်၊ သိန်းဌေး၊ မင်းသိန်းတို့ကလည်း “ကျောင်းသား လူငယ်များသို့ အသိပေးကြေညာချက်” ခေါင်းစဉ်ပါ စာတွေကို နယ်စပ်တလျှောက် လေယာဉ်နဲ့ ကြဲချခဲ့ပါတယ်။

ဒါ့အပြင် ကျောင်းသားတဦး ပြန်လာအောင် ဆောင်ရွက်ပေးနိုင်ရင် အဲဒီလို လုပ်ပေးတဲ့လူကို ဘတ်ငွေ ၅ဝဝဝ စီ ပေးမယ်လို့ ဘန်ကောက် မြန်မာသံရုံးက ကြေညာချက် ထုတ်ပြန်ခဲ့ပါတယ်။
အဲဒီအချိန်ဟာ ကျောင်းသားခေါင်းဆောင်တွေ သီဘောဘိုးနဲ့ ၀မ်ခမှာ ပထမအကြိမ် ညီလာခံအတွက် ဆွေးနွေးလို့ ကောင်းတုန်း၊ မယ်သဝေါကို န၀တ က အကြီးအကျယ် ထိုးစစ်ဆင်လို့ ကောင်းတုန်း အချိန်တွေနဲ့ တိုက်ဆိုင်နေပါတယ်။

န၀တ နဲ့ ချာဗလစ်ရဲ့ အဲဒီစီမံကိန်းကြောင့် ကျောင်းသားတွေ ရာနဲ့ချီပြီး မဲဆောက်ကနေ ရန်ကုန်မြို့ဆီ လေယာဉ်စီးပြီး ပြန်သွားတာကို အဲဒီကာလက ထုတ်ဝေတဲ့ သတင်းစာတွေ၊ ရုပ်မြင်သံကြားတွေမှာ ပရိသတ်တွေ မြင်ခဲ့ဖူးမှာ ဖြစ်ပါတယ်။
ဒီဖြစ်စဉ်တွေဟာ ကျနော်တို့အုပ်စုက လက်ဒေးမှာ အစည်းဝေးလုပ်နေတုန်း ဖြစ်သွားတယ်ဆိုပေမယ့် မဲဆောက်အခြေနေဟာ အခုချိန်အထိ ဘယ်လိုမှ စိတ်ချလို့ရတဲ့ အခြေနေမဟုတ်သေးပါဘူး။ ဘယ်သူ့ကို ဘာကောင်မှန်း အတိအကျမသိရသေးတဲ့ အချိန်ပါ။

ဒီလိုနဲ့ သူကို ကိုယ်မယုံ၊ ကိုယ့်ကို သူမယုံဖြစ်နေကြပြီး ဘယ်သူ ဘယ်နေ့ မြ၀တီဘက် ပြန်ပြေးမလဲဆိုပြီး စောင့် ကြည့်နေတဲ့ သဘောမျိုး ဖြစ်နေပါတယ်။
ဒီကြားထဲ ကျနော်တို့စခန်းက ကိုယ်စားလှယ်တဦးဖြစ်သူ ဦးစံရွှေအောင်တယောက် မြ၀တီဘက် ပြန်ဝင်သလိုလိုနဲ့ ပျောက်သွားတဲ့ အခါမှာတော့ မယုံသင်္ကာ စောင့်ကြည့် မှုတွေဟာ ပိုများလာပြီး အနေအထိုင်၊ အသွားအလာအားလုံး
သတိထားနေရတဲ့ အခြေနေဖြစ်လာခဲ့ပါတယ်။
.................................................................................................................


သူပုန်ကျောင်းသားတဦးရဲ့ မာရသွခန်ခရီး ၁၀ 
on December 1, 2011 8:00 pm
အောက်မေ့ဖွယ် ။ ဧရာဝတီမဂဇင်း။


အရေးပေါ်ညီလာခံနဲ့ ဗဟိုကော်မတီအသစ်

ကျနော်တို့အုပ်စု မဲဆောက်မှာ တရုံးရုံးဖြစ်နေတုန်း ၁၉၈၉ ခုနှစ် ဖေဖော်ဝါရီလ အစောပိုင်းမှာ အရေးပေါ် ညီလာခံ ခေါ်မယ်ဆိုပြီး ဖိတ်စာရောက်လာပါတယ်။
ဘာကြောင့်ခေါ်ဖို့လိုသလဲဆိုတဲ့ အကြောင်းပြ ချက်ကို ကျနော် အတိအကျ မမှတ်မိတော့ပေမယ့် အကြမ်းအားဖြင့်ကတော့ ဗဟို ဦးစီးအဖွဲ့မှာ ဥက္ကဋ္ဌ ကိုထွန်းအောင်ကျော်နဲ့ အတွင်းရေးမှူး ကိုသန်းဝင်းတို့ပဲ ရှိနေပြီး ဒုတိယ ဥက္ကဋ္ဌ ကိုဝင်းမိုး၊ တွဲဘက် အတွင်းရေးမှုး ၂ ဦးဖြစ်တဲ့ ကိုအောင်နိုင် (အခု VOA မြန်မာပိုင်းဌာနမှူး) နဲ့ ဆလိုင်းကိုကိုဦး တို့က မရှိကြပါဘူး။

ထိုင်းရဲက ဖမ်းလို့ ဘန်ကောက်မှာ သောင်တင်နေပြီး နယ်စပ်ကို ပြန်လာလို့မရ ဖြစ်နေတယ်လို့ဆိုပါတယ်။ တချိန် တည်းမှာပဲ သူတို့ ၃ ဦးကို KNU ဥက္ကဋ္ဌ ဗိုလ်ချုပ်မြက ဖမ်းမိန့်ထုတ်ထားလို့ KNU နယ်ဆီ ပြန်မလာရဲဖြစ်နေတယ် လို့လည်း သတင်းတွေ ထွက်ပေါ်နေပါတယ်။

အရေးပေါ်ညီလာခံ ကျင်းပနေစဉ် (ဓာတ်ပုံ - စာရေးသူ၏ face book)

ထိုင်းကဖမ်းတဲ့ သတင်းကို သတင်းစာထဲမှာ တွေ့လိုက်ရပေမယ့် KNU က ဖမ်းမယ်ဆိုတဲ့ သတင်းကိုတော့ တဆင့်စကားနဲ့ ပြောနေကြတာကိုသာ ကြားခဲ့ရပါတယ်။
သေချာတာကတော့ အရေးပေါ်ညီလာခံဆီ သူတို့ ၃ ဦးရောက်မလာခဲ့ပါဘူး။ နောက်တခါ ဗဟိုကော်မတီဝင်တွေ ထဲမှာလည်း ကိုထွန်းဦးနဲ့ ကိုကိုလေးတို့ ၂ ဦးကိုပဲတွေ့ရပြီး ကျန်တဲ့လူတွေကို ကျနော်မတွေ့မိဘူး။ ယူဂျီအတွက် ပြည်တွင်းပြန်ဝင်သွားသူ၊ အဖမ်းခံ လိုက်ရသူ၊ ဘန်ကောက်ကနေ ပြန်မလာတော့သူ စသဖြင့်အမျိုးမျိုးနဲ့ လူမစုံတော့တာကလဲ အရေးပေါ် ညီလာခံ ခေါ်ယူရခြင်း အကြောင်းရင်းတခု ဖြစ်မယ်လို့ စဉ်းစားမိပါတယ်။

ဒီလိုနဲ့ ညီလာခံကျင်းပမဲ့သံလွင်စခန်းဆီ ကျနော်တို့ ကေအန်ယူ-နယ်မြေက ပုဂ္ဂိုလ်တွေဟာ မဲဆောက်ကနေ ကားတွေငှား၊ တချို့လည်း KNU ကားကြုံစီးပြီး လက်ဒေးနဲ့ မယ်သဝေါဘက် ပြန်လာရပါတယ်။ အဲဒီအချိန်မှာ မက်သဝေါတောင်ကို န၀တ-တပ်က သိမ်းထားလိုက်ပီဖြစ်တဲ့ အတွက် မယ်သဝေါ ကနေ လှေမစီးနိုင်တော့ဘဲ တောလမ်းအတိုင်း နောက်ထပ် တနာရီနီးပါး ထပ်မောင်းရတဲ့ ခလေတလူ ဆိုတဲ့နေရာကနေ သောင်ရင်းမြစ်ထဲ လှေစီးရပါတယ်။

အဲဒီလှေဆိပ်ရဲ့ ဒီဘက်မှာတော့ နော်တ ခံစစ်ကြောင်း၊ အဲဒီတောင်တန်းဘေးက သောင်ရင်းမြစ်အတိုင်း နာရီဝက်လောက် စုန်ဆင်းလာတော့ သစ်တောဝန်ကြီး ပဒိုအောင်ဆန်း (နောက်ပိုင်းမှာ နအဖ နဲ့ အပစ်ရပ်သွားသူ) တို့အိမ်နဲ့ အထက ကျောင်းကြီးရှိရာ ထီးတခီးဆိုတဲ့ ကရင်ရွာကြီး တရွာကို လှေပေါ်ကနေ လှမ်းမြင်ရပါတယ်။ ဆက်ဆင်းလာတော့ KNU ဌာနချုပ် မာနယ်ပုလော စခန်း ဖြစ်ပါတယ်။
မာနယ်ပလောကနေ နာရီဝက်လောက် ဆက်မောင်းတော့ သောင်းရင်းနဲ့ သံလွင်ဆုံရာ မြစ်ဆုံ (၁၉၉၄-၉၅ မှာတော့ အဲဒီမြစ်ဆုံနားမှာ ရှိတဲ့ ဘုန်းကြီးကျောင်းကနေ စ ပြဿနာတက်ပြီး DKBA ပေါ်လာခဲ့ပါတယ်။
အဲဒီမှာ မာနယ်ပလော ကျဆုံးခဲ့ရပါတယ်)

သောင်ရင်းမြစ်အတိုင်း စုန်ဆင်းလာတဲ့ စက်လှေဟာ သံလွင်ရောက်တော့ ရေဆန်ဖြစ်သွားပါတယ်။ သံလွင်ဟာ သောင်ရင်းထက် ရေစီးသန်ပေမယ့် စက်အားကောင်းတဲ့ လှေနဲ့မို့ လှေသမားအတွက် ပြဿနာ ရှိပုံမရ ပါဘူး။ သောင်းရင်းကတော့ ရေစုန်ဆင်းရတယ် ဆိုပေမယ့် ရေတိမ်လွန်းတာကြောင့် တချို့နေရာတွေမှာ သောင်တင်တာ၊ ကျောက်ဆောင်တွေ၊ သစ်ပင်တွေနဲ့ ၀င်ဆောက်မိတာမျိုးတွေ မကြာခဏ ဖြစ်လေ့ရှိပါတယ်။ သံလွင်ကတော့ သောင်ရင်းထက် ၃ ဆလောက် ကျယ်ပြီး ရေကလည်း နက်တဲ့အတွက် ကြုံရတဲ့ ပြဿနာချင်း မတူတော့ပါဘူး။

မြစ်ဆုံကနေ သံလွင်ကို ဆန်တက်တဲ့ မြစ်ကြောင်းတလျောက်မှာတော့ စီးပွားဖြစ် သစ်ထုတ်လုပ်ရေး စခန်းတွေနဲ့ ကရင်ရွာလေးတွေကို မြန်မာဘက်ကမ်းတလျောက် မြင်နေရပါတယ်။ သစ်ဆွဲနေတဲ့ ဆင်တွေ။ ခေတ်မီ သစ်ဖြတ်၊သစ်သယ် ယန္တယားတွေ၊ နံပတ်ပြားမပါတဲ့ သစ်တင်ကားတွေ၊ သေနတ်လွယ်ပြီး သွားလာနေတဲ့ ကရင်စစ်သားတွေ၊ သဲသောင်စပ်က
ဟင်းသီးဟင်းရွက် စိုက်ခင်းလေးတွေ၊ ဒေသခံ ကရင်ရွာသူရွာသား တွေကို စက်လှေပေါ်ကနေ လှမ်းမြင် နေရပါတယ်။

ထိုင်းဘက်ကမ်းကို ကြည့်လိုက်တဲ့ အခါမှာတော့ မြန်မာဘက်ကမ်းနဲ့ ပြောင်းပြန်ပါ။
သစ်ခုတ်၊ သစ်ဖြတ် နေတာကို လုံးဝ မတွေ့ရဘဲ ကျွန်းပင် သေးသေးလေးတွေကို စနစ်တကျ တန်းစီစိုက်ထားတဲ့ ကျွန်းခြံတွေကို သံလွင်မြစ်ကမ်း တလျောက်က တောင်ကုန်းတွေမှာ တွေ့နေရပါတယ်။ တနည်းအားဖြင့် ပြောမယ်ဆိုရင်တော့ သူတို့နိုင်ငံမှာ သစ်ခုတ်ခွင့် လုံးဝမရှိပါဘူး။

သစ်တော ထိမ်းသိမ်းရေးကို စနစ်တကျ ဆောင်ရွက်နေပြီ ဖြစ်ပေမယ့် မြန်မာဘက်က သစ်ကိုတော့ ရတဲ့နည်းနဲ့ ၀ယ်ယူ နေဆဲဖြစ်ပါတယ်။ သံလွင်မြစ် တခုခြားလိုက်ရုံ၊ သောင်ရင်းမြစ် တခုခြားလိုက်ရုံ၊ နယ်စပ်မျဉ်း တကြောင်း ခြားလိုက်ရုံနဲ့ သစ်တောပြုန်းတီးမှု၊ သဘာဝ ပတ်ဝန်းကျင် ပျက်စီးမှု၊ ရာသီဥတု ဖောက်ပြန်မှုတွေကို တားဆီးထားနိုင်လိမ့်မယ်လို့ ထိုင်းဘက်က တွက်ဆ ထားဆဲလားလို့ ကျနော်စဉ်းစားနေမိပါတယ်။

ဒီလို အတွေးနယ်ချဲ့ရင်းနဲ့ ငိုငေးဒီငေး တနာရီ နီးပါး ကြာတဲ့အခါမှာတော့ စော်လဲထာ ဆိုတဲ့ လှေဆိပ်နဲ့ ဈေးတန်းကြီး တခုကို ထိုင်းဘက်ကမ်းမှာ တွေ့ရပါတယ်။ အဲဒီ စော်လဲထာမှာ ဆိုက်ထားတဲ့ လှေတွေဟာ အရွယ်အစားမျိုးစုံ ရှိနေပြီး တချို့ လှေကြီးတွေ ဆိုရင် နွားကောင်ရေ ၂၀ လောက်အထိ တင်နိုင်တဲ့ အကြီးကြီးတွေ ဖြစ်ပါတယ်။ ဒီဈေးဟာ မာနယ်ပလော အပါအ၀င် သောင်းရင်းနဲ့ သံလွင်မြစ်တလျောက်က KNU စခန်းတွေ၊ ကရင်ကျေးရွာတွေ အတွက် အဓိက ဈေးကြီး ဖြစ်တာကြောင့် ဒေသတွင်း အစည်းကားဆုံး ဈေးတန်းကြီး တခုဖြစ်ပြီး ပစ္စည်းမျိုးစုံ ၀ယ်ယူနိုင်ပါတယ်။

ကျနော်တို့ အုပ်စု ကတော့ အဲဒီဈေးမှာ ခဏနား၊ ပစ္စည်းတွေကို ဟိုငေးဒီငေး လုပ်ရုံမှတပါး ဘာမှ မ၀ယ်နိုင်ပါဘူး။ အဲဒီကနေ နောက်ထပ် တနာရီကျော် ရေဆန် ဆက်မောင်းတဲ့ အခါမှာတော့ ဒေသအခေါ် ဥသုထ စခန်း၊ ကျနော်တို့ ကျောင်းသားတွေအခေါ် သံလွင်စခန်း ကိုရောက်ပါတယ်။
ကျနော့် မျက်စိထဲမှာတော့ သံလွင် စခန်းမှာ တွေ့ရတဲ့ အစည်းအဝေး ခန်းမက ကလက်ဒေးထက်တောင်မှ ပိုကောင်းနေသလိုပါပဲ။ ဒါပေမယ့် ကလက်ဒေးမှာလို ကုန်သွယ်ရေးစခန်းနဲ့ ကုန်သည်ရွာတွေကိုတော့ သံလွင်မှာ ကျနော်မတွေ့မိပါဘူး။

ကျနော်တို့ ရောက်သွားတဲ့အချိန်မှာ အဲဒီအစည်းအဝေး အခန်းဘေးက
ဘောလုံးကွင်းထဲမှာ ကျောင်းသား၊ ကျောင်းသူ ၁၀၀ လောက် မယ်ညား-ပါသား အော်ပြီး ၀ါးရင်းတုတ် သေနတ်တွေနဲ့ လေ့ကျင့်လို့ ကောင်းနေဆဲပါ။ သူတို့ကိုမြင်တော့မှပဲ
ဝါးရင်းတုတ်နဲ့ လေ့ကျင့်တာ ငါတို့ချည်းမဟုတ်ဘူး၊ ကျောင်းသား အတော်များများ ဒီလိုပဲ ဖြစ်မှာပါလို့ စိတ်ဖြေရာ ရခဲ့ပါတယ်။ အဲဒီသင်တန်းမှာ သံလွင်နဲ့ စောထစခန်း ၂ ခုစလုံးက ကျောင်းသားတွေ ပါဝင်ပြီး စောထစခန်းက ကိုကျော်ဦးခေါ် ကိုကျော်နီ (၁၉၉၉ အောက်တိုဘာမှာ ဘန်ကောက်က မြန်မာသံရုံးကို ဝင်သိမ်းဖို့ ကြိုးစားမှုနဲ့ နာမည်ကြီးလာတဲ့ ကိုဂျော်နီ) လည်း ပါဝင်တယ်လို့ ဒီဆောင်းပါး ရေးချိန်မှာ စောထစခန်းတုန်းက ကျောင်းသားတယောက်က ကျနော့်ကို ပြောပြခဲ့ပါတယ်။ ဒါပေမယ့် အဲဒီအချိန်ကတော့ ကိုကျော်ဦးကို ဘယ်သူမှန်း ကျနော် မသိခဲ့ပါဘူး။

ဒီလိုနဲ့ အစည်းအဝေး ခန်းမမှာ ခဏနား၊ စစ်သင်တန်းကို ကြည့်ပြီးတဲ့နောက် အဲဒီအစည်းအဝေးခန်းမ နောက်က အဆောင် တခုမှာ ကျနော်တို့ ညီလာခံ ကိုယ်စားလှယ်တွေ၊ လေ့လာသူတွေကို နေရာချပေးပါတယ်။ ကျွန်းသစ်ပေါပြီး သစ်စက်တွေ ရှိတဲ့အတွက် ဒီဒေသက အဆောက်အဦ အားလုံးဟာ သစ်မာတွေနဲ့ အခိုင်အမာ ဆောက်ထားတာ ဖြစ်ပြီး ကျနော်တို့ တည်းတဲ့ အဆောင်ဟာလည်း အတော်ကောင်းမွန် ခိုင်ခန့်တဲ့ အဆောင်တခု ဖြစ်ပါတယ်။

ညနေပိုင်း ရေဆင်းချိုးတဲ့အခါမှာတော့ “အားပါးပါး … သံလွင်ရေဆိုတာ ဒီလိုလား” ဆိုပြီး အော်ရတဲ့အထိ အေးစက်နေတဲ့ ရေကို ကျနော့်ဘ၀မှာ ပထမဆုံးအကြိမ်ကြုံလိုက် ရပါတယ်။ ဒီလောက်အေးနေတဲ့ ရေကိုမှ ဟိုဘက်ကမ်း ဒီဘက်ကမ်း လက်ပိုက်ကူးတဲ့ မောင်ကျောင်းတွေက ရှိပါသေးတယ်။ သံလွင်ဟာ သောင်ရင်းထက် ၃-ဆနီးပါး ပိုကျယ်တယ်လို့ ကျနော့်စိတ်ထဲ ခန့်မှန်းမိပြီး သံလွင် စခန်းရှေ့က ရေပြင်ဟာ ပေ ၁၀၀ လောက်ကျယ်မယ် ထင်ပါတယ်။

သံလွင်ရဲ့ ဟိုဘက်ကမ်းက တောင်ကုန်းလေးပေါ်မှာတော့ စိုက်ခင်းတခုနဲ့ တဲတန်းလေး တခုကိုမြင်နေရပြီး “သံလွင်ချောင်းခြား တို့နှစ်ယောက်သား” ဆိုတဲ့ စိုင်းထီးဆိုင်ရဲ့ သီချင်းလေးကိုတောင် သွား သတိရမိပါတယ်။

ကိုယ်စားလှယ်အသစ်နဲ့ ဗဟိုကော်မတီအသစ်

ဒီတခေါက်ညီလာခံအတွက် ကျနော်တို့ မင်းသမီးစခန်းကနေ ကိုယ်စားလှယ်အသစ် တဦးကို ထပ်လွတ်လိုက်ပါတယ်။ အဲဒီပုဂ္ဂိုလ်ကတော့ နောက်ပိုင်းမှာ ဗဟိုကော်မတီ ပြန်ကြားရေးဌာန တာဝန်ခံ ဖြစ်လာပြီး အခု DVB ဒု ညွန်မှူး ဖြစ်နေသူ ကိုခင်မောင်ဝင်း ဖြစ်ပါတယ်။
ကျနော်တို့ နယ်မြေကော်မတီထဲက ကိုကျော်ထင်လည်း စခန်းကိုယ်စားလှယ်အဖြစ် ထပ်ရွေးခံရပါတယ်။

ကျနော်နဲ့ ဥက္ကဋ္ဌ ကိုကျော်ကျော်အပါအ၀င် နယ်မြေ ကော်မတီ် အတော်များများကတော့ လေ့လာသူအဖြစ် လာတက်ကြတာပါ။ နောက်တခါ မောတောင် စခန်းကလည်း ပထမဆုံးအကြိမ်အဖြစ် ကိုယ်စားလှယ် ၂ ဦး ရောက်လာပါတယ်။ ကိုကျော်ဇေယျ (ပုသိမ်ကောလိပ်က ကျော်ဇေယျဟာ တောကျောင်းသား အမည်နဲ့ ကဗျာတွေရေးခဲ့ပြီး ၁၉၉၀ လောက်က ဘန်ကောက်မှာ ငှက်ဖျားနဲ့ ကွယ်လွန်သွားပါတယ်) နဲ့ မြိတ်မြို့က ကျနော်နာမည် မမှတ်မိတော့တဲ့ ကျောင်းသားတဦး ဖြစ်ပါတယ်။

နောက်တရက် ညီလာခံစတဲ့ အခါမှာတော့ အရေးပေါ် ညီလာခံ ခေါ်ရခြင်းအကြောင်းရင်းနဲ့ ဗဟို ကော်မတီရဲ့ အစီရင်ခံစာကို တင်သွင်းတယ်လို့ ထင်ပါတယ်။ အစီရင်ခံစာပါ အချက်အလက်နဲ့ ဆွေးနွေးချက် တွေကို ကျနော် မမှတ်မိတော့ပါဘူး။ ဒါပေမယ့် ထူးထူးခြားခြား ကျနော်မှတ်မိနေတဲ့ အချက်တခုကတော့ ညီလာခံ ကျင်းပတဲ့ ပထမနေ့လား၊ ဒုတိယနေ့လား မသိပါဘူး။ သီဘောဘိုးစခန်းက တပ်ရင်းမှူးတဦး ဖြစ်သူ ကိုတင်မောင်ဆန်းနဲ့ ရဲဘော် ၃၊ ၄ ဦး ရောက်လာပြီး
ညီလာခံမှာ အရေးပေါ် တင်ပြစရာရှိလို့ သူ့ကို ဆွေးနွေးခွင့် ပေးပါဆိုပြီး ညီလာခံထဲ ၀င်လာပါတယ်။

တင်မောင်ဆန်းဆိုတာ အဲဒီကာလက ခေသူမဟုတ်ပါဘူး။ အသားဖြူဖြူ အရပ်က မနိမ့်မမြင့်၊ ခန္တာကိုယ် ဖွဲ့စည်းပုံ အချိုးကျပြီး ပါးမြိုင်းမွေး၊ မုတ်ဆိတ်မွေး ခပ်ရေးရေးနဲ့ မင်းသားပုံ ပေါက်နေသူပါ။ ပြီးတော့ DSA (မေမြို့စစ်တက္ကသိုလ်) ကျောင်း ဒုတိယ နှစ်ကနေ ထွက်လာသူ၊ အင်အားအများဆုံး ကျောင်းသား စခန်းတွေထဲက သီဘောဘိုး စခန်းခွဲတခုရဲ့ တပ်ရင်းမှူးလည်း ဖြစ်တယ်။

နောက်တခါ အဲဒီကာလက မြန်မာကျောင်းသား တဦးကို ပြည်တော်ပြန်ပို့နိုင်အောင် သတင်းပို့နိုင်ရင် ဘတ် ၅၀၀၀ နှုံး ပေးမယ်လို့ မြန်မာသံရုံးက ကြေငြာချက် ထုတ်ထားတဲ့အချိန်ဆိုတော့ အဲဒီငွေကို လိုချင်လို့ တွေ့သမျှ ကျောင်းသားတွေကို မဲဆောက်ကနေ ရန်ကုန်ပြန်ပို့ဖို့ အကျိုးဆောင်လုပ်ပေးနေတဲ့ မဲဆောက် ဒုတိယမြို့တော်ဝန်ကို တောင် ဖမ်းဆီးပြီး သူ့တပ်ရင်း အချုပ်ခန်းထဲ ထည့်ပညာပေးခဲ့တဲ့ ကိုတင်မောင်ဆန်းပါ။ စသည်ဖြင့် သတင်းကြီး နေပြီး လမ်းသိပ်မယူသူအဖြစ် ကျနော်တို့ကြား နားလည်ထားပါတယ်။

ကိုတင်မောင်ဆန်း ညီလာခံမှာ ဘာတွေ တင်ပြခဲ့သလဲ ဆိုတာကို ကျနော် မမှတ်မိတော့ပေမယ့် သူနဲ့ ဥက္ကဋ္ဌ ကိုထွန်းအောင်ကျော်တို့ ၂ ဦး အပြန်အလှန် ပြောတာကို နားထောင်နိုင်ဖို့ဆိုပြီး ညီလာခံကိုတောင် ခဏရပ်ခဲ့ရ သေးတယ်လို့ ကျနော့် စိတ်ထဲ မှတ်မိနေပါတယ်။
..................................................................................................


သူပုန်ကျောင်းသားတဦးရဲ့ မာရသွန်ခရီး ၁၁

December 8, 2011 7:44 pm
အောက်မေ့ဖွယ်။ ဧရာဝတီမဂဇင်း။
 
တပ်ရင်းနံပါတ်များ သတ်မှတ်ခြင်း

ညီလာခံအတွင်းဆွေးနွေးတဲ့ နောက်ထပ်အရေးကြီးတဲ့အချက်တခုကတော့ ABSDF
စခန်းတွေအတွက် တပ်ရင်းနံပါတ်တွေ သတ်မှတ်နိုင်ခဲ့ခြင်းဖြစ်ပါတယ်။
ကျောင်းသားတွေရောက်နေတဲ့ လူမျိုးစုလက်နက်ကိုင်နယ်မြေ အလိုက် တပ်ရင်း
နံပါတ်တွေကို သတ်မှတ်လိုက်ပြီး မွန်နယ်မြေ အ တွက် အမှတ် ၁ နဲ့ စဖို့။ ကရင်နယ်မြေကို
အမှတ်၂။ ကရင်နီနယ်ကို အမှတ် ၃။ ရှမ်း၊ ရလလဖ၊ ပအို့ ၊ ပလောင်နယ်တွေကို အမှတ် ၄။
၅။ ၆။ ၈။ ကချင် နယ်ကို အမှတ် ၇။ အိန္ဒိယနဲ့ ဘင်္ဂလားဒေ့ရ်ှနယ်စပ်ကို အမှတ် ၉ နဲ့ စဖို့ သတ်မှတ်လိုက်ပါတယ်။



သံလွင်စခန်းမှာ အရေးပေါ် ညီလာခံကျင်းပနေပုံ (ဓါတ်ပုံ စာရေးသူရဲ့ Face book )
အဲဒီသတ်မှတ်ချက်တွေအရ မွန်ပြည်သစ်နယ်မြေ ဘုရားသုံးဆူဒေသမှာ ၁၀၁ နဲ့ ၁၀၂ တပ်ရင်း တွေပေါ်လာပါတယ်။ KNUနယ်မြေ ဘိတ်(မြိတ်) ဒေသရှိ မောတောင်စခန်းမှာ ၂၀၃။ ထားဝယ်ဒေသ မင်းသမီးမှာ ၂၀၁။ သီဘောဘိုးမှာ ၂၀၄။၂၀၅။၂၀၆ တပ်ရင်းများ။ ရေကျော်မှာ၂၀၇။ သံလွင်မှာ၂၀၈ နဲ့ ၂၀၉။ စောထမှာ ၂၁၀။ ၀မ်ခမှာ ၂၁၁ စသဖြင့် ပေါ်လာပါတယ်။ ကရင်နီဒေသ ဟွေစေတီ စခန်း မှာ ၃၀၃ တပ်ရင်း ပေါ်လာပါတယ်။ ပလောင်နယ်မြေမှာ ၅၀၁။ ပအို့နယ်မြေမှာ ၆၀၁။ ရလလဖ နယ်မြေမှာ ၈၀၁ တပ်ရင်း တွေ ပေါ်လာပါတယ်။ ကချင် နယ်မြေကိုတော့ မြောက်ပိုင်းအဖြစ် သီးခြား သတ်မှတ်ပြီး ၇၀၁ တပ်ရင်းတွေပေါ်လာပါတယ်။ အိန္ဒိယနဲ့ ဘင်္ဂလားဒေ့ရှ် နယ်စပ်ဘက်မှာ ၉၀၁ တပ်ရင်းတွေ ပေါ်လာပါတယ်။


ဒီလိုအရေးကြီးတဲ့ ဆုံးဖြတ်ချက်တွေ။ ငြင်းခုံမှုတွေပြီးတဲ့နောက်မှာတော့ ဗဟိုိကော်မတီ ရွေး ချယ်တဲ့နေ့ဆီရောက်လာပါတယ်။ ကျနော်မှတ်မိသလောက် (မှတ်မိသမျှရေးထားခြင်းသာဖြစ်ပါတယ်။ မူရင်းစာရင်းရနိုင်ဖို့ ABSDF ဗဟိုသုတေသနဌာနဆီ တောင်းခံ ထားပေမယ့် အခုထိမရသေးပါ။ လူစာရင်း အမှားအယွင်းရှိပါက တောင်းပန်အပ်ပါတယ်)

အရေးပေါ်ညီလာခံကနေ ရွေးချယ်လိုက် တဲ့ ဗဟိုကော်မတီ စာရင်းကတော့ ဥက္ကဌ အဖြစ် မူလ ဥက္ကဌ ကိုထွန်းအောင်ကျော်။ ဒု ဥက္ကဌတွေအဖြစ် ဘုရားသုံးဆူ ဘက်က လာတဲ့ ဒေါက်တာ နိုင်အောင်(စီမံ)နဲ့ ကော့မူးရာမှ ဦးယုနွယ်(စစ်ရေး) တို့ ဖြစ်ပါတယ်။ အထွေထွေ အတွင်းရေးမှူး အဖြစ် မူလ အတွင်းရေးမှူး ကိုသန်းဝင်း။ တွဲဖက်အတွင်းရေးမှူး ၁ အဖြစ် ဟွေစေတီ စခန်း(ကရင်နီ) ဘက်ကလာတဲ့ စိုင်းဆိုင်ခေး။ တွဲဖက်အတွင်း ရေးမှုး ၂ အဖြစ် ဘုရားသုံးဆူဘက်ကလာတဲ့ ကိုတင်စိုးနောင် တို့ ဖြစ်လာပါတယ်။ ဗဟိုဦးစီး ကော်မတီဝင်တွေ အဖြစ်တော့ မူလစည်းရုံးရေးတာဝန်ခံ ကိုထွန်းဦး(ကျဆုံး)နဲ့ ပြန်ကြားရေးတာဝန်ခံ ကိုကိုလေးတို့ကို မူလတာဝန်တွေ ဆက်ပေးပါတယ်။

အသစ်တက်လာတဲ့ ဗဟိုဦးစီး ကော်မတီဝင်တွေထဲမှာတော့
ကော့မူးရာစခန်းက ဒေါက်တာ သောင်းထွန်းက နိုင်ငံခြားရေး(လက်ရှိ အဝေးရောက်
ညွန့်ပေါင်းအစိုးရရဲ့ ကုလသမဂ္ဂ ကိုယ်စားလှယ် အဖြစ်တာဝန်ထမ်းနေဆဲ)။ ကလက်ဒေး သို့မဟုတ် ရေကျော်စခန်း က ဒေါက်တာ ကျော်သက်ဦးက ကျန်းမာရေး။
ဟွေစေတီစခန်းက ကိုဆန်နီက စစ်ရေး(လက်ရှိ ABSDF အထွေထွေအတွင်းရေးမှူးအဖြစ် တာဝန်ယူနေဆဲ)။ ဟွေစေတီကပဲ ကိုမန်းထွန်းက ဘဏ္ဍာရေး။ စောထစခန်းက ကိုဆန်းလင်းက ထောက်ပံ့ရေး။ သီဘောဘိုးက ကိုအောင်သန်း(နှုတ်ခမ်းမွေး)က စာရင်းစစ် အဖြစ် ကျနော်မှတ်မိနေပါတယ်။

ဗဟိုကော်မတီဝင်တွေထဲမှာတော့ ၆၀၁ တပ်ရင်းက ကိုတိုက်မောင်း။ စောထစခန်းက ကိုတင်စိုး။ ရေကျော်က ကိုအောင်ဟိန်းနဲ့ ကို ထွန်းသိန်း။ မင်းသမီးစခန်းက ကိုခင်မောင်ဝင်းနဲ့ ကိုကျော်ထင်။ မောတောင်စခန်းက ကိုကျော်ဇေယျ တို့ကိုလည်း ကျနော် အမှတ် ရနေပါတယ်။ ပထမ အကြိမ် ဗဟိုကော်မတီ တုန်းက စခန်းတခုချင်းစီရဲ့ ကိုယ်စားလှယ်တွေစုံအောင်မပါတဲ့အတွက် ဒီတကြိမ်မှာတော့စခန်းတခုစီက အနည်းဆုံး ဗဟိုကော်မတီ တဦးစီ ပါစေရမယ်ဆိုတဲ့ စဉ်းစားချက်ကြောင့် ဗဟိုကော်မတီအများဆုံး ရွေးချယ် ခဲ့တဲ့ ညီလာခံတခုလည်း ဖြစ်ခဲ့ပါတယ်။

ဗဟိုကော်မတီအသစ် ကျမ်းသစ္စာဆိုတဲ့အခါမှာတော့ ဗုိုလ်ချုပ်အောင်ဆန်းတို့ ရဲဘော်သုံးကျိပ်လို လက်မောင်းသွေးဖောက် သွေးသောက် သစ္စာဆိုမယ်လို့ ကိုယ်စားလှယ်တဦးက အဆိုပြုပါတယ်။ ဒီအဆို ပြုချက်ကို အားလုံးနီးပါးက လက်ခံကြပေမယ့် ဟွေစေတီ ဘက်က လာတဲ့ ကိုယ်စားလှယ်တဦးကတော့ ဒီကိစ္စဟာ နိုင်ငံရေးအရမှန်ပေမယ့် ကျန်းမာရေး ရှုထောင့်ကကြည့်ရင် ကျန်းမာရေး ထိခိုက်နိုင်တဲ့အတွက် သူလက် မခံဘူးဆိုပြီး ထ ကန့်ကွက်တာကိုလည်း ကျနော်အမှတ်ရနေပါတယ်။

ညီလာခံအတွင်း ဒီလိုအဆင်မပြေမှုတွေ။ ငြင်းခုံမှုတွေရှိခဲ့ပေမယ့် ညီလာခံပြီးတဲ့ရက်လား။ ကျနော်တို့ ရောက်စဉ်က မယ်ညား- ပါသားနဲ့ ဘယ်ညာနင်းနေတဲ့ သင်တန်းသားတွေရဲ့ သင်တန်းဆင်းပွဲနေ့လား မသိပါ။ အဲဒီတရက်မှာ KNU တပ်ရင်း ၂၀ နယ်မြေ။ ဥသုထ ဒေသအကြီးအကဲနဲ့ ခရိုင် ဥက္ကဌ ပဒိုနော်တော့က ကျနော်တို့ ကျောင်းသားကိုယ်စားလှယ်အားလုံးကို သူ့အိမ်ဆီဖိတ်ပြီး နွား တကောင် ပေါ်ကြွေးခဲ့ပါတယ်။

အဲဒီ ထမင်းစားပွဲမှာ သူပြောတဲ့ အဓိကစကားလုံကတော့ ကျောင်းသားတွေ ညီညွတ်ရေးအတွက် အခုလို ထမင်းဖိတ်ကြွေးတာပါတဲ့။ ဒါပေမယ့် ငတ်ပြတ်နေတဲ့ ကျနော်တို့ကတော့ ထမင်းစားပွဲမတိုင်မီလုပ်လေ့ရှိတဲ့ ဆုတောင်းပွဲ မြန်မြန်ပြီးပါစေ။ “အာမင်” ကိုမြန်မြန်ကြားရပါစေလို့သာ ဆုတောင်းနေတဲ့အတွက် သူ့စကားကို သိပ်နားမ၀င်။ မစားရတာကြာပြီဖြစ် တဲ့ အမဲသားတုံးကိုသာ အလုအယက် ၀ိုင်းအားပေးခဲ့ပါတယ်။


ရန်သူနဲ့မတိုက်ခင် ငှက်ဖျားကို အရင်တိုက်

သံလွင်စခန်းမှာ အရေးပေါ်ညီလာခံတက်နေစဉ်အတွင်း ကျနော်ငှက်ဖျားစဖြစ်ပါတယ်။ သံလွင် မြစ်ရေကို မကြိုမချက်ဘဲ ဒီတိုင်း သောက်မိလို့လား။ အအေးဓာတ်များတဲ့ ဒေသမို့လား။ ဘာကြောင့်မှန်း မသိ တကိုယ်လုံးအေးစက် တုန်ရီဖြစ်ပြီး ငှက်ဖျားတက်ပါလေ ရော။ အဲဒါနဲ့ ရှေ့မှာပြောခဲ့တဲ့ စစ်ရေးပြကွင်း ဘေးနားမှာဖွင့်ထားတဲ့ အရေးပေါ် ဆေးခန်းဆီ ဆေးသွားတောင်းတော့ ကျနော်လို့ ငှက်ဖျား မိနေသူတွေအများကြီး။ ဆေးခန်း ခုတင်ပေါ်မှာ လူနာ ၂၀ ကျော်ရှိမယ် ထင်ပါတယ်။ အားလုံးနီးပါးဟာ အခုမှရောက်လာ တဲ့ ကျောင်းသားလူငယ်တွေဖြစ်ကြပြီး တချို့က စောင်ကိုခေါင်းမြီးခြုံကာ တအီးအီးညည်း နေပါတယ်။ တချို့က ဒရစ် ပုလင်းတွေတန်းလန်းနဲ့ ခွေပျော့လို့။ တချို့ကတော့ ခုတင်ပေါ်ထိုင်။ ဆေးခန်းနံရံ ကိုမှီပြီး သံလွင်မြစ်နဲ့ ဟိုဘက်ကမ်းက တောင်တန်းကြီးဆီ ငေးမောပြီး ငူငူငိုင်ငိုင် ခပ်ကြောင်ကြောင် ပုံစံ တွေနဲ့။

ကျနော့်ကိုတော့ အယင်ဆုံး ပြဒါးတိုင်တခုပေးပြီး ပါးစပ်ထဲငုံခိုင်းလိုက်ပါတယ်။ အပူချိန်က အတော်များနေပုံရပေမယ့် အတိအကျ ကျနော်မမှတ်မိတော့။ ပြီးတော့ သွေးပေါင်ချိန်တိုင်း။ အပေါ်သွေး။ အောက်သွေးကိုမှတ်။ ဟောဒီဆေးတွေကို အယင်သောက် လိုက်။ ၈ နာရီခြား တကြိမ်စီ ဆရာမတွေ က ဆေးလာပေးလိမ့်မယ် လို့ သရမူ (ဆရာမကို ကရင်လိုအခေါ်) တဦးက ဆေးတဆုပ်နဲ့ ရေတခွက် ပေးပြီး ပြောပါတယ်။ “အားပါးပါး မနည်းပါလား”ဆိုပြီး ကျနော့်ပါးစပ်က အော်မိတဲ့အထိ ဆေးတွေက အများကြီး။ ကွီနီး (ကလိုကွင်းလဲဖြစ်နိုင်ပါတယ်) က၂ လုံး။ ပါရာစီတမောက ၂ လုံး။ တက်ထရာ ဆကလင်း က ၂ လုံး။ ဘီဆစ်က ၂ လုံး။ အဲဒါ အားလုံးကို ပါးစပ်ထဲတကြိမ်တည်း ပစ်ထည့်ပြီး သောက်ရမယ်လို့ သရမူက ပြောပါတယ်။ သူပြောတဲ့အတိုင်း လိုက်လုပ်ပေမယ့် ဆေး ကြောက်တဲ့ ကျနော် အံထွက်ပါလေရောပေါ့ ခင်ဗျာ။

ကရင် သရမူကတော့ ခပ်ကြမ်းကြမ်းပါပဲ။ အန်လို့ မရဘူး။ နောက်တခါ ထပ်သောက်ဆိုပြီး ထပ် တိုက်ပါတယ်။ ဒီတခါမှာတော့ ရိုးရိုးရေအစား လိမ္မော်ရည်လား။ ကိုကာကိုလာလားမသိ တခွက် လောက်နဲ့တိုက်တော့ မအန်တော့ပါဘူး။ ပြီးတော့ ဆေး ၈လုံး စလုံး တပြိုင်တည်း မပစ်ထည့်ဘဲ မခါးတဲ့ ဆေး ၄ လုံးကို တကြိမ်။ ခါးလွန်းတဲ့ ကွီနီးနဲ့ ချဉ်စပ်စပ် ဘီဆစ်ကို တကြိမ်သောက် လိုက်တော့ အိုကေ သွားပါတယ်။ ဒီတော့မှ သရမူက ဟာလဲဂေ ပြောပြီး တခြားလူနာဆီ ပြောင်းသွားပါတယ်။ ကျနော်လည်း သရမူရဲနောက်ကျောကို ငေးကြည့်ရင်း စိုင်းထီးဆိုင်ရဲ့“ခွဲစိတ်ခန်းက ဆရာမလေး”ကို သွားသတိရမိပါတယ်။ မန္တလေး တက္ကသိုလ် က သူနာပြုဆရာမနဲ့ သံလွင်စခန်းကဆရာမ ဘာများကွာသလဲဆိုပြီး စဉ်းစားရင်း ပြုံးစိစိဖြစ်နေမိပါတယ်။


ညီလာခံဆီ တက်လာတဲ့စခန်းအသီးသီးက ကိုယ်စာလှယ်များ (ဓါတ်ပုံ စာရေးသူရဲ့ Face book )
ဒါပေမယ့် သေချာတာကတော့ နယ်စပ်ကတောထဲလာပြီး တက္ကသိုလ်ဆေးခန်းက သာယာနာပျော်ဘွယ် ဆရာမလေးကို စိတ်ကူး ယဉ်နေလို့မရ။ တက်နေတဲ့ငှက်ဖျား အချိန်မီအပူချိန်မကျဘူးဆိုရင် ပြာလားဂေ(မူလ ကရင်စကားလုံးတွေဖြစ်တဲ့ ဝေါလဲဂေ။ နီလဲ ဂေ။ ဟာလဲဂေ။ နာလဲဂေ-တွေကို တုပြီး အဆင်မပြေ။ ပြာယာခတ်တဲ့အချိန်။ ဒုက္ခနဲ့ တွေ့တဲ့အချိန်တွေမှာ ကျောင်းသားတွေကြား သုံးလေ့ရှိတဲ့ ဘန်းစကားဖြစ်ပါတယ်) ဖြစ်ပြီး ဒုက္ခများသွား နိုင်ပါတယ်။ ငှက်ဖျားပိုး ဦးနှောက်ထဲဝင်လို့သေသွားသူတွေ။ ဂေါက်
ကြောင် သွားသူတွေ။ ပြီးတော့ ဆီးထဲသွေးပါတဲ့ Black Water နဲ့ သေသွားသူတွေ ကျနော့်ရှေ့မှာ ဒါဇင်နဲ့ချီရှိခဲ့ပြီးဖြစ်တဲ့အတွက် ငှက် ဖျားဟာ တကယ်ကြောက်စရာဖြစ်လာနေပါတယ်။

ဒီဆေးခန်းမှာထူးထူးခြားခြား ကျနော်သတိထားမိတာတခုကတော့ ဒီက ကု-ထုံးတွေက ကျနော်တို့ မြန်မာနိုင်ငံနဲ့မတူ။ မြန်မာနိုင်ငံမှာ တုန်းက ကျနော်ပဲတခါမှ လူနာမဖြစ်ခဲ့ဘူးလို့လားမသိ။ ဒရစ်သွင်းတဲ့လူဆိုရင် အခြေနေ အတော်ဆိုးနေပြီ။ သေဖို့များနေပြီ လို့နားလည်ထားပေမယ့် ဒီမှာကတော့ ဆေးရုံတက်တာနဲ့ ဒရစ် အရင် ချိတ်တာပါပဲ။ နောက်တခု ကွာခြားချက်ကတော့ ကျနော့်အိမ်မှာတုန်းက အအေးမိ။ အပူရှပ်ပြီး အဖျားတက်တယ်ဆိုရင် တခါးတွေအလုံပိတ်။ စောင်ခြုံအိပ်။ ပြီးတော့ အဖျားကျရင်လည်း ဘာ မစားရ။ ညာမစားရဆိုတာတွေရှိပေမယ့် ဒီမှာကတော့ အပူသိပ်များရင် ရေခဲနဲ့ရိုက်မယ်။ ရေခဲ မရှိရင် အေးစိမ့်နေတဲ့ သံလွင်မြစ် ထဲဆင်းခိုင်းပြီး ရေချိုးခိုင်းမယ်။ ပြီးရင် အားရှိတဲ့အစာတွေ ပေးစားမယ်ပေါ့။ ဒါပေမယ့် ကျနော်တို့ ကျိုးဖိုးတွေကတော့ သံလွင်ရေနဲ့ ပဲ တိုးနေရပြီး အားရှိတဲ့အစာအတွက်တော့ မိုက်မီသန် (ပိုက်ဆံမရှိတာကို ထိုင်းလိုအခေါ်) အမြဲတမ်း ဖြစ်နေလို့ မစားနိုင်ခဲ့ပါဘူး။

အဲဒီလို အခြေနေတွေကြားမှာ ဒရစ် တလုံးသွင်း။ ကွီနီး-ပါရာ-တက်ထရာတွေနဲ့ ၃ရက်လောက် နှစ်ပါးသွားပြီးတဲ့အခါမှာတော့ ကျနော် ဆေးရုံကဆင်းခွင့်ရပါတယ်။ ကွီနီး တန်ခိုးပြလို့ မူးဝေေ၀ဖြစ်နေပြီး နားထဲမှာ တချိန်လုံး ရဟတ်ယဉ်အသံ ကြားနေရသလိုလို။ ယင်ကောင်တွေ။ ပိတုန်းတွေ ခေါင်းပေါ်မှာ ၀ဲပျံနေသလိုလို တချိန်လုံးကြားနေရပါတယ်။

အဲဒီကာလက ကျောင်းသားတွေရဲ့ပုံတွေကို အခုချိန်ပြန် ကြည့်မိရင် ငှက်ဖျားမိနေတဲ့ပုံတွေမှန်း သိပ်သိသာပါတယ်။ အဲ သံလွင်က ပေးလိုက်တဲ့ ငှက်ဖျားလက်ဆောင်ဟာ တော်ရုံနဲ့ မပျောက်တော့ပါဘူး။ တလတခါ နှစ်လတခါနီးပါး ငှက်ဖျားကပြန်ပြန်ပေါ်လာ နေ တဲ့အတွက် မဲဆောက်က ဒေါက်တာစင်သီယာ ဆေးခန်းမှာ ၂ ခါ ၃ ခါ ထပ်တက်လိုက်ရပါသေးတယ်။

နောက်ပိုင်း မင်းသမီးစခန်းဘက်ပြန်ရောက်တဲ့အချိန်မှာလည်း ငှက်ဖျားဟာအမြဲလိုလိုဖြစ်နေပြီး ဘန်ကောက် ရောက်တဲ့အထိ မပြတ် ပါဘူး။ ဘန်ကောက်မြို့လယ် အနုစာဝါရီ ကျောက်တိုင်အနီးရှိ မဟိဒေါ တက္ကသိုလ် ရဲ့ ငှက်ဖျားသုတေသနာဆေးရုံကြီးမှာတောင် သတင်းတပတ်ကြာ တက်ရောက် ကုသခံလိုက်ရပါသေးတယ်။ ဒါပေမယ့် ငှက်ဖျားက အမြစ်မပြတ်ဘဲ တခါတရံပြန်ပြန်ပေါ်လာတတ်ပြီး အခု နော်ဝေးကို ရောက်တော့မှပဲ ငှက်ဖျား ဇာတ်လမ်း တခန်းရပ်သွားပါတယ်။
............................................................................................................................


သူပုန်ကျောင်းသားတဦးရဲ့ မာရသွန်ခရီး (၁၂)
December 15, 2011 7:10 pm
အောက်မေ့ဖွယ်။ ဧရာဝတီမဂဇင်း။


မာနယ်ပလောဌာနချုပ်သို့ ပထမခရီးစဉ်


KNU နယ်မြေကော်မီတီမှာ တာဝန်ထမ်းစဉ်အတွင်း မာနယ်ပလောကို ၃၊ ၄ ခေါက် ကျနော်ရောက်ဖူးခဲ့ပေမယ့် ပထမအခေါက်ရောက်တာဟာအရေးပေါ်ညီလာခံ မတိုင်မီလား။ ညီလာခံပြီးမှလား ဆိုတာကိုတော့ အသေချာ မမှတ်မိတော့ပါ။ ပထမအခေါက်ဟာ ဥက္ကဋ္ဌ ကိုကျော်ကျော်၊ အတွင်းရေးမှူး ကိုခင်မောင်စိုးတို့နဲ့အတူ ကျနော် ပါသွားတာဖြစ်တဲ့အတွက် နယ်မြေကော်မီတီ ဖွဲ့ပြီးကာစမှာ သွားတာဖြစ်ဖို့များပါတယ်။ အချိန်ကာလကို အတိအကျ မမှတ်မိတော့ပေမယ့် ထူးခြားလှတဲ့ မာနယ်ပလောရဲ့ ပထ၀ီ အနေထားနဲ့ အခင်းအကျင်းကိုတော့ အခုအထိ စိတ်ထဲမှာ မြင်နေဆဲဖြစ်ပါတယ်။


မာနယ်ပလောစခန်းရောက် ABSDF စစ်ကြောင်းတခု
ထုံးစံအတိုင်း မဲဆောက်၊ မယ်လ၊ မက်သလေ၊ ခလေတလူကနေ မာနယ်ပလောအထိ ကားကြုံ၊ လှေကြုံ အဆင့်ဆင့်နဲ့ ရောက်လာတဲ့ ကျနော်တို့အုပ်စု မာနယ်ပုလော လှေဆိပ်ရောက်တော့ ညနေစောင်းနေပါပြီ။ ဗိုလ်မှူးစိုးစိုးအိမ်က ထုတ်ပေးထားတဲ့ ခရီးသွားလက်မှတ်ကို ဗဟိုလှေဆိပ်၊ စစ်ဆေးရေးဂိတ်မှာပြပြီး  သူပုန်ဌာနချုပ်ဆီ ကျနော်တို့ တက်လာခဲ့ပါတယ်။ လှေဆိပ်ကနေ အပေါ်တက်တဲ့ လမ်းကြောင်း ၂ ခုရှိပြီး ကျနော်တို့ တက်လာတဲ့လမ်းမှာတော့ သစ်သားလှေကားထစ်တချို့၊ မြေလှေကားထစ်တချို့နဲ့ မညီမညာ၊ အတို အရှည် လှေကားထစ် ၄၀ လောက် ရှိမယ်လို့ထင်ပါတယ်။

လှေကားထစ်တွေဆုံးလို့ မြေညီလွှာကိုရောက်တာနဲ့ မြက်ခင်းစိမ်းစိမ်းရှိတဲ့ မာနယ်ပလော ဘောလုံးကွင်းနဲ့ ကွင်းပတ်လည်က သစ်သားအိမ်တွေ၊ ရုံးတွေကို မြင်လိုက်ရပါတယ်။ အဲဒီရုံးတွေ၊ အိမ်တွေထဲက ပထမဆုံးတွေ့တဲ့အိမ်ဟာ ကျနော်တို့သွားချင်တဲ့ KNU အတွင်းရေးမှူးချုပ် ပဒိုဘသင်စိန် (နောက်ပိုင်း KNU ဥက္ကဌဖြစ်လာပြီး ၂၀၀၈ မှာ ကွယ်လွန်သွားသူ) ရဲ့ အိမ်ပါပဲ။ “ဟာလဲဂေး ပဒို” လိုိ့ မိတ်ဆက်ပြီး သူအိမ်ပေါ် ကျနော်တို့ တက်သွားပါတယ်။
ကေအန်ယူအရာရှိတွေနဲ့တွေ့ရင် ကရင်လိုနှုတ်ဆက်နိုင်ဖို့ “၀ါ-နီ-ဟာ-နာ” ကို အလွတ်ကျက်ထားရပါတယ်။ မနက်ပိုင်း Good morning ကို ၀ါလဲဂေး။ နေ့လည်ပိုင်း Good afternoon ကို နီလဲဂေး။ ညနေပိုင်း Good evening ကို ဟာလဲဂေးလို့ပြောပြီး ညပိုင်း Good night ကို နာလဲဂေးလို့ သုံးပါ တယ်။ အဲဒါကို အလွတ်မရဘဲ ၀ါ-နီ-ဟာ-နာ ကို နေရာမှားသုံးပြီး ပြောင်းပြန်နှုတ်ဆက်မိရင် “ဗမာလိုပဲ ပြောပါဗျာ။ မင်္ဂလာပါလို့ ပြောရင်လည်း ရပါတယ်” လို့ အပြောခံရတတ်ပါတယ်။ တခါတရံမှာတော့ အဟားခံရတတ်ပါတယ်။ ဒါကြောင့် ဒီ ၄ ခုကိုတော့ နေရာမှားမသုံးမိအောင် ကျနော်တို့ ကျိုးဖိုးတွေ အာဂုံဆောင်ထားရပါတယ်။
နောက်တခါ ဒီလိုမျိုး အချိန်ပိုင်းခြားအလိုက် နှုတ်ဆက်နည်းတွေကို ကရင်နယ်မြေအပါဝင် နိုင်ငံတကာမှာ ကျနော်ကြုံခဲ့ရဖူးပေမယ့် ကျနော်တို့မြန်မာနိုင်ငံမှာတော့ မရှိဘူးလို့ထင်ပါတယ်။ “မင်္ဂလာပါ” လို့ နှုတ်ဆက်တာမျိုးကို ကျောင်းခန်းထဲ ဆရာမ ၀င်လာချိန်မှာ ပြောတာကလွဲရင် တခြားနေရာမှာ သုံးတာ ကျနော်တော့ သိပ်မကြားမိပါဘူး။ “နေကောင်းလား”၊ “ထမင်းစားပြီးပြီလား” စသည်ဖြင့် နှုတ်ဆက်တာက ပိုများတယ်လို့ထင်ပါတယ်။ တဆက်တည်း တင်ပြချင်တဲ့ ထူးခြားမှုကတော့ ကရင်နယ်အပါဝင် နိုင်ငံတကာမှာ ကျနော်တွေ့ဖူးသမျှ လူမျိုးတွေမှာ Family name မိသားစုအမည်တွေရှိပေမယ့် မြန်မာမှာတော့ အမည်တွေက တယောက်တမျိုးစီဖြစ်နေပြန်ပါတယ်။ အဖေအမည်နဲ့ သားသမီးအမည်တွေဟာ ဘာမှအချိတ်အဆက်မရှိဘဲ သီးခြားစီ ဖြစ်နေတာကလည်း မြန်မာနိုင်ငံရဲ့ ထူးခြားမှုအဖြစ် တွေ့မိပါတယ်။
ဝါ-နီ-ဟာ-နာ နဲ့ မိသားစုအမည်ကိစ္စတွေကို စဉ်းစားရင်း ပဒိုဘသင်စိန်ရဲ့ အိမ်ပေါ် ကျနော်တို့ ရောက်သွားပါတယ်။ အတွင်းရေးမှူးချုပ်အိမ်ဆိုပေမယ့် ဘာမှထူးထူးခြားခြား အဆောင်ယောင်တွေမရှိပါ။ နောက်ပိုင်းမှ သိရတာကတော့ ဒီအိမ်တွေဟာ ရုံးနဲ့တွဲထားတဲ့အိမ်တွေသာဖြစ်ပြီး ဗိုလ်ချုပ်မြအပါဝင် ကေအန်ယူ ထိပ်တန်းအရာရှိတွေရဲ့ မိသားစုနေအိမ်တွေဟာ မာနယ်ပလောကနေ မိနစ် ၂၀ ခန့် လှေစီးရတဲ့ ဖွေးဘောလူရွာမှာရှိတယ်လို့ သိရပါတယ်။ ကျောင်းသားတချို့ ရောက်ဖူးကြပေမယ့် ကျနော် မရောက်ဖူးလိုက်ပါ။
တခြမ်းစောင်းနေတဲ့ တောင်နံရံကို မြေမညှိဘဲ တိုင်ကို ညှိပြီးဆောက်ထားတဲ့အိမ်။ ခြေတံရှည် ကျွန်းသစ်သားသစ်တိုင် အတိုအရှည်တွေ စိုက်ထားပြီး အဲဒီပေါ်မှာ သစ်တချို့၊ ၀ါးတချို့နဲ့ အသေချာ ဆောက်ထားတဲ့ ခြေတံရှည် တဲအိမ်တလုံးမျှသာဖြစ်ပါတယ်။ အမိုးက အင်ဖက်၊ အခင်းက ကျွန်းသစ် သားအကြမ်းထည်။ တခြမ်းပဲရှိတဲ့ အကာက ၀ါးထရံ။ ခါးဆစ်လောက်အထိ ၀ါးထရံ ကာထားတဲ့ သူ့အိပ်ခန်းတခုကလွဲရင် တအိမ်လုံးဟင်းလင်းပြင်။ အိမ်အလျားက ပေ ၃၀ လောက်ရှိပြီး အနံက ၁၅ ပေလောက်ရှိမယ်လို့ ထင်ပါတယ်။ အိမ်ရှေ့လှေကားအတက် ကွပ်ပြစ်မှာက ဧည့်ခန်း။ အပေါ် ဆင့်မှာ သူရဲ့ရုံးခန်း။ နောက်ကျောဘက်မှာ မီးဖိုးချောင်။ ဒါပါပဲ။
ရုံးခန်းဆိုပေမယ့် အဲဒီကာလက ကွန်ပြူတာမပေါ်သေးတဲ့အတွက် သူရဲ့အတွင်းရေးမှူးတဦးက လက်နှိပ်စက်တလုံးနဲ့ ကရင်စာ၊ အင်္ဂလိပ်စာတွေကို တဂျောက်ဂျောက်နဲ့ ရိုက်နေတုန်း။ အတွင်းရေးမှူးဆိုပေမယ့် ကော်သူးလေ အ.ထ.က ကနေ ဆယ်တန်းအောင်ခါစ ဖက်ဒရယ်တက္ကသိုလ်ကို တက်နေတဲ့ ကျောင်းသားလေးတဦးက စေတနာ့ဝန်ထမ်းအဖြစ် ကူညီနေတဲ့သဘောမျိုး ဖြစ်ပုံရပါတယ်။ နောက်တယောက်တော့ တိုလီမိုလီလုပ်ပေးရတဲ့ ရဲဘော်ကြီး မူးကလိ။ သူကတော့ ကျနော်တို့ကျောင်းသားတွေနဲ့ အရင်နှီးဆုံးပုဂ္ဂိုလ်ဖြစ်ပြီး နောက်ပိုင်းမှာ NCUB ပို့ဆောင်ရေးဌာနမှာ ဆက်လက် တာဝန်ထမ်းခဲ့ပါတယ် (အခုတော့ သူလည်း နော်ဝေးနိုင်ငံ ရောက်နေပါပြီ) အဲဒီညက ရဲဘော်ကြီး မူးကလိ လက်စွမ်းပြထားတဲ့ ကရင် ငရုတ်သီးထောင်း၊ တာလဘောဟင်းနဲ့ ငါးသေတ္တာသုတ်တို့ကို စားခဲ့ရတယ်လို့ မှတ်မိနေပါတယ်။
ညစာစားပြီးမှာတော့ ပဒိုဘသင်နဲ့ကျနော်တို့ ဆွေးနွေးမှုလုပ်ခဲ့ပါတယ်။ ပဒိုဘသင်စိန်ရဲ့ ပုံကိုတော့ ပရိတ်သတ် အတော်များများ မြင်ဖူးပြီးဖြစ်တဲ့အတွက် အထူးမိတ်ဆက်ပေးစရာ လိုမယ်မထင်ပါ။ ပါဝါမျက်မှန်တလက်ကို တပ်ထားပြီး အမြဲတမ်း ပြုံးရိပ်သန်းနေတဲ့ သူ့မျက်နှာဟာ သူပုန်ခေါင်းဆောင်နဲ့ သိပ်မတူဘဲ ပြည်နယ်အုပ်ချုပ်ရေးမှုးတဦးနဲ့ ပိုတူနေပါတယ်။ စကားပြောရင် လေသံပျော့ပြောင်းပြီး ဆက်ဆံရေး အတော်ကောင်းတဲ့ပုဂ္ဂိုလ်ပါ။ သူဟာ အရင်က ကျနော်တို့စခန်း အခြေစိုက်တဲ့ မင်းသမီးဒေသ မြိတ် ထားဝယ်ခရိုင် ဥက္ကဌအဖြစ် တာဝန်ယူခဲ့သူဖြစ်ပြီး အဲဒီကတဆင့် ဗဟိုအတွင်းရေးမှုးအဖြစ် အရွေးခံရတာလို့ သိရပါတယ်။ မြစ်ဝကျွန်းပေါ်ဇာတိ ပဒိုဘသင်ဟာ ၁၉၄၉ ကတည်းက KNU ထဲဝင် ခဲ့သူဖြစ်ပြီး ၁၉၈၄ မှာ အထွေထွေအတွင်းရေးမှူးအဖြစ် စတင်အရွေးခံရပါတယ်။ ကျနော်တို့တောထဲမှာရှိစဉ် ကျင်းပတဲ့ ၂၀၀၀ ခုနှစ် KNU ညီလာခံမှာတော့ သူဥက္ကဌဖြစ်လာပါတယ်။

စာသင်ခန်းထဲက ပထ၀ီ။ ရုပ်ရှင်ထဲကသူပုန်နဲ့ တကယ့်အခြေနေမတူပါ

သူ့အကြောင်းကိုမှတ်မိနေပေမယ့် သူနဲ့ကျနော်တို့ ဆွေးနွေးတဲ့အကြောင်းရာကိုတော့ မမှတ်မိတော့ပါ။ အကြမ်းအားဖြင့်ကတော့ KNU နယ်မြေကော်မီတီကို ကေအန်ယူက တတ်နိုင်ဆုံး အကူညီပေးဖို့ တင်ပြခဲ့တယ်လို့ ထင်ပါတယ်။ နောက်တနေ့မနက်မှာတော့ သူပုန်ဌာနချုပ်စခန်းကို ကျနော်လေ့လာ ခွင့်ရခဲ့ပါတယ်။ မာနယ်ပလောစခန်း ဆိုတာဟာ တောကြီးမျက်မည်းထဲက လူသူမရောက်နိုင်တဲ့ သူပုန်ဌာနချုပ်စခန်းလို့ မရောက်ဖူးသူတွေက ထင်ကောင်းထင်နိုင်ပေမဲ့ တကယ်ကတော့ အဲဒီလို မဟုတ်ပါဘူး။ မြန်မာနိုင်ငံဘက်ကနေလာဖို့ ခက်ခဲကောင်း ခက်ခဲနိုင်ပေမဲ့ ထိုင်းဘက်ကနေ ကားလမ်း၊ လှေလမ်းတွေနဲ့ အလွယ်တကူ သွားနိုင်တဲ့နေရာဖြစ်ပြီး စစ်ရေးအရ ဗျူဟာမြောက်တဲ့မြေအနေထားရှိပါတယ်။
နောက်ကျောဘက်မှာ သောင်ရင်းမြစ်နဲ့ ထိုင်းနိုင်ငံက တောတန်းတွေ၊ အောက်ဘက်ကို နာရီဝက်နီးပါး ဆင်းသွားမယ်ဆိုရင် သံလွင်နဲ့သောင်ရင်းမြစ်ဆုံ။ အဓိပ္ပာယ်ကတော့ န၀တဘက်ကနေ ကြည်းတပ်တွေ ဒီတိုင်းတက်လာဖို့ မဖြစ်နိုင်အောင် သံလွင်က မာနယ်ပလောကို သဘာဝအရ အကာအကွယ် ပေးထားတဲ့သဘောပါ။
အပေါ်ဘက်မှာတော့ ရှေ့မှာတင်ပြခဲ့တဲ့အတိုင်း နောတခံစစ်ကြောင်းကြီးရှိပါတယ်။ အရှေ့ဘက်မှာတော့ (နေ အ၀င် အထွက်တိုင်းဆိုရင် အနောက်ဘက်လို့ ပြောသင့်ပါတယ်) မြင့်မားလှတဲ့ နော်ဒေးတောင်ကျောကြီးက ကာရံထားတဲ့အတွက် အဲဒီ တောင်ကိုကျော်ပြီး န၀တတပ်တွေ ရုတ်တရက် တက်လာလို့ မရနိုင်ပါဘူး။ အဲဒီတောင်တန်းကြီးနဲ့ သောင်းရင်းမြစ်ကြားက ဘောလုံးကွင်း နှစ်ကွင်းစာလောက်သာရှိတဲ့ မြေပြန့်နေရာလေးမှာ မာနယ်ပလောစခန်းကို ဆောက်ထားတာ ဖြစ်ပါတယ်။



စစ်ရုံးချုပ်သစ်။ နော်ဒေးတောင်တန်းနောက်ခံနဲ့ မြင်နေရတဲ့ မာနယ်ပလောစခန်း
မြင့်မားလှတဲ့ နော်ဒေးတောင်တန်းကိုကျော်ပြီး န၀တဘက်ကနေ လက်နက်ကြီးနဲ့လှမ်းပစ်မယ်ဆိုရင် ကျည်ဟာ မာနာပလောရင်ပြင်ထဲ မကျဘဲ သောင်းရင်းကိုကျော်ပြီး ထိုင်းထဲကျဖို့များပါတယ်။ ၁၉၉၂ စစ်ပွဲတုန်းကဆိုရင် ကျည်အတော်များများ ထိုင်းထဲကျသွားတာက ဒီစခန်းရဲ့ ဗျုဟာမြောက်မှုကို သက်သေပြခဲ့ပါတယ်။ နောက်တခါ လေယဉ်နဲ့ဗုံးကြဲမယ်ဆိုရင်လည်း မြင့်မားတဲ့တောင်တန်းကြီးက ခံနေတဲ့အတွက် သိပ်မလွယ်တဲ့နေရာမျိုးပါ။ ဒါကြောင့်လည်း မာနယ်ပလောဌာနချုပ်ဆိုပြီး နာမည်ကြီးခဲ့တာဖြစ်မယ်လို့ ထင်ပါတယ်။
အဲ … ဘော်လုံးကွင်း ၂ ကွင်းစာလောက်သာရှိတဲ့ ဒီဌာနချုပ်စခန်းကနေ ထိမ်းချုပ်ထားနိုင်တဲ့ နယ်မြေတခုလုံးရဲ့ အခြေနေကို လှမ်းကြည့်လိုက်မယ်ဆိုရင် ပိုတောင် အံ့သြသွားနိုင်ပါတယ်။  အပေါ်ဘက် (မြောက်ဘက်) သံလွင်မြစ်ကြောင်း တလျှောက်ရှိ သံလွင်စခန်း၊ စောထစခန်းကနေ ကရင်နီနယ်စပ်အထိကို တပ်မဟာ ၅ နဲ့ တပ်မဟာ ၂ တို့က ထိန်းချုပ်ထားပါတယ်။ တခါ မာနယ်ပလောရဲ့ နောက်ကျောဖက်ကနေ ပဲခူးတိုင်းအရှေ့ခြမ်းနဲ့ စစ်တောင်းမြစ်ဝှမ်း ဒေသအထိ တပ်မဟာ ၁ နဲ့ ၃ တို့ က လှုပ်ရှားနေပါတယ်။
နောက်တခါ မာနယ်ပလောကနေ တောင်ဘက်ကို သောင်းရင်းမြစ်တလျှောက် ပြန်တက်လာမယ်ဆိုရင် မဲသဝေါတောင်ကို န၀တက ထိမ်းထားတာကလွဲရင် ကလက်ဒေးကနေ ဟိုး တနသာင်္ရီတိုင်း ကော့သောင်အနီးထိ ကျန်နယ်စပ်တကြောလုံးကို ကေအန်ယူက ထိန်းချုပ်ထားဆဲဖြစ်ပါတယ်။ ကလက်ဒေး၊ မယ်လ၊ ရေကျော်၊ ကော့မူရာ၊ သီဘောဘိုး၊ ဝေါလေ၊ ကျိုက်ဒုံ၊ မက္ကသာ စသည်ဖြင့် ဘုရားသုံးဆူဒေသ မွန်ပြည်သစ်ပါတီနယ်မြေအစပ်အထိ ကေအန်ယူ တပ်မဟာ ၇ နဲ့ တပ်မဟာ ၆ တို့က ထိန်းချုပ်ထားပါတယ်။ ဘုရားသုံးဆူဒေသနဲ့ မွန်ပြည်နယ်ကိုကျော်ပြီး ရေဖြူမြို့နယ် နတ်အိမ်တောင်ဒေသကနေ ဟိုးအောက်ဆုံး ကော့သောင်အနီးက ရွာလေလူစခန်းအထိ KNU တပ်မဟာ ၄ က ထိမ်းချုပ်ထားတဲ့အတွက် KNU ထိန်းချုပ်နယ်မြေဟာ တောင်-မြောက် ရှည်မျောမျောနဲ့ အတော်ကျယ် ပြန့်တဲ့သဘောရှိပါတယ်။
တဆက်တည်း KNU နယ်မြေကိုကျော်ပြီး တခြားဒေသတွေကို ကြည့်မယ်ဆိုရင်လည်း စောထစခန်းကနေ သံလွင်မြစ်အရှေ့ဘက်ခြမ်းတကျောလုံးနဲ့ တရုတ်နယ်စပ်တလျှောက်ကိုလည်း ကရင်နီ၊ ရှမ်း၊ ပအို့ဝ်၊ ပလောင်၊ ၀၊ ကချင် တော်လှန်ရေးအဖွဲ့တွေက ထိန်းချုပ်ထားပါတယ်။ ဒါကြောင့် ထိုင်း၊ လာအို၊ တရုတ်၊ အိန္ဒိယ နယ်စပ်တလျှောက်လုံးကို လူမျိုးစုတော်လှန်ရေးအဖွဲ့တွေက ထိန်းချုပ်ထားတဲ့သဘော ဖြစ်ပါတယ်။ တနည်းအားဖြင့်ပြောမယ်ဆိုရင်တော့ ကျနော်တို့ကျောင်းစာအုပ်ထဲမှာ သင်ခဲ့ဖူးတဲ့ ပထ၀ီတွေ မြန်မာ့သမိုင်းတွေနဲ့ ကျနော်တို့ကိုယ်တိုင် အခု မျက်စိနဲ့အမှန်တကယ် မြင်နေရတဲ့ ပထ၀ီတွေ၊ သမိုင်းတွေဟာ အတော့်ကို ကွာခြားနေတာကိုတွေ့ရပါတယ်။
တခါ မြန်မာနိုင်ငံမှာတုန်းက မြင်နေကြ ရုပ်ရှင်တွေထဲက သူပုန်နဲ့ အခု မာနယ်ပလောဌာနချုပ်မှာ တကယ်မြင်နေ။ တွေ့နေရတဲ့သူပုန်တွေဟာလည်း တခြားစီဖြစ်နေပြန်ပါတယ်။ ကြက်ပေါင်ကိုက်လိုက်၊ အရက်သောက်လိုက်၊ မိန်းမကိုဖက်လိုက်နဲ့ လုပ်နေတဲ့ ရုပ်ရှင်ထဲက သူပုန်မျိုး ဒီဒေသမှာ ကျနော်တော့ မတွေ့ဖူးပါဘူး။ ကျနော်တို့ ကျောင်းသားသူပုန်ဆိုရင် အခြေနေက ပိုတောင်ဆိုးပါသေးတယ်။ ကြက်ပေါင်ကိုက်ဖို့နေနေသာ ကြက်ဒူးခေါင်းရိုးကိုတောင် ကီလိုချိန်နဲ့ ၀ယ်မစားနိုင်တဲ့ဘ၀ပါ။
ဒါတွေကို န၀တ၀ါဒဖြန့်ချိရေးဌာနက မြသန်းစံတို့၊ တင်သန်းဦးတို့ကိုယ်တိုင် ရိပ်မိသွားလို့လားတော့ မသိပါဘူး။ ၁၉၈၉-၉၀ ၀န်းကျင်မှာ ထွက်ပေါ်ခဲ့တဲ့ “ပါပီမ” အပါဝင် ၀ါဒဖြန့်ချိရေး ရုပ်ရှင်ကား အတော်များများမှာတော့ သမားရိုးကျ ဇာတ်အိမ်ပုံစံတွေကို ချက်ချင်းပြောင်းပြီး ကျောင်းသားသူပုန်တွေကို ဇာတ်လိုက်နေရာမှာတင်ရိုက်တဲ့ ကားတွေထွက်လာပါတယ်။ အရင်ကဆိုရင် သူပုန်နေရာမှာ လူကြမ်းနဲ့သာ သရုပ်ဆောင်ရမယ်လို့ နားလည်ထားရာကနေ ကျောင်းသားသူပုန်နေရာမှာ နာမည်ကြီးမင်းသားတွေ၊ မင်းသမီးတွေကိုယ်တိုင် ၀င်သရုပ်ဆောင် ရိုက်ကူးပြသခဲ့တာကို ကျနော် သတိထားမိပါတယ်။
အဲဒီမာနယ်ပလောဌာနချုပ်က ပဒိုဘသင်အိမ်မှာတောင် န၀တ ၀ါဒဖြန့်ဌာနရဲ့ ရုပ်ရှင်တွေကို ကျနော်တို့ သူပုန်တွေကိုယ်တိုင် ထိုင်ကြည့်ပြီး လက်ရှိဖြစ်စဉ်နဲ့ န၀တရုပ်ရှင် တခြားစီဖြစ်နေတာကို “ဟား” ခဲ့ ဖူးကြပါတယ်။
 ........................................................................................

သူပုန်ကျောင်းသားတဦးရဲ့ မာရသွန်ခရီး (၁၃)

ဖက်ဒရယ်မြို့တော်နဲ့ ဖက်ဒရယ်တက္ကသိုလ်
မာနယ်ပလော ကွင်းပြင်ထဲကို ပြန်ကြည့်မယ်ဆိုရင်တော့ ဒီလိုတောကြီးမျက်မည်းထဲက သူပုန်ဌာနချုပ်မှာ လျှပ်စစ်မီး ၂၄ နာရီ လင်းနေတယ်ဆိုရင်မြန်မာနိုင်ငံက စာဖတ်ပရိသတ် ယုံပါ့မလားပဲ။ ကျန်တဲ့မြို့တွေကို အမှောင်ချပြီး နေပြည်တော် ဌာနချုပ်တခုတည်း မီးလင်းနေအောင် စီမံထားတာမျိုး မဟုတ်ပါဘူး။ ခုနက မြင့်မားလှတဲ့ နော်ဒေးတောင်တန်းပေါ်ကနေ ကျလာတဲ့ချောင်းရေကို တမံလုပ်ပြီး အဲဒီကနေ ရေအားလျှပ်စစ်နဲ့ မာနယ်ပလော တခွင်လုံးကို လျှပ်စစ်မီး ပေးထားတာပါ။ ဒါ့အပြင် ရေကိုလည်း ပိုက်တွေနဲ့ သွယ်ပေးထားတဲ့အတွက် ရေ၊ မီး အတော်အဆင်ပြေတဲ့နေရာ။ တီဗီစလောင်း လိုင်းပေါင်းစုံရတဲ့ တောတွင်းမြို့တော်လို့ ပြောရင်ရမယ် ထင်ပါတယ်။
မာနယ်ပလော အစည်းဝေးခန်းမကြီးနဲ့ ဘားတိုက်ကြီးရှေ့မှာ ကျင်းပနေတဲ့ အားကစားပွဲတခု
ပဒိုဘသင် အိမ်ကနေ ဘေးပတ်လည်အိမ်တွေကို ကျနော်လေ့လာကြည့်တဲ့အခါ အနီးဆုံးအိမ်က တွဲဘက်အတွင်းရေးမှူး ပဒိုစံလင်းရဲ့အ်ိမ်။ အိမ်ပုံစံချင်းက အတူတူပါပဲ။ ဒီအိမ်ဟာ KNU ဗဟိုစည်းရုံးရေးဌာန ရုံးခန်းလည်းဖြစ်ပြီး နာမည်ကြီး သနူးထူးစာစောင် ထုတ်ဝေတဲ့ နေရာလည်းဖြစ်ပါတယ်။ ရှေ့မှာတင်ပြခဲ့တဲ့အတိုင်း ကွန်ပြူတာခေတ် မဟုတ်သေးတဲ့အတွက် ဖရောင်းစက္ကူကို လက်နှိပ်စက်နဲ့ဖောက်။ မီးချောင်းနဲ့လှိမ့်ပြီး ကော်ပီကူးနေတာကို တွေ့ခဲ့ရပါတယ်။ (နောက်ပိုင်းမှာတော့ ABSDF ဗဟိုရုံးအဖွဲ့မှူးတဦးဖြစ်သူ ဦးရီထွန်း တီထွင်လိုက်တဲ့ ဖရောင်းစက္ကူ ကော်ပီကူး သစ်သားကရိယာလေးတခုက အတော်ခေတ်စားသွားပြီး ကွန်ပြူတာ မပေါ်မီအထိ အဲဒီကရိယာကို တော်လှန်ရေး
နယ်မြေတလုံးမှာ သုံးကြတာကိုတွေ့ရပါတယ်)
ပဒိုစံလင်းအိမ်ရဲ့ရှေ့က ပုံစံတူ အိမ်ကတော့ ပို့ဆောင်ဆက်သွယ်ရေးဌာန၊ နောက်တလုံးက သစ်တောဌာန၊ နောက်ထပ် တလုံးကတော့ ဘဏ္ဍာရေးဌာနဖြစ်ပါတယ်။ အဲဒီရုံးတွေပေါ်ကိုတော့ ကျနော်မတက်ဖြစ်လိုက်ပါ။ အဲဒီရုံးတွေ အလွန်မှာတော့ မဒတ (အမျိုးသားဒီမိုကရေစီတပ်ပေါင်းစု) ရုံး၊ ထီးတခီးဘက်ထွက်တဲ့ ကားလမ်းကြောင်းတခုနဲ့ ချောင်းကူးတံတားတခုရှိပါတယ်။ ကားလမ်းကို ကျော်လိုက်တော့ ဒုဥက္ကဌ ပဒိုသန်းအောင်ရဲ့အိမ် (သူကွန်လွန်ပြီးနောက်မှာ ဗိုလ်မှူးချုပ် မောင်မောင် ဆက်နေတဲ့အိမ်)။ အဲဒီအိမ်ကနေ ညာဘက်ကို လှည့်လိုက်မယ်ဆိုရင် တောင်ပေါ်က ဘုရားကျောင်းဆီတက်တဲ့ လူသွားလမ်းတခု။ ပြီးရင် ကျွန်းသစ်တွေနဲ့ အခိုင်မာဆောက်ထားတဲ့ အကောင်းစား ၂ ထပ် အဆောက်ဦကြီးတခု (အစောပိုင်းမှာ ဒေါက်တာ မာတာရဲ့ KNU နိုင်ငံခြားရေးဌာနရုံးဖြစ်ခဲ့ပြီး နောက်ပိုင်းမှာတော့ ADNSC  [Anti-military Dictatorship National Solidarity Committee]  တပ်ပေါင်းစု ရုံးခန်းဖြစ်လာပါတယ်) ရှိပြီး အဲဒီ ဘေးမှာတော့ သစ်ပင်တန်းတခုရှိပါတယ်။ (အဲဒီကာလကတော့ စစ်ရုံးချုပ်အသစ်ကြီး မဆောက်ရ သေးပါ) သစ်ပင်တန်းအဆုံးမှာတော့ ဗိုလ်ချုပ်မြရဲ့ ကော်သူးလေအစိုးရ သမ္မတအိမ်ဖြူတော် စံအိမ်ကြီးကို တွေ့ရမှာဖြစ်ပါတယ်။ စံအိမ်တော်ဆိုတာ တင်စားပြီးခေါ်ဝေါ်ခြင်း မဟုတ်ပါ။ တကယ့်ကို သားနားတဲ့ ၂ ထပ် တိုက်အိမ် အကြီးကြီးဖြစ်ပါတယ်။
အဲဒီဘေးမှာတော့ ဗိုလ်ချုပ်မြ ရုံးထိုင်တဲ့ ကျွန်းသစ်သားအိမ် ခပ်သေးသေးတလုံး။ ပြီးရင် KNU အမျိုးသမီးအစည်းအရုံးနဲ့ အမျိုးသမီးဆောင်တချို့။ ပြီးရင် ဆံသဆိုင်။ ဆံသဆိုင် နောက်ကျောမှာတော့ ကျနော်တို့ ကျိုးဖိုးတွေအတွက် အရေးကြီးတဲ့ မာနယ်ပလော ဗဟိုစားဖိုဆောင်။ စားဖိုဆောင်ဘေးမှာတော့ ကွန်မန်ဒိုကုန်းဘက်နဲ့ ခွေးအိပ်တောင်ဘက်တက်တဲ့ ကားလမ်းကြောင်းတခု။ ကားလမ်းကို ကျော်ပြီး ဘော်လုံးကွင်းအတိုင်း ပြန်လှည့်မယ်ဆိုရင် တပ်ထောက်ဌာနနဲ့ ဂိုဒေါင်ကြီးတခုကို သောင်းရင်းမြစ် ကမ်းနားစောင်းဘက်မှာ မြင်နိုင်ပါတယ်။ ပြီးရင် ဗိုလ်ချုပ် တာမလာဘော၊ ဗိုလ်ချုပ် ကစယ်ဒို တို့ ရုံးထိုင်တဲ့ စစ်ရုံးချုပ်။ စစ်ရုံးချုပ်ဘေးမှာတော့ ကရင်အမျိုးသား ကာကွယ်ရေးအဖွဲ့ (KNDO) ရုံးခန်း။
အဲဒီစစ်ရုံးချုပ်နဲ့ KNDO ရုံးရှေ့တည့်တည့် ဘောလုံးကွင်းဘေးက ကြီးမားပြီး အရိပ်ကောင်းလှတဲ့ ကုက္ကိူပင်တန်းအောက်မှာတော့ ခန့်ညားစွာနေရာယူထားတဲ့ မာနယ်ပလော အစည်းဝေးခန်းမကြီးကို တွေ့ရမှာဖြစ်ပါတယ်။ အစည်းဝေးခန်း ဘေးမှာတော့ ဧည့်သည်တော် စစ်သည်တွေ တည်းခိုလေ့ရှိတဲ့ ခြေခံရှည် ဘားတိုက်အကောင်းစားတခု (၁၉၉၂ နော်တစစ်ပွဲအပြီးမှာ ကျနော်အပါဝင် တပ်ရင်း ၂၀၁ နဲ့ ၁၀၂ က ရဲဘော်တွေ တည်းခိုခဲ့ဖူးပါတယ်)။ အဲဒီနောက်မှာတော့ နိုင်ငံခြားဧည့်သည်တွေအတွက် သားသားနားနား ဧည့်ရိပ်သာတလုံး။ ပြီးရင်တော့ ပဒိုဘသင်အိမ်ဆီ ပြန်ရောက်ပါတယ်။
မာနယ်ပလောကို ဒုတိယအခေါက် ကျနော်ရောက်သွားတဲ့ အချိန်ကတော့ မတ်လ အစောပိုင်းလို့ ထင်ပါတယ်။ ဒီတခေါက်မှာတော့ ကျနော်တယောက်တည်း။ KNU ကနေ ကျနော်တို့ နယ်မြေကော်မီတီဆီ ထောက်ပံ့နေကြ တလ ထိုင်းဘတ်ငွေ ၃၀၀၀ ကို ထုတ်ယူဖို့ ဥက္ကဌ ကိုကျော်ကျော်က ကျနော့်ကို တာဝန်ပေးလိုက်တာပါ။ အဲဒီငွေ ၃၀၀၀ ရဖို့အရေး ပဒိုဘသင်အိမ်မှာ ထိုင်စောင့်လိုက်ရတာ သီတင်းတပတ်ကြာသွားပါတယ်။
အတွင်းရေးမှူးချုပ်အိမ်မှာ တည်းရတဲ့ ဧည့်သည်ဆိုပေမယ့် ငရုတ်သီးထောင်းနဲ့ပဲ နေ့စဉ်တိုးနေတော့ ကျိုးဖိုးတွေရဲ့ ထုံစံအတိုင်း လဖက်ရည်ဆိုင် ရှာပါတော့တယ်။ အဲဒီမှာ ကျနော်တွေ့လိုက်တဲ့ ဆိုင်ကတော့ သောင်ရင်းမြစ်ရဲ့ အလှပဆုံးရှုခင်းကို အပေါ်စီးကနေ မြင်ခွင့်ရနေတဲ့ ပဒိုဝီးရဲ့ လဖက်ရည်ဆိုင်ပါပဲ။ သောင်ရင်းနဲ့ သံလွင်မြစ်ဆုံ ထိုင်းဘက်ကမ်းရှိ စားသောက်ဆိုင်နဲ့ ဘန်ဂလိုနေရာကလွဲရင် ဒီဒေသတ၀ိုက်မှာ ဒုတိယ ရှုခင်း အကောင်းဆုံးနေရာဟာ ပဒိုဝီးဆိုင်လို့ ထင်ပါတယ်။
သူဆိုင်ရှေ့မှာ ကျွန်းပင်အကြီးကြီးတပင်ရှိပြီး အဲဒီအောက်မှာ သစ်သားတွေနဲ့လုပ်ထားတဲ့ သဘာဝ ထိုင်ခုံတွေကလည်း အတော်ကောင်းပါတယ်။ လဖက်သုတ်တပွဲမှာ၊ ရေနွေအိုး တကရားနဲ့ အဲဒီ သစ်ပင်အောက်က ခုံတန်းမှာထိုင်ပြီး သောင်ရင်းမြစ်ကို ငေးကြည့်ရတဲ့အရသာကို အချိန်ထိ သတိရနေဆဲဖြစ်ပါတယ်။ အဲ … အဲဒီသဘာဝအလှအပ ရှုခင်းတွေအပြင်ပေါ့လေ၊ ကျနော်ခဏခဏ သွားဖြစ်တဲ့ နောက်ထပ် အကြောင်းရင်းတခုကတော့ လှပတဲ့ ဆိုင်ရှင်ကောင်မလေး တယောက်ကြောင့်လို့ ၀န်မခံရင် ကျနော် သတင်းထိမ်ချန်ရာ ကျပါလိမ့်မယ်။
မင်းသမီးခစန်းမှ ၂၀၁ တပ်ရင်း စစ်ကြောင်းတခု သောင်ရင်းမြစ်အတွင်း လှေဖြင့် မာနယ်ပလောစခန်းဆီ လာနေစဉ်
နောက်တနေ့မှာတော့ ရှေ့မှာပြောခဲ့တဲ့ ဗိုလ်ချုပ် မောင်မောင်ရဲ့ အိမ်ဘေးကနေ ထီးတခီးဘက်သွားတဲ့ ကားလမ်းအတိုင်း ဆက်လျှောက်ရင်းနဲ့ မဒတရုံးကို ကျနော်ရောက်သွားပါတယ်။ အဲဒီကာလ ရုံးထိုင်နေသူတွေထဲမှာ ရခိုင်ပါတီက ခိုင်စိုးနိုင်အောင်နဲ့ မွန်ပြည်သစ်ပါတီက နိုင်ဟံသာတို့ကို ကျနော်မှတ်မိနေပါတယ်။ အဲဒီရုံးကို ကျော်ပြီးဆက်သွားတော့ တောင်ကုန်းတခုပေါ်မှာ ဖက်ဒရယ်တက္ကသိုလ်ကို တွေ့ရပါတယ်။
ရန်ကုန်တက္ကသိုလ်၊ မော်လမြိုင်တက္ကသိုလ်နဲ့ ထားဝယ်ကောလိပ်တွေကိုသာ တွေ့ဖူးတဲ့ ကျနော့်အဖို့ ဖက်ဒရယ်တက္ကသိုလ် ဆိုတာဟာ အထူးအဆန်း ဖြစ်နေပါတယ်။ မြင်နေရတဲ့ အဆောက်ဦးက မြေစိုက် တဲတလုံးသာသာ ဖြစ်ပေမယ့် သင်ကြားနေတဲ့ဆရာတွေက နိုင်ငံတကာက ရောက်လာသူတွေ။ သင်ရိုးညွှန်းတမ်းကလည်း နိုင်ငံတကာ တက္ကသိုလ်တွေကနေ သင့်တော်တာတွေကို ကောက်နှုတ်ထားတဲ့ အနှစ်ချုပ်သင်ရိုး။ ကျောင်းသားတွေကတော့ ထီးတခီး အထက ကနေ ၁၂ တန်းအထိ အောင်မြင်ပြီးတဲ့ ကရင်ကျောင်းသားကျောင်းသူလေးတွေ။
ဖက်ဒရယ်တက္ကသိုလ်က အပြန်မှာတော့ ကျနော်တို့ မင်းသမီးခစန်းက ရဲဘော် ၂၀ ဦးအပါဝင် ဘုရားသုံးဆူ၊ သီဘောဘိုးနဲ့ တခြားစခန်းအသီးသီးက DAB စစ်ကြောင်းအတွက် ရောက်နေတဲ့ ABSDF ကျောင်းသား ၁၀၀ ခန့်ကို ရှေ့မှာပြောခဲ့တဲ့ ဧည့်သည်တော် ဘားတိုက်မှာ တွေ့လိုက်ရပါတယ်။ မြန်မာနိုင်ငံ ဒီမိုကရက်တစ် မဟာမိတ်အဖွဲ့ချုပ် (DAB) စစ်ကြောင်းတွေ အလုပ်ဖြစ်ခဲ့တယ်လို့ ဆောင်းပါးအခန်း ၈ မှာ ကျနော်ရေးခဲ့မိပေမယ့် တကယ်ကတော့ ဒီ ပထမအကြိမ် စစ်ကြောင်း အလုပ်မဖြစ်ဘူးလို့ ပြန်သိရပါတယ်။ DAB တွဲဖက်အတွင်းရေးမှူးနဲ့ ABSDF ဗဟို အတွင်းရေးမှူး ကိုသန်းဝင်း ခေါ်ယူခဲ့တဲ့ ကျောင်းသားတပ်ဖွဲ့ ၁၀၀ ၀န်းကျင်ဟာ DAB စစ်ကြောင်းမဖွဲ့နိုင်ဘဲနဲ့ မာနာပလောမှာ သတင်း ၂ ပတ်လောက် သောင်တင်ပြီးနောက် မိခင်စခန်းတွေဆီ ကိုယ့်အစီစဉ်နဲ့ကိုယ် ပြန်ခဲ့ရတယ်လို့ အဲဒီစစ်ကြောင်းမှာ ပါဝင်ခဲ့သူ မင်းသမီးခစန်းမှ ကျောင်းသားတဦးက ဒီဆောင်းပါး ရေးနေစဉ် ကျနော်ကို ပြန်ပြောပြခဲ့ပါတယ်။
နောက်ထပ် ထူးထူးခြားခြား ကျနော်မှတ်မိနေတဲ့ အချက်တခုကတော့ နိုင်ငံခြားသား ဧည့်ရိပ်သာမှာ တည်းတဲ့ အမေရိကန်သူ မီမီမြင့်ဖူးပဲ ဖြစ်ပါတယ်။ အားလုံးငှက်ဖျားရုပ် ပေါက်နေတဲ့ဒေသမှာ အမေရိကားကနေ ရောက်လာတဲ့ မီမီမြင့်ဖူးကို ကျောင်းသားတွေ အလုအယက် စိတ်ဝင်စားတာ အဆန်းတော့ မဟုတ်လောက်ပါဘူး။ ပဒိုဘသင်အိမ်မှာ ကျနော်တည်းနေစဉ် နိုင်ငံခြားရေးဌာနက ဦးအောင်ခင်အပါဝင် ကျောင်းသားခေါင်းဆောင် တချို့နဲ့အတူ မိမိမြင့်ဖူးတို့အဖွဲ့ ရောက်လာတာဖြစ်ပါတယ်။ နောက်ပိုင်းမှာတော့ မီမီမြင့်ဖူးပါတဲ့အဖွဲ့ဟာ DAB ရဲ့ ကိုယ်စားလှယ်အဖြစ်နဲ့ ကုလမဂ္ဂအပါဝင် နိုင်ငံတကာဆီ သွားရောက်ဆွေးနွေးတာတွေ၊ နိုင်ငံခြားဆက်ဆံရေးကို တက်ကြွစွာ ဆောင်ရွက်ခဲ့တာ တွေရှိခဲ့ပါတယ်။ တချိန်တည်းမှာပဲ န၀တ ဘက်ကလည်း မြက်ခင်းသစ်မဂ္ဂဇင်းကနေ ကျောင်းသားတွေနဲ့ မီမီမြင့်ဖူးကို အတုံးလိုက်အတစ်လိုက် ဝေဖန်တာတွေကို ဖတ်ရခဲ့ဖူးပါတယ်။
၁၉၈၉ အစောပိုင်းကာလက သွားခဲ့တဲ့ ကျနော်ရဲ့ မာနယ်ပလော ခရီးစဉ်အတွင်း မဒတရုံးနဲ့ ဖက်ဒရယ်တက္ကသိုလ်ကို ကျော်ပြီး တောင်ဘက်ကို မသွားခဲ့ဖူးပါ။ အဲဒီတောင်ဘက်မှာ ၁၉၉၀ ရွေးကောက်ပွဲနောက်ပိုင်း ဒေါ်အောင်ဆန်းစုကြည်လမ်းနဲ့ NLD-LA ရုံး၊ လူဘောင်သစ်ပါတီရုံး၊ ရဟန်းပျိုများသမဂ္ဂရုံး၊ NCG ရုံးတွေ ရှိပါတယ်။ အလားတူ ဆံသဆိုင်နဲ့ ထမင်းရုံကို ကျော်ပြီး မြောက်ဘက်ကိုလည်း မသွားခဲ့ဖူးပါ။ မြောက်ဘက်မှာ ၁၉၉၀ နောက်ပိုင်း ABSDF ဌာနချုပ်ရုံးရှိရာ လောကွာလူကုန်း၊ ကိုမိုးသီးဇွန်တို့ ဗဟိုဌာနချုပ်တောင်ကုန်း၊ ၂၀၈ တောင်ကုန်းနဲ့ ကွန်မန်ဒိုကုန်းတို့ ရှိပါတယ်။ ဒါကြောင့် ကျနော်ရောက်ဖူးတဲ့ မာနယ်ပုလောဆိုတာဟာ ဘောလုံးကွင်းဝန်းကျင်ရှိ ရုံးခန်းတ၀ိုက် သက်သက်မျှသာဖြစ်ခဲ့ပါတယ်။
(မှတ်ချက် ။         ။ ဒါဟာ ၁၉၈၉ ခရီးစဉ်မျှသာဖြစ်ပြီး ၁၉၉၂ မာနယ်ပလောတိုက်ပွဲ စစ်ကူခရီးစဉ်၊ ၁၉၉၃ ABSDF ပြန်လည်ပေါင်းစည်း ရေးဆွေးနွေးပွဲ မာနယ်ပုလောခရီးစဉ်တွေကိုတော့ နောက်ပိုင်းမှာ ဆက်လက်ဖော်ပြပါမယ်)

0 comments:

Post a Comment

Share

Twitter Delicious Facebook Digg Stumbleupon Favorites More